Pene 9

Te puai e noaa mai na roto i te tiaturiraa i te tia-faahou-raa

1. Eaha te tiaturiraa faahiahia ta te tia-faahou-raa e horoa maira?

 AITA anaˈe e tia-faahou-raa, aita atoa ïa e tiaturiraa e e ora faahou mai â te mau taata pohe. I roto râ i to ˈna aroha faito ore, ua opua Iehova e horoa mai no te mau miria taata pohe i te ravea faahiahia mau e fanaˈo ai ratou i te ora mure ore. Tei roto atoa ˈtura hoi ia tatou iho i te tiaturiraa taa ê faahiahia mau oia hoi e farerei â tatou i tei herehia e tatou ra e teie e taoto nei i roto i te pohe. — Hiˈo Mareko 5:35, 41, 42; Ohipa 9:36-41.

2. a) Eaha te faufaaraa o te tia-faahou-raa i roto i te tupuraa o te opuaraa a Iehova? b) Afea te tiaturiraa o te tia-faahou-raa e riro taa ê ai ei faaitoitoraa mau?

² Na roto i te tia-faahou-raa, e nehenehe o Iehova, ma te ore to ˈna mau tavini haapao maitai e mauiui e a muri noa ˈtu, e vaiiho ia Satani ia faatae i te hopea i ta ˈna pariraa haavare e te ino mau, oia hoi: “E riro hoi ta te taata atoa ra ei hoo i to ˈna ora.” (Ioba 2:4). Na roto atoa i to ˈna tia-faahou-raa mai te pohe mai i nehenehe ai o Iesu e faaite i te faufaa o to ˈna tusia taata i mua i te terono o to ˈna Metua i nia i te raˈi, maoti hoi teie tusia e nehenehe ai e noaa ia tatou te ora. E na roto â i te tia-faahou-raa e nehenehe ai te mau kerisetiano feia aiˈa e te Mesia e tahoê atu e o ˈna i roto i te Basileia i nia i te raˈi. E no tatou paatoa, te feia faaroo, ua riro te tiaturiraa o te tia-faahou-raa ei puai rahi aˈe i tei matauhia, ia faaruru anaˈe tatou i te mau tamataraa o te nehenehe e haapohe ia tatou.

 Te hoê haapiiraa tumu no te tiaturiraa kerisetiano

3. a) E riro te tia-faahou-raa ei “parau tumu” i roto i tei hea auraa? b) Eaha te manaˈo o te rahiraa o te taata o teie nei ao i te tia-faahou-raa?

³ Mai ta tatou e taio nei i roto i te Hebera 6:1, 2, ua riro te tia-faahou-raa ei “parau tumu”, ei hoê o te mau niu o te faaroo, e nehenehe ai tatou e riro ei mau kerisetiano paari. Aita râ teie manaˈo i roto i te feruriraa o te mau taata e rave rahi. I te mea hoi e aita e huru pae varua i roto ia ratou, te rahi noa ˈtura ïa te taata o te imi nei i te mau mea e navenave ai ra i roto i to ratou oraraa. No ratou, aita ˈtu mea mau maoti râ teie oraraa nei (Kor. 1, 15:32). Te feia melo no te mau haapaoraa matauhia, to roto aore ra to rapae i te amuiraa faaroo kerisetiano, te tiaturi nei ratou e e nephe pohe ore to ratou e te haafaufaa ore ra hoi te reira i te tia-faahou-raa. Te taata e tamata i te faatuea i teie na manaˈo e piti nei, e feaa roa ïa oia e eita oia e itoito i roto i to ˈna iho tiaturiraa. Nafea tatou ia faaitoito i te feia tei ineine i te faaroo mai? — Ohi. 17:32.

4. a) Na mua ˈˈe te hoê taata e ite papu ai i te auraa o te parau o te tia-faahou-raa, eaha te tia ia aparau atu e o ˈna? b) Eaha te mau irava ta outou e rave no te faataa ˈtu ia ˈna e eaha te nephe [âme] e eaha te huru o te mau taata pohe? c) Eaha te tia ia rave mai te peu e te faaohipa ra te hoê taata i te hoê iritiraa o te Bibilia o te haapouri rii ra i te mau parau mau e faahitihia ra e te mau irava?

⁴ Na mua ˈˈe te hoê taata e faariro ai i te tia-faahou-raa ei ohipa faahiahia mau, e tia ia ˈna ia ite e eaha te nephe e mai te aha te huru te mau taata pohe. E pinepine te tahi tau irava i te navai no te haamaramarama i te hoê taata tei hinaaro i te parau mau, no nia i taua mau tumu parau nei (Gen. 2:7; Ezek. 18:4; Sal. 146:3, 4). Oia mau, te haapouri nei te tahi mau iritiraa bibilia apî nei i taua mau parau mau ra. No reira, e mea maitai ia hiˈopoahia te mau parau mai tei papaihia i roto i te reo tumu o te Bibilia.

5. Nafea outou ia tauturu i teie huru taata ia ite oia e eaha te nephe?

⁵ Mea faufaa roa ïa te Tatararaa a te ao apî no te  reira mau ohipa, no te mea te faataa ra oia i te parau hebera ra néphésh e te parau heleni ra psukhê na roto i te hoê â parau oia hoi “nephe” [“âme”]. Taa ê atu i te reira, i roto i to ˈna mau api faataaraa, te vai ra te hoê tabula irava tei reira te faaiteraahia taua na parau e piti ra. I roto i te tahi mau iritiraa apî nei, aita teie na parau tumu e piti i iriti-noa-hia na roto i te parau ra “nephe” [“âme”], ua iriti-atoa-hia râ i te mau parau e “mea-poiete-hia”, “mea ora”, “taata” e “ora”. “To ˈu néphésh” e nehenehe ïa e iritihia i te parau ra “o vau” e “to oe néphésh”, “o oe” ïa. E tauturu mai te faaauraa o teie mau Bibilia e te tahi mau iritiraa tahito aˈe aore ra e te Tatararaa o te ao apî, i te hoê taata haapii aau mehara ia taa maitai e te mau parau tumu i iritihia na roto i te parau ra “nephe” [“âme”] te faataa ra ïa i te parau no 1) te mau taata, 2) te mau animala e 3) te ora e vai ra i roto i te tahi e te tahi. Aita roa ˈtu râ teie mau parau tumu e faataa ra i te manaˈo e, eita e itehia te “nephe” [“âme”], eita oia e nehenehe e tapeahia e e nehenehe oia e faarue i te tino i te poheraa no te ora ˈtu i te tahi vahi ê.

6. a) No te aha te tahi mau iritiraa apî nei i haafifi ai i te feia taio no nia i te mau parau ra Schéol, Hade e Gehena? b) Nafea outou ia faataa maoti te Bibilia e eaha te huru o te taata pohe e vai ra i roto i te Schéol, te Hade e te Gehena?

⁶ Mea tano atoa te Tatararaa a te ao apî ia faaohipa oia i te parau ra Schéol no te iriti i te parau hebera ra she’ôl, i te parau Hadès [Hade] no te iriti i te parau heleni ra hadês e Géhenne [Gehena] no te parau ra géénna. Te haafeaa nei te tahi mau iritiraa apî nei aore ra te mau buka tatararaa bibilia, i te manaˈo o te taata taio na roto i te iritiraa i teie na parau e PITI oia hoi hadês e géénna, na roto i te parau ra “po auahi” a huri noa atoa ˈtu ai na parau e piti nei, she’ôl e hadês, na roto i te parau ra “apoo taata pohe” e “faaearaa o te feia pohe”. Mai te peu e e hinaarohia, e nehenehe e faaite e te Schéol ra o te Hade iho â ïa, na roto i te faaauraa e rave rahi mau iritiraa (Sal. 16:10; Ohi. 2:27). Te faaite papu mai nei te Bibilia e ua taaihia te Schéol aore ra te Hade, oia hoi te apoo tanuraa o te mau taata atoa, i te  pohe eiaha râ i te ora (Sal. 89:48; Apo. 20:13). Te parau atoa ra oia e e nehenehe e hoˈi faahou mai i te ora na roto i te tia-faahou-raa (Ioba 14:13; Ohi. 2:31). Area te feia e haere i roto i te Gehena ra, aita ïa hoê aˈe tiaturiraa faahou to ratou no te ora faahou mai e aita e parauhia ra e e ora ˈtu te nephe [âme] i roto i taua vahi ra. — Mat. 18:9; 10:28.

7. Ia taa-maitai-hia oia, nafea te tiaturiraa no nia i te tia-faahou-raa ia taui i te huru o te mau ohipa e te mau manaˈo o te hoê taata?

⁷ Ia matara maitai anaˈe taua mau tumu parau ra, e auraa mau atura ïa to te pohe e to te tia-faahou-raa o te Mesia. E nehenehe atura ïa tatou e tauturu i te taata e faaroo maira ia ite e eaha te auraa o te tia-faahou-raa no ˈna, e ia haapopou i te aroha ta Iehova i faaite mai na roto i taua faanahoraa faahiahia ra. E nehenehe te feia e oto nei no te mea e ua pohe tei herehia e ratou e oaoa na roto i te tiaturiraa e e farerei faahou â ratou i roto i te faanahoraa apî o te mau mea i haapaohia e te Atua. Ua papu i te mau kerisetiano o te senekele matamua e ua riro te tia-faahou-raa o Iesu Mesia ei ofai tihi no te faaroo kerisetiano. Ua faaite ratou ma te itoito, i te parau no te tia-faahou-raa o Iesu e te tiaturiraa ta te reira e faatupu. I teie atoa mahana, te faaite nei te feia e oaoa nei i teie huru tiaturiraa i teie parau mau faufaa, i to ratou mau taata-tupu. — Ohi. 5:30-32; 10:40-43; 13:32-39; 17:31.

Te faaohiparaa i te ‘taviri o Hade’

8. Eaha te auraa no te mau kerisetiano faatavaihia i te varua moˈa, ia faaohipa o Iesu i te “taviri o te pohe e no Hade”?

⁸ Te feia atoa i maitihia no te tahoê atu i te Mesia i roto i to ˈna Basileia i nia i te raˈi, e pohe atoa hoi ratou. Ua taa maitai râ ia ratou i te auraa o te mau parau tamǎrû ta Iesu i faahiti atu i te aposetolo Ioane i te na ôraa e: “Pohe noa ˈi au: e inaha, e tia vau i te oraraa e a muri noa ˈtu, Amene; e tei ia ˈu te taviri o te pohe e to hade.” (Apo. 1:18). Eaha ïa ta ˈna e hinaaro ra e parau? Te huti nei oia i te manaˈo i nia i to ˈna iho huru. Ua pohe atoa hoi oia, aita râ te Atua i faarue ia ˈna i roto ia Hade.  I te toru o te mahana, ua faatia faahou mai Iehova iho ia ˈna no te oraraa pae varua e ua horoa ˈtu oia no ˈna i te ora e ore e pohe faahou. Hau atu, ua horoa ˈtu oia ia ˈna ra i te “taviri o te pohe e to Hade” ia nehenehe oia iho e faaora mai i te tahi atu mau mea i poietehia ra mai roto mai i te apoo tanuraa taata pohe e i te mau faahopearaa o te hara a Adamu. I te mea hoi e tei ia ˈna ra taua mau taviri ra, e nehenehe ïa ta Iesu e faatia faahou mai i ta ˈna mau pǐpǐ haapao maitai mai roto mai i te feia pohe. Ia faatia faahou mai oia i te mau melo o ta ˈna ekalesia tei faatavaihia i te varua moˈa, e horoa ˈtu ai oia no ratou i te oraraa i nia i te raˈi ma te ore roa ˈtu e pohe faahou, mai ta to ˈna Metua i na reira no ˈna. — Roma 6:5; Phil. 3:20, 21.

9. Afea ra te tupuraa te tia-faahou-raa o te mau kerisetiano haapao maitai tei faatavaihia i te varua moˈa?

⁹ Afea râ te mau kerisetiano haapao maitai faatavaihia e fanaˈo ai i taua faatia-faahou-raa ra? Ua haamata aˈena taua faatia-faahou-raa ra. Oia mau, ua faaite te aposetolo Paulo e e faatia-faahou-hia taua mau kerisetiano ra i te ‘tau te Mesia e hoˈi mai ai’, tau tei haamata i te matahiti 1914 ra (Kor. 1, 15:23). Eita ïa te mau kerisetiano faatavaihia tei faaoti i ta ratou hororaa i nia i te fenua nei e tiai faahou i roto i te pohe i te hoˈiraa mai to ratou Fatu. E faatiahia ratou ei varua i to ratou iho â poheraa; e “faahuru-ê-hia” ratou “eita e mahia, mai te amoraa mata ra”. E ite atu ratou i te hoê oaoa faito ore mau, “no te mea e pee hoi ta ratou ohipa ia ratou”. — Kor. 1, 15:51, 52; Apo. 14:13.

10. Eaha ˈtu â te tahi faatia-faahou-raa, e afea te reira e haamata ˈi?

¹⁰ E ere o ratou anaˈe te faatia-faahou-hia mai. I te mea hoi e to ratou te faatiaraa “matamua”, na te reira e faaite mai e te vai ra te tahi i muri mai (Apo. 20:6). Te mau taata e fanaˈo atu i teie tia-faahou-raa i muri mai, e oaoa ïa ratou i te ora e a muri noa ˈtu i nia i te fenua tei faarirohia ei paradaiso. Afea ïa te reira e tupu ai? Te faaite mai nei te buka Apokalupo e i muri aˈe ïa i te mouraa ‘te fenua e te raˈi’ o te faanahoraa o te mau mea ino nei. Ua fatata roa te hopea o taua faanahoraa  ra, e i muri iho, i te taime i haapaohia e te Atua e haamata ˈi te faatia-faahou-raa i nia i te fenua nei. — Apo. 20:11, 12.

11. O vai ma to roto i te mau tavini haapao maitai o te faatiahia mai no te ora i nia i te fenua nei, e no te aha te reira e riro ai ei ohipa putapû mau?

¹¹ O vai te fanaˈo atu i te reira? O te mau tavini ïa a Iehova no te tau tahito ra. I rotopu ia ratou, te vai ra te mau taata, oia hoi maoti to ratou tiaturiraa i te tia-faahou-raa, “aita ratou i rave i te ora”; aita ratou i hinaaro e taiva i to ratou Atua e ore atu ai ratou e roohia i te pohe hamani ino (Heb. 11:35). Auê ïa te oaoa e ia haamatau atu ia ratou e ia faaroo atu ia ratou ia faatia mai i te tahi mau huru tupuraa o ta te Bibilia i faaite poto noa mai! Tei reira atoa o Abela, te ite haapao maitai matamua a Iehova; o Enoha e o Noa, tei poro tuutuu ore i te parau faaararaa a te Atua na mua ˈˈe i te diluvi; o Aberahama, tei farii i te mau melahi; o Mose, te arai i horoahia mai ai te Ture i te mouˈa ra o Sinai; te mau peropheta itoito mai ia Ieremia, tei ite i te haamouraahia o Ierusalema i te matahiti 607 hou to tatou tau; e o Ioane Bapetizo, tei faaroo i te Atua i te parauraa mai ia Iesu e ‘ta ˈu Tamaiti’. E tei reira atoa te mau kerisetiano haapao maitai atoa tei pohe i roto i te mau mahana hopea o teie faanahoraa o te mau mea nei. — Heb. 11:4-38; Mat. 11:11.

12. a) E hia rahiraa taata pohe i roto ia Hade o te faatiahia mai? b) O vai hoi te fanaˈo i taua faatia-faahou-raa ra, e no te aha?

¹² E faatia-atoa-hia mai te tahi atu â mau kerisetiano i te tau i haapaohia ra. Te faaite mai nei te hoê orama a te aposetolo Ioane e mea nafea o Iesu ia faaohipa i ‘te mau taviri o Hade’ no te maitai o te huitaata nei. Ua ite hoi o Ioane i te ‘huriraahia o Hade i roto i te auahi’. Eaha te auraa o te reira? E haamou-roa-hia ïa oia, aita faahou oia no te mea e ore roa oia. No reira, taa ê atu i te mau tavini haapao maitai a Iehova, na roto i to ˈna aroha, e faatia atoa mai Iesu i te mau taata parau-tia ore mai roto mai ia Hade aore ra Schéol. Eita hoê noa ˈˈe o ratou e faatiahia mai e ia oti, a haapohe-oioi-hia ˈtu ai. Eita, i roto i te mau huru tupuraa tia i raro aˈe i te  faatereraa a te Basileia o te Atua, e tauturuhia ratou ia nehenehe ratou e taui i to ratou oraraa ia au i te mau eˈa o Iehova. Te faaite mai nei te orama ia tatou e e heheuhia “te buka ora”, e e nehenehe te feia i faatiahia mai e ite i to ratou iˈoa i te papairaahia i roto i taua buka ra. “E haavahia ihora taua feia i pohe ra (...) i ta ratou ohipa” e rave i muri aˈe i te tia-faahou-raa (Apo. 20:12-14; Ohi. 24:15). Ia hiˈohia te reira i te pae hopea, e nehenehe ïa to ratou tia-faahou-raa e riro mai “ei tia-faahou-raa no te ora” eiaha noa râ “ei tia-faahou-raa no te haavaraa [no te pohe]”. — Ioane 5:28, 29.

13. a) O vai te ore e faatiahia mai? b) Eaha te ohipa ta te iteraa tatou i taua parau mau ra e rave i nia i to tatou oraraa?

¹³ Oia mau, eita te taatoaraa o te taata i ora na i tera e tera tau e faatia-pauroa-hia mai. Ua rave te tahi pae i te hara o te ore e nehenehe e faaorehia. Te mau taata tei haapohehia i roto i te “ati rahi” e fatata mai nei, e roohia ïa ratou i te haamouraa mure ore (Mat. 12:31, 32; 23:33; 24:21, 22; 25:41, 46; Tes. 2, 1:6-9). E faaite o Iehova i to ˈna aroha rahi na roto i te faatiaraa mai i te feia pohe i roto ia Hade, eiaha râ tatou e haafaufaa ore i to tatou haerea i roto i to tatou oraraa i teie mahana. Eiaha, ia turai râ te reira ia tatou ia faaite i to tatou mauruuru i te Atua no taua aroha faito ore no ˈna ra.

Faaitoitohia maoti te tiaturiraa o te tia-faahou-raa

14. Nafea te hoê taata tei fatata i te pohe e nehenehe ai e huti mai i te puai i roto i te tia-faahou-raa?

¹⁴ Te feia e tiaturi i te tia-faahou-raa, e noaa ïa to ratou puai rahi. Ia tae i te ruauraa, eita ta ratou e nehenehe e faataere roa ˈtu i te pohe, noa ˈtu eaha te mau huru ravea rapaauraa atoa e faaohipahia (Kohel. 8:8). Mai te peu râ e ua tamau noa ratou i te rave ma te itoito i te ohipa a te Fatu e ua tavini ratou ma te haapao maitai i roto i ta ˈna faanahonahoraa, e nehenehe ïa ratou e hiˈo i te oraraa no a muri atu ma te peapea ore. Ua ite ratou e, na roto i te tia-faahou-raa i te tau i haapaohia e te Atua, e ora faahou mai ratou. Auê ïa huru oraraa e! Ia au i te parau a te aposetolo  Paulo, o te “ora mure ore” ïa. — Tim. 1, 6:19; Kor. 1, 15:58; Heb. 6:10-12.

15. Eaha te nehenehe e tauturu mai ia tatou ia ore e taiva ia Iehova, noa ˈtu e e haamǎtaˈu mai te feia hamani ino e haapohe ia tatou?

¹⁵ Te mea e faaitoito mai ia tatou, e ere noa ïa te iteraa e te vai ra te hoê tia-faahou-raa, ia ite atoa râ tatou o vai mau na te Tumu o te tia-faahou-raa. Na te reira e turai ia tatou ia ore e taiva ia ˈna, noa ˈtu e e haamǎtaˈu mai te feia hamani ino e haapohe ia tatou. Mea maoro i teie nei to Satani faaohipa-noa-raa i te haamǎtaˈuraa o te pohe, no te haavî i te mau taata. Aita o Iesu, i fati i taua huru haamǎtaˈuraa ra; aita oia i taiva ia Iehova e tae noa ˈtu i to ˈna poheraa. Na roto râ i to ˈna pohe e tae noa ˈtu i te mau faahopearaa oaoa o taua pohe ra, ua horoa ˈtu oia no te tahi pae i te ravea e tiamâ ai ratou i taua mǎtaˈu ra (Heb. 2:14, 15). Na roto i to ratou tiaturi i taua ravea e ora ai ra, i tui ai te roo o ta ˈna mau pǐpǐ mau ei mau taata haapao maitai. Noa ˈtu te mau tamataraa paari mau, ua faaite papu ratou e mea here aˈe na ratou ia Iehova ‘i to ratou iho ora’ (Apo. 12:11). Ua faaite ratou i to ratou paari e aita ratou i imi i te ravea no te faaora ia ratou iho na roto i te faarueraa i te mau faaueraa tumu kerisetiano, o te riro hoi i te faaere ia ratou i to ratou tiaturiraa no te ora mure ore (Luka 9:24, 25). Mai te reira atoa anei to tatou faaroo? E noaa ia outou te reira mai te peu e mea here mau na outou o Iehova e mai te peu e e haafaufaa mau outou i te tiaturiraa no nia i te tia-faahou-raa.

Ei haapoto-noa-raa

● No te aha e tia na mua roa ia ite e eaha te nephe e eaha te huru o te mau taata pohe na mua ˈˈe e taa maitai ai i te parau no te tia-faahou-raa?

● O vai ma te faatiahia mai mai te pohe mai? No te aha taua ite ra e haaputapû ai ia tatou?

● Mea nafea te tiaturiraa o te tia-faahou-raa ia faaitoito mai ia tatou?

[Uiraa haapiiraa]