Pene 1

Te tahoêraa i roto i te haamoriraa — Eaha to ˈna auraa no outou?

1, 2. a) Nafea e itehia ˈi te autahoêraa o te haamoriraa mau e tupu ra hoi i to tatou nei tau? b) Mea nafea ta te Bibilia faataaraa mai i taua ohipa ra?

 TE ITEHIA ra i roto i te ao nei i te hoê tahoêraa faahiahia roa i te pae no te haamoriraa o te haaputuputu ra i te mau taata no te mau nunaa atoa, te mau opu e te mau reo atoa. Teie râ, e ere roa ˈtu taua tahoêraa ra i te farii-noa-raa i tera aore ra tera haapiiraa e eita hoi no nia i te farii i te tahi mau peu ta te Parau a te Atua e opani ra. Nafea ïa te reira e tupu ai? No te mea, te farii nei teie mau taata huru rau atoa, ia Iehova ei Atua hoê mau no ratou e ua ineine ratou i te faaau i to ratou oraraa i to ˈna mau eˈa tia. — Hiˈo Apokalupo 15:3, 4.

² Te faatupu ra teie haaputuputuraa i te hoê parau tohu i papaihia e te peropheta ra o Mika a 2 700 matahiti i teie nei. No nia “i te mau mahana hopea”, ua papai oia e: “E rave rahi te fenua e haere, a parau ai e, E haere mai, e haere tatou i nia i te mouˈa o Iehova, i te hiero o te Atua o Iakoba; e na ˈna e haapii mai ia tatou i ta ˈna haapaoraa, e haere tatou na te eˈa ta ˈna e faaite maira.” (Mika 4:1, 2). Te tupu ra anei taua mau parau ra i teie mahana?

3, 4. a) Te fariu tia nei te mau “nunaa” i nia ia Iehova i roto i tei hea auraa? b) Eaha te mau uiraa te tia ia tatou ia uiui?

³ E parau mau, aita e itehia nei pauroa te mau “nunaa” i te haereraa mai i te fare varua o Iehova, i reira oia e haamorihia ˈi, te haaputuputu nei râ te mau tane e te mau vahine no roto mai i te mau nunaa atoa,  i taua vahi ra. Ua putapû roa to ratou mafatu i to ratou iteraa i te opuaraa aroha rahi a te Atua ra o Iehova e tae noa ˈtu to ˈna mau huru maitai faahiahia mau. No reira, ma te haehaa, te faaitoito nei ratou i te haapii i te mau mea o ta ˈna e titau maira ia ratou. Ua tuea ta ratou pure e ta Davida, te hoê taata faaroo, tei ani atu i te Atua e: “E haapii mai oe ia ˈu ia rave au i to oe ra hinaaro; o oe hoi tau Atua.” — Sal. 143:10.

⁴ Tei roto anei outou i teie nahoa rahi feia haamori ia Iehova? Te haapapu ra anei to outou huru i nia i te haapiiraa i haapiihia ˈtu ia outou e te farii ra outou e o Iehova iho te Tumu o te reira? Mai te aha ta outou huru ‘haere na nia i te eˈa ta ˈna i faaite maira’?

E tupu mau taua tahoêraa ra

5. a) Nafea te autahoêraa i roto i te haamoriraa e tupu mau ai? b) No te aha e mea rû ia riro tatou i teie iho â mahana ei taata haamori ia Iehova, e nafea tatou e nehenehe ai e tauturu i te tahi atu mau taata ia na reira atoa?

⁵ Te opua ra Iehova e tahoê i te taatoaraa o te mau mea maramarama ta ˈna i poiete i roto i te hoê anaˈe iho haamoriraa; te hinaaro ra oia eiaha roa te hoê o ta ˈna mau mea i poiete ia riro atu i te haavare aore ra ia perehahu noa no te mea aita ratou i ite i te auraa mau o te oraraa. Te tiai rû nei ïa tatou i te mahana te taatoaraa o te mau taata e haamaitai ai i te Atua hoê mau ra (Sal. 103:19-22). Na mua ˈˈe râ te reira e tupu ai, e tia i te Atua ia tamâ i te mau mea o ta ˈna i poiete na roto i te haamouraa i te feia e patoi ra ma te teoteo i ta ˈna faatereraa aroha rahi e o teie e tamau noâ i te haafifi i te oraraa o vetahi ê. I roto râ i to ˈna aroha rahi, te faaite atea mai nei oia i ta ˈna mau opuaraa, ia nehenehe te mau taata noa ˈtu e eaha te vahi ratou e faaea ˈi, ia taui i to ratou huru. No reira ïa, teie pii rû i roto i te ao nei e na ô ra e: “A mǎtaˈu i te Atua, e faahanahana ˈtu ia ˈna; ua tae hoi i te hora faautuaraa na ˈna ra: e haamori outou ia ˈna, i tei hamani i te raˈi, e te fenua, e te tai, e te mau pape pihaa ra.” (Apo. 14:6, 7). Ua farii anei outou i teie titauraa? Mai te peu e e, e nehenehe ta outou, i teie nei iho â, e apiti atu i te  faanahoraa a Iehova no te tauturu i te tahi atu mau taata ia na reira atoa.

6. I muri aˈe i to tatou iteraa i te mau haapiiraa tumu a te Bibilia, eaha te mau tutavaraa te tia mau ia tatou ia rave?

⁶ Aita to roto i te opuaraa a te Atua te faaôraa mai i roto i ta ˈna faanahoraa te mau taata e parau ra e te tiaturi ra ratou ia ˈna e e hinaaro ra e ora ˈtu i roto i te paradaiso, a tamau noa ˈi i te imi ma te miimii i te maitai no ratou iho. Te hinaaro nei râ oia ia noaa i te mau taata atoa “te ite i to ˈna ra hinaaro” mau e ia itehia te reira i roto i to ratou oraraa (Kol. 1:9, 10). Ia ite anaˈe ratou i te haapiiraa tumu o te Bibilia, e hinaaro iho â ïa te mau kerisetiano mafatu mehara e haere i mua ei kerisetiano paari; e hinaaro ratou e ite hau atu â ia Iehova, e faarahi e e faahohonu i to ratou ite no nia i ta ˈna Parau e e faaohipa papu maitai i te reira i roto i to ratou oraraa. Te faaitoito nei ratou i te pee i to ratou Metua i te raˈi ra na roto i te faaiteraa i to ˈna mau huru maitai e te hiˈoraa i te mau mea mai ta ˈna e hiˈo ra. E turai te reira ia ratou ia maimi e e nafea ratou ia rave hau atu â i te ohipa ta te Atua e hinaaro ra e ia tupu i teie mahana i nia i te fenua atoa nei. Te na reira atoa ra anei outou? — Eph. 5:1; Heb. 5:12 e tae atu i te 6:3; Tim. 1, 4:15.

7. Eaha te tia ia rave no te faatupu i te autahoêraa i roto i te haamoriraa, e nafea te reira e tupu ai?

⁷ Te faaite maira te Bibilia e e tia i te feia e tavini nei ia Iehova ia riro ei nunaa tahoê (Eph. 4:1-3). Ia itehia ïa teie autahoêraa i teie nei iho â, noa ˈtu e te ora nei tatou i roto i te hoê ao amahamaha e e tia ia tatou ia aro tamau i to tatou iho mau huru tia ore. Ua pure aˈera o Iesu ma te aau tae mau ia hoê ta ˈna mau pǐpǐ, e ia fanaˈo ratou i te hoê autahoêraa mau. Eaha ïa te auraa? A tahi, ia atuatu ïa ratou paatoa i te mau auraa maitatai e o Iehova e ta ˈna Tamaiti, e te piti ra, ia riro ïa ratou ei hoê i rotopu ia ratou iho (Ioane 17:20, 21). E noaa ia ratou te reira i teie mahana mai te peu e e faaohipa ratou i te haapiiraa i noaa mai ia ratou i roto i te “fare” o Iehova.

 Te mau tumu o te tahoêraa

8. a) Eaha ta tatou e faahotu ra mai te peu e e faaohipa tatou i te Bibilia no te tuatapapa tatou iho i te tahi mau tumu parau e tano no tatou? b) A pahono noa ˈtu ai i te mau uiraa i nia nei, a tuatapapa i te mau tumu taa ê o te faaitoito i te autahoêraa kerisetiano.

⁸ Ua faaitehia te mau tumu faufaa o te tahoêraa i raro nei. Ia taio anaˈe outou i te mau uiraa no nia i teie mau tumu taa ê, a feruri e a uiui outou iho e nafea râ te manaˈo i vauvauhia mai e ohipa ˈi i nia i to outou mau auraa e o Iehova e to outou mau taeae kerisetiano. Ia feruri maitai outou i taua mau manaˈo ra ia au i te mau irava i faahitihia, e rahi atu â ïa to outou aravihi i te pae feruriraa e e taa papu ïa ia outou i te auraa o te mau ohipa ia au i te hinaaro o te Atua, e mau huru maitai anaˈe hoi teie ta tatou paatoa e hinaaro rahi nei (Mas. 5:1, 2; Phil. 1:9-11). A hiˈopoa na i taua mau tumu nei te tahi i muri aˈe i te tahi:

 1) Te haamori nei tatou paatoa ia Iehova e te farii nei tatou i to ˈna tiaraa no te haamau i te mau ture no nia i te mea maitai e te mea ino.

 Eaha to te Atua manaˈo mai te peu e e opua maite tatou eiaha e haapao i ta ˈna mau aˈoraa no nia i te hoê tumu parau o ta tatou i manaˈo e e ere i te mea faufaa roa (Luka 16:10; hiˈo Malaki 1:6-8)?

 Mai te peu e eita outou e haapao tamau i te mau faaueraa a Iehova, eita anei te tahi mau taata e fifi (hiˈo Roma 5:12; Iosua 7:20-26; Te mau Arii 1, 14:16)?

 2) Noa ˈtu e eaha te vahi ta tatou e faaea nei, tei pihai iho te Parau a te Atua ia tatou ei aratai ia tatou.

 Ia rave anaˈe tatou i te hoê faaotiraa, eaha te fifi e noaa mai ia tatou mai te peu e e rave tatou i te mea o ta tatou e “manaˈo” ra e mea tia (Ier. 17:9; Mas. 14:12)?

 Mai te peu e aita tatou e papu ra eaha te aˈoraa ta te Bibilia e horoa ra no nia i te hoê ohipa, eaha te tia ia tatou ia rave (Mas. 2:3-5)?

 3) Hoê maa varua ta tatou paatoa e fanaˈo nei.

 Eaha te huru o te feia e ore nei e au i te mau faanahoraa i ravehia e Iehova no te faaamu ia tatou i te pae varua (hiˈo Isaia 1:3; 9:16; 65:14)?

  4) O Iesu Mesia to tatou Aratai e ere râ i te hoê taata, e mea na roto i to ˈna anaˈe iho arai tatou e nehenehe ai e haafatata ˈtu ia Iehova no te haamori ia ˈna.

 E tumu papu anei ta te hoê o tatou nei ia manaˈo e mea rahi aˈe oia i te tahi atu (Roma 3:23, 24; 12:3; Mat. 23:8-10)?

 5) Noa ˈtu eaha te vahi ta tatou e faaea nei, ua ite tatou e o te Basileia o te Atua anaˈe te tiaturiraa hoê roa no te huitaata nei.

 Nafea te reira e nehenehe ai e paruru ia tatou i te mau tumu amahamaharaa (Mat. 6:9, 10; Mika 4:3)?

 6) E faatupu te varua moˈa i te mau huru faufaa roa no te autahoêraa kerisetiano i roto i te feia e haamori ia Iehova.

 Nafea tatou ia vaiiho i te varua o te Atua ia ohipa i roto ia tatou ia nehenehe oia e faahotu mai i ta ˈna mau hotu (Sal. 1:2; Mas. 22:4; Apo. 3:6; Ohi. 5:32)?

 Eaha ta te mau hotu o te varua e faatupu i nia i to tatou mau auraa e o Iehova e to tatou mau taeae (Gal. 5:22, 23)?

 7) E hopoia na tatou paatoa i te pororaa i te parau apî maitai o te Basileia o te Atua.

 Ia apiti atu tatou i roto i te ohipa pororaa e to tatou mau taeae kerisetiano, eaha ïa ta te reira e faatupu i nia i to tatou mau manaˈo ia ratou (hiˈo Kolosa 4:7, 11)?

9. Eaha te mau faahopearaa e noaa mai ia tatou ia faaohipa mau tatou i taua mau parau mau ra i roto i to tatou oraraa?

⁹ Mea taa ê te iteraa i te reira, mea taa ê atoa ia faaohipa. E rahi roa ˈtu râ to tatou mau auraa e o Iehova e e riro atoa hoi to tatou amuimuiraa ˈtu i roto i to tatou mau taeae faaroo ei tumu faaitoitoraa. Teie hoi ta tatou e taio i roto i te Salamo 133:1: “Inaha hoi, te maitai e te popou, ia parahi atoa te mau taeae ma te au maite!” Aita anei outou iho e ite ra e mea faahiahia mau ia faarue tatou i teie nei ao miimii no te haere atu e farerei i roto i te mau putuputuraa, i te feia mai ia outou atoa na o te here mau ra ia Iehova?

 A faarue i te mau tumu amahamaharaa

10. No te aha e tia ia tatou ia haapao maitai ia nehenehe tatou e faarue i te manaˈo e faatere ia ˈna iho?

¹⁰ E tia ia tatou ia faarue i te mau tumu e amahamaha ˈi tatou mai te peu e eita tatou e hinaaro e faaino i taua autahoêraa faufaa mau ra. Te manaˈo e faatere ia ˈna iho o te hoê ïa o te mau tumu amahamaharaa matamua. Te tauturu maira râ Iehova ia tatou ia faarue i taua huru ra ma te faaite i te tumu mau o te reira, oia hoi te Diabolo ra o Satani. Na ˈna i haavare ia Eva i te faatiaturiraa ˈtu ia ˈna e e faufaahia oia ia ore oia e tâuˈa i ta te Atua i parau mai no te opua oia iho e nafea râ oia. Ua pee maira o Adamu ia ˈna i roto i ta ˈna patoiraa, e inaha, ua roohia ˈˈera raua i te ati e tatou atoa hoi (Gen. 2:16, 17; 3:1-6, 17-19). I te mea hoi e te ora nei tatou i roto i te hoê ao e mea puai te manaˈo faatere ia ˈna iho, eita ïa e maerehia e e tia ia tatou ia tiahi i taua manaˈo ra e nehenehe e vai mai i roto ia tatou nei. Te tauturu mai nei Iehova ia tatou ma te here ma te horoa mai i te mau aˈoraa na roto i te arai o ta ˈna faanahonahoraa.

11. Na te aha e faaite mai e te faaineine mau ra tatou ia tatou no te ora ˈtu i roto i te amuiraa apî e te parau-tia ta te Atua i tǎpǔ mai?

¹¹ Auaa teie faanahonahoraa i ite ai tatou i te parau tǎpǔ faahiahia mau a Iehova e haamou roa i teie nei ao ta tatou e ora nei i teie nei mahana e ma te mono i te reira na roto i te mau raˈi apî e te hoê fenua apî “i te vai-mau-raa o te parau-tia ra”. (Pet. 2, 3:13.) Te oaoa nei tatou i te iteraa e e fatata roa teie nei ao ino i te mou e e fatata atoa hoi te fenua nei i te faarirohia ei paradaiso. Teie râ, te faaite maira anei to tatou huru oraraa e te faaineine mau ra tatou ia tatou no te ora ˈtu i roto i te hoê ao e faaterehia mai e te parau-tia? Te haapapu maitai maira te Bibilia e: “Eiaha e hinaaro i teie nei ao, e te mau mea atoa o teie nei ao. O te taata i hinaaro i teie nei ao ra, aore te hinaaro i te Metua ra i roto ia ˈna.” (Ioane 1, 2:15). Parau mau, mea rahi roa te mau mea ta teie nei ao e pûpû mai nei e eita roa ˈtu hoi tatou e au. Tera râ, te au ore noa ra anei tatou i te mau mea, i roto i teie nei ao, o te rave ra e ia ore tatou  ia oaoa, aore ra te faarue atoa ra anei tatou i ta ˈna huru feruriraa, oia hoi te manaˈo e faatere ia ˈna iho e te miimii? Te haamatau mau ra anei tatou i te faaroo e te auraro ia Iehova ma to tatou mafatu atoa, noa ˈtu â ïa e e aratai to tatou mau hinaaro i te pae tino ia tatou i te hoê vahi ê atu? E tia i to tatou oraraa taatoa, — noa ˈtu eaha te vahi ta tatou e faaea ra e te ohipa ta tatou e rave ra, — ia haapapu mai e na te Atua e aratai ra i to tatou mau manaˈo e to tatou mau hinaaro. — Mas. 3:5, 6.

12. a) No te aha e riro ai ei mea faufaa roa ia farii papu, mai teie atu nei, i te ravea e pûpûhia maira no te haapii i te mau haerea o Iehova e no te faaohipa i te reira i roto i to tatou oraraa? b) Eaha te auraa o te mau irava i faahitihia i roto i te paratarapha no tatou iho nei?

¹² Ia tae i te tau i haapaohia e Iehova no te haamou i te ao iino o te mau mea nei e te feia mea au na ratou i teie nei ao, eita roa ˈtu oia e faanuu i taua taime ra. Eita roa ˈtu oia e faataere e eita atoa oia e taui i ta ˈna mau ture no te faaanaanatae i te manaˈo o te feia e tamata â i te ati atu i teie nei ao e, no te mea hoi e ua feaa piti to ratou mafatu, o te taupupu i te haapii e te faaohipa i te hinaaro o te Atua. No reira, e taime tano teie no te ohipa (Luka 13:23, 24; 17:32; 21:34-36)! Auê te oaoa ia ite atu i te hoê “nahoa rahi” taata ia farii papu i te ravea ta te Atua e pûpû atu nei ia ratou ra, no te imi uˈana i te haapiiraa ta ˈna e horoa mai nei na roto i te arai o ta ˈna faanahonahoraa arataihia e te here e no te haere ma te tahoê na nia i to ˈna mau eˈa!

Ei haapoto-noa-raa

● Eaha te opuaraa a Iehova no nia i te haamoriraa?

● I muri aˈe i to tatou iteraa i te mau haapiiraa tumu a te Bibilia, eaha te mau tutavaraa te tia mau ia tatou ia rave?

● Eaha ta tatou iho e nehenehe e rave ia ohipa mai te mau tumu autahoêraa ta tatou i paraparau aˈenei, i nia i to tatou oraraa?

[Uiraa haapiiraa]

 [Hohoˈa api taatoa i te api 4]