Pene 5

Te tiamâraa o te feia haamori ia Iehova

1, 2. a) Eaha te tiamâraa ta te Atua i horoa ˈtu i na taata matamua? b) A faahiti mai na te tahi mau ture e faatere ra i to raua oraraa.

 A POIETE ai Iehova i na taata matamua, ua horoa ˈtura oia no raua i te hoê tiamâraa rahi aˈe i te tiamâraa ta te taata nei e nehenehe e fanaˈo i teie nei mahana. I ora na o Adamu raua o Eva i roto i te paradaiso, aita roa ˈtu te hoê noa ˈˈe maˈi e haapeapea ra i to raua oraraa e aita roa ˈtu hoi te pohe e haapeapea ra ia raua. Ia nehenehe râ raua e tamau â i te fanaˈo i taua tiamâraa nei, e tia ia raua, e e mea faufaa roa hoi, ia auraro i te mau ture a te Atua.

² E riro paha e aita vetahi o taua mau ture nei i haapapu-roa-hia ia au i tera leta parau e tera leta parau, tera râ, ua poietehia o Adamu raua o Eva ia riro te auraro ei ohipa matauhia e raua. E faaite mai hoi to raua poia ia raua e e tia ia raua ia tamaa, e to raua poihâ e e tia ia raua ia inu. E titau mai te mahana ia raua ia faafaaea rii e ia taotooto ia au i tei hinaarohia e raua. Taa ê atu i te reira, ua paraparau mai Iehova ia raua e ua faataa mai i te tahi ohipa na raua o tei riro hoi ei ture, inaha, e faaite mai te reira i to raua haerea. Auê râ ïa ture maitai e te faufaa e! E ohipa faahiahia roa hoi te reira o te turai ia raua ia faaohipa i to raua ite ma te maitai. E fanau mai raua i te mau tamarii, i nia ˈˈe raua i te mau animala e e faarahi rii mǎrû noa ˈtu ai i te mau otia o te paradaiso e poˈi roa ˈˈe te fenua nei (Gen. 1:28; 2:15). Aita te Atua i faateimaha mai ia raua i te tahi mau ohipa rii faufaa ore, ua horoa mai râ oia i te hoê tiamâraa rahi i te pae no te opuaraa e nafea raua. Eaha ˈtu â ïa?

3. Na te aha i tauturu ia Adamu ia faaohipa maitai i to ˈna tiamâraa no te rave i te mau opuaraa maitai?

 ³ Parau mau, ahiri e ua horoahia ˈtu e na Adamu iho e rave i te mau opuaraa, e ere ïa te auraa e e mau faahopearaa maitai anaˈe te roaa mai i roto i ta ˈna mau opuaraa atoa, noa ˈtu eaha te huru. E mau hopoia te apee mai i taua tiamâraa nei. E nehenehe hoi oia e haapii ma te faaroo atu i to ˈna Metua i te raˈi ra e ma te hiˈopoa maite i ta ˈna mau ohipa i poiete. I te tahi aˈe pae, ua tuu atu te Atua i roto ia ˈna i te hoê maramarama e tauturu ia ˈna ia faaohipa i te mea o ta ˈna e haapii. I te mea hoi e ua poietehia o Adamu “ia au i te huru o te Atua”, e faahotu mai iho â ïa oia i te mau huru o te Atua ia rave oia i te mau opuaraa. E na reira mau â oia mai te peu e e mauruuru mau oia i te Atua no te mau ohipa ta ˈna i rave no ˈna e mai te peu e e hinaaro oia ia au mai te Atua ia ˈna. — Gen. 1:26, 27; hiˈo Ioane 8:29.

4. a) Te faaere ra anei te faaueraa a te Atua e faahepo ra i te hoê opaniraa, ia Adamu i to ˈna tiamâraa? b) No te aha taua faaueraa nei i tano maitai ai?

⁴ Ei faahaamanaˈoraa ˈtu i te taata e eita ta ˈna e nehenehe e aratai ia ˈna iho maoti to ˈna Poiete, ua horoa maira Iehova i teie nei faaueraa: “E amu noa oe i to te mau raau atoa o te ô nei; area i to te raau e ite ai i te maitai e te ino, eiaha oe e amu i te reira; ei te mahana e amu ai oe i te reira, e pohe ïa oe.” (Gen. 2:16, 17). Te faaere ra anei taua ture nei i te taata i to ˈna tiamâraa? Aita roa ˈtu. E tiamâraa to Adamu no te auraro aore ra no te ore e auraro. E ere roa ˈtu teie i te opaniraa fifi roa ia faaoromai, inaha, mea rahi hoi ta Adamu maa, noa ˈtu e eita ta ˈna e nehenehe e amu i to taua raau taa ê nei. Teie râ, e tia ia ˈna ia ite, e e mea tia mau â hoi, e no te Atua te fenua ta ˈna e faaea ra e o te Poiete te Raatira mau no ta ˈna mau mea i poiete. — Sal. 24:1, 10.

5. a) Mea nafea te ereraahia ia Adamu raua Eva i to raua tiamâraa hanahana? b) Eaha te ohipa i tupu, e eaha te mau faahopearaa teie e roohia nei i nia ia tatou?

⁵ Eaha râ te ohipa i tupu? No to ˈna miimii, ua haavare aˈera te hoê melahi ia Eva ma te faahua parau mai e e nehenehe mau â e tiaturi ia ˈna, inaha, te patoi ra hoi ta ˈna mau parau i te hinaaro o te Atua. Maori i te auraro  atu i to ˈna Metua, ua apee aˈera Adamu ia Eva i roto i ta ˈna hara. I te mea hoi e ua rave mai raua i te hoê taoˈa e ere na raua, ua erehia aˈera o Adamu raua o Eva i to raua tiamâraa hanahana. Ua riro maira te hara ei fatu no raua e, mai ta te Atua i faaara mai ia raua, ua faautuahia ˈˈera raua i te utua pohe. E eaha ˈtura ïa te faufaa ta raua i vaiiho mai na ta raua mau huaai? O te hara ïa o te itehia i roto i te huru e turai i te hoê taata ia rave i te ino, i roto i te paruparu o te faatupu mai i te maˈi e oia hoi i roto i te ruhiruhiaraa e te topa-roa-raa i roto i te ino. E pohe atura ïa te roohia mai i nia ia ratou. Ua faatupu te hinaaroraa e rave i te ino, tei faaino-roa-hia e te mana o Satani, i te hoê totaiete taata e faariro nei i te ora ei faufaa haihai roa. Auê ïa taa-ê-raa e te tiamâraa ta te Atua i horoa ˈtu i te taata i te omuaraa ra e! — Roma 5:12; Ioba 14:1; Apo. 12:9.

I hea te tiamâraa e itea ˈi?

6. a) I hea roa e itea ˈi ia tatou i te tiamâraa mau? b) Ia au i te Ioane 8:31, 32, te parau ra Iesu no nia i tei hea huru tiamâraa?

⁶ Ia hiˈohia te mau ohipa e tupu ra i teie nei tau, eita ˈtura ïa e maerehia ia titau te taata i te hoê tiamâraa rahi aˈe. I hea râ hoi e itea ˈi te tiamâraa mau? Teie ta Iesu Mesia e parau ra: “I mau maite outou i ta ˈu parau, e pǐpǐ mau [ïa] outou na ˈu i reira. E ite ïa outou i te parau mau, e na te parau mau outou e faatiamâ.” (Ioane 8:31, 32). Aita oia e faahiti ra i te parau no te tiamâraa haihai roa ta te mau taata e tiaturi ra e e noaa mai ia ratou ia faatahuri ratou i te hoê tia politita aore ra te hoê faatereraa no te mono mai i te tahi. Ta Iesu e pûpû maira, e û roa ˈtu ïa i nia i te mau fifi iho o te taata. Oia mau, te parau ra Iesu no nia i te tiamâraa mai i te hara, i te faatîtîraa a te hara (hiˈo Ioane 8:24, 34-36). No reira, ia riro mai te hoê taata ei pǐpǐ mau na Iesu Mesia, e itehia iho â ïa te hoê tauiraa i roto i to ˈna oraraa: te hoê tiamâraa.

7. a) E tiamâ mai tatou i te faatîtîraa a te hara mai teie atu nei i roto i tei hea auraa? b) Eaha te tia ia tatou ia rave e fanaˈo atoa ˈi tatou i taua tiamâraa ra?

⁷ E ere ïa te auraa e aita faahou te mau kerisetiano mau no teie nei tau to raro aˈe i te mau faahopearaa o te  huru e turai ia ratou ia rave i te ino. Aita, e tia râ ia ratou ia aro i te reira (Roma 7:21-25). Teie râ, ia faaau mau te hoê taata i to ˈna oraraa i nia i te haapiiraa a Iesu, eita ïa oia e riro faahou ei tîtî na te hara. Eita oia e auraro faahou i te hara mai ia ˈna e auraro atu i te hoê arii. Eita te hoê taata mai te reira te huru to roto faahou i te hoê oraraa aita e tumu e o te haapeapea hoi i to ˈna haava manaˈo. Oia mau, e oaoa te hoê kerisetiano i te mea e aita to ˈna haava manaˈo i viivii i mua i te Atua no te mea ua faaore mai oia i ta ˈna mau hara tahito ra maoti to ˈna faaroo i te tusia o te Mesia. Eita e ore to ˈna mau huru tiaraa taata hara i te tamata i te faaturori ia ˈna, teie râ, mai te peu e e tapea oia i roto i to ˈna feruriraa i te haapiiraa viivii ore a te Mesia, eita ïa oia e topa, e faaite râ oia i reira e e ere oia i te tîtî faahou na te hara. — Roma 6:12-17.

8. a) E faatiamâ te kerisetianoraa mau ia tatou i te aha? b) Eaha ta te reira e faatupu i nia i to tatou huru i mua i te mau hui mana o teie nei ao?

⁸ Ma to tatou tiaraa kerisetiano, te fanaˈo nei tatou i te hoê tiamâraa rahi. Oia mau, ua tiamâ mai tatou i te mau haapiiraa hape e to ratou mau faahopearaa, e tae noa ˈtu i te faatîtîraa a te tiaturiraa tupapau e a te hara. Ua faatiamâ mai te mau parau mau faahiahia no nia i te huru o te feia pohe e no nia i te tia-faahou-raa, ia tatou i te mǎtaˈu maamaa o te pohe e tupu tauê noa mai, mǎtaˈu o te turai i te taata ia haamâmû i to ratou haava manaˈo. I te mea hoi e ua ite tatou i teie nei e e monohia mai te mau faatereraa tia ore a te taata e te hoê faatereraa parau-tia, oia hoi te Basileia o te Atua, ua tiamâ atoa mai ïa tatou i te tiaturi-ore-raa. Eita râ te hoê tiamâraa mai te reira te huru e farii i te oreraa e auraro i te mau ture aore ra i te mau tia mana no te mea noa e e mou roa te amuiraa e vai nei. — Pet. 1, 2:16, 17; Tito 3:1, 2.

9. a) Nafea Iehova ia tauturu mai ia tatou ma te here, ia fanaˈo roa i te tiamâraa i teie nei? b) Nafea tatou e nehenehe ai e faaite, ia rave tatou i te hoê opuaraa, e ua papu maitai ia tatou i te mau faahopearaa o te huru o Adamu a ore ai oia e haapao i te parau no to ˈna tiamâraa?

⁹ Aita Iehova i vaiiho mai e na tatou iho e faaoti, na  roto i te ohipa o ta tatou e tamata e te hape o ta tatou e rave, i te huru oraraa maitai roa ˈˈe. Ua ite oia i to tatou huru aore ra mea nafea to tatou hamaniraahia, eaha te mea e faatupu mai i roto ia tatou i te mauruuru mau e te faatura ia tatou iho, e o te faatupu atoa mai hoi i te mau haamaitairaa e vai maoro atu. No te mea hoi e na ˈna i haamau i te taime i reira oia e faatupu ai i ta ˈna mau opuaraa, ua ite maitai ïa oia eaha te mau ohipa te tia ia tatou ia haapao rahi atu â. Ua ite atoa oia i te mau manaˈo e te mau ohipa e nehenehe e faaino i te hoê taata, e haapeapea i to ˈna mau auraa e te tahi pae aore ra e faaere ia ˈna i te mau haamaitairaa ta to ˈna Basileia e hopoi mai. Ma te here, te haapii maira oia ia tatou i taua mau mea atoa ra na roto i te Bibilia e na roto atoa i ta ˈna faanahonahoraa itehia (Gal. 5:19-23; Mar. 13:10; hiˈo Timoteo 1, 1:12, 13). I muri iho, na tatou atura ïa i te faaohiparaa i te tiamâraa ta te Atua i horoa mai no te maiti eaha te haerea ta tatou e rave. Mai te peu e ua haapao maitai tatou eaha ta te Bibilia e parau ra a erehia ˈi o Adamu i te tiamâraa tei horoahia mai no te huitaata nei, e ara ïa tatou i te rave i te hoê opuaraa paari. E faaite tatou e ua riro to tatou mau auraa e o Iehova ei tapitapiraa matamua na tatou.

Te maimiraa i te tahi atu â tiamâraa

10. Eaha te huru tiamâraa ta vetahi mau taata e faahua kerisetiano ra i tutava na ia noaa mai ia ratou?

¹⁰ I te tahi taime, e haamata vetahi mau taurearea tei ravehia na te mau metua Ite o Iehova, e vetahi atu hoi mau Ite paari aˈe, i te hinaaro i te hoê huru tiamâraa ê atu. E riro paha e i to ratou hiˈoraa, mea au roa teie nei ao, e ia rahi noa ˈtu â ratou i te manaˈo i te reira, rahi noa atoa ˈtu ïa ratou i te hinaaro e apee ia ˈna. Parau mau, aita paha ratou e manaˈo ra e faataero ia ratou i te raau taero, e inu aore ra e faaturi, e haamata râ ratou i te amuimui atu i roto i te mau hoa haapiiraa aore ra i te mau hoa ohipa mea au na ratou i teie nei ao. Parau mau, te hinaaro ra iho â ïa ratou e ia farii mai to ratou mau hoa apî ia ratou; no reira, e paraparau atoa ïa ratou mai ia ratou e e tae roa atoa ˈtu i te pee i to ratou haerea. — Ioane 3, 11.

11. I te tahi taime, i ǒ vetahi mau kerisetiano, no hea mai te hinaaro e imi i taua huru tiamâraa ra?

 ¹¹ I te tahi taime, na te tahi atu taata, o te faahua tavini ra ia Iehova, e aratai ia ratou e e turai ia ratou ia pee i te haerea o te mau taata o teie nei ao. Ua na reira hoi o Satani iho ia ˈna i haavare i te vahine, e ua na reira atoa o Eva ia ˈna i turai ia Adamu ia apee mai ia ˈna. Ua tupu atoa te reira huru i roto i te mau kerisetiano matamua, e te tupu râ i teie mahana. Mea au roa na teie huru taata i te mau huru atoa e faaaraara i te tino e te hinaaro uˈana nei ratou i te mau mea atoa e faanavenave rahi mai ia ratou. E turai ratou i te tahi pae ia haere “e arearea rii”. “Te parau faatiamâ ra ia ratou, e e tîtî hoi ratou iho na te ino”. — Pet. 2, 2:18, 19.

12. a) Eaha te mau faahopearaa peapea mau o te haerea o teie nei ao? b) Noa ˈtu e ua ite maitai te feia e rave ra i teie huru haerea e eaha te mau faahopearaa e tupu mai, no te aha ratou e tamau noa ˈi i te na reira?

¹² E ere roa ˈtu te mau hotu o teie huru haerea i te mea maitai. E faatupu mai te mau taatiraa tia ore o te tino nei i te mau fifi i te pae no te mau manaˈo e horuhoru ai ra, e tae noa ˈtu i te maˈi, te hapûraa hinaaro-ore-hia aore ra te ino-roa-raa te hoê faaipoiporaa (Mas. 6:32-35; Kor. 1, 6:18; Tes. 1, 4:3-8). E nehenehe te raveraa i te raau taero e faairia i te hoê taata, e haafifi i ta ˈna huru paraparau, i to ˈna mata aore ra e haafifi ia ˈna ia hutihuti oia i te aho, aore ra e faataninito i to ˈna upoo, aore ra e nehenehe o ˈna e ite i te tahi mau mea huru ê, e e nehenehe atoa hoi oia e pohe (hiˈo Maseli 23:29-35). Te taata e rave tamau i te raau taero, e nehenehe oia e riro mai ei tîtî na te raau taero e e nehenehe te reira e aratai ia ˈna ia taparahi pohe roa i te taata no te haamâha i to ˈna hiaai. Ua ite te rahiraa o te taata e rave nei i te raau taero eaha te ohipa e tupu mai a muri aˈe, no to ratou râ hiaai e faaaraara i te tahi mau hinaaro e te mau mea e navenave ai to ratou tino, eita ˈtura ratou e tâuˈa i te mau faahopearaa. Te hinaaro nei ratou e tiaturi e tera mau te tiamâraa, inaha hoi, ia maoro roa, i reira ïa ratou e ite ai e e tîtî ratou na te hara. Auê ïa fatu ino o te hara e! Ia feruri tatou i teie nei iho â i taua mau mea atoa ra e nehenehe ai tatou e ape i taua huru ohipa nei. — Gal. 6:7, 8.

 Nafea te fifi ia haamata

13. a) Nafea te mau hinaaro e faatupu mai i taua mau huru fifi ra i te pinepine i te itehia mai? b) E tia ia tatou ia ite i te manaˈo o vai ia taa ia tatou e eaha mau na te mau “amuimuiraa iino”? c) A pahono noa ˈi outou i te mau uiraa e itehia ra i roto i te paratarapha, a tatara maitai mai i te manaˈo o Iehova. A tuatapapa hoê uiraa i muri aˈe i te tahi.

¹³ E feruri anaˈe na maa taime iti e e hiˈo anaˈe na mea nafea mai te fifi ia haamata. Teie ta te Bibilia e faataa ra: “Ua haavarehia râ te taata ia faahahau-ê-hia, e ia riro noa ˈtu i to ˈna iho hinaaro tia ore. E ua tô anaˈe taua hinaaro tia ore ra, fanau maira ta ˈna, o te hara; e ia rave-faahope-hia te hara ra, fanau maira ta ˈna, o te pohe.” (Iak. 1:14, 15). Na te aha râ e faatupu mai i taua mau hinaaro ra? Na te mea ïa e ô mai i roto i to tatou feruriraa, oia hoi ia amuimui atu tatou i roto i te mau taata e ore e haapao i te mau faaueraa tumu a te Bibilia. Parau mau, ua ite tatou paatoa e e tia ia tatou ia faarue “i te mau amuimuiraa ino”, tera râ, te uiraa faufaa roa teie ïa: Eaha te mau amuimuiraa ino? E hiˈo anaˈe na i te manaˈo o Iehova no nia i taua tumu parau nei. E riro paha e mea ohie aˈe no tatou ia huti mai i te faaotiraa maitai ia feruri tatou i nia i te mau uiraa e te mau irava i muri nei:

 Mai te peu e e hiˈoraa maitai roa to vetahi mau taata, te auraa ra anei ïa e e mau amuimuiraa maitai ratou (hiˈo Genese 34:1, 2, 18, 19)?

 Te mau parau aore ra te mau parau hauti ta ratou e faahiti mai, e nehenehe anei te reira e faaite mai e e mau hoa rahi tatou no ratou aore ra eita (Eph. 5:3, 4)?

 E tia anei ia tatou ia haapeapea mai te peu e e ere hoê â tiaturiraa to taua mau taata ra e to tatou no nia i te opuaraa a te Atua (hiˈo Korinetia 1, 15:12, 32, 33)?

 Eaha ïa te manaˈo o Iehova mai te peu e e opua tatou i te amuimui atu i roto i te mau taata aita e here ra ia ˈna (hiˈo Paraleipomeno 2, 19:1, 2)?

 Noa ˈtu â ïa e te rave ra tatou i te ohipa aore ra te haere ra tatou i te haapiiraa e te mau taata aita to roto i te parau mau, nafea râ tatou e nehenehe ai e faaite e aita tatou e amuimui atura i roto ia ratou (Pet. 1, 4:3, 4)?

  E faaamuimui te afata teata e tae noa ˈtu te mau vea aore ra te mau buka ta tatou e taio ra, ia tatou i te tahi atu mau taata. E tia ia tatou ia faaatea ê mai i tei hea mau huru peu faaanaanataeraa manaˈo aore ra mau buka, i teie mahana (Mas. 3:31; Isa. 8:19; Eph. 4:17-19)?

 I mua i te aro o Iehova, eaha te huru taata ta tatou e faaite atura ia ˈna na roto i ta tatou mau amuimuiraa (Sal. 26:1, 4, 5; 97:10)?

14. Eaha te tiamâraa faahiahia mau ta te feia e haapao maite ra mai teie atu nei i te mau aˈoraa o te Parau a te Atua, e ite atu?

¹⁴ Ua fatata roa mai te amuiraa apî o te mau mea ta te Atua i tǎpǔ mai. Na roto i te Basileia o Iehova, e faatiamâhia ˈi te huitaata nei i te faaohiparaa iino a Satani e a ta ˈna amuiraa iino. E ore rii mǎrû noa te mau faahopearaa a te hara, e o te ora mure ore ïa i roto i te paradaiso to mua mai ia tatou. E i te pae hopea, e fanaˈo roa te mau mea atoa i poietehia i te tiamâraa mau, tiamâraa o te tano maitai e “[te varua o Iehova]”. (Kor. 2, 3:17.) Mea tia anei ia erehia tatou i taua mau mea atoa ra ia haafaufaa ore tatou i te aˈoraa a te Parau a te Atua? Ia faaite na tatou, na roto i ta tatou huru faaohiparaa i to tatou tiamâraa kerisetiano e te hinaaro mau ra tatou e “ia noaa te tiamâ maitai o te tamarii a te Atua ra”! — Roma 8:21.

Ei haapoto-noa-raa

● I fanaˈo na na taata matamua i tei hea huru tiamâraa? E taa ê te reira i te tiamâraa e itehia ra e te taata i teie mahana i roto i tei hea tuhaa?

● Taa ê atu i to teie nei ao, te fanaˈo ra te mau kerisetiano mau i tei hea huru tiamâraa? Nafea hoi te reira e tupu ai?

● Eaha te faahopearaa e itehia e te feia e imi ra i te tiamâraa o teie nei ao?

● No te aha e riro ai ei mea faufaa mau ia ape i te mau “amuimuiraa iino”? Taa ê atu ia Adamu, e farii tatou i te mau faaotiraa a vai no nia i te mau mea ino?

[Uiraa haapiiraa]