Pene 15

“O vai tei au ia heheu i teie nei buka [otaro]?”

1. Eaha te mau ohipa o ta Ioane e ite orama ra i teie nei?

 AUÊ ÏA TE FAAHIAHIA RAHI E! Ua tano maitai ïa teie mau parau i te orama maere rahi no nia i te terono o Iehova e vai ra i ropu i te mau lamepa auahi, te mau kerubi, te mau matahiapo e 24 e te miti mai te hiˈo anaana ra. Area o Ioane ra, eaha ta oe e ite ra i muri iho? Te tiatono noa ra Ioane i te ropu-mau-raa o teie hohoˈa e vai ra i nia i te raˈi, e ua parau ihora e: “E hiˈo atura vau i te hoê buka [otaro] i roto i te rima atau o tei parahi i nia iho i taua terono ra, ua papaihia o roto e o rapae, e ua taatihia i na tapao taati e hitu ra. E ite atura vau i te hoê melahi puai i te pii-hua-raa te reo e, O vai te au ia heheu i teie nei buka [otaro], e ia vahi i na tapao taati ra? E aore roa e taata i nia i te raˈi, aore atoa i te fenua, aore atoa o raro i te repo, e tia ˈi ia heheu i taua buka [otaro] ra, a hiˈo noa ˈtu ai i roto. Oto roa aˈera vau, no te mea aore roa i itea e au e au ai ia heheu e ia taio i taua buka [otaro] ra, e ia hiˈo noa ˈtu i roto.”—Apokalupo 5:1-4.

2, 3. (a) No te aha Ioane e hinaaro mau ai ia iteahia mai te hoê taata no te heheu i te otaro, area râ, e manuïa anei te mau maimiraa? (b) I to tatou nei tau, eaha ta te mau tavini a te Atua o tei faatavaihia e te varua e tiai ra ma te faaoromai ore?

² O Iehova iho, te Fatu Mana hope o te mau mea poiete-taatoa-hia, teie e tapea ra e teie e faatoro maira i teie otaro. Ua î roa ïa teie otaro i te mau haamaramaramaraa faahiahia roa ˈˈe no  te mea ua papaihia o roto e o rapae atoa. E hinaaro mau iho â ïa tatou e ite. Eaha ra te mea e vai ra i roto i teie otaro? Te haamanaˈo ra tatou e ua titau manihini Iehova ia Ioane i te na ôraa e: “A haere mai na i nia nei, e na ˈu e faaite atu ia oe i te mau mea e tupu e tia ˈi a muri nei.” (Apokalupo 4:1) Te tiai ra ïa tatou ma te anaanatae rahi i te taime i reira tatou e ite ai i taua mau mea nei. Auê râ i te peapea e! ua tavirivirihia te otaro e ua taatihia i na tapao taati e hitu ra!

³ Ua itehia anei i te melahi puai te hoê taata e au ia ˈna ia heheu i te otaro? Ia au i te tatararaa Kingdom Interlinear, ua itehia te otaro “i nia i te rima atau” o Iehova. Te horoa ra teie parau i te manaˈo e te faatoro ra Iehova i te otaro e vai ra i roto i to ˈna apu rima matara noa. E au ra e aita e taata, i nia i te raˈi, i nia atoa i te fenua nei, e au ia farii i teie otaro e ia iriti i te reira. Aore atoa o raro i te repo, i rotopu i te mau tavini haapao maitai a te Atua o tei pohe aˈena, e itehia ra te hoê taata o te faaî ra i te mau titauraa e au no te farii i teie hanahana rahi. Eita ïa tatou e maere i te iteraa e ua oto roa aˈera Ioane! Eita paha ïa o ˈna e nehenehe e haapii “i te mau mea e tupu e tia ˈi a muri nei.” I to tatou atoa nei mahana, ua tiai te mau tavini a te Atua o tei faatavaihia e te varua, e te reira ma te faaoromai ore, ia tono mai Iehova i to ˈna maramarama e ta ˈna parau mau i nia i te Apokalupo. Ua faaoti oia e e faatupu rii maite noa oia i te reira e i te tau tapaohia e faatupu ai oia i teie parau tohu, e e aratai oia i to ˈna nunaa i nia i te eˈa o te “ora [faahiahia mau].”—Salamo 43:3, 5.

Tei au

4. (a) O vai tei au ia heheu i te otaro e ia vahi i te mau tapao taati? (b) Eaha te utua e te haamaitairaa taa ê e vai ra i te pǔpǔ a Ioane e ta ˈna mau hoa?

⁴ Oia mau, te vai ra te hoê taata tei au ia ˈna ia heheu i te otaro. Te faˈi ra Ioane e: “Ua parau maira te hoê o te mau peresibutero [matahiapo] ra ia ˈu, Eiaha e oto: inaha tei te Liona o te opu o Iuda, tei te huaai o Davida, ua riro ia ˈna te heheu i taua buka [otaro] ra, e te vahi hoi i na tapao taati e hitu ra.” (Apokalupo 5:5) E Ioane, a tamarô i to oe roimata! I to tatou nei mau mahana, ua faaoromai atoa te pǔpǔ a Ioane e to ˈna mau hoa haapao maitai i te mau tamataraa fifi mau e rave rahi mau ahuru matahiti, ma te tiai e ma te faaoromai ia noaa mai ia ratou te mau haamaramaramaraa no nia i te Apokalupo. Auê ïa utua rahi tei noaa ia tatou i teie nei e te taa nei tatou teie orama, e auê ïa haamaitairaa taa ê tei horoahia no tatou maoti râ te tahoêraa ˈtu i roto i te tupuraa o te reira na roto i te pororaa i te poroi e vai ra i roto!

5. (a) Eaha te parau tohu no nia ia Iuda, e i hea te huaai o Iuda i te ariiraa? (b) O vai te Silo?

⁵ “Te Liona o te opu o Iuda.” Ua ite maitai Ioane i te parau tohu a Iakoba, te tupuna o te mau ati iuda, ta ˈna i parau atu i te maha o ta ˈna tamaiti, o Iuda: “E au Iuda i te liona apî; mai te pau mai oe, e tau tamaiti: ia piˈo oia i raro mai te liona ra, ia tipapa oia, mai te liona maiaa ra, na vai oia e faatia i nia? e ore roa Iuda e ere i te sepeta, e to ˈna huaai i te haava, e tae noa mai te Silo ra; e amui mai ia ˈna ra to te mau fenua ê.” (Genese 49:9, 10) No roto mai te huaai arii o te nunaa o te Atua ia Iuda. Mai ia Davida mai, te  mau arii tei arii i Ierusalema e tae roa ˈtu i te haamouraahia teie oire e te mau Babulonia, e mau huaai anaˈe ïa no Iuda. Aore râ te hoê noa ˈˈe i rotopu ia ratou i riro ei Silo tohuhia e Iakoba. Te auraa o te parau Silo “Te taata no ˈna tera [te tiaraa].” Te faataa atea ra teie parau tohu ia Iesu, te taata no ˈna te basileia a Davida i teie nei e a muri noa ˈtu.—Ezekiela 21:25-27; Luka 1:32, 33; Apokalupo 19:16.

6. Nafea Iesu i te riroraa mai ei “ohǐ” no Iese e ei “huaai o Davida”?

⁶ Ua taa oioi ia Ioane e o vai teie e faataahia ra na roto i te parau “te huaai o Davida.” Ua piihia te Mesia tei tǎpǔhia na roto i teie mau parau tohu “te hoê ohǐ no roto i te tumu ra o Iese [te metua tane o te arii ra o Davida]” e “te hoê aveave,” e tae noa ˈtu “te tumu ra o Iese, e tia i nia ei reva no te taata.” (Isaia 11:1, 10) I te mea e ua fanauhia oia i roto i te huaai arii o Davida, te tamaiti a Iese, ua riro ïa Iesu ei ohǐ no Iese. E hau atu â, ei tumu o Iese, Na ˈna ïa i faatupu faahou mai te huaai arii o Davida, na roto i te faaoraraa e te haamauraa i te reira e a muri noa ˈtu.—Samuela 2, 7:16.

7. No te aha e au ia Iesu ia rave mai i te otaro mai roto mai i te rima o Tei parahi i nia iho i te terono?

⁷ O Iesu anaˈe, te taata tia roa, tei tavini ia Iehova ma te ore e taiva noa ˈtu te mau tamataraa ino mau. Ua horoa oia i te hoê pahonoraa taatoa i te faatihaehaeraa a Satani. (Maseli 27:11) I te po hou to ˈna pohe tusia, ua nehenehe ia ˈna i te parau e: “Ua riro te re o teie nei ao ia ˈu.” (Ioane 16:33) No reira, i muri aˈe i to ˈna faatia-faahou-raahia, ua horoa Iehova no ˈna “te mana atoa i te raˈi e te ao atoa nei.” I rotopu i te mau tavini atoa o te Atua, o Iesu anaˈe iho tei au ia farii i te otaro e ia nehenehe oia e faaite i te poroi faufaa rahi e vai ra i roto.—Mataio 28:18.

8. (a) Eaha te mau ohipa no nia i te Basileia e faaite ra e e au ia Iesu te heheu i te otaro? (b) No te aha e mea tano iho â e na te hoê o na e 24 matahiapo e faaite atu ia Ioane e o vai tei au ia heheu i te otaro?

⁸ E mea tano mau iho â e o Iesu te nehenehe e iriti i te otaro. Mai te matahiti 1914 mai â, ua haamauhia oia i roto i to ˈna mau tiaraa ei Arii no te Basileia mesia o te Atua; area râ, te faaite ra teie otaro e rave rahi mau mea no nia i te Basileia e te mea o ta ˈna e faatupu. Ua faaite Iesu ma te haapao maitai i te parau mau no nia i te Basileia i to ˈna parahiraa i nia i te fenua nei. (Ioane 18:36, 37) Ua haapii atoa oia i ta ˈna mau pǐpǐ ia pure ia tae mai teie Basileia. (Mataio 6:9, 10) I te hamataraa te tau kerisetiano, ua avari oia i te ohipa pororaa i te parau apî oaoa o te Basileia e ua faaite atea mai e e tupu teie ohipa i te rahi i te tau hopea. (Mataio 4:23; Mareko 13:10) E mea tano atoa e na te hoê o te mau peresibutero [matahiapo] e 24 e faaite ia Ioane e na Iesu e vahi i te mau tapao taati. Eaha te tumu? No te mea teie mau matahiapo, e parahi ra i nia i te mau terono e e korona to ratou i nia i to ratou upoo, e feia tufaa ratou e te Mesia i roto i te Basileia.—Roma 8:17; Apokalupo 4:4.

‘Te Arenio tei taparahihia’

9. E ere te liona ta Ioane i ite, eaha râ te animala ta ˈna i ite i te tiaraa i “ropu mai i te terono,” e mea nafea oia i te faataaraa ˈtu ia ˈna?

⁹ Te imi ra Ioane ia ite atu i teie “Liona o te opu o Iuda.” Auê ïa ohipa maere e! O te hoê hohoˈa taipe taa ê roa tei itehia ia ˈna: “Hiˈo atura vau, e inaha, tei ropu mai i te terono e na mea ora e maha ra, i te area i ropu atu i te mau peresibutero [matahiapo] ra, te hoê Arenio i te tiaraa, mai te mea no taparahihia ihora, e hitu o ˈna tara, e hitu hoi mata, oia na [v]arua o te Atua toohitu i tono haerehia na te ao atoa nei.”—Apokalupo 5:6.

10. O vai te “arenio” o ta Ioane i ite, e no te aha e tano teie parau no ˈna?

¹⁰ I ropu mau, i pihai iho i te terono, i ropu i na mea ora e maha e haaati ra i te terono e na matahiapo e 24 e haaati atoa ra i te terono, te vai ra te hoê arenio! Mea papu e ua faaau oioi Ioane i teie arenio i te “Liona o te opu o Iuda” e “te huaai o Davida.” Ua ite oia e, e hau atu i te 60 matahiti i mahemo, ua faaite Ioane bapetizo ia Iesu i te mau ati Iuda e vai ra i reira mai “te Arenio a te Atua, o tei hopoi ê atu i te hara o te ao.” (Ioane 1:29) I te maororaa o to ˈna oraraa i nia i te fenua nei, aita Iesu i viiviihia i teie nei ao—ua vai noa o ˈna mai te hoê arenio porao ore—ia nehenehe oia e pûpû i to ˈna ora tia roa ei tusia no te huitaata nei.—Korinetia 1, 5:7; Hebera 7:26.

11. No te aha e ere roa ˈtu te faariroraa ˈtu ia Iesu ei “arenio . . . , mai te mea ua taparahihia ihora” i te faatura-ore-raa ˈtu ia Iesu o tei faahanahanahia?

¹¹ Aita anei te faahohoˈaraa ia Iesu mai te hoê “arenio . . . , mai te mea no taparahihia ihora” e faahaehaa ra e aore ra e faatura ore ra ia Iesu, o tei faahanahanahia i teie nei? Aita roa ˈtu. Ua riro  te haapao maitai o ta Iesu i faaite e tae noa ˈtu i to ˈna poheraa ei pau rahi no Satani e ei upootiaraa hanahana no te Atua ra o Iehova. Teie hohoˈa taipe tei ravehia no te faataaraa ia Iesu, te haapapu ra te reira ma te hanahana rahi i te re tei noaa ia ˈna i te ao o Satani e te faahaamanaˈo ra te reira i te here rahi o Iehova e o Iesu no te huitaata nei. (Ioane 3:16; 15:13; hiˈo Kolosa 2:15.) O Iesu ïa te Huaai tǎpǔhia, tei au ia heheu i te otaro ma te faahiahia mau.—Genese 3:15.

12. Te faahohoˈa ra na tara e hitu o te Arenio i te aha?

¹² Eaha te tahi atu â mau mea o te faarahi ra i to tatou faatura i teie “arenio”? E hitu o ˈna tara. I roto i te Bibilia, mea pinepine te mau tara i te faataipehia i te puai aore ra te mana, e te numera hitu i te hoê mea taatoa. (Hiˈo Samuela 1, 2:1, 10; Salamo 112:9; 148:14.) No reira, te faahohoˈa ra na tara e hitu o te Arenio i te taatoaraa o te mana o ta Iehova i horoa ˈtu no Iesu. Tei “nia ê roa [oia] i te mau arii, e te feia mana, e te puai, e te rahi, e te mau iˈoa atoa i faahitihia nei, eiaha i teie nei ao anaˈe ra, i te ao atoa râ a muri atu.” (Ephesia 1:20-23; Petero 1, 3:22) Te faaohipa iho â râ Iesu i to ˈna mana, te hoê mana faatere, mai te matahiti 1914 maira, matahiti i reira Iehova i te haamauraa ia ˈna ei Arii i nia i te raˈi.—Salamo 2:6.

13. (a) Te faahohoˈa ra na mata e hitu o te Arenio i te aha? (b) Eaha ïa ta te Arenio ohipa i teie nei?

¹³ E hau atu â, ua î Iesu i te varua moˈa; o ta te mau mata e hitu o te Arenio e faahohoˈa ra, o “na [v]arua o te Atua toohitu.” Ua riro Iesu ei arai e mea na reira Iehova i te faataeraa i to ˈna puai ohipa taatoa i nia i ta ˈna mau tavini e vai ra i nia i te fenua nei. (Tito 3:6) E au ra e, e mea na roto i teie nei iho â varua e nehenehe ai Iesu e ite mai nia mai te raˈi i te ohipa e tupu ra i nia i te fenua nei. Mai to ˈna iho Metua, tei ia ˈna ra te hoê ite tia roa no te taa i te mau ohipa. Aita hoê aˈe mea e moe ia ˈna. (Hiˈo Salamo 11:4; Zekaria 4:10.) Mea papu, teie Tamaiti—te taata o te ore roa i taiva e o tei noaa ia ˈna te re i te ao nei; te Liona o te opu o Iuda; te huaai o Davida; o tei pûpû i to ˈna ora no te huitaata nei; tei ia ˈna ra te hoê mana tia, te varua moˈa taatoa e te hoê ite tia roa no te taa i te mau mea no ǒ mai i te Atua ra o Iehova—oia mau, teie Tamaiti e au mau ïa ia ˈna ia rave i te otaro e vai ra i roto i te rima o Iehova. Te feaa piti ra anei oia i te fariiraa i teie ohipa i roto i te faanahonahoraa hanahana o Iehova? Aita roa ˈtu! Aita roa ˈtu, “ua haere maira oia, e ua rave maira i taua buka [otaro] ra, i roto i te rima atau o [T]ei parahi i nia iho i te terono ra.” (Apokalupo 5:7) Auê ïa hiˈoraa maitai no te hoê auraroraa oioi mau!

Te mau himene arueraa

14. (a) Eaha te ohipa a te mau mea ora e maha e te mau matahiapo e 24 i to Iesu raveraa mai i te otaro? (b) Mea nafea te mau haamaramaramaraa ta Ioane i horoa no nia i te mau matahiapo e 24 e haapapu ra i to ratou tiaraa e to ratou toroa?

¹⁴ Mai te aha ïa te huru o te mau taata e vai ra i mua i te terono o Iehova? “E ia ravea e ana taua buka [otaro] ra, ua tipapa ihora na mea ora e maha ra, e te mau peresibutero [matahiapo] e piti ahuru ma maha ra i raro, i mua i te Arenio, e kinura anaˈe ta ratou atoa, e te auˈa auro ua îî i te mea noˈanoˈa, oia te pure a te feia moˈa ra.” (Apokalupo 5:8) Mai na mea ora e maha, na kerubi e maha ra, e tia ra i mua i te terono o te Atua, ua tipapa ihora te mau matahiapo e 24 i mua ia Iesu, ma te faaiteraa e ua farii ratou i to ˈna mana. Area râ, e kinura anaˈe ta teie mau matahiapo e te mau auˈa îî i te mea noˈanoˈa. * O ratou anaˈe teie e himene nei i teie nei i te hoê himene apî. (Apokalupo 5:9) E au atoa ïa ratou i na melo 144 000 o “te Iseraela . . . o te Atua” moˈa, e e mau kinura atoa ta ratou e te himene ra ratou i te hoê himene apî. (Galatia 6:16; Kolosa 1:12; Apokalupo 7:3-8; 14:1-4) E hau atu â, te faataahia ra te mau matahiapo e 24 i te raveraa i te hoê toroa autahuˈa i nia i te raˈi. Ua faahohoˈahia teie toroa i te toroa a te mau tahuˈa no te Iseraela i tahito, ia tutui anaˈe ratou i te mea noˈanoˈa i mua ia Iehova i roto i te sekene—toroa tei ore i nia i te fenua nei i to te Atua iritiraa i te Ture a Mose na roto i te patitiraa i te reira i nia i te pou haamauiuiraa o Iesu. (Kolosa 2:14) Eaha ïa te faaotiraa e roaa mai ia tatou? Te faataa ra teie irava i te toroa o tei horoahia i te pae hopea i te feia faatavaihia e te varua tei noaa ia ratou te re, maoti ra ‘ei tahuˈa na te Atua e na te Mesia, e e hau to ratou ia ˈna ra e ia hoê tausani te matahiti.’—Apokalupo 20:6.

15. (a) I Iseraela i tahito ra, o vai anaˈe te nehenehe e tomo i roto i te Vahi Moˈa Roa o te sekene? (b) No te aha e ohipa ora ïa no te tahuˈa rahi ia tutui i te mea noˈanoˈa ia tomo anaˈe oia i roto i te Vahi Moˈa Roa?

 ¹⁵ I Iseraela i tahito ra, o te tahuˈa rahi anaˈe ïa tei tomo i roto i te Vahi Moˈa Roa, i mua i te aro taipe o Iehova. Te raveraa i te mea noˈanoˈa e ohipa ora ïa e aore ra e ohipa pohe ïa no ˈna. Teie ta te Ture a Iehova e haapapu ra: “ei reira oia . . . [Aarona] e faaî ai i te hoê auˈa tutuiraa mea noˈanoˈa i te arahu â no nia i te fata i mua i te aro o Iehova, e faaî hoi i o ˈna pue rima i te mea noˈanoˈa i ohuahia ra, a hopoi ai i roto mai i te paruru ra; e tuu hoi oia i taua mea noˈanoˈa ra i nia i te auahi i mua i te aro o Iehova ra, ia moe te tapoˈi i nia i te afata ture ra i te au o te mea noˈanoˈa, ia ore hoi oia ia pohe.” (Levitiko 16:12, 13) Eita roa ˈtu te tahuˈa rahi e nehenehe e tomo, i roto i te Vahi Moˈa Roa e e vai ora noa mai te peu aita oia i tutui i te mea noˈanoˈa.

16. (a) I roto i te faanahonahoraa kerisetiano, o vai ma te tomo i roto i te Vahi Moˈa Roa o tei faahohoˈahia? (b) No te aha e tia i te mau kerisetiano faatavaihia ‘ia tutui i te mea noˈanoˈa’?

¹⁶ I roto i te faanahonahoraa kerisetiano, e ere te Tahuˈa Rahi anaˈe o Iesu Mesia, tei faahohoˈahia mai te reira, area râ, o te mau 144 000 tahuˈa tauturu taitahi atoa o te tomo i te pae hopea i roto i te Vahi Moˈa Roa, te vahi i reira Iehova e parahi ai i roto i te mau raˈi. (Hebera 10:19-23) Teie mau tahuˈa, o te faahohoˈahia i ǒ nei i te mau matahiapo e 24, eita ratou e nehenehe e tomo i roto i te Vahi Moˈa Roa mai te peu aita ratou i ‘tutui i te mea noˈanoˈa,’ oia hoi te faatae-tamau-raa i te mau pure e te mau pure taparu ia Iehova ra.—Hebera 5:7; Iuda 20, 21; hiˈo Salamo 141:2.

Te hoê himene apî

17. (a) Eaha te himene apî ta te mau matahiapo e 24 e himene ra? (b) I te rahiraa o te taime, mea pinepine te Bibilia i te faaohiparaa i teie parau “himene apî” mai te aha te huru?

¹⁷ E i teie nei, te faaroohia ra te hoê himene au maitai no te faahanahanaraa i te Arenio. O te mau matahiapo e 24, te mau tahuˈa o te tahoêhia ˈtu ia ˈna, o ratou teie e himene ra i te reira: “Ua himene iho ratou i te himene apî, i te na ôraa e, E au oe ia rave i te buka [otaro] e ia vahi i te mau tapao taati ra: i taparahihia hoi oe, e ua hoo oe ia matou ei taata no te Atua, i to oe iho na toto, no roto i te mau opu atoa, e te mau reo atoa, e te mau nunaa atoa e te mau fenua atoa.” (Apokalupo 5:9) Mea pinepine te itehia te parau “himene apî” i roto i te Bibilia. I te rahiraa o te taime o te mau himene arueraa ïa ia Iehova no te hoê o te mau ohipa puai faaora o ta ˈna i rave. (Salamo 96:1; 98:1; 144:9) E himene apî teie no te mea te taata e himene ra e nehenehe ïa o ˈna i teie nei e faaite i te tahi atu â mau ohipa apî faahiahia a Iehova e e faaite oia i te hoê faatura rahi no To ˈna iˈoa hanahana.

18. No teihea mau tumu, e arue ai te mau matahiapo e 24 ia Iesu na roto i ta ratou himene apî?

¹⁸ I teie nei râ, te himene ra te mau matahiapo e 24 i te hoê himene apî i mua ia Iesu, eiaha râ i mua ia Iehova. E auraa hoê râ to te reira. Te arue ra ratou ia Iesu no te mau mea apî o ta ˈna i rave no ratou, ei Tamaiti na te Atua. Na roto i to ˈna toto, ua riro mai oia ei arai no te faufaa apî e ua nehenehe oia e faafanau i te hoê nunaa apî o te riro mai ei tuhaa taa ê na Iehova. (Roma 2:28, 29; Korinetia 1, 11:25; Hebera 7:18-25) I te mea mau, no roto mai te mau melo no teie nunaa apî i te pae varua i te mau nunaa e rave rahi, ua tahoê râ Iesu ia ratou i roto i te hoê anaˈe iho amuiraa, te hoê anaˈe iho nunaa.—Isaia 26:2; Petero 1, 2:9, 10.

19. (a) I te mea e ua taiva oia, ua erehia ïa te nunaa Iseraela i te pae tino i teihea haamaitairaa? (b) Eaha te haamaitairaa ta te nunaa apî o Iehova e fanaˈo ra?

¹⁹ I to Iehova faariroraa i te mau Iseraela ei nunaa i te mau mahana o Mose, ua faatupu oia i te hoê parau faaau e o ratou e ua tǎpǔ oia ia ratou e, mai te peu e vai haapao maitai noa ratou, e riro mai ïa ratou ei autahuˈa arii no ˈna. (Exodo 19:5, 6) Area râ, ua taiva te mau Iseraela; e eita roa ˈtu ïa ratou e ite i te tupuraa o teie parau tǎpǔ. Area râ, te nunaa apî tei faatupuhia mai na nia i te faufaa apî e o Iesu te arai, ua vai haapao maitai noa ïa oia. E nehenehe ïa to ˈna mau melo e arii i nia i te fenua nei e e tavini ei tahuˈa, na roto i te tautururaa i te mau taata tia ia faatupu faahou i te hau e o Iehova. (Kolosa 1:20) O tera mau ta te himene apî e faaite ra i te na ôraa e: “E ua faariro oe ia matou ei hui arii, e ei tahuˈa na to matou Atua, e e riro ia matou te hau i teie nei ao.” (Apokalupo 5:10) Auê ïa oaoaraa no teie e 24 matahiapo ia himene i teie himene arueraa apî no te faahanahanaraa ia Iesu o tei faateiteihia!

 Te hoê pǔpǔ himene i nia i te raˈi

20. I teie nei, eaha ïa te himene arueraa e himenehia ra no te faahanahanaraa i te Arenio?

²⁰ Eaha ïa ta te tahi atu â mau melo no te faanahonahoraa rahi a Iehova i nia i te raˈi i rave i to ratou faarooraa i teie himene apî? Ua putapû roa Ioane i to ˈna iteraa ia ratou i te faaiteraa ma to ratou mafatu taatoa i te hoê â manaˈo hohonu: “Hiˈo atura vau, e faaroo atura i te reo o te mau melahi e rave rahi e ati noa ˈˈe taua terono ra, e te mau mea ora ra, e te mau peresibutero [matahiapo]: (e to ratou rahiraa ia taio ra, ua muriadi i te muriadiraa, e ua tausani i te tausaniraa;) i te pii-hua-raa te reo e, E au te Arenio taparahihia ra e, ei ia ˈna te mana e te taoˈa rahi, e te paari, e te puai, e te tura, e te hanahana, e te haamaitai.” (Apokalupo 5:11, 12) Auê ïa himene arueraa haaputapû i te mafatu e!

21. Te faahaehaa ra anei te mau himene arueraa i te Arenio i te mana hope e aore ra te tiaraa o Iehova? A tatara i te reira.

²¹ Te auraa ra i teie nei te rave ra anei Iesu i te parahiraa o te Atua ra o Iehova e te arue ra anei te mau mea atoa i poietehia ia ˈna, eiaha râ i to ˈna Metua? Aita roa ˈtu! Ua tuea maitai teie himene arueraa i teie mau parau a te aposetolo Paulo e: “I faateitei roa ˈtu ai te Atua ia ˈna [Iesu], e ua horoa hoi i te iˈoa i hau ê roa i te mau iˈoa atoa nei no ˈna; ia tuu te mau turi atoa i raro, to te raˈi, to nia i te fenua e to raro aˈe i te fenua, i te iˈoa o Iesu ra; e ia faˈi te mau vaha atoa, e o Iesu Mesia te Fatu, e hanahana ˈtu [i] te Atua Metua ra.” (Philipi 2:9-11) I roto i teie mau irava, te faateiteihia ra Iesu no te tuhaa ohipa o ta ˈna i rave i mua i te mau mea atoa i poietehia no te faatitiaifaroraa i te tumu parau rahi maoti ra—te faatiaraa i te tiaraa arii mana hope tia o Iehova. Ua faahanahana mau ta ˈna huru raveraa i to ˈna Metua!

Te haere noa ˈtura te himene i te rahi

22. Ua tahoê atu mai te mau reo mai te fenua atu nei i teihea himene?

²² I roto i te orama a Ioane, te faatae ra te mau mea i poietehia e rave rahi i nia i te raˈi i te mau haapopouraa au maitai no te faahanahanaraa ia Iesu, ma te faaite atu e ua farii ratou i to ˈna haapao maitai e to ˈna mana i nia i te raˈi. Ua rahi atu â teie mau haapopouraa na roto i te tahoêraahia te mau reo mai te fenua atu nei, i to ratou arueraa i te Metua e te Tamaiti. Mai te mau ohipa a te hoê tamaiti a te taata nei, e nehenehe te reira e faahanahana hau atu i to ˈna nau metua, oia atoa, i roto i te taatoaraa o te mau mea i poietehia, ua riro te haapao maitai o Iesu i te ‘faahanahana ˈtu i te Atua Metua ra.’ No reira ïa Ioane i na ô faahou ai e: “E faaroo atura vau i to nia atoa i te raˈi ra, e to te fenua nei, e to raro i te repo, e to te moana, e to roto ia ratou atoa ra, i te na ôraa e, O te haamaitai, e te tura, e te hanahana, e te mana, ei ia ˈna ïa ei Tei parahi i nia iho i te terono ra, e ei te Arenio, e a muri noa ˈtu.”—Apokalupo 5:13.

23, 24. (a) Nafea tatou e papu ai e anafea te haamataraa te himene i nia i te raˈi e anafea e tupu ai i te fenua nei? (b) Mea nafea teie himene i te tupuraa i te rahi i te roaraa o te mau matahiti?

²³ Anafea teie himene faahiahia e himenehia ˈi? Ua haamata i te himenehia i te omuaraa o te mahana o te Fatu ra. I muri aˈe i to Satani e to ˈna mau demoni tiahairaahia mai nia mai i te raˈi, i reira “to nia atoa i te raˈi ra” i te haamataraa i te himene tahoê i teie himene arueraa. E hau atu â, mai ta te mau ohipa i tupu e faaite ra, mai te matahiti 1919 mai â, ua tahoê te rahiraa o te mau mea i poietehia i nia i te fenua nei i to ratou reo no te arueraa ia Iehova, e ua maraa to ratou numera tau tausani e ua tae hau atu i te toru mirioni i te hopea o te mau matahiti 80. * I muri aˈe i te haamouraa i te amuiraa a Satani e vai ra i nia i te fenua nei, i reira “to te fenua nei” e arue ai ia Iehova e ta ˈna Tamaiti. I te tau tapaohia e Iehova, e haamata te faatia-faahou-raa i te mau miria feia pohe, e i reira ïa “to raro i te repo” e o ta te Atua e haamanaˈo noa ra, e nehenehe ai e tahoê atu ai i to ratou reo i teie himene.

²⁴ ‘Mai te hopea mai o te fenua ra, o te tai e te mau motu,’ ua haamata aˈena ïa te mau mirioni taata i te himene i te hoê himene apî ma te tahoê atu i te faanahonahoraa taatoa a Iehova. (Isaia 42:10; Salamo 150:1-6) E tupu roa teie mau himene arueraa oaoa i te rahi ia tae i te hopea o te Tausani matahiti, ia noaa i te huitaata nei te tia-roa-raa. E i muri iho, e haamouhia ˈi te Ophi tahito ra, te haavare rahi, o Satani iho, e na te reira e faahope roa i te parau tohu e vai ra i roto i te Genese 3:15. E aratai teie faahopearaa hanahana i te mau mea ora poietehia, te mau varua e te mau taata, ia himene amui: “O te haamaitai,  e te tura, e te hanahana, e te mana, ei ia ˈna ïa ei Tei parahi i nia iho i te terono ra, e ei te Arenio, e a muri noa ˈtu.” Eita roa ˈtu ïa e faaroo-faahou-hia te hoê noa ˈˈe reo patoi i roto i te ao taatoa nei.

25. (a) Te turai ra te taioraa i te aamu a Ioane no nia i teie himene o te ao taatoa nei ia tatou no te rave i te aha? (b) I te mea e te hope ra te orama, eaha te hiˈoraa maitai roa ta te mau mea ora e maha e te mau matahiapo e 24 e horoa ra?

²⁵ Auê ïa tau oaoa rahi e! Eita e ore tatou i te î i te oaoa i teie faataaraa a Ioane e na te reira e turai ia tatou ia tahoê atu i te mau mea poietehia e rave rahi i nia i te raˈi na roto i te himeneraa ma to tatou mafatu taatoa i te mau himene arueraa i te Atua ra o Iehova e ia Iesu Mesia. Aita anei tatou e faaitoito-rahi-hia ra i te tamau-noa-raa ma te faaoromai i te rave i te mau ohipa maitatai? Mai te peu e e, auaˈa o Iehova, e nehenehe ïa tatou e tiai ia riro mai tatou iho ei ite, i te tatararaa rahi oaoa o te orama; e tahoê atu ai tatou i to tatou reo i te himene arueraa o ta te ao taatoa e himene ra. Mea papu e mea tahoê maitai na mea ora e maha, aore ra kerubi, e te mau kerisetiano faatavaihia o tei faatia-faahou-hia, e no reira ïa te faataaraa o te orama e hope ai na roto i teie mau parau: “Ua parau ihora na mea ora e maha ra, Amene. Ua tipapa ihora te mau peresibutero [matahiapo] e piti ahuru ma maha ra i raro, e ua haamori [I]a ˈna i te tia i te oraraa e a muri noa ˈtu.”—Apokalupo 5:14.

26. E tia ia tatou ia faatupu i te tiaturiraa i nia i te aha, e eaha ta te Arenio i ineine noa i te rave?

²⁶ Ia nehenehe mau ïa outou, e hoa here ma e e taio ra i teie buka, ia faatupu i te tiaturiraa i roto i te tusia o te Arenio—‘tei au ia ˈna’—e ia haamaitaihia ta outou mau faaitoitoraa o ta outou i rave ma te haehaa no te haamori e no te tavini ia Iehova—“Tei parahi i nia iho i te terono ra.” Ia fanaˈo ïa outou i te tauturu o ta te pǔpǔ a Ioane e horoa ra i teie nei mahana na roto i te horoaraa i te ‘maa’ e au ‘i te hora au ra.’ (Luka 12:42) A hiˈo na râ! ua ineine te Arenio i te vahi i na tapao taati e hitu ra. Eaha ïa te mau faaiteraa faahiahia mau o tei faahereherehia i teie nei no tatou?

[Nota i raro i te api]

[Uiraa haapiiraa]

 [Hohoˈa api taatoa i te api 86]