Pene 1

Te Apokalupo—Te tatararaa oaoa hopea!

1. Nafea tatou e papu ai e te hinaaro ra te Atua ia oaoa tatou?

 TE APOKALUPO IA IOANE RA—teie buka o te Bibilia tei faatupu i te anaanatae rahi, teie e aratai nei i te aamu o te Atua i to ˈna tatararaa oaoa hopea nei. No te aha tatou e parau ai e “oaoa”? No te mea e “Atua oaoa,” oia te Fatu o te Bibilia o te pûpû nei i “te evanelia [parau apî] hanahana” i te feia e here ra ia ˈna. Te hinaaro ra oia ia oaoa atoa tatou. Te haapapu nei te Apokalupo i te reira i te omuaraa iho â e: “E ao to ˈna to te taio, . . . i teie nei parau tohu.” E te faaoti ra oia na roto i teie mau parau e: “E ao to te haapao i te mau parau tohu i roto i teie nei buka.”—Timoteo 1, 1:11; Apokalupo 1:3; 22:7.

2. Eaha te tia ia tatou ia rave no te iteraa ˈtu i te oaoa na roto i te buka o te Apokalupo?

² Nafea tatou e ite ai i te oaoa na roto i te buka o te Apokalupo? Na roto ïa i te imiraa i te auraa o ta ˈna mau tapao aore ra mau taipe papu maitai, e ma te faaohiparaa ia au i te reira. Ua fatata roa te aamu arepurepu o te huitaata nei i te farerei i te hoê faahopearaa ati mau, ia faatae anaˈe mai te Atua e o Iesu Mesia i te haavaraa i nia i teie amuiraa ino o te mau mea e vai nei e ia monohia ˈtu te reira i “te raˈi apî e te fenua apî,” e i reira “e ore roa te pohe.” (Apokalupo 21:1, 4) Eita anei tatou paatoa e hinaaro i te ora i roto i te hoê ao mai te reira te huru i reira te hau e te ino ore mau e vai ai? Oia e nehenehe tatou, mai te peu râ e faarahi tatou i to tatou faaroo na roto i te haapiiraa i te Parau a te Atua, e tae noa ˈtu i te parau tohu faahiahia mau o te Apokalupo.

Te Apokalupo—Eaha mau ïa?

3. No te mau taata e rave rahi, eaha ïa te Apokalupo e o Aramagedo?

³ Aita anei i pii-atoa-hia te Apokalupo te buka o te Faaiteraa aore ra Heheuraa i te parau? Oia mau, “faaiteraa aore ra heheuraa i te parau” o te iritiraa ïa na roto i te reo tahiti o te parau heleni a·po·kaʹly·psis. Ua faariro e rave rahi mau taata i te Apokalupo mai te haamouraa o te ao nei na roto i te hoê tamaˈi atomi. I roto i te hoê oire no Texas, i reira e hamani-rahi-hia ˈi te mau mauhaa tamaˈi uta atomi, ua matau te mau taata faaroo i te parau e, “O matou te mou na mua ˈˈe.” Area te mau ekalesiatiko no taua vahi ra, te parauhia ra ïa e “ua tiaturi mau ratou, e eita iho â tatou e nehenehe e ape ia Aramagedo, ua fatata roa oia, e teie tamaˈi hopea i rotopu i te mau puai o te maitai e o te ino, to te Atua e to Satani, e tupu ïa na roto te hoê ati rahi atomi.” *

4. Eaha mau na te auraa o te parau “apokalupo,” e no te aha ïa e mea tano mau ia piihia te buka hopea o te Bibilia e “Heheuraa” aore ra “Faaiteraa”?

⁴ Eaha mau na râ te hoê apokalupo? Te faataa ra te mau titionare i te reira na roto i te mau parau mai teie te huru “ati rahi o te ao taatoa nei e fatata mai nei,” area râ teie te manaˈo tumu o te parau heleni a·po·kaʹly·psis oia hoi “heheu” aore ra “faaite.” No reira e mea tano ia topahia te iˈoa o te buka hopea o te Bibilia e “Heheuraa” aore ra “Faaiteraa.” Aita e itehia nei i reira te hoê noa poroi peapea mau no nia i te hopea o te ao nei, te hoê atoa râ faaiteraa i te mau parau mau a te Bibilia o te faatupu i roto i to tatou mafatu i te hoê tiaturiraa oaoa e te hoê faaroo aueue ore.

5. (a) O vai ma te haamouhia i Aramagedo, e o vai ma te ora mai? (b) Eaha te oraraa faahiahia e vai ra i mua i te feia e ora mai i Aramagedo?

⁵ Parau mau, te faataa ra te buka hopea o te Bibilia ia Aramagedo mai “te tamaˈi i taua mahana rahi o te Atua Puai hope ra.” (Apokalupo 16:14, 16) E mea taa ê mau râ te reira i te hoê ati rahi atomi! E nehenehe e manaˈohia e na roto i teie huru ati rahi e mou ïa te taatoaraa o te ora e vai nei i nia te fenua nei. Te haapapu nei râ te Bibilia ma te oaoa hoi e o te feia iino anaˈe, te mau enemi o te Atua, te haamouhia e te mau puai e arataihia ra e te Atua. (Salamo 37:9, 10; 145:20) E ora mai te hoê nahoa rahi taata no te  mau nunaa atoa mai roto mai i te haavaraa hopea nei a te Atua i Aramagedo. I reira Iesu e haapao ai i taua mau taata ra e e aratai atu ai ia ratou i te ora mure ore i roto i te Paradaiso i nia i te fenua nei. Eita anei oe e hinaaro e o oe atoa to rotopu ia ratou? Auaa râ, te faaite ra te Apokalupo e e nehenehe mau te reira e tupu!—Apokalupo 7:9, 14, 17.

Te imiraa i te auraa o te mau parau moe a te Atua

6. I te roaraa o te mau matahiti, eaha te mau buka ta te Taiete Watch Tower i nenei no te haamaramaramaraa ˈtu i te Apokalupo?

⁶ Mai te matahiti 1917 mai â, ua nenei te Taiete Watch Tower i te buka ra Te tupuraa te parau moe, o te tatararaa taitahi o te mau irava o te mau buka a Ezekiela e te Apokalupo. I muri iho, i to te mau ohipa o te ao nei faaiteraa i te tupuraa o te mau parau tohu o te Bibilia, ua haapararehia i te taime tano maitai, i te matahiti 1930 ra, e piti na buka e tuatapapa faahou ra i te Apokalupo piihia Maramarama. I te mea e, te tamau noa ra te maramarama ‘i te ueuehia na te feia parau-tia,’ i te matahiti 1963, ua nenei te Taiete i te hoê buka e 704 api e teie to ˈna upoo parau “Ua mairi Babulonia Rahi!” Ua haamata te Basileia o te Atua i ta ˈna faatereraa! Te faatia papu maira oia i te tupuraa e te toparaa o Babulonia Rahi, te hau emepera o te haapaoraa hape o te ao nei, e te faaoti ra oia na roto i te hoê tuatapaparaa anaanatae mau no na pene hopea e iva o te Apokalupo. E i te mea e, ‘te eˈa hoi o te feia parau-tia ra, e au ïa i te maramarama anaana ra, o tei tupu noa te anaanaraa,’ no nia iho â ra i te ohipa a te mau amuiraa, i te matahiti 1969, ua haapararehia ïa te buka e 414 api e teie to ˈna upoo parau “I reira te parau moe a te Atua e hope ai,” o te tuatapaparaa ïa o na 13 pene matamua o te Apokalupo.—Salamo 97:11; Maseli 4:18.

7. (a) No te aha te Taiete i nenei ai i teie buka no nia i te Apokalupo? (b) Eaha te mau mea o te tauturu atu i te pae no te haapiiraa, i te feia e taio ra i teie buka?

⁷ No te aha ïa e tia ˈi ia nenei-faahou-hia te hoê atu â buka no nia i te Apokalupo? Mea papu maitai hoi te rahiraa o te mau haamaramaramaraa i faaite-aˈena-hia, e aita râ e vai ra te ravea no te tatara e no te nenei i te reira na roto i te mau reo e rave rau o te ao nei. No reira, ua manaˈo matou e mea faufaa ia hamanihia te hoê anaˈe iho buka no nia i te Apokalupo e te hoê buka ohie atoa no te neneiraa ˈtu i te reira na roto i te mau reo e rave rahi. Hau atu â, ua imi atoa matou i te ravea no te haamaitai atu â i te haapiiraa na roto i te mau hohoˈa, te mau tabula e te mau parau haapoto noa, o tei tauturu hoi i te feia taio ia maramarama hau atu â i te faufaaraa o teie parau tohu maere mau.

8. Eaha te tumu rahi no reira matou i nenei ai i teie buka?

⁸ Te tumu rahi râ no reira i nenei-faahou-hia ˈi teie buka maoti ra ïa o te hinaaro rû e faatano i te manaˈo e ia tuea i te parau mau e faaitehia ra i teie nei. Te ninii maira o Iehova i te hoê maramarama o te anaana noa ra no nia i te auraa o ta ˈna ra Parau; no reira ïa e maitai hau atu â ïa to tatou ite no nia i te buka o te Apokalupo, e no nia atoa i te vetahi atu â mau parau tohu a fatata noa ˈtu ai tatou i te ati rahi. (Mataio 24:21; Apokalupo 7:14) E mea faufaa mau ïa ia maramarama maitai tatou. Teie ta te aposetolo Petero i papai no nia i te parau tohu a te Bibilia: “O te mea maitai ïa ia outou ia haapao i te reira [te parau tohu], mai te lamepa e anaana i te vahi pouri ra, e ia tai ao, e ia hiti e fetia poipoi i roto i to outou na aau.”—Petero 2, 1:19.

9. (a) Eaha ta te Atua e poiete, ia au i te Apokalupo e te vetahi atu â mau parau tohu? (b) Eaha te ao apî, e nafea tatou e ora mai ai e a tomo atu ai i reira?

⁹ Te amui atoa ra te Apokalupo i ta ˈna faaiteraa i te tahi atu â mau parau tohu bibilia e rave rahi ei haapapuraa e te opua ra te Atua ra o Iehova i te poiete i te mau raˈi apî e te fenua apî. (Isaia 65:17; 66:22; Petero 2, 3:13; Apokalupo 21:1-5) No te mau kerisetiano faatavaihia o ta Iesu i hoo mai ma to ˈna ra toto ia arii ratou e o ˈna atoa i nia i te raˈi, no ratou na mua ïa teie poroi. (Apokalupo 5:9, 10) E faaitoito atoa râ teie parau apî oaoa i te faaroo o te mau milioni taata e hinaaro nei i te ora mure ore i raro aˈe i te Basileia o te Mesia. To roto atoa anei oe ia ratou? Mai te peu e, e, e faaitoito ïa te Apokalupo i ta oe tiaturiraa ia ora i roto i te Paradaiso, ei melo no te fenua apî, e ia fanaˈo atoa oe i te hau rahi, te hoê tino oraora maitai e te mau haamaitairaa e rave rau ta te Atua e ninii tamau mai. (Salamo 37:11, 29, 34; 72:1, 7, 8, 16) E hinaaro anei oe e ora mai e a tomo atu ai i roto i teie ao apî? No reira, e mea rû ïa, e mea faufaa mau, ia haapao maite tatou i te faataaraa papu maitai a te Apokalupo no nia i te anotau i reira e tupu ai te tatararaa rahi hopea nei o te fatata roa mai nei.—Zephania 2:3; Ioane 13:17.

[Nota i raro i te api]

[Uiraa haapiiraa]

 [Hohoˈa api taatoa i te api 7]