Pene 44

Te Apokalupo e o oe

1. (a) Eaha te mau parau tamahanahana ta te melahi i faatae atu ia Ioane no nia i te mau parau tǎpǔ faahiahia atoa a te Apokalupo? (b) O vai teie e parau ra e: “E inaha te haere vave atu nei au,” e i anafea oia e ‘haere mai’ ai?

 I TO OE TAIORAA i te faataaraa nehenehe mau no nia ia Ierusalema Apî, ua ui paha oe ia oe iho e: ‘E nehenehe mau anei te hoê mea nehenehe roa mai te reira te huru e iteahia mai?’ Na Ioane ïa e pahono mai i teie uiraa i to ˈna papairaa i teie mau parau a te melahi: “Ua parau maira te melahi ia ˈu, E parau mau teie nei mau parau, e te haavare ore: ua tono mai hoi te Fatu [Iehova] ra o te Atua o te mau peropheta moˈa ra i tana melahi e faaite i tana mau tavini i te mau mea e fatata i te tupu ra. E inaha, te haere vave atu nei au; e ao to te haapao i te mau parau tohu i roto i teie nei buka.” (Apokalupo 22:6, 7) E tupu mau iho â te mau parau fafau atoa o te Apokalupo. I to ˈna parauraa ˈtu na nia i te iˈoa o Iesu, te faˈi ra te melahi e te haere “vave” atu nei oia. E tuea taua haereraa mai i te haereraa mai ta Iesu i parau i to ˈna na ôraa e e haere mai oia “mai te eiâ ra” no te haamou i te mau enemi o Iehova e no te avari i te tatararaa hopea oaoa e te rahi o te Apokalupo. (Apokalupo 16:15, 16) E tia ïa ia tatou ia faaau i to tatou oraraa i te mau parau o “teie nei buka [otaro],” te Apokalupo, ia oaoa tatou i taua taime ra.

2. (a) Ua aha ˈtura Ioane i muri aˈe i te noaaraa mai ia ˈna te hoê faaiteraa faahiahia mau mai te reira te huru, e eaha ta te melahi i parau atu ia ˈna? (b) Eaha ta te mau parau a te melahi, oia hoi “[A haapao maitai!]” e “O te Atua te haamori,” e haapii maira ia tatou?

² E taa iho â ïa tatou i te rahi o to Ioane oaoa i muri aˈe i te horoaaraahia ˈtu teie Apokalupo faahiahia rahi. Te faˈi ra oia e: “O vau hoi o Ioane, o vau tei ite, e tei faaroo i teie nei mau parau, e ite aˈera hoi e faaroo aˈera vau, ua tipapa ihora hoi au i raro i te pae avae o te melahi e haamori ia ˈna, i tei faaite mai ia ˈu i teie nei mau parau. Ua parau maira oia ia ˈu, [A haapao maitai!] Eiaha roa, e taetaeae tavini hoi au no oe, e no to mau taeae i te mau peropheta ra, e no te feia i haapao i te parau i roto i teie nei buka; o te Atua te haamori.” (Apokalupo 22:8, 9; hiˈo Apokalupo 19:10.) Teie faaararaa no nia i te haamoriraa i te mau melahi o tei tataipitihia e mea tano ïa i te tau o Ioane, no te mea e au ra e te faaohipa ra vetahi pae i teie huru haamoriraa e aore ra te marô ra ratou e ua horoahia ia ratou ra te tahi mau faaiteraa taa ê no ô mai i te mau melahi ra. (Korinetia 1, 13:1; Galatia 1:8; Kolosa 2:18) I to tatou nei mau mahana, te haapapu ra te reira e e tia ia tatou ia haamori i te Atua oia anaˈe. (Mataio 4:10) E tia ia tatou ia vai ora noa eiaha tatou ia haaviivii i te haamoriraa mâ na roto i te haamoriraa ˈtu i te tahi noa ˈˈe taata e aore ra te tahi noa ˈˈe mea ê atu i te Atua iho.—Isaia 42:5, 8.

3, 4. Eaha ˈtu â ta te melahi i parau atu ia Ioane, e mea nafea te toea faatavaihia i te auraroraa i ta ˈna mau parau?

³ Te na ô faahou ra o Ioane e: “E ua parau maira oia ia ˈu, Eiaha e taatihia te parau tohu i roto i teie nei buka; ua fatata roa hoi te taime. Te taata parau-tia ore ra, e vaiiho noa ˈtu ia vai parau-tia ore noa na; e tei viivii ra, e vaiiho noa ˈtu ia viivii noa na; e te taata parau-tia ra, e vaiiho noa ˈtu ia vai  parau-tia noa na; e tei moˈa ra, e vaiiho noa ˈtu ia moˈa noa na.”—Apokalupo 22:10, 11.

⁴ I to tatou nei mau mahana, ua faaroo te toea faatavaihia i teie nei mau parau a te melahi. Aita oia i taati i te mau parau o taua tohu ra. I tatara na hoi te numera matamua roa o Te Pare Tiairaa no Siona, te Vea no te Faraa mai te Mesia (Tiurai 1879, beretane) e rave rahi mau irava o te Apokalupo. Mai ta matou i tapao i roto i te pene matamua o teie nei buka, i te roaraa o te mau matahiti ua nenei te Taiete Watch Tower i te mau vea e te mau buka e haamaramarama ra i te Apokalupo. I teie nei mahana, te huti faahou ra matou i te ara-maite-raa o te feia atoa e here ra i te parau mau i nia i te mau parau tohu faahiahia mau o te Apokalupo e to ratou tupuraa.

5. (a) Eaha te nehenehe e parauhia no te feia aore e haapao ra i te mau faaararaa e te mau aˈoraa ta Iesu i horoa i roto i te Apokalupo? (b) Eaha te tia i te feia haehaa e te parau-tia ia rave?

⁵ Mai te peu e aita vetahi pae e tauˈa ra i te mau faaararaa e te mau aˈoraa no roto mai i te Apokalupo, e tiamâraa to ratou! “Te taata parau-tia ore ra; e vaiiho noa ˈtu ia vai parau-tia ore noa na.” Te feia e au rahi nei i te viivii o to tatou nei ao e faatia ra ia ravehia te mau mea atoa, ia pohe ïa ratou i roto i taua huru viivii ra, mai te peu e tera aˈe to ratou hinaaro. Ua fatata roa te mau haavaraa a Iehova i te faatupu-taatoa-hia, na mua ˈˈe ïa na roto i te haamouraa ˈtu ia Babulonia Rahi. Ia pee maite ïa te feia haehaa i teie faaitoitoraa a te peropheta e: “E imi ia Iehova . . . ; e imi i te parau-tia, e imi i te haehaa: peneiaˈe outou o te faatapunuhia ia tae i te mahana e riri ai Iehova ra.” (Zephania 2:3) No te feia râ tei pǔpǔ aˈena ia ratou no Iehova, te na ô faahou ra te melahi e: “E te taata parau-tia ra, e vaiiho noa ˈtu ia vai parau-tia noa na; e tei moˈa ra, e vaiiho noa ˈtu ia moˈa noa na.” Ua ite tei paari e aore roa e nehenehe e faaauhia te maitai poto noa e noaahia i te hara i te mau haamaitairaa mure ore e fanaˈohia e te feia e tutavara ia vai parau-tia noa ratou e te moˈa. Te parau ra te Bibilia e: “E imi maite ia outou iho i to outou faaroo; e hiˈopoa maite ia outou iho.” (Korinetia 2, 13:5) Ia au i te  eˈa ta oe i maiti e ta oe e pee ra, e noaa ïa ia oe te utua aore ra eita.—Salamo 19:9-11; 58:10, 11.

6. Eaha ta Iehova e parau ra i te feia e taio ra i te parau tohu a te Apokalupo i te taime hopea a paraparau atu ai oia ia ratou i roto i teie parau tohu?

⁶ Teie te taime hopea a aparau atu ai Iehova te Arii mure ore i te feia e taio ra i te parau tohu o te Apokalupo, i te na ôraa e: “Inaha, te haere vave atu nei au; e tei ia ˈu nei ta ˈu utua, ia hopoi atu na te taata atoa i tei au i ta ˈna ra ohipa. O vau te Alepha e te Omega, te matamua e te faahopea, o to mua e o to muri. E ao to te feia e haapao i ta ˈna ra parau, ia au ia ratou ia amu i to nia i te raau ora ra, e ia na te mau uputu ratou i te tomo i roto i te oire ra. Area to rapae au ra, e urî ïa, e te tahutahu, e te faaturi, e te taparahi taata, e te haamori idolo, e te feia atoa e hinaaro e ua parau i te parau haavare ra.”—Apokalupo 22:12-15.

7. (a) Eaha te tumu Iehova e ‘haere vave mai ai’? (b) No te aha e ore roa te upoo faatere haapaoraa o te amuiraa faaroo kerisetiano e ô atu i roto ia Ierusalema Apî?

⁷ Teie nei â, te haafaufaa ra te Atua ra o Iehova i ta ˈna tiaraa Arii mana hope e te mure ore e te haapapu ra e ua fatata roa oia i te faatupu i ta ˈna opuaraa matamua. ‘Te haere vave atu nei’ oia no te faatupu i te haavaraa e no te horoa na te feia e imi mau ra ia ˈna te utua. (Hebera 11:6) Na ˈna e faaoti e o vai te horoahia ˈtu te utua e o vai te faaruehia ia au i te mau ture o ta ˈna iho i haamau. E mau “urî mamû noa” ra te huru o te mau melo o te upoo faatere haapaoraa o te amuiraa faaroo kerisetiano; ua tapo ratou i to ratou mata i mua i te mau ohipa faufau o ta Iehova i faahiti i ô nei. (Isaia 56:10-12; hiˈo atoa Deuteronomi 23:18, Tatararaa a te ao apî, Bibilia faahororaa irava beretane, nota i raro i te api.) Mea papu, ua  ‘hinaaro e ua parau’ ratou i te mau haapiiraa e te mau tiaturiraa haavare e aita roa ˈtu ratou i haapao i te mau aˈoraa ta Iesu i horoa i na amuiraa toohitu. No reira ïa, eita ïa ratou e ô atu i roto ia Ierusalema Apî.

8. (a) O vai ma anaˈe te haere e “amu i to nia i te raau ora,” e eaha te auraa o te reira? (b) Mea nafea te mau melo o te nahoa rahi i te ‘horoiraa i to ratou mau ahu roroa,’ e mea nafea ratou i te vai-mâ-noa-raa?

⁸ O te mau kerisetiano faatavai anaˈe iho o tei horoi mau i to ratou mau “ahu [roroa]” ia mâ ratou i mua i te aro o Iehova te nehenehe e “amu i to nia i te raau ora ra,” oia hoi e noaa ia ratou te tiaraa, aore ra te toroa, no te oraraa pohe ore i nia i te raˈi. (Hiˈo Genese 3:22-24; Apokalupo 2:7; 3:4, 5.) I muri aˈe i to ratou poheraa ei taata, e fariihia ratou i roto ia Ierusalema Apî maoti te tia-faahou-raa. Na te mau melahi 12 e vaiiho ia ratou ia tomo mai i roto, ma te opani-etaeta-raa ˈtu i te feia e faaohipa ra i te haavare e te taiata ma te faahua parau e e tiaturiraa to ratou no te raˈi. I nia i te fenua nei, te mau melo o te nahoa rahi, ratou atoa, “ua horoi i to ratou ahu, e ua teatea, i te toto o te Arenio;” e i muri iho e tia ia ratou ia vai mâ noa. E tia ia ratou ia faarue i te mau peu faufau o ta Iehova e faaara ra i ô nei e ia haapao ma te mafatu tae i te mau faaitoitoraa ta Iesu i parau i roto i na poroi e hitu o ta ˈna i faatae atu i te mau amuiraa.—Apokalupo 7:14; te pene 2 e te pene 3.

9. Eaha ta Iesu e parau ra, e te faatae-matamua-hia ra ta ˈna poroi e te Apokalupo taatoa ia vai ma?

⁹ I muri iho ia Iehova o Iesu ïa teie e paraparau nei. Te faatae ra o ˈna iho i teie mau faaitoitoraa i te mau taata aau tia e taio ra i te Apokalupo: “O vau o Iesu, e ua tono atu vau i tau melahi e faaite ia outou i roto i te mau ekalesia i teie nei mau parau. O vau te tumu e te huaai o Davida, e te fetia poipoi  anaana ra.” (Apokalupo 22:16) Oia mau, no “te mau ekalesia” na mua ˈˈe teie mau parau. O te hoê iho â ïa poroi na te amuiraa o te mau kerisetiano faatavaihia e vai noa ra i nia i te fenua nei. Te mau mea atoa i parauhia i roto i te Apokalupo ua faataehia ïa na mua ˈˈe na te mau kerisetiano faatavaihia, o te faaea i muri iho i roto ia Ierusalema Apî. Na roto i te arai o taua amuiraa ra, e fanaˈo atoa ˈi te nahoa rahi i te maramarama i te auraa o teie mau parau mau faufaa rahi a te parau tohu.—Ioane 17:18-21.

10. Eaha te tumu Iesu i parau ˈi no ˈna iho e (a) o oia “te tumu e te huaai o Davida”? (b) o oia “te fetia poipoi anaana”?

¹⁰ Ua faauehia Iesu ia faaite atu i te Apokalupo ia Ioane, e na roto i to ˈna arai i te amuiraa. O Iesu “te tumu e te huaai o Davida.” I te mea hoi e huaai na Davida i te pae tino nei, ua faaî ïa o ˈna i te mau titauraa ia riro mai oia ei Arii no te Basileia o Iehova. E riro atoa râ o ˈna ei “Metua no te ui a muri atu” na Davida, e e “aa” atoa ïa na Davida. (Isaia 9:6; 11:1, 10) O oia te Arii tamau e te pohe ore no roto mai i te huaai a Davida, o te faatupu ra i te parau faufaa a Iehova ia Davida ra, e o oia atoa te “fetia poipoi anaana ra” tei tohuhia i te tau o Mose. (Numera 24:17; Salamo 89:34-37) O oia te “fetia poipoi” e hiti ra, e aahiata ihora i reira. (Petero 2, 1:19) Aita te mau huru raveraa atoa a te enemi rahi, o Babulonia Rahi i haafifi noa ˈˈe i te hitiraa hanahana o taua fetia ra.

“A haere mai”

11. Eaha te titau-manihini-raa ta Ioane e faaite ra i teie nei, e o vai te nehenehe e farii i te reira?

¹¹ O Ioane ïa te paraparau i teie nei. Ua faˈi oia ma te aau mehara rahi no te mau mea atoa o ta ˈna i ite e o ta ˈna i faaroo e: “E te parau nei te [v]arua e te vahine faaipoipo apî, E haere mai. E o tei faaroo ra, a parau atoa oia e, E haere mai. E o tei poihâ ra, a haere mai. E tei hinaaro ra, a rave noa mai oia i te pape ora.” (Apokalupo 22:17) Eita e taotia-noa-hia te mau maitai o te tusia taraehara a Iesu i te mau 144 000 anaˈe, no te mea e titauraa te reira na te taatoaraa. Te ohipa ra te varua aore ra te puai ohipa a Iehova na roto i te arai o te pǔpǔ a te vahine faaipoipo, no reira ïa e faaroo-noa-hia ˈi teie poroi ma te papu maitai e: ‘A rave noa mai oia i te pape ora.’ (Hiˈo atoa Isaia 55:1; 59:21.) Te titau-manihini-hia ra te feia e hinaaro ra ia ‘haere mai’ e ia fanaˈo oia i te huru horoa noa o Iehova. (Mataio 5:3, 6) Auê ïa haamaitairaa taa ê mau no te feia e tiaturi ra e e ora ratou i nia i te fenua nei ia farii i teie titauraa a te pǔpǔ faatavaihia a Ioane!

12. Mea nafea te nahoa rahi i te fariiraa i te titauraa a te Apokalupo 22:17?

¹² Mai te omuaraa o te mau matahiti 30, te “faaroo” ra te hoê rahiraa melo o te nahoa rahi e haere noa ˈtura i te rahi i teie titauraa—e te haapao ra ratou i te reira. Mai to ratou mau hoa tavini faatavaihia e te varua, ua naeahia e ratou te hoê tiaraa mâ i mua i te aro o Iehova. Te tiai ra ratou ma te faaoromai ore i te mahana e pou ai Ierusalema Apî mai te raˈi mai no te haamaitairaa ˈtu i te huitaata nei. I muri aˈe i to ˈna faarooraa ˈtu i te poroi faateniteni a te Apokalupo, te parau ra te mau melo o te nahoa rahi e: “haere mai,” e hau atu â te haaputuputu ra ratou ma te ru i te tahi atu â mau taata i roto i te faanahonahoraa a Iehova e ma te faaineine ia ratou ia nehenehe atoa ratou e faaite e: “E o tei poihâ ra, a haere mai.” Te maraa noa ˈtura te rahiraa o te mau melo o te nahoa rahi; i teie nei ua hau atu ïa ratou i te 3 000 000 i roto hau atu i te 200 fenua o te ao nei e te rave amui ra ratou i te ohipa e te pǔpǔ faatavaihia a te vahine faaipoipo, e i teie nei ua iti aˈe ratou i te 9 000 melo, no te titauraa ˈtu i to ratou taata-tupu ia ‘rave noa mai i te pape ora.’

13. Eaha te faaararaa a Iesu?

¹³ Te paraparau faahou maira Iesu. Ua faˈi oia e: “Te faaite papu nei hoi au i te taata atoa e ite i te parau tohu i roto i teie nei buka, ia taati noa mai te tahi taata i te tahi parau ê i teie nei mau parau, na te Atua e taati mai ia ˈna i te mau pohe i papaihia i roto i teie nei buka. E ia iriti noa ˈtu te hoê taata i te hoê parau i te mau parau tohu i roto i teie nei buka, na te Atua e iriti ê atu i ta ˈna tufaa i roto i te buka ora, e i roto i te oire moˈa ra, e i tei papaihia i roto i teie nei buka.”—Apokalupo 22:18, 19.

14. Eaha te hiˈoraa a te pǔpǔ a Ioane no nia i “te parau tohu” o te Apokalupo?

¹⁴ E tia i te mau melo o te pǔpǔ a Ioane ia huti i te ara-maite-raa o te taata i nia i “te parau tohu” o te Apokalupo, eiaha ia huna i te reira e eiaha e tuu atu i te tahi noa ˈˈe parau ê atu i roto. E tia ia poro-hua-hia teie poroi, “i nia iho i te mau fare.” (Mataio 10:27) E mea faauruahia te Apokalupo e te Atua. O vai te tia ia taui i te hoê noa parau i ta te Atua iho i parau e i faatae atu na roto i te arai o tei riro i teie nei ei Arii e faatere ra, Iesu Mesia? Te taata e rave i teie huru ohipa, mea papu, e erehia e a ˈna te hororaa no te ora e e roohia o  ˈna i te mau pohe e tae mai i nia ia Babulonia Rahi e i nia i te ao taatoa nei.

15. Eaha te auraa o te mau parau a Iesu oia “Tei faaite mai i teie nei mau parau” e “E tae vave mau atu â vau”?

¹⁵ Te faaoti nei Iesu na roto i teie nei mau faaitoitoraa e: “Te na ô maira tei faaite mai i teie nei mau parau, E tae vave mau atu â vau.” (Apokalupo 22:20a) O Iesu “te ite mau e te parau mau.” (Apokalupo 3:14) Mai te peu e te turu ra oia i te tia o te mau orama a te Apokalupo, e parau mau ïa te reira. E mea pinepine o Iesu iho e te Atua ra o Iehova i te haapapuraa ˈtu e te haere “vave” atu nei raua, aore ra ua fatata roa; no Iesu iho e pae taime i teie nei to ˈna parauraa ˈtu i te reira. (Apokalupo 2:16; 3:11; 22:7, 12, 20) Te “haere” maira raua no te faatupu i te haavaraa i nia i te vahine faaturi rahi, i nia i te “hui arii” aore ra te mau faatere politita, e i nia i te mau enemi atoa o te “basileia no to tatou Fatu [Iehova] e no ta ˈna ra Mesia.”—Apokalupo 11:15; 16:14, 16; 17:1, 12-14.

16. I te iteraa e e tae vave atu mau Iehova e o Iesu, eaha ïa te tia ia oe i te rave ma te itoito?

¹⁶ I te mea e ua ite tatou e te haere vave atu nei te Atua ra o Iehova e o Iesu atoa, e faaitoito ïa te reira ia tatou ‘eiaha ia haamoe i te haereraa mai o te mahana o Iehova.’ (Petero 2, 3:12) Te huru aueue ore o te fenua e vai ra i roto i te amuiraa o te mau mea e faaterehia ra e Satani, e manaˈo hape ïa te reira. Te hoê noa ˈˈe huru manuïaraa a te mau raˈi, oia hoi te mau faatere o te ao a Satani, e manuïaraa poto noa ïa te reira. Te mou ra teie nei mau mea atoa. (Apokalupo 21:1) Aore e vai ra te hoê noa ˈˈe mea o te vai tamau noa, o Iehova anaˈe râ, ta ˈna Basileia e faaterehia ra e Iesu Mesia e te ao apî o ta ˈna i tǎpǔ. Eiaha roa te reira ia moehia e tatou, e tia ˈi.—Ioane 1, 2:15-17.

17. No to oe aau mehara no te huru moˈa o te Atua e turai ïa te reira ia rave oe i te aha?

¹⁷ Ia vaiiho oe i te mea o ta oe e haapii ra na roto i te tuatapaparaa i te buka o te Apokalupo e ohipa ma te hohonu i roto i to oe oraraa, e tia ˈi! Aita ra anei te mea o ta oe i haapii no nia ia Iehova iho e parahi ra i nia i te raˈi i haapapu ia oe i te hanahana e te moˈa faito ore o to tatou Poiete? (Apokalupo 4:1 e tae atu i te 5:14) Auê ïa haamaitairaa taa ê mau te taviniraa ˈtu i te hoê Atua mai te reira te huru! Na to oe aau mehara no te huru moˈa o te Atua e turai ia oe ia haapao maitai i te mau aˈoraa ta Iesu i horoa i na amuiraa toohitu ra e ia faarue roa oe i te mau peu faufau mai te hinaaro rahi i te taoˈa materia, te haamori idolo, te taiataraa, te faataupupu, te faatupuraa i te mau pǔpǔ faaroo taa ê apotata, e te mau mea atoa o te faariro i ta oe taviniraa ei mea au-ore-hia e Iehova. (Apokalupo 2:1 e tae atu i te 3:22) E nehenehe atoa e faaohipahia ˈtu te manaˈo o te faaitoitoraa ta te aposetolo Petero i faatae atu i te pǔpǔ a Ioane i te mau melo o te nahoa rahi e: “Mai Ia ˈna hoi i parau mai ia outou e moˈa ra, ia moˈa atoa outou i ta outou mau parau atoa.”—Petero 1, 1:15, 16.

18. E faaô atoa oe ia oe iho i roto i te aha, ia au i te maraa ia oe, e no te aha e ohipa ru te reira i teie nei mahana?

¹⁸ E hau atu â ia î atoa outou i te itoito o tei faaapî-noa-hia no te pororaa ˈtu i “te matahiti hinaarohia e Iehova; e te mahana tahooraa na to tatou Atua”! (Isaia 35:4; 61:2) Mai te peu noa ˈtu e melo oe no te nǎnǎ iti e aore ra no te nahoa rahi, a haa ïa ia au i tei maraa ia oe no te faaiteraa i te niniiraa o na aua toohitu o te riri o Iehova ma te faaiteraa ˈtu i te mau haavaraa ta te Atua i faaoti no nia i te ao a Satani. I te hoê â taime, a tahoê atu i to oe reo i te pororaa oaoa no nia i te parau apî maitai mure ore no nia i te Basileia a Iehova e ta ˈna ra Mesia, Basileia o tei haamauhia i teie nei. (Apokalupo 11:15; 14:6, 7) Ia itoito oe i te raveraa i taua ohipa ra, e tia ˈi. Ia ite maitai te feia e rave rahi o te ore â e tavini ia Iehova e te ora nei tatou i te mahana o te Fatu ra e ia hinaaro ratou e amui atu i roto i te ohipa pororaa i te parau apî maitai. E ia haere ratou i mua e tae noa ˈtu i te pûpûraa ˈtu i to ratou ora no te Atua e ia bapetizo ia ratou, e tia ˈi! Eiaha ia moehia ia tatou e “ua fatata te tau e tupu ai”!—Apokalupo 1:3.

19. Eaha te mau parau faaotiraa a te aposetolo ruhiruhia o Ioane, mai te aha ïa to oe huru i mua i te reira?

¹⁹ Te pure hua atoa nei tatou e o Ioane iho e: “Amene. Oia ïa, a haere mai, e te Fatu, e Iesu e!” E ua na ô faahou â teie aposetolo ruhiruhia e: “Ei ia outou [te feia moˈa] atoa na te aroha mau o to tatou Fatu ra o Iesu Mesia.” (Apokalupo 22:20b, 21) Ia vai atoa te reira i rotopu ia outou atoa e taio nei i teie nei buka. Ia tiaturi outou e te fatata maira te tatararaa rahi hopea nei o te Apokalupo, e tia ˈi, ia nehenehe outou e parau ma te mafatu tae mau e: “Amene.”

[Uiraa haapiiraa]

[Hohoˈa i te api 314]

“To rapae au ra, e urî ïa . . . ”

[Hohoˈa i te api 315]

‘E ao to te feia e ia na te mau uputa ratou i te tomo i roto i te oire’