Pene 28

Te aroraa i na puaa taehae toopiti nei

Orama 8—Apokalupo 13:1-18

Tumu parau: Te puaa taehae e hitu o ˈna afii, te puaa taehae e piti o ˈna tara e te hohoˈa o te puaa taehae

Tau no te tupuraa: Mai te tau o Nimeroda e tae noa ˈtu i te ati rahi

1, 2. (a) Eaha ta Ioane e parau ra no nia i te teni? (b) Mea nafea Ioane i te faataaraa i te faahohoˈaraa a te hoê faanahonahoraa ite-mata-hia ta te teni e faaohipa ra?

 UA HURIHIA te teni rahi i raro i te fenua nei! Ua papu maitai ia tatou e i to tatou tuatapaparaa i te Apokalupo, eita roa ˈtu te Ophi tahito ra e ta ˈna mau demoni e faatiahia ia hoˈi faahou ratou i nia i te raˈi. Aita râ tatou i matara ˈtura i te ohipa a taua ophi ra, “tei parauhia o te diabolo ra, e o Satani hoi, o tei haavare i to te ao atoa nei.” No reira e haamaramarama hau atu â te faatiaraa i mua nei i te mau ravea ta Satani e faaohipa no te aroraa ˈtu i ‘te vahine e ta ˈna ra huaai.’ (Apokalupo 12:9, 17) Teie ta Ioane e parau ra no nia i te teni, aore ra te ophi: “Tia ihora [oia] i nia i te one tahatai.” (Apokalupo 13:1a) E hiˈopoa ïa tatou i te ravea ta te teni e faaohipa ra.

² Eita te mau raˈi moˈa e haafifi-faahou-hia e Satani e ta ˈna ra mau demoni. Ua tiavaruhia teie mau varua iino e ua taotiahia ratou i pihai iho i te fenua nei. Mea papu o te reira ïa te tumu a parare roa ˈi te mau peu tahutahu i te senekele XX. Te faatere noa ra te Ophi paari i te hoê faanahonahoraa viivii i te pae varua, teie râ te faaohipa atoa anei oia i te hoê faanahonahoraa ite-mata-hia no te haavare i te huitaata nei? Teie te pahonoraa a Ioane: “E hiˈo atura vau i te hoê puaa i te aˈera ˈˈe i nia mai mai raro mai i te moana ra, e hitu o ˈna afii, auahuru hoi tara; auahuru hoi korona i nia iho i taua mau tara no ˈna ra, e e iˈoa faaino anaˈe tei nia iho i to ˈna mau afii. E taua  puaa ta ˈu i ite ra mai te nemera te huru, e mai to te daba ra to ˈna avae, e to ˈna vaha mai te vaha ïa o te liona: e ua horoa maira te teni i to ˈna iho puai, e to ˈna iho terono, e te mana rahi no ˈna.”—Apokalupo 13:1b, 2.

3. (a) Eaha te mau puaa taehae ta te peropheta ra o Daniela i ite orama mai? (b) Te faahohoˈa ra teie mau puaa rarahi tei faataahia i roto i te Daniela pene 7, i te aha?

³ Eaha ta teie puaa mehameha mau e faahohoˈa ra? Na te Bibilia iho e faataa i te reira. Na mua ˈˈe Babulonia a topa ˈi i te matahiti 539 hou to tatou nei tau, ua ite atoa te peropheta ra ati iuda o Daniela i te mau orama no nia i te mau puaa taehae. I roto i te Daniela 7:2-8, te faataa ra oia i na puaa toomaha i te aˈeraa mai mai raro mai i te moana; te puaa matamua mai te liona ïa, te piti mai te daba ïa, te toru mai te nemera ïa, e “o te maha ïa o te mea ora, e mea riaria e te mehamehahia, e te puai rahi: . . . hoê ahuru hoi o ˈna tara.” Te faaite ra teie mau puaa i te hoê â huru maere mau e te puaa taehae ta Ioane i ite i te matahiti 96 no to tatou nei tau. Oia mau, e hohoˈa liona, e te daba e te nemera atoa te huru to teie puaa hopea nei, e hoê ahuru o ˈna tara. Ua faaauhia ra teie mau puaa rarahi ta Daniela i ite i te aha? Na ˈna iho e faaite mai ia tatou i te reira i te na ôraa e: “Taua na mea ora rarahi . . . e maha ïa basileia [arii], o te tupu ïa i te fenua nei.” (Daniela 7:17) Oia mau, te faahohoˈa ra teie mau puaa i te mau “basileia [arii]” aore ra te mau puai politita e vai ra i nia i te fenua nei.

4. (a) Te faahohoˈa ra te mamoe oni e te puaaniho oni o tei faahitihia te parau i roto i te Daniela pene 8, i te aha? b) Eaha ïa te faahohoˈahia ra i te mea e ua fati te tara rahi a te mamoe oni e na tara e maha i mono atu i te reira?

⁴ I roto i te tahi atu â orama, ua ite o Daniela i te hoê mamoe oni e piti o ˈna tara e na te hoê puaaniho oni e hoê o ˈna tara i huri ia ˈna i raro. E na te melahi o Gaberiela i faataa ia ˈna te auraa o teie na puaa i te na ôraa e: “O te mamoe oni . . . o na arii ïa no Medai e no Peresia. E te puaaniho aito ra, o te arii ïa no Iavana [Heleni].” Ua tohu o Gaberiela i muri iho e e fati te tara rahi o te puaaniho oni e na tara e maha e mono ia ˈna. O te reira mau tei tupu ua hau atu i te 200 matahiti i muri iho, i to Alexandre le Grand poheraa e i te tatuhaaraahia ta ˈna basileia na roto e maha basileia e faaterehia ra e ta ˈna mau tenerara e maha.—Daniela 8:3-8, 20-25. *

5. (a) Eaha te taatoaraa o te auraa o te parau heleni o tei tatarahia na roto i te parau puaa? (b) Te faahohoˈa ra te puaa taehae e na afii toohitu ra o te Apokalupo 13:1, 2, i te aha?

⁵ Mea maramarama maitai ïa no te Fatu o te Bibilia, te buka o te faauruahia e te Atua, e faariro ra oia i te mau puai politita e vai ra i nia i te fenua nei i te mau puaa ra te huru. Mai te aha ïa te huru o taua mau puaa ra? Te parau ra te hoê taata tuatapapa e e mea “oviri” teie puaa e faahitihia ra te parau i roto i te Apokalupo 13:1, 2, e te na ô faahou ra oia e: “Ua ite maitai matou i te taatoaraa o te auraa o te parau θηρίον [thêrion, te parau heleni no te “puaa”], oia hoi te hoê puaa mehameha ino mau, te hoê puaa haamou, riaria, taehae, e te vai atu â.” * Te faataa maitai maira teie parau i te huru o te amuiraa politita o tei viiviihia i te toto e o ta Satani e faaohipa ra no te haavî i te huitaata nei! Te faahohoˈa ra teie afii toohitu o te puaa taehae ra i na puai rahi tooono o te ao nei tei iteahia mai te tahi i muri iho i te tahi i roto i te aamu o te Bibilia e tae roa ˈtu i te mau mahana o Ioane—Aiphiti, Asura, Babulonia, te Hau emepera no Medai e o Peresia, Heleni e o Roma—e oia atoa te hitu o te puai o te ao nei, o tei iteahia i muri roa iho, ia au i te parau tohu.—Hiˈo Apokalupo 17:9, 10.

6. (a) Eaha te ohipa taa ê i ravehia e te afii toohitu o te puaa taehae? (b) Mea nafea o Iehova i te faaohiparaa ia Roma no te faatupuraa i Ta ˈna haavaraa i nia i te amuiraa o te mau mea ati iuda, e eaha tei tupu mai i nia i te mau kerisetiano no Ierusalema?

⁶ Parau mau, i vai na te tahi atu â mau puai o  te ao i teie mau puai toohitu nei i te roaraa o te Aamu, e oia atoa no te puaa taehae ta Ioane i ite, aita e itehia ra e hitu afii e hoê ahuru tara anaˈe, e tino atoa râ to ˈna. Area râ te faahohoˈa ra na afii toohitu i na puai rahi toohitu o te ao nei, o tei haavî te tahi i muri iho i te tahi, i te nunaa a te Atua. I te matahiti 33, i te mea e o Roma te puai e faatere ra i te reira tau, ua faaohipa Satani i taua afii ra o te puaa taehae no te haapohe i te Tamaiti a te Atua. I taua taime ra, ua faarue te Atua i te amuiraa taiva o te mau mea ati iuda, e i muri iho, i te matahiti 70, ua faatia ihora oia i to Roma ia faatupu i Ta ˈna haavaraa i nia i taua nunaa ra. Auaa râ, ua faaarahia te Iseraela mau a te Atua, oia hoi te amuiraa o te mau kerisetiano faatavaihia; ua horo ïa te mau kerisetiano e noho ra i Ierusalema e i Iudea i te hoê vahi papu i te tahi atu pae o Ioridana.—Mataio 24:15, 16; Galatia 6:16.

7. (a) Eaha tei tupu mai ia tae i te hopea o te amuiraa o te mau mea e vai nei e i te mahana o te Fatu ra? (b) Te faahohoˈa ra te hitu o te afii o te puaa taehae e faahitihia ra i roto i te Apokalupo 13:1, 2 i te aha?

⁷ Fatata râ i te hopea o te senekele I, ua faarue e rave rahi mau melo o taua amuiraa matamua ra i te parau mau; ua fatata râ te huero kerisetiano maitai, oia hoi “te tamarii ïa o te basileia,” i te moe roa i te aihere ino, oia hoi “te tamarii ïa a te varua ino.” I te taeraa mai râ te hopea o te amuiraa o te mau mea e vai nei, ua itea-faahou-hia mai te mau kerisetiano faatavaihia ei pǔpǔ faanaho-maitai-hia. I roto i te mahana o te Fatu ra, i reira te feia parau-tia ‘e anaana mai ai mai te anaana o te mahana ra.’ Ua faanahohia ïa te amuiraa kerisetiano no te raveraa i te ohipa. (Mataio 13:24-30; 36-43) I taua tau ra, ua mou ïa te Hau emepera roma. O te Hau emepera beretane rahi roa e te mau Etats-Unis puai mau no Marite nau puai matamua o te ao nei. O teie nau puai o te ao nei te hitu ïa o te afii o te puaa taehae.

8. No te aha eita e tia ia huru-ê-hia te taata i te mea e ua faaauhia nau Puai beretane e marite i te hoê puaa te huru?

⁸ E ere anei i te mea au ore ia faaau-anaˈe-hia te mau puai politita e faatere ra i te hoê puaa taehae? I roto i te Piti o te Tamaˈi rahi o te ao nei, o te reira ïa te parau a vetahi mau enemi o te mau Ite no Iehova, e ua marôhia to ratou tiaraa, ei pǔpǔ e ei taata taitahi, i mua i te mau tiribuna o te ao taatoa nei. Aita râ anei te mau nunaa iho e rave ra i te mau puaa, te mau animala taehae ei taipe no to ratou aiˈa? Ei hiˈoraa, te vai ra te liona beretane, te aeto marite, te teni tinito e te daba rusia. No te aha ïa tatou e faahapa ˈi i te Fatu o te Bibilia Moˈa ia rave anaˈe oia i te mau puaa no te faataipe i te mau puai o te ao nei?

9. (a) No te aha e ore ai e tia ia huru-ê-hia te taata i te mea e, ia au i te Bibilia, na Satani i horoa i te mana rahi i te puaa taehae? (b) Mea nafea te faataaraahia Satani i roto i te Bibilia, e eaha te huru o to ˈna mana i nia i te mau faatereraa?

⁹ E hau atu â, no te aha te taata e ore ai e farii, ia au i te Bibilia, na Satani i horoa i te hoê mana rahi i teie puaa taehae? Na te Atua iho teie parau, e i mua ia ˈna ‘e au te mau fenua nei mai te topata pape i roto i te bakete e mai te huˈa repo.’ E mea maitai aˈe ia imi te mau nunaa ia auhia mai ratou e te Atua eiaha râ ratou ia inoino i te huru faataaraa a ta ˈna Parau tohu no nia ia ratou. (Isaia 40:15, 17; Salamo 2:10-12) E ere roa ˈtu Satani e taata no te aai e haamauiui ra i te nephe o te feia pohe i roto i te po auahi; e aita hoi e vai ra te hoê vahi mai te reira te huru. Te faataa ra râ te mau Papai ia Satani mai te hoê “melahi . . . no te maramarama”—te haavare aravihi e haafifi ra ma te mana rahi i te taatoaraa o te mau ohipa politita.—Korinetia 2, 11:3, 14, 15; Ephesia 6:11-18.

10. (a) Eaha te auraa i te mea e te vai ra hoê korona i nia i te mau tara taitahi? (b) Te faahohoˈa ra na tara hoê ahuru e te na korona hoê ahuru i te aha?

¹⁰ E ahuru tara to te puaa taehae i nia i na hitu afii. Peneiaˈe, te vai ra hoê tara i nia i na maha afii taitahi, e e piti tara i nia i na toru afii taitahi. E hau atu â, te vai ra ahuru mau korona i nia i taua mau tara ra. E tia ia ravehia te numera tia, mai tei papaihia, o te mau puaa riaria mau tei faataahia i roto i te buka a Daniela. No reira, te faahohoˈa ra na tara toopiti o te hoê mamoe oni i te hoê hau emepera e piti to ˈna nunaa, oia hoi o Medai e o Peresia. E te faahohoˈa ra na tara toomaha o te hoê puaaniho i na hau emepera toomaha i tupu mai i te hoê â taime mai roto mai i te Hau emepera heleni a Alexandre le Grand. (Daniela 8:3, 8, 20-22) Area râ, mai te mea ra e, e auraa taipe to te numera o te mau tara, hoê ahuru, ta Ioane i ite i nia i te puaa. (Hiˈo Daniela 7:24; Apokalupo 17:12.) Te faahohoˈa ra teie mau tara i te taatoaraa o te mau Hau rahi o te faanahonahoraa politita taatoa a Satani. E  huru raveraa uˈana e te taehae to teie mau tara atoa, area râ, mai ta teie e hitu afii e haapapu ra, na te hoê anaˈe iho ïa puai e raatira ra i te hoê â taime. Oia atoa, te faaite ra na korona ahuru e e tia i te mau Hau atoa ia faatere i te hoê â taime e te Hau rahi aˈe aore ra puai o te ao nei no te reira tau.

11. Eaha te auraa i te mea e “e iˈoa faaino anaˈe tei nia iho i [te] mau afii” o te puaa taehae?

¹¹ E “e iˈoa faaino anaˈe tei nia iho i [te] mau afii” o te puaa taehae, teie ïa te auraa, te faaite ra oia i te faatura ore rahi mau i te Atua ra ia Iehova e ia Iesu Mesia, na roto i ta ˈna mau titauraa teoteo. Ua rave oia i te iˈoa o te Atua e o te Mesia ia manuïa ta ˈna mau opuaraa politita; e ua amuimui atu oia i te haapaoraa hape, e ua tae roa oia i te faatia i te upoo faatere haapaoraa ia faaô atoa ia ratou i roto i te mau ohipa politita. I Beretane, ei hiˈoraa, e parahi atoa te mau epikopo i roto i te Apooraa a te mau faatere hau. E tiaraa politita teitei to te mau arii epikopo katolika i te matamua i Farani e i Italia, e e ere i te mea maoro aˈenei, ua farii te mau perepitero i te mau toroa politita i Marite latino. Ua nenei te tahi mau hau i nia i ta ratou mau moni papai i te mau parau mai teie te huru “E TIATURI TATOU I TE ATUA” e i nia atoa i ta ratou mau toata te mau faˈiraa parau e haapapu ra e ua farii te Atua i ta ratou mau tia, e ua haamanahia ratou “na nia i te haamaitairaa a te Atua,” ei hiˈoraa. E mau parau faaino mau ïa teie. I te na reiraraa, te tamata ra ratou i te faaô i te Atua i nia i te tahua tatauraa politita e te here aiˈa viivii.

12. (a) Mea nafea te puaa taehae i te aˈeraa i nia mai raro mai i “te moana,” e i anafea oia i te haamataraa? (b) Mea nafea te teni i te horoaraa i te mana rahi i teie puaa taipe?

¹² Te haere maira te puaa taehae mai raro mai i te moana, taipe tano maitai no te mau taata arepurepu noa, e no roto mai hoi teie mau faatereraa taata nei. (Isaia 17:12, 13) Ua haamata teie puaa taehae i te aˈeraa i nia mai raro mai i te moana o te huitaata arepurepu i te mau mahana o Nimeroda (fatata i te senekele XXI hou to tatou nei tau), i te iteraahia mai i muri iho i te diluvi te hoê faanahonahoraa patoi ia Iehova. (Genese 10:8-12; 11:1-9) Ua ite-maitai-hia te afii hopea o na afii toohitu nei i te mahana o te Fatu ra. A tapao atoa na e na te teni i “horoa . . . i to ˈna iho puai, e to ˈna iho terono e te mana rahi” no te puaa. (Hiˈo Luka 4:6.) Te puaa o te amuiraa politita ïa ta Satani i haamau i rotopu i te mau taata. O Satani mau ïa “te arii o teie nei ao.”—Ioane 12:31.

 Te paruparu pohe

13. (a) Ua roohia te puaa taehae i teihea ati i te omuaraa o te mahana o te Fatu ra? (b) Mea nafea te puaa taehae taatoa i mauiui ai i te paruparu pohe o te hoê o to ˈna mau afii?

¹³ I te omuaraa o te mahana o te Fatu ra, ua roohia teie puaa taehae i te ati. Te parau ra Ioane e: “Ite atura vau i te hoê afii no ˈna i te paruparuraa, mai te mea e paruparu pohe; faaorahia aˈera râ taua paruparu pohe no ˈna ra; maere anaˈe ihora to te ao atoa, e ua pee atura i taua terio [puaa taehae] ra.” (Apokalupo 13:3) Ia au i taua irava ra, ua roohia te hoê afii o te puaa taehae i te paruparu pohe, i roto râ i te irava 12, e au ra e o te puaa taatoa tei atihia. No te aha ïa? Te haamanaˈo ra tatou e eita te mau afii atoa o te puaa e riro ei puai rahi i te hoê â taime, area râ, ua haavî ratou te tahi i muri iho i te tahi, ma te teoteo mau i te huitaata nei e i te nunaa a te Atua iho â râ. (Apokalupo 17:10) No reira ïa, i te omuaraa o te mahana o te Fatu ra, o te hitu anaˈe iho ïa o te mau afii tei ohipa ei puai faatere o te ao nei. Ua mauiui roa ïa te puaa taehae taatoa i te paruparu pohe o taua afii ra.

14. I anafea te rooraahia te puaa i te paruparu pohe, e mea na roto i teihea mau parau to te hoê ofitie faaiteraa mai i te mau faahopearaa i nia i te puaa taehae?

¹⁴ Eaha ïa taua paruparu pohe ra? I mua rii te faaitehia ra e e puta ˈoˈe ïa; e te faahohoˈa ra hoi te ˈoˈe i te tamaˈi. E nehenehe e faaauhia teie puta ˈoˈe, o tei patiahia i te omuaraa o te mahana o te Fatu ra, i te Tamaˈi rahi Matamua o te ao nei, o tei faaano e o tei haaparuparu roa i te puaa taehae politita e arataihia ra e Satani. (Apokalupo 6:4, 8; 13:14) Mea na roto i teie mau parau to te taata papai ra o Maurice Genevoix, e ofitie hoi oia i roto i taua tamaˈi ra, i faaite mai i te mau faahopearaa o taua tamaˈi ra e: “E farii iho â te taatoaraa o te taata e, i roto i te aamu taatoa o te huitaata nei, e mea varavara roa te mau taio mahana faufaa roa mai te 2 no atete 1914. Na mua ˈˈe o Europa, e i muri iho fatata ïa te taatoaraa o te huitaata nei tei topa i roto i te hoê tupuraa riaria mau. Te mau faaauraa parau, te mau faaauraa i te pae totiare, te mau ture morare, ua aueue ïa te mau niu atoa; i muri aˈe i te hoê noa mahana, ua taui ïa te mau mea atoa. Ua hau aˈe teie tupuraa i tei mǎtaˈuhia e te taata e i tei ferurihia ma te au noa. Te huti noa ra oia ia tatou, ma te ore e nehenehe e faaauhia to ˈna rahi, ma te huanane, ma te mehameha, i roto i te mau arepurepuraa o ta ˈna i faatupu.”—Maurice Genevoix, melo no te Hiva tahuˈa farani, no roto mai i te buka ra Ua tǎpǔhia te hanahana (beretane), 1968.

15. Mea nafea te hitu o te afii o te puaa taehae i te rooraahia i te paruparu pohe?

¹⁵ Ua riro teie tamaˈi ei ati mau no te hitu o te afii o te puaa taehae e faatere ra. Ua pohe te hoê rahiraa taurearea, e aita to ˈna e faauraa no te fenua Beretane, e no te tahi atu â mau nunaa no Europa. I te matahiti 1916, i roto i te hoê anaˈe iho tamaˈi, tei tupu i te anavai o Somme, ua pohe, 420 000 Beretane, 200 000 Farani e 450 000 Helemani—ua hau atu ïa i te hoê mirioni faehau! Ua roo-atoa-hia te fenua Beretane e te toea o Europa i te mau aueueraa i te pae faanavairaa faufaa. Ua aueue te Hau emepera beretane rarahi i taua paruparu pohe ra, e aita oia i ora roa mai. Ma te papu maitai, ua faaaueue teie tamaˈi e e 28 nunaa rahi tei ô i roto, i te ao taatoa nei i taua paruparu pohe ra te huru. I te 4 no atete 1979, e 65 matahiti i muri iho te Tamaˈi rahi Matamua o te ao nei i te haamataraa, teie ta te vea beretane ra The Economist, no Lonedona i te fenua Beretane i parau: “I te matahiti 1914, ua erehia teie nei ao i te hoê autahoêraa o tei ore roa i ite-faahou-hia mai.”

16. I roto i te Tamaˈi rahi Matamua o te ao nei, mea nafea te mau Etats-Unis i te faaiteraa e e tuhaa atoa ta ratou i roto i nau puai o te ao nei?

¹⁶ I te hoê â taime, te Tamaˈi Rahi, to ˈna ïa iˈoa i te reira tau, ua itea-maitai-hia mai te mau Etats-Unis ei tuhaa no te Puai beretane e marite  o te ao nei. I te mau matahiti matamua o te tamaˈi, na roto i te manaˈo o te huiraatira, aita te mau Etats-Unis i faaô ia ratou i roto i taua tamaˈi ra. Area râ, mai ta te taata papai aamu o Esmé Wingfield-Stratford i papai, “i taua hora ati mau ra, teie ïa te tumu parau rahi, e faaore ra anei te fenua Beretane e te mau Etats-Unis i to raua mau peapea no te faatupu i ta raua tahoêraa puai rahi e no te haamau i te hoê faatereraa amui.” Te faaite ra te Aamu e o te reira mau ta raua i rave. I te matahiti 1917, ua faaohipa te mau Etats-Unis i ta ratou mau maitai e ta ratou nuu no te tururaa ˈtu i te mau tutavaraa no te tamaˈi a te mau nunaa patoi ia Helemani e paruparu ra. Mea na reira te hitu o te afii, te fenua Beretane e te mau Etats-Unis, i te upootiaraa mai i roto i taua aroraa ra.

17. Eaha tei tupu i nia i te amuiraa a Satani e vai ra i nia i te fenua nei i muri aˈe i te tamaˈi?

¹⁷ I muri aˈe i te tamaˈi, ua taui roa ïa te ao nei. Area râ, noa ˈtu e ua ano oia i te paruparu pohe, ua ora faahou maira te amuiraa a Satani i nia i te fenua nei e ua hau atu to ˈna puai i to mutaa ihora; ua faahiahia roa te mau taata atoa i mua i teie huru faaora-faahou-raa no ˈna ra.

18. Eaha ïa te auraa i te mea e “maere anaˈe ihora to te ao atoa, e ua pee atura i taua terio [puaa taehae] ra”?

¹⁸ Ua papai te taata tuatapapa aamu o Charles L. Mee junior e: “Ua riro te toparaa te huru faanahoraa tahito [na roto i te Tamaˈi rahi Matamua o te ao nei], ei haamataraa titauhia no te haaparareraa te manaˈo e e tia i te mau fenua ia faatere ia ratou iho, no te faatiamâraa i te mau nunaa e te mau pǔpǔ apî, e ia iteahia mai te hoê tiamâraa e te hoê auraro-ore-raa aitâ i farereihia aˈenei.” Te hitu o te afii o te puaa taehae, o tei ora i teie nei, e ohipa faufaa rahi hoi ta te mau Etats-Unis no Marite i roto, na ˈna ïa i faahaere i te mau mea i mua i te tau i muri aˈe i te tamaˈi. Ua riro te Puai beretane e marite o te ao nei ei auvaha no te Taiete o te mau Nunaa e no te mau Hau amui. I te omuaraa o te mau matahiti 80, ua turai te puai politita marite i te mau fenua navai ia haamaitai roa ˈtu â i to ratou oraraa, ia aro atu i te mau maˈi e ia faatupu i te tahi mau ravea apî. Ua tae roa oia i te faahaere e 12 taata i nia roa iho i te avaˈe. Eita iho â tatou e maere i te mea e, “maere anaˈe ihora to te ao atoa, e ua pee atura i taua terio [puaa taehae] ra!”

19. (a) Mea nafea te mau taata i te ore i haafaahiahia noa i te puaa taehae? (b) Tei ia vai te mana rahi i nia i te mau basileia atoa o te fenua nei, e nafea tatou e papu ai i te reira? (c) Mea nafea Satani i te horoaraa i to ˈna ra mana i te puaa taehae, e eaha te faahopearaa no te rahiraa o te mau taata?

¹⁹ Mai ta Ioane e faaite ra i muri iho, aita te huitaata i haafaahiahia noa i te puaa taehae: “E ua haamori ratou i te teni ra, oia i horoa i te mana no te terio [puaa taehae] ra: e ua haamori ratou i te terio [puaa taehae] ra, i te na ôraa e, O vai tei au i te puaa nei? e tia ia vai ia tamaˈi mai ia ˈna ra?” (Apokalupo 13:4) I to Iesu parahiraa i nia i te fenua nei, ua parau Satani e e mana to ˈna i nia iho i te mau basileia taata atoa, e aita hoi Iesu i patoi atu i te reira; ua faariro ra oia ia Satani ei raatira no teie nei ao e aita oia i farii e faaô ia ˈna i roto i te mau ohipa politita o to ˈna ra tau. I to ˈna aˈe pae, e papai Ioane i muri iho i te mau kerisetiano e: “Ua ite hoi tatou e no te Atua tatou, e te vai noa nei to te ao atoa i raro aˈe i taua varua ino ra.” (Ioane 1, 5:19; Luka 4:5-8; Ioane 6:15; 14:30) Oia mau, te horoa ra Satani i to ˈna ra mana i te puaa taehae e ua na reira oia na nia i te manaˈo here aiˈa. No reira ïa, maoti i te tahoêhia e te hoê aroha e au i te hinaaro o te Atua, ua amahamaha te mau taata na roto i te teoteo o te opu fetii, o te huru o te iri e o te aiˈa. Te haamori ra te rahiraa o te taata i te tuhaa o te puaa taehae e haavî ra i te fenua e faaeahia ra e ratou. Mea na reira ïa te mau taata i te haafaahiahiaraa e te haamoriraa i te puaa.

20. (a) Mea nafea te mau taata i te haamoriraa i te puaa taehae? (b) No te aha te mau kerisetiano e haamori ra ia Iehova e ore ai e haamori i te puaa taehae, e o vai ta ratou e pee ra?

²⁰ Mea nafea te mau taata i te haamaoriraa i te puaa? Na roto ïa i te tuuraa ˈtu i te here aiˈa na mua ˈˈe i te here ia Iehova. E here iho â te rahiraa o te mau taata i te fenua i reira ratou i te fanauraahia. Te faatura atoa ra te mau kerisetiano mau, mai te huiraatira maitai te huru, i te mau tia faatere e te mau taipe no te fenua e faaeahia ra e ratou, te auraro ra ratou i te mau ture e te ohipa atoa ra ratou no te maitai o to ratou mau taata-tupu. (Roma 13:1-7; Petero 1, 2:13-17) Eita râ ratou e nehenehe e tiaturi mai te matapo ra te huru i te hoê anaˈe iho fenua, ma te patoi atu i te tahi atu mau fenua. Eita te hoê kerisetiano e tia ia parau e: “Noa ˈtu e ua hape e aore ua tano ratou, o to ˈu ïa fenua.” Eita roa ˈtu te mau kerisetiano e haamori ra ia Iehova e  nehenehe e amui atu i roto i te mau haamoriraa here aiˈa teoteo i te hoê noa ˈˈe tuhaa o te puaa taehae, no te mea e haamori ïa ratou i te teni tei horoa i to ˈna ra mana i te puaa. Eita roa ˈtu ratou e nehenehe e ui ma te faahiahia rahi e: “O vai tei au i te puaa nei?” Eita roa ˈtu, te pee nei râ ratou i te hiˈoraa o Mihaela, teie hoi te auraa o to ˈna ra iˈoa “O vai tei au i te Atua ra?,” na roto i te faateiteiraa ˈtu i te mana arii o Iehova i nia i te ao taatoa nei. Ia tae râ i te tau faataahia e te Atua, e aro mau ïa teie Mihaela, oia hoi o Iesu Mesia i te puaa taehae e e upootia mai oia, mai ta ˈna atoa i upootia i nia ia Satani i to ˈna tiavaruraa ia ˈna i rapae i te raˈi.—Apokalupo 12:7-9; 19:11, 19-21.

E tamaˈi oia i te feia moˈa

21. Mea nafea Ioane i te faataaraa i ta Satani huru faaohiparaa i te puaa taehae?

²¹ Ua opua anaˈe na Satani, taua varua paari ra, i te faaohipa i te puaa taehae ia manuïa oia. O te reira ïa ta Ioane e faataa ra i teie nei: “E e vaha tei horoahia mai no taua puaa ra, i te parauraa mai i te parau ahaaha e te faaino, e e mana tei ho-mai-hia mai no ˈna, e ia maha ˈˈe ahuru i te marama e ia piti tiahapa. Ua parau ihora to ˈna vaha i te parau faaino i te Atua, e te faaino i to ˈna iˈoa, e to ˈna sekene, e te feia i parahi i nia i te raˈi ra. E i tuuhia ˈtu ia ˈna te tamaˈi mai i te feia moˈa, e ia pau ratou ia ˈna, e e mana tei ho-mai-hia mai no ˈna i te mau opu atoa, e i te mau reo atoa, e i te mau fenua atoa. E o to te ao atoa nei tei haamori ia ˈna, o tei ore i papaihia to ratou iˈoa mai te matamua mai â o te ao nei, i roto i te buka ora a te Arenio i taparahihia ra.”—Apokalupo 13:5-8.

22. (a) E nehenehe e faaauhia na 42 avaˈe i teihea tau? (b) I te roaraa e 42 avaˈe, mea nafea te mau kerisetiano faatavaihia i te ‘pauraa’?

²² E au ra e ua aifaito ïa teie 42 avaˈe i na toru matahiti e te afa i reira te hoê tara e vai ra i nia i te afii o te hoê o te mau puaa e faahitihia ra te parau i roto i te parau tohu a Daniela i haapeapea ˈi i te feia moˈa. (Daniela 7:23-25; hiˈo atoa Apokalupo 11:1-4.) No reira ïa, mai te hopea o te matahiti 1914 e tae atu i te matahiti 1918, e te taparahi ra te mau nunaa e aro ra te tahi i te tahi mai te mau puaa taehae ra te huru, ua faahepohia to ratou mau taata ia haamori i te puaa taehae, ia haamori i te aiˈa e ia pohe atoa no to ratou fenua. Riro maira te reira ei haamauiuiraa rahi no te mau kerisetiano faatavaihia e rave rahi; ua ite mau ratou e e tia ia ratou ia auraro na mua ˈˈe ia Iehova e i ta ˈna ra Tamaiti, ia Iesu Mesia. (Ohipa 5:29) Ua rahi roa to ratou mau fifi i te avaˈe me 1918, e ‘pau’ ihora ratou. I te mau Etats-Unis, ua tapeahia ma te tano ore te tahi mau tia rahi e te tahi atu â mau tia a te Taiete Watch Tower i roto i te fare auri, ua haafifi-mau-hia te ohipa pororaa faanahohia e ravehia ra e to ratou mau taeae kerisetiano. I te mea e e mana to te puaa taehae i nia “i te mau opu atoa, e i te mau reo atoa, e i te mau fenua atoa,” ua opani etaeta te puaa i te ohipa e arataihia ra e te Atua i te ao taatoa nei.

23. (a) Eaha te ‘otaro ora a te Arenio,’ e eaha te ohipa o tei fatata i te hope mai te matahiti 1918 mai â? (b) No te aha e mea faufaa ore te hoê re a te faanahonahoraa ite-mata-hia a Satani i nia i te “feia moˈa”?

²³ E nehenehe ïa e manaˈohia e ua manuïa Satani e ta ˈna ra faanahonahoraa. Eita râ te reira e horoa mai i te mau haamaitairaa tamau, no te mea aore i papaihia te iˈoa o te hoê anaˈe iho melo o te faanahonahoraa a Satani i roto “i te buka ora a te Arenio.” Teie to ˈna auraa taipe, te vai ra i roto i taua otaro ra te iˈoa o te feia e faatere e o Iesu i roto i te Basileia i nia i te raˈi. Ua papaihia te mau iˈoa matamua i te mahana Penetekose o te matahiti 33. I muri iho, ua haere noa ˈtura i te rahi te mau iˈoa i papaihia. Mai te matahiti 1918, ua tae te ohipa no te tapaoraa i te toea o te mau 144 000 taata e fatu i te Basileia i roto i to ˈna tuhaa hopea. Ua fatata i teie nei e e ore e tumâhia to ratou iˈoa o tei papai-tamau-hia i roto i te otaro ora a te Arenio. Area râ, no to ratou mau enemi, e haamori ra i te puaa, e ore e papaihia to ratou iˈoa i roto i taua otaro ra. Noa ˈtu eaha te huru o te re o ta ratou e noaa mai i nia i te “feia moˈa,” aita ïa to ˈna e faufaa e te reira no te hoê noa taime poto.

24. Ia au i te titauraa a Ioane, eaha te mau parau ta te feia ite e faaroo ra, e eaha to ˈna auraa no te mau tavini a te Atua?

²⁴ Te titau maira Ioane i teie nei, ia faaroo maitai te feia e ite to ratou: “E tariˈa to ˈna ra, a faaroo mai oia.” E ua na ô faahou atura e: “O te aratai tîtî ia ratou ra, e aratai-tîtî-atoa-hia oia, o te taparahi ia ratou i te ˈoˈe ra, ia taparahi-atoa-hia oia i te ˈoˈe e tia ˈi. O te faaoromai teie e o te faaroo teie o te feia moˈa ra.” (Apokalupo 13:9, 10) Mea na reira atoa Ieremia i te parauraa ˈtu i te feia o  to ˈna ra tau i te matahiti 607 hou to tatou nei tau, no te faaiteraa ˈtu ia ratou e e tupu mau â te mau haavaraa a Iehova i nia i te oire taiva o Ierusalema. (Ieremia 15:2; hiˈo atoa Ieremia 43:11; Zekaria 11:9.) I to ˈna aˈe pae, ua fatata oia i te faaruru atu i te hoê tamataraa fifi mau, ua faataa maitai Iesu e e ore e tia i ta ˈna ra mau pǐpǐ ia haamamu i to ratou haava manaˈo. Ua faˈi oia e: “O te rave hoi i te ˈoˈe ra, e pohe ïa i te ˈoˈe.” (Mataio 26:52) Oia atoa, i to tatou nei mau mahana, i te mahana o te Fatu ra, e tia i te mau tavini o te Atua ia tapea maite i te mau faaueraa tumu a te Bibilia. Aore e ora no te feia tatarahapa ore e haamori ra i te puaa taehae. E titauhia ïa te hoê faaroo aueue ore, te faaoromai, no te ora mai mai roto mai i te mau hamani-ino-raa e te mau tamataraa e vai ra i mua ia tatou.—Hebera 10:36-39; 11:6.

Te puaa taehae e piti o ˈna tara

25. (a) Eaha te faataaraa a Ioane no nia i te tahi atu â puaa taehae taipe e iteahia mai i te ao nei? (b) Eaha te auraa i te mea e e piti o ˈna tara e te haere maira oia mai raro mai i te fenua nei?

²⁵ Iteahia maira i teie nei te tahi atu puaa taehae i te ao nei. Te faatia ra Ioane e: “E ite atura vau i te hoê puaa i te haerea mai mai raro mai i te fenua nei; e piti o ˈna tara mai to te [a]renio ra, mai to te teni râ to ˈna reo. E tei ia ˈna atoa te mana o tei mutaa ihora puaa ia rave oia i mua i tana aro; e no ˈna to te ao nei, te feia e parahi i te fenua nei, i haamori ai i te puaa matamua ra, o tei faaorahia to ˈna paruparu pohe ra. E e tapao rahi ta ˈna e rave ra, e e mairi mai te auahi no nia i te raˈi i raro i te fenua nei ia ˈna, i mua i te aro o te taata nei.” (Apokalupo 13:11-13) E piti tara to teie puaa taehae, te faahohoˈa ra te reira i na puai politita amui toopiti. Te haapapu-atoa-hia ra e te haere maira oia mai raro mai i te fenua nei, eiaha râ mai raro mai te moana; no roto mai o ˈna i te amuiraa o te mau mea a Satani e vai ra i nia i te fenua nei e o tei haamau-aˈena-hia. O te hoê ïa te reira puai o te ao nei, e vai mau ra i teie nei e e ohipa faufaa rahi ta ˈna e rave ra i roto i te mahana o te Fatu ra.

26. (a) O vai te puaa taehae e piti o ˈna tara e mea nafea e faaauhia ˈi o ˈna i te puaa taehae matamua? (b) Eaha te auraa i te mea e “mai to te [a]renio ra” na tara o teie puaa, e ‘mai to te teni ra’ to ˈna reo? (c) Te haamori mau ra te feia here aiˈa ia vai, e e nehenehe e faaauhia te manaˈo here aiˈa i te aha? (Hiˈo i te nota.)

 ²⁶ O vai ïa taua puai ra? O te Puai beretane e marite ïa o te ao nei, e ua faahohoˈa-atoa-hia te reira i te hitu o te afii o te puaa taehae matamua, e ohipa taa ê râ ta ˈna i reira. I te mea e ua faahohoˈahia o ˈna i roto i te orama ei puaa taehae taa ê atu, na te reira ïa e tauturu mai ia maramarama tatou e mea nafea oia i te ohiparaa i roto i te ao nei ma te ore e haapao atu ia vetahi ê. Teie puaa e piti o ˈna tara e piti ïa puai politita e vai ra i te hoê â taime e tiamâraa to te tahi e tahi, area râ te rave amui ra raua i te ohipa. I te mea e e piti o ˈna tara “mai to te [a]renio ra,” e au ra e te hinaaro ra o ˈna ia manaˈohia e mea marû o ˈna e eita o ˈna e faaino i te taata, e faatereraa maramarama to ˈna e te titau maira oia ia fariu mai te huitaata taatoa ia ˈna ra. Area râ, ‘mai to te teni ra’ to ˈna reo, oia hoi e nehenehe o ˈna e haamǎtaˈu i te taata e e faaite i te riri uˈana ia ore anaˈe e fariihia ta ˈna huru faatereraa. Aita oia e faaitoito ra i te taata ia auraro i te Basileia e faaterehia ra e te Arenio o te Atua, te turu ra râ o ˈna i te mau faufaa a Satani, te teni rahi. Te faaitoito atoa ra oia i te manaˈo here aiˈa o te faatupu mai i te amahamaharaa e te riri, e mea na reira i haamorihia ˈi te puaa taehae matamua. *

27. (a) I to ˈna haamairiraa i te auahi mai nia mai i te raˈi, eaha ta te puaa taehae e piti o ˈna tara e tamata ra i te rave? (b) Mea nafea te mau taata e rave rahi e faariro ra i te tuhaa o to tatou nei tau o te puaa taehae e piti o ˈna tara?

²⁷ E mau tapao rahi ta teie puaa taehae e rave ra; ua haamairi atoa o ˈna i te auahi mai nia mai i te raˈi. (Hiˈo Mataio 7:21-23.) Te faahaamanaˈo ra teie tapao ia tatou ia Elia, te hoê peropheta a te Atua o tei aimarô atu i te mau peropheta a Baala. I to ˈna haamairiraa mai mai nia mai i te raˈi i te auahi na nia i te iˈoa o Iehova, ua haapapu mau te reira e e peropheta mau oia e e mau peropheta haavare ïa te mau peropheta a Baala. (Te mau Arii 1, 18:21-40) Mai teie mau peropheta a Baala, te manaˈo ra teie puaa taehae e piti o ˈna tara e ua haapapu te reira e e peropheta mau oia. (Hiˈo Apokalupo 13:14, 15; 19:20.) Te faahua parau ra oia e ua upootia mai o ˈna i te mau puai o te ino e vai ra i roto i na tamaˈi rahi toopiti o te ao nei e i teie nei te patoi ra oia i te communisme e manaˈo ra e aita e Atua e vai ra. Te faariro ra e rave rahi mau taata e ora nei i teie nei tau i teie puaa taehae e piti o ˈna tara ei tiai no te tiamâraa e ei pu no te mau haamaitairaa i te pae materia.

Te hohoˈa o te puaa taehae

28. Mea nafea Ioane i te faataaraa e ere teie puaa taehae i te puaa maitai i te mea e mai to te arenio to ˈna nau tara?

²⁸ E puaa maitai anei teie puaa taehae i te mea e mai te arenio ra to ˈna nau tara? Te na ô faahou ra Ioane e: “E te haavare nei oia i to te ao i te mau tapao i horoahia mai na ˈna e rave i mua i te aro o te puaa ra; e te parauraa hoi i te feia e parahi i te ao nei, e hamani i te hohoˈa o te puaa e tia ˈi, o tei puta i te ˈoˈe ra, e ora aˈerâ. E e tia hoi ia ˈna ia horoa i te aho no taua hohoˈa o te puaa ra, e ia parau noa mai hoi taua hohoˈa o te puaa ra, e ia pohe hoi ia ˈna te feia atoa e ore e haamori ia taua hohoˈa o te puaa ra.”—Apokalupo 13:14, 15.

29. (a) Eaha te opuaraa a te hohoˈa o te puaa taehae, e i anafea te hamaniraahia mai taua hohoˈa ra? (b) No te aha e ere teie hohoˈa o te puaa taehae i te hoê tii ora ore?

²⁹ E nehenehe e faaauhia teie “hohoˈa o te puaa [taehae] ra” i te aha, e eaha ta ˈna opuaraa? Ta ˈna opuaraa o te faaitoitoraa ïa i te haamoriraa i te puaa taehae e hitu o ˈna afii, e e hohoˈa hoi o ˈna no ˈna, ia vai ora noa teie puaa taehae. Ua hamanihia teie hohoˈa i te oraraa mai te puaa taehae e hitu o ˈna afii i te puta ˈoˈe, oia hoi i muri aˈe i te hopea o te Tamaˈi rahi Matamua o te ao nei. E ere oia i te hoê tii ora ore, mai te tii ta Nebukanesa i faatia  i te vahi papu ra i Dura. (Daniela 3:1) Oia mau, ua horoa te puaa taehae e piti o ˈna tara i te aho ora i taua hohoˈa ra, ia nehenehe oia e ora e e rave i te ohipa i roto i te aamu o te ao nei.

30, 31. (a) Te faaau ra te Aamu i teie hohoˈa i te aha? (b) Ua haapohehia ra anei te tahi mau taata i te mea e aita ratou i haamori i taua hohoˈa ra? A tatara i te reira.

³⁰ Na te Aamu e faaite mai e teie hohoˈa o te hoê ïa faanahonahoraa o tei opuahia, tei faaitoitohia e tei turuhia e to Beretane e to te mau Etats-Unis, e i te haamataraa teie ïa to ˈna iˈoa Taiete o te mau Nunaa. I mua rii i roto i te Apokalupo pene 17, mea taa ê rii to ˈna faataaraa, e puaa taehae uteute ïa e ora ra, e huti ra i te aho e e oraraa tiamâ to ˈna. E ‘parau noa mai’ teie faanahonahoraa o te mau nunaa atoa i te mea e te faahua parau ra oia e o o ˈna anaˈe iho te nehenehe e afai mai i te hau e te ino ore no te huitaata nei. Area râ, ua riro oia ei tahua aimarôraa e tuhiraa no te mau nunaa melo. E faariariahia te mau nunaa, te mau fenua e ore e auraro i to ˈna mana e e tiavaruhia ratou i rapae, e aore ra e oraraa ino aˈe ïa to ratou i te pohe. Ua tiavaru mau oia i rapae te mau nunaa tei ore farii i to ˈna mau manaˈo. I te omuaraa o te ati rahi, e faatupu te mau “tara” i te pae no te nuu o taua hohoˈa ra i te hoê haamouraa.—Apokalupo 7:14; 17:8, 16.

³¹ Mai te Piti mai â o te Tamaˈi rahi o te ao nei, ua haapohe mau te hohoˈa o te puaa taehaa, tei piihia i teie nei e, te Faanahonahoraa o te mau Hau amui (O.N.U.), i te taata. I te matahiti 1950, ei hiˈoraa, ua faaô te mau faehau o te O.N.U. ia ratou i roto i te tamaˈi e vai ra i rotopu ia Korea Apatoerau e Korea Apatoa. Te manaˈohia ra e ua haapohe teie mau faehau, ma ta aroraa i te pae o Korea Apatoa, e 1 420 000 taata no Korea Apatoerau e no te fenua Tinito. Oia atoa, mai te matahiti 1960 e tae atu i te matahiti 1964, ua aro atoa te mau nuu a te Hau amui i Congo (o Zaïre ïa i teie nei). E hau atu â, ua haapapu noa te mau tia o te ao nei, e tae noa ˈtu i te mau pâpa Paulo VI e Ioane Paulo II, e teie hohoˈa, o te ravea hopea hoê roa no te hau. Ia au i to ratou manaˈo, e mai te peu e, eita te mau taata e auraro ia ˈna, e haamou ïa ratou ia ratou iho. E faaauraa parau teie, e haapohe ïa taua mau tia ra i te feia atoa e ore e farii ra ia rave amui ratou i te ohipa e taua hohoˈa ra, e ia haamori ia ˈna.—Hiˈo Deuteronomi 5:8, 9.

 Te tapao o te puaa taehae

32. Mea nafea Ioane i te faataaraa e e faaohipa Satani i te tuhaa politita o ta ˈna faanahonahoraa ite-mata-hia no te haamauiui rahi roa i te toea o te huaai o te vahine a te Atua?

³² I teie nei te ite ra Ioane ia Satani i te faaohiparaa i te mau tuhaa politita e rave rau o ta ˈna faanahonahoraa ite-mata-hia, no te haamauiui rahi roa i te toea o te huaai a te vahine a te Atua. (Genese 3:15) Teie ta ˈna e parau faahou ra no nia i “te puaa taehae”: “E e faatapao â oia i te taata atoa i te tapao, te feia rarahi, e te taata rii, te feia taoˈa, e te feia taoˈa ore; te tiamâ, e te tavini, i roto i to ratou rima atau, e aore ïa, ei nia i te rae: e eiaha roa te hoê taata ia hoo atu i te taoˈa, e ia hoo mai hoi, maori râ o te taata tei ia ˈna taua tapoa ra, e tei iˈoa o te puaa ra, e te taio o taua iˈoa no ˈna ra. Tei ǒ nei te paari. E ite to ˈna ra, a taio oia i te taio i te puaa nei: tei te taata hoi te auraa i teie nei taio: teie hoi te taio ia ˈna, e ono hanere, e ono ahuru, e ono tiahapa.”—Apokalupo 13:16-18.

33. (a) Eaha te iˈoa o te puaa taehae? (b) Ua taaihia te numera ono i te aha? A tatara i te reira.

³³ E iˈoa to te puaa taehae, e e numera taua iˈoa ra: 666. Ua taaihia te numera ono i te mau enemi o Iehova. Te faahiti ra te Bibilia i te parau no te hoê Philiseti ati Raphai atoa e e “taata roa” oia e “te manimani taiono i te rima hoê, taiono hoi i te avae hoê.” (Paraleipomeno 1, 20:6) Ua faatia te arii ra o Nebukanesa i te hoê tii auro e 6 kubiti te aano e 60 kubiti te teitei no te tahoêraa i ta ˈna feia mana i roto i te hoê â haamoriraa. I to te mau tavini o te Atua patoiraa i te haamori i taua tii auro ra, ua huri atura teie arii ia ratou i roto i te hoê umu auahi. (Daniela 3:1-23) Mea iti aˈe te numera ono i te numera hitu, o te faahohoˈa ra hoi i te mea taatoa i mua i te aro o te Atua. No reira ïa, te faataipe ra tataitoru ono i te hoê huru tia ore roa.

34. (a) Eaha te auraa e “tei te taata hoi te auraa i teie nei taio”? (b) No te aha e iˈoa tano maitai te numera 666 no te amuiraa politita o te ao nei e faaterehia ra e Satani?

³⁴ E ravehia te hoê iˈoa no te faataa i te hoê taata. Mea nafea teie numera i te faataaraa i te huru o teie puaa? Te parau ra Ioane e “tei te taata hoi te auraa i teie nei taio,” eiaha râ i te varua. No reira, te haapapu ra teie numera e tei te fenua nei teie puaa taehae, te faahohoˈa ra oia i te mau faatereraa a te taata nei. I te mea e mea iti aˈe te numera ono i te numera hitu, oia atoa ïa no te numera 666—ua tatai toruhia te numera ono—o te hoê ïa iˈoa tano maitai no te amuiraa politita rahi mau o te ore roa e aifaito i te mau ture tia roa a te Atua. No reira ïa, te puaa taehae politita e haavî ra ma te mana i nia i te ao nei, to ˈna iˈoa e numera ïa: 666, e te faatia noa ra te mau amuiraa politita, haapaoraa e tapihooraa ia haavî oia i te mau taata e ia hamani ino i te nunaa a te Atua.

35. Eaha te auraa i te mea e ua tapaohia te rae aore ra te rima atau i te iˈoa o te puaa taehae?

 ³⁵ Eaha ïa te auraa i te mea e ua tapaohia te rae e aore ra te rima atau i te iˈoa o te puaa taehae? I to Iehova horoaraa i ta ˈna Ture i te mau Iseraela, ua parau oia ia ratou e: “E teie nei, e vaiiho outou i taua mau parau na ˈu nei i roto i to outou aau [mafatu], e i roto i to outou varua [nephe], e taamu hoi i nia iho i to outou rima ei tapao; e ia riro hoi mai te haamanaˈoraa i mua mau i to outou na mata.” (Deuteronomi 11:18) Teie te auraa o teie nei mau parau, e tia i te mau Iseraela ia haamanaˈo noa i taua Ture ra, ia itehia te reira i roto i ta ratou mau ohipa e to ratou mau manaˈo. Teie te parauhia ra no te mau 144 000 kerisetiano faatavaihia, e tei nia i to ratou rae te iˈoa o te Metua e te iˈoa o Iesu, ei haapapuraa e no te Atua ra o Iehova e no Iesu Mesia hoi ratou. (Apokalupo 14:1) Te faaohipa atoa ra Satani i te tapao demoni a te puaa taehae mai te reira atoa te huru. I to te mau taata raveraa i ta ratou mau ohipa i te mau mahana atoa, mai te hooraa ˈtu e aore ra te hooraa mai i te taoˈa, te haafifihia ra ratou ia rave i te mau mea atoa ia au i te hinaaro o te puaa taehae, ei hiˈoraa, na roto ïa i te faatupuraa i te mau oroa. E tia ia ratou ia haamori ia ˈna, ia vaiiho ia ˈna ia faatere mai i to ratou oraraa, ia tapaohia ratou.

36. Eaha te mau fifi i farereihia e te mau taata tei ore e farii i te tapao o te puaa taehae?

³⁶ E farerei noa iho â te mau taata o tei ore e hinaaro i te tapao o te puaa taehae i te fifi. Mai te matahiti 1930 mai â, ei hiˈoraa, ua tia ia ratou ia rave e rave rahi mau hororaa i mua i te haavaraa e ia faaoromai i te mau aroraa uˈana a te nahoa taata e te tahi atu â mau hamani-ino-raa. I roto i te mau fenua faatereraa haavî, ua hurihia ratou i roto i te mau aua hamani-ino-raa, e ua pohe e rave rahi i reira. Mai te Piti mai â o te Tamaˈi rahi o te ao nei, ua faaea maoro roa e rave rahi mau taurearea i roto i te mau fare tapaeraa, ua hamani-ino-atoa-hia e pohe roa vetahi pae, no te mea aita ratou i hinaaro i te haamamu i to ratou haava manaˈo kerisetiano, e ore e faaô ia ratou i roto i te mau ohipa a teie nei ao. I roto i te tahi atu â mau fenua, eita roa te mau kerisetiano e nehenehe e hoo atu e aore ra e hoo mai i te taoˈa; eita te tahi pae e nehenehe e hoo mai i te fenua e te fare, e motorohia, e taparahihia e aore ra e tiahi-roa-hia vetahi i rapae au i to ratou iho fenua. Eaha te tumu? No te mea, ia au i to ratou haava manaˈo, aita ratou i hoo mai i te titeti a te hoê pǔpǔ politita. *—Ioane 17:16.

37, 38. (a) No te aha e ere i te mea ohie ia ora i roto i te ao nei ma te ore e farii i te tapao o te puaa taehae? (b) O vai te mau taata e tapea ra i to ratou haapao maitai, e eaha ta ratou i faaoti i te rave mau?

 ³⁷ I te tahi mau vahi o te fenua nei, no te rahi o te mana o te haapaoraa i roto i te oraraa o te mau taata, ia farii anaˈe te hoê taata i te parau mau o te Bibilia, e faarue-roa-hia o ˈna e te utuafare fetii e to ˈna mau hoa tahito. Ei faaroo itoito mau ïa e tia ˈi no te faaoromairaa i te reira tamataraa. (Mataio 10:36-38; 17:22) I roto i teie nei ao i reira te rahiraa o te taata e haamori ai i te faufaa i te pae moni e e peu matauhia te eiâ, e tia i te kerisetiano ia tiaturi noa ia Iehova e nehenehe O ˈna e tauturu mai ia ˈna ia faaea i nia i te eˈa o te parau-tia. (Salamo 11:7; Hebera 13:18) I roto i te ao taiata roa, e titauhia te hinaaro mau ia faaea viivii ore noa. E mea pinepine te mau kerisetiano tei maˈihia i te faahepohia e te mau taote ia ofati i te ture a te Atua no nia i te huru moˈa o te toto; e tia atoa ia ratou ia patoi atu i te mau faaotiraa a te haavaraa e ore faatura ra i to ratou faaroo. (Ohipa 15:28, 29; Petero 1, 4:3, 4) I to tatou nei tau e mea fifi roa te noaaraa te ohipa, e ere i te mea ohie no te hoê kerisetiano ia ore e farii i te rave i te hoê ohipa a erehia ˈi oia i to ˈna haapao maitai i mua i te Atua.—Mika 4:3, 5.

³⁸ Oia mau, e ere i te mea ohie ia ora i roto i te hoê ao e aita hoi te tapao o te puaa taehae i nia ia matou. Ma te haapapuraa i te rahi maere mau o te puai e te haamaitairaa ta Iehova e horoa ra no ratou, te mau maite ra te mau melo o te toea o te huaai a te vahine e te hau atu i te toru mirioni taata no te nahoa rahi noa ˈtu te mau haafifiraa no te turairaa ia ratou ia ofati i te mau ture a te Atua. (Apokalupo 7:9) Ma te tahoê maitai i te ao taatoa nei, ia tamau â tatou i te faahanahana ia Iehova e ta ˈna mau eˈa tia, ma te ore e farii i te tapao o te puaa taehae!—Salamo 34:1-3.

[Nota i raro i te api]

[Uiraa haapiiraa]

[Hohoˈa i te api 195]

Ua horoahia ia ˈna ra te ravea no te horoa ˈtu i te aho i te hohoˈa o te puaa taehae