Te oto e te oaoa i te haamouraahia o Babulonia
Pene 37
Te oto e te oaoa i te haamouraahia o Babulonia
1. Mai te aha te huru o ‘te mau arii o te fenua nei’ ia mou taue noa o Babulonia Rahi?
UA RIRO te haamouraa o Babulonia ei parau apǐ oaoa mau no te nunaa a Iehova, mai te eaha râ ïa te huru o te mau nunaa? Teie ta Ioane e parau ra: “E te mau arii o te ao nei tei faaturi ia ˈna ra, e ua amui atoa ia ˈna i te faatate-atoa-raa, e oto ïa ratou ia ˈna, e e auê ratou ia ˈna ia hiˈo ratou i te au auahi no to ˈna ra amâraa, i te tia-noa-raa i te atea ê i te mǎtaˈu i to ˈna ra pohe, e te na ôraa e, Auê te oire rahi nei o Babulonia e, auê oe te oire etaeta nei e! hora-tahi-noa-hia iho nei hoi to oe pohe e!”—Apokalupo 18:9, 10.
2. (a) I te mea e ua haamouhia Babulonia Rahi e na tara taipe hoê ahuru o te puaa taehae uteute, no te aha ïa “te mau arii o te ao nei” e oto ai i to ˈna moeraa ˈtu? (b) No te aha te mau arii o tei mauiui roa, e tia noa ˈi i te atea ê i taua oire i faautuahia ra?
2 E nehenehe tatou e maere i te huru o te mau nunaa i te mea e ua haamouhia Babulonia e na tara taipe hoê ahuru o te puaa taehae uteute. (Apokalupo 17:16) Ia mou râ o Babulonia, i reira ra “te mau arii o te ao nei” e taa ˈi i to ˈna faufaa no te tapea i te hau e te auraro i rotopu i te taata. Ua haamoˈa te mau melo o te upoo faatere haapaoraa i te mau tamaˈi, ua riro ratou ei taata e tihepu ra i te mau faehau apî, e na roto i ta ratou mau aˈoraa, ua faaitoito ratou i te mau taurearea ia haere e aro. Ua horoa te haapaoraa i te hoê paruru moˈa e i muri aˈe i te reira e nehenehe ai te mau faatere viivii e haavî i te taata haehaa. (Hiˈo Ieremia 5:30, 31; Mataio 23:27, 28.) A tapao na râ e te tia noa ra te mau arii o te auê ra i te atea ê i te oire i faautuahia. Aita ratou e haafatata ra ia ˈna no te tauturu atu ia ˈna. Te oto ra ratou i te iteraa ˈtu e ua mou oia, e ere râ i te oto rahi a tae roa ˈi ratou i te faaruru atu i te ati no te tautururaa ˈtu ia ˈna.
E taˈi e e oto te feia hoo
3. O vai atoa te oto ra i te haamouraahia o Babulonia Rahi, e no teihea mau tumu, ia au i ta Ioane parau?
3 E ere te mau arii anaˈe o te fenua nei o te mihi ra i te moeraa o Babulonia Rahi. “E oto te mau hoo taoˈa o te ao nei ia ˈna, e hea oto hoi; aore roa hoi e taata ia hoo faahou mai i ta ratou taoˈa. Te hooraa auro ra, e te ario, e te ofai maitatai, e te poe, e te ahu hua, e te ahu uraura, e te seriko, e te ahu ura; e te mau raau noˈanoˈa atoa ra, e te mau auˈa sena atoa ra, e te mau auˈa raau maitatai atoa ra, e te veo, e te auri, e te maremaro. E te kinamo, e te mea noˈanoˈa, e te mura, e te libano, e te uaina, e te monoˈi, e te faraoa maitai ra, e te sitona, e te puaa, e te mamoe, e te puaahorofenua, e te pereoo, e te tino e te aho o te taata nei. E te mau maa hiaai-rahi-hia e oe [Babulonia Rahi] ra, ua taa ê ïa ia oe, e te mau mea maitatai, e te mau mea unauna ra, ua taa ê aˈenei ïa ia oe, e eita roa e noaa faahou ia oe.”—Apokalupo 18:11-14.
4. No te aha “te feia hoo” e auê ai ia Babulonia Rahi e e oto ai i nia ia ˈna i muri aˈe i to ˈna haamouraahia?
4 Ua riro o Babulonia Rahi ei hoa rahi mau o tei hoo faarahi i te taoˈa i te feia hoo ona. Ei hiˈoraa, ua faufaahia te mau fare monahi, te mau fare paretenia e te mau fare pure a te amuiraa faaroo kerisetiano i te auro, te ario, te ofai maitatai e te raau maitatai e rave rahi, e te tahi atu â mau taoˈa moni rahi i te roaraa o te mau senekele. Hau atu â i te reira, te haamaitai ra te haapaoraa i te mau taoˈa hoo moni rahi e te inu-hua-raa i te ava e apee ra i te oroa Noela, faatura-ore-raa i te Mesia, e te tahi atu â mau mahana o ta ratou e parau e e mea moˈa. Ua tomo te mau mitionare o te amuiraa faaroo kerisetiano i te fenua atea, i te na reiraraa matara maira te mau matete apî no te “feia hoo” o te ao nei. I te fenua Tapone, te haapaoraa katolika, o tei tae mai i reira i te hoê â taime e te feia hoo tatini, ua amui atoa o ˈna i roto i te mau tamaˈi e vai ra i rotopu i te mau taata mana o te senekele XVII. Teie ta te Buka parau paari Beretane e faˈi ra no nia i te hoê tamaˈi faufaa tei tupu i pihai iho i te aorai no Osaka: “Ua tia ˈtu te mau nuu a te mau Tokugawa i mua i te hoê enemi e e mau satauro, e mau hohoˈa no te Faaora e no te taata moˈa ra o Iakobo, te paoti moˈa no Paniora, to nia i to ratou mau reva.” Ua hamani ino te pǔpǔ i manuïa e ua fatata roa oia i te faaore i te haapaoraa katolika i taua fenua ra. I to tatou atoa nei mau mahana, eita te haapaoraa e haamaitaihia i te mea e ua faaô o ˈna ia ˈna i roto i te mau ohipa a teie nei ao.
5. (a) Ia au i te reo mai te raˈi mai, mea nafea “te feia hoo” i te otoraa? (b) No te aha te feia hoo ‘e tia noa ˈi i te atea ê,’ ratou atoa?
5 Teie â ta te reo mai nia mai i te raˈi e parau ra: “E te feia hoo i teie nei mau mea, o tei taoˈahia ia ˈna ra, ei te atea ê ïa e tia mai ai i te mǎtaˈu i to ˈna ra pohe, ma te oto, e ma te auê, e te na ôraa e, Auê te oire rahi nei e, auê, o tei ahu i te ahu hua, e te uraura, e te uteute, o tei faaunauna hoi i te auro, e te ofai maitatai, e te poe e! O teie nei taoˈa rahi hoi i te pau roa i te hora hoê nei e!” (Apokalupo 18:15-17a) I te mea e ua haamouhia o Babulonia Rahi, te auê ra “te feia hoo” i te moeraa teie hoa o te pae tapihooraa taoˈa. Parau mau, “auê . . . , auê” teie moeraa i te peapea e no ratou! A tapao na râ e, te tumu ratou e oto ai e mau tumu miimii anaˈe ïa, e mai te mau arii ra, “ei te atea ê ïa e tia mai ai” ratou. Eita ratou e haafatata ˈtu ia Babulonia Rahi no te tauturu noa ˈˈe ia ˈna.
6. Ia au i te reo mai te raˈi mai, mea nafea te mau pailoti e te mau matero i te otoraa, e no te aha ratou e auê ai?
6 Te na ô faahou ra te faatiaraa e: “E te mau pailoti atoa, e to nia atoa i te mau pahi ra, e te feia atoa e teretere ra, e tei ohipa haere i te moana, tia anaˈe ihora i te atea ê, pii hua ˈtura, i to ratou iteraa i te au auahi no to ˈna ra amaraa, na ô atura, Eaha te oire e faito i teie nei oire i te rahi! E ua tuu ratou i te repo i nia iho i to ratou upoo, ma te pii hua, ma te oto, e te auê, e te na ôraa e, Auê te oire rahi nei e, auê, i taoˈa-rahi-hia ˈi hoi to te feia atoa e pahi to ratou i te moana ra, no te rahi o ta ˈna ra taoˈa! hora-tahi-noa-hia iho nei hoi to ˈna pau.” (Apokalupo 18:17b-19) E oire no te pae tapihooraa taoˈa o Babulonia i tahito ra, e mea rahi mau ta ˈna mau pahi. Na roto i “te pape e rave rahi” oia hoi to ˈna ra mau melo, ua hoo atu e ua hoo mai o Babulonia Rahi i te taoˈa ma te rahi atoa, e na te reira e horoa i te ohipa na to ˈna mau taata faaroo. Auê ïa ati rahi no ratou i te pae faanavairaa faufaa ia mou anaˈe o Babulonia Rahi! Eita ratou e ite faahou i te tahi pu faufaa mai ia ˈna ra te huru.
Te oaoa ra vetahi i to ˈna haamouraahia
7, 8. Mea na roto i teihea faaitoitoraa to te reo mai te raˈi mai i te faateiteiraa ˈtu i ta ˈna poroi no nia ia Babulonia Rahi, e eaha to muri noa iho i taua faaitoitoraa ra?
7 No nia i te faataahuriraahia o Babulonia i tahito ra e to Medai raua o Peresia, ua tohu atea mai o Ieremia e: “Ei reira te mau raˈi, e te fenua atoa, e to roto atoa ia ratou ra, e himene ai ia Babulonia.” (Ieremia 51:48) I te haamouraahia o Babulonia Rahi, i reira te reo mai te raˈi mai e faateitei ai i ta ˈna ra poroi i te na ôraa e: “A oaoa ia ˈna, e to te raˈi ê, e o outou hoi, e te mau aposetolo moˈa e te mau peropheta; ua tahoo hoi te Atua ia ˈna ia outou.” (Apokalupo 18:20) Te oaoa ra o Iehova e te mau melahi i te iteraa ˈtu i te mouraa te enemi a te Atua mai te mau senekele mai â, oia atoa te mau aposetolo e te mau peropheta kerisetiano matamua o tei faatia-faahou-hia i teie nei e o tei rave i to ratou parahiraa i roto i te faanahonahoraa a te mau matahiapo e 24.—Hiˈo Salamo 97:8-12.
8 Ma te papu maitai, e pii te feia “moˈa” atoa ma te oaoa—oia hoi te feia i faatia-faahou-hia i nia i te raˈi aore ra te ora noa ra ratou i nia i te fenua nei—e te nahoa rahi atoa o te mau mamoe ê atu o tei tahoê atu ia ratou. I te tau au ra, e faatia-faahou-hia te feia haapao maitai atoa no te tau tahito i roto i te faanahonahoraa apî, e e oaoa atoa ïa ratou. Aita roa ˈtu te mau tavini a te Atua i imi i te ravea no te tahoo atu i te mau melo o te haapaoraa hape tei hamani ino ia ratou. Ua haamanaˈo ratou i teie nei mau parau a Iehova e: “Te parau maira Iehova, Ei ia ˈu te riri, na ˈu ïa e tahoo atu.” (Roma 12:19; Deuteronomi 32:35, 41-43) Ua tahoo ïa o Iehova i teie nei. Ua tahoohia te toto atoa o ta Babulonia Rahi i haamanii.
Ua taorahia te hoê ofai mule i raro i te tai
9, 10. (a) Eaha ta te hoê melahi puai e parau ra e e rave ra i teie nei? (b) Eaha te ohipa tuea o tei ravehia e te melahi puai o te Apokalupo 18:21, i faatupu-aˈena-hia i te tau o Ieremia, e eaha ta te reira e haapapu ra? (c) Eaha te haapapuraa ta te ohipa a te melahi puai i rave i mua i te aro o Ioane?
9 Te haapapu ra te mea o ta Ioane i ite i muri iho e ua faaoti-mau-hia te haavaraa a Iehova i nia ia Babulonia Rahi: “Ua rave ihora te hoê melahi puai i te tahi ofai rahi mai te ofai mule te huru, e ua taora taue atura i raro i te tai, na ô aˈera, Mai te reira atoa te oire rahi ra o Babulonia i te huri-uˈana-hia i raro, e e ore roa e itea-faahou-hia ˈtu.” (Apokalupo 18:21) Ua faatupu-atoa-hia i te tau o Ieremia te hoê â huru ohipa, e auraa puai mau to te reira tohu. Ua faauruahia oia no te papai i roto i te hoê buka “i te mau ino atoa e hopoihia mai i nia ia Babulonia.” Ua horoa ˈtura oia ia Seraia i taua buka ra e ua parau atu oia ia ˈna ia tere atu i Babulonia. I reira ra, ia au i te mau faaueraa a Ieremia, ua taio o Seraia i teie faˈiraa parau i nia i taua oire ra e: “E Iehova, ua parau na hoi oe i teie nei vahi, e tâpû ê atu, e eiaha roa ei taata i reira, eiaha ei taata e te puaa atoa; ia ano roa râ te reira vahi e a muri noa ˈtu.” I muri iho taamu aˈera o Seraia i te hoê ofai i nia iho i taua buka ra e taora ˈtura i te reira i roto ia Eupharate i te na ôraa e: “Na reira to Babulonia mairi, e e ore e tia faahou mai, no te ino ta ˈu e hopoi i nia ia oe ra.”—Ieremia 51:59-64.
10 I te mea e ua taamuhia te buka i nia iho i te hoê ofai e ua taorahia i roto i te anavai pape rahi, te haapapu ra te reira e e aramoina roa o Babulonia, e eita roa ˈtu oia e tia faahou mai. Oia atoa, te haapapu ra te ohipa tuea ta te melahi puai e rave ra i mua i te mata o Ioane, e e tupu mau iho â te opuaraa a Iehova i nia ia Babulonia Rahi. No te huru ano o Babulonia i tahito ra o ta tatou e ite i teie nei mahana, aita ïa e feaaraa no nia i te hopea e fatata maira i nia i te haapaoraa hape.
11, 12. (a) Eaha te mau parau ta te melahi puai e faatae ra i teie nei ia Babulonia Rahi? (b) Eaha ta Ieremia i tohu no nia ia Ierusalema apotata, e eaha ïa to ˈna tupuraa i to tatou nei mau mahana?
11 I teie nei, te faatae ra te melahi puai i teie nei parau ia Babulonia Rahi e: “E te oto kinura e, e te oto vivo ra, e te mau mea i faaotohia ra, e te oto pu ra, e ore roa ïa e itea-faahou-hia i roto ia oe na; e te feia tahuˈa i te mau toroa atoa nei, e ore roa e itea-faahou-hia i roto ia oe na; e te haruru ofai mule e ore roa e faaroo-faahou-hia i roto ia oe na. E e ore roa te maramarama lamepa e itea-faahou-hia i roto ia oe na; e te reo o te tane e te vahine i faaipoipo-apî-hia ra, e ore roa e faaroo-faahou-hia i roto ia oe na; o te feia hoo i ǒ oe na hoi, o to te ao nei ïa feia rarahi, e ua vare te mau fenua atoa i ta oe na peu tahutahu.”—Apokalupo 18:22, 23.
12 Na roto i te hoê â huru parau, ua tohu o Ieremia no nia ia Ierusalema apotata e: “E hopoi-ê-hia e au te reo oaoa ia ratou, e te reo faaarearea, e te reo o te tane faaipoipo apî, e te reo o te vahine faaipoipo apî, te haruru o na ofai oro ra e te maramarama o te mori. E riro te fenua atoa ra i te ano, e ei maereraa.” (Ieremia 25:10, 11) I te mea e e tuhaa rahi te amuiraa faaroo kerisetiano no Babulonia Rahi e faaanohia ïa oia e e ore roa e taata-faahou-hia, ua faahohoˈa-maitai-hia te reira i te pauraa Ierusalema i muri aˈe i te matahiti 607 hou to tatou nei tau. Te amuiraa faaroo kerisetiano, i te matamua ra, te oaoa hua ra e te faaroohia ra te mau maniania o te mau mahana atoa, e pau ïa o ˈna e e haapae-roa-hia ïa.
13. Eaha te tauiraa taue ta Babulonia Rahi e ite ra, e eaha ïa te hopearaa no ta ˈna “feia hoo”?
13 Oia mau, mai ta te melahi e parau ra ia Ioane i ǒ nei, eita Babulonia Rahi taatoa e riro faahou ei mana faatere puai i te mau nunaa atoa e riro râ ei vahi ano mârǒ mai te medebara te huru. Ua faaohipa “te feia hoo,” e te feia ona miria tuiroo atoa i ta ˈna haamoriraa ia onahia ratou aore ra ei ravea no te parururaa ia ratou. Ua manaˈo te upoo faatere haapaoraa e mea maitai ia amui atu ia ratou ia tui atoa to ratou roo. E e erehia râ taua feia hoo ra i to ratou hoa rave hara ra o Babulonia Rahi. Eita oia e haapouri faahou i te mau nunaa o te fenua nei na roto i ta ˈna ra mau peu faaroo paieti rahi ra.
Te hoê faataheraa toto riaria mau
14. Ia au i te parau a te melahi puai, no te aha e mea etaeta mau te haavaraa a Iehova, e eaha te hoê â huru faˈiraa parau ta Iesu i to ˈna parahiraa i nia i te fenua nei?
14 Ei faaotiraa, te faataa ra te melahi puai e eaha te tumu Iehova i haava etaeta mau ai ia Babulonia Rahi. “E,” te na ô ra te melahi, “tei roto ia ˈna te toto o te mau peropheta e to te feia moˈa i te iteraahia, e to te feia atoa i taparahihia i teie nei ao.” (Apokalupo 18:24) I to Iesu parahiraa i te fenua nei, ua faˈi oia i te mau raatira haapaoraa no Ierusalema e e tia ia anihia ia ratou te utua no “te toto hara ore atoa i manii i te fenua nei, mai te toto o Abela parau-tia mai â.” Ia au i taua mau parau ra, ua haamouhia taua ui faufau ra i te matahiti 70. (Mataio 23:35-38) I to tatou nei mahana, te vai ra te tahi atu â ui o te mau raatira haapaoraa tei harahia i te maniiraa toto i to ratou hamani-ino-raa i te mau tavini a te Atua.
15. I Helemani nazi, mea nafea te Ekalesia katolika i te harahia i te toto na roto e piti huru raveraa?
15 I roto i ta ˈna buka Te Ekalesia katolika e te Helemani nazi, ua papai o Guenter Lewy e: “I te opani-etaeta-raahia te mau Ite no Iehova i Bavière, i te 13 no eperera [1933], ua tae roa te Ekalesia i te farii i te ohipa faauehia e te Faatere hau no te Haapiiraa e no te mau Haapaoraa, oia hoi e tihotiho i te mau melo atoa o taua pǔpǔ faaroo ra e faaohipa noa ra i taua haapaoraa ra tei opani-etaeta-hia.” E nehenehe ïa e parihia te Ekalesia katolika e e tuhaa atoa ïa ta ˈna i te tapearaahia te mau tausani Ite i roto i te mau aua hamani-ino-raa; ua viiviihia to ˈna mau rima i te toto o te mau hanere Ite i taparahihia. I muri aˈe i to te mau Ite taurearea, mai ia Wilhelm Kusserow, faaiteraa e e nehenehe ratou e faaruru i te pohe ma te itoito i mua i te mau pupuhi a te mau faehau, ua faaoti ihora Hitler e pohe hanahana roa te reira no te feia e patoi i te rave i ta ratou tau faehau; e tâpûhia ˈtura te arapoa o Wolfgang, e 20 matahiti to ˈna, e e taeae oia no Wilhelm. I te hoê â taime te faaitoito ra te Ekalesia katolika i te mau taurearea helemani katolika ia pohe i roto i te tamaˈi no to ratou aiˈa. Ma te papu maitai, ua harahia te Ekalesia i te maniiraa toto e rave rahi.
16, 17. (a) No teihea mau maniiraa toto e rave rahi e tia ia Babulonia Rahi ia pahono atu, e no te aha e tuhaa atoa ta te Vaticana i te taparahiraahia te mau ati Iuda i to te mau nazi opuaraa e haamou roa ia ratou? (b) A faahiti na i te tumu matamua no nia te haapaoraa hape i hara ˈi i te pohe o te mau mirioni taata i roto i te mau hanere tamaˈi tei iteahia i teie senekele XX anaˈe iho?
16 Te parau nei râ te parau tohu e ua hara Babulonia Rahi i te maniiraa toto e rave rahi o “te feia atoa i taparahihia i teie nei ao.” E parau mau roa te reira i to tatou nei mau mahana. Ei hiˈoraa, na roto i ta ˈna mau ravea huna e te paari, ua tauturu te Ekalesia katolika ia Hitler ia mana oia i Helemani, e hara rahi to te Vaticana i te taparahiraahia e ono mirioni ati Iuda tei pohe i to te mau nazi opuaraa e haamou roa ia ratou. Taa ê atu i te reira, i roto noa i te senekele XX, ua pohe hau atu i te hanere mirioni taata i roto i te mau hanere tamaˈi. E nehenehe ra anei e parihia te haapaoraa no te reira? E, e e piti ïa tumu to te reira.
17 A tahi, ua taaihia te rahiraa o te mau tamaˈi i te amahamaharaa e vai ra i roto i te mau haapaoraa. Ei hiˈoraa, te haavîraa uˈana i tupu i te fenua Inidia i rotopu i te feia haamori ia Allah e te feia haamori ia Bouddha i te matahiti 1946 e tae atu i te matahiti 1948, o te haapaoraa ïa te tumu o te reira. Ua pohe ïa te mau hanere tausani taata. I roto i te mau matahiti 80, ua taaihia te aroraa i rotopu ia Irakia e ia Irania i te mau pǔpǔ faaroo taa ê te tahi i te tahi; ua pohe ïa te mau hanere tausani taata i reira. Ua pohe te mau tausani taata i Irelane Apatoerau i te mau aroraa uˈana i tupu i rotopu i te mau katolika e te mau porotetani. O te haapaoraa atoa te tumu no te haavîraa uˈana tamau e itehia ra i Lebanona. I te matahiti 1976, ua parau te taata papai vea ra o C. L. Sulzberger i to ˈna hiˈopoa-maite-raa i taua tumu parau e: “E parau mau peapea mau teie, peneiaˈe, te afaraa aore ra hau atu o te mau tamaˈi e tupu ra i teie nei mahana i roto i te ao nei e mau aroraa ïa te reira a te haapaoraa aore ra ua taaihia i te mau tatamaˈiraa faaroo.” Oia mau, mai te reira ïa te huru i te roaraa o te aamu arepurepu o Babulonia Rahi.
18. Eaha te piti o te tumu no reira te mau rima o te mau haapaoraa o te ao nei i viivii ai?
18 Eaha ïa te piti o te tumu? I mua i te aro o Iehova, ua viiviihia te rima o te haapaoraa i te toto no te mea aita ratou i haapii maitai i to ratou mau melo te parau mau no nia i te mau mea o ta te Atua e titau maira i ta ˈna ra mau tavini. Aita oia i haapii maitai i te mau taata e e tia i te feia haamori mau i te Atua ia pee i te huru o Iesu Mesia e ia aroha i to ratou taata-tupu noa ˈtu e eaha to ratou nunaa. (Mika 4:3, 5; Ioane 13:34, 35; Ohipa 10:34, 35; Ioane 1, 3:10-12) No te mea e aita te mau haapaoraa o Babulonia Rahi i haapii i taua mau mea ra no reira ïa to ratou mau melo i aratohia ˈi i roto i te mau tamaˈi o te mau nunaa mai te puaahiohio ra te huru. Ua ite-maitai-hia te reira i roto i na tamaˈi rahi toopiti o te ao nei tei haamata i te afaraa matamua o te senekele XX, raua toopiti nei i rotopu ïa i te amuiraa faaroo kerisetiano, e ua tae roa te feia e hoê â to ratou haapaoraa i te taparahi te tahi i te tahi. Ahiri te feia atoa e parau ra e e kerisetiano ratou i faatura i te mau faaueraa tumu a te Bibilia, eita ïa na tamaˈi e tupu.
19. No te aha e tia ia parauhia e ua manii o Babulonia Rahi i te toto e rave rahi?
19 I mua i te aro o Iehova, ua harahia ïa Babulonia Rahi i te taatoaraa o taua mau maniiraa toto e rave rahi ra. Ahiri te mau aratai haapaoraa, to te amuiraa faaroo kerisetiano iho â râ, i haapii i te parau mau o te Bibilia i to ratou mau melo, eita ïa taua mau taparahiraa taata e rave rahi ra e tupu. Parau mau ïa, e tia ia Babulonia Rahi—te vahine faaturi rahi, te mana faatere o te haapaoraa hape o te ao nei—ia pahono tia ˈtu i mua ia Iehova no te toto o “te feia atoa i taparahihia i teie nei ao” e eiaha noa no “te toto o te mau peropheta e to te feia moˈa” o ta ˈna i hamani ino e o ta ˈna i taparahi. Ma te papu maitai ua manii o Babulonia Rahi i te toto e rave rahi. Auê ïa i te mâmâ e ia mou anaˈe o ˈna e a muri noa ˈtu!
[Uiraa haapiiraa]
[Tumu parau tarenihia i te api 270]
Te pau i te faaauraa te tahi i te tahi
I roto i ta ˈna buka Te Ekalesia katolika e te Helemani nazi, ua papai o Guenter Lewy e: “Ahiri te haapaoraa katolika no Helemani, mai te haamataraa iho â, i rave i te hoê polititaraa no te patoi-etaeta-raa ˈtu i te faatereraa nazi, peneiaˈe e tereraa ohipa taa ê ïa to te aamu o te ao nei. Noa ˈtu â ïa e aita paha teie aroraa e manuïa no te faataahuriraa ia Hitler e ia ore te rahiraa o ta ˈna mau taparahiraa taata e tupu, ahiri oia i na reira, e maraa rahi mau ïa te hanahana o te Ekalesia i te pae morare. Mea papu ïa e pohe e rave rahi taata na roto i taua patoiraa ra, e fariihia râ taua mau faatusiaraa ra no te tumu maitai roa ˈˈe. I te mea e e ere i te mea papu roa i to ˈna iho fenua, eita paha ïa o Hitler e haere atu e tamaˈi, e e ora mai ïa te mau mirioni taata. . . . I te mea e ua hamani-ino-hia te mau tausani Helemani patoi i te mau nazi, e ua pohe roa ratou i roto i te mau aua hamani-ino-raa, i te mea e ua taparahia te intelligentsia no te fenua Polonia, e ua pohe te mau tausani Rusia no te mea e mau Untermenschen [i raro aˈe i te taata] no Europa i ropu, e ua taparahi-pohe-hia e ono mirioni taata no te mea e ere ratou i te mau ‘aryens,’ ua turu te mau mana ekalesiatiko no Helemani i te faatereraa e rave ra i taua mau taparahiraa taata ra. Ua vai mamu noa te Pâpa, raatira i te pae varua o te Ekalesia e pu hau roa ˈˈe hoi i te teitei no te morare katolika.”—Te api 275 e te api 292.
[Hohoˈa i te api 268]
“Auê . . . auê,” te na ô ra te feia faatere
[Hohoˈa i te api 268]
“Auê . . . auê,” te na ô ra te feia hoo
