Te unauna rahi o te terono o Iehova i nia i te raˈi
Pene 14
Te unauna rahi o te terono o Iehova i nia i te raˈi
Orama 2—Apokalupo 4:1 e tae atu i te 5:14
Tumu parau: Te mau ohipa maere mau e tupu ra i mua i te terono e parahihia ra e te Atua no te haavaraa
Tau no te tupuraa: Te faataa ra teie orama i te mau ohipa e tupu mai te matahiti 1914 mai â e tae noa ˈtu i te hopea o te Tausani matahiti e hau atu â, i to te mau mea poiete atoa to te raˈi e to te fenua arueraa ia Iehova.—Apokalupo 5:13
1. No te aha e mea tano ia anaanatae mau â tatou i te mau orama ta Ioane i faaite mai?
TE HAAMATA ra Ioane i te faaite mai ia tatou i te tahi atu â mau orama o te haaputapû i to tatou mafatu. Ma te faauruahia e te Atua, tei roto noa o Ioane i te mahana o te Fatu ra. E mea faufaa roa ïa no tatou te mau mea o ta ˈna e faataa ra, no te mea te ora mau ra tatou i taua mahana ra. Na roto i te arai o teie mau orama, te iriti ra Iehova i te paruru o te mau mea itea-ore-hia e te mata taata nei e tapoi ra i te mau mea mau e vai ra i nia i te raˈi e te horoa ra oia ia tatou nei to ˈna iho manaˈo no nia i ta ˈna mau haavaraa o ta ˈna e faatae mai i nia i te fenua nei. E hau atu â, noa ˈtu e e tiaturiraa to tatou no nia i te raˈi aore ra no nia i te fenua nei, e tauturu mai teie mau faaiteraa ia tatou ia ite i to tatou parahiraa i roto i te opuaraa a Iehova. No reira ïa e mea tano ia tamau â tatou paatoa i te faaite i te hoê anaanatae rahi no nia i teie mau parau ta Ioane e: “E ao to ˈna to te taio, e to te feia e faaroo i teie nei parau tohu, e te haapao i tei papaihia i roto ra.”—Apokalupo 1:3.
2. I teie nei, eaha ïa te titau-manihini-raa tei faaitehia ˈtu i teie nei ia Ioane?
2 Te mea o ta Ioane e ite ra i teie nei, ua hau aˈe ïa i te faahiahia i te mau mea atoa o te itehia nei i roto i te mau hohoˈa vidéo o te XXraa o te senekele! Ua papai oia e: “E I muri aˈe i taua mau parau nei, hiˈo atura vau, e inaha, iritihia aˈera te hoê opani i nia i te raˈi, e te reo matamua ta ˈu i faaroo ra mai te pu ra ïa, i te parauraa mai ia ˈu; i te na ôraa mai e, A haere mai na i nia nei, e na ˈu e faaite atu ia oe i te mau mea e tupu e tia ˈi a muri nei.” (Apokalupo 4:1) Te tomo ra o Ioane na roto i te orama i roto i te mau raˈi ite-ore-hia e te mata taata nei, i mua roa i te aro o Iehova, atea atu â i te reva teitei e raterehia ra e te mau taata o te maoˈahia na te reva teitei o to tatou nei tau, e atea atu â i te mau haapueraa fetia o te ao taatoa nei. E au ra e ua titau-manihini-hia oia ia haere na roto i te hoê uputa matara no te mataitai i te hoê vahi maere mau: te vahi teitei roa ˈˈe o te mau raˈi i te pae varua, te vahi tei reira Iehova i te parahiraa i nia i to ˈna terono. (Salamo 11:4; Isaia 66:1) Auê ïa haamaitairaa taa ê rahi e!
3. Eaha ta te reo “mai te pu ra” te huru e faahaamanaˈo ra, e o vai mau na te Tumu o te reira?
3 Aita te Bibilia e faataa ra e eaha teie “reo matamua.” Mai te reo puai o Iesu tei faaroohia i mutaa ihora, o te hoê ïa faaueraa e au ra i te oto o te pu. (Apokalupo 1:10, 11) Te faahaamanaˈo ra te reira i te oto pu puai e faaite ra e tei nia Iehova i te mouˈa o Sinai. (Exodo 19:18-20) Mea papu e o Iehova te Tumu hanahana no teie titauraa. (Apokalupo 1:1) Ua iriti oia i te uputa ia nehenehe Ioane e tomo na roto i te orama i roto i te vahi moˈa roa no te tuhaa otia ore o To ˈna mana hope.
Te aro anaana o Iehova
4. (a) Eaha te auraa o te orama a Ioane no te mau kerisetiano faatavaihia? (b) Eaha te auraa o teie orama no te mau kerisetiano e tiaturi ra e ora ratou e a muri noa ˈtu i nia i te fenua nei?
4 Eaha ta Ioane e ite ra? A faaroo na i ta ˈna faaiteraa ia tatou i te mea faahiahia roa ˈˈe o ta ˈna i ite: “Mahere roa ˈtura vau i te [v]arua i reira ra, e inaha, e terono tei faatiahia i nia i te raˈi, e te parahi ra te hoê i nia iho i taua terono ra.” (Apokalupo 4:2) I reira iho, ua mahere roa ˈtura Ioane i te varua na roto i te puai ohipa o te Atua e tae roa ˈtu i mua i te terono o Iehova. Ua putapû roa Ioane i te reira! I reira, to Ioane ite-atea-raa i te hoê orama anaana no te mau raˈi i reira o ˈna e haere ai e te tahi atu â mau kerisetiano faatavaihia, “te tufaa ino ore ra, e te viivii ore, e te maheahea ore.” (Petero 1, 1:3-5; Philipi 3:20) E no te feia e tiaturi ra e ora ratou e a muri noa ˈtu i nia i te fenua nei, e auraa hohonu atoa to te orama a Ioane no ratou. Te tauturu ra oia ia ratou ia taa i te hanahana o Iehova e te huru faanahoraa o te faatereraa o ta ˈna e faaohipa ra i nia i te raˈi, na mua ˈˈe no te haava i te mau nunaa, e i muri iho no te faatere i te mau taata i nia i te fenua nei. O Iehova mau ïa te Atua aravihi roa ˈˈe i te pae no te faanahonahoraa!
5. Eaha te mea mau o tei faahohoˈahia e te tapoi o te afata faufaa o ta Ioane e ite ra?
5 Te faahaamanaˈo ra e rave rahi mau mea o ta Ioane e hiˈo ra i nia i te mau raˈi i te mau tauihaa no te sekene o tei hamanihia fatata 1 600 matahiti i mahemo aˈenei i roto i te medebara ia riro mai oia ei fare pureraa no te haamoriraa mau a te mau Iseraela. Tei roto i te Vahi Moˈa Roa o teie sekene te afata faufaa, e te paraparau maira Iehova iho mai nia mai i te tapoi auro o teie Afata. (Exodo 25:17-22; Hebera 9:5) Te faahohoˈa maira te tapoi o te Afata i te terono o Iehova. I teie nei, te ite ra Ioane i te mea mau o teie faahohoˈaraa taipe: te Arii Mana Hope te Fatu ra o Iehova iho, i te parahiraa i nia i to ˈna terono unauna rahi faito ore i nia i te raˈi teitei.
6. Mea na roto i teihea mau parau to Ioane faaiteraa i to ˈna manaˈo no nia ia Iehova, e no te aha e mea tano mau te reira?
6 Taa ê atu i te mau peropheta o tei ite aˈena i te mau orama no nia i te terono o Iehova, aita Ioane e faataa papu ra i tei Moˈa e parahi ra i nia i teie parahiraa teitei. (Ezekiela 1:26, 27; Daniela 7:9, 10) Area râ, te horoa ra Ioane ia tatou i to ˈna manaˈo no nia i Tei parahi i nia i te terono i te na ôraa e: “E o tei parahi i nia iho i taua terono ra, mai te isephe ra, e te ofai adama ra, te huru; e i haaatihia taua terono ra i te anuanua, mai te semaradino ra te huru.” (Apokalupo 4:3) Auê ïa unauna rahi faito ore e! Te mataitai ra Ioane i te hoê mea nehenehe e faatupu mai i te hau, e o te anaana ra, e au i te mau ofai taoˈa rahi e anapanapa noa ra. Ua tuea maite ïa te reira i te faataaraa ta te pǐpǐ ra o Iakobo i horoa no nia ia Iehova i to ˈna piiraa ia ˈna e te “Metua o te maramarama [i nia i te raˈi ra]”! (Iakobo 1:17) E i muri iti noa iho i to ˈna papairaa i te Apokalupo, ua haapapu o Ioane iho e “e maramarama te Atua, e aita roa e pouri o roto ia ˈna.” (Ioane 1, 1:5) E hanahana hau aˈe ïa to Iehova!
7. Eaha ta tatou e haapii ra i te mea e te haaatihia ra te terono o Iehova e te hoê anuanua?
7 A tapaˈo na e te ite ra Ioane i te hoê anuanua ninamu mai te semaradino ra te huru e haaati ra i te terono. Te iˈoa heleni tei tatarahia i ǒ nei na roto i te parau anuanua (iris) te faataa ra oia i te hoê mea menemene roa. Te faahiti-matamua-raahia te parau no te anuanua i roto i te Bibilia, ua tuati ïa te reira i te tau o Noa. I muri aˈe i te pâpâmarôraa te mau pape o te diluvi, faatupu maira Iehova i te hoê anuanua i roto i te ata, e ua horoa maira i te faataaraa o teie tapao na roto i teie mau parau: “O tau anuanua i roto i te ata ra ta ˈu ïa e haapao nei, ei tapao no te faufaa na ˈu i to te ao atoa na. Ei reira vau e manaˈo ai i tau faufaa nei, o vau te tahi pae, e o outou te tahi, e te mau mea ora atoa e rave rahi te huru; e e ore roa te pape e riro faahou ei diluvi, e hope ai te mau mea ora i te pohe ra.” (Genese 9:13, 15) Te manaˈo ra Ioane i te aha i to ˈna iteraa i teie orama i nia i te raˈi? Te faahaamanaˈo ra te anuanua o ta ˈna i ite e e mea titauhia no ˈna te hoê taairaa hau e o Iehova, mai te taairaa e fanaˈohia ra e te pǔpǔ a Ioane i teie nei mahana. Ua haaputapû atoa teie anuanua ia Ioane no te mǎrû e te hau e itehia ra no ǒ mai ia Iehova ra. E tae atoa teie hau i nia i te mau taata faaroo atoa ia hohora-anaˈe-hia te sekene o te Atua i nia i te huitaata o te fenua apî aore ra te totaiete taata apî.—Salamo 119:165; Philipi 4:7; Apokalupo 21:1-4.
Te iteraa e o vai na peresibutero [matahiapo] e 24
8. O vai ma ta Ioane e ite ra o te haaati i te terono, e te faahohoˈa ra ratou ia vai ma?
8 Ua ite Ioane e ua nominohia te mau tahuˈa no te taviniraa i roto i te sekene i tahito ra. Peneiaˈe ua maere paha ïa o ˈna i te iteraa i te mea o ta ˈna e faataa ra i muri iho: “E na terono ěê hoi e piti ahuru ma maha i te haaatiraa i taua terono ra; e ite atura vau i na peresibutero [matahiapo] e piti ahuru ma maha i te parahiraa i nia iho i taua mau terono ra, ma te ahu teatea i te ahuraa, e ma te korona auro i nia i to ratou upoo.” (Apokalupo 4:4) Oia mau, aita oia i ite i te mau tahuˈa, ua ite râ oia e 24 mau matahiapo, e parahi ra i nia i te mau terono e e korona to nia i to ratou upoo mai te mau arii ra te huru. O vai ma ïa? O te mau melo faatavaihia ïa o te amuiraa kerisetiano, o tei faatia-faahou-hia e tei nia ratou i te tiaraa o ta Iehova i tǎpǔ i nia i te raˈi. Nafea tatou e taa papu ai i te reira?
9, 10. Nafea tatou e papu ai e te faahohoˈa ra te mau matahiapo e 24 i te amuiraa o te mau kerisetiano faatavaihia e te varua i roto i to ˈna tiaraa hanahana i nia i te raˈi?
9 Na mua ˈˈe, e korona to nia i to ratou upoo. Ia au i te Bibilia, e noaa i te mau kerisetiano faatavaihia “te korona tahuti ore” e e noaa atoa ia ratou te ora e aita to ˈna e hopea—te pohe ore. (Korinetia 1, 9:25; 15:53, 54) I te mea e te parahi ra na matahiapo e 24 i nia i te mau terono, ia au i te taatoaraa o teie mau irava, te faahohoˈa ra ïa te mau korona auro i te mana arii. (Hiˈo Apokalupo 6:2; 14:14.) Te haapapu maira te reira e te faahohoˈa ra te mau matahiapo e 24 i te mau pǐpǐ a Iesu faatavaihia e te varua i roto i to ratou tiaraa i nia i te raˈi, no te mea ua fafau Iesu i te hoê faufaa na ratou ia nehenehe ratou e parahi i nia i te mau terono i roto i to ˈna ra Basileia. (Luka 22:28-30) O Iesu e teie e 24 mau matahiapo anaˈe iho—aita e taata ê atu, aita atoa te mau melahi—e faaitehia ra i ǒ nei o te arii i nia i te mau raˈi i mua i te aro o Iehova.
10 Ua au maite ïa teie faataaraa e te parau tǎpǔ ta Iesu i horoa i te amuiraa no Laodikea: “O te riro ia ˈna te re ra, e haaparahi au ia ˈna ia ˈu nei i nia i to ˈu nei terono.” (Apokalupo 3:21) Aita râ i taotiahia te tiaraa o te mau matahiapo e 24 i nia i te raˈi i nia i te faatereraa noa. I te omuaraa o te buka o te Apokalupo, te parau ra Ioane no nia ia Iesu e: “E ua faariro ia tatou ei arii anaˈe, e ei tahuˈa na te Atua i to ˈna ra Metua.” (Apokalupo 1:5, 6) No reira ïa e mau arii tahuˈa teie mau matahiapo. “E riro râ ratou ei tahuˈa na te Atua e na te Mesia, e e hau to ratou ia ˈna ra e ia hoê tausani i te matahiti.”—Apokalupo 20:6.
11. No te aha e mea tano ia itehia e 24 matahiapo, e eaha ta teie numera e faaite ra?
11 Te ite ra Ioane e 24 matahiapo e haaati ra i te terono. Eaha ïa te auraa o teie numera? Na nia e rave rahi mau auraa, ua riro te mau tahuˈa haapao maitai no Iseraela i tahito ra ei taipe no teie mau matahiapo. Ua papai te aposetolo Petero i te mau kerisetiano faatavaihia e: “E ui maitihia râ outou, e autahuˈa arii, e nunaa moˈa, e feia hoohia.” (Petero 1, 2:9) E mea faufaa mau te iteraa e ua tufahia te autahuˈa ati iuda na roto e 24 pǔpǔ. Ua maitihia te mau pǔpǔ taitahi no te taviniraa i mua ia Iehova i roto i te tahi mau hebedoma o te matahiti, e mea na reira ïa te taviniraa moˈa i te pûpûhia ma te faaea ore. (Paraleipomeno 1, 24:5-19) No reira, te itehia ra, ma te tano, e 24 matahiapo i roto i te orama a Ioane no nia i te autahuˈaraa e vai ra i nia i te raˈi, no te mea te tavini tamau ra ratou ia Iehova, oia mau, ma te faaea ore. Ia naea-anaˈe-hia te numera taatoa, e itehia ïa e 24 pǔpǔ, e 6 000 feia tei noaa ia ratou te re i roto i te pǔpǔ hoê, no te mea te parau ra te Apokalupo 14:1-4 e 144 000 taata (24 x 6 000) ‘i tauihia . . . no roto i te taata nei’ o te tia ra i nia i te mouˈa Siona i nia i te raˈi e te Arenio ra, o Iesu Mesia. I te mea e te faaite ra te numera 12 i te hoê faanahonahoraa aifaito maitai a te Atua, te tataipitihia ra—e aore ra te haafaufaa-rahi-hia ra—teie huru na roto i te numera 24.
Te uira, te reo e te patiri
12. Eaha ta Ioane e ite ra e e faaroo ra i muri iho, e eaha ta ‘te uira, te reo e te patiri’ e faahaamanaˈo ra?
12 Eaha ta Ioane e ite ra e e faaroo ra i muri iho? “Ua hoa maira te uira, e te patiri, e te reo, no roto i taua terono ra.” (Apokalupo 4:5a) Te faahaamanaˈo atoa ra te reira i te tahi atu â tupuraa faahiahia roa o te puai o Iehova i nia i te raˈi ra! E hiˈopoa tatou ei hiˈoraa i te ohipa i tupu i to Iehova ‘pouraa mai’ i nia i te mouˈa Sinai. Te faatia ra Mose e: “E tae aˈera i te toru o te mahana, i te poipoi, o te patiri ihora, e te uira, e te hoê ata meumeu i nia i taua mouˈa ra; e te oto o te pu ra e mea rahi roa. . . . E rahi aˈera te oto o taua pu ra, e te tupu noa ˈtura hoi i te rahiraa, ua parau atura Mose, e ua parau maira te Atua ia ˈna i te hoê reo.”—Exodo 19:16-19.
13. Eaha ta te uira e haere maira i rapae au mai roto mai i te terono o Iehova e faahohoˈa ra?
13 I te roaraa o te mahana o te Fatu ra, te faaite ra Iehova i to ˈna puai e tei reira oia e ma te faahiahia mau. Aita o ˈna i na reira na roto i te arai o te uira mau, no te mea te ite ra Ioane i te mau tapao. Eaha ïa ta te uira e faahohoˈa ra? E nehenehe te uira e turama, e nehenehe atoa ra e tairi pohe roa i te hoê taata. No reira, te uira e haere maira i rapae au mai roto mai i te terono o Iehova, te faahohoˈa ra ïa te reira i te mau haamaramaramaraa o ta ˈna e horoa tamau ra no to ˈna nunaa e, te mea tano roa ˈtu â, te faahohoˈa atoa ra te reira i ta ˈna mau poroi faautuaraa e au i te auahi ra.—Hiˈo Salamo 18:14; 144:5, 6; Mataio 4:14-17; 24:27.
14. Mea nafea te mau reo i te faarooraahia i to tatou nei tau?
14 E eaha te parau no te reo? I to Iehova pouraa mai i nia i te mouˈa Sinai, ua paraparau te hoê reo ia Mose. (Exodo 19:19) Na te mau reo mai nia mai i te raˈi e faatae ra i te mau faaueraa e te mau faaiteraa parau e rave rahi e vai ra i roto i te buka o te Apokalupo. (Apokalupo 4:1; 10:4, 8; 11:12; 12:10; 14:13; 16:1, 17; 18:4; 19:5; 21:3) I to tatou nei mahana, ua faatae atoa Iehova i te mau faaueraa e te mau parau faaite i to ˈna nunaa, e mea na reira oia i te faarahiraa i te ite o to ˈna nunaa no nia i te mau parau tohu e te mau ture tumu o te Bibilia. Mea pinepine, te horoahia te mau haamaramaramaraa i te mau tairururaa o te mau nunaa atoa, e i muri iho, e faaitehia teie mau parau mau bibilia i roto i te ao taatoa nei. Ua faaite te aposetolo Paulo no nia i te mau taata haapao maitai e poro ra i te parau apî oaoa e: “Ua ite ïa; ua reva to ratou reo i te mau fenua atoa, e ua tae ta ratou parau i te hopea mai o te fenua ra.”—Roma 10:18.
15. Eaha te patiri e haere maira i rapae au i te terono i te mahana o te Fatu ra?
15 I muri iho mai i te uira o te patiri ïa. Ua faariro Davida i “te reo o Iehova” i te haruru patiri. (Salamo 29:3, 4) I to Iehova aroraa no Davida ma te patoiraa ˈtu i ta ˈna mau enemi, e au ra e no ǒ mai Ia ˈna ra te patiri. (Samuela 2, 22:14; Salamo 18:13) Ua parau Elihu ia Ioba e au te reo o Iehova i te patiri e ‘e parau rahi ta ˈna e rave nei, e ore e tia ia faataa.’ (Ioba 37:4, 5) I roto i teie tuhaa o te mahana o te Fatu ra, ua faaroohia te ‘haruru’ no ǒ mai ia Iehova ra no te faaara i te mau taata i te mau ohipa faahiahia o ta ˈna e fatata roa i te rave i nia i to ˈna mau enemi. Ua faaroo-tamau-noa-hia teie mau haruru patiri taipe i nia i te fenua paatoa. E oaoa outou mai te peu e e haapao maitai outou i teie mau parau faaite e au i te haruru patiri e mai te peu e faaohipa outou ma te paari i to outou reo no te haapurororaa i te reira!—Isaia 50:4, 5; 61:1, 2.
Te mau lamepa auahi e te hoê miti mai te hiˈo ra
16. Eaha ta te mau “lamepa aamâ e hitu i te uraraa” e faahohoˈa ra?
16 Eaha atu â o ta Ioane e ite faahou ra? “E na lamepa aamâ e hitu i te uraraa i mua i taua terono ra, oia na varua toohitu o te Atua ra. E te hoê miti mai te hiˈo anaana tei mua i taua terono ra mai te kerehe te huru.” (Apokalupo 4:5b, 6a) O Ioane iho te horoa ra i te auraa o na lamepa e hitu i te na ôraa e “oia na varua toohitu o te Atua ra.” Te faahohoˈa ra te numera hitu i te huru taatoa o te mau mea no ǒ mai i te Atua ra; no reira, te faahohoˈa ra na lamepa e hitu ra i te taatoaraa o te puai turama o te varua moˈa. I to tatou nei mahana, ua mauruuru roa te pǔpǔ a Ioane i te mea e ua turamahia oia e ua horoahia no ˈna te hopoia no te haamaramarama i te mau taata o te fenua nei e poia ra i te pae varua. Auê ïa te oaoa i te iteraa e i te matahiti hoê hau atu i te 200 mirioni vea Te Pare Tiairaa o te tamau noa ra i te opere i teie maramarama na roto hau atu i te hanere reo!—Salamo 43:3.
17. Eaha ta te “miti mai te hiˈo . . . mai te kerehe te huru” e faahohoˈa ra?
17 Te ite atoa ra Ioane i te hoê “miti mai te hiˈo anaana . . . mai te kerehe te huru.” Eaha ïa ta te reira e faahohoˈa ra no te feia o tei titau-manihini-hia ia tomo i roto i te aua o Iehova i nia i te raˈi? Ia au i te parau a Paulo, ua haamoˈa Iesu i te amuiraa na roto “i te horoiraa pape, e te parau i aˈohia ra.” (Ephesia 5:26) Hou to ˈna poheraa, ua parau Iesu i ta ˈna mau pǐpǐ e: “Ua mâ ra outou i tena na, i te parau ta ˈu i haapii atu ia outou na.” (Ioane 15:3) No reira, te faahohoˈa ra teie miti mai te hiˈo ra e au i te kerehe te huru ra i te Parau a te Atua tei papaihia, parau o te tamâ. No te tomoraa i mua i te aro o Iehova, e tia i te mau melo o te autahuˈa arii ia tamâ taatoa ia ratou na roto i te arai o ta ˈna Parau.
A hiˈo—“Na mea ora ïa e maha”!
18. Eaha ta Ioane e ite ra i ropu e na te hiti e ati noa ˈˈe te terono?
18 I teie nei, te hiˈo ra Ioane i te tahi atu â mea. Ua papai oia e: “E tei ropu i taua terono ra, e tei te hiti e ati noa ˈˈe taua terono ra, o na mea ora ïa e maha, ua ati i te mata o mua, e o muri.”—Apokalupo 4:6b.
19. Eaha ta teie mau mea ora e maha e faahohoˈa ra, e mea nafea tatou e papu ai i te reira?
19 Eaha ta teie mau mea ora e faahohoˈa ra? Na te hoê orama tei faaitehia i te tahi atu â peropheta, o Ezekiela, e tauturu mai ia tatou ia taa i te reira. Te ite ra Ezekiela ia Iehova i nia i te terono i nia i te hoê pereoo i nia i te raˈi, e te apeehia ra te reira e te mau mea ora hoê â huru e te mau mea ora o ta Ioane e faataa ra. (Ezekiela 1:5-11, 22-28) I muri iho, ua ite faahou Ezekiela i teie pereoo e terono to nia iho e te apeehia ra e te mau mea ora. I teie nei râ, te parau ra o ˈna e teie mau mea ora e mau kerubi ïa. (Ezekiela 10:9-15) No reira, te faahohoˈa ra ïa teie mau mea ora e maha o ta Ioane i ite i te mau kerubi e rave rahi a te Atua—e e tiaraa teitei to teie mau mea poietehia i roto i Ta ˈna faanahonahoraa i te pae varua. Aita roa ˈtu Ioane i maere i te mea e te tia ra teie mau kerubi i pihai iho roa ia Iehova, no te mea i roto i te sekene i tahito ra, te vai ra e piti kerubi auro i nia i te tapoi o te afata faufaa, e faahohoˈa ra i te terono o Iehova. E mai rotopu i teie nau kerubi e horoa ˈi te reo o Iehova i te mau faaueraa i te nunaa.—Exodo 25:22; Salamo 80:1.
20. Nafea e nehenehe ai i te parau e te tia ra na mea ora e maha i “ropu i taua terono ra, e tei te hiti e ati noa ˈˈe taua terono ra”?
20 Te tia ra na mea ora e maha i “ropu i taua terono ra, e tei te hiti e ati noa ˈˈe taua terono ra.” Eaha mau na te auraa o te reira? Peneiaˈe, te tia ra na mea ora taitahi i ropu i na tuhaa taitahi e maha. No reira, mea na reira te feia iriti La Bible en français courant te huriraa i teie parau heleni tumu: “Na te hiti e ati noa ˈˈe te terono, e i na pae taitahi.” E nehenehe atoa teie piiraa parau e horoa i te manaˈo e te tia ra na mea ora e maha i ropu mau i te mau raˈi, i reira te tiaraa te terono. No reira ïa te Nouveau Testament a P. de Beaumont i tatara ˈi mai te reira te huru: “Na te hiti e ati noa ˈˈe te terono iho, i ropu.” Te vahi faufaa râ, te tia ra te mau kerubi i pihai iho roa i te terono o Iehova, mai te mau kerubi o ta Ezekiela i ite i te tiaraa i na poro e maha o te pereoo e faahohoˈa ra i te faanahonahoraa a Iehova. (Ezekiela 1:15-22) Ua tuea maite ïa te reira i te mau parau a te Salamo 99:1: “O Iehova te arii, . . . te parahi ra oia i nia i te kerubi.”
21, 22. (a) Mea nafea Ioane i te faataaraa i na mea ora e maha? (b) Eaha ta te mau mea ora taitahi e maha e faahohoˈa ra?
21 E te na ô faahou ra Ioane e: “Te hoê mea ora ra, mai te liona ïa, e te piti o te mea ora ra, mai te kafa ïa, e te toru o te mea ora ra, mai to te taata to ˈna mata te huru, e te maha o te mea ora ra, mai te aeto mahuta ra ïa.” (Apokalupo 4:7) No te aha na mea ora e maha i taa ê mau ai te tahi i te tahi? Te faataa papu ra na mea ora taa ê te tahi i te tahi i te mau huru taa ê o te Atua. A tahi, te vai ra te liona. I roto i te Bibilia, te faahohoˈa ra teie animala i te itoito, taaihia iho â ra i nia i te faaohiparaa i te parau-tia. (Samuela 2, 17:10; Maseli 28:1) No reira, te faahohoˈa maitai ra te liona i te huru o te Atua, oia hoi te parau-tia o tei faaohipahia ma te itoito. (Deuteronomi 32:4; Salamo 89:14) E au ra te piti o te mea ora i te hoê kafa apî. Te faahaamanaˈo ra teie animala i teihea huru? No te mau Iseraela, e mea faufaa roa ïa te puaatoro oni no to ˈna puai. (Maseli 14:4; hiˈo atoa Ioba 39:9-11.) Te faahohoˈa ra ïa te puaatoro oni apî i te puai itoito ohipa no ǒ mai ia Iehova ra.—Salamo 62:11; Isaia 40:26.
22 Te toru o te mea ora, e au ïa to ˈna mata i to te taata. Te faahohoˈa ra ïa i te here o te Atua, no te mea, i nia i te fenua nei, o te taata anaˈe iho tei poietehia ia au i te hohoˈa o te Atua, e no reira ua horoahia no ˈna teie huru faufaa rahi o te here. (Genese 1:26-28; Mataio 22:36-40; Ioane 1, 4:8, 16) Mea papu e te faaite ra te kerubi i teie huru i to ratou taviniraa na te hiti e ati noa ˈˈe te terono o Iehova. I teie nei, eaha ïa te parau no te maha o te mea ora? E au ra oia i te hoê aeto e rere ra. O Iehova iho te huti ra i te ara-maite-raa i nia i te mata o te aeto i te na ôraa e: “E ite to ˈna mata i te maa i te atea ê ra.” (Ioba 39:29) Te faahohoˈa ra te aeto i te paari, e te taa i te auraa o te mau mea. O Iehova te Pû o te paari, e te faaite ra te mau kerubi i teie huru na roto i te auraroraa i ta ˈna mau faaueraa.—Maseli 2:6; Iakobo 3:17.
Te mau arueraa no te faahanahanaraa ia Iehova
23. Eaha te auraa i te mea e ua “îî” mau mea ora e maha “i te mata,” e eaha te haapapuhia ra e i te mea e mea tataitoru to ratou nau pererau?
23 Te tamau ra Ioane i ta ˈna faataaraa i te na ôraa e: “E o aua na mea ora e maha ra, taiono anaˈe o ratou pererau e ati noa ˈˈe; e ua îî ratou i te mata i roto: e aore ratou i faaea i te rui e te ao i te na ôraa e: E moˈa, e moˈa, e moˈa, to te Fatu ra to te Atua Mana hope ra, o tei vai na, e te vai nei, e o te tae mai.” (Apokalupo 4:8) I te mea e, ua î roa na mea ora e maha i te mau mata, te faaite ra te reira e e mata maitai roa to ratou e e nehenehe ratou e hiˈo i te atea roa. Te faaohipa tamau ra ratou i te reira, no te mea eita ratou e taoto. Te pee ra ratou i te hiˈoraa o Teie no ˈna te parau i papaihia e: “Te hiˈo nei te mata o Iehova i to te ao atoa nei, ia horoa mai oia i te etaeta i te feia i tia te aau ia ˈna.” (Paraleipomeno 2, 16:9) I te mea e e rave rahi to ratou mata, e nehenehe ïa te mau kerubi e hiˈo i te mau vahi atoa. Aita hoê aˈe mea e ore e itehia e ratou. E ua ineine ïa ratou no te taviniraa i te Atua i roto i ta ˈna ohipa haavaraa. Teie tei papaihia no ˈna: “Tei te mau vahi atoa nei to Iehova mata, i te hiˈoraa mai i te ino e te maitai.” (Maseli 15:3) E hau atu â, i te mea e mea tataitoru to ratou nau pererau—i roto i te Bibilia, ua faaohipahia te numera toru no te haapapuraa i te manaˈo—e nehenehe ïa te mau kerubi e tere oioi noa mai te uira ra te huru no te faaiteraa i te mau haavaraa a Iehova e no te faatupuraa i te reira.
24. Mea nafea te mau kerubi i te arueraa ia Iehova e eaha te auraa o te reira?
24 A faaroo na! Te himene ra te mau kerubi i te hoê himene au maitai, o te haaputapû i te mafatu, no te arueraa ia Iehova: “E moˈa, e moˈa, e moˈa, to te Fatu ra to te Atua Mana hope ra, o tei vai na, e te vai nei, e o te tae mai.” Te haapapu faahou ra teie tataitoruraa i te puai faito ore o te hoê mea. Te haapapu ra te mau kerubi ma te puai i te moˈaraa o te Atua ra o Iehova. O oia, te Pu e te Hiˈoraa maitai roa no te moˈaraa. O oia atoa te “Arii hau mure ore”; e o o ˈna noa iho â “te Alepha e te Omega, te matamua e te faahopea, o to mua e o to muri.” (Timoteo 1, 1:17; Apokalupo 22:13) Ma te faaea ore, te faaite ra te mau kerubi i te mau huru faito ore o Iehova i mua i te mau mea atoa i poietehia.
25. Mea nafea te mau mea ora e maha e te mau matahiapo e 24 i te tahoê i te haamoriraa ia Iehova?
25 Ua haruru te raˈi o te mau raˈi i te mau himene arueraa ia Iehova. Oia mau, te na ô faahou ra te faatiaraa a Ioane e: “E ia faahanahana aua na mea ora ra, ia faateitei, e ia haamaitai ia ˈna i tei parahi i nia iho i te terono ra, o te ora e a muri noa ˈtu, e tipapa te mau peresibutero e piti ahuru ma maha i raro, i mua ia ˈna i tei parahi i nia i te terono ra, a haamori ai ia ˈna i te tia i te oraraa e a muri noa ˈtu, e tuu hoi i to ratou mau korona i mua i te terono ra, a na ô atu ai, E au te hanahana ia oe, e te Fatu, e te tura, e te mana, na oe hoi i hamani i te mau mea atoa nei, e no to oe hinaaro i mau ai, e i hamanihia ˈi ratou.” (Apokalupo 4:9-11) I roto i te mau Papai taatoa, o te reira ïa te hoê o te mau faahanahanaraa faahiahia roa ˈˈe tei faataehia ˈtu ia Iehova ra, to tatou Atua e to tatou Fatu Mana Hope.
26. No te aha te mau matahiapo e 24 i tuu ai i to ratou mau korona i mua ia Iehova?
26 Hoê â huru feruriraa to te mau matahiapo e 24 e to Iesu. E ua tae roa ratou i te tuu i to ratou mau korona i mua i te aro o Iehova. Aita roa ˈtu ratou i hinaaro noa ˈˈe i te faateitei ia ratou iho i mua i te aro o te Atua. Te farii ra ratou ma te haehaa e te opuaraa hoê e te otahi o to ratou tiaraa arii maoti ra o te faahanahanaraa e te arueraa ia ˈna, mai ta Iesu i na reira noa na. (Philipi 2:5, 6, 9-11) Ma te auraro, te farii ra ratou e mea haihai roa ratou e te faˈi atoa ra e ua taaihia ta ratou faatereraa i nia i te Mana Hope o Iehova. No reira, tahoê-maitai-hia ma to ratou mafatu taatoa i te mau kerubi e i te toea o te mau mea poietehia o tei faaite i to ratou haapao maitai, te arue ra e te faahanahana ra ratou i te Atua tei hamani i te mau mea atoa.—Salamo 150:1-6.
27, 28. (a) E turai te faataaraa a Ioane ia rave tatou i te aha? (b) Eaha te uiraa e tia ia anihia no nia i te mea ta Ioane e ite ra e e faaroo ra i muri iho?
27 O vai tei ore i putapû te aau i te taioraa i teie faataaraa ta Ioane i horoa no nia i teie orama? Auê te reira i te faahiahia rahi e! Area râ, mai te aha ïa te huru o te mea mau? Mea papu e turai te hanahana mana arii o Iehova i te mau taata aau mehara atoa ia tahoê atu i na mea ora e maha ra e i te mau matahiapo e 24 no te arueraa ia ˈna, na roto i te faataeraa ˈtu i te pure ia ˈna ra e na roto i te faaiteraa i mua i te taata atoa i to ˈna iˈoa. O te Atua ïa o ta te mau kerisetiano e fanaˈo nei i to ratou riroraa mai ei ite no ˈna i teie mahana. (Isaia 43:10) Eiaha ia moehia ia tatou e te orama a Ioane, no te mahana ïa o te Fatu ra, mahana o ta tatou e ora nei i teie nei. Ua ineine noa “na varua toohitu” i te aratai e te faaitoito ia tatou. (Galatia 5:16-18) I teie mahana, e nehenehe noa tatou e rave i te parau a te Atua no te tautururaa ia tatou ia vai moˈa noa tatou i te taviniraa i te hoê Atua moˈa. (Petero 1, 1:14-16) Mea papu mau e te oaoa ra tatou i te taioraa i te mau parau o teie parau tohu. (Apokalupo 1:3) Te faaitoito maira te reira ia tatou ma te puai hoi ia mau papu tatou ia Iehova e eiaha tatou ia aratohia e teie nei ao ia ore tatou ia himene faahou i te mau himene arueraa Ia ˈna ma te itoito.—Ioane 1, 2:15-17.
28 Tae roa mai i teie nei, te faataa noa ra Ioane i te mea o ta ˈna e ite ra i to ˈna titau-manihini-raahia ia haafatata ˈtu na roto i te tomoraa na te uputa matara i nia i te raˈi. Ma te faahiahia mau, te faaite ra oia ia Iehova i te tiaraa i nia i To ˈna terono i nia i te raˈi, ma te hinuhinu taatoa o To ˈna mana arii e To ˈna tura rahi, e te haaatihia ra oia e te faanahonahoraa puai roa ˈˈe i te mau faanahonahoraa atoa—e te hoê anaana e te hoê haapao maitai papu. Te ohipa ra te Tiribuna a te Atua i teie nei. (Daniela 7:9, 10, 18) I te mea ua ineine te mau mea atoa e tupu mai ïa te hoê ohipa faahiahia roa ˈˈe. Eaha ïa te reira, e mea nafea te reira e riro mai ai ei faufaa na tatou i teie nei mahana? Ia haapao maitai ïa tatou i to muri iho faaiteraa.
[Uiraa haapiiraa]
[Hohoˈa api taatoa i te api 75]
[Hohoˈa api taatoa i te api 78]
