Pene 25

Ua faaora-faahou-hia mai na ite toopiti nei

1. Eaha te titauraa a te melahi ia Ioane?

 NA MUA ˈˈE a hope ai te piti o te ati, ua titau manihini te melahi puai ia Ioane ia ohipa atoa i roto i te tahi atu â hohoˈa o te mau mea e tupu a muri aˈe, no nia ïa i te hiero. (Apokalupo 9:12; 10:1) Teie ta Ioane i papai: “E e aeho tei hoo-mai-hia mai ia ˈu, mai te raau faito ra te huru: tia maira te melahi, e ua parau maira, A tia, a faito i te hiero o te Atua, e te fata, e e taio hoi i te feia e haamori i roto ra.”—Apokalupo 11:1.

Te hiero aore ra te fare pure

2. (a) Eaha te hiero aore ra te fare pure o te vai noa e tae roa mai i to tatou nei tau? (b) O vai te Tahuˈa Rahi o te hiero aore ra sekene, e eaha te Vahi moˈa Roa o teie hiero?

² E ere ïa te hiero e faahitihia ra i ǒ nei i te hoê hiero materia e vai ra i Ierusalema, no te mea ua haamouhia te hiero hopea e te nuu Roma i te matahiti 70 o to tatou nei tau. Area râ, ua faaite te aposetolo Paulo e, na mua roa ˈˈe i teie haamouraa, ua tupu mai te tahi atu â hiero aore ra fare pure e e vai noa te reira e tae roa mai i to tatou nei anotau. E hiero rahi hoi teie i te pae varua no te mau hohoˈa o te mau mea e tupu a muri aˈe no nia i te sekene e i muri iho i te mau hiero i patuhia i Ierusalema. O “te sekene mau, ta te Fatu [Iehova] i faatia, e ere ta te taata ra,” e o Iesu te Tahuˈa Rahi, e o ta Paulo e faataa ra e “te parahi ra [oia] i te pae atau i te terono o tei Rahi i nia i te raˈi ra.” Te Vahi Moˈa Roa o teie hiero o te vahi ïa i reira Iehova e noho ai i roto i te mau raˈi iho.—Hebera 8:1, 2; 9:11, 24.

3. No nia i te sekene, te faahohoˈa ra (a) te paruru e faataa ê ra i te Vahi moˈa Roa e te Vahi moˈa i te aha? (b) te mau tusia animala i te aha? (c) te fata o te mau tusia i te aha?

³ Te faataa ra te aposetolo Paulo e te faahohoˈa ra te paruru e faataa ê ra i te Vahi Moˈa Roa i te Vahi Moˈa i te tino ïa o Iesu. I to Iesu faatusiaraa i to ˈna ora, ua mahae ihora teie paruru na ropu, ei faaiteraa e i teie nei e ere atura te tino o Iesu i te hoê fifi e tapea ra ia ˈna i te tomoraa ˈtu i pihai iho ia Iehova i nia i te raˈi. Na nia i te tusia a Iesu, e nehenehe atoa ta ˈna mau tahuˈa tauturu faatavaihia e o tei pohe ma te tapea i to ratou haapao maitai, e haere atu i nia i te raˈi i te tau au. (Mataio 27:50, 51; Hebera 9:3; 10:19, 20) Ua haapapu atoa Paulo e te faaite atea ra te mau tusia animala o tei afai-tamau-noa-hia i te sekene ra i te tusia otahi o te ora tia roa o Iesu. Te faahohoˈa ra te fata o te mau tusia e vai ra i roto i te aua i te faanahonahoraa ta Iehova i rave, ia au i to ˈna ra hinaaro, no te fariiraa i te tusia a Iesu ei maitai no “te taata e rave rahi,”—na mua ˈˈe no te feia faatavaihia e i muri iho no te mau mamoe ê atu—‘ia ora râ te feia e tiai ia ˈna ra.’—Hebera 9:28; 10:9, 10; Ioane 10:16.

4. Te faahohoˈa ra (a) te Vahi moˈa i te aha? (b) te aua e vai ra i roto i te hiero i te aha?

⁴ Ia au i teie faataaraa faauruahia mai e te Atua, e nehenehe tatou e faaoti e te faahohoˈa ra te Vahi Moˈa o te sekene na mua ˈˈe i te huru moˈa o Iesu e i muri iho i te huru moˈa o te mau 144 000 melo faatavaihia o te autahuˈa arii a parahi noa ˈi ratou i nia i te fenua nei, hou ratou a tomo ai na roto i “te paruru.” (Hebera 6:19, 20; Petero 1, 2:9) Te faahohoˈa ra te reira i te mea e ua fariihia ratou ei mau tamarii na te Atua i te pae varua, mai to te Atua fariiraa ia Iesu ei tamaiti na ˈna i muri aˈe i to ˈna bapetizoraahia i Ioridana i te matahiti 29 o to tatou nei tau. (Luka 3:22; Roma 8:15) E eaha ˈtura no te aua e vai ra i roto i te sekene, te vahi anaˈe o ta te mau Iseraela e ere no roto i te pǔpǔ autahuˈa e nehenehe e hiˈo e i reira e faatupuhia ˈi te mau tusia? Te faahohoˈa ra te reira i te huru tia roa o te taata ra o Iesu, e no reira oia e nehenehe ai e pûpû i to ˈna ora no te huitaata nei. Te faahohoˈa atoa ra te reira i te huru parau-tia o te mau pǐpǐ faatavaihia, tei noaa ia ratou na nia i te tusia a  Iesu e no reira ratou i faariroraahia ˈi ei mea moˈa noa ˈtu e te parahi noa ra ratou i nia i te fenua nei. *—Roma 1:7; 5:1.

Te faitoraahia te hiero aore ra te fare pure

5. I roto i te mau parau tohu a te mau Papai Hebera eaha ïa te auraa no (a) te faitoraahia Ierusalema? (b) te faitoraahia te hiero o ta Ezekiela i ite orama mai?

⁵ Ua faauehia Ioane e ‘e faito i te hiero aore ra fare pure o te Atua, e te fata e te feia e haamori ra i roto.’ Eaha ïa te auraa o te reira? Ia au i te mau parau tohu a te mau Papai Hebera, te horoa ra teie faitoraa i te haapapuraa e e faaitehia te parau-tia, haamǎrûhia e te aroha, ia au i te mau ture tia a Iehova. I te mau mahana o te arii ino ra o Manase, te faaite ra te faitoraa taipe no Ierusalema i te haavaraa haamouraa aueue ore o teie oire. (Te mau Arii 2, 21:13; Oto a Ieremia 2:8) I muri aˈe râ i to Ieremia iteraa ˈtu i te faitoraahia Ierusalema, ua riro ïa ei haapapuraa e e patu-faahou-hia teie oire. (Ieremia 31:39; hiˈo atoa Zekaria 2:2-8.) Oia atoa, te faitoraahia ma te papu maitai, te hiero ta Ezekiela i ite orama, te haapapu ra te reira i te mau ati Iuda i afai-tîtî-hia i Babulonia e e haamau-faahou-hia te haamoriraa mau i roto i to ratou fenua. Te faahaamanaˈo atoa ra te reira ia Iseraela e e tia ia ˈna, no te mau hara o ta ˈna i rave, ia “faito” ia ˈna i nia i te mau ture moˈa a te Atua.—Ezekiela 40:3, 4; 43:10.

6. Ua riro te aniraa ia Ioane e faito i te hiero aore ra te fare pure e te mau tahuˈa e haamori ra i roto ei tapao no te aha? A tatara i te reira.

⁶ No reira, ia faaue-anaˈe-hia Ioane e faito i te hiero aore ra te fare pure e te mau tahuˈa e haamori ra i roto, o te tapao ïa te reira e e ore roa te hoê mea e nehenehe e haafifi i te tupuraa o te mau opuaraa a Iehova no nia i te hiero e te feia e vai ra i roto, e ua fatata teie mau opuaraa i te tae i to ratou tatararaa hopea nei. I teie nei, ua tuuhia te mau mea atoa i raro aˈe i te avae o te melahi puai a Iehova, ua tae ïa te tau e “e faatiahia te mouˈa o te fare o Iehova i nia i te tupuai mouˈa.” (Isaia 2:2-4) E tia ia faateiteihia te haamoriraa viivii ore a Iehova i muri aˈe i te taivaraa o te amuiraa faaroo kerisetiano e rave rahi senekele i teie nei. Ua tae atoa i teie nei te tau e faatia-faahou-hia ˈi te mau taeae o Iesu e taoto ra i roto i te pohe na nia i “tei Moˈa Rahi ra.” (Daniela 9:24; Tesalonia 1, 4:14-16; Apokalupo 6:11; 14:4) E e tia ia “faitohia” te mau tavini hopea i tapaohia i rotopu i “te mau tavini o to tatou Atua” e vai ra i nia i te fenua nei ia au i te mau ture a te Atua ia nehenehe ratou e parahi tamau i roto i te hiero ei tamaiti na te Atua o tei faafanauhia e te varua. I teie nei mahana, ua ite maitai te pǔpǔ a Ioane i taua mau ture moˈa ra, e te hinaaro mau ra oia e faatura i te reira.—Apokalupo 7:1-3; Mataio 13:41, 42; Ephesia 1:13, 14; hiˈo Roma 11:20.

Te taataahiraahia te aua

7. (a) No te aha o Ioane i opanihia ˈi e faito i te aua? (b) I anafea te oire moˈa i te taataahiraahia e 42 avaˈe? (c) I te roaraa e 42 avaˈe, mea nafea te upoo faatere o te amuiraa faaroo kerisetiano i te oreraa e faatura i te mau ture parau-tia a Iehova?

⁷ No te aha o Ioane i opanihia ai ia faito i te aua? Te faaite maira oia i te reira i te na ôraa e: “Area te mahora [te aua] i rapae aˈe i te hiero [aore ra fare pure] ra, e vaiiho ïa [e huri ïa i rapae au], eiaha e faito i te reira: ua horoahia hoi te reira i te Etene: e e taataahi ratou i te oire moˈa nei e ia maha ahuru e piti tiahapa i te marama.” (Apokalupo 11:2) Ua ite aˈena tatou e te faahohoˈa ra te aua e vai ra i roto i te hiero i te parau-tia o te mau kerisetiano o tei faafanauhia e te varua a parahi noa ˈi ratou i nia i te fenua nei. Mai ta tatou e ite atu, te faahitihia ra i ǒ nei te parau no na 42 avaˈe mau i haamata i te avaˈe atopa 1914 e tae atu i te matahiti 1918, i te tamataraahia te feia atoa e faahua parau ra e e kerisetiano ratou. E faatura ra anei ratou i te mau ture parau-tia a Iehova i te roaraa o taua mau matahiti tamaˈi ra? Aita te rahiraa i na reira. Te rahiraa, ua tuu te upoo faatere o te amuiraa faaroo kerisetiano i te here aiˈa na mua ˈˈe i te auraroraa i te ture a te Atua. I nia i na tahua aroraa e piti, i tupu i roto i te amuiraa faaroo kerisetiano iho â râ, ua faaitoito te upoo faatere haapaoraa i te mau taurearea ia rave i te mau mauhaa tamaˈi. Ua taparahi-pohe-roa-hia te mau mirioni taurearea. Ua haamata te haavaraa na roto i te fare o te Atua i te matahiti 1918, e ô atoa atura te mau Etats-Unis i roto i teie taparahiraa taata rahi, e ua î roa te upoo faatere o te amuiraa faaroo kerisetiano i te toto e rave rahi, o te ani ra i te tahooraa i te Atua ra. (Petero 1, 4:17) Ua hurihia te upoo faatere haapaoraa  i rapae au, e ohipa tamau te reira e ore roa e tia ia tauihia.—Isaia 59:1-3, 7, 8; Ieremia 19:3, 4.

8. I roto i te Tamaˈi rahi Matamua o te ao nei, eaha ta te Feia haapii Bibilia e rave rahi i maramarama, eaha râ ta ratou e ore e papu maitai ra?

⁸ Eaha te nehenehe e parauhia no nia i te pǔpǔ iti o te Feia haapii i te Bibilia? E ‘faito-oioi-hia’ ra anei ratou ia au i to ratou taairaa i te mau ture a te Atua i te matahiti 1914 ra? Eita. Ia au i te hiˈoraa o te mau faahua kerisetiano o te amuiraa faaroo kerisetiano, e tia atoa ia tamatahia ratou. Ua ‘hurihia ratou i rapae au, ua horoahia ratou i te Etene’ ia tamata-mau-hia ratou e ia hamani-ino-hia ratou. Ua maramarama e rave rahi i rotopu ia ratou e eita e tia ia ratou ia taparahi i to ratou taata-tupu; aita râ ratou e papu maitai ra i te tiaraa kerisetiano mau oia hoi te oreraa e faaô ia ratou i roto i te mau ohipa a teie nei ao. (Mika 4:3; Ioane 17:14, 16; Ioane 1, 3:15) I raro aˈe i te haafifiraa a te mau nunaa, aita te tahi pae i auraro i to ratou haava manaˈo.

9. Eaha taua oire moˈa ra i taataahihia e te mau nunaa, e eaha ta teie oire e faahohoˈa ra i nia i te fenua nei?

⁹ Mea nafea te oire moˈa i te taataahiraahia e te mau nunaa? Mea papu e aita te reira e parau ra no te oire o Ierusalema i haamouhia e 25 matahiti hou te papairaahia te Apokalupo. Te oire moˈa o Ierusalema Apî ïa i faataahia te parau i mua rii i roto i te Apokalupo, e i teie nei te faahohoˈa ra te reira i nia i te fenua nei, i te toea o te mau kerisetiano faatavaihia e tia ra i roto i te aua e vai ra i roto i te hiero. I te roaraa o te tau, e riro atoa teie mau kerisetiano ei mau melo no taua oire moˈa ra. No reira, te taataahiraahia teie mau kerisetiano teie ïa te auraa o te taataahiraahia te oire iho.—Apokalupo 21:2, 9-21.

Na ite toopiti nei

10. I te taime a taataahihia ˈi ratou e te mau nunaa, eaha ïa ta te mau Ite no Iehova taiva ore i rave?

¹⁰ Noa ˈtu e te taataahihia ra ratou, aita râ teie mau taata taiva ore i faaea i te riro ei mau ite o Iehova haapao maitai. No reira ïa te parau tohu e na ô faahou ai e: “E na ˈu e poroi i na faaite  toopiti na ˈu ra, ia tohu raua ma te ahu i te ahu paau, e ia hoê aˈe tausani, ia piti hanere, e ia ono hoi ahuru i te mahana. O na olive e piti ra teie, e na lamepa hoi e piti i tuuhia i mua i te aro o te Fatu o te ao nei.”—Apokalupo 11:3, 4.

11. Eaha ïa te auraa no te mau kerisetiano taiva ore o te faatavaihia i te ahuraa “te ahu paau”?

¹¹ E titauhia i taua mau ite kerisetiano te faaoromai, no te mea e tohu ratou “ma te ahu i te ahu paau.” Eaha ïa te auraa o te reira? I te anotau o te Bibilia e mea pinepine te ahu paau i te faataipe i te tau hevaraa. Ua riro ïa te ahuraa i te ahu paau ei tapao no te oto e aore ra no te ati o te hoê taata. (Genese 37:34; Ioba 16:15, 16; Ezekiela 27:31) Ua faaau-atoa-hia te ahu paau i te mau poroi peapea faautuaraa aore ra ati o ta te mau peropheta a te Atua e tia ia faaite. (Isaia 3:8, 24-26; Ieremia 48:37; 49:3) E riro atoa te ahuraa i te ahu paau ei tapao no te haehaa aore ra no te tatarahaparaa i muri iho i te hoê faaararaa a te Atua. (Iona 3:5) E au ra e ua riro te ahu paau o na ite toopiti nei ei tapao no to raua huru haehaa i te tamauraa i te faaite i te haavaraa a Iehova. Ua riro raua ei nau ite e faaite ra i te mahana tahooraa a te Atua, o tei riro atoa hoi ei tumu otoraa no te mau nunaa.—Deuteronomi 32:41-43.

12. No te aha e au ia ravehia te numera tia o te tau i reira te taataahiraahia te oire moˈa e te mau nunaa?

¹² E tia i te pǔpǔ a Ioane ia poro i teie poroi no te hoê tau taotia-maitai-hia, oia hoi e 1 260 mahana aore ra e 42 avaˈe; hoê â ïa te roaraa o teie tau e te tau taataahiraa o te oire moˈa. E au ra e e tia ia ravehia te numera mau o teie tau no te mea ua faahitihia e piti huru taioraa taa ê, na mua ˈˈe e avaˈe e i muri iho e mahana ïa. Hau atu â i te reira, i te omuaraa o te mahana o te Fatu ra, ua iteahia mai te hoê tau taotiahia e toru matahiti e te afa tei tuea maite i te mau ohipa peapea i tupu i nia i te mau tavini a te Atua e o tei tohuhia i ǒ nei to ratou tupuraa—ua haamata taua tau ra i te omuaraa o te Tamaˈi rahi Matamua o te ao nei i te hopea o te matahiti 1914 e tae roa ˈtu i te omuaraa o te matahiti 1918. (Apokalupo 1:10) Ua faaite te mau kerisetiano o te pǔpǔ a Ioane i te hoê poroi no nia i te haavaraa a Iehova i nia i te amuiraa faaroo kerisetiano e te ao atoa nei, e e au teie poroi i te ahuraa i te “ahu paau.”

13. (a) Eaha te auraa e ua faataipehia te mau kerisetiano faatavaihia i na ite toopiti nei? (b) Eaha te parau tohu a Zekaria ta Ioane e faahaamanaˈo ra ia tatou ia faaau anaˈe oia i na ite toopiti nei i “na olive e piti ra . . . , e na lamepa hoi e piti”?

¹³ I te mea e e piti na ite teie, e haapapuraa ïa te reira e parau mau teie e mea tano ta raua poroi. (Hiˈo Deuteronomi 17:6; Ioane 8:17, 18.) Ua faaau Ioane ia raua i “na olive e piti ra . . . , e na lamepa hoi e piti i tuuhia i mua i te aro o te Fatu o te ao nei.” Te faahiti maitai maira te reira i te parau tohu a Zekaria, tei ite atu i na pue lamepa e hitu e e piti olive. Te haapapuhia ra e te faahohoˈa ra na olive toopiti nei i “na taata toopiti teie i faatahinuhia,” oia hoi te tavana ra o Zerubabela e te tahuˈa rahi ra o Iosua, ‘e tia ra i mua i te aro o te Fatu o te ao nei.’—Zekaria 4:1-3, 14.

14. (a) Eaha ta te orama a Zekaria no nia i na olive toopiti nei e na pue lamepa e hitu e faahaamanaˈo ra? (b) Eaha te ohipa e iteahia e te mau kerisetiano faatavaihia i roto i te Tamaˈi rahi Matamua o te ao nei?

¹⁴ Te ora ra Zekaria i te hoê tau no te patu-faahou-raa, e teie te auraa o ta ˈna orama no nia i na olive toopiti nei e e haamaitaihia Zerubabela raua o Iosua e te varua moˈa o Iehova no te faaitoito i te nunaa ia rave i te ohipa. Te faahaamanaˈo ra te orama no nia i na lamepa e hitu ra ia Zekaria e eiaha e ‘vahavaha i te mahana parau rii haihai ra,’ no te mea e tupu te opuaraa a Iehova—“eiaha i te puai taata, e te mana taata, na tau varua râ, te parau maira Iehova sabatoa ra.” (Zekaria 4:6, 10; 8:9) E faaohipa-atoa-hia teie pǔpǔ iti o te mau kerisetiano e hopoi tamau maite ra i te maramarama o te parau mau i te mau taata i te roaraa o te Tamaˈi rahi Matamua o te ao nei, ia rave i te hoê ohipa no te patu-faahou-raa. E riro atoa oia ei tumu faaitoitoraa, e noa ˈtu to ratou iti, e haapii ïa ratou i te tiaturi i nia i te puai o Iehova ma te ore e haavahavaha i te mahana parau rii haihai ra.

15. (a) Eaha ˈtu â teie e faahohoˈahia ra i te mea e ua faaauhia te mau kerisetiano faatavaihia i na ite toopiti nei? A tatara i te reira. (b) Ua faatiahia teie e piti na ite ia faatupu i teihea mau huru tapao?

¹⁵ I te mea e te faahohoˈa ra na ite toopiti nei i taua mau kerisetiano ra, te faahaamanaˈo atoa ra te reira ia tatou i to Iesu faahuru-ê-raahia i nia i te mouˈa. I roto i taua orama ra ua ite e toru aposetolo ia Iesu i roto i te hanahana o te Basileia, e tei pihai iho o Mose e o Elia ia ˈna. Ua riro te reira ei faahohoˈaraa i to Iesu parahiraa i  nia i to ˈna terono hanahana i te matahiti 1914 no te faatupu i te hoê â huru ohipa i faataipehia e teie e piti na peropheta. (Mataio 17:1-3; 25:31) E mea tano ïa ia itehia ˈtu i teie nei, na ite toopiti nei i te raveraa i te mau tapao mai ta Mose raua o Elia. Ei hiˈoraa, teie ta Ioane e parau ra no nia ia raua e: “E ia rave ino mai te hoê ia raua ra, te puroro atura te auahi no roto i to raua vaha, e pau atura to raua enemi: e ia rave ino mai te hoê ia raua ra, e na reirahia oia e pohe roa ˈtu. E mana to raua ia opani i te raˈi, e eiaha te ûa ia mairi mai i to raua mau mahana tohuraa ra.”—Apokalupo 11:5, 6a.

16. (a) Mea nafea te tapao no nia i te auahi i te faahaamanaˈoraa ia tatou i te tau i marôhia ˈi te mana o Mose e Iseraela? (b) Mea nafea te upoo faatere o te amuiraa faaroo kerisetiano i te haavahavaharaa i te Feia haapii Bibilia e i te haafifiraa ia ratou i te roaraa o te Tamaˈi rahi Matamua o te ao nei, e mea nafea ratou i te aroraa ˈtu?

¹⁶ Te faahaamanaˈo ra te reira ia tatou i te tau a marôhia ai te mana o Mose e Iseraela. Ua faaite maira te peropheta i te hoê haavaraa faautuaraa uˈana, e mou ihora te mau taata orure hau ia Iehova ra, e pau ihora e 250 i rotopu ia ratou i te auahi no ǒ mai i te raˈi ra. (Numera 16:1-7, 28-35) Oia atoa ua haavahavaha te mau tia o te amuiraa faaroo kerisetiano i te Feia haapii Bibilia i te mea e aita ta ratou e mau parau tuite no roto mai i te mau fare haapiiraa teitei a te haapaoraa. Ua nehenehe râ i te mau Ite o te Atua i te horoa mai i te mau haapapuraa hau roa ˈˈe i te maitai no nia i to ratou tiaraa tavini, oia hoi te feia haehaa tei farii mai i ta ratou poroi no roto mai i te Bibilia. (Korinetia 2, 3:2, 3) I te matahiti 1917, ua nenei te Feia haapii Bibilia i te hoê buka, Te tupuraa te parau moê, te hoê tuatapaparaa mana no nia i te Apokalupo e te buka a Ezekiela. I muri iti noa ˈˈe, te haaparare ra ratou e 10 000 000 papai rii e maha api teie te iˈoa Te taata haapii Bibilia. E teie te upoo parau no taua numera ra “Te toparaa o Babulonia Rahi—No te aha te amuiraa faaroo kerisetiano e mauiui ai i teie nei—Te tupuraa hopea.” I te mau Etats-Unis, ua haafaufaa te upoo faatere haapaoraa iria i te huru maamaa i iteahia mai i te tau tamaˈi no te opani-etaeta-raa i taua buka ra. I roto i te tahi atu mau fenua ua faahapahia teie buka. Ua tamau râ te mau tavini a te Atua i te aro na roto i te arai o te mau papai rii e maha api e ta ratou parau mai te auahi ïa te huru, teie te upoo parau Mau parau apî o te Basileia. I te tereraa te mahana o te Fatu ra, e faaite maramarama maitai te tahi atu â mau buka e mau vea i te huru pohe o te amuiraa faaroo kerisetiano.—Hiˈo Ieremia 5:14.

17. (a) Eaha te mau tupuraa o tei taaihia i nia i te paˈura e te auahi i itehia i te mau mahana o Elia? (b) Mea nafea te hoê auahi i te purororaa mai roto mai i te vaha o na ite toopiti nei, e ua huti raua i te ara-maite-raa i nia i teihea huru paˈura?

 ¹⁷ E eaha te nehenehe e parauhia no nia ia Elia? I te mau mahana o te mau arii o Iseraela, ua tohu teie peropheta i te paˈura ei faaiteraa i te riri o Iehova i nia i te mau Iseraela e haamori ra ia Baala. E toru matahiti e te afa te vai-noa-raa te paˈura. (Te mau Arii 1, 17:1; 18:41-45; Luka 4:25; Iakobo 5:17) I muri aˈe i to te arii taiva o Ahazia tonoraa i te mau faehau no te faahepo ia Elia e haere mai oia i mua i te arii ra, ua haamairi mai te peropheta ra i te auahi no nia mai i te raˈi e pau ihora te mau faehau. I to te hoê raatira o te nuu faaiteraa i te tura e au no te hoê peropheta, i reira ïa Elia i te fariiraa e haere na muri iho ia ˈna e tae roa ˈtu i mua i te aro o te arii. (Te mau Arii 2, 1:5-16) Oia atoa, i te matahiti 1914 e tae atu i te matahiti 1918, ua huti ma te uˈana te toea faatavaihia i te ara-maite-raa o te rahiraa o te taata i nia i te huru paˈura i te pae varua o te amuiraa faaroo kerisetiano e ua faaite oia i te haereraa mai te haavaraa mai te umu i te amaraa i te “mahana rahi mǎtaˈu o Iehova.”—Malaki 4:1, 5; Amosa 8:11.

18. (a) Eaha te mana i horoahia ˈtu i na ite toopiti nei, e mea nafea e nehenehe ai ia faaau i te reira i te mana i horoahia ˈtu ia Mose ra? (b) Eaha ta teie e piti na ite i faaite tahaa noa no nia i te mau “pape” o te amuiraa faaroo kerisetiano?

¹⁸ Teie faahou â ta Ioane e parau ra no nia i na ite toopiti nei e: “E e mana hoi to raua i te mau pape ra ia faariro ei toto, e ia tairi i te fenua i te mau pohe atoa nei ia hinaaro raua ra.” (Apokalupo 11:6b) No te faahepo ia Pharao e vaiiho ia Iseraela ia haere tiamâ noa, ua faaohipa Iehova ia Mose no te faataeraa i te mau pohe i nia ia Aiphiti haavî, e tae noa ˈtu i te tauiraa te pape ei toto. Te mau senekele i muri iho, te haamanaˈo papu noa ra te mau Philiseti, te mau enemi a  Iseraela, i te mau ohipa a Iehova i nia ia Aiphiti, e no reira ïa ratou i pii ai e: “Auê hoi tatou e! e ora tatou ia vai i te rima o tera . . . [Atua] mana? o te . . . [Atua] ïa i tairi i to Aiphiti i taua mau pohe atoa e rave rahi i te medebera ra!” (Samuela 1, 4:8; Salamo 105:29) E taipe Mose no Iesu, e mana hoi to ˈna no te faaiteraa i te mau haavaraa a te Atua i nia i te mau raatira faaroo o to ˈna ra tau. (Mataio 23:13; 28:18; Ohipa 3:22) E i roto i te Tamaˈi rahi Matamua o te ao nei, ua faaite tahaa noa te mau taeae o te Mesia, oia hoi na ite toopiti nei i te taero o te mau “pape” ta te amuiraa faaroo kerisetiano e faainu ra i to ratou mau nǎnǎ.

Ua taparahi-pohe-hia na ite toopiti nei

19. Ia au i te faatiaraa a te Apokalupo, eaha te tupu mai i te otiraa te pororaa o na ite toopiti nei?

¹⁹ No te rahi o te mauiui o teie pohe i nia i te amuiraa faaroo kerisetiano i muri aˈe i to teie e piti ite tohuraa ma te ahu i te ahu paau e 42 avaˈe, ua faaohipa ihora te amuiraa faaroo kerisetiano i to ˈna mana no te ‘taparahi pohe roa’ ia raua. Ua papai Ioane e: “E ia oti ta raua faaiteraa i ta raua parau e tamaˈi mai ai te puaa no roto i te abuso ra ia raua, e e pau raua ia ˈna, e e taparahi pohe roa oia ia raua. E e vaiiho-noa-hia to raua oivi i te aroâ o te oire rahi i parauhia o Sodoma e o Aiphiti, i te haapaoraa o te [v]arua ra, i te vahi i faasataurohia ˈi to tatou Fatu ra. E e hiˈo to te mau nunaa, e to te mau opu, e te mau reo ěê, e to te mau fenua i to raua oivi, e e toru aˈe mahana e maha vaehaa e tahi, e e ore e tuu i to raua oivi ia tanuhia. E te feia e parahi i te fenua nei e umere ïa ia raua, e e oaoa, e e hapono ratou i te taoˈa te tahi i te tahi; no te mea, e mea mauiui taua na peropheta e piti ra na te feia e parahi i te fenua nei.”—Apokalupo 11:7-10.

20. Eaha ïa “te puaa no roto i te abuso ra”?

²⁰ I ǒ nei te faahiti-matamua-raahia te parau no te hoê puaa taehae i nia i na 37 taime to ˈna faahitiraahia i roto i te Apokalupo. I te taime au ra, e ite ai tatou e eaha mau na teie puaa e te tahi atu â tei faahiti-atoa-hia. I teie nei râ, e navai noa te parau e na Satani i hamani i “te puaa no roto i te abuso ra” oia hoi te amuiraa politita o te mau mea e vai nei. *—Hiˈo Apokalupo 13:1; Daniela 7:2, 3, 17.

21. (a) Mea nafea te mau enemi o na ite toopiti nei i te haafaufaaraa i te tamaˈi? (b) Eaha ïa te auraa i te mea e ua vaiihohia te tino pohe o na ite toopiti nei e aita e hunaraa? (c) Mea nafea e tia ia faaauhia te tau e toru mahana e te afa? (Hiˈo i te nota i raro i te api.)

²¹ Mai te matahiti 1914 mai â e tae atu i te matahiti 1918, tei roto ïa te mau nunaa i te Tamaˈi rahi Matamua o te ao nei. Mea puai roa ïa te manaˈo here aiˈa, e i te tau no te tupuraa raau i te matahiti 1918, ua haafaufaa te mau enemi faaroo o na ite toopiti nei i te reira. Ua faaohipa ratou i te mau fare haavaraa a te Hau ia hurihia te mau tia tavini o te Taiete Watch Tower i roto i te fare tapearaa na nia i te mau pariraa haavare orure hau . Ua paruparu roa to ratou mau hoa rave ohipa haapao maitai. Ua fatata te ohipa o te Basileia i te faaea roa. E mai te huru ra ua pohe roa te ohipa pororaa. I te tau o te Bibilia, e mea haama roa no te hoê taata pohe ia ore o ˈna ia tanuhia. (Salamo 79:1-3; Te  mau Arii 1, 13:21, 22) No reira e mea haama roa no teie e piti na ite ia ore raua ia tanuhia. I Palesetina, ia veavea anaˈe, e hauˈa ino iho â te hoê tino pohe o tei vaiiho-noa-hia i nia i te purumu e toru mahana e te afa. * (Hiˈo Ioane 11:39.) Te faaite maira teie tuhaa a te parau tohu i te rahi o te haama ta teie e piti na ite i faaoromai. Aita atoa i fariihia ia tuuhia i rapae te mau tia o te Taiete i muri iho i te aufauraahia te tahi moni i te afairaahia ta ratou hororaa i mua roa i te fare haavaraa teitei. Ua vai tahaa noa raua i mua i te taatoaraa, tau taime maoro e ua hauˈa ino raua i te mau taata o “te oire rahi.” Eaha ïa taua “oire rahi” ra?

22. (a) Eaha te “oire rahi”? A tatara i te reira. (b) Mea nafea te nahoa taata e te upoo faatere haapaoraa i te oaoaraa i te haamamûraahia na ite toopiti nei? (Hiˈo i te tabula.)

²² Te faaite ra Ioane i te tahi mau haamaramaramaraa. Te parau ra oia e ua haamauiuihia Iesu i nia i te pou i roto i taua oire rahi ra. I reira râ, e oioi tatou i te manaˈo ia Ierusalema. Area râ, te parau atoa ra oia e o Sodoma e o Aiphiti te iˈoa o taua oire rahi ra. Parau mau, i te matamua ra, ua pii-atoa-hia Ierusalema e Sodoma no ta ˈna mau peu viivii (Isaia 1:8-10; hiˈo Ezekiela 16:49, 53-58.) No Aiphiti atoa, te Puai Matamua o te ao nei, i te tahi mau taime ua riro oia ei hohoˈa no te ao nei aore ra no te amuiraa o te mau mea e vai nei. (Isaia 19:1, 19; Ioela 3:19) No reira ïa, te faahohoˈa ra teie oire rahi i te hoê “Ierusalema” viivii e faahua haamori ra i te Atua, area râ ua viivii e ua hara oia mai ia Sodoma te huru, e ua riro oia ei tuhaa no teie nei ao aore ra amuiraa o te mau mea a Satani, mai ia Aiphiti ra te huru. Te faataipe ra oia i te amuiraa faaroo kerisetiano, te hohoˈa o Ierusalema taiva o to tatou nei tau, e ua oaoa roa te mau melo o taua faanahonahoraa ra i to ratou haamamûraa i na ite toopiti nei no ta raua pororaa au ore.

Ua faatia-faahou-hia raua!

23. (a) Eaha tei tupu mai i nia i na ite toopiti nei ia toru aˈe mahana e te afa, e eaha ïa te huru o to raua mau enemi? (b) I anafea te Apokalupo 11:11, 12 e te parau tohu a Ezekiela no nia i to Iehova haapuairaa i te aho i roto i te peho o te mau ivi marô i te iteraa i te tupuraa i to tatou nei tau?

²³ Ua tahoê te mau ravea haapurororaa parau  apî i te upoo faatere haapaoraa no te faainoraa i te mau tavini a te Atua; teie ta te hoê vea i faˈi: “Ua tairi-pohe-hia te buka ra ‘Te tupuraa te parau moe.’” Auê ïa hape rahi e! Aita teie e piti na ite i vai noa i roto i te pohe. Te taio nei tatou e: “E hope aˈera na mahana e toru ra, e e mahana vaehaa hoi e tahi, ua uru maira te [v]arua ora no ǒ mai i te Atua ra i roto ia raua, ua tia hua maira raua i nia; roohia ihora te feia atoa i ite ia raua ra i te mǎtaˈu rahi. E faaroo atura raua i te hoê reo rahi no nia mai i te raˈi, i te na ôraa mai ia raua e, A haere mai i nia nei. Reva ˈtura raua i nia i te raˈi na roto i te ata; te hiˈo atura to raua mau enemi ia raua.” (Apokalupo 11:11, 12) No reira ïa, te ora ra raua i te hoê â huru tupuraa tei faataa-atoa-hia e Ezekiela i to ˈna mataitai-orama-raa i te peho o te mau ivi marô. Haapuai ihora Iehova i te aho i roto i teie mau ivi marô e ora maira ratou, ua riro te reira ei hohoˈa no te faaoraraahia mai te nunaa o Iseraela i muri aˈe i to ˈna faatîtîraahia i Babulonia e 70 matahiti. (Ezekiela 37:1-14) Ua tupu teie na tohu e piti, ma te maere mau, ta Ezekiela e ta te Apokalupo, i to tatou nei tau i te matahiti 1919 i to Iehova faaoraraa mai i to ˈna nau ite i “pohe roa.”

24. I te oraraa mai na ite toopiti nei, mai te aha ïa te huru o te mau melo o te haapaoraa tei hamani ino ia raua?

²⁴ A manaˈo noa na i te maere rahi o te feia i hamani ino ia raua! I te tia-taue-raa mai na tino pohe o na ite toopiti nei mai te pohe mai i te ora no te rave-faahou-raa i te ohipa. E au ïa te reira i te hoê auˈa maramara no te mau melo o te upoo faatere haapaoraa, e hau atu â no te mea ua matara mai te mau tavini kerisetiano o ta ratou hoi i huri atu i roto i te fare tapearaa na roto i te mau ravea huna e i muri iho ua faaore-roa-hia te mau pariraa atoa. Rahi roa ˈtura to ratou huru-ê-raa i to te Feia haapii Bibilia faatupuraa i te hoê tairururaa i Cedar Point (Etats-Unis) i te avaˈe setepa 1919. I reira o J. F. Rutherford, peretiteni o te Taiete Watch Tower, no mahiti noa mai hoi oia mai roto mai i te fare tapearaa, i te haaputapûraa i te mafatu o te feia e faaroo ra i ta ˈna oreroraa parau “A faaite i te Basileia,”  niuhia i nia i te Apokalupo 15:2 e te Isaia 52:7. Ua haamata faahou â te pǔpǔ a Ioane i te “tohu,” oia hoi te pororaa i mua i te mau taata. Ma te haere-tamau-noa-raa i mua, te faaite ra ratou ma te itoito i te haavare a te amuiraa faaroo kerisetiano.

25. (a) I anafea te parauraahia i na ite toopiti nei: “A haere mai i nia nei,” e mea nafea te reira i te tupuraa? (b) Mai te aha ïa te huru o te oire rahi i mua i te faaoraraa o na ite toopiti nei?

²⁵ Mea pinepine to te amuiraa faaroo kerisetiano tamataraa i te faatupu faahou â i te re i noaa ia ˈna i te matahiti 1918. Ua faaohipa oia i te tiarepuraa, te mau ravea huna i te pae haavaraa, te huriraa i roto i te fare tapearaa e tae noa ˈtu i te taparahi-pohe-roa-raa, aita râ oia i manuïa! Mai te matahiti 1919 mai â, eita o ˈna e nehenehe e tomo faahou i roto i te tuhaa pae varua o na ite toopiti nei. I taua matahiti ra ua parau Iehova ia raua e: “A haere mai i nia nei.” E reva ˈtura raua i nia i te hoê vahi teitei i te pae varua, e nehenehe to raua mau enemi e hiˈo ia raua e eita râ ratou e nehenehe e haafifi faahou atu ia raua. Te faataa ra Ioane i te huru o te oire rahi i mua i teie faaoraraa: “E e aueue rahi to te fenua i taua hora ra, hiˈa ihora te ahuru o te tuhaa o taua oire ra i raro, pohe ihora na taata e hitu tausani i taua aueue fenua ra; mǎtaˈu roa aˈera hoi te feia i toe, e ua faahanahana ˈtura i te Atua o te raˈi.” (Apokalupo 11:13) Ua faaueue-uˈana-mau-hia te haapaoraa. E au ra e te poopoo ra te fenua i raro aˈe i te avae o te mau tia o te mau Ekalesia rarahi, a ohipa noa ˈi teie pǔpǔ kerisetiano i faaorahia mai. Te ahuru o te tuhaa o to ratou oire, oia hoi e 7 000 taata, e faaauraa parau teie, no te rahi o te ati pohe ihora ratou, ta te Papai ïa e parau maira.

26. Te faahohoˈa ra “te ahuru o te tufaa o taua oire ra” e te “hitu tausani” i te aha, ia au i te Apokalupo 11:13? A tatara i te reira.

²⁶ Te faahaamanaˈo ra te reira ia tatou i te parau e “te ahuru o te tufaa o taua oire ra” e ua tohu atoa Isaia no nia ia Ierusalema i tahito ra e e ora mai te ahuru o te taata mai roto mai i te haamouraa o te oire ra ei huaai moˈa. (Isaia 6:13) Oia atoa, te faahaamanaˈo ra te reira ia tatou i te numera 7 000 e i to Elia manaˈoraa e o ˈna anaˈe iho tei taiva ore i Iseraela, e te faaite maira Iehova ia ˈna i te mea mau, e te toe noa ra e 7 000 taata tei ore i tuu i te turi i raro ia Baala. (Te mau Arii 1, 19:14, 18) I te senekele I ua faˈi te aposetolo Paulo ra e te faahohoˈa ra teie 7 000 i te toea o te mau ati Iuda o tei farii i te parau apî oaoa no nia i te Mesia. (Roma 11:1-5) Na teie mau irava o te mau Papai e tauturu mai ia taa tatou e te faataa ra teie “e hitu tausani” e te “ahuru o te tufaa o taua oire ra” i roto i te Apokalupo 11:13, i te feia e faaroo ra i na ite toopiti nei o tei faaorahia mai e te faarue ra ratou i te oire rahi i hara. E faaauraa parau teie, ua pohe ïa ratou no te amuiraa faaroo kerisetiano. Ua tumâhia to ratou iˈoa i roto i ta ratou mau buka i reira te papairaahia te iˈoa o ta ratou mau melo. Ia au i to ˈna manaˈo, aita ïa ratou e ora faahou nei. *

27, 28. (a) Mea nafea ‘te feia i toe, e ua faahanahana ˈtura i te Atua o te raˈi’? (b) Eaha ta te upoo faatere o te amuiraa faaroo kerisetiano e tia ia farii?

²⁷ Mea nafea râ ‘te feia i toe [o te amuiraa faaroo kerisetiano], e ua faahanahana ˈtura i te Atua o te raˈi ra’? E ere roa ˈtu ïa na roto i te faarueraa ˈtu i te haapaoraa apotata no te taviniraa i te Atua, ia au râ i te huru i faataahia i roto i te hoê tuatapaparaa no nia i te Bibilia (Word Studies in the New Testament, a Vincent) i reira, e nehenehe tatou i te taio no nia i te mau parau “ua faahanahana ˈtura i te Atua o te raˈi ra” e: “Te faataa ra teie pereota i te fariiraa i te ohipa i tupu eiaha râ i te fariuraa, te tatarahaparaa e aore ra te mauruuru, mai tei faahitihia i te rahiraa o te taime i roto i te mau Papai. Hiˈo Iosua 7:19 (Hitu ahuru); Ioane 9:24; Ohipa 12:23; Roma 4:20.” Ma te riri rahi, e tia i te amuiraa faaroo kerisetiano ia farii e ua faatupu te Atua o te Feia haapii Bibilia i te hoê ohipa maere mau i to ˈna faaora-faahou-raa mai ia ratou no te raveraa i te ohipa a te mau kerisetiano.

²⁸ Peneiaˈe ua farii te upoo faatere haapaoraa i te reira i roto noa i to ratou feruriraa e aore ra manaˈo. Aitâ i taiohia ˈtura i roto i te vea e ua faˈi teie mau ekalesiatiko i mua i te taata e ua farii ratou i te Atua o na ite toopiti nei. Area râ, te tauturu maira te parau tohu a Iehova ta Ioane i papai ia papu tatou i to ratou mau manaˈo hohonu roa e ia ite tatou i te rahi o te faahaehaaraa ta ratou i faaruru atu i te matahiti 1919. Mai taua matahiti mai â, i to te “hitu tausani”  faarueraa i te amuiraa faaroo kerisetiano, noa ˈtu ta ˈna mau tutavaraa tamau no te tapearaa i te mau mamoe no ta ˈna aua, ua faahepohia te upoo faatere haapaoraa ia farii e mea puai aˈe te Atua o te pǔpǔ a Ioane i ta ratou iho atua. I muri iho râ, e ite maitai roa ˈtu â ratou i te reira, no te mea ua hau atu â to ˈna mau melo i te faarueraa i te nǎnǎ, ma te faahitiraa i te mau parau a te mau taata atoa i to Elia upootiaraa i mua i te feia e haamori ra ia Baala i nia i te mouˈa ra o Karemela e : “O Iehova, oia te Atua; o Iehova, oia te Atua.”—Te mau Arii 1, 18:39.

29. Ia au i te parau a Ioane, eaha te tae oioi mai, e eaha ˈtu â te rahi o te ati e faahereherehia ra no te amuiraa faaroo kerisetiano?

²⁹ A faaroo anaˈe na i teie nei! Teie ta Ioane e parau nei: “Ua mure aˈenei te piti o te pohe [ati]; e inaha, te fatata maira te toru o te pohe [ati].” (Apokalupo 11:14) Ahiri e ua faaaueuehia te amuiraa faaroo kerisetiano i teie mau ohipa i tupu e tae roa mai i teie nei, mai te aha ïa to ˈna huru ia faaite-anaˈe-hia mai te toru o te ati, e ia faaoto te hitu o te melahi i ta ˈna pu e ia tupu anaˈe te parau aro moˈa a te Atua i te pae hopea?—Apokalupo 10:7.

[Nota i raro i te api]

[Uiraa haapiiraa]

[Tumu parau tarenihia i te api 168]

Te oaoa ra ratou ia au i te Apokalupo 11:10

I roto i ta ˈna ra buka Te faaite ra te feia poro i ta ratou mauhaa (beretane), neneihia i te matahiti 1933, te faahiti ra o Ray H. Abrams i to te upoo faatere haapaoraa patoi-uˈana-raa i te buka a te Taiete Watch Tower Te tupuraa te parau moe. Te faataa ra oia i te mau tutavaraa a te upoo faatere haapaoraa no te faaore i te Feia haapii Bibilia e ta ratou atoa “tiaturiraa hauˈa ino.” Ua tae roa te reira i roto i te hoê haavaraa e ua faautuahia o J. F. Rutherford e to ˈna mau hoa toohitu nei e rave rahi mau matahiti i roto i te fare tapearaa. Te na ô faahou ra o Ray H. Abrams e: “Ia tuatapapa-maitai-hia teie hororaa, e iteahia mai ïa e o te mau Ekalesia e te upoo faatere haapaoraa te tumu no teie ohipa no te faaore-roa-raa i ta Russell feia. I Kanada, i te avaˈe febuare 1918, ua faatupu te upoo faatere haapaoraa i te hoê polititaraa no te patoi ia ratou e ta ratou atoa mau buka e mau vea, te buka iho â râ Te tupuraa te parau moe. Ia au i te vea ra Tribune no Winnipeg, . . . na te mau ‘tia o te upoo faatere haapaoraa’ iho â i opua e opani etaeta roa i ta ratou buka.”

Te na ô faahou ra o Ray H. Abrams e: “I te faarooraa te feia papai vea faaroo i te parau apî no nia i te utua e piti ahuru matahiti, ua fatata te taatoaraa o teie mau vea, te vea rarahi e te vea iti, i te oaoa i te reira. Aita vau i ite i te hoê noa ˈˈe parau aroha i roto i te mau vea atoa a te mau haapaoraa matauhia. O Upton Sinclair râ, teie ïa ta ˈna faaotiraa: ‘Aita e feaaraa, ua tupu te hamani-ino-raa . . . i te mea e ua roohia ratou i te riri o te mau haapaoraa “orthodoxes” aore ra matauhia.’ I te mea e aita te mau tutavaraa tahoê a te mau Ekalesia i nehenehe e faatupu i te reira, o te hau ïa tei na reira no te monoraa ˈtu ia ratou.” I muri aˈe i to ˈna papairaa i te mau parau faaino a vetahi mau vea faaroo, te faahiti ra teie taata papai i te faaoreraahia te mau faautuaraa e te fare haavaraa teitei te na ô ra oia e: “Ua vai mamû noa te mau Ekalesia no nia i teie faaotiraa.”

[Hohoˈa i te api 163]

Te faito ra Ioane i te hiero i te pae varua—e tia i te autahuˈa faatavaihia ia faatura oia i te mau ture a te Atua

[Hohoˈa i te api 165]

Te faataa ra te patu-faahou-raa tei ravehia e Zerubabela raua o Iosua e ia tae i te mahana o te Fatu ra, e i muri aˈe i te mau haamataraa haihai e itehia mai te hoê haereraa i te rahi i rotopu i te mau Ite no Iehova. Ua faararahi-roa-hia te mau fare neneiraa e vai ra i Brooklyn, i te fenua Etats-Unis, mai tei faaitehia ˈtu i nia nei ia navai maitai te mau mea hinaarohia

[Hohoˈa i te api 166]

Ua faahohoˈahia te mau poroi faautuaraa uˈana i faaitehia ˈtu e na ite toopiti nei i te ohipa a Mose raua o Elia no nia i te mau mea e tupu a muri aˈe

[Hohoˈa i te api 169]

Mai te mau ivi marô o te parau tohu a Ezekiela pene 37, ua faaora-faahou-hia na ite toopiti nei no te raveraa i te ohipa pororaa i to tatou nei tau