“E mea ora hoi te parau a te Atua”
Pene 13
“E mea ora hoi te parau a te Atua”
Ua faaite mai te pene na mua ˈtu i te faufaa o te mau aˈoraa bibilia no te faaruru i te mau fifi e no te ape atoa i te mau hape. Ua riro te paari mure ore ta ratou e faaite maira ei haapapuraa etaeta maitai e no ǒ mai te reira i te Atua ra. Te haapapu maira hoi te Bibilia e: “Te mau parau moˈa atoa i papaihia ra e mea faaurua mai ïa e te Atua, e e mea maitai ei haapiiraa, ei aˈoraa, ei faaiteraa hapa, ei faaite mai i te parau-tia ra.” (Timoteo 2, 3:16). Aita râ hoi oia e horoa noa maira i te mau aˈoraa paari. Oia mau, e mana atoa to te Parau a te Atua no te taui i te mau taata i roto i te hohonuraa o to ratou aau.
1-3. a) Mea nafea to te Bibilia haapapuraa mai e mea faufaa mau ia faatupu i te tahi mau tauiraa i roto i to ˈna huru taata? b) Eaha te hiˈoraa e haapapu maira e e mana to te Bibilia no te taui i te huru o te hoê taata?
E NEHENEHE mau anei ta te Bibilia e taui i te taata? Papu maitai; e nehenehe atoa hoi ta ˈna e taui i to ratou huru taata, mai ta teie aˈoraa bibilia e faaite maira i te na ôraa mai e: “E e haapae outou i ta outou parau i mutaa ihora, i te taata tahito i tei ino i te hinaaro haavare ra; e ia faahouhia outou i to outou varua ra i te aau; e ia faataata apî hoi outou, o tei hamanihia ia au i te Atua ra, i te parau-tia e te maitai mau ra.” — Ephesia 4:22-24.
2 E nehenehe mau anei e faataata apî? E, papu maitai! I te parau mau, ua tia i te tahi pae ia rave i te tahi mau tauiraa faufaa mau no te riro mai ei kerisetiano (Korinetia 1, 6:9-11). Ei hiˈoraa, i te fenua Marite i te pae Apatoa, ua vai otare noa mai na te hoê tamaiti iti, e iva to ˈna matahiti. E i te mea e aita to ˈna e metua faahou no te aratai ia ˈna, a paari noa ˈi oia, ua matau roa ˈˈera ïa oia i te rave i te tahi mau peu tano ore mau. Teie ta ˈna e faatia ra: “I te 18raa o to ˈu matahiti, tei raro aˈe roa vau i te mana o te raau taero, e i te mea e e eiâ na vau no te haamâha i taua hinaaro no ˈu nei, ua mau aˈera ïa vau i te fare auri.” Te vai ra râ to taua taurearea nei te tahi mama fetii e Ite no Iehova o ˈna, o tei nehenehe e tauturu mai ia ˈna.
3 “Ua haamata vau i te haapii i te Bibilia e teie nei mama fetii to ˈu, ta ˈna ïa e faataa ra. E hitu avae i muri iho, ua faaea vau i te faataero ia ˈu.” Ua faaea atoa o ˈna i te amuimui atu i roto i to ˈna mau hoa tahito e ua noaa maira ïa to ˈna mau hoa apî i roto i te mau Ite no Iehova. Te na ô râ oia e: “Maoti to ˈu mau hoa apî e te haapiiraa tamau i te Bibilia, e mau vahi apî tei noaa mai ia ˈu, o tei tauturu mai ia ˈu ia pûpû i to ˈu oraraa no te Atua ei tavini ia ˈna.” Ua riro mai hoi taua taurearea nei, i mutaa ihora e taata taero i te raau taero e e taata eiâ atoa hoi, ei kerisetiano itoito mau. Ua manuïa oia i te faatupu i taua tauiraa rahi mau ra maoti te mana puai ta te Bibilia i faaohipa i nia ia ˈna. Tera mau te hoê faahohoˈaraa o teie mau parau a te aposetolo Paulo e na ô ra e: “E mea ora hoi te parau a te Atua, e te puai rahi.” — Hebera 4:12.
Tauihia maoti te ite
4, 5. Ia au i te Kolosa 3:8-10, eaha ta tatou e hinaaro ra no te faaapî i to tatou huru taata?
4 Nafea hoi te Bibilia ia taui i te taata? E itehia te pahonoraa i roto i teie irava bibilia: “E haapae atoa outou i taua mau parau atoa nei, i te riri, te tairoiro, te feii, te faaino, e te parau tiaâ i to outou vaha. Eiaha e haavare te tahi i te tahi, ua haapae hoi outou i te taata tahito e ta ˈna atoa ra mau parau; e ua faa-taata-apî, o tei faahouhia i te ite ra, mai te huru atoa o tei hamani ia ˈna ra.” — Kolosa 3:8-10.
5 A hiˈo na i te tiaraa faufaa roa o te ite mau i te Parau a te Atua. Te faataa maira te Bibilia eaha te mau huru taata te tia ia faaore-roa-hia e te mau huru te tia ia atuatuhia. Ia ˈna anaˈe ra, e nehenehe taua ite ra e faatupu i te hoê mana puai mau, mai ta teie hiˈoraa no te pae apatoa no Europa ma e faaite maira. Mea rahi te mau fifi i farereihia e te hoê taurearea no to ˈna huru iria. I to ˈna vai-tamariirii-raa ra, ua rau ïa te mau huru tatamaˈiraa ta ˈna i farerei mai. E no te haamâha i taua huru iria no ˈna ra, ua haapii aˈera oia i te ohipa moto, aita râ te reira i tauturu ia ˈna ia haavî mai i to ˈna huru iria. I ta ˈna tau faehau, te tahi atu â ïa mau fifi ta ˈna i farerei ia ˈna i tupai i te tahi atu faehau. I roto i to ˈna oraraa tivira, ua faaipoipo aˈera oia e ua tupai atoa hoi i ta ˈna vahine. I roto i te hoê tatamaˈiraa fetii, ua tupai atoa oia i to ˈna metua tane, ma te faatarava roa ia ˈna i raro. O te huru taata iria ohie noa e te ino hoi oia.
6, 7. Mea nafea te ite mau i te Bibilia i te tautururaa i te hoê taurearea no te pae Europa ma, ia taui i to ˈna huru?
6 I muri aˈe, ua haapii aˈera teie taurearea i te Bibilia e te mau Ite no Iehova. Ua faaroo aˈera hoi oia te mau aˈoraa mai teie te huru: “Eiaha roa te ino e tahoohia i te ino i te taata atoa nei. (...) Peneiaˈe o te tia ra, e parahi hau noa outou i roto i te taata atoa nei. E au mau here e, eiaha outou e tahoo, tuu noa ˈtu râ i te riri.” (Roma 12:17-19). Ua taa aˈera ïa ia ˈna i te ino rahi o to ˈna huru iria. Ua vaiiho aˈera oia i te ohipa moto, i te mea e ua manaˈo oia eita roa ˈtu taua ohipa nei e tuati noa ˈˈe i te huru taata kerisetiano hau. Teie râ, te aro uˈana noa râ oia i to ˈna mau huru ino.
7 Ua riro te hoê ite rahi atu â no nia i te mau faaueraa tumu bibilia ei mea faufaa roa no ˈna. Ua faaineine te reira i to ˈna haava manaˈo, e ua tauturu ia ˈna i muri iho ia haavî i to ˈna huru iria ohie noa. I te hoê mahana, tei mua roa hoi o ˈna i roto i ta ˈna haapiiraa bibilia, ua riri maira te hoê taata ia ˈna e ua parau faufau maira hoi ia ˈna. Mai ta ˈna i matau, ua haamata taua taurearea ra i te riri. Ua oioi roa râ te tahi manaˈo i te ô mai i roto ia ˈna: te manaˈo haama, tei tapea mai ia ˈna ia ore o ˈna e fati i raro aˈe i te mana o te riri. Maoti hoi i ‘te tahoo i te ino i te ino’, ua haavî maira oia ia ˈna. Maoti te ite mau o te Bibilia, ua taui roa teie nei taata i teie mahana, ua faataata apî hoi o ˈna ia ˈna.
Haapii i te ite e o vai te Atua
8. a) E hamanihia te huru taata apî ia au i te huru o vai? b) Te ite no nia ia vai te tia ia apee i te ite mau e faatupu i te huru taata apî?
8 E ere anei e mea rahi te taata teie e vaiiho nei i to ratou mau huru paruparu i te pae tino ia faatere mai ia ratou e inaha, ua ite maitai ratou e eaha te tia ia ratou ia rave? Eita ˈtura ïa te ite-papu-noa-raa eaha te mea maitai aore ra eaha te mea ino e navai. O te tahi atu â tumu tei faaitoito i te mau taata ta tatou i faahiti aˈena i te parau, ia taui. Eaha ïa taua tumu ra? Te parau ra te irava i faahitihia ˈtu na i nia nei e: “E ua faa-taata-apî, o tei faahouhia i te ite ra, mai te huru atoa o tei hamani ia ˈna ra.” (Kolosa 3:10). Oia mau, ua hamanihia te huru taata apî ia au i te huru o te Atua, mai ia Adamu i te omuaraa ra (Genese 1:26). No reira, e ô atoa ïa te ite no nia i te Atua i roto i te ite mau tei tauturu i na taurearea toopiti ra. E ite-faahou-hia taua manaˈo ra i roto i teie mau parau a Iesu e na ô ra e: “Teie hoi te ora mure ore, ia ite ratou ia oe i te Atua mau ra, e ia Iesu i te Mesia i ta oe i tono mai.” — Ioane 17:3.
9. Nafea te ite i te Atua i te tautururaa mai ia tatou ia taui i to tatou huru?
9 Nafea râ hoi te ite no nia i te Atua ia tauturu mai ia tatou ia taui i to tatou huru? E mau tumu ïa ta ˈna e horoa maira no te taui. Te taata e haapii i te ite e o vai mau na te Atua na roto i te tuatapaparaa i te Bibilia, e ite atoa ïa oia i te mau huru o te Atua e te here Ta ˈna e faaite mai nei i te taata; e riro hoi oia i te here atoa ia ˈna (Ioane 1, 4:19). E nehenehe ta ˈna i muri iho e auraro i te faaueraa i muri nei, ta Iesu i parau e e faaueraa matamua e e faaueraa rahi roa ˈˈe hoi: “Hinaaro oe i to Atua ia Iehova ma to aau atoa, e ma to varua atoa, e ma to manaˈo atoa.” (Mataio 22:37). Na te here i te Atua e faaitoito mai ia tatou ia hinaaro e faatupu i te huru taata apî e au ia ˈna e tutava ˈtu ai tatou i te hinaaro e riro mai ia ˈna ra te huru, noa ˈtu eaha te paari o te aroraa.
Mau huru paruparu tei aa-roa-hia
10, 11. Nafea te ite papu i te tautururaa i te hoê vahine no te pae Marite Apatoerau, ia haamata i te taui i to ˈna huru taata?
10 I roto i te tahi mau hiˈoraa, aita roa ˈtu tatou e faarahi ra i te parau ia faahiti tatou i te parau no te aroraa. I Marite Apatoerau, ua nehenehe noa te hoê vahine e taui maoti te hoê aroraa uˈana. I to ˈna vai-tamariirii-raa ra, ua hamani-ino-hia oia i te pae o te taatiraa tino, e ua paari oia i roto i te hoê utuafare iria ohie noa, e inaha ua fariu tia ˈtura i nia i te raau taero. Ua aratai aˈera hoi taua peu moni rahi ra ia ˈna ia rave i te ohipa taiata. E eiâ atoa na o ˈna i te mau ratere, e inaha e rahi aˈe atura ïa to ˈna taime i roto i te fare auri aore ra i roto i te mau fare pereraa i to ˈna iho utuafare.
11 I te taime te mau Ite no Iehova e farerei ai ia ˈna, ua fanau o ˈna i te hoê tamarii faaturi, e hia ˈtura ïa tamarii ta ˈna i haamarua na mua ˈtu. Ua oaoa roa râ oia i te faarooraa i te parau no nia i te Bibilia e ua opua aˈera e haapii. Ua oioi roa oia i te taai i te mau auraa e te Atua e i te faatupu i te tahi mau tauiraa i roto i to ˈna oraraa.
12, 13. A faaite mai e mea nafea te ite papu, ia ô roa mai i roto ia tatou, ia faaitoito ia tatou ia taui.
12 Teie râ, e aroraa rahi mau to mua ia ˈna, no te mea ua aa-roa-hia te huru taata tahito i roto ia ˈna. I te hoê mahana, ua inoino oia no te hoê aˈoraa maitai roa hoi, ua faaea aˈera oia i te haapii i te Bibilia e ua hoˈi faahou atura i roto i ta ˈna mau peu viivii. Eita râ e moehia ia ˈna i te mau parau mau bibilia i haapiihia mai ia ˈna. Te parau ra oia i teie mahana e: “I te tahi taime, e faahapahapa noa na vau ia ˈu, ia haamanaˈo faahou vau i te irava o te Petero 2, 2:22 e na ô ra e: ‘Ua hoˈi te urî i to ˈna iho ruai, e te maiaa i mâ ra i to ˈna taaviriviriraa i te vari.’”
13 I roto râ i te roaraa o te tau, ua faaitoito te mea ta ˈna i haapii mai i roto i te Bibilia ia ˈna, ia horoa i te tahi â tutavaraa itoito mau. Te faatia ra oia e: “Ua tuu vau i te mau mea atoa i roto i te rima o Iehova e ua pure pinepine vau ia ˈna e tauturu mai ia ˈu.” I teie nei râ, e noa ˈtu te paari o te aroraa, ua ô maitai mai te huru taata apî i roto ia ˈna. I te hoê mahana, i roto i te hoê taime paruparu, ua taero oia e ua rave aˈera hoi i te hoê ohipa tia ore. Ua faaite mai râ to ˈna huru i te hoê tauiraa mau. Ua faufau roa oia i te ohipa ta ˈna i rave. “Ua faarahi vau i te pure e i te haapii”, ta ˈna ïa i parau. I roto i te roaraa o te tau, ua taui te Parau a te Atua ia ˈna e ua faariro ia ˈna ei vahine kerisetiano itoito mau, e inaha, e oraraa titiaifaro atura ïa to ˈna. E rave rahi atura matahiti i teie nei to ˈna riroraa mai ei vahine apî, tei vaiiho i muri roa ia ˈna i te vahine ohie roa hoi i te haavarehia, o te faataero na ia ˈna i te raau taero e te vahine taiata.
Tauihia e te Parau a te Atua
14, 15. a) Eaha te puai no ǒ mai i te Atua ra e itehia i roto i te Bibilia? b) Eaha vetahi mau huru o te mau kerisetiano mau i to tatou nei tau?
14 Te haapapu maira te mana ta te Bibilia i faaohipa i nia i te oraraa o te mau taata haehaa e e ere oia i te hoê noa buka i papaihia e te taata, o te Parau faauruahia râ e te Atua. Ia au i taua tiaraa ra, ua riro oia ei arai no te ohipa a te varua o te Atua. I teie mahana, te horoa mai nei taua iho varua ra tei tauturu ia Iesu i mutaa ihora ia faatupu i te mau semeio, i roto ia tatou i te puai e upootia atu ai tatou i nia i to tatou mau hapa e a ahu mai ai i te huru taata kerisetiano. Inaha, te mau huru faufaa roa te tia i te mau kerisetiano ia atuatu — oia hoi, te aroha, te oaoa, te hau, te faaoromai, te mǎrû, te maitai, te faaroo, te mamahu e te hitahita ore — e parauhia ïa i roto i te Bibilia o ‘te hotu o te varua’. — Galatia 5:22, 23.
15 I to tatou nei mau mahana, te ohipa nei taua varua ra eiaha i nia i te tahi noa mau taata, i nia râ i te mau mirioni taata “e haapiihia (...) [nei] e Iehova” e teie e tamata nei i ‘te hau rahi’ ta ˈna e horoa mai nei (Isaia 54:13). O vai hoi taua mau taata ra? Te horoa mai nei Iesu i te hoê ravea e nehenehe atu ai e ite e o vai ratou ia parau oia e: “O te mea teie e ite ai te taata atoa e, e pǐpǐ outou na ˈu, ia aroha outou ia outou iho.” (Ioane 13:35). E hotu o te varua te aroha kerisetiano e e huru faufaa roa hoi teie no te huru taata apî. Te vai ra anei te hoê pǔpǔ taata teie e faaite nei i te aroha ta Iesu i faahiti mai?
16, 17. A faaite mai na i te tahi mau manaˈo i piahia i roto i te mau vea, o te riro ei mea faufaa e ite atu ai tatou o vai ma te feia “e haapiihia (...) [nei] e Iehova” e teie e fanaˈo nei i ‘te hau rahi’ ra.
16 Teie te hoê tuhaa no te tahi rata i faataehia ˈtu i te hoê vea marite (New Haven Register): “Noa ˈtu â ïa e ua riri aˈenei tatou i to ratou huru itoito no te faariroraa mai i te taata ei melo apî no ta ratou haapaoraa, eita ta tatou e nehenehe e ore e haafaahiahia i te haapao maitai, te mâ, te haerea maitai e te huru oraraa mâ o taua mau taata ra.” Ua parau te Münchner Merkur, vea helemani, no nia i taua iho nei mau taata ra e: “O te mau taata aufau tute haerea tia roa ˈˈe e o te tae atoa hoi i te hora tia, no te Repubilika [no Helemani] tooa o te râ. E ite-atoa-hia to ratou faatura i te mau ture ia faahoro ratou i to ratou pereoo e i roto atoa i te mau tabula numera o te mau taata ohipa iino.”
17 No vai hoi te parau ta teie na vea e piti e faahiti ra? No te pǔpǔ iho ïa ta te Herald no Buenos Aires (Ra-Parata) e faahiti ra i te na ôraa e: “Ua haapapu te mau Ite no Iehova i roto i te roaraa o te mau matahiti e e mau taata rave ohipa ratou, ma te haerea au noa, e te haamâuˈa ore i te moni e te mǎtaˈu atoa hoi i te Atua ta te nunaa e hinaaro ra.” Ma te pia i te mau parau i noaa mai i roto i te hoê titorotororaa i te pae no te tuatapaparaa i te oraraa totiare i ravehia i Zambie, te na ô ra te vea ra American Ethnologist no nia i taua iho pǔpǔ nei e: “Ua manuïa rahi aˈe te mau Ite no Iehova, hau atu i te tahi atu mau pǔpǔ faaroo, i te faaau maite i te oraraa o te feia faaipoipo.”
18, 19. Na roto i teihea mau parau te mau Ite no Iehova no Italia e no Afirika Apatoa i te faataaraahia?
18 No ratou ta te La Stampa, vea italia, i papai te parau: “Tera mau taata, o te mau taata haerea tia roa ˈˈe ïa te nehenehe e hinaarohia: eita ratou e eiâ i nia i te tute e eita atoa ratou e ape i te mau ture e ore e haafanaˈo ia ratou. To ratou oraraa ‘i te mau mahana atoa’, ua niuhia ïa i nia i te aroha taata-tupu, te patoiraa i te rave i te faatereraa, te patoiraa i te haavîraa puai e e haerea tia hoi to ratou (inaha no te rahiraa o te mau kerisetiano, o te tahi noa ïa teie mau ‘ture no te sabati’ e tano noa ia porohia mai na nia mai i te pupiti).”
19 I Afirika Apatoa, ua faariro te hoê orometua no te haapiiraa tuatoru, tei farerei hoi i te fifi i te pae no te au-ore-raa tera nunaa e tera nunaa e itehia ra i roto i taua fenua ra, i te mau Ite no Iehova ei mau “taata ta te mau ture teitei o te Bibilia i faariro ei mau taata aita roa ˈtu e ite ra eaha te taa-ê-raa i rotopu i tera peni e tera peni”! E ma te hohora mai i te hohonuraa o to ˈna manaˈo, ua na ô mai â oia e: “Eita taua mau taata ra e faaea noa i nia i te huru o te iri, mea anaanatae râ na ratou i te tahi pae no to ratou iho huru mau. Ua riro te mau Ite no Iehova, i teie mahana, ei utuafare fetii mau otahi roa no te huitaeae ra.”
20. Te taa ê ra te mau Ite no Iehova i te mau taata o to ratou tau i roto i teihea tuhaa?
20 Te faaite maira taua mau manaˈo ra e te vai ra te hoê pǔpǔ taata teie e farii nei i te Bibilia e te ohipa ra te varua o te Atua i nia ia ratou. Te vahi faahiahia roa, e tano maitai taua mau taata ra i te pǔpǔ — tei faaitehia ˈtu i roto i te hoê pene na mua ˈtu — teie e auraro nei i te faaueraa i horoahia mai e Iesu e haere e poro i te parau apî maitai o te Basileia i roto i te ao taatoa nei (Mataio 24:14). No te aha te mau Ite no Iehova e taa ê ai i roto i taua mau tuhaa e rave rahi ra? I roto e rave rahi mau hiˈoraa, aita ratou e taa ê ra i te mau taata o to ratou tau. Hoê â to ratou mau huru paruparu i te pae tino, hoê â mau fifi i te pae faanavairaa faufaa ta ratou e farerei nei e hoê â mau hinaaro tumu to ratou. Teie râ, ia amuihia ratou, mea here na ratou i te Atua, mea faufaa na ratou i te Bibilia e te vaiiho nei ratou i te Bibilia ia ohipa mai i roto i to ratou oraraa.
21. Eaha ta te hoê pǔpǔ mai te mau Ite no Iehova e haapapu maira i roto i te hoê ao e faaterehia nei e te riri uˈana?
21 Te tahi tau mirioni rahiraa mau Ite no Iehova e te ora nei ratou i roto hau atu i te 200 fenua. Te vai ra i roto ia ratou te mau taata no te mau huru nunaa atoa, mau reo e mau faito totiare atoa. Te riro nei hoi ratou ei utuafare fetii tahoê e te hau no te mau fenua atoa. Noa ˈtu eaha te fenua ta ratou e faaea ra, e mau taata haerea maitai ratou, teie râ, na mua roa ˈˈe, e mau melo ratou e ora ˈtu i raro aˈe i te Basileia o te Atua, teie e apiti paatoa atu nei ma te itoito i roto i te pororaa o te parau apî maitai o taua Basileia ra. I roto i te hoê ao amahamaha, faaterehia e te riri uˈana, mea fifi roa ia tiaturi e te vai nei te hoê pǔpǔ taata mai teie te huru. Ua riro atura ïa oia ei haapapuraa faahiahia mau e te ohipa noa maira te varua o te Atua i roto i te mau taata. Te haapapu maira oia ma te puai e e “mea ora hoi [te Bibilia] (...) e te puai rahi”.
[Uiraa haapiiraa]
[Parau iti faaôhia i te api 177]
E mana to te Bibilia no te taui i te mau taata i roto i te hohonuraa o to ratou aau.
[Parau iti faaôhia i te api 181]
E faaitoito mai te ite no nia i te Atua ia tatou, ia riro atoa mai ia ˈna te huru.
