A FERURI na mai te peu o outou anaˈe i mua i te hoê nuu faehau. E mauhaa tamaˈi puai ta ratou e ua ineine ratou no te aro ia outou. Tei mua ïa outou e to outou mau hoa ia ratou, mai te huru ra e eita iho â ïa e û ia outou teie nuu.

Tera ïa ta Baraka, Debora e e 10 000 Iseraela i faaruru i te tau o te mau tavana no Iseraela. O vai to ratou mau enemi? O te raatira Sisera ïa tei faatere i te mau nuu puai no Kanaana. I roto i ta ratou mau mauhaa tamaˈi, te vai atoa ra te pereoo tamaˈi e ˈoˈe to nia iho i te huira. Ihea te aroraa i te tupuraa? I te mouˈa Tabora e i te tahora o Kisona. Ua faaite te mau ohipa tei tupu i reira e mea puai te faaroo o Baraka. E hiˈopoa anaˈe i te tahi mau tupuraa hou a tupu ai te tamaˈi.

Te tiaoro ra te ati Iseraela ia Iehova

Te faahiti ra te buka Te mau tavana i te mau taime atoa i faarue ai te mau Iseraela i te haamoriraa mau e te mau faahopearaa mauiui mau ta ratou i faaruru. I roto i te mau tupuraa tataitahi, e taparu ratou i te aroha hamani maitai o te Atua, e tono-atoa-hia te hoê aratai, e faaorahia ratou e i muri iho, e orure hau faahou ratou. I taua taime ra, tera ïa tei tupu “i to Ehuda [te hoê tavana tei faaora ia ratou i te ati Moabi] poheraa, rave faahou aˈera te ati Iseraela i te mea ino i te aro o Iehova.” Maiti ihora “te nunaa i te atua apî” no ratou. Eaha te faahopearaa? “Tuu atura Iehova ia ratou i te rima o Iabina te arii no Kanaana, tei arii na i Hazora. O Sisera te raatira o ta ˈna nuu . . . Tiaoro aˈera te ati Iseraela ia Iehova, no te mea e 900 pereoo tamaˈi e ˈoˈe to nia iho i te huira ta [Sisera], e i haavî rahi na oia i te ati Iseraela e 20 matahiti.”—Te mau tavana 4:2, 3; 5:8.

I te tau o Iseraela, te parau ra te mau Papai: “[I taua mau mahana ra] . . . aita e taata i nia i te mau purumu. Ua haere noa te mau ratere na nia i te tahi atu mau purumu. Aita faahou to te mau oire rii i Iseraela.” (Te mau tavana 5:6, 7) E haamǎtaˈu noa te mau pǔpǔ eiâ i te taata. Te na ô ra te hoê aivanaa: “Ua ora te mau Iseraela i roto i te riaria. Ua paruparu roa ratou e aita faahou to ratou e tiaturiraa.” Mai ta ratou râ i rave noa na, i roto i te hepohepo, ua tiaoro te ati Iseraela ia Iehova.

Ua tono Iehova i te hoê aratai

Ua riro te haavîraa a to Kanaana ei tau ati no Iseraela. Ua faaohipa ïa Iehova i te peropheta vahine ra o Debora no te faaite i ta ˈna mau haavaraa e aratairaa. E hopoia faahiahia ta Iehova i horoa ia Debora, e tavini oia mai te hoê metua vahine no Iseraela ei auraa parau.—Te mau tavana 4:4; 5:7.

Faaue atura Debora ia tiihia o Baraka e parau atura oia ia ˈna: “Ua faaue Iehova te Atua o Iseraela: ‘A haere i te mouˈa Tabora, e a rave 10 000 tane o te opu o Naphatali e to Zebuluna na muri ia oe. E faahaere au ia Sisera, te raatira o te nuu a Iabina, ia oe ra, e ta ˈna mau pereoo tamaˈi e ta ˈna mau pǔpǔ faehau i te tahora o Kisona, e e tuu vau ia ˈna i to rima.’” (Te mau tavana 4:6, 7) Ma te parau ‘ua faaue Iehova te Atua o Iseraela,’ ua faaite ïa Debora e aita to ˈna e mana i nia ia Baraka. E pee noa oia i ta te Atua i faaue ia ˈna ia rave. Eaha ta Baraka i pahono atu?

Ua parau Baraka: “Ia haere mai oe na muri ia ˈu, e haere au. Ia ore râ oe ia haere na muri ia ˈu, eita vau e haere.” (Te mau tavana 4:8) No te aha Baraka i feaa ˈi? Ua riaria anei o ˈna? Te auraa anei aita o ˈna e tiaturi ra i te mau parau fafau a te Atua? Aita. Aita o Baraka i patoi i teie hopoia, aita atoa o ˈna i faaroo ore ia Iehova. Te faaite ra ta ˈna pahonoraa, ua manaˈo oia e eita e maraa ia ˈna anaˈe ia auraro i teie faaueraa. E itoitohia râ o ˈna e to ˈna mau taata mai te peu e haere o Debora te tia o te Atua na muri ia ˈna. No reira, e ere roa ˈtu Baraka i te taata paruparu, mea puai râ to ˈna faaroo.

E au te huru o Baraka i to Mose, Gideona e to Ieremia. I manaˈo atoa na teie mau tane e eita e maraa ia ratou ia amo i ta ratou hopoia. E ere râ te auraa, e mea paruparu to ratou faaroo. (Exodo 3:11–4:17; 33:12-17; Te mau tavana 6:11-22, 36-40; Ieremia 1:4-10) E eaha te nehenehe e parau no nia i te huru o Debora? Aita o ˈna i imi i te ravea no te faatere. Ua faaite noa oia i te aau haehaa. Ua parau oia ia Baraka: “E haere au na muri ia oe.” (Te mau tavana 4:9) Ua ineine o ˈna i te faarue i to ˈna fare, to ˈna nohoraa papu no te haere na muri ia Baraka i te tamaˈi. E hiˈoraa maitai atoa Debora no to ˈna faaroo e to ˈna itoito.

Ma te faaroo ua pee ratou ia Baraka

Te vahi i putuputu ai te mau Iseraela tei te mouˈa Tabora ïa. Ua maiti maitaihia taua vahi ra. Tera hoi te vahi e farerei ai te mau opu o Naphatali e o Zebulona tei faaea i pihai iho noa mai. No reira, mai ta te Atua i faaue, e 10 000 rima tauturu e o Debora tei pee ia Baraka ma te pauma i nia i te mouˈa.

E titauhia te faaroo no te pee ia Baraka. Ua fafau Iehova e upootia Baraka i nia i te ati Kanaana. E mauhaa tamaˈi anei râ to te ati Iseraela? Te na ô ra Te mau tavana 5:8: “Aita i itehia hoê paruru, aita atoa e omore, i rotopu e 40 000 tane i Iseraela.” Aita ïa te ati Iseraela i ineine maitai. E noa ˈtu e omore e e paruru to ratou, eita te reira e navai i mua i te hoê nuu e pereoo tamaˈi e ˈoˈe to nia iho i te huira ta ratou. I to Sisera faarooraa e ua pauma Baraka i nia i te mouˈa Tabora, ua haaputuputu oia i ta ˈna mau pereoo tamaˈi e pauroa te pǔpǔ faehau i te tahora o Kisona. (Te mau tavana 4:12, 13) Ta Sisera râ i ore i ite, o te Atua Manahope ta ˈna e aro ra.

Ua aˈuaˈu Baraka i te nuu a Sisera

I te taime aroraa, ua parau Debora ia Baraka: “A tia i nia, teie hoi te mahana e tuu ai Iehova ia Sisera i to rima. Aita anei Iehova e haere nei na mua ia oe?” Pou ihora Baraka e to ˈna mau taata mai nia mai i te mouˈa teitei o Tabora i te mau peho. Tera râ, e tere vitiviti te mau pereoo tamaˈi a Sisera inaha tei te vahi papu ratou. Eaha to outou huru ahani tei roto outou i te nuu a Baraka? E pee oioi anei outou i te faaueraa a Iehova? Ua auraro Baraka e to ˈna mau taata i ta Iehova i faaue mai. “Faarapu ihora Iehova ia Sisera e pauroa ta ˈna pereoo tamaˈi e pauroa te nuu i mua i te ˈoˈe a Baraka.”—Te mau tavana 4:14, 15.

Maoti te turu a Iehova, ua upootia Baraka i nia i te nuu a Sisera. Aita te Bibilia e faataa ra i te mau mea atoa tei tupu. Teie râ, te parau ra te himene upootiaraa a Baraka raua Debora e ‘ua ninii te raˈi e te mau ata i te pape.’ E au ra e no te ûa rahi, ua mau te mau pereoo a Sisera i roto i te vari. Ua riro ïa te mauhaa tamaˈi a to Kanaana ei haafifiraa na ratou. No te mau taata a Sisera tei pohe, te na ô ra te himene: “Ua hopoi ê te tahora o Kisona ia ratou.”—Te mau tavana 5:4, 21.

E nehenehe anei e tiaturi i teie aamu? I te peho o Kisona, e tahe rii te pape. Ia tupu râ te vero aore ra ia topa te ûa rahi, e î oioi ïa te pape a riro atu ai ei tahora pape atâta roa. I te roaraa o Tamaˈi rahi matamua, ua topa te ûa, e ua titauhia 15 noa minuti ia vari roa teie vahi. Mea fifi ïa no te faahoro i te mau pereoo tamaˈi. No nia i te aroraa i rotopu ia Napoléon e te mau Turekia i te mouˈa Tabora i te 16 no Eperera 1799, te faatiahia ra, “e mea rahi tei paremo a tamata ˈi i te horo ê na roto i te peho o Kisona.”

A fatata ˈi te nuu a Sisera e a Baraka i te farerei, te parau ra Joseph Flavius te hoê taata tuatapapa i te aamu: “Ua tupu taue mai te vero, ua topa te ûa e te ûa paari. Ua puhi mai te mataˈi i te ûa i nia i te hohoˈa mata o te mau faehau no Kanaana e ua haapoiri te reira i to ratou mata. Ua riro ïa to ratou mau teˈa e ta ratou mau taora ofai ei mea faufaa ore na ratou.”

Te faataa ra Te mau tavana 5:20: “Mai te raˈi mai, ua aro te mau fetia. Mai to ratou vairaa, ua aro ratou ia Sisera.” Mea nafea te mau fetia i te aroraa ia Sisera? E parau vetahi, te auraa ua fanaˈo Baraka i te tauturu a to te raˈi. No te tahi atu, e manaˈo ratou na te mau melahi i tauturu mai, aore ra te ofai auahi tei topa mai te raˈi mai, aore ra ua tiaturi Sisera i te mau fetia, ua hape râ tei tohuhia no ˈna. Inaha, aita te Bibilia e horoa ra i te tahi atu mau haamaramaramaraa no nia i teie mau fetia, e au ra e ua fanaˈo te mau Iseraela i te tauturu a te Atua. I roto i tera aroraa, o te mau Iseraela ïa tei upootia. “Aˈuaˈu atura Baraka i te mau pereoo tamaˈi . . . Pau ihora ïa te nuu taatoa a Sisera i te ˈoˈe, aita hoê i toe.” (Te mau tavana 4:16) Eaha ïa tei tupu no te raatira Sisera?

Ua topa te taata haavî “i te rima . . . o te tahi vahine”

Te parau ra te Bibilia: “[Ua faarue Sisera i te tamaˈi e] horo ê atura râ [oia] i te fare ie o Iaela te vahine faaipoipo a Hebere te ati Keni, e hau hoi to rotopu ia Iabina te arii no Hazora e te utuafare o Hebere te ati Keni.” Ua titau-manihini Iaela ia Sisera ia tomo mai i to ˈna fare ie. Ua horoa oia i te û ia Sisera, ua tapoˈi oia ia ˈna, e varea taoto ihora Sisera. I muri iho, rave maira Iaela “i te tahi naero rahi fare ie e te tahi hamara,” e mauhaa teie ta te feia purutia e faaohipa pinepine. “E a taoto maitai ai Sisera tei rohirohi roa, tapiri omoˈe maira oia ia ˈna e patiti ihora ia ˈna i taua naero rahi ra na te aoao o to ˈna upoo e tae roa i te repo, e pohe ihora Sisera.”—Te mau tavana 4:17-21.

I muri iho i te reira, ua haere Iaela e farerei ia Baraka e parau atura oia ia ˈna: “A haere mai, e faaite au ia oe i te tane ta oe e imi nei.” Te parau atoa te aamu: “Tomo atura oia i ǒ ˈna e ite atura ia Sisera e tarava ra ua pohe, e te naero rahi fare ie tei pipiha ˈtu na te aoao o to ˈna upoo.” Eita e ore ua haapuai te reira i te faaroo o Baraka. Na mua ˈtu, ua parau te peropheta vahine ra o Debora ia Baraka: “Eita oe e faahanahanahia i teie tere ta oe e haere ra, i te rima hoi o te tahi vahine e tuu ai Iehova ia Sisera.”—Te mau tavana 4:9, 22.

E ohipa haavarevare anei ta Iaela i rave? Aita Iehova e manaˈo ra mai tera. Te na ô ra te himene upootiaraa a Baraka e Debora, “i rotopu i te mau vahine, ia haamaitai-rahi-hia Iaela.” Ia au i teie himene mea tano ia haapohehia o Sisera. Ua haapeapea noa to ˈna mama a tiai noa ˈi ia hoˈi mai ta ˈna tamaiti mai te tamaˈi. Te ui maira oia: “Eaha to ˈna pereoo i maoro ai i te tae mai?” E tamata “te vahine feruriraa paari roa ˈˈe o to ˈna aorai” i te tamahanahana ia ˈna a parau atu ai e te tufa nei paha Sisera i te mau taoˈa ta ˈna i haru mai i te tamaˈi, te mau ahu nira-faanehenehe-hia e te mau tamahine no te horoa i te mau tane. Te parau maira te mau vahine feruriraa paari: “Papu, te tufa nei ratou i te mau taoˈa ta ratou i haru mai, hoê tamahine, e piti tamahine na te mau faehau atoa, e ahu ua rau te û tei haruhia no Sisera, . . . e ahu nira-faanehenehe-hia, e ahu ua rau te û, e piti ahu nira-faanehenehe-hia no te aˈî o te feia haru taoˈa.”—Te mau tavana 5:24, 28-30.

Te haapiiraa no tatou

E mau haapiiraa faufaa ta tatou e nehenehe e huti mai i teie aamu. E roohia te feia aita e tuu ra ia Iehova i roto i to ratou oraraa i te fifi e te inoino. No te feia râ o te tatarahapa e o te faatupu i te faaroo i te Atua, e faaora Iehova ia ratou. Mea faufaa atoa te auraroraa. Noa ˈtu e manaˈo tatou eita te mau aratairaa a te Atua e tano no tatou, ia papu ra ia tatou e riro teie mau aratairaa ei haamaitairaa na tatou. (Isaia 48:17, 18) Maoti noa te faaroo ia Iehova e te auraroraa i ta ˈna mau aratairaa i nehenehe ai Baraka e ‘aˈuaˈu i te mau nuu.’—Hebera 11:32-34.

Teie te mau parau hopea o te himene a Debora raua Baraka: “Ia mou pauroa to oe mau enemi, e Iehova, ia riro râ te feia mea here na ratou ia oe mai te mahana e hiti ra ma te anaana rahi.” (Te mau tavana 5:31) E parau mau iho â te reira i te taime e haamou roa ˈi Iehova i te ao ino a Satani.

[Hohoˈa]

Ua faaohipa Iehova ia Debora no te paraparau ia Baraka

[Hohoˈa]

Te anavai Kisona o tei hahi ê i to ˈna vairaa mau

[Faaiteraa i te tumu]

Pictorial Archive (Near Eastern History) Est.

[Hohoˈa]

Mouˈa Tabora