Ua taui te Bibilia i to ˈu oraraa

MEA nafea te hoê tamahine tei hamani-ino-hia i to ˈna tamariiraa i te iteraa i te oaoa? Eaha tei turai i te hoê taurearea orure hau ia riro ei taata poro evanelia e ia faatupu i te hau? A taio i to raua aamu.

“Ua imi noa na vau i te tamahanahanaraa e te here.”​—INNA LEZHNINA

MATAHITI FANAURAA: 1981

FENUA: RUSIA

AAMU: UA HAMANI-INO-HIA I TO ˈNA TAMARIIRAA

NA MUA ˈˈE: E tariˈa turi au i to ˈu fanauraahia, e tariˈa turi atoa to ˈu papa e to ˈu mama. Tae roa i te onoraa o to ˈu matahiti, e oraraa oaoa to matou. Ua faataa râ to ˈu na metua, ua mauiui roa to ˈu aau! Ua haere papa e to ˈu taeae matahiapo e faaea i Troitsk, area mâua mama, i Chelyabinsk. I muri aˈe, ua faaipoipo faahou mama i te hoê taata inu ava tei tupai na ia mâua mama.

I te matahiti 1993, ua paremo to ˈu taeae matahiapo i roto i te hoê anavai, ua ino roa ˈtu â to matou oraraa utuafare i muri aˈe i tera ati! Ua haamata mama i te inu i te ava e i te tupai atoa ia ˈu! Ua imi au i te ravea ia maitai mai to ˈu oraraa, ua imi noa na vau i te tamahanahanaraa e te here. Ua haere au i roto e rave rau haapaoraa no te imi i te tamahanahanaraa, aita râ i itehia!

UA TAUI TE BIBILIA I TO ˈU ORARAA: I te 13raa o to ˈu matahiti, ua faatia mai te tahi hoa haapiiraa Ite no Iehova i te tahi mau aamu Bibilia. Mea au roa na ˈu te aamu o Noa raua Ioba tei tavini i te Atua noa ˈtu te fifi. Ua haamata vau i te haapii i te Bibilia e i te apiti i te putuputuraa a te mau Ite no Iehova.

E rave rahi parau mau ta ˈu i haapii i roto i te Bibilia, ua putapû roa vau i te iteraa e iˈoa to te Atua. (Salamo 83:18) Ua maere atoa vau i ta te Bibilia i tohu no nia i “te mau mahana hopea.” (Timoteo 2, 3:1-5) Ua oaoa roa vau i te iteraa e tupu te tia-faahou-raa! E nehenehe ïa vau e farerei faahou i to ˈu taeae!—Ioane 5:28, 29.

Aita râ to ˈu mama e ta ˈna tane i mauruuru i ta ˈu e haapii ra, aita hoi raua e au ra i te mau Ite no Iehova! Ua faahepo mai raua ia faaea i ta ˈu haapiiraa Bibilia. Mea au roa râ na ˈu te reira, ua tamau noa ïa vau i te haapii.

E ere i te mea ohie ia faaoromai i te patoiraa a to ˈu utuafare. Te tahi atu ati tei tupu, ua paremo atoa to ˈu teina, tei haere mai na hoi na muri ia ˈu i te mau putuputuraa a te mau Ite no Iehova. Aita râ te mau Ite no Iehova i faarue ia ˈu! I rotopu ia ratou to ˈu iteraa i te tamahanahanaraa e te here ta ˈu i imi noa na! Na ôraa ïa vau, teie te haapaoraa mau! I te matahiti 1996, ua bapetizohia vau ei Ite no Iehova!

TO ˈU FAUFAARAAHIA: A ono atura matahiti au i te faaipoiporaahia i te hoê tane maitai o Dmitry. Te tavini amui nei mâua i te amaa a te mau Ite no Iehova i Saint-Pétersbourg. I teie nei, ua mǎrû rii mai to ˈu mama e ta ˈna tane i nia ia ˈu!

Te mauruuru nei au i te ite o vai o Iehova e te oaoa atoa nei i te tavini ia ˈna!

“E rave rahi uiraa i roto i to ˈu feruriraa.”​—RAUDEL RODRÍGUEZ

MATAHITI FANAURAA: 1959

FENUA: CUBA

AAMU: UA ORURE I TE HAU O TO ˈU FENUA

NA MUA ˈˈE: Ua fanauhia vau i te oire pu o Cuba, ua paari au i te hoê vahi veve e mea pinepine te taata i te tupai. Haamata ˈtura vau i te anaanatae i te mau tuaro taputô mai te judo.

E piahi maitai au e ua faaitoito to ˈu na metua ia ˈu ia haere i te haapiiraa teitei. I reira, ua haamata vau i te manaˈo e titauhia ia taui i te faanahoraa poritita i to matou fenua. Ua riro mai au ei taata orure hau, ua tamata vau e te hoê hoa haapiiraa i te haru i te pupuhi a te hoê mutoi. Ua pepe roa ino te upoo o te mutoi. Ua mau mâua i te fare auri, te utua, e pupuhi-pohe-hia mâua! E 20 noa matahiti to ˈu i tera taime!

I roto i te fare auri, ua feruri noa vau ahani au i ore i rave i tera ohipa ino, eita ïa vau e haapohehia i te pupuhi. Aita râ vau i hinaaro e faaite i to ˈu taiâ. I te hoê â taime, e rave rahi uiraa i roto i to ˈu feruriraa. No te aha i rahi roa ˈi te ohipa tia ore na te ao? Mai tera noa anei to tatou oraraa?

UA TAUI TE BIBILIA I TO ˈU ORARAA: Ua tauihia ta mâua utua, eita mâua e haapohehia, e mau râ e 30 matahiti fare auri. I taua taime ra vau i te farereiraa i te mau Ite no Iehova tei tapeahia no to ratou faaroo. Ua faahiahia vau i to ratou itoito. Noa ˈtu atoa ua tapeahia ratou ma te tano ore, aita ratou i riro mai ei feia iria, ua faatupu noa râ i te hau.

Ua haapii mai te mau Ite no Iehova e opuaraa ta te Atua no te huitaata. Maoti te Bibilia, ua faaite mai ratou e faariro te Atua i te fenua ei paradaiso, e ore roa te ohipa ino e te tia ore. E parahi te feia maitai i nia i te fenua e a muri noa ˈtu ma te oaoa!—Salamo 37:29.

Ua au roa vau i ta ˈu i haapii, mea taa ê râ to ˈu huru i to te mau Ite no Iehova. Eita e haere ia ˈu ia ore e faaô i roto i te ohipa poritita e ia faaea hau noa ia hamani ino mai te taata. Faaoti atura vau i te taio i te Bibilia, i te hoperaa te reira, ua taa ia ˈu o te mau Ite no Iehova anaˈe tei pee i te haerea o te mau Kerisetiano matamua.

Ua papu ia ˈu e titauhia ia rave i te mau tauiraa rahi. E faaea anei i te parau ino, i te puhipuhi i te avaava e i te faaô i roto i te ohipa poritita. E ere i te mea ohie, maoti râ ta Iehova tauturu, ua manuïa vau!

Te tahi tauiraa fifi roa, o te haavîraa ïa ia ˈu iho! Te tamau noa ra vau i te pure no te faatupu i tera huru maitai. Ua tauturu rahi mai te mau irava Bibilia mai te Maseli 16:32 o te na ô ra: “Mea maitai aˈe te taata e ore e riri oioi i te taata puai, e te taata e haavî i to ˈna riri i te taata o te haru i te hoê oire.”

I te matahiti 1991, ua bapetizohia vau ei Ite no Iehova i roto i te hoê tura pape i te fare auri. I te matahiti i muri mai, ua matara mai vetahi o matou e ua faarevahia i te fenua Paniora no te mea e fetii to matou i reira. To ˈu iho â taeraa ˈtu, ua apiti au i te mau putuputuraa a te mau Ite no Iehova. Ua farii maitai ratou ia ˈu mai te mea ra e mea maoro matou i te matauraa! Ua tauturu mai ratou ia haamata i te hoê oraraa apî!

TO ˈU FAUFAARAAHIA: I teie nei, e taata oaoa vau o te tavini ra i te Atua na muri i ta ˈu vahine e ta mâua na tamahine e piti. Te rahiraa o to ˈu taime, no te tauturu ïa i te taata ia haapii i te Bibilia. I te tahi taime, e manaˈo vau ia ˈu a fatata ˈi i te pohe, te mauruuru mau nei au i te riroraa mai ei taata maitai. Aita noa vau i ape i te utua pohe, ua fanaˈo atoa râ i te hoê tiaturiraa! Te tiai ru nei au i te paradaiso fafauhia i reira e vai ai te parau-tia e “e ore roa te pohe.”—Apokalupo 21:3, 4.

 [Parau iti faaôhia i te api 19]

“Ua putapû roa vau i te iteraa e iˈoa to te Atua”

 [Hohoˈa i te api 20]

Te oaoa nei mâua ta ˈu tane i te poro i te feia tariˈa turi