Ua tapea Samasona i te tino pohe o te feia ta ˈna i haapohe. No te aha ïa i vai Nazira noa ˈi oia?

I Iseraela i tahito, e nehenehe te hoê taata e euhe ia Iehova no te ora ei Nazira no te hoê taime noa. a Teie hoê o te mau faaueraa e titauhia ia pee te hoê Nazira: “Eiaha oia e tapiri atu i te hoê taata pohe i te mau mahana atoa i faataa-ê-noa-hia ˈi oia no Iehova. Noa ˈtu e o to ˈna metua tane, to ˈna metua vahine, to ˈna taeae aore ra to ˈna tuahine te pohe, eiaha oia e haaviivii ia ˈna.” E nafea râ “ia pohe taue te tahi taata i pihai iho ia ˈna”? E haaviivii ïa teie ohipa i to ˈna Naziraraa. No reira, ua parauhia: “Eita râ te mau mahana na mua ˈtu e taiohia.” E titauhia ia tamâ oia ia ˈna e ia faataa ê faahou ia ˈna ei Nazira no Iehova.—Numera 6:6-12.

Area râ te tupuraa o Samasona mea taa ê ïa. Hou oia a fanauhia ˈi mai, ua parau te melahi a Iehova i to ˈna mama: “Inaha, e hapû e e fanau oe i te tahi tamaiti, e eiaha to ˈna upoo ia hahuhia, no te mea e riro te tamarii ei Nazira na te Atua mai to ˈna fanauraa mai, e na ˈna e faaora ia Iseraela i te rima o te mau Philiseti.” (Te mau tavana 13:5) E ere na Samasona i faaoti e ora ei Nazira, na te Atua râ i maiti ia ˈna. E vai Nazira noa o ˈna i te roaraa o to ˈna oraraa. Aita ïa te faaueraa eiaha e tapiri i te hoê tino pohe e tano i roto i tera tupuraa. Inaha, ia tapea noa ˈtu oia i te hoê tino pohe ma te manaˈo-ore-hia, e nafea o ˈna e nehenehe ai e faataa ê faahou ia ˈna ei Nazira, ua haamata hoi to ˈna Naziraraa i to ˈna fanauraahia mai? No reira, mea taa ê te mau titauraa no te mau Nazira aita e hopearaa o ta ratou taviniraa, i te feia tei maiti i te tavini ei Nazira.

A tapao na i te mau faaueraa ta Iehova i horoa i te mau tavini e toru maitihia no te ora ei Nazira: Samasona, Samuela e Ioane Bapetizo. Mai tei faahitihia na mua ˈtu, aita Samasona i nehenehe e tâpû i to ˈna rouru. Hou Hana a fanau mai ai ia Samuela, ua euhe oia: “E horoa vau ia ˈna ia oe, e Iehova, i te mau mahana atoa o to ˈna oraraa, eita te reta e tae i nia i to ˈna upoo.” (Samuela 1, 1:11) No Ioane Bapetizo, ua parau te melahi a Iehova: “Eiaha roa ˈtu oia e inu i te uaina e te ava.” (Luka 1:15) Hau atu, “e ahu huruhuru kamela to Ioane e te hatua i nia i to ˈna tauupu. E ta ˈna maa, e vivi ïa e te meri.” (Mataio 3:4) Aita ïa i faauehia ia ratou e toru eiaha e tapiri atu i te hoê tino pohe.

Noa ˈtu e Nazira o Samasona, ua faaohipa atoa Iehova ia ˈna ei tavana no te faaora i te mau Iseraela i te rima o te feia haru faufaa. (Te mau tavana 2:16) No te rave maite i ta ˈna hopoia, ua tapea Samasona e rave rahi taata pohe. I te hoê mahana, ua tairi oia 30 Philiseti e ua rave oia i to ratou ahu. I muri aˈe, ua tairi oia i to ˈna mau enemi “te tahi i muri iho i te tahi i te hoê taparahiraa rahi.” Ua faaohipa atoa Samasona i te hoê ivi taa o te tahi asini oni tei pohe aˈenei no haapohe e tausani taata. (Te mau tavana 14:19; 15:8, 15) Ua rave oia i te reira maoti te turu e te farii maitai a Iehova. Te parau ra te Bibilia e taata faaroo puai o Samasona.—Hebera 11:32; 12:1.

Te parau ra te Bibilia e ua hahae Samasona i te hoê liona “mai te tahi taata e hahae i te hoê puaaniho apî i to ˈna rima.” Te auraa anei ïa, e peu matauhia i tera ra tau ia rave ino i te puaaniho apî?

Aita hoê aˈe haapapuraa e peu matauhia i te tau o te mau tavana i Iseraela ia na reira te taata i nia i te puaaniho apî. Te parau ra Te mau tavana 14:6: “Haapuai maira te varua o Iehova ia [Samasona], e hahae ihora oia i te liona [apî] mai te tahi taata e hahae i te hoê puaaniho apî i to ˈna rima noa.” E faahohoˈaraa noa teie mau parau.

E piti auraa to te parau “hahae.” E au ra e ua taataa Samasona i te taa o te liona aore ra ua hahae o ˈna i teie liona na roto i te tahi atu ravea. Mai te peu e tera iho â ta ˈna i rave, e nehenehe ïa e manaˈohia e ere i te mea fifi no te hoê taata ia na reira atoa i nia i te hoê puaaniho apî. Te auraa ïa, e faahohoˈaraa noa te reira no te faaite e ere i te mea fifi no Samasona ia hahae i te hoê liona i to ˈna rima noa mai tei ravehia i nia i te hoê puaaniho apî. Mai te peu râ, ua hahae oia te liona ma te taataa i to ˈna mau mero tataitahi, ua riro ïa te reira ei hohoˈa faaauraa. Inaha mai tei papaihia i roto i te irava, ua horoa Iehova i te puai ia Samasona no te hahae i te liona. Noa ˈtu râ, te faataa ra Te mau tavana 14:6 e maoti ta Iehova tauturu aita roa ˈtu Samasona i mǎtaˈu i mua i te liona, mai te hoê taata e ore e riaria i mua i te hoê puaaniho apî.

[Nota]