E tia mau â te Edoma o to tatou nei tau ia mou roa
Pene 15
E tia mau â te Edoma o to tatou nei tau ia mou roa
1, 2. Nafea te Poiete ia hiˈo mai i te mau nunaa paari maitai i te mau mauhaa tamaˈi, e ua opua mau oia i te aha, ia au i te parau tohu a Isaia?
MAI tei ore i itehia aˈenei i te tahi atu anotau, ua paari maitai te ao nei teie mahana i te mau mauhaa tamaˈi. Te haamǎtaˈu nei te mau mauhaa atomi a te mau nunaa i te ora iho o te huitaata nei. Mea nafea râ hoi ta te Atua ra o Iehova, tei poiete i te huitaata nei, huru hiˈoraa mai i te mau mea? Te haapapu maitai maira o ˈna i te reira i te pene 34 o te parau tohu a Isaia e na ô ra e:
2 “E haafatata mai, e te mau fenua, e faaroo mai; e haapao mai ia ˈu, e te mau taata e: ia faaroo mai te fenua, ma te î atoa ra; te ao atoa, e tei tupu atoa i reira. Te vai nei hoi te riri o Iehova i nia i te mau fenua atoa, e to ˈna ooo tei nia i to ratou atoa ra mau nuu; ua faataahia ratou e ana, ua horoahia ratou no te pohe. E to ratou i pohe ra, e faarue-noa-hia ïa; e pee te hauˈa ino i nia i to ratou mau tino, e horohia te mouˈa i to ratou toto. E mou paatoa to te raˈi atoa ra; e otarohia te raˈi mai te parau e otarohia ra: e mairi to ratou atoa ra, mai te rau vine ia oriorio ra, e mai te suke ai ore no nia i te suke ra.” (Isaia 34:1-4). E parau tohu riaria mau teie!
3. a) Te titauhia ra te mau nunaa ia faaroo i te aha, e no te aha Iehova e nehenehe ai ma te tia mau e horoa ˈtu na ratou i taua faaueraa nei? b) Na te aha e faaite ra e aita te mau nunaa i faaroo?
3 E manaˈo to te Poiete i te ao taatoa nei no te mau nunaa i teie mahana. No reira hoi ratou e titauhia ˈi ia faaroo i te poroi a te Bibilia ta te Atua i faaite i roto i te ao taatoa nei mai te matahiti 1919 maira. E tia mau â ia ratou ia faaroo i te mea ta ˈna e parau atura ia ratou na roto i te arai o ta ˈna mau Ite. Te haapapu maira râ te mau ohipa i tupu e aita roa ˈtu ratou i na reira, e aita roa ˈtu hoi ta ˈna mau Ite i tâuˈahia na te mau nunaa tei maiti i te Hau amui maoti hoi i te Basileia i te raˈi ra i horoahia ˈtu i roto i te rima o te Tamaiti a te Atua i faateronohia, te ‘Tamaiti hui arii no te hau’ ra.
Te parau tohu a Isaia e haava ra ia Edoma
4, 5. a) O vai mau na te mau ati Edoma, e eaha te huru ta ˈna i faaohipa i nia ia Iseraela, to ratou nunaa maehaa? b) No reira, eaha te faaotiraa ta Iehova i faaoti i nia ia Edoma?
4 E hopoia taa ê mau tei nia i te hoê tuhaa itoito roa teie mahana i rotopu i te mau nunaa. Ua faahohoˈahia oia i te nunaa o Edoma tei faahitihia iho nei i roto i taua parau tohu ra. No roto mai te mau ati Edoma ia Esau tei hoo atu i to ˈna tiaraa matahiapo i to ˈna taeae maehaa ia Iakoba no “te pane e te pipi tunu”. Taua taime ra hoi to Esau mairiraahia te iˈoa ra ia Edoma, oia hoi te auraa “uteute”. (Genese 25:24-34.) I te mea hoi e tei nia aˈe o Iakoba ia ˈna maoti te tiaraa matahiapo faufaa mau ra hoi, ua riri roa aˈera o Esau i to ˈna taeae maehaa. Ua riro maira o Edoma ei enemi rahi no te nunaa tahito Iseraela aore ra o Iakoba, noa ˈtu â ïa e na maehaa taua na nunaa nei. No taua ino no ˈna ra i te nunaa o te Atua, ua roohia aˈera o Edoma i te riri tia mau o Iehova, te Atua o Iseraela, tei faaoti e ia haamou-roa-hia o Edoma e a muri noa ˈtu. Ua faaitehia taua faaotiraa a te Atua ra i roto i te Isaia na roto i teie mau parau:
5 “Ua taero tau ˈoˈe i nia i te raˈi; e inaha, e tae mai ïa i raro i nia ia Edoma; i nia i te feia i faataahia e au no te pohe. Ua fiu te ˈoˈe o Iehova i te toto; ua î i te toâhua: i te toto fanauˈa mamoe, e te puaaniho; i te toâhua i te taha aoao o te mamoe oni ra: e tusia hoi ta Iehova i Bozara [te oire rahi roa ˈˈe no Edoma], e te patiaraa puaa e rave rahi i te fenua ra i Edoma.” — Isaia 34:5, 6.
6. a) No te aha Iehova e nehenehe ai e parau e te faaohipa ra o ˈna i ta ˈna “ˈoˈe” i nia ia Edoma i roto i “te raˈi”? b) Afea râ te basileia o Iuda i te haruraahia na to Babulonia, e eaha te huru te ore hoi e au i te hoê taeae ta Edoma i faaite i nia i te nunaa o Iehova?
6 E î roa te fenua ra o Edoma, te nunaa taparahi taata, i to ˈna iho toto na roto i te arai o te ˈoˈe a Iehova. Tei nia o Edoma i te hoê vahi teitei (Ieremia 49:16). No reira, na roto i te tairiraa i taua fenua ra, ua nehenehe aˈera Iehova e parau e, e auraa parau, e te faaohipa ra oia i ta ˈna ˈoˈe no te haavaraa i roto “i te raˈi”. E nuu rahi ta Edoma e e hahaere na ta ˈna nuu na nia i te mouˈa teitei mai te mau raˈi ra, no te paruru i te fenua i te feia e haere noa mai e haru. E tano maitai atura ïa te nuu Edoma e parauhia ˈi “te nuu o te mau raˈi”. Aita râ hoi te nunaa puai o Edoma i haere mai i tauturu ia Iseraela, to ˈna nunaa maehaa, a haruhia ˈi oia na te mau nuu babulonia. Aita, ua oaoa roa râ Edoma i te iteraa e ua faatahurihia te basileia o Iuda e ua tae roa hoi oia i te faaitoito i te feia ia haere mai e haru ia ˈna (Salamo 137:7). Ua tae roa atoa hoi te ino o Edoma i te turai ia ˈna ia auau i te mau ati Iuda tei horo ê e a tuu atu ai ia ratou i roto i te rima o to ratou mau enemi (Obadia 10-14). Ua manaˈo aˈera atoa te mau ati Edoma e haru mai i te fenua Iseraela tei vai ano noa e ua faaino aˈera hoi ia Iehova. — Ezekiela 35:10-15.
7. Mea nafea to Iehova haavaraa mai i te ino o te nunaa o Edoma?
7 Ua tapo anei o Iehova, te Atua o Iseraela, i to ˈna mata i taua huru o te mau ati Edoma i to ˈna nunaa i maitihia? Aita; no reira oia i manaˈo ai e faatupu i “te mahana faaiteraa riri” e “te matahiti tahooraa” no te tahoo ia Edoma i to ˈna ino i ta ˈna faanahonahoraa i te fenua nei, oia hoi o Ziona. Te na ô ra te parau tohu e: “O te mahana faaiteraa riri hoi te reira na Iehova; te matahiti tahooraa [i mua i te aro o te ao taatoa nei] ïa no te tia ia Ziona.” — Isaia 34:8; Ezekiela 25:12-14.
8. a) Ua faaohipa Iehova ia vai no te faautua ia Edoma? b) Eaha ta te peropheta ra o Obadia i tohu mai no nia ia Edoma?
8 Tau taime i muri aˈe i te haamouraahia o Ierusalema, ua haamata aˈera Iehova i te faaohipa i ta ˈna tahooraa tia mau i nia i te mau ati Edoma na roto i te arai o te arii no Babulonia, o Nebukanesa (Ieremia 25:8, 15, 17, 21). A haere mai ai te mau nuu babulonia e aro ia Edoma, aita roa ˈtu te hoê noa ˈˈe mea i nehenehe e faaora i te mau ati Edoma. Ua iriti maira te mau nuu no Babulonia ia ratou mai roto mai i to ratou mau vahi teitei. E “matahiti tahooraa” mau â te reira no Edoma. Ua faaite mai Iehova i te reira i te na ôraa mai na roto i te arai o te tahi atu peropheta e: “No te taparahi e te rave faaherehere ore i to taeae ia Iakoba, e moe ïa oe i te haama, e tâpû-ê-hia oe e a muri noa ˈtu. (...) E mai ta oe i rave ra, e na reira-atoa-hia mai oe: e hoˈi ta oe i rave ra i nia i to oe iho upoo.” — Obadia 10, 15.
9. O vai te Edoma o to tatou nei tau, e no te aha?
9 Te faaite atoa maira taua mau parau nei i te huru o Iehova i nia i te Edoma o to tatou nei tau. O vai hoi ïa taua Edoma ra? E hiˈopoa anaˈe na: O vai, i teie senekele XX, tei faaino e tei hamani ino na mua i te mau tavini o Iehova? E ere anei o te amuiraa faaroo kerisetiano taiva na roto i te arai o ta ˈna mau upoo faatere haapaoraa teoteo? Oia mau. Ua faaô te amuiraa faaroo kerisetiano aore ra te tuhaa o te kerisetianoraa hape ia ˈna i roto i te mau ohipa o teie nei ao, mai te hoê mouˈa ra i te teitei. O te hoê tuhaa faufaa roa hoi te reira i roto i te faanahoraa a te amuiraa o te mau mea nei a te taata, e ua riro te mau haapaoraa ei tuhaa matamua no Babulonia rahi. Ua faaoti aˈera râ o Iehova i te “matahiti tahooraa” no te aro i te Edoma o to tatou nei tau no to ˈna haerea ino mau i nia i to ˈna nunaa, ta ˈna mau Ite.
Te hoê hopea mai tei itehia na e Edoma
10. Mea nafea te Isaia 34:9, 10 faataaraa mai i te hopea o Edoma, e e tano te parau tohu ia vai i teie nei mahana?
10 A hiˈopoa noa ai i te mau parau i muri iho a te parau tohu a Isaia, ia tapea na tatou i roto i to tatou feruriraa i te parau no te amuiraa faaroo kerisetiano i to tatou nei mau mahana: “E riro ta ˈna ra mau pape tahe ei tapau, e te repo e riro ei gopheri, e riro hoi to ˈna fenua ei tapau ura ra. E ore roa e tinaihia i te rui e te ao; e tia to ˈna au auahi i te peeraa i nia e a muri noa ˈtu.” (Isaia 34:9, 10). No te paura hoi te fenua Edoma e riro ai ta ˈna ra mau pape tahe ei tapau e te repo e riro ei gopheri, e e tuuhia ˈtu hoi te auahi i nia i taua mau mea nei. — Hiˈo Apokalupo 17:16.
11, 12. Ia au i te faataaraa o te parau tohu i horoahia mai i roto i te Isaia 34:10-15, e riro mai te fenua o Edoma ei aha e e vai noa o ˈna mai te reira te huru e hia maororaa?
11 Te na ô râ te parau tohu a Isaia e: “E tia oia i te vai-ano-noa raa i te mau ui atoa ra, e ore e haerehia e te taata e a muri noa ˈtu. O te kata râ e te kephoda te parai i reira, e te inesupha e te oreva te noho i o ˈna ra: e tatai oia i te leni pau na nia ia ˈna ra, e ua tuuhoi i te tapao o te ano i reira. E te feia rarahi i o ˈna ra, aore ïa, ia parau atu ratou ei tavana i nia ia ratou ra; e te hui arii i o ˈna ra, e riro ïa i te ore roa. E tupuhia to ˈna mau fare arii i te raau taratara; e te iriaeo e te tatararoa, i roto i to ˈna ra mau pare; e riro hoi oia ei parahiraa no te teni; e ei hezere no te mau tamahine o te ione ra. E rave rahi te mea taehae o te aru e te mea taehae o te motu e farerei i reira, e pii hoi te sairima i te hoa i reira; ei reira atoa te taehae o te rui e tau ai, noaa ihora to ˈna faaearaa i reira. Ei reira hoi te ophi oˈua e ofaa ˈi, a fanau ai i to ˈna huero; a ahi ai, a haaputu ai i to ˈna fanauˈa i raro aˈe i to ˈna maru; e riro atoa te mau die ra i te putuputu i reira; a tataipiti ai ratou atoa e ati noa ˈˈe.” — Isaia 34:10-15.
12 E riro mai o Edoma ei fenua “pau” ïa i te pae no to ˈna mau taata. E riro mai oia ei vahi moemoe, ei faaearaa no te mau puaa taehae, no te mau manu e te mau ophi. E vai noa mai taua huru paura ra “e a muri noa ˈtu” mai ta te irava 10 e haapapu ra. Eita to ˈna mau taata tahito e ora faahou. — Obadia 18.
13. Eaha tei tohuhia i roto i te “buka a Iehova” no nia i te amuiraa faaroo kerisetiano, e eaha mau na taua buka ra?
13 Auê ïa huru tupuraa ino mau e tiai maira i te Edoma o to tatou nei tau, oia hoi te amuiraa faaroo kerisetiano! Ua itehia oia mai te enemi rahi roa ˈˈe o te Atua ra o Iehova, ta ˈna hoi i hamani ino i te mau Ite. No reira to ˈna haamouraa e fatata roa maira na mua ˈˈe hoi ia Aramagedo i tohuhia ˈi roto i te “buka a Iehova”. (Isaia 34:16.) Taua “buka a Iehova” ra, o ta ˈna ïa buka i reira oia e titau atu ai i to ˈna mau enemi e tae noa ˈtu hoi te feia i hamani ino i to ˈna nunaa, i te hara ta ratou i rave. Te mea i papaihia i roto i te “buka a Iehova” no nia i te fenua Edoma i tahito ra, ua tupu ïa; o te haapapuraa te reira e e tupu mau â te parau tohu i nia i te amuiraa faaroo kerisetiano, te Edoma o to tatou nei tau.
14. Eaha ta te mau ati Edoma o to tatou nei tau i ore i farii, e eaha te hiˈoraa o te nunaa o Iehova ta ratou i ore i apee?
14 Te mau ati Edoma o to tatou nei tau, o “te amuiraa o te mau mea nei”, aita ïa ratou i farii ia Iehova ei Arii. Hau atu â, i te mea hoi e ua riro te amuiraa faaroo kerisetiano ei tuhaa faatere no Babulonia rahi, ua faautuahia ïa oia no te ite atu i to ˈna mau mauiui. Aita oia i auraro i te faaueraa a te Atua ia ‘haere mai i rapae’ ia Babulonia rahi (Apokalupo 18:4). Aita oia i pee i te hiˈoraa o te toea o te mau Iseraela i te pae varua e o te “feia rahi roa” o te mau “mamoe ê atu”.
15, 16. Eaha te oraraa a muri aˈe o te amuiraa faaroo kerisetiano, ia au i te Apokalupo pene 17 e 18 e te Isaia pene 34?
15 Mea poiri mau â te oraraa no a muri aˈe o Babulonia. Te faaitoito nei oia no te tamǎrû i to ˈna mau hoa politita ia ore ratou ia aro mai ia ˈna no te haamou roa ia ˈna, mea faufaa ore râ hoi ta ˈna mau tutavaraa.
16 Ia au i te mau pene 17 e 18 o te Apokalupo, e tuu te Atua Puai hope ra o Iehova i roto i to ratou mafatu ia haaputuputu i to ˈna mau nuu politita e faehau e a fariu tia ˈtu ai i nia ia Babulonia rahi e ta ˈna mau haapaoraa atoa e tae noa ˈtu hoi te amuiraa faaroo kerisetiano. I reira ïa te fenua nei e mâ roa ˈi i te kerisetianoraa hape. E iteahia te amuiraa faaroo kerisetiano i roto i te huru tupuraa riaria mau i vauvauhia mai i roto i te Isaia pene 34. Eita oia e itehia i reira i te taime te tamaˈi hopea “o te mahana rahi o te Atua Puai hope ra” e tupu ai i nia i te mau nunaa tei haru ia Babulonia rahi. E ore roa te Edoma no teie nei tau aore ra amuiraa faaroo kerisetiano i nia i te fenua nei, “e a muri noa ˈtu”.
[Uiraa haapiiraa]
[Hohoˈa i te api 122]
E roohia te amuiraa faaroo kerisetiano i te hoê haavaraa mai tei itehia no te mau ati Edoma, te mau tamarii a Esau, tei hoo atu i to ˈna tiaraa matahiapo no te hoê noa maa iti.
