Pene 17

Ia haamanaˈo na tatou ma te haapao maitai i te faanahonahoraa a Iehova

1. E tia ia tatou ia manaˈo i te tapea i to tatou haapao maitai no vai, e eaha ta te arii ra o Davida i parau no nia i teie tumu parau?

 I TEIE mahana, te parau-rahi-hia nei i te parau no te haapao maitai aore ra te oreraa e taiva i te fenua. Eaha ˈtura râ ïa no te oreraa e taiva i te Atua, tei Poiete i te fenua e nohohia nei e te mau nunaa tataitahi? Te faahiti ra anei te mau faatere e te mau nunaa o te ao nei i te reira? I tahito ra, teie ta te arii ra o Davida, tei riro ei taata haamori haapao maitai no te Poiete ra o Iehova i parau i taua Atua haapao maitai ra: “I te feia e aroha ra [e tapea i to ratou haapao maitai], e aroha atoa oe.” (Samuela 2, 22:26; Salamo 18:25). Te faaite maira anei taua mau parau nei i to outou huru i nia i te Atua?

2. Nafea tatou e ite ai e aita o Iehova i taiva i te fetii taata nei?

² I te paeau rahi, aita roa ˈtu te mau taata o to tatou nei tau e tapitapi nei ia taiva ratou aore ra eita i te Atua. Aita râ hoi te reira e tapea ia Iehova ia haapao maitai i te fetii taata nei. Aita hoi oia i faarue ia ˈna. Te parau atoa ra ta ˈna Tamaiti, tei ore atoa i taiva e: “I aroha mai te Atua i to te ao, e ua tae roa i te horoa mai i ta ˈna Tamaiti fanau tahi, ia ore ia pohe te faaroo ia ˈna ra, ia roaa râ te ora mure ore.” (Ioane 3:16). Aita te Atua i faarue i te huitaata i roto i te rima o Satani, to ˈna enemi rahi roa aˈe, tei turai i to tatou na metua matamua ia taiva i te Atua. E, i te matahiti 2370 hou to tatou nei tau, ua faaite te Atua  i to ˈna haapao maitai i te fetii taata nei na roto i te faaoraraa mai ia Noa e to ˈna fetii mai roto mai i te diluvi rahi ra, tei tairi te toea o te huitaata nei (Petero 2, 2:5). No reira, ua horoa faahou maira te Poiete i te hoê niu apî no te fetii taata nei.

3. a) Eaha te nehenehe e parauhia no nia i te haavîraa puai i teie nei mahana, e eaha ta te Atua e faaau maira e e rave oia i roto i taua tuhaa ra? b) Eaha te haamaitairaa ta te oreraa e taiva ia Iehova e faatupu?

³ E rahi aˈe te haavîraa puai i teie mahana i te tau o Noa, tei ora na hau atu i te 4 000 matahiti i teie nei (Genese 6:11). Mea tano mau atura e ia faaore roa te Atua i te amuiraa o te mau mea taatoa nei. O ta ˈna ïa i faaau mai e e rave oia, na roto i te faaoraraa i to ˈna mau tavini haapao maitai i nia i te fenua nei. E rave oia mai ta te Salamo 37:28 e parau no ˈna i te na ôraa e: “E mea au hoi na Iehova te parau-tia, e ore hoi oia e faarue i tana feia moˈa ra.” Mai te mau mahana o Noa ra, e faatupu Iehova na roto i te parau-tia i te hoê amuiraa o te mau mea apî o ‘te mau raˈi apî e te hoê fenua apî’. (Petero 2, 3:13.) Mea rahi mau â te haamaitairaa ta te haapao maitai e faatupu, e horoa mai hoi oia i te ora!

4. Nafea tatou e ite ai e ua riro te nunaa Iseraela ei faanahonahoraa ite-mata-hia na Iehova i taua tau ra?

⁴ I raro aˈe i te faatereraa a te arii ra o Davida, aita te nunaa o Iseraela i taiva ia Iehova. Ua horoa hoi o Davida i te hiˈoraa i te nunaa taatoa. Ua riro te reira ei faanahonahoraa itehia na Iehova. E nunaa faanahonahohia hoi oia na ˈna iho. Ta te Amosa ïa 3:1, 2 e faahaamanaˈo maira i te na ôraa e: “E faaroo mai i teie nei parau i parauhia e Iehova ia outou, e te tamarii a Iseraela e, e no te fetii atoa ta ˈna i aratai mai mai te fenua ra i Aiphiti, na ô maira, Outou anaˈe ra ta ˈu i ite i te mau fetii atoa o te ao nei.” — Hiˈo Te mau Arii 1, 8:41-43.

5. a) I te mau mahana o te mau aposetolo a Iesu Mesia, ua tamatahia anei i te faaô mai i te hape i roto i te amuiraa kerisetiano? b) Ia au i te mau Papai, eaha te tia ia tupu mai i muri aˈe i te poheraa o te mau aposetolo?

 ⁵ Ia au maite i taua ohipa i tupu o te aamu bibilia ra, e nunaa faanahonahohia ta taua iho nei Atua ra o Iehova i nia i te fenua nei i teie mahana, te hoê faanahonahoraa ite-mata-hia. O ˈna iho hoi te fatu o taua faanahonahoraa ra, eiaha râ no te tahi atu faanahonahoraa. Teie râ, ua haa te tahi mau taata e ia ô mai te hape i roto i te faanahonahoraa a te Atua, i to ˈna atoa hoi haamataraa ra, i te tau o te mau aposetolo a Iesu Mesia, tei riro ei feia paruru itoito mau no te haapao maitai o te amuiraa kerisetiano (Korinetia 1, 15:12; Timoteo 2, 2:16-18). I muri aˈe i te poheraa o te aposetolo ra o Ioane, eita e ore e i muri iti noa aˈe i te matahiti 98 o to tatou nei tau, ua tupu aˈera te ohipa apotata i tohuhia mai. — Ohipa 20:30; Petero 2, 2:1, 3; Timoteo 1, 4:1.

6. a) Eaha te maororaa o te ohipa apotata, e eaha ïa te ohipa i tupu mai? b) Ua riro te mau haapaoraa o te amuiraa faaroo kerisetiano ei mau tîtî na vai, e eaha ˈtura ïa te mau uiraa ta te reira e faatupu mai?

⁶ Ua tupu noa taua ohipa apotata ra i roto i te roaraa hau atu i te 1 700 matahiti, e tae roa mai i te piti o te afaraa o te senekele e XIX. I taua taime ra, aitâ te amuiraa faaroo kerisetiano i amahamaha ˈtura i roto e rave rahi hanere mau pǔpǔ faaroo. Mea fifi mau atura hoi ia ite e o vai mau na te nunaa mau o te Atua. Mai ia Babela, e rave rahi mau haapaoraa iti aore ra rarahi a te amuiraa faaroo kerisetiano i reira hoi e anoi-noa-hia ˈi e rave rahi mau reo faaroo, tei ore roa ˈtu i niuhia i nia i te mau Papai faauruahia. Tei raro aˈe mau â taua mau haapaoraa ra i te faatîtîraa a te hoê faatereraa rahi roa ˈtu â i ta to Babulonia, tei haamou roa ia Ierusalema. Eaha mau na hoi te Babulonia tahito, e mai te aha ihora hoi te huru haerea o te mau ati Iuda haapao maitai i faatîtîhia?

 Te haamanaˈo ra te feia i faatîtîhia i Babulonia ia Ziona ma te haapao maitai

7. a) I te pae no te haapaoraa, ua riro te fenua o Babulonia tahito ei aha? b) Eaha hoi ta te reira i faatupu i nia i te mau ati iuda i vai tîtî na?

⁷ E basileia no te mau atua haavare i reira ta ratou mau idolo e pue noa ˈi, te Babulonia tahito (Daniela 5:4). E ere roa ˈtu ïa i te mea fifi na tatou ia feruri e eaha tei itehia na e te mau ati Iuda haapao maitai i roto roa i te hohonuraa o to ratou mafatu, ia ratou i ite i te haamoriraa e pûpûhia ˈtu na taua mau atua haavare ra, ratou hoi tei haamori noa te Atua hoê mau ra e tei ore roa ˈtu i rave i te mau hohoˈa. Maoti hoi i te mataitai atu i te hiero nehenehe mau ra o Iehova i Ierusalema, te ite ra ratou i te mau hiero o taua mau atua haavare ra e ta ratou mau idolo i roto ia Babulonia * taatoa. Auê hoi hohoˈa faufau mau no taua mau taata haamori i te Atua mau hoê ra e!

8. a) E tia i te mau ati Iuda ia faaoromai i to ratou vai-tîtî-raa e hia maororaa, e eaha ˈtura ïa te hinaaro puai o te mau ati Iuda haapao maitai? b) Mea nafea to te Salamo 137:1-4 faataaraa mai i te mauiui o te mau ati iuda haapao maitai e vai tîtî noa na?

⁸ Ia au i te parau tohu a Ieremia, e tiâ ia ratou ia faaoromai i te reira e 70 matahiti te maororaa hou ratou e hoˈi faahou atu ai i to ratou fenua (Paraleipomeno 2, 36:18-21; Ieremia 25:11, 12). Mai teie te huru to te Salamo 137:1-4 faataaraa mai i te mauiui i itehia na e te mau ati iuda i faatîtîhia, mea here hoi na ratou ia Iehova e o te hinaaro na e haamori ia ˈna i roto i te hoê hiero i pûpûhia no ˈna e tei patuhia i roto i te oire ta ˈna i maiti no ˈna: “I te hiti o te mau  pape i Babulonia ra to matou parahiraa i raro; e ua oto ihora matou i te manaˈoraa ia Ziona. I nia i te mau arobe, i rotopu ra, te faautaraahia ta matou mau kinura. I reira te feia i tîtî ai matou ra i te faaueraa mai i te himene; e te feia i riro mai ai matou tei ani i te arearea: na ô maira, A himene mai na i te hoê himene no Ziona. Eaha matou e tia ˈi ia himene i te himene a Iehova i te fenua ê nei?”

9. Ua riro te faarooraa ˈtu i te himeneraahia “te himene a Iehova” ei ravea ia aha to Babulonia, eaha râ te ohipa e tupu mai ia hope na matahiti e 70?

⁹ E tia hoi “te himene a Iehova” ia riro ei himene na te hoê nunaa tiamâ, e haamori ra i te Atua i roto i to ˈna hiero moˈa. No taua mau taata tiai babulonia ra, ia faaroo ratou i te mau ati Iuda ia himene i “te himene a Iehova” i roto i te fenua tei reira ratou i te faatîtîraahia, ua riro ïa te reira ei ravea no te faaooo i te iˈoa o Iehova, no te tuu-roa-raa ia ˈna i nia i te faito o te hoê atua haihai aˈe i te mau atua no Babulonia. Ua faahaama-ê-na-hia taua iˈoa moˈa ra a faatia ˈi Iehova i to ˈna nunaa ia tiahihia i rapae i te fenua o ta ˈna i horoa ˈtu no ˈna, ia hopoihia ˈtu i roto i te hoê fenua ua rau te huru atua i reira. E taotiahia râ te taime i vaiihohia na to Babulonia ia faaooo i te Atua e ia faaino i to ˈna iˈoa: e 70 matahiti anaˈe. I muri aˈe i taua otia ra, e hope ïa te tau o te mau atua haavare no Babulonia e e hoˈi mai â te hanahana atoa i nia i te Atua mau ra o Iehova.

Te hoê here haavare ore no te faanahonahoraa a Iehova

10. Eaha te uiraa e uihia no nia i te nunaa a Iehova o te senekele e piti ahuru tei hopoi-tîtî-hia e Babulonia Rahi?

¹⁰ I teie mahana, te vai nei te hoê faanahonahoraa faaroo e parauhia o Babulonia Rahi teie e faatere nei eiaha noa te tuhaa fenua o Babulonia tahito, o te ao taatoa nei râ. Oia hoi, ua riro anei te huru o te mafatu o te mau ati Iuda i vai tîtî na i Babulonia ei hiˈoraa  maitai no te nunaa o Iehova o te senekele e piti ahuru, tei hopoi-tîtî-hia hoi ma te faahepo e Babulonia Rahi, inaha, na te Atua o te Iseraela tahito iho hoi i na reira ei aˈoraa i to ˈna nunaa?

11. a) Ua tumâ anei te mau ati Iuda haapao maitai i roto i to ratou feruriraa i te fenua no reira mai ratou? b) Mea nafea to te hoê papai salamo tei faatîtîhia i te faaiteraa mai i te mau manaˈo hohonu o to ˈna mau hoa tei faatîtî-atoa-hia?

¹¹ I te mea hoi e to ratou hopoi-tîtî-raahia hoê ui te maororaa, e nehenehe iho â ïa ta te mau ati Iuda e parahi tamau roa ˈtu i Babulonia; tera râ, ua tupu mau anei mai te reira te huru e ua tumâ roa anei ratou mai roto i to ratou feruriraa i to ratou aiˈa? Na roto i teie mau parau putapû mau to te hoê papai salamo i faatîtîhia, faaiteraa mai i te mau manaˈo hohonu o to ˈna mau hoa i faatîtî-atoa-hia, i te na ôraa mai e: “E Ierusalema, ia moe oe ia ˈu ra ia moe atoa i tau rima atau nei to ˈna toroa. Ia piri tau arero i tau vaha nei, ia ore au ia manaˈo ia oe: ia ore au ia faateitei ia Ierusalema ei mea oaoa rahi na ˈu.” — Salamo 137:5, 6.

12. Te faaite ra te huru o te mafatu o taua papai salamo i faatîtîhia i tei hea manaˈo hohonu?

¹² Eaha hoi te manaˈo hohonu ta taua huru o te mafatu o te iseraela i tapeahia ei tîtî e faaite mau ra? Te oreraa ïa e taiva i te faanahonahoraa ite-mata-hia a Iehova o taua tau ra, a ite noa ˈi oia i te fenua i horoahia mai e te Atua na to ˈna nunaa i maitihia ia vai ano noa e 70 matahiti te maororaa. Oia mau, te tamau noa râ te faanahonahoraa ite-mata-hia a Iehova i te ora i roto i te mafatu o taua mau ati Iseraela ra.

13. Mea nafea te oreraa e taiva i te faanahonahoraa ite-mata-hia a Iehova i te haamaitairaahia?

¹³ Ua haamauruuruhia taua huru haapao maitai ra e faaitehia no te faanahonahoraa tahito ite-mata-hia a te Atua ma te tia mau. Ua tupu te reira, a faatahurihia ˈi o Babulonia, te Toru o te Puai i roto i te ao taatoa nei i roto i te aamu bibilia, e a faatupu ai to  Medai e to Peresia, te Maha o te Puai i roto i te ao taatoa nei, i te hinaaro o te Atua o Iseraela. Nafea hoi te reira? Na roto ïa i te faahoˈi-faahou-raa i te mau ati Iuda i hopoi-tîtî-hia, i te fenua o te faanahonahoraa ite-mata-hia a Iehova ma te hopoia ra oia hoi te patu-faahou-raa te hiero o to ratou Atua, te pu iho o Ierusalema, oia hoi te oire pu (Paraleipomeno 2, 36:22, 23). Aita noa ratou i faatia faahou i te hiero o te haamoriraa mau, ua faatia atoa râ ratou i te oire o Ierusalema i haaatihia e te patu, ia riro mai oia ei oire i reira Iehova e faatere ai ei Arii i nia i to ˈna nunaa.

14. a) Tau senekele i muri aˈe, eaha ta te Mesia i parau no nia i te faanahonahoraa ite-mata-hia a Iehova? b) I roto i tei hea auraa to Iehova faatereraa mai Ierusalema mai â?

¹⁴ Hau atu i te ono senekele i muri aˈe o Ierusalema i haamouhia ˈi, teie ta Iesu i parau: “Eiaha roa e tǎpǔ; eiaha i te raˈi ra, o to te Atua ïa terono; eiaha atoa i te fenua, o to ˈna ïa taahiraa avae; eiaha i Ierusalema, o te oire ïa o te Arii rahi.” (Mataio 5:34, 35). A parahi mai ai te Mesia i te fenua nei, te vai ra i Ierusalema te hoê hiero i faatia-faahou-hia e tei pûpûhia na Iehova, e ei auraa parau, te faatere ra te Atua ra o Iehova i roto i te vahi Moˈa Roa o taua hiero ra. No reira, mai Ierusalema maira, te oire pu o to ˈna nunaa, te faatere noa ra o Iehova i nia i ta ˈna faanahonahoraa ite-mata-hia.

Aita o Iehova i taiva i ta ˈna faanahonahoraa

15. I to Iesu faahaparaa i te mau upoo faatere haapaoraa taiva o Iseraela, ua patoi anei oia i te tuhaa itehia o te faanahonahoraa a Iehova? A tatara mai i ta outou pahonoraa.

¹⁵ Ia Iesu râ hoi i faahapa i te mau upoo faatere haapaoraa taiva o Iseraela, te faarue ra anei oia i te faanahonahoraa ite-mata-hia a te Atua? E, inaha teie ta ˈna e parau ra: “A tae hoi oe, e Ierusalema e, e Ierusalema! o tei taparahi i te mau peropheta, e te pehi hoi i te ofai i te feia i tonohia ˈtu ia oe na e, e rave rahi to ˈu haaputuraa i to tamarii, mai te moa e  haaputu i to ˈna fanauˈa i raro aˈe i to ˈna pererau ra; aita râ i tia ia outou. Ei teie nei, to outou utuafare e tuuhia ˈi i te ano.” (Mataio 23:37, 38). Ia ˈna i faarue ia Ierusalema e ta ˈna mau “tamarii”, te vaiiho noa ra anei ïa o Iesu i to ˈna Metua i te raˈi ra ma te faanahonahoraa ore i nia i te fenua nei? Aita, no te mea o ˈna te niu o te faanahonahoraa apî ite-mata-hia ta te Poiete o teie nei ao e patu.

16. Mea nafea te faarueraahia te Iseraela i te pae tino nei i te haapapuraahia mai i te taime o Iesu e pohe ai i nia i te pou haamauiuiraa?

¹⁶ Ma te feaa ore ua papu-maitai-hia e ua faaruehia te Iseraela i te tino nei, i te poheraa o Iesu i nia i te pou haamauiuiraa, a mutu ai te paruru meumeu e faataa ê ra te vahi Moˈa Roa i te vahi Moˈa i roto i te hiero o Ierusalema, “mai nia mai â e raro roa”. I taua iho taime ra, “ua aueue ihora te fenua, e amahamaha ihora te mato”. E mau ohipa puai mau te reira i ravehia e te Atua tei faatere mau i taua vahi ra, e te faaite maira taua mau semeio ra e ua faarue oia i te nunaa o Iseraela e ta ˈna haapaoraa. — Mataio 27:51.

17. Mea nafea to Iehova e to Iesu faaiteraa i to raua haapao maitai i nia i te mau melo no a muri aˈe o te faanahonahoraa apî itehia a te Atua?

¹⁷ Ua vaiiho-noa-hia râ te mau melo e ô mai i roto i te faanahonahoraa ite-mata-hia ta te Atua ra o Iehova e patu a muri aˈe, i Ierusalema. Ua tuu atura hoi Iesu ia ratou i mua i te aro o te Atua, tei faarue i te oire i te fenua nei no te tahi mea maitai aˈe (Ioane 17:9-15). Inaha i to ˈna na reiraraa, ua tapea Iehova i to ˈna haapao maitai no ta ˈna faanahonahoraa, ma te faaite mai i te hoê aupuru taa ê no to ratou mau tupuna o Aberahama, Isaaka, Iakoba e na tamaiti hoê ahuru a Iakoba (Daniela 12:1). I roto i te pene i mua nei, e tamau â ïa tatou i ta tatou tuatapaparaa i nia i te tumu parau no te haapao maitai aore ra te oreraa e taiva, ma te tauturuhia mai e te Salamo 137.

[Nota i raro i te api]

[Uiraa haapiiraa]