Pene 2

Te ‘Tamaiti hui arii no te hau’ i mua ia Aramagedo

1, 2. a) Eaha te mau parau faahiahia mau ta te Atua i faaurua ˈtu i te peropheta ra ia Isaia? b) Afea ra te reira i te haamataraa i te tupu?

 I TE senekele vau hou to tatou nei tau, teie ta te peropheta ra o Isaia i parau ma te faauruahia, i te nunaa o te Atua: “Ua fanau mai hoi te hoê tama na tatou, ua horoahia mai te hoê tamaiti na tatou; ei nia i to ˈna ra tapono te hau vai ai: e mairihia to ˈna iˈoa, ia Hau ê, e Aˈo, te Atua puai, te Metua no te ui a muri atu, te Arii no te hau. E te tupuraa o to ˈna mana i te rahi e to ˈna hau, aore ïa e hopea; e mana hoi oia i nia i te terono o Davida, e i nia i to ˈna ra basileia ei haamau e ei faaitoito i te reira, ma te parau au e te parau-tia i teie nei e a muri noa ˈtu.” — Isaia 9:6, 7.

² Ua haamata teie mau parau oaoa mau i te tupu i te piti o te afaraa o te matahiti 2 hou to tatou nei tau, a fanauhia mai ai o Iesu i roto i te opu fetii o te arii ra o Davida, tei faatere ei arii i roto i te oire no Ierusalema i nia i na opu hoê ahuru e ma piti o Iseraela.

Te hoê faufaa i faaauhia no te hoê basileia aita e hopearaa to te hau

3. a) Eaha te faufaa ta te Atua i faaau atu i te arii ra o Davida? b) Ua horoa mai o Iehova i te tiaraa ‘Tamaiti hui arii no te hau’ i teihea huaai a te arii ra o Davida?

³ Ua aratai aˈera te itoito o Davida no nia te  haamoriraa i te Atua o Iseraela ia Iehova ia faaau mai i te hoê faufaa e o ˈna no te hoê basileia mure ore, no to ˈna mau mono hui arii (Samuela 2, 7:1-16). Ua turuhia mai taua faufaa ra e te hoê euhe (Salamo 132:11, 12). No nia i taua parau tǎpǔ ra i faaauhia, e tia ˈtura ïa i te basileia o Davida ia haamau i te niu o te Basileia no a muri aˈe, te basileia o te ‘Tamaiti hui arii no te hau’; “Iesu Mesia, e tamaiti na Davida”, ta Iehova i horoa ˈtu i te tiaraa ‘Tamaiti hui arii no te hau’. — Mataio 1:1.

4. a) O vai te metua vahine o Iesu i nia i te fenua nei? b) Eaha ta te melahi o Gaberiela i parau atu ia ˈna no nia i taua tumu parau nei?

⁴ No roto mai te metua vahine o Iesu i te opu fetii hui arii o Davida. E paretenia hoi oia ia ˈna i fanau mai i te tamaiti i tǎpǔhia maira o te riro mai ei mono e faatere tamau atu i nia i te terono o Davida. Ua hapû hoi oia hou Iosepha i rave ai ia ˈna ei vahine na ˈna (Mataio 1:18-25). Ua faaite mai te melahi ra o Gaberiela i taua parau nei i te paretenia ra ia Maria i te na ôraa mai e: “E inaha, e tô oe, e fanau ta oe tamaiti, e na oe e mairi i te iˈoa ia Iesu. E rahi oia, e e parauhia i te Tamaiti na te Teitei: e na te Fatu ra na te Atua e horoa mai i te terono o to ˈna ra metua o Davida no ˈna: ei ia ˈna te hau i te fetii o Iakobo e a muri noa ˈtu; e e ore roa to ˈna basileia e mure.” — Luka 1:31-33.

5. Eaha ta Isaia i tohu no nia i te ‘Tamaiti hui arii no te hau’?

⁵ No reira te peropheta ra o Isaia i faahiti ai i teie parau tohu no nia i te ‘Tamaiti hui arii no te hau’ i te na ôraa e: “Ia rahi te mana i roto i te hoê hau aita e hopearaa i nia i te terono o Davida e i nia i to ˈna basileia.” (Isaia 9:5, 6, Bible de Jérusalem). No reira, ia au i te faufaa i faaauhia ia Davida, e Basileia mure ore ïa taua Basileia ra, i roto i te hoê hau aita  e hopearaa. E vai mai to ˈna terono “e a muri noa ˈtu”.

6. a) No te faatupu i te mau parau no nia i te faufaa i faaauhia no te Basileia, eaha ta te Atua i rave i te toruraa o te mahana i muri aˈe i te poheraa o Iesu? b) Afea ra to Iesu haamataraa i te faatere mai ei ‘Tamaiti hui arii no te hau’?

⁶ Ma te haapao i te faufaa i faaauhia no nia i te Basileia, ua faatia maira te Atua Puai Hope ra ia Iesu mai roto mai i te feia pohe, i te toruraa o te mahana i muri noa ˈˈe oia i hamani-ino-hia ˈi. I te ahuru ma onoraa o te mahana o te avae ati iuda no Nisana o te matahiti 33 o to tatou nei tau. Ma te riro ei ite no te tia-faahou-raa mai te Tamaiti a te Atua, te na ô ra te aposetolo Petero no nia ia Iesu e “i pohe na hoi (...) oia i te tino ra, i faaorahia râ [ei varua]”. (Petero 1, 3:18.) Ua haaparahi aˈera te Atua Teitei ra ia ˈna i to ˈna pae atau. I reira, ia hope te mau tau o te mau Etene aore ra “tau haapaohia no te mau [nunaa]”, i te omuaraa o te avae atopa o te matahiti 1914, ua faatere maira oia ma te tiaraa ‘Tamaiti hui arii no te hau’. — Luka 21:24.

7. a) Ua faaruru atu ïa o Iesu i te aha i te omuaraa o ta ˈna faatereraa? b) O vai teie e faaite nei i te mana arii o Iesu i te mau nunaa atoa, e ia au i teihea parau tohu?

⁷ I te omuaraa ra iho â o ta ˈna faatereraa i nia i te raˈi, ua faaruru aˈera hoi oia i te hoê ao ino, mai na tamaˈi rahi toopiti i faatupuhia no te haru i te faatereraa o te ao nei, e faaite maira. Te aro ra oia i teie nei i te mau Hau amui. E maoti te pororaa o te parau apî maitai i roto i te ao atoa nei ta te mau Ite no Iehova e rave nei i roto hau atu i te 200 fenua, tei mua ˈtura ïa ta ˈna faatereraa e ohipa ra i nia i te raˈi, i te aro o te mau nunaa atoa. O te tupuraa hoi te reira ta te ‘Tamaiti hui arii no te hau’ iho i tohu mai, ia au i te Mataio 24:14 e na ô ra e: “E e  parau-haere-hia te evanelia o te basileia nei e ati noa ˈˈe teie nei ao, ia ite te mau fenua atoa: o te hopea ihora ïa i reira ra.”

8. No te aha e nehenehe ai e parau e tei mua roa tatou i roto “[i te tau hopea o te amuiraa o te mau mea nei]”?

⁸ Fatata noa ïa te tumu parau no nia i te faatereraa o te ao nei i te faaotihia. Ua hope hau atu i te hitu ahuru matahiti mai te hoperaa o te mau “tau i haapaohia e te mau nunaa” i te matahiti 1914; tei mua roa ïa tatou i roto i te “hopearaa o te amuiraa o te mau mea nei”. Ua ite te ui no 1914 te mau ohipa matamua e auraa hoi to ratou, tei tohuhia e Iesu (Mataio 24:3-14) E ia au i te parau a Iesu, e ore teie nei ui e mou e hope ai teie nei mau mea atoa i te tupu. Fatata roa oia i te mou i teie mahana. — Mataio 24:34.

9, 10. a) Mea nafea te mau parau tohu no nia i te buka a te Apokalupo i te taeraa mai ia tatou nei? b) I roto i te Apokalupo 16:13, 14, 16, eaha te parau tohu e itehia no nia ia Aramagedo?

⁹ No reira, eaha ˈtura ïa te tupu mai i roto i te mau tau e fatata mai nei ia tatou, e eaha ta te ‘Tamaiti hui arii no te hau’ e faaruru atu? Ua faaite mai oia iho i roto i te buka hopea roa o te Bibilia, oia hoi te Apokalupo i te orama ta te Atua i horoa mai ia ˈna ra e ta ˈna i faaite atu i te aposetolo ruhiruhia ra o Ioane, na roto i te arai o te hoê melahi (Apokalupo 1:1, 2). Ua tupu te reira i te hopearaa o te senekele matamua o to tatou nei tau. I roto i te Apokalupo 16:13, 14, 16, ua turai aˈera Iesu ia Ioane ia faahiti oia i te parau no nia ia Aramagedo mai teie te huru:

¹⁰ “Ua hiˈo atura hoi au i e tootoru varua faufau mai te rana ra i te purororaa mai, mai roto mai i te vaha o te teni, e mai roto mai i te vaha o te puaa, e mai roto mai i te vaha o te peropheta tei haavare ra. E varua demoni ratou, o te haere i te hui arii o te  fenua nei e o te ao atoa nei, ma te rave i te tapao ra, e haaputu ia ratou i te tamaˈi i taua mahana rahi o te Atua Puai hope ra. Ua haaputuputu ihora ratou i te hoê vahi, o Aramagedo te iˈoa i te parau hebera ra.”

Te “mouˈa [taipe] o Megido”

11. a) Eaha te auraa te parau ra Aramagedo, e ua itehia anei te hoê vahi o Aramagedo te iˈoa? b) No te aha te oire tahito ra o Megido e riro ai ei mea faufaa roa i roto i te aamu? c) Eaha na auraa e piti o te parau ra Aramagedo?

¹¹ Te auraa o te parau hebera ra Aramagedo “mouˈa ïa no Megido”. Aita ˈtu vahi i te tau tahito aore ra i to tatou nei tau tei piihia aˈenei “mouˈa no Megido”. No reira, i roto i te buka a te Apokalupo i reira hoi e itehia ˈi e rave rahi mau taipe, e faahohoˈaraa ïa to taua parau ra. Eaha ïa taua faahohoˈaraa ra? Inaha, te oire teitei ra o Megido, oia hoi te auraa “haaputuputuraa o te mau nuu”, e mea faufaa roa to ˈna iˈoa i te pae no te aamu. I te pae no te aamu taata nei e i roto atoa i te Bibilia, e faahaamanaˈo mai taua iˈoa ra i te mau aroraa hopea. Oia mau, tei nia ê teie oire i te hoê eˈa e aratai tia ˈtu i Europa, Asia e Afirita; mai reira mai, e ohie roa ïa te mau taata i te aro e i te tapea i te feia e aro mai ia ratou. No reira, ua riro maira o Megido, no te tahi pae, ei pauraa rahi mau, e no te tahi pae ra, ei upootiaraa faahiahia mau.

12, 13. a) Mea nafea te Atua o te Bibilia i te ôraa ˈtu i Megido e i to ˈna anavai pape i te tau o te tavana ra o Baraka? b) Mea nafea te mau parau a te himene upootiaraa a Baraka raua o Debora i te faataaraa mai i te tiaraa o te Atua i roto i te upootiaraa?

¹² Ua amui atoa mai te Atua o te Bibilia i Megido e i Kisona, anavai pape fatata roa i te tau o te mau tavana iseraela. I te tau o te tavana ra o Baraka e o te vahine autahuˈa ra o Debora, ua horoa maira te  Atua i pihai iho ia Megido, i te hoê rê faufaa mau na to ˈna nunaa maitihia ra. 10 000 anaˈe hoi taata to te tavana ra o Baraka, area te nuu o Sisera ra, taa ê atu i te rahiraa faehau, e 900 ïa ta ˈna mau pereoo tamaˈi hutihia na te mau puaahorofenua. Ua ohipa maira Iehova i roto i te aroraa ei paruru i to ˈna nunaa na roto i te faatupuraa mai i te hoê pape pue o tei tapea roa i te mau pereoo tamaˈi enemi. Te faahanahana ra te himene no nia i te upootiaraa ta Baraka raua o Debora i himene no Iehova i muri aˈe i te pauraa o Sisera na roto i te hoê semeio, i te ohipa ta te Atua i faatupu i taua taime ra:

¹³ “Ua maraa maira te hui arii, ua aro maira; ua aro mai te hui arii o Kanaana i Tanaka, i te pae o te pape ra o Megido: e aore roa te hoê maa ario iti i riro ia ratou. I na te raˈi mai te mau fetia i te aro, ua aro ïa ia Sisera i to ratou haerea. Na te pape ra na Kisona ratou i rave e pau atura i taua pape tahito ra, te pape ra o Kisona.” — Te mau Tavana 5:12, 19-21.

14. Mea nafea te mau parau hopea o taua himene upootiaraa ra i faauruahia e riro ai ei pure e tano maitai i te tamaˈi Aramagedo i mua ia tatou nei?

¹⁴ Aita e feaaraa e te mau parau hopea faauruahia e te Atua e tei himenehia e Baraka raua o Debora e pure ïa no te faahanahana i te rê i noaa mai i Megido e o tei faahohoˈahia i te tamaˈi Aramagedo i mua ia tatou nei. Teie hoi taua mau parau ra: “Ia na reira atoa te mau enemi atoa no oe i te pohe, e Iehova e: area te feia i hinaaro ia ˈna ra, ia riro ïa ratou, mai te mahana ia hiti mai to ˈna anaana rahi ra!” — Te mau Tavana 5:31 *.

 Ua haaputuputuhia te mau nunaa i Aramagedo

15. a) Eaha hoi taua vahi ra o Aramagedo? b) Eaha te hoê o te mau pû haapurororaa parau viivii teie e tapea nei i te mau nunaa no te tamaˈi Aramagedo?

¹⁵ Ia haamanaˈo na tatou e e vahi no te mau aroraa hopea o Megido. Ma te tano maitai, e tia mau iho â ïa o Aramagedo ia riro ei tahua aroraa i reira te mau nunaa o te ao nei e haere ai ma te turuhia e te mau puai i faaitehia i roto i te Apokalupo 16:13, 14. Te mau “parau faauruahia na te mau demoni” teie e tapea nei i te mau nunaa o te hoê ïa haapurororaa parau viivii, i te mea hoi e ua faaauhia ratou i te mau rana, mau animala viivii hoi i roto i te Bibilia. Te hoê o te mau tumu e na reira mai ai taua haapurororaa parau viivii ra o te “teni rahi ïa”. Te faaite maira te Apokalupo 12:1-9 e “taua teni” ra o te Diabolo ra ïa o Satani.

16. Te faahohoˈa ra te “puaa” o te Apokalupo 16:13 i te aha?

¹⁶ Ua riro atoa “Te puaa” ei pû no te mau haapurororaa parau viivii. I roto i te Apokalupo 16:13, ua tahoê taua “puaa” taipe ra i te “teni” diabolo ra. E ia au i te Apokalupo 20:10, e haamou-roa-hia taua “puaa” ra i te mea hoi e ua tahoê atu oia i te “teni” taipe ra. “Te puaa” e parauhia ra i ô nei o te faanahoraa politita ïa o te ao atoa nei e o “te teni” hoi te atua (Korinetia 2, 4:4). Taua faanahoraa ra o te mau huru faatereraa taa ê atoa ïa o te ao nei. — Hiˈo Daniela 7:17; 8:20, 22.

17. Eaha ta te haapurororaa parau, mai te rana ra te huru, ravehia na te “puaa” e faatupu nei?

¹⁷ Te aratai nei taua faanahoraa politita o te ao nei i te hoê haapurororaa parau e tano no ˈna iho. Taua haapurororaa parau i faaauhia i te taˈi a te mau rana, e parau faauruahia ïa e tahoê mai i te parau  faauruahia a te “teni” no te haaputuputu i te mau “arii” aore ra raatira politita o te ao nei no “te tamaˈi o te mahana rahi ra o te Atua Puai hope”, o te tupu i Aramagedo.

18. a) Eaha te auraa te parau ra Aramagedo? b) Ua riro te hoê mouˈa ei taipe no te aha?

¹⁸ Ua riro atura ïa o Aramagedo ei aroraa i roto i te ao taatoa nei e aratai atu i te hoê tamaˈi hopea. Oia hoi, e tae te huru tupuraa i roto i te ao taatoa nei i nia i to ˈna faito teitei roa ˈˈe e e tahoê maite mai te mau faatere atoa o te ao nei no te aro i te hinaaro o te Atua, e e riro hoi te Atua i te aro atoa mai, ia au i ta ˈna opuaraa. Tei taua aroraa hopea ra ïa te oraraa no a muri aˈe. I Megido iho, aita e mouˈa i reira. Te faahohoˈa ra râ te hoê mouˈa i te hoê vahi haaputuputuraa teitei, ite-maitai-hia na te atea mai e te mau nuu faehau e haaputuputu mai i reira.

19, 20. Eaha te opuaraa a te Tenerara o te mau nuu i te raˈi ra a Iehova, i Aramagedo, e eaha ihora ïa te faahopearaa?

¹⁹ Te hiˈo noa maira o Iesu Mesia, te Tenerara o te mau nuu a Iehova, a hia ˈtura matahiti i teie nei i te haaputuputuraa o te mau raatira o te ao nei e ta ratou mau nuu no Aramagedo. Teie râ, aita oia i rave e ia purara ê taua mau arii ra e a tairi atu ai ia ratou te tahi i muri aˈe i te tahi e a tairi mǎrû noa ˈtu ai te mau puai enemi. Aita, ua horoa ˈtura oia i te taime navai maitai no te haaputuputu ia ratou e no te tahoê i ta ratou mau nuu ia nehenehe ratou ia riro ei nuu rahi roa ˈˈe e te puai roa ˈˈe. Mea faahiahia mau â ta ˈna opuaraa: oia hoi te aroraa ˈtu ia ratou hoê â aroraa.

²⁰ E riro mau ta ˈna upootiaraa ei faahanahanaraa i to ˈna Tomana rahi, te Atua ra o Iehova, e e haapapu mau â oia e o ˈna te “Arii o te mau arii, e te Fatu o te mau fatu ra”. — Apokalupo 19:16.

[Nota i raro i te api]

[Uiraa haapiiraa]