Pene 7

Te faaafaro nei te Mesia i te mau ohipa e ta ˈna mau tavini

1. Eaha te faatereraa aita to ˈna e fifi i te pae faanavairaa faufaa, o vai hoi te tia i teie nei ia faaite atu i taua faatereraa ra e eaha ta ˈna ohipa i rave?

 TEI roto te mau faatereraa atoa i te fifi i te pae no te faanavairaa faufaa, mea rahi hoi ta te tahi pae e tarahu, te hoê anaˈe râ faatereraa aita to ˈna e fifi. Taua faatereraa taa ê mau ra o te “basileia o te ao [te mau raˈi]” ïa teie e faaitehia nei i teie mahana i roto i te ao taatoa nei (Mataio 25:1). Te ora nei â te mau melo e faatere atu i roto i taua Basileia i te raˈi ra i nia i te fenua nei e te tavini nei ratou i taua faatereraa ra. I roto i teie tau fifi roa ˈˈe o te aamu taata nei, e tia i taua mau tavini ra ia faaite atu i taua faatereraa nei e eaha ta ratou ohipa i rave i te mau taoˈa i horoahia mai ia ratou ra.

2. E tia ia tatou ia anaanatae taa ê i tei hea parabole a te ‘Tamaiti hui arii no te hau’?

² Ua faataa mai te tia rahi roa ˈˈe o taua “basileia o te ao [o te mau raˈi ra]” i taua ohipa ra na roto i te hoê parabole. E riro te reira ei mea faufaa no tatou, inaha, ua tuu mai hoi te ‘Tamaiti hui arii no te hau’ i roto i ta ˈna parau tohu e tupu a muri aˈe, no nia i te “tapao” e faaite mai e to roto oia i te Basileia, ia haamanahia oia i te mana arii (Mataio 24:3). I teie mahana, eita roa ˈtu hoi tatou e nehenehe e ape i te mau faahopearaa o te tupuraa o teie nei parabole no nia i te mau ohipa e tupu a muri  aˈe, i te mea hoi e to tatou oraraa taatoa, aore ra to tatou iho ora o te ati atu i te reira. Mai teie atura ïa te huru to te ‘Tamaiti hui arii no te hau’ horoaraa ˈtu taua parabole nei i ta ˈna mau aposetolo tau mahana noa hou to ˈna poheraa ei tusia i nia i te pou haamauiuiraa.

Te parabole o te mau taleni

3. Mea nafea to te mau tavini tei horoahia mai te mau taleni a te fatu hou oia e reva ˈtu ai, i te faaohiparaa i te reira i te taime aita o ˈna i reira?

³ “E teie nei, e ara, aore hoi outou i ite i te mahana e te hora atoa e tae mai ai te Tamaiti a te taata. E au hoi te Tamaiti a te taata nei i te hoê taata i opua i to ˈna tere, e ua parau atura i to ˈna iho mau tavini, tuu atura i ta ˈna taoˈa ia ratou. Tuu atura oia i ta te tahi, e pae ïa taleni *, e piti ta te tahi, hoê ta te tahi; i tei au atoa i taua na taata ra; reva ˈtura i to ˈna tere. Haere atura tei rave i na taleni e pae ra, hoo haere atura i taua na taleni ra, e noaa maira na taleni ê e pae. Mai te reira atoa tei rave i na taleni e piti ra, e noaa maira na taleni ê e piti. Area tei rave i te hoê ra, haere atura ïa, heru atura i te repo, huna ihora i te moni a to ˈna fatu.

4. Eaha ta te fatu i parau atu i te mau tavini tei faarahi i te mau taleni?

⁴ “E maoro aˈera, hoˈi maira te fatu o taua mau tavini ra, faaau maira i te parau ia ratou. Ua haere maira tei rave i na taleni e pae ra, hopoi atoa maira i na taleni ê e pae, na ô maira, E tau fatu, e pae a oe taleni i tuu mai ia ˈu; inaha, teie ïa, e na teleni ê hoi e pae i noaa ia ˈu nei. Ua na ô atura tana fatu ia ˈna, Ua tia roa, e teie nei tavini maitai e te haavare ore; o oe i haapao maitai i tena na taoˈa iti  haihai, e faatiaau atu vau ia oe i i nia iho i te mea rahi: e haere oe i roto i te oroa oaoaraa a to fatu. Ua haere atoa maira tei rave i na taleni e piti ra, na ô maira, E tau fatu, e piti a oe taleni i tuu mai ia ˈu; inaha, teie ïa, e na taleni ê hoi e piti i noaa ia ˈu nei. Ua na ô atura tana fatu ia ˈna, Ua tia roa, e teie nei tavini maitai e te haavare ore, ua haapao maitai oe i tena na taoˈa iti haihai, e faatiaau atu vau ia oe i nia iho i te mea rahi: e haere oe i roto i te oroa oaoaraa a to fatu.

5, 6. Eaha te otoheraa ta te toru o te tavini i faahiti i te mea hoi e ua tahuna o ˈna i te taleni, e ua nafea te fatu ia ˈna?

⁵ “Ua haere maira hoi tei rave i te taleni hoê ra, na ô maira, E tau fatu, ua ite au e e taata iriâ oe, e ere i ta oe i tanu ra e ooti â oe, e ere hoi i ta oe i ueue ra e haaputu â oe; mǎtaˈu aˈera vau haere atura, huna ihora vau i te taleni na oe i raro i te repo: inaha, i faahoˈi mai nei â vau i ta oe iho. Ua parau atura tana fatu ia ˈna, na ô atura, E teie nei tavini ino e te faatau, ua ite oe e e ere i ta ˈu i tanu ra e ooti â vau, e e ere i taˈu i ueue ra e haaputu â vau? Eiaha hoi oe e hopoi i tau moni i te hooraa ra, e ia tae mai au ra noaa ihora ta ˈu ma te hoo?

⁶ “A rave mai i ta ˈna taleni a hopoi atu ai i te taata auahuru a ˈna taleni ra. E taoˈa ta ˈna ra, e horoahia ˈtu â ta ˈna e ia rahi; aita a ˈna ra, e hopoi-ê-hia ïa ta ˈna. E huri atu i taua tavini faufaa ore nei i roto i te pouri i rapaeau ra, tei reira te oto e te auauraa niho ra.” — Mataio 25:13-30.

7. Te faahohoˈa ra te mau taleni i te aha?

⁷ Te faahohoˈa ra ïa te mau taleni i te aha i roto i taua parabole nei? Te tahi taoˈa faufaa rahi ïa i te pae varua eiaha râ i te pae materia. E taipe te mau taleni no te parau mana e titau ra e haere e faariro  i te mau taata ei pǐpǐ na te Mesia. Te hoê tuhaa faufaa roa o taua parau mana ra, o te haamaitairaa faahiahia mau ra ïa oia hoi te riroraa ei vea na te Mesia, te Arii, i te tiaraa ˈtu no te Basileia i mua i te mau nunaa o te ao nei. — Ephesia 6:19, 20; Korinetia 2, 5:20.

8. a) Ua hurihia te pǔpǔ o te tavini “faatau” i teie anotau o te “hopea o te amuiraa o te mau mea nei” i roto i tei hea pouri? b) No te aha te huitaata nei i erehia ˈi i te maramarama o te here e te haamaitairaa a te Atua?

⁸ Ma te feaa ore, ua tae tatou i roto i te tuhaa hopea no te tupuraa o teie nei parabole no nia i te mau mea e tupu a muri aˈe. O te tau pouri roa ˈˈe o te taatoaraa o te aamu taata nei ta to tatou nei ui e ite nei. I te parau mau, e tano maitai te mau pouri e itehia ra i rapaeau mai i te tuhaa itehia e te mata taata nei o te faanahonahoraa a Iehova, i te pǔpǔ o te tavini “ino” e “te faatau” atoa hoi; e hurihia oia i reira ia au i te faaueraa a te fatu. Taua “pouri i rapaeau ra” o te pouri taotao roa ïa e haaati ra i te huitaata nei, i te pae faaroo iho â râ. Ua erehia te huitaata nei i te maramarama o te here e te haamaitairaa a te Atua. Ua erehia o ˈna i te maramarama o te ite no nia i te Basileia o te Atua. Tei raro aˈe oia i te mana o te “atua o teie nei ao” tei “[haapouri i te aau o te mau taata faaroo ore ra]” “ia ore te maramarama o te evanelia hanahana o te Mesia, o te hohoˈa o te Atua ra, ia anaana mai i roto ia ratou”. — Korinetia 2, 4:4.

9. a) Ei faatupuraa i te parabole, o vai tei faahohoˈahia i te “taata”, e ua aratai to ˈna tere ia ˈna i hea? b) Eaha te haapapuraa e faaite maira e ua hoˈi mai o ˈna?

⁹ I teie nei mahana, mea rahi roa te mau haapapuraa e faaite mai e te “taata” e vau taleni ario ta ˈna, ua hoˈi mai ïa mai to ˈna tere mai. Taua “taata”  ra o Iesu Mesia ïa. Ua aratai aˈera to ˈna tere i te fenua ê ia ˈna, i mua i te aro o tei Poiete i te mahana, i te avae e i te mau fetia o to tatou nei ao. No te tapao i to ˈna hoˈiraa mai, e piti tamaˈi rahi, apeehia mai i muri iho e te tahi mau tamaˈi rii, tei haamanii i te toto i nia i te fenua nei. Mai tei tohuhia mai, e apeehia mai taua mau ati ra e te oˈe, te maˈi e te mau aueueraa fenua, te rahi te ino i te tupuraa e te pororaa i te “evanelia o te basileia nei” e ati noa ˈˈe te fenua atoa nei. Tera te mau tuhaa taa ê no te mau mea ta Iesu i parau e “te tapao no [to ˈna] taeraa [e faaite mai e tei reira o ˈna] mai e te hopea o teie nei ao [amuiraa o te mau mea nei]”. — Mataio 24:3-15.

10. a) No te aha te “taata” i tere ai i te fenua ê? b) No te aha te huitaata nei i ore mau ai i ite i to ˈna hoˈiraa mai?

¹⁰ Noa ˈtu â ïa e aita te parabole e haapapu ra, te taata e tere ra i te fenua ěê no te hoê tau maoro, ua tere ïa oia ia horoahia mai i roto i to ˈna rima “te basileia o te ao [o te mau raˈi], i faahitihia i roto i te Mataio 25:1. Aita te Tamaˈi rahi Matamua i tapea i te Atua ra o Iehova, tei faatahurihia te mana arii i nia ia Iseraela i te matahiti 607 hou to tatou nei tau, ia faaarii i te Mono mau ra o te Basileia i te matahiti 1914 o to tatou nei tau tapaohia no te faahope i te tau taataahiraa a te mau nunaa. Parau mau, aita te mau nunaa etene i ite mata roa i te faaariiraahia te Taata ta Davida i parau e “to ˈu fatu”. (Salamo 110:1.) Aita hoi ratou i nehenehe e na reira, inaha, ua parau atu te taata o te parabole oia hoi o Iesu Mesia, i ta ˈna mau pǐpǐ hou oia e reva ˈtu ai e: “E ia roovau iti aˈe, e ore to te ao e hiˈo faahou mai ia ˈu.” — Ioane 14:19.

11. a) Eaha te hoê o te mau tuhaa o te tapao e haapapu mai e ua hoˈi mai te Mesia? b) Afea te reira e tupu ai?

 ¹¹ I te mea hoi e e horoahia ˈtu i te Mesia ra te mana arii i nia i te raˈi, ma te ite-ore-hia hoi e te mata taata nei, e tia atura ïa ia ˈna ia rave e ia itehia e ua tae mai oia i roto i taua Basileia ra na roto i te hoê tapao, te tapao i anihia ˈtu e te mau aposetolo e toru mahana na mua ˈˈe i to ˈna haamauiuiraahia. Te hoê o te mau tuhaa o taua tapao hopea ra oia ïa e hoˈi mai te taata mai to ˈna tere mai no te titau i ta ˈna mau tavini o te tia hoi ia haapao i ta ˈna mau taleni faufaa roa, eaha ta ratou ohipa i rave. E tupu taua ohipa ra i muri aˈe i te matahiti 1914.

12. a) O vai ma te tia ia haamata i te ohipa pororaa i te Basileia? b) Nafea ratou e ora roa ˈi?

¹² Te auraa ra, te aniraa ˈtu ïa oia i te feia aiˈa o te “basileia o te ao [te mau raˈi]”, oia hoi i te toea o te pǔpǔ kerisetiano i maitihia e te varua o te Atua mai te Penetekose atu o te matahiti 33 (Ohipa, pene 2). E toe mai â te hoê toea o taua mau kerisetiano ra i nia i te fenua nei i “te hopea o te amuiraa o te mau mea nei”, tei haamata i te matahiti 1914 ra. Na ratou atura hoi e haamata na mua i te faatupu i te parau tohu a Iesu i muri nei i te tau e parauhia ra: “E e parau-haere-hia te evanelia o te basileia nei e ati noa ˈˈe teie nei ao, ia ite te mau fenua atoa: o te hopea ihora ïa i reira ra.” (Mataio 24:14; Mareko 13:10). E tia ia ratou ia tapea i to ratou haapao maitai e tae noa ˈtu i te hopea e noaa mai ai ia ratou i te ora no te tomo atu i roto i te Basileia o te mau raˈi (Mataio 24:13). Ia ora roa ˈtu ratou, ua faaitoito maira te Atua Mana hope ia ratou ia nehenehe ratou ia mau maite e tae roa mai i teie nei mahana, noa ˈtu te hamani-ino-raa rahi e tupu i roto i te ao  taatoa nei. O te tapao papu maitai hoi te reira e ua fariihia mai ratou e a ˈna.

Te mau faahuaraa parau haavare no nia i te mau taleni

13. a) O vai teie e faahua nei e ua horoahia mai ia ˈna ra te mau taleni? b) Eaha ïa te haavaraa e nehenehe e tuu atu i nia ia ˈna?

¹³ Te faahua parau nei te amuiraa faaroo kerisetiano e ua horoahia mai ia ˈna ra te mau taleni a te taata taoˈa rahi o te parabole a Iesu. Inaha, ia hiˈohia ta ˈna mau ohipa i rave mai te matahiti 1914 mai, eaha hoi te haavaraa ta tatou e nehenehe e rave? Teie ïa: aita i taeahia ia ˈna ta ˈna mau faahuaraa parau. Ma te ore e tapea i to ˈna haapao maitai no te taata o te parabole ra, ua faaau aˈera hoi oia i te parau e te mau basileia o teie nei ao: te mau raatira o te mau faatereraa tei riro ei mau tane faaturi na ˈna. Te turu noa nei â o ˈna i te mau Hau amui, tei mono i te Totaiete o te mau Nunaa i hemo na.

14. Teihea roa te amuiraa faaroo kerisetiano i teie mahana?

¹⁴ Eita atoa hoi o ˈna te tavini tei horoahia ˈtu hoê anaˈe taleni e tei faahupehupe ma te ore e faahotu i te mau taoˈa a to ˈna fatu. No reira, i taua tau ra tei haamata i te taime hopea o te Tamaˈi rahi Matamua i te matahiti 1918, ua faaite-tahaa-roa-hia e tei roto noa te amuiraa faaroo kerisetiano i te pouri, i rapaeau i te fare turama-maitai-hia o te Fatu ra. I reira, i roto i te ao e vai ra i roto i te pouri taotao, te haamata-ê-na-raa, ei faahohoˈaraa, ta ˈna mau oto e ta ˈna mau auauraa niho. E rahi atu â to ˈna mauiui ia fariu tia mai ta ˈna mau tane faaturi politita i nia ia ˈna, ia tataratara i to ˈna ahu ei faaiteraa e o ˈna te tuhaa rahi roa ˈˈe no Babulonia Rahi, te mana faatere no te haapaoraa hape o te ao taatoa nei, te tia ia faahapahia.

 Ua hurihia ˈtu te pǔpǔ o te “tavini ino i rapaeau”

15. O vai ma tei faaauhia i te tavini faatau e teihea ratou i teie nei?

¹⁵ Te feia tei riro mau na ei melo no te toea faatavaihia i te varua e tei ia ratou ra te mau maitai o te Basileia, e tei faaea râ hoi i te faahotu i te mau faufaa a te Fatu tei hoˈi mai i teie nei, o ratou tei tiahihia e o te ore e tavini faahou nei i te Arii (Mataio 24:48-51). Aita te hoê noa ˈˈe taata e ite faahou ra i taua pǔpǔ o te “tavini ino ra e te faatau” ia poro i te “evanelia o te basileia” nei. Aita, te tapitapi rahi nei râ oia no to ˈna iho ora eiaha râ no te mau faufaa o te Basileia o te Atua. Tei roto oia i teie nei i “te pouri i rapaeau ra” e te huitaata nei. Ua hopoi-ê-hia ta ˈna taleni taipe e ua horoahia ˈtu na te pǔpǔ tei faaite e ua ineine mau oia i te faahotu i taua taleni ra i roto i te taime e toe ra o te “hopea o te amuiraa o te mau mea nei”.

16. a) Ua tano maitai teie tau no tei hea faaohiparaa i te mau taleni taipe? b) Eaha te titauhia ra i teie nei i te “feia rahi roa” o te mau “mamoe ê atu”?

¹⁶ Aita ˈtu hoi tau tano maitai, teie anaˈe no te poro i te “[parau apî maitai o te basileia]” na roto i te ravea o te “taleni”, oia hoi te haamaitairaa aore ra ravea hoê roa no te tavini ei “vea (...) na te Mesia”, te Arii e faatere ra, e ia haere e faariro i te mau taata ei pǐpǐ na ˈna (Korinetia 2, 5:20). E a fatata noa mai ai te hopea, te titauhia ra ïa i “te feia rahi roa” o te mau “mamoe ê atu” ia tauturu i te toea o taua mau vea i maitihia e te varua teie e faaohipa nei i taua “taleni” faufaa mau ra tei pûpûhia mai i roto i to ˈna rima, ma te itoito.

[Nota i raro i te api]

[Uiraa haapiiraa]

 [Hohoˈa api taatoa i te api 59]

Te feia i riro mai te tavini ino ra, e hurihia ïa ratou i roto i te pouri i rapaeau ra e eita hoi ratou e tavini faahou i te Fatu.