Te haamau-faahou-raahia te ǒ i Edene ra i nia i te fenua atoa nei
Pene 21
Te haamau-faahou-raahia te ǒ i Edene ra i nia i te fenua atoa nei
1. a) E haamau-faahou-hia te ǒ i Edene ra i roto i teihea auraa, e no te aha hoi oia e ore ai e itea ˈi i roto i te hoê noa tuhaa o te fenua nei? b) Eaha ta te mau parau ta Iesu i parau atu i te taata rave parau ino ra e faaite maira?
E “PARADAISO nehenehe mau” te ǒ i Edene ra. (Genese 2:8, Douay.) O taua paradaiso ra te haamau-faahou-hia. Te paradaiso matamua o te hoê anaˈe ïa tuhaa o te fenua nei. Te opuaraa râ a Iehova, ia parare roa ˈtu ïa to ˈna mau otia a rahi noa ˈtu ai te fetii taata nei, a riro noa ˈtu ai te fenua taatoa nei ei paradaiso nehenehe mau (Genese 1:26-28; 2:8, 9, 15). Ua horoa mai hoi te mau parau ta Iesu i faahiti atu i te taata rave parau ino ra i fariu tia mai hoi e tei pohe i pihai iho ia ˈna i te Calvaire, i te tiaturiraa e e faatiahia mai oia mai te pohe mai ia tae i te taime te Paradaiso e nahonaho maitai ai; i reira oia e ite atu ai i te mau tauiraa faahiahia mau i ravehia i nia i te fenua nei (Luka 23:43). Mai te aha ïa te huru te Paradaiso e haamau-faahou-hia i nia i te fenua nei? E taa ê oia i te ǒ i Edene matamua ra i roto i teihea tuhaa?
2. a) Eaha to roto i te ǒ i Edene ra o te ore roa e itea ˈtu i roto i te Paradaiso e haamauhia i roto i te ao taatoa nei? b) No te aha e riro ai ei manaˈo tano mau e e ore roa ˈtu te Atua e tamata mai i te faaroo o te huitaata nei na roto i te ravea o te tahi atu raau?
2 I roto i te mau parau tohu e faaite ra no nia i te mau mea faahiahia mau e tupu i mua nei, aita roa ˈtu hoê noa ˈˈe e faahiti ra no nia i te hoê “raau e ite ai i te maitai e te ino” e iteahia “i ropu i te ǒ nei” aore ra Paradaiso e haamau-faahou-hia i nia i te fenua nei (Genese 2:17; 3:3). Ma te papu maitai, e raau otahi mau taua raau ra. E mea tia anei ia manaˈo e i ropu i te ǒ i Edene ra e haamau-faahou-hia na nia i te fenua taatoa nei, e itea te hoê raau mai te reira te huru tei opanihia e te Atua? Papu maitai e aita roa ˈtu. A feruri na: e tia i te mau taata atoa o na poro e maha o te fenua nei ia tere i te hoê tere atea e tae roa ˈtu i te pae Hitia o te râ ma, no te amu i te hotu o taua raau nei ei faaiteraa i to ratou huru auraro ore i te Atua Teitei ra.
3. Eaha te ore atoa e itehia i roto i te Paradaiso e haamau-faahou-hia?
3 I roto i taua vahi ra, eita atoa e itehia i te hoê ophi e “paraparau” no te titau i te feia e haafatata ˈtu i taua raau ra no te rave mai i to ˈna mau hotu nehenehe mau, ei haapapuraa e eita roa ˈtu na ratou i te mea tâuˈa i te mau faaueraa a te Atua. Aita atoa hoi e varua ino itea-ore-hia o te faaohipa i te hoê ophi ta ˈna e haaparaparau, e a aratai atu ai i te mau taata atoa e faaroo mai ia ˈna, ia patoi atu i te Atua na roto i te oreraa e auraro ia ˈna, patoiraa o te riro hoi i te faatupu mai i te mau faahopearaa ino mau.
4. No te aha te Diabolo ra o Satani e ore ai e itea ˈtu i reira i roto i te Faatereraa hoê tausani matahiti a te ‘Tamaiti hui arii no te hau’?
4 Eita, eita faahou te varua ino itea-ore-hia, i tapuni na i muri mai i te ophi i paraparau na i roto i te ǒ i Edene ra, e itehia i roto i te Faatereraa hoê tausani matahiti a te ‘Tamaiti hui arii no te hau’ ra o Iesu Mesia. Eita roa ˈtu ta taua varua ino ra, te Diabolo ra o Satani, e nehenehe faahou e ohipa mai i muri aˈe ia Aramagedo. Te parau mai nei te Apokalupo 20:2, 3 e e haru atu te ‘Tamaiti hui arii no te hau’ i ‘te ophi tahito ra, oia hoi te Diabolo ra, o Satani’, a ruuruu e a huri atu ai i roto i te abuso ra hoê tausani matahiti te maororaa.
Te hau e te ino ore mau i roto i te Paradaiso e haamau-faahou-hia
5. No te aha te hau e te ino ore mau o te itehia ˈtu i roto i te Paradaiso e haamau-faahou-hia?
5 Auê ïa hau e te ino ore mau e itea i reira e! E ore roa hoi te faaohiparaa e te faatereraa a Satani “te arii o teie nei ao” (Ioane 14:30). I te mea hoi e ua hurihia te mau nuu demoni a Satani i roto i te abuso, e tiamâ mai te fenua nei i te mau ohipa tahutahu atoa, i te ohipa hiˈohiˈo. Oia mau aita faahou e ohipa demoni ta Iehova e opani roa. — Deuteronomi 18:10-12.
6, 7. a) No te aha te mau animala e ore ai e riro faahou ei haamǎtaˈuraa no te taata? b) Eaha te parau tohu e turu ra i taua manaˈo nei o te tupu mau hoi?
6 Eita roa ˈtu te mau animala e haamǎtaˈu e e haamauiui faahou i te mau taata e ora ˈtu i roto i te Paradaiso e haamau-faahou-hia. E faahoˈi faahou mai te Atua i roto i te mau animala i te mǎtaˈu i te taata, huru tei moe hoi ia ratou. I reira, i roto i te Faatereraa hoê tausani matahiti a te ‘Tamaiti hui arii no te hau’ ra, te parau tohu a Isaia 11:6-9 e faataa maira ma te tahi mau parau putapû mau i te oraraa animala, e tupu mau ai, i te na ôraa e:
7 “Ei reira te luko e parahi atoa ˈi raua o te arenio; e te nemera e te pinia mamoe, e apiti atoa ïa i te taatoaraa; e te fanauˈa puaatoro, e te liona apî, e te puaatoro haaporia ra, hoê â amuiraa mai, e na te hoê tamaiti iti e aratai. Te puaatoro apî ra, e te daba maiaa ra, hoê â ïa amuiraa, e hoê â taotoraa to te fanauˈa. E amu hoi te liona i te aihere mai te puaatoro atoa ra. E hauti noa hoi te tamarii aiû i te apoo asepi, e te tamaiti no mairi aˈe i te û ra, e tuu ïa i te rima i nia i te pupuniraa o te zepho ra. E ore ratou e hauti, e ore e rave ino, i to ˈu atoa nei mouˈa moˈa; te na reira maira Iehova; e î hoi te fenua i te ite ia Iehova, mai te vairaa miti e î i te miti ra.”
8. Eaha te auraa te parau tohu e faahiti ra i te parau e o “te repo” ta te ophi ra maa?
8 Eita roa ˈtu i te manaˈo tano ia faaurua mai te Atua i te hoê parau tohu mai teie te huru mai te peu e tupu noa te reira i te pae varua, e aita roa ˈtu hoi e faufaa to te reira i nia te oraraa i nia i te fenua nei. Teie â ta tatou e taio i roto i te Isaia 65:25: “O te luko te pinia mamoe hoê â amu-atoa-raa; e amu hoi te liona i te aihere mai te puaatoro atoa ra: area te ophi o te repo ta ˈna maa.” Te auraa ra e ore roa ïa te mau ophi atoa i roto i te ǒ Edene i roto i te ao taatoa nei? Eita; te auraa o te parau tohu ra e maa te “repo” na te ophi oia ïa eita te mau ophi atoa e riro faahou ei haamǎtaˈuraa no te oraraa e te oraora-maitai-raa o te taata. E tia hoi ia ratou ia auraro i te taata o te haavi i te mau mea ora atoa i nia iho te fenua nei, mai tei itehia i te ǒ i Edene ra, a horoa noa ˈi o Adamu i te tahi iˈoa no te mau animala atoa, ma te mǎtaˈu ore. — Genese 2:19, 20; Hosea 2:18.
9, 10. Eaha ta te Salamo 65 e ta te Isaia 25:6 e faaite ra no nia i te fenua nei i raro aˈe i te Faatereraa a te ‘Tamaiti hui arii no te hau’?
9 Eita e nehenehe e parau i te nehenehe o taua ǒ Edene ra e itea i roto i te ao taatoa nei e tae noa ˈtu te rahi o te hotu o te fenua. Teie râ hoi ta te Bibilia e faataa maira no nia i taua parau tohu nei i roto i te Salamo 65, tei faataehia ˈtu na te Atua. Teie hoi te nehenehe e taiohia: “Ua hiˈo mai oe e ua faararirari i te fenua; e ua rahi roa ïa i te tupu ia oe i te anavai a te Atua ra, tei î i te pape: e maitai aˈera ia oe ra, faatupu ihora oe i ta ratou sitona.” Ua oti te mau tau paˈurâ, o te mau “ûa rarahi” hoi te mono mai. (Salamo 65:1, 9-13.) O te maa e rave rahi no te mau taata atoa o te fenua nei te itehia ia tae i taua tau ra.
10 Ua faaite-atea-hia mai taua hotu e rave rahi ra i roto i te Isaia 25:6, i reira hoi tatou e taio ai e: “Ei reira Iehova sabaota ra e rave ai, na te taata atoa i teie nei mouˈa, i te oroa amuraa maa maitatai, i te oroa uaina tahito faaateate-maitai-hia ra.” E oaoa roa te mau taata o te Paradaiso i te mau maa au maitai ra ia amu o te turu hoi i te mafatu e o te faaoaoa i te hohoˈa mata. E inu ratou i te uaina tahito faaateatehia ra, e faaoaoa mau i te mafatu (Salamo 104:14, 15). Maoti hoi i te oˈe, o te rahi ïa o te hotu te itehia i raro aˈe i te Faatereraa hoê tausani matahiti a te ‘Tamaiti hui arii no te hau’ ra. — Salamo 72:16.
Te hoê reo otahi, te tahi mau huru tupuraa tia roa
11. Eaha te tauiraa e tupu no nia i te reo, e nafea hoi te reira ia ohipa mai i nia i te huitaata nei?
11 E iteahia anei te arepurepu i roto i te Paradaiso e haamauhia i roto i te ao taatoa nei, no te rahiraa reo e paraparauhia? Eita, no te mea e “Atua puai” atoa te ‘Tamaiti hui arii no te hau’. (Isaia 9:6.) E nehenehe atura ïa ta ˈna e faahoˈi faahou mai i te huru nahonaho i faaorehia na e te arepurepuraa i tupu na i te Pare i Babela (Genese 11:6-9). Eaha ïa te reo otahi o te mau tamarii atoa i nia i te fenua nei a te “Metua no te ui a muri atu”? O te reo matamua anei o te Adamu matamua, ta Iehova i horoa ˈtu? Eita e ore. Noa ˈtu e eaha, e ore roa te mau patu atoa e opani ra i te taata ia papu ratou i to te tahi e to te tahi reo. Auê te au e ia tere tatou na te ara, i te mea hoi e aita e fifi faahou i te pae no te reo! E papu maitai i te tahi e te tahi eaha ta ratou e hinaaro ra e parau. Hoê anaˈe iho hoi reo ta te huitaata nei e parau, e mea tia iho â ïa e ia papaihia te Bibilia na roto i taua reo otahi ra. (Hiˈo Zephania 3:9.) Maoti hoi te reira e î ai te fenua i te ite ia Iehova “mai te vairaa miti e î i te miti ra”. — Isaia 11:9.
12. Mea nafea te Zekaria 14:9 ia tupu?
12 I reira hoi e tupu ai teie mau parau a Zekaria (14:9) e na ô ra e: “Ia tae i taua mahana ra, hoê ïa Iehova, hoê hoi o ˈna iˈoa.” O Iehova anaˈe te haamorihia mai te Atua hoê mau ra. “Ia tae i taua mahana” o te faatereraa a te Basileia o Iehova e a te ‘Tamaiti hui arii no te hau’ ra, i reira te Atua e faaite mai e nafea mau na râ ia parau i to ˈna iˈoa. No reira, hoê â ïa huru faahitiraa ta te mau taata atoa i taua iˈoa moˈa ra. Hoê anaˈe hoi o ˈna iˈoa.
13. No te aha te tau, te mataˈi e te mau are e ore ai e riro ei haamǎtaˈuraa no te mau taata o te fenua nei?
13 Te mau tauiraa e itehia i nia i te huru o te reva e i nia i te natura e riro ïa i te faaanaanatae rahi i te feia e tiai ra i te Paradaiso e haamauhia na te ‘Tamaiti hui arii no te hau’ i roto i te ao taatoa nei. Te hoê mea papu maitai, teie ïa: e riro mai te fenua taatoa nei ei vahi au maitai no te ora. Eita roa ˈtu taua Paradaiso ra e ino i te mau ûa rarahi, te mau miti rahi, te mau puahiˈohiˈo e te mau mataˈi rarahi. E auraro te mau mataˈi, te mau are e tae noa ˈtu i te tau i te ‘Tamaiti hui arii no te hau’. (Mareko 4:37-41.) E au maitai te mau tereraa o te reva i roto i taua Edene e haamauhia i nia i te palaneta atoa nei. E nehenehe roa hoi te fenua no te riro atu ei paradaiso au maitai i reira e noaa ˈi te mau taata te haamaitairaa e ora ˈtu ma te hau e a muri noa ˈtu.
14, 15. a) Eaha te parau tǎpǔ i papaihia i roto i te Apokalupo 21:3, 4 o te tupu? b) Tei ǒ te taata nei te sekene o te Atua i roto i teihea auraa? c) Eaha te huru roimata e horoihia e a muri noa ˈtu?
14 No te aha hoi e ora faahou ai i roto i te oto? Te horoa mai nei Iehova i teie nei haapapuraa i te na ôraa e: “Inaha tei ǒ te taata ra te sekene o te Atua, e e parahi oia i roto ia ratou ra, e ei taata ratou no ˈna, e ei pihai atoa iho te Atua ia ratou, ei Atua no ratou. E na te Atua e horoi i to ratou roimata atoa; e e ore roa te pohe, e te oto, e te mihi, e te mauiui, e ore atoa ïa.” — Apokalupo 21:3, 4.
15 Te mau raˈi o te terono ïa o te Atua e te fenua o to ˈna ïa taahiraa avae (Isaia 66:1). Eita ˈtura ïa ta ˈna e nehenehe e parahi mai i nia i te fenua nei; tei ǒ te taata nei râ to ˈna sekene. I roto i te Faatereraa hoê tausani matahiti, na ta ˈna Tamaiti faahanahanahia o Iesu Mesia e tia mai no te sekene o Iehova, i rotopu i te mau taata. E tia mau â e na ta ˈna ‘Tamaiti hui arii no te hau’ e tia mai no Iehova. Aita anei te reira e faahaamanaˈo maira i te iˈoa i horoahia no te Mesia i roto i te parau tohu a Isaia (7:14), oia hoi ia Emanuela? Te auraa o taua iˈoa ra “Te Atua i ǒ tatou nei”. (Mataio 1:23.) Auê ïa ohipa horuhoru mau e! E ‘parahi’ mai te Atua, na roto i te arai o ta ˈna Tamaiti here mau, i rotopu i te mau taata. I reira mau hoi te mau roimata oaoa e itea ˈi i nia i te mata o te feia e ite atu i te mau semeio faahiahia mau e faatupuhia e taua “Atua puai” ra, e oia hoi i roto i te tia-faahou-raa mai te feia pohe here mau e faahoˈi-faahou-hia mai i te ora i roto i te Paradaiso (Ohipa 24:15). E haapapu maitai mai taua mau ohipa puai ra e tei ǒ te taata ra o te Atua e te horoi ra oia i to ratou roimata e to ratou mauiui atoa e a muri noa ˈtu.
Te hoê daiamani i roto i teie nei ao otia ore
16. E tupu noa anei te tia-faahou-raa o te feia pohepohe ia aano roa te Paradaiso i nia i te fenua atoa nei? A haapapu mai i ta outou pahonoraa.
16 Ua haapiihia te Adamu matamua e nafea râ oia ia haamata i te faaaano i te Paradaiso mai te ǒ atu i Edene ra. E faaoti-maite-hia hoi taua opuaraa matamua ra no nia i te Paradaiso e haamauhia i roto i te ao taatoa nei. Teie râ e tupu noa anei te tia-faahou-raa o te feia pohepohe ia parare roa te Paradaiso i nia i te palaneta taatoa nei? Eita. Ei hiˈoraa, e hoˈi mai te feia e faatia-na-mua-hia, i roto i te mau tuhaa o te fenua nei i reira te feia e vai ora ˈtu i Aramagedo e faaea ˈi e o ta ratou i faariro ei paradaiso. A tupu noa ˈi te tia-faahou-raa o te mau taata, e aano roa ˈtu ïa taua mau tuhaa fenua mai te ǒ i Edene e tae roa ˈtu i te taime te fenua taatoa nei e riro ai ei paradaiso.
17. Mea nafea te faataaraahia mai te Paradaiso i roto i te ao taatoa nei?
17 E rahi aˈe te nehenehe o te Paradaiso i mua nei i te mau aua e te mau ǒ matau-maitai-hia. E riro mau te fenua taatoa nei ei paradaiso hau e te nehenehe o te faaoaoa eiaha noa i te taata, te Poiete atoa râ. E riro oia i roto i to ˈna taatoaraa ei ǒ Edene faanehenehehia e te mau raau huru rau e te mau tumu raau nehenehe mau ia hiˈo ra o te horoa mai i te hotu no te atuatu i te ora tia o te taata. E vai noa mai te fenua e a muri noa ˈtu ei daiamani i roto i te ao aita e hopearaa a Iehova. Area te huitaata tahoêhia nei, e noaa ïa ia ˈna te haamaitairaa e te hopoia no te atuatu i taua daiamani ra.
18. Nafea hoi tatou e ite ai e te taatoaraa o te mau tane e te mau vahine, e parahi amui hoi ratou i roto i te hau ei taeae e ei tuahine?
18 E ora amui te mau melo o taua fetii taata paieti ra i roto i te hau, mai te mau taeae e te mau tuahine, ma te viivii ore, inaha, e riro atu hoi ratou ei mau tamarii a te “Metua no te ui a muri atu” e ‘Tamaiti hui arii no te hau’ atoa hoi. Eita ˈtura e ite-faahou-hia te faatereraa teoteo a te taata i nia i te vahine, to ˈna tuahine. I to ˈna aˈe pae, e riro mau te vahine e faarirohia ei vahine tia mai ta Iehova i hinaaro ia Eva na Adamu, oia hoi “te hoê tauturu au” no ta ˈna tane tia. — Genese 2:18; hiˈo atoa Petero 1, 3:7.
19. Eaha te hohoˈa e pûpûhia mai e te Paradaiso e haamauhia i roto i te ao taatoa nei i mua i te feia e parahi ra i roto i te mau raˈi itea-ore-hia?
19 Ia tae i taua tau ra e mataitai mai te mau taata e noho ra i roto i te mau raˈi itea-ore-hia i te hoê fenua i riro ei paradaiso hau aˈe i te nehenehe i te mahana o to ˈna poieteraa, “a fatu atoa ˈi te mau fetia poipoi i te himene, e ua pii noa te mau tamarii atoa a te Atua i te oaoa”. (Ioba 38:7.) Oia mau, e hope roa o Iehova, te Atua Teitei i te haamoˈahia e i te fariihia mai Tei riro te opuaraa hanahana ra i te ore e nehenehe e tairihia. Ia haamaitaihia oia e tia ˈi!
[Uiraa haapiiraa]
[Hohoˈa i te mau api 172, 173]
E faanehenehe mau te Paradaiso i nia i te fenua nei i te “taahiraa avae” o te Atua.
