Pene 18

Te haapao-maitai-raa i te faanahonahoraa itehia a te Atua i teie mahana

1, 2. Nafea tatou ia tatara i te Salamo 50:5?

 I ROTO i te Salamo 16:10, teie ta tatou e taio: “E ore hoi oe e vaiiho i tau varua [ia ˈu] i hade, e ore hoi oe e tuu i te taata moˈa ra ia ite i te tahuti.” E teie hoi ta te Salamo 50:5 e parau ra: “Ia haaputuhia mai to ˈu feia moˈa i mua ia ˈu, o tei faaau i te faufaa ia ˈu ma te tusia.” Te feia e faaau i te faufaa ia Iehova, o ratou atoa anei te horoa i te “tusia”? Eita; no te mea eita taua mau tavini haapao maitai ra e “faatusia” ia ratou iho na roto i te pûpûraa i to ratou tino iˈo no te faaau i te hoê faufaa e te Atua.

² Inaha, nafea hoi te faufaa i te faaauraahia? I nia ïa i te “tusia” o te tavini “haapao maitai” ra tei ore hoi i vaiihohia i hade, o ta te Atua râ i faatia mai mai roto mai i te feia pohe. Ua faaohipa te aposetolo ra o Petero i te Salamo 16:10 i nia ia Iesu Mesia e ua na ô faahou aˈera oia e: “Oia [Davida] râ i itea noa i te reira, i parau ai oia i te tia-faahou-raa o te Mesia ra, e eita to ˈna varua e vaiihohia i hade, e eita to ˈna tino e vaiiho-noa-hia ia tahuti noa na. O taua Iesu nei â ta te Atua i faatia aˈenei i nia.” — Ohipa 2:25, 27, 31, 32.

3. O vai ma tei haaputuputuhia ia au maite i te faaueraa i horoahia i roto i te Salamo 50:5, e no te aha hoi ratou e tia ˈi ia tapea i to ratou haapao maitai i te Atua?

³ Taua Iesu i faatia-faahou-hia ra o te Arai ïa o te faufaa apî, tei haapapuhia e to ˈna tusia (Hebera  9:15, 17). No reira, o vai ma atura te tia ia haaputuputuhia ia au maite i te faaueraa i horoahia i roto i te Salamo 50:5? O te mau pǐpǐ ïa a Iesu tei ô i roto i te faufaa apî maoti to ˈna tusia. E tia mau â hoi to ratou mauruuru ia Iehova no taua tusia faufaa mau ra o te ore e nehenehe e faaauhia ia faaitoito ia ratou ia tapea i to ratou haapao maitai no ˈna.

4, 5. a) Ua manuïa te Diabolo ra o Satani i te rave i te aha i roto i te Tamaˈi rahi Matamua a faaitoito noa ˈi oia i te haamou i te faanahonahoraa itehia a Iehova? b) Ua tauihia te vahi te mau piha ohipa a te Taiete no te haamau i hea, e no te aha? c) I roto i te faahohoˈaraa no teie tau o te Salamo 137:1, eaha mau na te mau manaˈo o te toea haapao maitai ia ˈna i ite i te faanahonahoraa a te Atua i te mau-roa-raa?

⁴ A haamauhia ˈi te Basileia o Iehova i roto i te mau raˈi i te matahiti 1914 ra, ua riri roa te mau nunaa i taua Basileia ra na roto i te faaôraa ia ratou i roto i te tamaˈi rahi matamua, e ua faatia noa aˈera hoi te Atua ia ratou ia na reira (Salamo 2:1, 2). Na roto i te ravea o taua tamaˈi ra, ua haa aˈera te Diabolo ra o Satani no te haamou roa i te tuhaa itehia a te faanahonahoraa a Iehova. Ua nehenehe aˈera hoi oia e rave e ia mau te peretiteni o te Taiete Watch Tower i roto i te fare tapearaa no Atlanta, i te mau Etats-Unis, e e hitu mau tia ê atu o taua taiete ra na muri ia ˈna.

⁵ No te mau hamani-ino-raa i tupu, ua tauihia aˈera te vahi o te mau piha ohipa a te pu no Brooklyn, i New York, i roto i te hoê fare i tarahuhia i Pittsburgh, i Pennsylvanie. E te reira no te tamau â ïa i te nenei i te vea ra Te Pare Tiairaa. Te tiai-mau-hia ra te faahanahanaraa i nia i te raˈi o te mau tavini haapao maitai. Mai te huru râ ïa e te hinaaro ra te mau melo o te toea e oto ia ratou i ite i te faanahonahoraa a Iehova ia hamani-ino-hia e ia mau roa. — Salamo 137:1.

 Haapao maitai noa ˈtu i roto i te fare tapearaa

6-8. A tapeahia ˈi oia, mea nafea to te peretiteni Rutherford faaiteraa i to ˈna haapao maitai no te faanahonahoraa a Iehova?

⁶ Ma te tapea i to ˈna haapao maitai no te faanahonahoraa a Iehova ia ˈna i mau i roto i te fare tapearaa, i te 25 no titema 1918, ua papai aˈera te peretiteni iho o Rutherford ia J. Bohnet, tavini o Iehova te nehenehe mau e tiaturihia. Teie te rata ta ˈna i faatae atu i te piha ohipa a te amaa i Pittsburgh:

⁷ “I te mea hoi e ua patoi au i te amui atu i roto ia Babulonia e ua faaitoito vau i te tavini ma te haapao maitai i ta ˈu Fatu, tei roto atura ïa vau i te fare tapearaa, e te mauruuru nei hoi au. (...) Mea au aˈe hoi na ˈu i roto i te fare tapearaa e ia ite e te farii maira oia ia ˈu maoti hoi i te fanaˈo i te tiamâraa i raro aˈe i te mau haapopouraa a te ao taatoa nei no te tururaa ˈtu i te Puaa aore ra i te auraroraa ˈtu ia ˈna. E haamaitairaa e e ohipa mǎrû ia mauiui au no te tavini i te Fatu ma te haapao maitai. I roto i te Basileia, hau aˈe i te mau mea atoa, e poihere tatou i te mea e te farii maira te Metua ia tatou. Te reira te mea te tia ia vai i te parahiraa matamua i roto i te manaˈo o te mau tamarii tataitahi a te Atua. Te ru nei tatou i te autahoêraa o te faariro ia tatou ei Hoê i roto i te Basileia. Te oaoa nei au, e inaha te hinaaro nei hoi au e farerei oioi ia outou paatoa. Te fatata maira te tairururaa e te putuputuraa matahiti. Ia faaî mau te varua o te Mesia i te mafatu o te taata tataitahi e tae mai! (...)

⁸ “E rave rahi â ohipa te tia ia ravehia. E e riro â ïa ei haamaitairaa rahi te amuiraa ˈtu i roto i te ohipa pororaa. O te feia anaˈe mea here na ratou i te Atua teitei ra o te tapea i to ratou haapao maitai e o te riro ia faahanahanahia. (...) Hou aˈe taua mahana oaoa ra e tae mai ai, e tia mau te hoê pororaa rahi ia horoahia.  (...) Eita te mau ravea e te mau mauhaa no mutaa ihora e tano faahou, i roto râ i to ˈna maitai rahi te Fatu e horoa mai ai te reira. (...) Te oaoa nei au i te mea o matou tei mau i roto i te fare tapearaa eiaha râ o taeae Russell. I teie nei mai tei ore hoi i itehia e au i mutaa ihora, te riri hohonu nei au i te ino e mea here hoi na ˈu i te parau-tia, ma te ru i te haere e tauturu ia vetahi ê. (...) Te fatata roa maira te upootiaraa a Ziona.”

Te faanahonahoraa a te Atua, “e mea oaoa rahi” na ratou

9. Eaha te huru o te papai salamo ta te mau tia o te Taiete i mau i roto i te fare tapearaa i faaite na?

⁹ Noa ˈtu â ïa e ua faariro te ao nei i te mau tavini o Iehova ei feia taiva, o te ore e tapea i to ratou haapao maitai e o te ore hoi e turu i to ratou aiˈa, aita ratou i faarue i ta ˈna faanahonahoraa. Ua patoi ratou i te amui atu i roto i to ratou mau enemi noa ˈtu ta ratou mau faaheporaa. Mea maitai aˈe na ratou ia erehia ratou i to ratou rima atau aore ra i te parau i te haamoe roa i te faanahonahoraa a te Atua, ia riro te reira ei “mea oaoa rahi” na ratou. — Salamo 137:5, 6.

10, 11. a) Eaha hoi te tumu matamua o te pure a te toea haapao maitai, e eaha te mau parau a te papai salamo no nia ia Edoma ta ˈna i rave no ˈna? b) Ua manuïa te mau enemi o te faanahonahoraa itehia a Iehova i te rave i te aha, e aita râ ratou i manaˈo e e tupu teihea ohipa?

¹⁰ Te oaoa nei te mau enemi o Iehova no te mau ohipa i ravehia no te patoi atu i te tia i nia i te fenua nei o ta ˈna faanahonahoraa i roto i te ao taatoa nei. Ua pure râ te mau tavini o te Atua ia tae mai ta ˈna mahana taahooraa no ta ratou faaino i ta ˈna faanahonahoraa. Ua faariro hoi ratou i teie mau parau a te papai salamo no nia i te Edoma tahito ra no ratou: “Haamanaˈo, e Iehova, i te mau tamarii a  Edoma, o tei parau i te mahana a ati ai Ierusalema, A taihitumu na, taihitumu na, ia ihipapa hua ïa!” (Salamo 137:7; Galatia 4:26). Oia mau, i te mea hoi mea here rahi na Iehova i ta ˈna faanahonahoraa e vahine atoa hoi e ore ai e moehia ia ˈna i te ohipa ta te mau melo o te faanahonahoraa a te Diabolo e parau nei e e rave nei i nia i te mau tavini haapao maitai a ta ˈna faanahonahoraa i nia i te fenua nei.

¹¹ Ia au i te mau ohipa e tupu ra, ua vaiiho aˈera te mau tia politita a Babulonia Rahi i te faanahonahoraa itehia a Iehova ma te ‘taihitumuhia, ia ihipapa hua roa oia’. Aita ratou i manaˈo e e tia mai oia mai roto mai i te repo no te riro mai ei faanahonahoraa rahi mai teie e itehia nei i teie mahana.

Te oaoaraa o to ˈna taata Tahoo

12. a) O vai tei itehia mai te faaora o te nunaa o Iehova i vai tîtî na i roto ia Babulonia tahito, e no ˈna mau anei te parau e faahitihia ra i roto i te Salamo 137:8, 9? b) Eaha ta taua mau irava nei i faaite atea mai no nia i te taata Tahoo o te faanahonahoraa a te Atua i nia i te fenua nei?

¹² Ua faaohipa o Iehova i te arii peresia ra o Kuro no te faaora mai i to ˈna nunaa mai roto mai i te Puai rahi babulonia tahito ra. Inaha, e ere hoi no Kuro te parau e parauhia ra i te hopearaa o te Salamo 137, e faahiti ra i te parau no Babulonia Rahi, te faatereraa i roto i te ao taatoa nei o te haapaoraa hape. Teie ta tatou e taio: “E te tamahine a Babulonia faaano fenua e, e ao to ˈna to te tahoo atu ia oe, mai ta oe i rave mai ia matou nei! E ao to ˈna to te rave i to mau aruaru rii, e ua tairi noa i nia i te mato ra.” — Salamo 137:8, 9.

13, 14. No te aha e ore ai e nehenehe e parau e te taata “oaoa” ta te Salamo 137:8, 9 o te mau puai politita ïa e haamou ia Babulonia Rahi?

¹³ O vai hoi taua taata “oaoa” ra? O na “auahuru tara” anei i nia i te upoo o te “puaa [taehae]”, ta te  vahine faaturi tahito ra aore ra amuiraa faaroo e horo nei na nia iho a hia ˈtura maororaa i teie nei? Eita, no te mea eita te feia haamou politita o te faatereraa i roto i te ao taatoa nei o te haapaoraa hape e tairi ia ˈna a vaiiho atu ai i te parahiraa no te haamoriraa viivii ore a te Atua mau ra. Ta ratou opuaraa, ia na reira ratou, e ere ïa i te faahanahanaraa i te Atua o te Bibilia. Nafea hoi, mai te peu e mai te reira te huru e nehenehe ai e parau e o ratou taua taata “oaoa” ra ta te papai salamo i faaite atea mai?

¹⁴ Eita te mau puai politita o te ao nei e faatupu i taua ohipa aroraa haapaoraa ra no te mea e mea here na ratou i te feia e haamori nei ia Iehova. No te aha hoi? No te mea e riro te mau Ite no Iehova i te faahuru ê ia ratou i roto i ta ratou ohipa oia hoi te faatupuraa i te hoê ao o te ore roa ˈtu e tiaturi i te Atua. No reira, e mau mauhaa noa te mau puai politita e faaohipahia e te Atua o te mau Ite no te faatupu i ta ˈna iho opuaraa. — Apokalupo 17:17.

15. Na vai mau na e turai ra i te mau puai politita, e na roto i teihea ravea?

¹⁵ No reira, noa ˈtu â ïa e na ratou e haamou roa i te faatereraa i roto i te ao taatoa nei o te haapaoraa hape, na Iehova râ hoi e rave ra e ia na reira ratou. Nafea hoi te reira? Na roto ïa ia Kuro Rahi, ta ˈna Tamaiti o Iesu Mesia, ta ˈna i haamau ei arii. Oia mau, na Iesu, te Arii o te Basileia, te taata “oaoa” ta te papai salamo e faahiti ra.

16. Nafea Iehova ia haamou i te mau “tamarii” a Babulonia?

¹⁶ A paruru noa ˈi Iehova i ta ˈna mau tavini haapao maitai, e haru mai ai oia ei auraa parau, i te mau “tamarii” tataitahi i te pae faaroo a te vahine faaturi ra aore ra amuiraa o te mau haapiiraa hape e a tairi atu ai ia ratou i nia i tei au i te hoê “pǎpǎ”, oia hoi te Basileia aueue ore a te Atua e a te Mesia.

17. a) Ia au i te Isaia 61:1, 2, eaha te mea te tia ia Iesu ia poro i muri aˈe i to ˈna faatavairaahia i te varua o te Atua? b) Mea nafea taua ohipa pororaa ra ia ravehia i teie mahana?

 ¹⁷ A parahi mai ai oia i nia i te fenua nei, ua faatavaihia o Iesu i te varua o te Atua e turu na ia ˈna eiaha noa no te “faaite i te matahiti hinaarohia e Iehova”, i “te mahana tahooraa [atoa râ] na to tatou Atua” na nia i te fenua taatoa nei, ei faaararaa i te mau nunaa. No te apiti atu i roto i taua ohipa pororaa ra, ua apiti mai te hoê “feia rahi roa” e rahi noa ˈtura o te mau pǐpǐ a te Mesia i faaauhia i te mau mamoe, i te toea, mai ta te Apokalupo 7:9-17 e faaite ra.

18. E apiti atu te mau tavini haapao maitai a te Atua i roto i teihea oaoaraa?

¹⁸ Ratou paatoa, te mau melo no te toea e te “feia rahi roa”, tei auraro i te titauraa a te melahi e vai ra i roto i te Apokalupo 18:4. Ua haere ê mai ratou i rapae ia Babulonia Rahi. No te aha hoi taua ohipa ra e riro ai ei ohipa ru? No te mea e tia ia ratou ia horo ê mai i rapae ia Babulonia Rahi hou ta ˈna mau “tamarii” faaroo e tairihia ˈi e e haamou-roa-hia ˈi na te “puaa [taehae]” e to ˈna “auahuru tara”, na mua iti noa aˈe ia Aramagedo. E amui atu taua mau tavini haapao maitai ra i roto i te oaoaraa o Kuro Rahi, oia hoi o Iesu Mesia. E parau hoi ratou e te mau raˈi e: “Haleluia: o te ora, e te hanahana, e te tura, e te mana, tei te Fatu, tei to tatou Atua ïa. E mea mau hoi e te tia ta ˈna ra tuuraa utua: ua faautua iho nei hoi oia i taua faaturi rahi ra, o tei haaviivii i to te ao nei i tana faaturiraa.” — Apokalupo 19:1, 2; hiˈo Ieremia 51:8-11.

19. Eaha te oaoaraa e itehia nei i teie mahana e te mau melo haapao maitai o te toea, eaha te oaoaraa rahi roa ˈtu â e tiai maira ia ratou?

¹⁹ Mai te matahiti 1919 maira, “e ohipa rahi” ta Iehova i rave no to ˈna nunaa (Salamo 126:1-3). Te faaoaoa nei â taua faaiteraa faahiahia mau no to ˈna  mana faaora, e haapapu mai e e “Atua haavare ore” oia, i te mafatu o te mau melo o te toea i faaorahia mai (Deuteronomi 7:9). Te oaoa rahi nei ratou, teie râ e oaoaraa rahi atu â te tiai maira ia ratou, oia hoi te apitiraa ˈtu i roto i te oaoaraa o Kuro Rahi, te Arii e faatere ra oia hoi o Iesu Mesia, ia tairi oia i te taatoaraa o te mau “tamarii” a taua faanahonahoraa diabolo ra.

20. O vai atu â teie e ite nei i te oaoaraa e itehia ra e te toea faatavaihia, e no te aha?

²⁰ E rave rahi milioni mau taata i vai “tîtî” na i roto ia Babulonia rahi tei tauturu-ê-na-hia ia horo ê mai i rapae i taua amuiraa faaroo i faautuahia ra hou oia e haamou-roa-hia ˈi. O ratou te “feia rahi roa” o te mau “mamoe ê atu”, e e 3 000 000 rahiraa ratou tei purara ê na nia i te fenua atoa nei. Aita e otia to te numera e te feia e tiâ ia faaorahia mai roto mai te haamouraa o te faatereraa i roto i te ao taatoa nei a te haapaoraa hape. Ma te ore e taiva i te faanahonahoraa a Iehova, te amui nei ratou i roto i te oaoaraa o te toea na roto i te apitiraa ˈtu ia ˈna i roto i te pororaa i te mahana tahooraa e ravehia i nia i te Babulonia Rahi faaroo ra.

21. Eaha ïa to tatou huru i nia ia Babulonia Rahi e te feia i raro aˈe i ta ˈna faatîtîraa?

²¹ Ia ore roa ˈtu na tatou ia faaô atu i roto i te mau ohipa a te faatereraa i roto i te ao taatoa nei a te haapaoraa hape. Ia ore roa ˈtu na te hoê noa aˈe o tatou ia hoˈi faahou i roto ia Babulonia Rahi! Ia tamau râ tatou i te tauturu i te mau taata e vai tîtî noa ra ia haere ê mai i rapae i taua amuiraa i faautuahia ra, hou te re e noaa ˈi ia Kuro Rahi, re o te riro ei tumu oaoaraa.

[Uiraa haapiiraa]