Pene 8

Te haereraa i roto i “te oroa oaoaraa” o te ‘Tamaiti hui arii no te hau’

1. a) No te aha te tahi taata i haere atu ai i te fenua ê? b) Eaha te parauhia ra i roto i te parabole a Iesu, noa ˈtu â ïa e aita te reira i haapapu-roa-hia mai?

 I ROTO i te parabole a Iesu, aita te taata e vau taleni ario ta ˈna i tere i te fenua ê no te faaoaoa noa ia ˈna aore ra e ere to ˈna tere i te tere ori haere noa. No te hoê tumu faufaa roa oia i tere atu ai i te fenua atea. Ua hinaaro oia ia noaa mai ia ˈna te tahi taoˈa faufaa roa. Ta ˈna i hinaaro, mai ta te parabole e faaite ra, ia noaa mai ïa ia ˈna te hoê “oaoaraa” papu maitai e ia noaa atoa ia ˈna i “[te mau mea e rave rahi]”. (Mataio 25:21.) E tia ˈtura ïa ia ˈna ia tere i te hoê tere atea, o te titau rahi i te taime, no te faaite atu i to ˈna hinaaro i te taata e nehenehe e horoa mai i taua oaoaraa taa ê mau ra.

2. a) Ia parauhia no Iesu, eaha ïa te auraa te tere i te fenua ê o te taata taoˈa rahi ra, e ua tere tia ˈtu oia ia vai ra? b) Ua hoˈi mai te Fatu e te aha?

² Te taata taoˈa rahi o te parabole o Iesu Mesia ïa. No reira, te taata e tere ra no te hoê tere atea o Iesu ïa o te haere ra i te Tumu otahi no taua oaoaraa taa ê nei ta ˈna e titau ra. Ua haere oia i hea? Teie ta te Hebera 12:2 e parau mai nei: ‘Ma te tiatonu maite to tatou mata ia Iesu, i te tumu e te faaoti i to tatou faaroo; o te faaoromai i te satauro [pou], aore i haapao i te haama, i te maitai i tuuhia mai i mua i tana aro; e te parahi ra i teie nei i te pae atau i te  terono o te Atua ra.’ Oia mau, o te Atua ra o Iehova te Tumu no taua oaoaraa ra. Ua haere atu hoi Iesu i pihai iho ia ˈna, ma te vaiiho mai i ta ˈna mau pǐpǐ haapao maitai i nia i te fenua nei e ta ˈna mau “taleni”. Ua hoˈi maira te Fatu e “mea rahi” ta ˈna taoˈa. Aita hoi ta ˈna, taua mau taoˈa ra ia ˈna, i pûpû atu ai oia i na taleni ario e vau i ta ˈna mau tavini tootoru. Te haapapu maira te parabole o na “mina hoê ahuru” ta Iesu i horoa mai tau taime na mua ˈˈe e ua hoˈi mai oia ma te haamanahia i te “toroa arii”. — Luka 19:12-15.

3. Eaha tei tia ia ravehia a haamata ˈi o Zekaria 9:9 i te tupu i te senekele matamua?

³ Ia oti anaˈe te hoê arii i te faaariihia, e oaoa iho â ïa o ˈna e tae noa ˈtu te mau taata haapao maitai atoa i raro aˈe i ta ˈna faatereraa. Te haamanaˈo ra tatou i te mahana te Tamaiti a te Atua i tomo atu ai i Ierusalema na nia i te hoê asini, ma te faatupu hoi i te parau tohu a Zekaria 9:9. Teie tei papaihia no nia i te tupuraa taua parau tohu nei: “E e feia rahi tei horahora i to ratou ahu i te eˈatia; ooti aˈera hoi e tahi pae i te amaa raau, vauvau ihora i te eˈatia. Te pii noa maira te tiaa rahi i na mua ra, e tei pee mai na muri, na ô maira, Hosana te Tamaiti a Davida; ia ora oia o tei haere mai ma te iˈoa o te Fatu. Hosana i te raˈi teitei ra. E tae atura oia i roto i Ierusalema, aueue ihora taua oire atoa ra, e te taata atoa i te uiraa e, O vai teie?” — Mataio 21:4-10; hiˈo atoa Luka 19:36-38.

4. I muri aˈe i to ˈna haamauraahia ei Arii, no te aha Iesu i titau mau ai i ta ˈna mau “tavini” haapao maitai ia tomo mai i roto i te hoê huru oaoaraa?

⁴ Mai te peu e ua rahi roa ˈtu â te oaoa, ia Iesu i tia ˈtu i mua i te mau taata no Ierusalema mai tei faatavaihia i te varua o Iehova no te rave i te tiaraa arii, a feruri na râ ïa i te oaoa rahi o te taatoaraa a  faaarii-mau-hia ˈi oia ia hope te mau tau o te mau Etene i te matahiti 1914 ra! Auê ïa taime oaoaraa no ˈna e! Ua tomo aˈera oia i roto i te hoê oaoaraa mai tei ore i iteahia aˈenei e ana. I te taime faatitiaifaroraa ohipa, ua nehenehe aˈera hoi oia e parau atu i ta ˈna mau pǐpǐ ta ˈna i faariro ei mau tavini ‘maitai e te haavare ore’: ‘O oe i haapao maitai i tena na taoˈa iti haihai, e faatiaau atu vau ia oe i nia iho i te mea rahi: e haere oe i roto i te oroa oaoaraa a to fatu.’ (Mataio 25:21). Inaha, e ite atu ta ˈna mau “tavini” i te hoê oaoaraa apî. Auê atura ïa haamauruururaa e!

5. a) O vai mau na hoi te Mesia i te tau te aposetolo Paulo i riro ai ei ‘vea’ na ˈna? b) Eaha mau na hoi oia i teie mahana i reira te te toea faatavaihia e tavini ai ei ‘vea’?

⁵ I te matahiti 1919, ua ô mai te mau pǐpǐ faatavaihia a te Arii e faatere ra, oia hoi o Iesu Mesia i roto i te hoê huru ta ratou i farii mai te hoê oaoaraa rahi. Ahuru ma iva senekele na mua ˈtu, ua papai te aposetolo Paulo i to ˈna mau hoa faaroo no nia i to ratou tiaraa teitei i te na ôraa e: “E teie nei, e vea matou na te Mesia.” (Korinetia 2, 5:20). I taua taime ra, aitâ o Iesu i riro atura ei fatu o tei haapaohia no te rave mai i te “basileia o te ao [te mau raˈi]”. (Mataio 25:1.) E tia hoi ia ˈna ia parahi i te pae atau o te Atua a tiai noa ˈtu ai i te mahana oia e faarirohia ˈi ei arii. Teie râ, mai te matahiti 1919 maira, e mau “vea” te mau melo o te toea i fariihia tei tonohia na Tei faatere mau ra ei Arii (Hebera 10:12, 13). Ua faataa-papu-hia ˈtu taua ohipa nei i mua i te aro o te Feia haapii i te Bibilia tei haaputuputuhia i roto i te hoê tairururaa i Cédar Point i te matahiti 1922 ra.

6. I muri aˈe i te tamaˈi, e tia ïa te mau tutavaraa i ravehia e te feia tei noaa ia ratou te mau “taleni”, ia faatupuhia i roto i teihea huru ohipa?

⁶ I te matahiti 1919, ua horoa-ê-hia mai na te mau  “taleni” a te Arii e faatere ra oia hoi o Iesu Mesia, e inaha, ua rahi roa ˈtura ïa ta ratou mau hopoia i mua ia ˈna. I te omuaraa ra iho â, e haamau ratou i ta ratou mau tutavaraa i nia i te ohipa o te “auhune” aore ra haaputuputuraa o te pǔpǔ o te “sitona”. (Mataio 13:24-30.) I te mea hoi, mai ta Iesu i parau, te auhune o “te hopea ïa o teie nei ao [o te hoê amuiraa o te mau mea]”, te matahiti i muri aˈe i te tamaˈi oia hoi te matahiti 1919 o te matahiti ïa i reira te ootiraa sitona aore ra te mau “tamarii o te basileia” oia hoi o te toea haapao maitai i faatavaihia ˈi. — Mataio 13:37-39.

7. a) Ua tomo te feia ooti e to ratou Fatu i roto i teihea huru tau? b) Ua faahoˈi faahou mai Iehova i te feia ooti i roto i teihea huru, e eaha te parau tohu ta ratou e rave mai no ratou?

⁷ Ua riro te tau auhune ei tau oaoaraa no te feia ooti e no te Fatu atoa hoi o te auhune (Salamo 126:6). Ua haapapu-faahou-hia mai taua tau ootiraa ra na te mau tapao o te rahi noa ˈtura e ua haamauhia te Basileia o te Atua e te Mesia atoa i roto i te mau raˈi i te matahiti 1914 ra e ua faahoˈi faahou mai Iehova i to ˈna nunaa pûpûhia e ora nei i nia i te fenua nei, i roto i te hoê huru parau-tia. Ma to ˈna tiaraa pǔpǔ, ua faariro te toea i faahoˈi-faahou-hia mai, i teie mau parau a Isaia i muri nei, no ˈna (61:10): “E oaoa roa vau ia Iehova; e ouˈauˈa noa tau varua i te oaoa i tau Atua. Ua faaahu mai oia ia ˈu i te ahu ra i te ora: e ua tapoˈi oia ia ˈu i te ahu pu ra i te parau-tia.”

Te haaputuputuraahia te “feia rahi roa” teie e apiti atu nei i roto i “te oaoaraa” o te toea

8. Eaha te oaoaraa ‘ta ˈna i ore i manaˈo’ ta te toea faatavaihia e ite atu ia hope te feia aiˈa o te Basileia i te haaputuputuhia?

⁸ Aita roa ˈtu hoi te toea faatavaihia tei tomo atu i roto i te “oaoaraa” o to ˈna Fatu i manaˈo e e faaauhia  mai â ia ˈna te tahi atu oaoaraa, te hoê oaoaraa ta ˈna i ore roa ˈtu i manaˈo noa ˈˈe. Te hinaaro nei matou e parau no nia i te haaputuputuraahia te hoê pǔpǔ i nia i te fenua nei, o te ora ˈtu i roto i te Paradaiso i raro aˈe i te Fatereraa hoê tausani matahiti a Iesu Mesia. O vai atu â hoi, maoti râ te mau melo o taua pǔpǔ i nia i te fenua nei, te tia ia titauhia i te taime taua parau no nia ia ratou e faaitehia mai ai?

9. O vai tei titau-taa-ê-hia no te amui atu i te tairururaa i tupu i Washington i te matahiti 1935 ra, e eaha te parau tano maitai i faaitehia mai ia ratou?

⁹ No reira, ma te pahono i te titauraa a Te Pare Tiairaa *, ua amui maira te feia i hinaaro e taai i te mau auraa e o Iehova e hia rahiraa hanere ratou, i roto i te nunaa no to ˈna ra iˈoa, a tupu ai te tairururaa rahi a te mau Ite no Iehova i Washington i te 30 no me e tae atu i te 2 no tiunu 1935. Ua oaoa roa ratou i te iteraa ratou e te feia rahi roa i faaitehia i roto i te Apokalupo 7:9-17, e pǔpǔ taata ïa o te parahi mai i nia i te fenua nei.

10, 11. Ua riro te reira ei anotau oaoaraa taa ê mau no vai, i roto i te mau raˈi?

¹⁰ Auê ïa oaoaraa no Iehova, te Atua Teitei, i te tupuraa taua tairururaa nei i Washington i te matahiti 1935 ra e! Auê atoa hoi ta ˈna Tamaiti, te Tiai mamoe maitai o te haaputuputu i taua mau “mamoe ê atu” ra ei “hoê aˈe nǎnǎ”, i te oaoa e! — Ioane 10:16.

¹¹ Ma te arataihia e te faaamuhia, ei faaauraa parau, te ora amui nei te mau melo o te toea e te “feia rahi roa” o te mau “mamoe ê atu” o te rahi noa ˈtura, i roto i te hau e te here. E riro mau â te mafatu o to ratou “tiai hoê” ra i te oaoa rahi i taua “nǎnǎ” ra  a fatata noa ˈtu ai te “[amuiraa o te mau mea nei]” i te hope.

Tei tonohia e te ‘Tamaiti hui arii no te hau’ ra

12, 13. a) O vai tei titauhia ia apiti atu i te toea faatavaihia no te tomo atu i roto i te oaoaraa o te Fatu tei hoˈi mai, e eaha mau na hoi te tumu? b) Te tavini nei te “feia rahi roa” o te mau “mamoe ê atu” i te mau faufaa a te ‘Tamaiti hui arii no te hau’ ia au i teihea tiaraa?

¹² Te apiti nei taua mau “mamoe” o te “feia rahi” ra i roto i te oaoaraa o to ratou Fatu, o Iesu Mesia. E te reira, no te mea te apiti rahi atu nei ratou ma te itoito i roto i te feia e tahoê mai i te “feia rahi roa”, aita hoi te numera i haapapuhia i roto i te Apokalupo 7:9.

¹³ Te tupu nei te ohipa haaputuputuraa ta te mau “mamoe ê atu” e turu nei i teie mahana i roto i te ao taatoa nei, ohipa o te ore hoi e nehenehe e faatupuhia e te toea faatavaihia, o te iti noa ˈtura te numera. No reira ˈtura i titau-rahi-hia ˈi ia apiti noa mai te mau tiaa rahi taata o te mau “mamoe ê atu” o te rahi noa ˈtura no te haaputuputu e rave rahi atu â mau “mamoe ê atu” e tiaturi ra e ora i nia i te fenua nei. No reira, te tavini nei te mau melo o taua pǔpǔ ra ei mau taata tonohia haapao maitai na te ‘Tamaiti hui arii no te hau’. Teie ta tatou e taio i roto i te Maseli 25:13: “Mai te toetoe hiona i te anotau auhune ra, oia te vea maitai i te taata i tono ia ˈna ra: maitai aˈera te aau o tana fatu ia ˈna.”

14. a) E fatu te mau mamoe taipe o te parabole a Iesu i faaitehia i roto i te Mataio 25:31-46 i te aha? b) Ua faaineinehia te Basileia no ratou “mai te hamaniraa mai o te fenua ra” i roto i teihea auraa?

¹⁴ I roto i te parabole no nia i te mau mamoe e te mau puaaniho, te mau mamoe taipe o te mau taata ïa ta te Arii o Iesu Mesia e parau atu e: “A haere mai  outou, e te feia i faaorahia e tau Metua, e parahi i te basileia i haapaohia no outou mai te hamaniraa mai o te fenua nei ra.” (Mataio 25:31-46). E fatu ratou i te fenua nei ta te Basileia o te mau raˈi e faatere mai i roto i te faatereraa hoê Tausani matahiti a te Mesia. Mai te tau o te taata haapao maitai ra o Abela, te faaineine nei Iehova i taua tuhaa ra no te ao o te mau taata e hoohia mai. — Luka 11:50, 51.

15, 16. a) Noa ˈtu â ïa e te faatere nei te Fatu i teie mahana i rotopu i to ˈna mau enemi, eaha te huru “hinuhinu” arii o Solomona mai ta ˈna iho e parau ra? b) Mai te aha te huru taua “hinuhinu” ra i teie nei mahana? c) Eaha ta te feia o ratou hoi teie “hinuhinu” i rave?

¹⁵ Teie ta Solomona, te arii paari o Iseraela tahito ra i papai: “Tei te rahi o te taata te hinuhinu o te arii; e tei te taata ore to te arii ïa pohe.” (Maseli 14:28). Te reira mau hoi te “hinuhinu” o Iesu Mesia, te Fatu arii o to tatou nei tau, tei teitei aˈe ia Solomona, no nia i “te rahi o te taata”. Tei ia ˈna ra taua hinuhinu nei, aitâ hoi ta ˈna faatereraa hoê  tausani matahiti i haamata ˈtura e te faatere nei oia i rotopu i to ˈna mau enemi i nia i te fenua nei tei riro te Diabolo ra o Satani ei arii itea-ore-hia e te mata taata nei, no ratou. — Mataio 4:8, 9; Luka 4:5, 6.

¹⁶ Te “hinuhinu” i teie nei tau e tano maitai i te hoê taata hui arii, e itehia ïa i roto i te numera o te rahi noa ˈtura o ta ˈna mau “mamoe ê atu” o te “feia rahi roa”. Ma te oaoa, te faateitei amui nei ratou i te reo i te na ôraa e: “Tei to tatou Atua te ora, tei parahi i nia iho i te terono ra, e tei te Arenio.” (Apokalupo 7:9, 10). Ua faaora-ê-na-hia ratou mai roto mai i te amuiraa o te mau mea i haapaohia no te haamouraa e o te Diabolo ra o Satani te “atua”. (Korinetia 2, 4:4.) Ua ‘horoi ê na ratou ei faaauraa parau, i to ratou ahu i roto i te toto o te Arenio’, ma te faateatea i te reira ia ore roa te tafetafeta i mua i te Atua ra o Iehova, oia hoi te Haava. — Apokalupo 7:14.

17. a) Eaha te faaoraraa ta te “feia rahi roa” e tiai nei â? b) E fanaˈo ratou i teihea haamaitairaa i roto i te Faatereraa hoê tausani matahiti a te ‘Tamaiti hui arii no te hau’?

¹⁷ Teie râ, te tiai nei ratou i te faaoraraa ta Iehova e horoa mai i roto i ta ˈna re hopea i te taime o “te tamaˈi o taua mahana rahi o te Atua Puai hope ra” i Aramagedo. Na roto i ta ˈna re rahi, e faaititiaifaro oia i to ˈna mana hope, area ratou ra, e riro ïa ratou ei mau ite i nia i te fenua nei, i te mea hoi e ua faaorahia mai ratou i roto i te peapea rahi o te hopea o te ao nei (Apokalupo 16:14; Petero 2, 3:12). Auê ïa haamaitairaa tei hau ê i te faahiahia e! A feruri na i te oaoa ta te ‘Tamaiti hui arii no te hau’ e ite atu e ta te “feia rahi roa” o te mau “mamoe ê atu” e ora mai!

[Nota i raro i te api]

[Uiraa haapiiraa]

[Hohoˈa i te api 71]

E riro mau â te mafatu o te Tiai mamoe maitai ra i te oaoa ia ite oia pauroa taua “mau mamoe ê atura” ia haere mai ia ˈna ra.