Pene 5

Te hoê maramarama no “te hopea o te amuiraa o te mau mea nei”

1. I “te hopea o te amuiraa o te mau mea nei” o ta tatou e ora nei, eaha ïa te faaipoiporaa rahi ta te ‘Tamaiti hui arii no te hau’ i tohu, e i roto i teihea parabole?

 I ROTO i te Mataio 24:38, te parau ra te ‘Tamaiti hui arii no te hau’ e i te “[hopea o te amuiraa o te mau mea nei]” ‘e faaipoipo te mau taata e e horoahia te mau vahine ia faaipoipohia’. I taua iho taime ra, te haamata ra i roto i te mau raˈi te faaipoiporaa rahi roa ˈˈe i rotopu i te mau faaipoiporaa atoa. Oia hoi te faaipoiporaa ïa ta Iesu i faahiti i roto i te faahohoˈaraa o na paretenia hoê ahuru o tei rave i ta ratou lamepa. — Mataio 24:3; 25:1-12.

2. a) Eaha te hora e tupu ai taua faaipoiporaa ra? b) Eaha to muri iho i te oroa faaipoiporaa, e mea nafea te eˈa i te turamaraahia?

² Te tupu ra te reira i te pae Hitia o te râ ma. Ua po roa: fatata i te tuiraa po. E tupu te faaipoiporaa na mua ˈˈe, e i muri iho te feia apee e haere ai i te fare i reira e tupu ai te tamaaraa. Aita e mori i nia i te eˈa. Na te feia e apee ra e turama i te eˈa, e nehenehe atura te feia e tiai ra i te pae purumu e parau i na taata faaipoipo apî ia oaoa raua.

3, 4. a) O vai te anaanatae ra i na feia faaipoipo e to ratou mau apee, e nafea teie mau paretenia i te faaineineraa ˈtu ia ratou? b) Eaha te haapapuraa hau atu ta te tupuraa o teie parabole e horoa maira? c) Eaha te tia ia tatou ia rave e oaoa ˈi tatou?

³ Ia au iho â i te peu a te mau vahine, mea au roa na te paretenia te faaipoiporaa. No reira te tia ra hoê ahuru mau paretenia i te pae eˈa e te tiai ra ratou ia  tae mai na feia faaipoipo e to ratou mau apee i pihai iho ia ratou. No te faanehenehe roa ˈtu â i te oroa, rave atura ratou i te mau lamepa afaifai e ama ra, e pae anaˈe iho râ tei faaherehere i te hinu i roto i ta ratou mau farii. O te mau paretenia paari ïa. E mea tia mau ia anaanatae tatou i teie mahana i te tupuraa o taua parabole ra, no te mea ia au i te parau a Iesu Mesia, ua riro te reira ei haapapuraa hau atu e te ora mau nei tatou i te hopea o te amuiraa o te mau mea e vai nei. — Mataio 25:13.

⁴ Auê ïa tatou i te oaoa e mai te peu e faaite tatou i to tatou paari e ia ite tatou i te tupuraa o te faaipoiporaa rahi roa ˈˈe i roto i te mau faaipoiporaa atoa e tae roa ˈtu i te mau mea e ati mai i te reira! O vai ma i teie mahana tei fariihia i te tamaaraa? Te vai ra anei te hoê i rotopu ia tatou tei fariihia? E tuatapapa anaˈe na i te reira.

5. Eaha te taa-ê-raa e itehia ra i ǒ te feia e faaauhia ra i na paretenia hoê ahuru, e eaha te ohipa e tupu ra no te mea te maoro ra te Tane faaipoipo apî?

⁵ Ua faaauhia te parabole a Iesu no nia i na paretenia hoê ahuru i te “basileia o te ao [te mau raˈi]”, te faatereraa o te ao paatoa nei o te haamaitai i te huitaata taatoa nei. Ua parau o Iesu e: “E au te basileia o te ao [te mau raˈi] i na paretenia tino ahuru i reira, tei rave i ta ratou mau lamepa e haere atura ia farerei i te tane faaipoipo apî ra. E feia paari e toopae, e maamaa hoi e toopae. O te feia maamaa ra, i hopoi atura i ta ratou mau lamepa, aita râ i hopoi atoa i te mori [hinu]: area te feia paari ra, ua hopoi i ta ratou mau lamepa ma te mori [hinu] atoa i roto i ta ratou mau farii. Te maoro ra râ taua tane faaipoipo apî ra, tiaruhe paatoa ihora ratou e mairi ihora te taoto.” — Mataio 25:1-5.

6. a) Eaha ta te mau paretenia hoê ahuru e faahohoˈa ra? b) No te aha aita te parabole e faahiti ra i te parau no te vahine faaipoipo?

 ⁶ Eaha ta teie mau paretenia hoê ahuru e faahohoˈa ra? Te faahohoˈa ra ratou i te mau melo no a muri atu o te vahine faaipoipo a Iesu Mesia, te Tane faaipoipo apî i te pae varua. Eita e ore e tera te tumu i ore ai Iesu i faahiti i te parau no te vahine faaipoipo; o te tane faaipoipo anaˈe iho râ ta ˈna i faahiti. Ua papu-maitai-hia ˈtura ïa e o vai te mau paretenia, o te ore roa e nehenehe e faahohoˈa ˈtu i te tahi atu pǔpǔ taata.

7. I teihea tau i manaˈohia ˈi e te maoro ra te haereraa mai o te Tane faaipoipo apî i pihai iho i ta ˈna vahine faaipoipo, e no te aha?

⁷ Aita te tahoêraahia o te mau melo no te tau a muri aˈe o te pǔpǔ o te vahine faaipoipo i te Tane faaipoipo apî i nia i te raˈi no te faaipoiporaa, i tupu, mai tei manaˈohia, i te hopea o te mau “[tau taotiahia o te mau nunaa]” i te matahiti 1914 ra (Luka 21:24). No reira ïa, manaˈo atura taua mau melo ra e te maoro ra te haereraa mai o te Tane faaipoipo apî noa ˈtu e tei reira mau iho â oia i roto i to ˈna Basileia i nia i te raˈi mai te matahiti 1914 mai â. Mai te huru ra ïa e ua riro te mau matahiti mehameha mau o te Tamaˈi rahi matamua ei tau poiri roa no te pǔpǔ o te mau paretenia.

8. a) Nafea ia faataa e ia au i te hoê auraa taipe e ua tiaruhe e ua varea te mau paretenia i te taoto? b) Eaha te tumu te Tane faaipoipo apî i haere mai ai i roto i te hiero, e no te aha e mea faufaa to ˈna haereraa mai no te pǔpǔ o te vahine faaipoipo?

⁸ Ei faahohoˈaraa, e ua tiaruhe ihora ratou e varea ˈtura i te taoto. Ua faaea ihora te pororaa i te mau taata i te parau apî maitai no te haereraa mai o te Faatereraa o na tausani matahiti o te Mesia no te oaoaraa o te huitaata nei. I te matahiti hopea o te Tamaˈi rahi matamua, haamata ihora te hoê tau  haavaraa hopea no taua mau paretenia taipe ra. No te mea, ua haere mai te Arii haamanahia o Iesu Mesia i roto i te hiero i te pae varua. I to ˈna taeraa mai, ua haava ihora oia e ua tamâ ihora oia i te feia e tavini ra i te Atua ra o Iehova i roto i te hiero (Malaki 3:1-3). Ua tae mai ïa te tau no to ˈna tiaraa mai, ei Tane faaipoipo apî i nia i te raˈi, i reira oia e farii ai i roto i te mau raˈi i te mau melo maitihia no te pǔpǔ o te vahine faaipoipo e taoto ra i taua taime ra i roto i te pohe.

9. Eaha te taime e tia ˈi i te pǔpǔ o te mau paretenia ia faaarahia mai roto mai i te taoto o te vai-ohipa-ore-noa-raa, e no te aha?

⁹ I te matahiti 1919 ra, i muri iho i te matararaa mai na vau melo faatere o te Watch Tower Bible and Tract Society o tei faautua-hape-hia, ua tae atura te tau i reira te pǔpǔ o te mau paretenia e ora noa ra i nia i te fenua nei e ara mai i roto i te taoto o te vai-ohipa-ore-noa-raa. Te vai ra i mua ia ratou i te hoê ohipa e ravehia i roto i te ao taatoa nei no nia i te turamaraa i te mau taata. Ua tae i te taime no te mau paretenia e ta ratou mau lamepa e ama ra ia tia ˈtu i mua i te Tane faaipoipo, o te faaea ra i roto i te hiero pae varua. Nehenehe ihora te mau taata o te mau nunaa atoa e tairuru mai i “te fare o Iehova” tei faateiteihia i nia aˈe i te tupuai mouˈa, e faaauraa parau teie. — Isaia 2:1-4.

Faaineine ihora ratou i ta ratou mau lamepa

10. Eaha te auraa o te hinu i faahereherehia i roto i te mau farii a te mau paretenia paari?

¹⁰ Ua faaherehere te mau paretenia paari i te hinu i roto i ta ratou mau farii. Ma te ore e haamarirau, faaî ihora ratou i ta ratou mau lamepa i te hinu. Te faahohoˈa ra teie hinu i te Parau a Iehova, o tei riro ei pu no te maramarama, e i to ˈna atoa ra varua moˈa. Eaha te auraa o te hinu tei faahereherehia i roto i te mau farii o te mau paretenia paari? Teie ïa:  te varua moˈa i faahereherehia o te turama ra i te Parau papaihia a Iehova, e o te vai atoa ra i roto i te toea faatavaihia o te mau pǐpǐ o te Tane faaipoipo apî i maitihia i te varua i te taime e haamata ˈi te ohipa e ravehia i roto i te ao taatoa nei i muri iho i te tamaˈi, ohipa no te turama i te mau taata no nia i “te basileia o te ao [te mau raˈi]”.

11. Te faahohoˈa ra te farii taipe e hinu to roto ia vai?

¹¹ Ua faahohoˈahia te mau farii i te mau paretenia paari iho ia au i to ratou tiaraa fatu no te hinu taipe. E ere ïa te auraa e no oti noa maira te pǔpǔ o te mau paretenia i te faatavaihia i te varua o Iehova e aore ra na ratou iho i faatavai ia ratou; na te Atua râ i faatavai ia ratou i to ˈna ra varua. — Isaia 61:1, 2; Luka 4:16-21.

12. a) Eaha te parau tohu a Ioela tei tupu i nia i te mau paretenia paari? b) Eaha te taime e tia ˈi ia ratou ia turama ma te rave i ta ratou mau lamepa?

¹² I te mea e ua horoahia ˈtu ia ratou te ohipa no te turama i te ao no nia i te parau o te “basileia o [te mau raˈi]”, ua tupu ïa te mau parau tohu a Ioela (2:28, 29) i nia i te mau paretenia paari. Teie te faahitiraa a te aposetolo Petero no nia i taua mau irava ra: “Te parau maira te Atua, ia tae i te mau mahana hopea ra, e ninii atu ai au i tau [v]arua i nia iho i te taata atoa, e na to outou mau tamarii tamaroa ra e te mau tamahine e tohu, e e ite hoi to outou mau taata apî ra i te orama, e to outou hoi mau taata ruhiruhia ra, e taotootoahia ïa.” (Ohipa 2:17). No reira, mai te matahiti 1919 ra, e tia i te mau melo paari o te pǔpǔ o te mau paretenia taipe ia tuu i ta ratou mau lamepa taipe aore ra ravea no te turama, i nia, e o ratou iho hoi taua mau lamepa taipe ra. O te mea ïa ta ratou i rave no te horoaraa ˈtu i te maramarama i te feia e vai noa ra i roto i te poiri i te pae varua. Maoti hoi to ratou oraraa arataihia e te Parau e te varua o te Atua, riro atura ratou ei “mau  tiarama o te ao nei”. (Philipi 2:15.) Pee atura ratou i te taahiraa avae o te Tane faaipoipo apî a faaineine ai oia i te rave mai i te mau melo atoa o te pǔpǔ o te vahine faaipoipo i pihai iho ia ˈna i roto i te Basileia i nia i te raˈi i muri aˈe i to ratou poheraa i nia i te fenua nei. — Mataio 5:14-16.

Te mau faahopearaa o te huru maamaa i te pae varua

13. Eaha ta te mau paretenia paari i pahono i te aniraa a te mau paretenia maamaa?

¹³ Eaha te ohipa e tupu mai i nia i te pǔpǔ o te mau paretenia maamaa? Ua parau faahou maira Iesu e: “Ua parau atura te feia maamaa ra i te feia paari, Ho mai i te tahi vahi i ta outou mori [hinu] na; te pohe nei hoi ta matou mau lamepa. Ua parau maira râ te feia paari, na ô maira, Eiaha, o te ore hoi o te navai ia opere na tatou atoa; e haere râ outou i te feia hoo ra hoo atu ai i ta outou iho.” — Mataio 25:8, 9.

14. No te aha te mau paretenia i ore e vahi atu i ta ratou hinu i riro ai ei mau paretenia paari eiaha râ ei mau paretenia miimii?

¹⁴ Aita te mau paretenia i haapao noa ia ratou, ua faaite râ ratou i to ratou paari. Ua hinaaro mau ratou e faahope i ta ratou ohipa matamua oia hoi no te turama i te poiri no te Tane faaipoipo apî. Aita roa ˈtu ratou i faahepohia ia tahoê atu i roto i ta ratou ohipa maamaa e ia faaiti mai i te faito o te varua moˈa e vai ra i roto ia ratou no te tauturu atu i te mau paretenia maamaa i te pae varua. Aita ratou i faaineine aˈe ia ratou no te faaî oioi i te hopoia no te tavini e vai ra i mua ia ratou i te matahiti 1919.

15. a) I te omuaraa o te tau no te hau ra, o vai ma, i roto i te pǔpǔ o te mau paretenia, tei haamata i te faaite mai i te mau tapao no te maamaa i te pae varua? b) No te aha te mau paretenia paari i ore roa ˈtu ai e nehenehe e tauturu i te mau paretenia maamaa i te pae varua?

¹⁵ I te omuaraa o te hoê tau no te hau, ua haamata ihora te tahi mau taata o te faahua e mau  kerisetiano pûpûhia e bapetizohia ratou, i te faaite mai i te mau tapao no te huru maamaa i te pae varua. I muri aˈe i te poheraa te peretiteni matamua o te Taiete Watch Tower, o Charles Taze Russell, aita ratou i farii maitai i te huru apî faatupuhia e te mauhaa itehia a Iehova o tei tuuhia ˈtu i raro aˈe i te peretiteniraa a Joseph Rutherford. Aita to ratou mafatu i au i te huru tereraa o te mau ohipa. Ua faaite ratou i te mauruuru ore no te mau huru raveraa a Iehova i nia i to ˈna nunaa. No reira, aita roa ˈtura te pǔpǔ o te mau paretenia paari i nehenehe aˈe i te tuu atu i roto i te mau paretenia maamaa ra te hoê huru feruriraa maitai no te rave amui i te ohipa, e ua atea ê roa ˈtura teie mau paretenia maamaa.

16. Mea nafea te huru maamaa i te pae varua o te mau paretenia maamaa i te papu-roa-raahia?

¹⁶ Ua ite-maitai-hia ˈtura te maamaa i te pae varua. Mea nafea? Na roto hoi i te ereraa i te hinu taipe i te taime e hinaaro-rahi-hia ˈi te maramarama pae varua, e i reira atoa te mau ohipa apî i te haapapuraa mai e tei reira te Tane faaipoipo apî. Ei faahohoˈaraa, e tia ïa ia ratou ia haere atu e farerei i te Tane faaipoipo apî ma te hoê lamepa e ama ra. Tera râ, te feia i faaauhia ˈtu i te mau paretenia maamaa, e te pohe ra hoi ta ratou mau lamepa, ua faataa ê ihora ratou i te mau paretenia paari.

17. Ia au i tei papaihia i roto i te Mataio 25:10, eaha tei ere-roa-hia i te feia i faahohoˈahia i te mau paretenia maamaa ra?

¹⁷ Auê ïa ereraa faito ore no te taata o tei parau e no roto oia i te pǔpǔ o te mau paretenia, o tei ore râ i haapao i te haamaitairaa otahi roa no te farii i te Tane faaipoipo apî i te pae varua, o Iesu Mesia! Tera ïa te huru ereraa tei roohia i te mau paretenia no to tatou nei tau, mai te matara mai na roto i te faahohoˈaraa a Iesu: “E te haere atura ratou e hoo ra, tae  maira taua tane faaipoipo apî ra, e te feia [paretenia] i ineine ra, haere atura ïa e oia atoa i roto i te oroa faaipoiporaa, e opanihia ihora te uputa.” — Mataio 25:10.

18. a) Eaha te haamaitairaa ta te mau paretenia maamaa o to tatou nei tau e ore e farii mai? b) No te aha te mau paretenia maamaa i maoro roa ˈi i te tae mai no te apee i te mau taata e apee ra i na taata faaipoipo e no te tomo atu i roto i te fare no te apiti atu i te tamaaraa?

¹⁸ Auê te ati e no te mau paretenia maamaa o to tatou nei tau! I te tau poiri mau no te taatoaraa o te aamu o te huitaata nei, aita ratou i turama i te feia e parahi ra i roto i te poiri i te pae varua e i raro aˈe i te maruata o te pohe, e tupu mai i te “te tamaˈi i taua mahana rahi o te Atua Puai hope ra”. (Apokalupo 16:14.) Ma te hinu ore i roto i ta ratou mau lamepa taipe ra no te turama i to ratou eˈa, ua haere ê atura ratou e ua imi i te eˈa i roto i te poiri o te po. No reira aita ïa ratou i reira no te pee atu i te taahiraa avae o te Tane faaipoipo apî na muri mai i te feia apee oaoa o te haere ra na te uputa e o te tomo atu i roto i te fare maramarama maitai no te oroa faaipoiporaa. Ua erehia e ratou te tapao e itehia ˈi e pǐpǐ ratou na te Tane faaipoipo apî o te tiai ra ia tahoêhia ratou e o ˈna atoa ra i roto i te Basileia i nia i te raˈi. Aita ratou i “ineine” i te tau au ra. Ua riro ratou ei hiˈoraa no te faaara ia tatou.

19. Eaha te mau haamaitairaa e noaa mai ia tatou ia tuatapapa tatou i taua tumu parau nei i roto i to ˈna taatoaraa?

¹⁹ Ua faaite-maitai-hia to ratou peapea mau i te pae hopea o te faahohoˈaraa a te Mesia, te Tane faaipoipo apî, e no tatou ïa taua mau parau ra, no te mea te ora nei tatou i “te hopea o te amuiraa o te mau mea nei”. E tamau â tatou i te tuatapapa i taua tumu parau ra. Ma te haamaramaramaraa ia tatou, e riro te pene i muri iho i te faaoaoa ia tatou.

[Uiraa haapiiraa]

 [Hohoˈa api taatoa i te api 45]

Eita te feia e faaauhia i te mau paretenia maamaa ra e apiti atu i roto i te oroa faaipoiporaa.