Pene 20

Te hoê utuafare fetii taata oaoa i raro aˈe i te mana o te hoê Metua apî

1. No te aha te faaiteraahia mai te parau no te hoê mana metua apî e riro ai ei mea oaoa roa no te fetii taata nei?

 I MURI aˈe ia Aramagedo, e riro ïa te huitaata taatoa nei i te auraro i te mana o te hoê Metua tane apî. E ere anei teie te hoê parau apî maitai? E horoa mai teie mana metua i te ora mure ore i roto i te tiaraa taata hara ore i nia i te fenua e faarirohia ei paradaiso, e taata pohe ore hoi te Metua iho o te huitaata nei. E mana to ˈna no te horoa i te oraraa tia roa na te mau taata atoa ta ˈna e farii ei tamarii na ˈna i nia i te fenua nei.

2. No te aha e titauhia ˈi te hoê mana metua apî?

² E hinaarohia te hoê mana metua apî, no te mea aita te huitaata nei i raro aˈe faahou i te mana metua tei reira oia i te omuaraa, oia hoi te mana metua o tei Poiete i te taata. I roto i te papa-tupuna-raa mai ia Iesu e haere tia ˈtu ia Adamu ra, te taata matamua, te parauhia ra e: “Na Kainana, na Enosa, na Adamu.” — Luka 3:37, 38.

3. E riro te tatararaa mai ia ˈna mai raro aˈe mai i te mana metua o Iehova ei mea peapea mau no te huitaata nei, i roto i teihea auraa?

³ I te mea hoi e aita te huitaata nei i raro aˈe faahou i te mana metua o Iehova, e mau faahopearaa iino ïa tei noaa mai. Oia mau, ua roohia maira te huaai a Adamu i te pohe. E ua faaite-maramarama-hia maira te reira i roto i te Roma 5:12, e teie hoi ta tatou e taio: “E teie nei, no te taata hoê ra i ô mai ai te ino i  te ao nei, e no te ino hoi te pohe; e ua taea-atoa-hia te taata atoa e te pohe i te mea ua hara paatoa.” E taua “taata hoê ra” o Adamu ïa; na roto i to ˈna hararaa ma te opua mau, ua tatara maira oia ia ˈna mai raro aˈe mai i te mana metua o Iehova, to ˈna Poiete.

4. Ua riro atu o Adamu e te mau taata i raro aˈe i teihea mana metua?

⁴ Ua riro aˈera ïa o Adamu i raro aˈe i teihea mana metua? I raro aˈe i te mana o teihea metua tane to ˈna tuuraa i te huitaata nei? Ma te papu maitai, i raro aˈe iho â ïa i te mana o tei aratai ia ˈna ia faarue i te fetii o te mau tamarii faaroo a te Atua i roto i te mau raˈi e i nia i te fenua nei. O te mana metua ïa o te taata haavare matamua ra o te Diabolo ra o Satani. Eaha hoi ta taua enemi o Iehova ra i rave?

5. a) Ua aratai te Diabolo ra o Satani ma te aravihi i te vahine a Adamu ia ore ia auraro i te Atua, na roto i teihea ravea? b) No te aha e nafea to Adamu amoraa i ta ˈna hopoia ia au maite i te ohipa ta ˈna i rave?

⁵ Teie ta te aposetolo Paulo i parau i roto i te Korinetia 2, 11:3: “Mai ta te ophi i haavare atu ia Eva i to ˈna ra paari.” Ma te aravihi, ua haaparaparau aˈera o Satani i te hoê ophi i Edene ra, e ua faaite aˈera oia i te haavare matamua ia Eva ma te ore hoi e mǎtaˈu; ua pari aˈera hoi oia e e haavare o Iehova (Genese 3:1-7; Ioane 8:44). Aita o Adamu i aˈo noa ˈtu i ta ˈna vahine. Mai ia ˈna atoa, ua amu aˈera oia i te maa, ma te ore roa ˈtu e rave noa aˈe i te tahi mea no te faatitiaifaro i te ino e tupu. Ua turu tahaa noa aˈera ta ˈna ohipa ino i rave i te opuaraa a Satani. Ma te tuu atu i te hape i nia i te tumu mau, te na ô ra te Timoteo 1, 2:14 e: “E ere hoi o Adamu tei vare na, o te vahine râ tei vare, o tei harahia na ïa.”

O te tia mau ia riro ei Metua

6, 7. Ua ineine o Iesu i te amo i teihea tiaraa metua, e nafea te parau tohu bibilia i te faaiteraa mai i te reira?

⁶ Na roto i te patoiraa ˈtu i te haamori i “te atua o  teie nei ao”, ua faaite aˈera Iesu e e tia mau â oia ia riro ei piti o te Metua o te fetii taata nei (Korinetia 2, 4:4; Mataio 4:1-11; Luka 4:1-13). Mai to ˈna mai â fanauraahia mai ei taata, i te matahiti 2 hou to tatou nei tau, ua tano maitai te parau tohu a Isaia (9:6) i muri nei:

⁷ “Ua fanau mai hoi te hoê tama na tatou, ua horoahia mai te hoê tamaiti na tatou; ei nia i to ˈna ra tapono te hau vai ai: e mairihia to ˈna iˈoa, ia Hau ê, e Aˈo, te Atua puai, te Metua no te ui a muri atu, te Arii [Tamaiti hui arii] no te hau.” No reira, e tiaraa faufaa atu â to te ‘Tamaiti hui arii no te hau’ i nia i te huitaata nei: oia hoi te riroraa ei “Metua no te ui a muri atu”.

8. No te aha o Iesu i nehenehe ai e riro mai ei “Metua no te ui a muri atu” o te huitaata nei, e nafea to te aposetolo Paulo i te haapapuraa i te reira?

⁸ E tia i te Tamaiti a te Atua ia riro mai ei “Metua no te ui a muri atu” o taua huitaata nei no reira hoi oia i pûpû ai i to ˈna ora ei tusia ma te tiaraa taata tia. O ta te aposetolo Paulo ïa i papai i te na ôraa e: “Eita râ tei horoa-noa-hia mai e au i taua hara ra. E rave rahi tei pohe i te hara a te taata hoê ra, e rahi atu hoi te aroha o te Atua, e tei horoahia mai e taua aroha ra, i te tae i te taata e rave rahi, ia Iesu Mesia i te taata hoê ra. E teie nei, mai te taata atoa i taea i te utua faahapa i te hara a te taata hoê ra, ua taea-atoa-hia te taata atoa i te tia ia ora, i te parau-tia a te taata hoê ra.” — Roma 5:15, 18.

9. Nafea to Iesu riroraa ei Adamu piti no te huitaata nei, teie râ, mai hea mai oia ia faaohipa mai i to ˈna tiaraa metua i nia i te mau taata?

⁹ No reira, e au maite taua mau tumu parau faufaa mau ra te tahi e te tahi. Te taata tei rave i te “hara hoê roa” o Adamu ïa, te taata matamua i nia i te fenua nei. Na Iesu, te tahi atu taata parau-tia hoê ra,  i faatupu i te ohipa “parau-tia [hoê ra]. E nehenehe atura ïa oia e riro mai ei “Metua no te ui a muri atu” o te mau huaai o te taata hara ra o Adamu. Eita te tusia ta ˈna i horoa ma to ˈna tiaraa taata tia e oia atoa te pûpûraa ˈtu i te tiaraa taata nei i mua i te aro o te Haava rahi ra i roto i te mau raˈi, e faatia ia riro oia ei Metua mure ore no te huitaata nei i nia i te fenua nei. I to ˈna faatia-faahou-raahia mai mai roto mai i te feia pohe, ua hoˈi aˈera oia i roto i te mau reva varua e ua faateiteihia aˈera oia i te pae atau o Tei faaora mai ia ˈna. Teie tei parauhia no nia i taua tumu parau ra: “Ua oti hoi i te papaihia, e hamanihia te taata matamua o Adamu ei taata ora; area te Adamu hopea e [v]arua ora ïa.” (Korinetia 1, 15:45). E horoa mai hoi te Metua apî o te huitaata nei, to ˈna Metua faaamu, i te hoê haamataraa maitai roa i roto i te oraraa.

Te mau taata matamua i poietehia o Iesu hoi to ratou Metua

10. E riro mai Iesu na mua ei Metua no teihea mau taata?

¹⁰ E faaite mai te “Metua o te ui a muri atu”, te Arii  ra o Iesu Mesia, e o vai mau na ta ˈna mau tamarii matamua. Nafea hoi te reira? Na roto ïa i te faaoraraa i te mau milioni taata tei pûpû ia ratou no te Atua e teie e ora nei â, mai roto mai i “te ati rahi”. O te “feia rahi roa” ïa o te mau “mamoe ê atu”. — Apokalupo 7:9, 14.

11. Eaha te tau faahiahia roa i mua i te mau “mamoe” e ora atu mai roto atu i te “ati rahi”?

¹¹ Te hoê tau faahiahia e aita ˈtu to mua i te “feia rahi” roa i muri aˈe i “te ati rahi”. A tâpû-ê-noa-hia ˈi te mau puaaniho taipe o te parabole ta Iesu i faahiti no nia i te “tapao” o te “hopea o te amuiraa o te mau mea nei” mai nia ˈtu i te fenua nei, oia hoi a  haamouhia ˈi ratou e a muri noa ˈtu; e huru tupuraa taa ê mau ïa ta te “feia rahi roa” o te mau “mamoe ê atu”, tei hamani maitai i te toea o te mau “taeae” varua o te Mesia e ora nei â i nia i te fenua nei, e ite atu (Mataio 25:31-46). E riro te oraraa mai taua mau “mamoe” ra mai roto mai i “te ati rahi” e te tomoraa ˈtu ratou i roto i te Faatereraa hoê tausani matahiti a te ‘Tamaiti hui arii no te hau’ ra i tapuhia mai, i te ite atu i te mau haamaitairaa a te Basileia. O ratou te mau melo o te ora ˈtu i raro aˈe i te faatereraa a te ‘Tamaiti hui arii no te hau’ ra i nia i te fenua nei.

12. Eaha te mau parau a Iesu no nia i te tia-faahou-raa e faaite maira e o te ora mure ore te tiai maira i te feia e ô atu i roto i te tuhaa a te Basileia i nia i te fenua nei?

¹² I taua taime ra te mau parau, ta Iesu i faahiti hou oia a faatia faahou mai ai ia Lazaro, i nia i te feia e ora ˈtu i nia i te fenua i raro aˈe i te faatereraa o te Basileia. Teie hoi ta ˈna i parau: “Tei ia ˈu te tia-faahou-raa e te ora, o te faaroo mai ia ˈu ra, pohe noâ oia e ora â ïa. E te taata ora atoa nei e faaroo ia ˈu ra, e ore roa ˈtu ïa e pohe.” (Ioane 11:25, 26). E tauturu to ratou auraro i te Mesia ia noaa mai ia ratou i te ora taata tia i nia i te tuhaa a te Arii i nia i te fenua nei. E noaa atoa hoi i te taata rave hara aau tae tei pohe i pihai iho ia Iesu i te Calvaire, i te haamaitairaa no te tomo atu i roto i te Paradaiso (Luka 23:43). E haapao mau â Iesu i te mau mea atoa i taaihia i to ˈna tiaraa “Metua no te ui a muri atu”.

O te hoê oraraa oaoa teie e tiai mai nei i te feia pohe

13. Maoti te tia-faahou-raa o te feia pohe, o vai te mau taata tuiroo no te tau Tahito te itehia i nia i te tuhaa o te fenua nei o te Basileia?

¹³ Ua parau maira Iesu, te huaai tuiroo roa aˈe o Aberahama e e ora atoa ˈtu taua patereareha ra, e tae noa ˈtu hoi ta ˈna tamaiti o Isaaka e ta ˈna mootua o  Iakoba, i nia i te tuhaa o te Basileia a te Atua i nia i te fenua nei (Mataio 22:31, 32). E tupu mau â te reira maoti te tia-faahou-raa. Mai ta Iesu i parau, e faaroo te feia pohe atoa i roto i te apoo ra i te reo o te Tamaiti a te Atua e e haere mai ratou i rapae. Tei te haerea ta ratou e rave to ratou ora no a muri atu. — Ioane 5:28, 29; Apokalupo 20:12-15.

14. Eaha te mau faaineineraa e titauhia no te farii i te feia e faatia-faahou-hia i nia i te fenua nei; e o vai na mua te apiti i roto i taua mau faaineineraa ra?

¹⁴ E mau faaineineraa faufaa roa te tia ia ravehia no te farii atu i te mau taata e faatia-faahou-hia mai no te ora ˈtu i nia i te fenua nei i raro aˈe i te Basileia o te “Metua no te ui a muri atu”. O te feia e ora ˈtu i “te tamaˈi i taua mahana rahi o te Atua Puai hope ra”, te feia matamua o te haapao atu i te reira (Apokalupo 16:14, 16). E hia râ rahiraa taata i roto i taua “feia rahi” o te mau “mamoe ê atu” ra a te ‘Tamaiti hui arii no te hau’ i taua taime ra? Aita tatou i ite, te vahi papu râ, e navai maitai taua mau “mamoe” ra no taua ohipa nei.

15. Eaha te tiaraa taa ê ta te rahiraa e rave i raro aˈe i te faatereraa a te Metua faaamu o te huitaata nei?

¹⁵ Te parau atura te Salamo 45 i te ‘Tamaiti hui arii no te hau’ ei Arii, e i te mea hoi o ˈna te parauhia “Metua no te ui a muri atu” o te huitaata nei, teie ta taua salamo nei e parau atura ia ˈna: “E monohia mai to mau metua ra i to tamarii, e na oe ïa e faaarii i te mau fenua atoa nei.” (Salamo 45:16). Teie râ, hou aˈe hoi taua mau “metua” haapao maitai e faatiahia mai ai, ua nominohia ˈtura ïa te tahi mau taata no roto mai i te “feia rahi roa” e ora ˈtu i Aramagedo i nia i te tiaraa tamaiti hui arii. Oia mau, i roto i taua mau taata e ora ˈtu, te tavini nei â e rave rahi tausani taata ei matahiapo i roto fatata e 49 000 amuiraa o te  mau Ite no Iehova, o te haapao ra i te mau faufaa i te pae varua a ta ratou mau amuiraa.

16. a) Eaha te ohipa ta te feia e ora ˈtu i Aramagedo e rave i raro aˈe i te aratairaa a te mau tamaiti hui arii? b) Eaha te mau uiraa e tupu mai no nia i te tumu parau oia hoi o vai na mua te faatia-faahou-hia mai?

¹⁶ I raro aˈe i te aratairaa a taua mau tamaiti hui arii ra, e rave amui te feia e ora ˈtu i Aramagedo i te ohipa ma te itoito mau. Aita tatou i ite e eaha te mau huru faaueraa e horoahia ˈtu na te mau “[tamaiti hui arii]” i haamauhia “na te fenua atoa nei” e te ‘Tamaiti hui arii no te hau’ i nia i te raˈi, te vahi papu râ e ite atu te feia e ora ˈtu i Aramagedo i te mau taime ohipa mau. A feruri na eaha te mau ahu e tia ia nirahia ia nehenehe te feia e faatia-faahou-hia mai ia fanaˈo i te mau ahu au maitai, i te maa te tia ia haaputuhia, i te mau nohoraa e titauhia! Auê ïa tau faahiahia mau no te feia e haapao i taua mau faaineineraa ra! O vai râ te faatia-na-mua-hia? E na mua anei te feia no pohe noa ˈtura i te faatiahia mai e haere tia ˈtu ai i te feia matamua? O te taata i hamani-ino-hia ra o Abela e o Enoha anei, ta te Atua i rave, e tae noa ˈtu ia Noa, Aberahama, Isaaka, Iakoba e te mau peropheta haapao maitai atoa, te feia matamua e fanaˈo i te haamaitaraa taa ê, o te faatiahia mai?

17. Na vai e faaoti i te parau oia hoi o vai na mua te faatia-faahou-hia i nia i te fenua nei, e eaha te tiaraa i horoahia i taua Taata ra e faaite ra e e nehenehe mau ta ˈna e amo i ta ˈna mau hopoia?

¹⁷ Ua ite te ‘Tamaiti hui arii no te hau’ ra e o vai e na ˈna e opua. E maraa mau â ia ˈna i ta ˈna mau hopoia ei Metua apî o te huitaata i hoohia mai. Ua horoa-atoa-hia mai te tahi atu tiaraa no ˈna, oia hoi te tiaraa “Atua puai”. Oia, e riro mau oia ei taata Puai. E riro mau â te huru atua ta ˈna e faaite mai ei mea puai mau i te mea hoi e e faatia faahou mai oia  i te taatoaraa o te feia pohe i hoohia mai, i te haamanaˈoraa i to ratou mau iˈoa e to ratou iho huru (Ioane 5:28, 29; Ohipa 10:42). E nehenehe mau â ta ˈna e tataˈi i te mau ino atoa i faatupuhia e te Diabolo ra o Satani i roto i te roaraa e 6 000 matahiti o te oraraa taata nei.

18. a) Nafea to te Atua raveraa e ia ore o Adamu ia riro ei hui tupuna no Iesu Mesia? b) Nafea to Iesu neheneheraa e riro mai ei metua piti no te huaai a Adamu?

¹⁸ Ua riro mai anei te Adamu matamua, tei vaiiho mai i te utua pohe na ta ˈna huaai taatoa, ei tupuna no te taata ra o Iesu Mesia? Aita. E ere te metua tane o Iesu i te taata. Na te hoê paretenia i fanau mai ia ˈna, inaha ua tuu mai te Atua i to ˈna puai ora mai te mau reva varua mai i roto i te opu o taua potii ra. No reira, e ere atura ïa te taata hara ra o Adamu te tupuna o taua Tamaiti a te Atua i nia i te fenua nei. Teie râ, ua riro maira te Adamu piti ei varua faaora. E mana ˈtura ïa to ˈna no te faatupu i te parau tohu a Isaia na roto i te riroraa mai ei “Metua no te ui a muri atu” o te mau huaai a te Adamu matamua, ta ˈna e hoo mai no te horoa ˈtu na ratou i te ora tia i roto i te paradaiso i nia i te fenua nei.

19. Eaha te mau taairaa apî ta Iehova e faatupu e te mau taata, e eaha te mau ravea a te Diabolo ra o Satani o te faahuru-ê-hia?

¹⁹ Mea na reira ˈtura ïa te Metua i te raˈi o Iesu Mesia e riro mai ei Metua Rahi i te raˈi ra o te fetii taata e faatiamâhia. No reira hoi taua fetii taata ra e tomo atu ai i roto i te mau auraa apî e tei Poiete i te raˈi e te fenua. Aita aˈenei te opuaraa matamua a Iehova i fifi. Inaha, ua faahuru ê atura ïa o Iehova i te mau opuaraa hairiiri e te faufau a te Diabolo ra o Satani. E ite paatoa te fetii taata nei i hoohia mai i te reira. Auê hoi mahana oaoa mau te mahana i reira o Iesu Mesia e faaohipa ˈi to ˈna mana ei Metua o te fetii taata nei ta ˈna e haapii atu i roto i te Paradaiso i faahoˈi-faahou-hia mai i nia i te fenua nei!

[Uiraa haapiiraa]

[Hohoˈa i te mau api 164, 165]

Te riro nei te Mesia, tei horoahia te mana arii, ei “Metua no te ui a muri atu” na te feia ta ˈna e farii ra.