Pene 11

Te taa-ê-raa te Ierusalema i te fenua nei i te Ierusalema no nia maira

1. a) E riro anei ïa te haamouraa o Ierusalema ei ohipa apî? b) No te aha e ore ai e riro ei ati no te huitaata nei mai te peu e e haamou-faahou-hia o Ierusalema?

 I TEIE mahana, ua papu maitai i te mau ati Iuda i te fenua nei e e vai noa mai te Ierusalema o te pae Hitia o te râ ma e a muri noa ˈtu. Te haafaufaa rahi noa nei â atoa hoi te mau melo o te amuiraa faaroo kerisetiano i taua oire nei i reira to Iesu faaotiraa i ta ˈna taviniraa. Ua riro anei ïa te reira ei haapapuraa e e vai maoro mai oia? Ua haamouhia hoi oia i mutaa ihora, i te matahiti 607 hou to tatou nei tau na to Babulonia e i te matahiti 70 o to tatou nei tau na to Roma. E riro anei ïa ei ati no te huitaata nei ia haamou-faahou-hia oia? Eita; eita te oire i te mea faufaa roa no te faatupu i te mau haamaitairaa o te faufaa aberahama i nia i te huitaata nei. No nia ia Aberahama iho, teie hoi tei papaihia: “Te titau ra hoi oia i taua oire niu mau ra, o te Atua te faaau e te faatia ra.” — Hebera 11:10.

2. a) Mea nafea to te aposetolo Paulo faaiteraa e te vai râ te tahi atu Ierusalema, tei teitei aˈe hoi? b) O vai te Fatu e te Tane faaipoipo atoa hoi a taua Ierusalema ra, e o vai te tamaiti a taua vahine faaipoipo ra?

² Teie ta te aposetolo Paulo i papai: “Area taua Ierusalema no nia maira, o te vahine tiamâ ïa, o to tatou atoa ïa metua vahine.” (Galatia 4:26). Te faaite ra oia i ǒ nei e taua Ierusalema no nia maira o Sara ïa e o ˈna hoi te faanahonahoraa e te vahine  atoa a te Aberahama Rahi ra o Iehova. No reira, te mau tamarii o “te Ierusalema no nia maira” e mau kerisetiano i maitihia ïa e te varua, mai ia Paulo.

“Te riroraa mai te Ierusalema no nia maira” ei oire hui arii

3. a) Afea ra to te Atua ra o Iehova haamataraa i te faatere mai ei arii? b) I hea roa to Iesu Mesia faaariiraahia, e eaha ta te reira iho i faatupu i nia i te ariiraa o Iehova?

³ Mai te hoperaa mai “to te Etene anotau”, i te matahiti 1914 ra, e huru hui arii tei itehia e “te Ierusalema no nia maira outou” (Luka 21:24). Mai taua mai â hoi taime ra te tupuraa te Salamo 97:1, i reira tatou e taio ai e: “O Iehova te arii, ia ouˈauˈa te fenua.” Ua tupu atoa hoi te Salamo 99:1, 2, e na ô ra e: “O Iehova te arii, (...) Te rahi nei Iehova i Ziona! e teitei rahi to ˈna i te taata atoa ra.” I te matahiti 1914, ua tae aˈera te taime no ˈna no te faaore roa i te taataahiraa i te basileia o te opu fetii o Davida, tei tiahia mai na te oire hui arii i mutaa ihora o Ierusalema. Ua tuu aˈera hoi oia i ta ˈna Tamaiti ia Iesu Mesia i nia i te terono, ua haaparahi aˈera i to ˈna rima atau i roto i “te Ierusalema no nia maira”, i nia i te raˈi, ma te faariro maira hoi ia ˈna ei oire hui arii. Ua faaetaeta-atoa-hia aore ra ua faaaano-atoa-hia te oire iho o Iehova na roto i te faariroraahia o Iesu Mesia ei Arii.

4. I muri aˈe i teihea mau ohipa i tupu, “te Ierusalema no nia maira” te riroraa mai ei oire hui arii mai te matahiti 1914 maira?

⁴ No reira, i muri aˈe i te fanauraahia te Basileia o te raˈi mai i te matahiti 1914 ra, e i muri aˈe o Satani e ta ˈna mau demoni e tiavaruhia mai ai mai te raˈi mai, mea tia iho â ïa ia faahitihia i teie nei mau parau: “Teie mai nei te ora, e te puai, e te basileia o to tatou Atua, e te mana o ta ˈna ra Mesia: ua hurihia hoi te tihotiho i to tatou mau taeae i raro, o tei tihotiho ia ratou i mua i te aro o to tatou Atua i  te rui e te ao.” (Apokalupo 12:1-10). “Te mana no to ˈna ra Mesia” oia ïa ia faatere mai oia ei Arii i roto i te “Ierusalema no nia maira”. Ua riro mau â oia ei oire hui arii i taua matahiti oaoa mau ra oia hoi i te matahiti 1914 ra.

Te tamahine a “te Ierusalema no nia maira”

5, 6. a) Eaha te oire apî taipe ta Ioane i ite i roto i te Apokalupo 21:1, 2? b) Ia au i te Zekaria 9:9, 10, o vai teie e farii popou nei i te Arii, e na roto i teihea mau parau?

⁵ Hau atu i te piti ahuru ma pae matahiti i muri aˈe o Ierusalema e haamouhia ˈi na te mau nuu roma i te matahiti 70, ua ite aˈera te aposetolo Ioane i te mau orama faahiahia mau o te buka Apokalupo. I roto i te Apokalupo 21:1, 2, te faahiti ra o Ioane i te parau no te hoê “Ierusalema apî”. E o te mau melo o taua “Ierusalema apî” ra teie e farii popou nei i te Arii apî e haere maira ma te iˈoa o Iehova, mai ta te Zekaria (9:9, 10) e titau ra:

⁶ “A oaoa hua na oe, e te tamahine o Ziona e; a pii na, e te tamahine o Ierusalema e; inaha, te haere maira to arii ia oe ra: e parau-tia ta ˈna, e o te Ora hoi oia, haehaa to ˈna, i te parahiraa i nia i te asini, e te pinia, te fanauˈa o te asini. E faaorehia e au te pereoo i Epheraima, e te puaahorofenua i Ierusalema, e faaore-atoa-hia hoi te fana tamaˈi: e na ˈna e parau i te mau etene i te parau hau: e riro to ˈna hau mai te miti mai e tae noa ˈtu i te tahi miti, e mai te pape mai e tae noa ˈtu i te mau hopea o te fenua ra.”

7. Maoti o vai taua parau tohu nei i tupu ai i ‘te hopea o te amuiraa o te mau mea nei’, e mea nafea hoi i te tupuraa?

⁷ Ua tupu te hoê tuhaa o taua parau tohu nei ia Iesu i tomo mai i Ierusalema ma te hanahana i te matahiti 33 ra. Mai te matahiti 1919 maira, ua ite oia i to ˈna tupuraa hopea i nia i te toea o te Iseraela i te pae varua. I rotopu i te mau melo o te toea i faatavaihia, aita e amahamaharaa mai tei itehia i  rotopu i te mau opu no Epheraima tahito ra e no Ierusalema te oire pû o te basileia o Iuda toopiti hoi na opu to ˈna. Ia tavini ratou i roto i te autahoêraa i te mau faufaa o te basileia mesia no te faatupu i te parau tohu a Iesu e vai ra i roto i te Mataio 24:14 e te Mareko 13:10, te faaite tuutuu ore nei ïa ratou i te Arii hanahana ra oia hoi o Iesu Mesia. Ma te autahoê mau, te auraro nei ratou ma te aueue ore i ta ˈna faatereraa arii i ‘te hopea o te amuiraa o te mau mea nei’. — Mataio 24:3.

8. a) O vai te ore e farii nei i te Arii hanahana? b) Te haere tia nei te mau nunaa i hea?

⁸ Ia haama na te Ierusalema o te Repubilita no Iseraela e te mau nunaa e faahua kerisetiano nei o te amuiraa faaroo kerisetiano, no te mea aita ratou e farii nei i te Arii hanahana teie e haere mai nei ma te iˈoa o Iehova. Area te mau Ite o te Atua ta te Arii e haere maira ma to ˈna iˈoa, te tavini nei ïa ratou ma te oaoa i roto i to ˈna hiero (Isaia 43:10-12). Ua araara maitai to ratou mata i te pae varua no te ite e ua fatata roa te Repubilita no Iseraela e te tahi atu mau nunaa atoa, e melo ratou aore ra eita no te mau Hau amui i te tapae i te “[vahi] o Aramagedo te iˈoa i te parau hebera ra”. (Apokalupo 16:16.) Inaha, te fatata roa maira te tamaˈi a te Atua Puai hope ra!

9. Mea nafea te oraraa no a muri aˈe o te Ierusalema i te fenua nei ia taa ê i te oraraa no a muri aˈe o te Ierusalema Apî?

⁹ Mea peapea mau â te huru tupuraa e itehia nei i roto i te Ierusalema i te fenua nei, mea oaoa râ te huru tupuraa e itehia ra e te Ierusalema apî. I te tau i haapaohia ra, e riri roa na “tara auahuru” o te “puaa [taehae]” politita, e tae noa ˈtu te “puaa” iho no te amuiraa a te vahine faaturi ra, oia hoi o Babulonia Rahi, te hau emepera o te mau haapaoraa hape atoa o te ao nei. E faaite mai ratou i taua riri uˈana no ratou ra i nia i te Ierusalema i te fenua  nei tei faaturahia e te ao faaroo e e haamou roa hoi ratou ia ˈna i te auahi (Apokalupo 17:16). Eita roa ˈtu râ hoi ta ratou e nehenehe e tairi atu i te Ierusalema apî i te raˈi ra.

10. Te taa ê ra te huru o te Ierusalema i te fenua nei i te huru o te mau kerisetiano maitihia e te varua e o te “feia rahi roa” o to ratou mau hoa i roto i teihea auraa?

¹⁰ Te tamau nei â te toea o te mau kerisetiano i maitihia e te varua teie e tiaturi nei e e ô atu ratou i roto i te Ierusalema apî i te raˈi ra i te haapopou i te Arii e te Tane faaipoipo atoa hoi o Iesu Mesia e te “feia rahi roa” o te tahi atu mau Ite no Iehova. Na roto i taua huru haerea haapao maitai ra, te pûpû mai nei ratou i te hoê taa-ê-raa papu maitai e te Ierusalema tahito ra. Mai te haamauraahia te Repubilita no Iseraela, aita te oire o Ierusalema, e oire ati iuda hoi ia parauhia, i faaea i te pee i te hiˈoraa o te mau taata o te Ierusalema o te senekele matamua. Ma te pee i te faaohiparaa matapo a te feia faaroo, te tamau noa nei â oia i te faarue ia Iesu Mesia, tei ia ˈna hoi te tiaraa e te puai no te faatere i roto i te basileia i te raˈi ra.

11, 12. a) Maoti o vai i tupu mau ai te parau tohu faahiahia mau a Iesu e vai ra i roto i te Mataio 24:14? b) I teie mahana, i roto i te Repubilita no Iseraela, eaha ta taua taatiraa nei ta ratou e rave ra i te ohipa?

¹¹ Parau mau, mai te hoperaa mai â te mau tau o te mau Etene aore ra Nunaa i te matahiti 1914 ra, to te ‘Tamaiti hui arii no te hau’ faatereraa mai ma te ite-ore-hia e te mata taata nei. Area râ, mai te haruraahia mai â o Ierusalema na te fenua Beretane i te Tamaˈi rahi Matamua e i te tuuraahia ˈtu i raro aˈe i te faatere a to Beretane na te Totaiete o te mau Nunaa, aita te parau apî maitai no nia i te Basileia i te raˈi ra tei horoahia ˈtu i roto i te rima o te Tamaiti mesia a te Arii ra o Davida i faaea i te “[parau haere] te evanelia o te basileia nei e ati  noa ˈˈe teie nei ao, ia ite te mau fenua atoa”, mai ta Iesu Mesia iho i tohu mai. — Mataio 24:14.

¹² Maoti hoi te ohipa i ravehia e te mau Ite no Iehova i raro aˈe i te aratairaa a te Taiete Watch Tower i tupu ai taua parau tohu faahiahia mau nei. E amaa ta taua taatiraa nei i Tel-Aviv, e na reirahia mai hoi te mau ohipa a te mau Ite no Iehova i te arataihia i Iseraela. E mau amuiraa no te mau Ite itoito i roto i te pororaa i te evanelia o te Basileia atoa ta taua fenua nei.

13. a) Eaha te ohipa e tupu ia hope roa te pororaa i te parau apî maitai o te Basileia o te Atua i te ravehia? b) Mea faufaa mau anei ia patuhia te tahi atu Ierusalema i te fenua nei, noa ˈtu â ïa no te farii ia Davida ia faatiahia mai oia mai te pohe mai?

¹³ Ua tohu maira Iesu Mesia e ia oti taua “evanelia o te basileia” nei i te porohia, o te “hopea ihora [ïa o te amuiraa o te mau mea taatoa nei]” (Mataio 24:14). No reira, ua fatata roa mai te haamouraa o te Ierusalema o te fenua nei. I teie nei, mai te huru ra ïa e aita e faufaa ia patuhia te tahi atu Ierusalema i nia i te vahi iho o te Ierusalema tahito, e aita atoa hoi no te farii ia Davida tei riro ei arii i nia i taua oire ra, ia faatiahia mai oia mai roto mai i te feia pohe i raro aˈe i te Faatereraa hoê tausani matahiti a to ˈna huaai hui arii ra o Iesu Mesia (Ioane 5:28, 29). Eita râ hoi e ore e e faatiahia mai o ˈna i te vahi i reira to ˈna taviniraa i te Atua ra o Iehova.

Te hoê tau oaoaraa

14, 15. a) Mea nafea to te aposetolo Ioane faataaraa mai i te Ierusalema hanahana apî e pou mai mai te raˈi mai no te haamaitai i te huitaata nei? b) No te aha to tatou nei tau e tano maitai ai no te mau oaoaraa, e eaha te ohipa oaoa mau e fatata roa mai nei no te huitaata nei?

¹⁴ Ua tahoêhia te Ierusalema apî i te amuiraa apî hanahana o te mau mea nei. Teie ta te aposetolo Ioane i parau: “E ite atura vau i te raˈi apî e te fenua apî; ua mou hoi tei mutaa iho raˈi, e tei mutaa ihora  fenua; e aore aˈera e miti. E ite atura hoi au, o Ioane, i te oire moˈa ra, ia Ierusalema apî, i te pouraa mai mai ǒ mai i te Atua i nia i te raˈi ra, ua faanehenehehia mai te vahine i faanehenehehia no te faaipoiporaa i tana tane ra. Ua faaroo atura vau i te hoê reo rahi no te raˈi maira, i te na ôraa mai e, Inaha tei ǒ te taata ra te sekene o te Atua, e e parahi oia i roto ia ratou ra, e ei taata ratou no ˈna, e ei pihai atoa iho te Atua ia ratou, ei Atua no ratou.” (Apokalupo  21:1-3). No reira, e riro mau â te Ierusalema ei haamaitairaa no te huitaata atoa nei.

¹⁵ Ua tae atura hoi te taime no tatou ia oaoa. Ia amui atoa na tatou i te reira i te hoê ohipa oaoa mau e fatata roa mai nei no te ao taatoa nei. Oia hoi te faaipoiporaa o te pǔpǔ o te vahine faaipoipo i roto i to ˈna taatoaraa, te Ierusalema apî e te Arii ra o Iesu Mesia. Te faahiti ra hoi te Apokalupo (19:6-9) i taua parau ra i te na ôraa e: “Ua faaroo atura vau [te aposetolo Ioane] i te haruru mai te reo o te hoê pupu rahi ra, e mai te haruru miti rahi ra, e mai te haruru patiri rahi ra i te na ôraa e, Haleluia: tei te Fatu ra tei te Atua Puai hope ra te hau. E oaoa tatou, e ia rahi atu â te oaoa, e e haamaitai hoi ia ˈna: ua tae hoi i te faaipoiporaa a te Arenio, e ua faanehenehe ta ˈna vahine ia ˈna iho. E ua tuuhia ia ˈna te ahu i te ahu hua teatea e te anaana: e taua ahu hua ra, o te parau-tia ïa a te feia moˈa ra. Ua parau maira oia ia ˈu, A papai na, E ao to tei parauhia e haere mai i te amuraa rui faaipoiporaa a te Arenio ra.”

16. a) Na roto i to ˈna faaipoiporaa i nia te raˈi e te Arenio, e riro mai te Ierusalema Apî ei metua vahine no vai? b) E riro te Ierusalema Apî ei haamaitairaa ia au maite i te aha?

¹⁶ E riro mau â taua faaipoiporaa ra e te Arenio ra o Iesu Mesia ei oaoaraa rahi aita e faaauraa no te Ierusalema apî i roto i te mau raˈi. Na roto i taua ohipa ra e nehenehe ïa oia e riro mai ei “metua vahine oaoa i ta ˈna ra mau tamarii”. (Salamo 113:9.) Oia mau, e riro mai oia ei metua vahine no te raˈi ra no te mau taata atoa tei ora e tei pohe ta ta ˈna tane here mau i hoo mai na roto i te ravea o to ˈna tusia taata tia roa ahuru ma iva senekele i teie nei. Ia au maite i te faufaa aberahama i faaauhia mai e Iehova tau tausani matahiti i teie nei, e riro mai te Ierusalema apî ei haamaitairaa no te mau fetii atoa o te fenua nei.

[Uiraa haapiiraa]

[Hohoˈa i te api 96]

I roto i te amuiraa apî o te mau mea, e haamaitai te Ierusalema Apî i te huitaata atoa nei.