Te titau nei te ao i te hau e te ino ore
Pene 1
Te titau nei te ao i te hau e te ino ore
1, 2. Eaha ta te huitaata e titau mau ra, e no te aha?
TE HAU aita e ino, terâ ta tatou e hinaaro nei no te fenua. Aita e mea i hinaarohia aˈenei mai te reira te huru. E ere noa o ta te taata taataitahi e titau ra, o te hinaaro atoa ra te reira o te fetii taata atoa nei.
2 Te ora nei â te huiraatira o te fenua nei i te hoê anotau taa ê mau i roto i te mau anotau atoa. ‘Nafea hoi tatou e nehenehe ai e parau i te reira? Inaha o te anotau riaria roa ˈˈe hoi o te aamu o te taata nei ta tatou e ora nei, te anotau o te mauhaa atomi?’
3. a) Eaha te tumu te mau nunaa e titau ai te paura atomi? b) Eaha ta te manaˈo maitai e tia ia faaue ia ratou ia rave?
3 Te parauhia ra e, hau atu i te vau nunaa te nehenehe e hamani i te paura atomi, e te manaˈohia ra e i te matahiti 2000, e nehenehe e 31 fenua e hamani i te mau mauhaa atomi. Eaha hoi ta ratou e titau ra? No te parururaa ia ratou, no te haamǎtaˈuraa tera e tera nunaa te vai ra ta ratou teie mau mauhaa ia riaria roa taua mau nunaa ra i te mau mauhaa atomi. Ia hiˈohia i te huru tupuraa o te ao nei, te titauhia ra i te manaˈo maitai i te mau nunaa ia faaoromai ratou te tahi i te tahi.
4. Noa ˈtu â ïa e aita te Poiete i haafifi i te mau tutavaraa a te taata no te haamau i te ino ore eaha ïa ta ˈna opuaraa i roto i taua tuhaa ra?
4 Te titau ra anei tatou i te hoê hau e aita e ino no ô mai i te taata ra? Noa ˈtu â ïa e aita te Poiete i haafifi i te mau tutavaraa a te taata no te haamau e no te tapea i te hau e te ino ore i roto i te ao taatoa nei, e nehenehe râ ta ˈna e haamâha i ta tatou e titau nei oia hoi i to tatou manaˈo natura e aore ra tano maitai i te titau e te hau e te ino ore. E taua ravea ra e mea tia mau ïa. Ua haamau atoa oia aore ra ua haapao atoa oia i te hoê tau no te faaore roa i te feia atoa e faatupu nei i te ino e teie hoi e faaino nei i to ˈna mau taata haamori. Auê ïa i te oaoa e ia ite tatou e fatata maira taua tau ra.
5. Eaha ta te papai salamo faauruahia i parau no nia i te fenua e eaha te opuaraa a te Poiete i te taata nei?
5 I muri aˈe i te tahi tau tausani matahiti aamu taata nei e te peapea hoi, e tia ia manaˈo e te titau uˈana nei te taata i te hau e te ino ore. Mai to ˈna poieteraahia mai, o te fenua te vahi nohoraa o te taata. Aita anei te papai salamo faauruahia i parau e: “Te mau raˈi ra, na Iehova ïa mau raˈi; area te fenua nei, ua horoa mai oia i te reira na te tamarii a te taata nei.” (Salamo 115:16). Mai te omuaraa mai â, te opuaraa hamani maitai a te Poiete, ia ora ïa te taata ma te oaoa i nia i te fenua nei ta ˈna i horoa mai no ˈna.
6. E nehenehe ta te taata matamua e ta to ˈna mau huaai e ohipa mai mai te Atua ra, i roto i teihea tuhaa?
6 Ia au i te aamu no nia i te poieteraahia tei faaitehia i roto i te Genese 2:7, “a hamani ai te Atua ra o Iehova i te taata i te repo fenua nei, ua haapuai ihora oia i te aho ora i roto i tana apoo ihu ra, riro aˈera te taata ei taata ora”. Eita roa ˈtu e noaahia i te tahi noa ˈˈe mea ora i nia i te fenua nei to ˈna faito e to ˈna aravihi: mai te Atua e mana to te taata no te rave i te hoê faatereraa. Inaha, taua mana ra no te faatere, e ere noa ïa no te taata matamua, e nehenehe atoa râ to ˈna mau huaai e fanaˈo i te reira.
7. Nafea te noaaraa mai ia Adamu te hoê vahine, e eaha ta ˈna i parau a arataihia mai ai taua vahine hara ore ra ia ˈna ra?
7 Tera te tumu te Poiete i horoa mai ai i te hoê vahine na Adamu. E riro mai oia ei metua vahine no te mau taata atoa e parahi mai a muri aˈe i nia i te fenua nei. No reira, a arataihia mai ai taua vahine ra i te taata ra, ua na ô aˈera te taata e: “I teie nei, e ivi teie no to ˈu nei ivi, e iˈo hoi no to ˈu nei iˈo.” Na roto i taua mau parau nei, te parau ra ïa o Adamu e o ˈna te vahine o te huru taata nei, oia hoi te auraa ’ishshah, huru vahine no roto mai i te parau hebera ’ish, hurihia na roto i te parau ra taata. — Genese 2:21-23.
8. Eaha te mau faaueraa ta te Poiete i horoa ˈtu i na taata matamua?
8 Ua parau maira te Poiete e te Metua i te raˈi ra i na taata matamua e: “Ia fanau orua, e ia rahi roa, e faaî i te fenua nei, e e haavi iho.” (Genese 1:28). Tera te ohipa apî roa i roto i te aamu o te mau mea maramarama i poietehia. Aita te mau varua e faaea ra i roto i te mau raˈi itea-ore-hia e te mata i hamanihia na roto i te ravea o te fanauraa.
9. Nafea to Salamo 8:4, 5 faataaraa mai i to te Atua faanahonahoraa i te mau mea?
9 Mea tano mau iho â ïa e a poietehia ˈi te fenua nei ‘ua fatu aˈera te mau fetia poipoi i te himene e ua pii noa te mau tamarii a te Atua i te oaoa’. (Ioba 38:7.) I taua tau ra, mea hau e mea au maite te ao nei. I roto i te Salamo vau, e faahanahana ra i te faanahonahoraa a te Atua i te mau mea, teie ta te papai salamo i parau no nia i te taata: “I raro iti aˈe oia i te mau melahi i te hamaniraahia e oe ra, e ua faakorona oe ia ˈna i te hinuhinu e te tura.” (irava 4 e te 5). Ia au i taua salamo nei, ua tuu mai te Atua i te mau mea atoa i nia i te fenua nei i raro aˈe i te taahiraa avae o te taata.
Te faraa mai te hoê faatereraa enemi
10. a) Eaha te ohipa i tupu hou te tamarii matamua a te taata e fanauhia mai ai? b) Eaha atura ïa te nehenehe e haamauhia i nia i te huitaata nei?
10 Te ohipa maere roa ˈtu, hou aˈe te tamarii matamua i fanauhia mai ai, ua tupu aˈera te orureraa i roto i te faanahonahoraa rahi iho a te Atua ra o Iehova i roto i te ao taatoa nei. E nehenehe hoi taua huru tupuraa ra e aratai tia ˈtu i te hoê faatereraa apî, te hoê mana tei hau ê i te natura taata nei, ia faataa-ê-hia iho â râ te huitaata nei i te faanahonahoraa rahi a Iehova i roto i te ao taatoa nei. E haamauhia ïa te hoê faatereraa enemi i reira. E tia râ hoi ia faaohipahia te haavare matamua na roto i te oreraa e faaite mai i te huru mau o te Atua ra o Iehova.
11. Na roto i te oreraa e faaite mai i te huru mau o Iehova, ua aha ihora ïa te patoi matamua?
11 Na roto i taua haavare matamua ra, ua riro maira te patoi matamua a te Atua ei haavare matamua e ei diabolo. Ma te horoa i te hoê taa-ê-raa papu maitai, ua na ô maira o Iesu Mesia e: “O vau te eˈa, e te parau mau, e te ora.” (Ioane 14:6). E teie ta ˈna i parau atu i to ˈna mau enemi i te pae faaroo: “O te Diabolo to outou na metua, i faatia ˈi â outou i te hinaaro o te outou metua ra: e taparahi taata oia mai te matamua mai â: aore oia i haapao i te parau mau, no te mea aore e parau mau i roto ia ˈna. Ia parau oia i te parau haavare ra, ua parau ïa i te parau au ia ˈna ihora, e haavare oia, e e metua hoi no te haavare.” — Ioane 8:44.
12. a) Mea nafea to te Diabolo faaiteraa mai i te haavare matamua, e eaha hoi tei roohia i nia ia Eva? b) Eaha te ohipa i tupu ia Adamu i amu i te maa i opanihia ra?
12 Na roto i te arai o te hoê ophi i roto i te ǒ i Edene ra, aore ra paradaiso faahiahia mau, ua faahiti aˈera te Diabolo i taua parau haavare ra i te vahine matamua. Ua parau aˈera hoi oia e ua haavare mai to ˈna Poiete ia ˈna, ma te ueue atura ïa i te aehuehu i roto i te feruriraa o Eva. Ua faatupu aˈera oia i roto ia ˈna i te hoê manaˈo papu ore i roto i te huru ite ore ta ˈna i manaˈo, e inaha, ua amu aˈera oia i te maa i opanihia. Ua faahepo atura ia Adamu, ta ˈna tane, ia rave atoa e ua tahoê maira oia ia ˈna i roto i ta ˈna patoiraa i te Atua ra o Iehova (Genese 3:1-6). Ua erehia aˈera na taata matamua faaroo ore i te hau ta raua i fanaˈo na e te Atua e ua tiavaruhia aˈera raua i rapae i te paradaiso faahiahia; ua ora aˈera oia i reira, i roto i te ino. Te faaite maira te Roma 5:12 i te huru tupuraa peapea mau i te na ôraa e: “E teie nei, no te taata hoê ra i ô mai ai te ino i te ao nei, e no te ino hoi te pohe; e ua taea-atoa-hia te taata atoa e te pohe i te mea ua hara paatoa.”
13. Eaha te opuaraa ta tatou tataitahi e tia ia rave i teie nei mahana?
13 Te tuu maira ïa te huru tupuraa ta tatou e ite nei, ia tatou, i mua i te hoê maitiraa papu maitai: te faatereraa enemi a te Diabolo ra o Satani, “te atua o teie nei ao”, aore ra te faatereraa a Iehova, te Atua Teitei, te Atua Mana Hope o te ao nei. — Korinetia 2, 4:4; Salamo 83:18.
Nafea ia faaea hau e te Atua
14. Nafea tatou e nehenehe ai, i teie nei iho â mahana, e fanaˈo i te hau e te ino ore?
14 No to ratou iho ati, te patoi nei te rahiraa o te taata i te ravea i faaineinehia e te Atua Puai Hope no te horoa mai na to ˈna feia haamori i te hoê hau e aita e ino i teie anotau ino roa ˈˈe o te aamu taata nei. Inaha, o Iehova “te Atua hau” e tei mua ia tatou te haamaitairaa e ite atu ai tatou i te hoê hau e te ino ore mau o te vai e a muri noa ˈtu (Roma 16:20; Philipi 4:6, 7, 9). O te hau e aita e ino ta ˈna e horoa mai nei i teie nei na ta ˈna mau tavini i te fenua nei, na ta ˈna faanahonahoraa itehia, ia au i ta ˈna mau parau tǎpǔ o te tupu aita e feaaraa. No tatou atoa taua mau parau tǎpǔ ra ia tahoê maite atu tatou i te faanahonahoraa itehia a te Atua i nia i te fenua nei.
15. Mea tano ore mau anei ia manaˈo e e faanahonahoraa ta te Atua, e eaha ta Iesu Mesia i farii no nia i taua tumu parau nei?
15 Eita roa ˈtu hoi e tu i te mau haapiiraa maramarama maitai a te mau Papai, ia tiaturi tatou e aita ta te Atua iho e faanahonahoraa aore ra e nunaa faanahonahohia. Ua farii mau Iesu Mesia e e faanahonahoraa ite-mata-hia ta to ˈna Metua. E tae roa ˈtu i te Penetekose o te matahiti 33, o te faanahonahoraa ati iuda hoi tei ô i roto i te mau auraa e taai ia ratou i te Atua ra o Iehova na roto i te ravea o te ture a Mose. — Luka 16:16.
16. a) Ua riro o Mose ei arai i rotopu ia vai e ia vai? b) E arai o Iesu Mesia, te Mose Rahi, i rotopu ia vai e ia vai?
16 Mai te nunaa Iseraela i tahito ra i faaau atu i te hoê faufaa e o Iehova na roto i te arai o Mose, oia atoa te nunaa Iseraela i te pae varua, “te Iseraela atoa o te Atua ra”, i faaau i te hoê faufaa e o ˈna na roto i te hoê arai (Galatia 6:16). O ta te aposetolo Paulo ïa i papai i to ˈna hoa kerisetiano i te na ôraa e: “Hoê hoi Atua, e hoê hoi arai i ropu i te Atua e te taata, o te taata ra o Iesu Mesia.” (Timoteo 1, 2:5). Ua riro anei o Mose ei arai i rotopu i te Atua ra o Iehova e te huitaata taatoa? Aita, ua riro râ oia ei arai i rotopu i te Atua o Aberahama, o Isaaka, o Iakoba e te nunaa o to ˈna mau huaai i te pae tino. Na reira hoi o Iesu Mesia, te Mose Rahi, e ere oia i te Arai i rotopu ia Iehova e te huitaata atoa nei. E Arai râ oia i rotopu ia Iehova, to ˈna Metua i te raˈi ra, e te nunaa o te Iseraela varua, tei taotiahia i nia i te 144 000 melo. E faaauhia taua nunaa i te pae varua ra i te hoê nǎnǎ iti “mamoe” a Iehova. — Roma 9:6; Apokalupo 7:4.
Tiai mamoe, eiaha râ no te “nǎnǎ iti” anaˈe
17. a) Ua haamau o Iehova ia Iesu Mesia i nia i teihea tiaraa? b) Eaha ta ˈna i parau atu i te feia e faatere atu i roto i te Basileia i nia i te raˈi?
17 I roto i te Salamo 23:1, teie ta te arii no Iseraela tahito, o Davida i parau ma te faauruahia: “O Iehova to ˈu Tiai, e ore roa vau e e ere.” Ua haamau o Iehova te Titai mamoe rahi roa ˈˈe, ia Iesu i nia i te tiaraa “tiai mamoe maitai”. (Ioane 10:11.) I roto i te Luka 12:32, teie ta Iesu i parau atu i te feia o ˈna hoi to ratou Tiai mamoe maitai: “Eiaha e mǎtaˈu e ta ˈu nǎnǎ iti e; e mea hinaaro na to ˈu Metua i te horoa mai te basileia no outou.”
18. a) Te faahohoˈa ra te mau Netinimi e te mau tamarii a te mau tavini a Solomona e ere hoi i te ati iseraela, ia vai? b) Ua tahoêhia ratou ia vai?
18 I te tau tahito ra, ua tahoê mai te mau taata e ere i te ati Iuda, mai te mau Netinimi e te mau tamarii a te mau tavini a Solomona e ere i te ati Iseraela, i te nunaa Iseraela (Ezera 2:43-58; 8:17-20). Na reira atoa i teie nei mahana, ua pûpû taatoa te mau tane e te mau vahine ia ratou i te Atua na roto i te arai o Iesu Mesia, noa ˈtu â ïa e ere ratou i te mau ati Iseraela i te pae varua. Ua amui mai râ ratou i te toea o te Iseraela i te pae varua, i te mea hoi e ua pûpû ratou ia ratou no Iehova na roto i te arai o Iesu Mesia, “o tei horoa ia ˈna iho ei hoo i te taata”. (Timoteo 1, 2:6.) I teie nei mahana, mea rahi roa ˈtu ïa ratou ia faaauhia i te mau melo 144 000 Iseraela i te pae varua o te faatere atu i roto i te Basileia i nia i te raˈi.
19. Eaha ta Iesu i parau no te faaite e eita noa oia e riro ei Tiai mamao no te “nǎnǎ iti”?
19 No reira, i te tau i haapaohia e te Atua, e riro mai o Iesu Mesia ei Tiai mamoe no te hoê nǎnǎ rahi roa ˈtu â, oia hoi te hoê nǎnǎ “mamoe” o te fatu atu i te hoê faufaa i nia i te fenua. O taua mau mamoe ra hoi ta ˈna e manaˈo ra, ia ˈna i parau e: “E mamoe ê atu â ta ˈu, e ere i to teie nei aua, e aratai atoa mai au ia ratou e tiaˈi, e faaroo mai hoi ratou i to ˈu reo, ia hoê aˈe nǎnǎ e hoê hoi tiai.” Ma te haamanaˈo atoa i taua mau “mamoe ê atu”, te aposetolo Ioane i papai ai no nia ia Iesu e: “E oia hoi te taraehara i ta tatou nei hara; e ere hoi i ta tatou anaˈe ra, i ta to te ao atoa nei râ.” — Ioane 10:16; Ioane 1, 2:2.
20. a) A faaau te numera o te mau “mamoe ê atu” i te numera o te mau melo o te toea o te “nǎnǎ iti”. b) Eaha ta te mau aupururaa hamani maitai a te Tiai mamoe maitai, i hopoi mai no ratou?
20 I teie nei, fatata 9 000 taata teie e parau nei e e mau melo ratou no te toea o te “nǎnǎ iti” o te mau mamoe i te pae varua. Taa ê atu, e rave rahi milioni tane e vahine tei pûpû ia ratou no te Atua, tei tahoê mai i te toea faatavaihia ra no te haere na nia i te taahiraa avae o te Tiai mamoe maitai ra, o Iesu Mesia. Ua purara haere ratou i roto hau atu i te 200 fenua o te ao nei. Eaha ta te mau aupururaa haapao maitai ta te Tiai mamoe maitai e faatupu nei no ratou? Te hau ïa e aita e ino! Mai te peu e aita e hau i roto ia ratou, eita atoa ïa te autahoêraa mau e aueue ore e itehia i rotopu ia ratou. Mai te peu aita ratou e tapitapi ra ma te here no te mau faufaa i te pae varua o te tahi e te tahi, eita roa ˈtu ïa ratou e fanaˈo i taua hau ra. No reira, ua haamata ïa to ratou hinaaro i te hau e te ino ore i roto i te ao taatoa nei, i te tupu.
[Uiraa haapiiraa]
[Hohoˈa i te mau api 4, 5]
Te vai ra i te Poiete i te huru otahi roa e te tia no te haamaha i te hinaaro o te taata no te hau e te ino ore.
