Pene 19

Ua fatata roa “te tamaˈi i taua mahana rahi o te Atua Puai hope ra”

1. a) E fatata roa te mau nunaa i te faahepo i te Atua Puai Hope ra ia papai i te aha i roto i te “buka tamaˈi a Iehova”, e eaha hoi taua buka ra? b) E matara te hoê o te mau pene faufaa roa ˈˈe o taua “buka” ra i nia i teihea tamaˈi?

 INAHA, ua tae te mau nunaa i te taime e faahepo ai te Atua Puai hope ra ia faaoti i “te buka Tamaˈi a Iehova”. (Numera 21:14.) I te parau mau, ua riro taua buka nei ei buka no nia i te mau tamaˈi i arataihia mai e Iehova no to ˈna nunaa. Ma te papu maitai, ua taio o Mose i te reira. Peneiaˈe, te haamata ra no nia i te tamaˈi hanahana i arataihia e Aberahama no te aro i te mau arii i haru ia Lota, oia hoi na Iehova i aro no te patereareha (Genese 14:1-16, 20). Fatata roa “te buka o te mau tamaˈi a Iehova” i te matara i nia i te hoê tumu parau apî e faaite mai i ta ˈna rê hanahana roa ˈtu â. Te iˈoa o taua tamaˈi ra, “te tamaˈi i taua mahana rahi o te Atua Puai hope ra”, i Aramagedo; te tamaˈi o te tapao i te mahana hopea o te mau mea nei (Apokalupo 16:14-16). Mai te omuaraa e tae noa ˈtu i te hopea, e faaite mai teie buka nei aita aˈenei te Atua Puai hope ra i pau aˈenei i te tamaˈi.

2, 3. a) Mai te omuaraa mai â o te kerisetianoraa, ua aratai anei o Iehova i te mau “tamaˈi” iho? b) Na te aha e aratai ia Iehova ia aro mai no ta ˈna mau tavini i teie nei tau?

² Parau mau, mai te omuaraa mai â o te kerisetianoraa e tae roa mai i teie nei, ua faaora mai Iehova  i to ˈna nunaa taa ê atu hoi i te tamaˈi iho. Aitâ oia i aro aˈenei no to ˈna mau ite kerisetiano mai ta ˈna hoi i rave no Iseraela, i raro aˈe i te Ture a Mose. Ua fatata roa râ te tau i teie nei i reira oia e tono ai i ta ˈna mau nuu faehau i roto i te hoê tamaˈi no te paruru i ta ˈna mau tavini haapao maitai i teie nei tau. Mea nafea hoi taua tamaˈi o Aramagedo ra ia tupu mai?

³ Hou aˈe taua tamaˈi a te Atua ra e tupu ai, e haamou-atoa-hia o Babulonia Rahi, te faatereraa o te mau haapaoraa hape i roto i te ao taatoa nei. E riro te Diabolo ra o Satani e tae noa ˈtu hoi te feia politita aita ta ratou e haapaoraa o te haamou atu ia Babulonia rahi, i te riri no te mea e e te mau Ite no Iehova anaˈe te pǔpǔ faaroo o te ora nei. Eita e taeahia i te mau faatere o te ao nei i ta ratou opuaraa, oia hoi te faatupuraa i te hoê ao tiaturi ore i te Atua. No reira ratou e riri ai i te feia haamori ia Iehova, te Atua ta ratou e ore nei e farii e ta ratou atoa hoi e patoi nei i te mana arii i roto i te ao taatoa nei. No reira o te Atua atura ïa ta ratou e aro atu. — Apokalupo 17:14, 16; hiˈo Ohipa 5:39.

E faaohipa faahou o “Iehova sabaota” i ta ˈna mau nuu faehau

4. a) Eaha ïa te huru o Iehova ia aro mai o Goga? b) E haapapu mai taua huru nei i te aha ia au i te iˈoa ra o “Iehova sabaota” ra?

⁴ E aratai te Diabolo ra o Satani te Goga no Magoga taipe i taua aroraa ra i te nunaa o Iehova. Ia tuu o Goga i ta ˈna mau nuu e tiaturi ore i te Atua no te aro atu ia ˈna e no te eiâ e no te haamou roa hoi i reira o Iehova e ohipa mai ai e e aro atu ai no to ˈna nunaa mai ta Ezekiela (38:2, 12, 18-20) i tohu mai. Ua faaite-atoa-hia mai te huru o Iehova na roto i teie mau parau a Zekaria (14:3): “Ei reira Iehova e haere ai, a aro ai i taua mau fenua ra, mai ta ˈna hoi  i aro i te mahana tamaˈi ra.” I reira e faaite ïa te Atua o te Bibilia i mua i te aro o te mau nunaa o teie tau e Atua tamaˈi noâ oia, mai te tau o te Iseraela tahito ra. Oia mau, te faaite mai nei te mau Papai hebera ia ˈna 260 taime na roto i te iˈoa ra “Iehova sabaota”. — Salamo 24:10; 84:12.

5, 6. a) Eaha te tamaˈi e tupu i reira; e na vai e aratai i te mau nuu no te raˈi mai i te aroraa? b) Eaha te faatiaraa parau ta te aposetolo Ioane e faaite maira no nia i te ôraa mai te mau nuu o te raˈi ra i roto i te aroraa?

⁵ Ia tae mai “te mahana rahi o te Atua Puai hope ra”, ua taˈi atoa ïa te ôe o “te tamaˈi” e tapao i taua mahana ra. I te faaueraa a Iehova, e faaô mai o Iesu Mesia, to ˈna Raatira rahi, e ta ˈna mau nuu no te raˈi ra o te amui mai e hia rahiraa miriadi melahi, i roto i te aroraa no nia i te iˈoa o Iehova; mai te huru ra ïa e taparuru maira e hia rahiraa taata i nia i te puaahorofenua (Iuda 14, 15). Mai te hoê taata faatia parau ra no nia i te hoê tamaˈi, te horoa mai nei te aposetolo Ioane i te hoê faataaraa no nia i te rê hanahana mau e noaa i te Raatira rahi a Iehova i “te tamaˈi o te mahana rahi o te Atua Puai hope ra”:

⁶ “Ite atura hoi au i te raˈi i te vetearaahia, e inaha, e puaahorofenua teatea, e o tei parahi i nia ihora, ua parauhia oia, e Haapao mau ta ˈna e Te Parau mau, e haava oia e te tamaˈi hoi i te tamaˈi ma te parau-tia ra. Mai te ura auahi ra o ˈna mata, e rave rahi te korona i nia iho i tana upoo; (...) E ua pee maira te mau papaupea o te raˈi ra ia ˈna i nia i te puaahorofenua teatea ra, ma te ahu hua teatea, e te viivii ore i te ahuraa. E ˈoˈe ooi tei na roto mai i tana vaha, e tairiraa na ˈna i te mau fenua ra; e e tavana oia i nia iho ia ratou ma te sepeta auri ra: e na ˈna e taataahi i te neneiraa uaina ra o te hoturaa rahi o te riri o te Atua Puai hope ra. E e iˈoa to ˈna i papaihia i nia iho i to ˈna ahu e to ˈna humaha, o te Arii o te mau Arii,  e te Fatu o te mau Fatu ra.” — Apokalupo 19:11-16.

7. Eaha ïa te auraa no te mau nunaa te taataahiraa i te neneiraa o te riri o te Atua?

⁷ E aratai te Arii e te Raatira rahi o Iesu Mesia, i te mau nuu no te raˈi ra i roto i te hoê aroraa e roaa mai hoi ia ratou te rê i nia i te enemi i haaputuhia i Aramagedo. E faariro oia i te tahua aroraa ei neneiraa rahi. I te mea hoi e “e taataahi atoa [te Arii o te mau arii] i te neneiraa uaina ra o te riri o te Atua ra”, te auraa ra e rarerare roa ïa te mau nunaa. Mai te mau vine i para roa, e hurihia ˈtu ratou i roto i te hoê “neneiraa” rahi roa i reira “te riri o te Atua [Puai hope]” e arataihia ˈtu ai e a rarerare roa ˈtu ai ratou. E ati mai te mau nuu no nia i te mau raˈi i roto i te taataahiraa te “neneiraa rahi uaina o te riri o te Atua”. — Apokalupo 14:18-20.

8. Nafea Iehova ia faataa mai i ta ˈna huru aroraa?

⁸ Eita te mau Ite no Iehova i nia i te fenua nei e rave i “te ˈoˈe” no te aro atu i te mau nuu a Goga. O Iehova anaˈe te na reira. Na ˈna taua tamaˈi ra. I reira taua mau nunaa o te ao nei ra tei aravihi i te pae no te ite paari e ite atu ai ia ˈna ia aro mai. Faaroo mai ia ˈna ia faatia mai i ta ˈna iho ohipa e rave: “E na ˈu e parau i te ˈoˈe ei rave ia ˈna [Goga] e ati noa ˈˈe tau mau mouˈa atoa nei, te parau maira te Fatu ra o Iehova; e te mau ˈoˈe atoa a te taata atoa nei, ei rave anaˈe ïa i to ˈna iho taeae. I te maˈi pohe e te toto ta ˈu parau ia parau atu ia ˈna ra; e ma te ûa rahi, e te ofai rahi ûa-paari, e te auahi, e te gopheri; e na ˈu e haamairi mai i te ûa i nia ia ˈna, e i nia i to ˈna ra mau pǔpǔ, e te taata e pee ia ˈna ra. E na reira vau i te faarahi ia ˈu iho, e te haamaitai ia ˈu iho; e itehia hoi au e te mau fenua atoa e rave rahi; e ite hoi ratou e, o vau o Iehova.” — Ezekiela 38:21-23.

 Mau mauhaa a te Atua e faaohipahia no te aro i te enemi

9. Eaha vetahi mau mauhaa ta Iehova e faaohipa ˈtu i roto i ta ˈna tamaˈi no te aro atu i to ˈna mau enemi?

⁹ I te pae no te mau mauhaa tamaˈi, e faaohipa Iehova i te mau puai o te mau mea o ta ˈna i poiete: te mau pape pue e faatupuhia e te ûa, te mau ûa paari e nehenehe e haapohe, te mau vero auahi e tae noa ˈtu hoi i te gopheri, i te pihaaraa mai mai roto mai i te mau pape o te abuso e te mau uira puai mau. Ia faaohipa mai te Atua i ta ˈna mau mauhaa no te tairi i to ˈna mau enemi, no te rahi hoi te maramarama o te ao mai te rui ra, aita ˈtura ïa e faufaa faahou to te mahana e to te avae. Mai te huru ra ïa e e faaea na maramarama e piti nei, mai te  huru atoa hoi e ua faaea raua i te ohipa mai ei marama, ua vaiiho raua na te mau mauhaa pura mau a Iehova te tiaraa ei mori e ei maramarama (Habakuka 3:10, 11). E rave rahi mau mea a te natura e vai ra ia Iehova ra no te mahana aroraa. — Iosua 10:11; Ioba 38:22, 23, 29.

10. Ia au i te Zekaria 14:12 e faaohipa Iehova i te aha i te “mahana aroraa”?

¹⁰ I te “mahana aroraa” e fatata maira, e faaohipa atoa Iehova i te maˈi pee mai te hoê “pohe” aore ra ati. Teie ta te peropheta ra o Zekaria i papai no nia i taua tumu parau ra: “Teie râ te pohe ta Iehova e tairi mai i te taata atoa ra i tei aro ia Ierusalema ra; E pau noa to ratou iˈo tia noa ˈi to ratou avae i nia, e  pau noa hoi to ratou mata i roto i te apoo mata mau ra, e pau noa hoi to ratou arero i roto i to ratou vaha.” — Zekaria 14:12.

11. Eaha te ohipa e tupu ia tairi mai “te pohe” i te feia e aro mai i te nunaa o Iehova?

¹¹ E “pohe [ati]” mau aore ra eita, e haamamû roa oia i te mau vaha o tei hamama no te parau i te mau haamǎtaˈuraa riaria mau. E pe roa hoi to ratou arero! I te mea hoi e ua po te mata taehae mau o te feia e aro mai, e tairi noa ˈtura ïa ratou mai te matapo ra te huru. E pe to ratou mau mata! I te mea hoi e te tia noa râ te feia aro puai mau aitâ hoi i pohe atura, e ere-roa-hia ratou i te puai. E pe atoa te iˈo e tapoˈi ra i to ratou mau ivi! — Hiˈo Habakuka 3:5.

12. Nafea “te pohe” ia tairi i te mau mauhaa e tae noa ˈtu hoi te mau vahi puhaparaa o te mau enemi?

¹² E tairi taue noa mai te “pohe” i to ratou mau aua faehau. E mau roa te mau mauhaa tamaˈi atoa i haaputuputuhia no te aroraa (Zekaria 14:15; hiˈo Exodo 14:24, 25). Te faaite mai nei te mau parau a Zekaria (14:6) i te faufaa-ore-raa o taua mau tamaˈi ra: “E e riro hoi ia tae i taua mahana ra, e ore e rahi hua te maramarama; e arehurehu râ. I taua mahana ra, e ore roa ˈtu te hoê noa ˈˈe maramarama na te raˈi mai oia hoi te haamaitairaa a te Atua e hiti i nia ia ratou.” Eita roa ˈtu te maramarama i hamanihia e te feia aivanaa no teie nei tau e nehenehe noa ˈˈe e faaore i te poiri e faatupuhia mai i te mea e aita faahou te haamaitairaa a te Atua. E mau roa te mau puai o te natura, mai te huru ra ua paarihia i te toetoe.

13. Eaha te amuihia mai i te riaria ta Iehova e tairi mai i nia i te feia e aro mai?

¹³ E tia atoa ia amuihia mai i roto i taua hohoˈa riaria mau ra i te arepurepuraa ta te Atua e tuu mai i rotopu i te feia aro. I reira ïa e mutu ai te autahoêraa  ta ratou i taai no te aro i te mau Ite no Iehova. No te feia aro i roto i te mau aua aroraa i Roma e i matapohia no to ratou taupoo, e tairi noa ïa ratou te tahi i te tahi mai te matapo ra te huru. E rahi roa te arepurepuraa a taparahi noa ˈi ratou te tahi i te tahi. — Zekaria 14:13.

14. a) Eaha hoi te rahiraa o te ati i taua taime ra, e nafea te mau manu e tae noa ˈtu te mau animala ia apiti mai i roto i te upootiaraa a Iehova? b) Eaha ïa te huru o te feia e ora ˈtu i nia i “tei pohe ia Iehova ra”?

¹⁴ I taua mahana ra, mea rahi mau â te ati e tupu mai, no te mea mea rahi atoa hoi te mau puai e amui atu ia Goga i roto i taua aroraa ra (Apokalupo 19:19-21). Parau mau, taua tamaˈi ra e tamaˈi ïa o te tupu i roto i te ao taatoa nei, no te mea eita roa ˈtu te hoê noa ˈˈe tuhaa o te fenua nei e erehia i te haamouraa. Taa ê atu i te reira, eita te feia e pohe i roto i te tamaˈi i Aramagedo e tanuhia e aita atoa hoi e menema no te tanu ia ratou ei haamanaˈoraa ia ratou. E amui mai te mau huru manu atoa e te mau huru puaa atoa i te rê a te Atua na roto i te paia-roa-raa i te mau tino pohe ta ratou e amu mai, e oia hoi, e tamâ atura ïa ratou i te mau tino pohe atoa e itea mai mai te pera ra te huru i nia i te fenua taatoa nei; eita hoi ratou e taˈihia e eita atoa e tanuhia na te feia e ora ˈtu i te mea hoi e mea faufau roa na taua mau taata nei ia ratou (Ezekiela 39:1-5, 17-20; Apokalupo 19:17, 18). E riro mau “tei pohe ia Iehova” ei haama e a muri noa ˈtu. — Ieremia 25:32, 33; Isaia 66:23, 24.

Ua faahanahanahia te iˈoa o Iehova

15. Eaha te ohipa faahiahia roa e tupu i reira, e eaha ïa ta te reira e faatupu i nia i te iˈoa o Iehova?

¹⁵ No reira, na roto ia Iesu Mesia, ta ˈna Raatira rahi, e hanahana o “Iehova sabaota” e a muri noa  ˈtu. Te ohipa faahiahia roa ˈtu â o te aamu o te ao nei, oia hoi te faatitiaifaroraa te mana hope o Iehova i roto i te ao taatoa nei e te faaraaraa to ˈna iˈoa rahi ra (Ezekiela 38:23; 39:6, 7). E teitei aˈe o Iehova i nia aˈe i to ˈna iho roo i papaihia i roto i te “buka tamaˈi a Iehova” e i roto i te mau Papai hebera o te Bibilia Moˈa (Hiˈo Isaia 63:12-14). E hanahanaha mau â te iˈoa o Iehova maoti te rê faahiahia mau e noaa mai ia ˈna i roto i “te tamaˈi i taua mahana rahi o te Atua Puai hope ra”. Ma te oaoa, e arue te mau hoa atoa o taua iˈoa nei ia ˈna e a muri noa ˈtu; e e himene ratou no te faahanahana ia ˈna.

16. I te mea hoi e ua fatata roa te “tamaˈi i taua mahana rahi o te Atua Puai hope” ra i te tupu, eaha ïa te pure e pûpûhia no te “feia rahi roa”?

¹⁶ Ia aro mai na o Iehova sabaota e te Arii ra o Iesu Mesia i pihai iho ia ˈna (Salamo 110:5, 6)! Ia amui atoa mai na ta ˈna mau ite haapao maitai i te fenua nei ma te oaoa i roto i taua upootiaraa ra tei ore aˈenei hoi i iteahia aˈenei, e noaa mai ia ˈna na roto i te arai o ta ˈna Arii, o Iesu Mesia, i roto i “te tamaˈi i taua mahana rahi o te Atua Puai hope ra”! Ia haere mai na te “feia rahi roa” ma te oaoa ‘mai roto mai i te ati rahi’ e ia riro atoa hoi ratou ei ite no ˈna i nia i te fenua nei (Apokalupo 7:14)! Ia ora na oia i raro aˈe i ta ˈna parururaa hamani maitai e ia tomo atu hoi i roto i te Faatereraa hoê tausani matahiti o ta ˈna ‘Tamaiti hui arii no te hau’ ra o te upootia mai hoi, e i reira te tamaˈi e ore roa ˈi! Ia riro na oia i pihai iho i te feia e faatia-faahou-hia mai ei haapapuraa mau no te faatitiaifaroraa i te mana hope o Iehova o te riro hoi te tiamâraa i te haamauhia! Ia aruehia te Atua i te mea hoi e e papai oia i te pene nehenehe roa ˈˈe o “te buka tamaˈi a Iehova” ia vai noa mai na taua aamu ra no nia i ta ˈna upootiaraa o te ore hoi e nehenehe e faaau i roto i te mau buka o te aamu o te ao nei!

[Uiraa haapiiraa]

[Hohoˈa i te mau api 156, 157]

E aro “Iehova sabaota” i te mau nunaa.