E itehia te vai-maitai-raa i rotopu i te nunaa o te Atua
Pene 17
E itehia te vai-maitai-raa i rotopu i te nunaa o te Atua
1, 2. Nafea te huru tupuraa o te huitaata nei ia tuati i tei farereihia e te mau taata i roto i te hoê vahi i ino e te vero?
AHIRI e ua ino roa te vahi ta oe e faaea ra i te hoê vero rahi. Ua parari roa to oe fare, e aita ta oe e tauihaa faahou. Mea varavara te maa. Mai te mea ra ïa e aita e ravea faahou. E inaha, te tae mai nei te mau tauturu aita i manaˈohia e e tae mai. Te tae rahi mai nei te maa e te ahu. E patuhia te hoê fare apî no oe. Eita e ore oe i te mauruuru roa i te taata i horoa mai i taua mau tauturu ra na oe.
2 Te tupu nei te hoê ohipa mai te reira te huru i to tatou nei tau. E mai taua vero ra, ua faatupu hoi te orureraa hau a Adamu e o Eva i te ino rahi i nia i te huitaata nei. Ua erehia aˈera te taata nei i to ˈna nohoraa i roto i te Paradaiso. Mai reira mai, aita te mau faatereraa a te taata i nehenehe faahou e paruru i te taata i te tamaˈi, i te ohipa taparahi taata, e i te parau-tia ore. E ta te mau haapaoraa hape i vaiiho mai, te haapoheraa ïa i te mau nahoa rahi taata i te poia i te maa maitatai i te pae varua. I roto i te hoê auraa i te pae varua, te horoa mai nei te Atua ra o Iehova i te maa, i te ahu, e i te nohoraa. Nafea hoi oia ia faatupu i te reira?
“TE TAVINI HAAPAO MAITAI E TE PAARI”
3. Nafea o Iehova ia horoa mai i te mau tauturu na te huitaata nei, mai tei faaitehia e teihea mau hiˈoraa?
3 E pinepine te mau tauturu i te horoahia mai na roto i te hoê arai faanahonahohia, na reira atoa o Iehova, ua horoa mai oia i te maa varua na to ˈna nunaa na roto i te hoê arai. Ei hiˈoraa, ua riro te mau ati Iseraela ei “amuiraa [na] Iehova” te tahi tau 1500 matahiti i te maoro. I roto ia ratou, te vai ra o te tavini ra ei arai na te Atua no te haapii i te ture. (Paraleipomeno 1, 28:8; Paraleipomeno 2, 17:7-9) I te senekele matamua o to tatou nei tau, ua faatupu o Iehova i te faanahonahoraa kerisetiano. Ua haamauhia te mau amuiraa, e ohipa na hoi ratou i raro aˈe i te aratairaa a te hoê tino aratai a te mau aposetolo e te mau taeae paari. (Ohipa 15:22-31) Na reira atoa i teie mahana, te haa maira o Iehova i roto i to ˈna nunaa na roto i te arai o te hoê pǔpǔ faanahonahohia. Nafea tatou e ite ai i te reira?
4. O vai tei itehia ei “tavini haapao maitai e te paari” i to tatou nei tau, e nafea te mau tauturu a te Atua i te pae varua ia horoahia mai?
4 Ua parau o Iesu e i te tau no to ˈna vairaa mai i roto i te mana o te Basileia, e itehia “te tavini haapao maitai e te paari” e horoa ra i te “maa i te hora mau ra” na Ta ˈna mau pǐpǐ. (Mataio 24:45-47) A haamauhia ˈi o Iesu ei Arii i nia i te raˈi i te matahiti 1914, o vai mau na ïa taua “tavini” ra? Papu maitai, e ere roa ˈtu te mau upoo faatere haapaoraa a te amuiraa faaroo kerisetiano. I te paeau rahi, te faaamu ra ratou i ta ratou mau nǎnǎ i te mau manaˈo e turu ra i ta ratou iho mau faatereraa i roto i te Tamaˈi Rahi Matamua. Ua operehia râ te maa varua maitai i te tau mau ra na te pǔpǔ o te mau kerisetiano mau i faatavaihia e te varua moˈa o te Atua e ua riro hoi ratou ei tuhaa no ta Iesu e parau ra te “nǎnǎ iti.” (Luka 12:32) Ua poro teie mau kerisetiano faatavaihia i te Basileia o te Atua eiaha râ te mau faatereraa a te taata. Ei faahopearaa, i te roaraa o te mau matahiti, ua apiti atu te tahi tau mirioni “mamoe ê atu” aau parau-tia i te “tavini” faatavaihia no te faatupu i te haapaoraa mau. (Ioane 10:16) Ma te faaohipa i te ‘tavini haapao maitai’ e ta ˈna Tino Aratai i teie mahana, te aratai nei te Atua i to ˈna nunaa faanahonahohia no te horoa i te maa, i te ahu, e te nohoraa i te pae varua e au no te feia atoa e hiaai ra i taua mau tauturu ra.
“[TE] MAA I TE HORA MAU RA”
5. Eaha te huru tupuraa i te pae varua e itehia nei i roto i teie nei ao i teie mahana, e eaha hoi ta Iehova e rave ra no te reira?
5 Ua parau o Iesu e: “E ore te taata e ora i te maa anaˈe ra, i te mau mea atoa râ i haapaohia e te Atua.” (Mataio 4:4) Ma te peapea râ, aita te rahiraa o te taata e haapao nei i te mau parau a te Atua. Mai tei tohuhia mai e te peropheta a Iehova ra o Amosa, “e ere râ i te oˈe maa ore, e te hiaai i te pape, i te faaroo râ i te parau a Iehova.” (Amosa 8:11) Inaha tei roto te feia faaroo roa ˈˈe i te oˈe i te pae varua. Tera râ, te hinaaro ra te Atua “i te taata atoa ia ora, e ia noaa te ite i te parau mau.” (Timoteo 1, 2:3, 4) No reira, te horoa rahi mai nei hoi oia i te maa varua. Ihea râ te reira e nehenehe ai e noaa mai?
6. Mea nafea to Iehova faaamuraa i to ˈna nunaa i te pae varua i tahito ra?
6 I roto i te roaraa o te aamu, ua horoa mai o Iehova i te maa varua na to ˈna nunaa i faanahohia ei pǔpǔ. (Isaia 65:13) Ei hiˈoraa, ua haaputuputu te mau tahuˈa no Iseraela i te mau tane, te mau vahine, e te mau tamarii ia haapiihia ratou ei pǔpǔ i te Ture a te Atua. (Deuteronomi 31:9, 12) I raro aˈe i te aratairaa a te tino aratai, ua faanaho te mau kerisetiano o te senekele matamua i te mau amuiraa e ua faatupu hoi i te mau putuputuraa no te haapii e no te faaitoito i te taatoaraa. (Roma 16:5; Philemona 1, 2) Te pee nei te mau Ite no Iehova i teie hiˈoraa. Te titau-manihini-hia ˈtu nei oe ia haere i ta ratou mau putuputuraa atoa.
7. Nafea te tae-tamau-raa i roto i te mau putuputuraa kerisetiano ia tuati i te ite e te faaroo?
7 Papu maitai, e riro paha e mea rahi te mau mea ta oe i ite mai i roto i ta oe iho haapiiraa i te Bibilia. Peneiaˈe ua tauturu mai te hoê Ite ia oe. (Ohipa 8:30-35) Tera râ e nehenehe to oe faaroo e riro mai te hoê raau e oriorio e e pohe atu ia ore e haapao-maitai-hia. No reira, e tia ia oe ia rave mai i te maa varua e au. (Timoteo 1, 4:6) Te horoa mai nei te mau putuputuraa kerisetiano i te hoê porotarama haapiiraa tamau i haapaohia no te faatamaa ia oe i te pae varua e no te tauturu ia oe ia tamau â i te tupu i roto i te faaroo a rahi noa ˈi to oe ite no nia i te Atua.—Kolosa 1:9, 10.
8. No te aha tatou e faaitoitohia ˈi ia tae i te mau putuputuraa a te mau Ite no Iehova?
8 Te vai atoa ra te tahi atu tapao faufaa roa ta te mau putuputuraa e titau ra. Ua papai o Paulo: “E haapao maite â tatou te tahi i te tahi, a faaaraara ˈtu ai ia rahi te aroha, o te rave i te mau ohipa maitatai ra: eiaha hoi e faarue i to tatou haaputuputuraa.” (Hebera 10:24, 25) Te parau heleni i hurihia na roto i te parau ra “faaaraara ˈtu ia rahi” teie atoa ïa te auraa “faaooi.” Te na ô ra te hoê maseli a te Bibilia e: “Na te auri i [faaooi] i te auri; e na te taata i [faaooi] i te mata o to ˈna taua.” (Maseli 27:17) Te hinaaro nei tatou paatoa i te ‘faaooiraa’ tamau. E nehenehe te mau faaheporaa a teie nei ao e haaparuparu i to tatou faaroo. Ia tae tatou i te mau putuputuraa kerisetiano, e nehenehe tatou e faaitoito te tahi e te tahi. (Roma 1:11, 12) E pee te mau melo o te amuiraa i te aˈoraa a te aposetolo Paulo “e haamahanahana outou ia outou iho, e e faatupu i te maitai te tahi i te tahi,” e e haapuai hoi taua mau mea ra i to tatou nei faaroo. (Tesalonia 1, 5:11) Te haapapu atoa ra te tae-tamau-raa tatou i te mau putuputuraa kerisetiano e te here ra tatou i te Atua, e te horoa mai nei hoi te reira na tatou i te ravea no te arue ia ˈna.—Salamo 35:18.
‘IA AHU NA OUTOU I TE HERE’
9. Mea nafea to Iehova vaiihoraa mai i te hiˈoraa no nia i te faaiteraa i te here?
9 Teie atoa ta Paulo i papai: “[Ia ahu na outou i] te [here] o taua tatua nehenehe roa ra ïa.” (Kolosa 3:14) Ua horoa mai Iehova i taua ahu ra no tatou ma te hamani maitai. I roto i teihea auraa? E nehenehe te mau kerisetiano e faatupu i te here no te mea o te hoê teie o te mau hotu o te varua moˈa o Iehova ta te Atua i horoa mai. (Galatia 5:22, 23) Ua faaite roa mai o Iehova iho i te here rahi roa ˈˈe na roto i te tonoraa mai i ta ˈna Tamaiti fanau tahi ia nehenehe tatou e fanaˈo i te ora mure ore. (Ioane 3:16) Te horoa mai nei taua faaiteraa here rahi ra i te hoê hiˈoraa na tatou i te pae no te faatupuraa i taua huru nei. “I na reira te Atua i te [hereraa] mai ia tatou,” ta te aposetolo Ioane ïa i papai, “ia [here] atoa tatou ia tatou iho e tia ˈi.”—Ioane 1, 4:11.
10. Nafea tatou e nehenehe ai e fanaˈo i ‘[te amuiraa o] te huitaeae’?
10 E horoa mai te amuimuiraa ˈtu oe i roto i te mau putuputuraa i te Piha no te Basileia i te hoê ravea faahiahia roa no te faaite i te here. I reira, e farerei oe e rave rau mau taata. Eita e ore oe i te au i te rahiraa o ratou. Parau mau, mea taa ê te mau huru o te feia e tavini ra ia Iehova. Peneiaˈe i mutaa ihora, e ape na oe i te feia e e ere hoê â mau mea o ta ratou e anaanatae ra e e ere hoê â huru e to oe. E tia râ i te mau kerisetiano ia ‘here atu i [te amuiraa o] te huitaeae.’ (Petero 1, 2:17) No reira, ia riro te haamatauraa ˈtu i te mau taata i te Piha no te Basileia ei tapao na oe—noa ˈtu to ratou faito matahiti, to ratou huru, to ratou nunaa, aore ra te faito ite i noaa mai ia ratou i te haapiiraa, aita e tuati ra e to oe. E na reira oe e ite ai i te mau huru maitai roa o te taata taitahi.
11. No te aha oe e ore ai e huru ê i te rau o te mau huru i roto i te nunaa o Iehova?
11 Eiaha roa te mau huru taa ê o te taata i roto i te amuiraa ia faahuru ê ia oe. Ei faahiˈoraa, a feruri na e mea rahi te mau pereoo e tere ra na nia i te purumu na pihai iho ia oe. Aita pauroa te mau pereoo e tere ra hoê â faito tere, e e ere atoa hoê â huru maitairaa to ratou mau matini atoa. Ua tere mai vetahi ehia rahiraa kilometera, e mai ia oe, no haamata noa ˈtura te tahi pae i te tere. Ma te ore hoi e haapao i teie mau taa-ê-raa, te tere paatoa ra outou na nia i te purumu. Hoê â huru e te mau taata o te hoê amuiraa. Eita pauroa e faatupu i te mau huru kerisetiano hoê â vitivitiraa. Hau atu, e ere hoê â huru tino e mau manaˈo hohonu to te taatoaraa. Ua haamori te tahi pae ia Iehova e rave rahi matahiti; no haamata noa ˈtura te tahi atu pae. E inaha, te tere ra te taatoaraa na nia i te purumu e aratai i te ora mure ore, ma te “ati maite . . . ma te aau hoê e te manaˈo hoê.” (Korinetia 1, 1:10) No reira, a imi i te mau huru maitai roa eiaha i te mau huru paruparu o te mau taata i roto i te amuiraa. Ia na reira oe, e mahanahana ˈi to oe mafatu, no te mea e ite hoi oe e tei rotopu mau â te Atua i teie nunaa. E papu maitai o teie mau te vahi ta oe e hinaaro ra e parahi.—Korinetia 1, 14:25.
12, 13. (a) Ia faariri mai te hoê taata ia oe i roto i te amuiraa, eaha ta oe e nehenehe e rave? (b) No te aha e mea faufaa roa ia ore e faatupu i te inoino?
12 I te mea hoi e feia tia ore anaˈe te taatoaraa o te mau taata, i te tahi mau taime e riro te hoê i roto i te amuiraa i te parau aore ra i te rave i te hoê mea e faahuru ê ia oe. (Roma 3:23) Ua papai te pǐpǐ ra o Iakobo ma te papu maitai e: “Te hapa nei hoi tatou atoa i te mau mea atoa e rave rahi. E ia ore te hoê taata ia hapa i te parau ra, e te taata parau-tia oia.” (Iakobo 3:2) Eaha to oe huru ia faariri mai te hoê taata ia oe? Te na ô ra te hoê maseli o te Bibilia e: “Na te haapao o te taata e ore e riri vave ai; o to ˈna ïa maitai te faaore i te hara ra.” (Maseli 19:11) Te auraa ia noaa te haapao, te iteraa ïa i te hohonuraa o te hoê ohipa e tupu, te taaraa eaha te mau tumu te hoê taata e paraparau ai aore ra e haa ˈi mai ta ˈna e rave ra. E faaohipa mau hoi te rahiraa o tatou i te haapao no te imi i te mau otoheraa no ta tatou iho mau hapa. No te aha ïa e ore ai e faaohipa i te haapao no te taa e no te tapoˈi i te mau huru tia ore o te tahi pae?—Mataio 7:1-5; Kolosa 3:13.
13 Eiaha roa ˈtu ia moehia ia tatou e e tia ia tatou ia faaore i ta vetahi ê ra hapa ia hinaaro tatou ia faaore mai o Iehova i ta tatou nei hara. (Mataio 6:9, 12, 14, 15) Mai te peu e te faaohipa ra tatou i te parau mau, e here ïa tatou ia vetahi ê. (Ioane 1, 1:6, 7; 3:14-16; 4:20, 21) No reira, ia farerei oe i te hoê fifi e te hoê taata i roto i te amuiraa, ia aro atu na oe i te inoino e tia ˈi. Mai te peu e ua ahu oe i te here, e tutava ïa oe i te faatitiaifaro i te fifi, e eita hoi oe e haamarirau i te faaite i to oe tatarahapa ahiri e ua faariri oe ia vetahi ê.—Mataio 5:23, 24; 18:15-17.
14. E tia ia tatou ia ahu i teihea mau huru?
14 Ia ite-atoa-hia i roto i to tatou ahu varua te tahi atu mau huru fatata roa i te here. Ua papai o Paulo e: “E faaaau aroha noa, e te hamani maitai, e te haehaa, e te mǎrû, e te faaoromai rahi.” Taua mau huru nei, i vehîhia e te here, ua riro ïa ei tuhaa no te ‘huru taata apî’ paieti. (Kolosa 3:10, 12) E tutava ra anei oe no te faaahu ia oe mai te reira te huru? Ia ahu mau oe i te here taeae, e noaa ïa ia oe i te tapao e itea ˈi te mau pǐpǐ a Iesu, inaha te na ô ra hoi oia e: “O te mea teie e ite ai te taata atoa e, e pǐpǐ outou na ˈu, ia [here] outou ia outou iho.”—Ioane 13:35.
TE HOÊ VAHI NO TE VAI-MAITAI-RAA
15. Nafea te amuiraa ia riro mai te hoê tamǎrûraa?
15 E riro atoa te amuiraa ei tamǎrûraa, ei haapûraa i reira oe e paruruhia ˈi. I reira, e ite oe i te mau taata mafatu haavare ore e tutava ra i te rave i te mea tia i mua i te aro o te Atua. E rave rahi o ratou tei faaore roa i te mau peu e te mau haerea iino o ta oe atoa paha e faaitoito ra i te haapaiuma. (Tito 3:3) E nehenehe ratou e tauturu mai ia oe, inaha e tia hoi ia ratou ia “faaoromai . . . te tahi i ta te tahi ra hopoia.” (Galatia 6:2) Parau mau, te tamauraa i nia i te eˈa e aratai i te ora mure ore, i te pae hopea e hopoia ïa na oe. (Galatia 6:5; Philipi 2:12) Inaha, ua horoa mai o Iehova i te amuiraa kerisetiano ei ravea faahiahia roa no te tauturu e te turu. Noa ˈtu te rahi o to oe mau fifi, te vai ra te hoê vahi e noaa ˈi ia oe te tauturu faufaa mau e te ineine noa—te hoê amuiraa here e tia mai i pihai iho ia oe i te mau taime otoraa aore ra ereraa.—A faaau e te Luka 10:29-37; Ohipa 20:35.
16. Eaha te tauturu ta te mau matahiapo o te amuiraa e horoa mai?
16 I roto i te feia e ineine i te tauturu mai ia oe, o te mau ‘ô taata’ ïa—te mau matahiapo, aore ra mau tiaau i nominohia i roto i te amuiraa no te haapao i te nǎnǎ ma te hinaaro mau e te anaanatae mau hoi. (Ephesia 4:8, 11, 12; Ohipa 20:28; Petero 1, 5:2, 3) Teie ta Isaia i tohu no nia ia ratou: “E riro hoi te hoê taata mai te faarǔrǔraa i te vero ra, e mai te pupuniraa i te mataˈi rahi ra; e mai te pape rii tahe i te vahi pâpâmaro ra; e mai te mǎrǔ o te hoê mato rahi i te fenua paurâ.”—Isaia 32:2.
17. (a) Eaha te huru tauturu ta Iesu e hinaaro mau e horoa? (b) Eaha te tauturu ta te Atua e tǎpǔ maira e horoa oia na to ˈna nunaa?
17 Ia Iesu i parahi mai i te fenua nei, aita roa ˈtu te mau aratai faaroo e tiaau ra i te taata ma te here. Ua putapû roa o ˈna i mua i te huru o te mau taata, e ua hinaaro mau â oia e tauturu ia ratou i te paeau varua. Ua aroha roa hoi o Iesu ia ratou no te mea “ua purara ratou e ua faarue-taue-hia, mai te mamoe tiai ore ra.” (Mataio 9:36) Te faataa maitai maira te reira i te tupuraa ino e faaruruhia nei i teie nei tau e te rahiraa o te hepohepo ra to ratou aau i te mau fifi e aita hoi e taata no te tauturu e no te tamahanahana mai ia ratou i te pae varua! Te vai nei râ ta te nunaa o Iehova tauturu i te pae varua, inaha ua tǎpǔ mai oia e: “E tuu hoi au i te tiai i nia iho ia ratou, ei faaamu ia ratou ra. E ore atura ratou e mǎtaˈu faahou, e ore e horuhoru, e ore hoi ratou e na reira-faahou-hia mai.”—Ieremia 23:4.
18. No te aha tatou e haafatata ˈtu ai i te hoê matahiapo ia hinaaro tatou i te tauturu i te pae varua?
18 A haamatau i te mau matahiapo i nominohia i roto i te amuiraa. Ua aravihi ratou i te faaohiparaa i te ite no nia i te Atua, inaha te faaî ra ratou i te mau titauraa a te mau tiaau e faataahia ra i roto i te Bibilia. (Timoteo 1, 3:1-7; Tito 1:5-9) Eiaha e haamarirau i te haafatata ˈtu i te hoê o ratou ia hinaaro anaˈe oe i te tauturu i te pae varua no te upootia mai i nia i te hoê peu aore ra i te hoê huru e patoi ra i te mau titauraa a te Atua. E ite hoi oe e te pee ra te mau matahiapo i te aˈoraa a Paulo e: “E haamahanahana ˈtu i te aau taiâ, e tauturu atu i tei paruparu, ia maoro te faaoromai i te taata atoa ra.”—Tesalonia 1, 2:7, 8; 5:14.
A FANAˈO I TE VAI-MAITAI-RAA E TE NUNAA O IEHOVA
19. Eaha te mau haamaitairaa ta Iehova i horoa mai na te feia e imi i te vai-maitai-raa i roto i ta ˈna faanahonahoraa?
19 Noa ˈtu â ïa e te ora nei tatou i roto i te mau huru tupuraa tia ore, te horoa mai nei o Iehova na tatou i te maa, te ahu, e te nohoraa i te pae varua. Parau mau, e tia ia tatou ia tiai i te ao apî ta te Atua i tǎpǔ mai no te fanaˈo i te mau haamaitairaa o te hoê paradaiso mau. Tera râ, te fanaˈo nei te feia i roto i te faanahonahoraa a Iehova i teie nei iho â i te vai-maitai-raa o te hoê paradaiso i te pae varua. No nia ia ratou, teie ta Ezekiela i tohu mai: “E parahi râ ratou ma te panoonoo ore, e aore roa e haamataˈutaˈu ia ratou.”—Ezekiela 34:28; Salamo 4:8.
20. Nafea o Iehova ia mono i te mau mea atoa ta tatou paha e faarue no ta ˈna haamoriraa?
20 E nehenehe tatou e mauruuru i te mea e te horoa mai nei o Iehova i te mau tauturu here mau i te pae varua na roto i ta ˈna Parau e i ta ˈna faanahonahoraa! A haafatata mai i te nunaa o te Atua. Eiaha e tapea ia oe i te na reira no te mea te mǎtaˈu ra oe i te mau mea ta te mau hoa aore ra ta te mau metua e nehenehe e manaˈo no nia ia oe i te mea ua farii oe i te ite no nia i te Atua. E riro te tahi pae i te ore e au mai no te mea te amuimui maira oe e te mau Ite no Iehova e te haere atoa ra oe i te mau putuputuraa i te Piha no te Basileia. Tera râ e haamauruuru rahi mai te Atua ia oe no te mau mea atoa ta oe e faarue no ta ˈna haamoriraa. (Malaki 3:10) Hau atu, te na ô ra o Iesu: “Aore roa e taata i faarue i to ˈna fare, e te mau taeae, e te mau tuahine, e te mau metua tane, e te mau metua vahine, e te vahine iho, e te mau tamarii, e te fenua, no ˈu e no te evanelia nei, e ore ai i te noaa ta ˈna e hanere atu i teie nei ao, i te fare, i te taeae, i te tuahine, i te metua vahine, i te tamarii, i te fenua, e te hamani ino; e i te ao to muri ra, o te ora mure ore ïa.” (Mareko 10:29, 30) Oia mau, noa ˈtu eaha te mau mea ta oe e vaiiho i muri aore ra e tia ia faaoromai, e nehenehe e itea ia oe i te auhoaraa maitai mau e i te vai-maitai-raa i te pae varua i rotopu i te nunaa o te Atua.
A HIˈOPOA NA I TO OE ITE
O vai “te tavini haapao maitai e te paari”?
Eaha te tauturu ta Iehova i faaineine no te faaamu ia tatou i te pae varua?
Nafea te mau taata i roto i te amuiraa kerisetiano e nehenehe ai e tauturu ia tatou?
[Uiraa haapiiraa]
[Hohoˈa api taatoa i te api 165]
