Pene 1

E nehenehe oe e fanaˈo i te hoê oraraa oaoa no a muri aˈe!

1, 2. Eaha ta to oe Poiete e hinaaro maira ia noaa ia oe?

 TE TAUAHI mahanahana a te hoê taata herehia e oe. Te paainaraa te ata i te taime oe e tamaa ˈi e te mau hoa rahi roa. Te oaoa ia hiˈo atu i ta oe mau tamarii ia hauti haere noa ma te anaanatae rahi. Te mau taime mai teie te huru, e mau taime oaoa anaˈe hoi i roto i te oraraa. No te rahiraa râ, mai te mea ra e e fifi anaˈe ta te oraraa e pûpû mai nei. Mai te peu e o ta oe ïa e faaruru ra, a faaitoito.

² Te hinaaro o te Atua, ia oaoa oe e a muri noa ˈtu i roto i te mau huru tupuraa maitai roa ˈˈe e i te mau vahi faahiahia roa. E ere teie i te moemoeâ, inaha te pûpû atu nei te Atua ia oe ra i te taviri no teie huru oraraa oaoa mau no a muri aˈe. E taua taviri ra o te ite ïa.

3. Eaha te ite o te riro ei taviri no te oaoaraa, e no te aha tatou e nehenehe ai e papu e e nehenehe ta te Atua e horoa mai i taua ite ra?

³ Te faahiti nei matou i te parau no te hoê huru ite taa ê tei hau aˈe i te rahi i te paari o te taata nei. O “te ite [mau ïa no nia] i te Atua.” (Maseli 2:5) Fatata e 2 000 matahiti i teie nei, ua parau te hoê taata papai bibilia: “E faatia hoi to te mau fare atoa nei, o te faatia râ i te mau mea atoa ra, o te Atua ïa.” (Hebera 3:4) A feruri na i te ite e vai ra i Tei hamani i te mau mea atoa! Te parau ra te Bibilia e te taio nei e te mairi nei te Atua i te iˈoa no te mau fetia atoa. Auê ïa manaˈo faahiahia mau e, inaha e mau hanere miria fetia e vai ra i roto i to tatou nei haapueraa fetia, e te na ô ra te feia tuatapapa i te reva teitei e te vai ra fatata hoê hanere miria  haapueraa fetia ê atu! (Salamo 147:4) Ua ite atoa te Atua i te mau mea atoa no nia ia tatou nei, no reira o vai atu â ïa te nehenehe e horoa mai i te mau pahonoraa maitai roa ˈˈe i te mau uiraa faufaa roa no nia i te oraraa?—Mataio 10:30.

4. No te aha tatou e tiaturi ai e e horoa mai te Atua i te mau haamaramaramaraa no te aratai ia tatou, e eaha te buka e faatupu ra i teie hinaaro?

⁴ A feruri na e te tatai ra e piti nau taata i to raua pereoo. No to ˈna fiu, ua faaea te hoê i te tatai. Te tahi râ, ma te hau e faaafaro oia i te fifi, e ia taviri oia i te taviri pereoo, e oaoa oia ia haruru te matini e ia tere rii mǎrû noa. E ere roa ˈtu i te mea fifi ia ite e o vai o na taata toopiti nei e buka haamaramaramaraa ta ˈna na te taata hamani pereoo. E ere anei mea tano ia horoa mai te Atua i te mau haamaramaramaraa no te aratai ia tatou i roto i te oraraa? Mai ta oe paha e ite, tera iho â ta te Bibilia e parau ra—e buka haapiiraa e aratairaa no ǒ mai i to tatou ra Poiete, tei haapaohia no te faaite i te ite no nia i te Atua.—Timoteo 2, 3:16.

5. Eaha te faufaaraa o te ite e vai ra i roto i te Bibilia?

⁵ Ahiri e e parau mau ta te Bibilia, a feruri na ïa i te mau faufaa no nia i te ite e vai ra i roto i taua buka nei! I roto i te Maseli 2:1-5, te ru maira oia ia tatou ia imi i te paari, ia heru i te reira mai te taoˈa faufaa i hunahia ra—eiaha i roto i te manaˈo o te taata nei, i roto râ i te Parau iho a te Atua. Ia imi tatou i reira, e “noaa [ïa ia tatou] i te ite [mau no nia] i te Atua.” I te mea hoi e ua ite te Atua i to tatou mau otia e i to tatou mau hinaaro, te horoa mai nei oia i te haapiiraa e tauturu ia tatou ia ora i te oraraa hau e te oaoa. (Salamo 103:14; Isaia 48:17) Hau atu, te pûpû mai nei te ite no nia i te Atua i te mau parau apî maitai anaanatae mau.

TE ORA MURE ORE!

6. Eaha te haapapuraa ta Iesu Mesia i horoa mai no te ite no nia i te Atua?

⁶ Ua tatara papu maitai mai te taata matau-maitai-hia i roto i te aamu oia hoi o Iesu Mesia, i teie tuhaa o te ite no nia i te Atua. Ua parau oia e: “Teie hoi te ora mure, ia ite ratou ia oe i te Atua mau ra, e ia Iesu i te Mesia i ta oe i tono mai.” (Ioane 17:3) A feruri na—te ite e aratai i te ora mure ore!

7. Eaha te haapapuraa e vai ra e aita te Atua e hinaaro maira e ia pohe tatou?

 ⁷ Eiaha na e faariro oioi i te ora mure ore mai te hoê noa moemoeâ. Maoti hoi te reira, a hiˈo na mea nafea te tino taata i te hamaniraahia. Ua haapaohia hoi oia ma te faahiahia mau no te tamata, te faaroo, te hauˈa, te hiˈo, e te fafa. Mea rahi mau â te mau mea i nia i te fenua e faaoaoa nei ia tatou—te maa maitai, te himene rii au mau a te manu, te mau tiare hauˈa noˈanoˈa, te mau vahi nehenehe mau, te mau hoa au maitai! E to tatou nei roro maere mau, ua hau aˈe ïa oia i te matini roro uira aravihi roa ˈˈe, inaha e ravea te reira e fanaˈo ai e e oaoa roa ˈi tatou i taua mau mea atoa nei. Ia manaˈo oe, te hinaaro maira to tatou Poiete e ia pohe tatou e ia erehia tatou i taua mau mea atoa nei? E ere anei i te mea tano aˈe ia parau tatou e te hinaaro maira oia e ia ora tatou ma te oaoa e ia fanaˈo roa tatou i te oraraa e a muri noa ˈtu? Oia mau, tera te auraa ta te ite no nia i te Atua e nehenehe e horoa mai na oe.

TE ORARAA I ROTO I TE PARADAISO

8. Eaha ta te Bibilia e parau ra no nia i te oraraa o te huitaata nei no a muri aˈe?

⁸ Ta te Bibilia e parau ra no nia i te fenua e te huitaata nei no a muri aˈe, e tia ïa ia haapotohia i roto i te hoê noa parau—Paradaiso! Ua faahiti o Iesu Mesia i te reira ia ˈna i na ô atu i te taata e fatata ˈtura i te pohe e: “Ei [te] paradaiso ïa oe e o vau atoa.” (Luka 23:43) Eita e ore te faahitiraahia te parau no te Paradaiso i te faahaamanaˈo i taua taata nei te huru oaoa mau o to tatou na metua matamua, o Adamu e o Eva. I to te Atua poieteraa ia raua, e nau taata tia roa e ua ora na hoi raua i roto i te hoê ô ta te Poiete i faaineine e i tanu. Ua tano maitai te reira i te piiraahia te ô i Edene ra oia hoi te auraa o to ˈna iˈoa, au rahi mau.

9. Eaha te huru o te oraraa i roto i te Paradaiso matamua?

⁹ Auê hoi taua ô ra i te au maitai e! E paradaiso mau hoi. I rotopu i ta ˈna mau tumu raau nehenehe mau, te vai ra o te horoa ra i te hotu au maitai. Ia hiˈo haere o Adamu e o Eva i ta raua aua, ia inu i to ˈna pape mâ, ia pofai i te mau hotu o ta ˈna mau tumu raau, aita e tumu e ahoaho ai raua aore ra e riaria ˈi.  Aita atoa raua e mǎtaˈu ra i te mau animala, inaha ua tuu mai te Atua i te tane e i ta ˈna vahine ia mana raua i nia ia ratou paatoa ma te here. Hau atu, e tino oraora maitai to na taata matamua. Ia tamau noa raua i te auraro i te Atua, e ora mure ore oaoa mau ïa to mua ia raua. Ua horoahia mai ia raua ra i te ohipa faahiahia roa o te atuaturaa i to raua nohoraa paradaiso faahiahia mau. I muri iho, ua horoa maira te Atua ia Adamu raua o Eva i te faaueraa mana e “faaî i te fenua nei, e e haavi iho.” E e tia ia raua e i ta raua huaai ia faarahi roa ˈtu i te mau otia o te Paradaiso e riro roa ˈtu ai to tatou palaneta taatoa nei ei vahi nehenehe mau e te au rahi.—Genese 1:28.

10. I to Iesu faahitiraa i te parau no te Paradaiso, eaha ta ˈna e hinaaro ra e parau?

¹⁰ Ia Iesu râ i faahiti i te parau no te Paradaiso, aita o ˈna i ani atu i te taata e fatata i te pohe e ia manaˈo oia i te tau i mairi. Aita, te parau ra o Iesu no te tau a muri aˈe! Ua ite oia e e riro mai to tatou nohoraa taatoa i te fenua nei ei paradaiso. Na reira hoi te Atua ia faatupu i ta ˈna opuaraa matamua no te huitaata e no to tatou nei fenua. (Isaia 55:10, 11) Oia, e haamau-faahou-hia te Paradaiso! E mai te aha to ˈna huru? E vaiiho na tatou i te Parau a te Atua, te Bibilia Moˈa, ia pahono mai.

TE ORARAA I ROTO I TE PARADAISO O TE HAAMAU-FAAHOU-HIA

11. I roto i te Paradaiso o te haamau-faahou-hia, eaha ˈtura ïa no te maˈi, te ruhiruhia, e te pohe?

¹¹ E ore roa hoi te maˈi, te ruhiruhia, e te pohe. “Ei reira e faaaraarahia ˈi te mata o te matapo ra, e amaha hoi te tariˈa o te feia tariˈa turi ra: ei reira te pirioi e ouˈauˈa noa ˈi mai te aili, e himene mai hoi te vaha o te taata vava ra.” (Isaia 35:5, 6) “E ei pihai atoa iho te Atua [i te huitaata], . . . E na te Atua e horoi i to ratou roimata atoa; e e ore roa te pohe, e te oto, e te mihi, e te mauiui, e ore atoa ïa, no te mea ua mou te mau mea tahito ra.”—Apokalupo 21:3, 4.

12. No te aha tatou e papu ai e ore roa te taparahiraa taata, te haavîraa uˈana, e te ino i roto i te Paradaiso i mua nei?

¹² E ore roa te taparahiraa taata, te haavîraa uˈana, e te ino. “E riro hoi te feia hamani ino ra i te tâpû-ê-hia . . . No parahirahi  aˈe te paieti ore, e aita ra . . . e aita nei. Area te feia mǎrû ra, e parahi ïa i te fenua.” (Salamo 37:9-11) “E tâpû-ê-hia ra te paieti ore i te fenua nei, e te feia i rave i te hara ra, e taihitumuhia ïa.”—Maseli 2:22.

13. Nafea te Atua ia faatupu i te hau?

¹³ E rahi roa te hau i te fenua taatoa nei. “Ua faaore oia [te Atua] i te tamaˈi e tae roa aˈenei i te hopea fenua! ua ofati oia i te fana, e ua tapǔpǔ i te mahae.” (Salamo 46:9) “I to ˈna ra tau e tupu roa ˈi te parau-tia; e rahi roa hoi te hau, oi vai aˈe te marama.”—Salamo 72:7.

14, 15. Eaha ta te Bibilia e parau ra no nia i te nohoraa, te ohipa, e te maa i roto i te Paradaiso e haamau-faahou-hia?

¹⁴ E nohoraa papu e e ohipa maitai. “E patu ratou i te fare, e na ratou iho e parahi . . . E ore ratou e patu, e na vetahi ê e parahi; e ore ratou e tanu, e na vetahi ê e amu; mai te mau mahana o te raau nei te mau mahana o to ˈu ra mau taata, e vai taiata te aho o to ˈu ra feia i maitihia i to te mau mea ta ratou i hamani. E ore hoi ratou e ohipa faufaa ore noa; e ore ratou e faafanau i te tamarii pohe noa.”—Isaia 65:21-23.

¹⁵ E noaa te maa maitatai e rave rahi. “E riro hoi e maa sitona tei te fenua i nia i te tupuai o te mau mouˈa ra.” (Salamo 72:16) “Ei reira e hotu rahi mai ai te fenua, e na te Atua, na to tatou iho Atua, e haamaitai mai ia tatou nei.”—Salamo 67:6.

16. No te aha te oraraa i roto i te Paradaiso e riro ai ei oraraa au maitai?

¹⁶ E oraraa au maitai te ora mure ore i roto i te hoê paradaiso i nia i te fenua nei. “E parahi te feia parau-tia i nia i te fenua, e parahi tamau â ratou i reira.” (Salamo 37:29) “E rearea te medebara e te vahi pâpâmaro ra no ratou; e oaoa hoi te fenua aihere e e ruperupe hoi mai te tiare ra.”—Isaia 35:1.

TE ITE E TO OE ORARAA A MURI AˈE

17. (a) Eaha te tia ia oe ia rave mai te peu e te anaanatae ra oe i te oraraa i roto i te Paradaiso? (b) Nafea tatou e ite ai e e faatupu te Atua i te mau tauiraa rarahi i nia i te fenua nei?

¹⁷ Mai te peu e te anaanatae ra oe i te oraraa i roto i te Paradaiso, eiaha na oe e faatia i te hoê noa ˈˈe mea ia tapea ia oe i te rave mai i te ite no nia i te Atua. Te here nei oia i te huitaata e e faatupu oia i te mau tauiraa e titauhia no te faariro i te fenua  ei paradaiso. Ahiri e e mana to oe no te faaore i te veve e te parau-tia ore o te uˈana nei i roto i te ao nei, eita anei oe e na reira? E ia manaˈo tatou e iti aˈe ïa ta te Atua e rave? I teie nei, te faahiti ra te Bibilia ma te papu maitai i te parau no te tau e faaore ai te Atua i teie amuiraa î i te mau aroraa uˈana e na te hoê faatereraa tia e te titiaifaro e mono i te reira. (Daniela 2:44) E ere te reira anaˈe râ ta te Bibilia e parau maira ia tatou. Te faaite maira oia e nafea tatou e nehenehe ai e ora ˈtu i roto i te ao apî i tǎpǔhia mai e te Atua.—Petero 2, 3:13; Ioane 1, 2:17.

18. Eaha ta te ite no nia i te Atua e nehenehe e rave no oe i teie nei iho â?

¹⁸ E nehenehe atoa te ite no nia i te Atua e haamaitai hau atu â ia oe, i teie nei iho â. E pahono te Bibilia i te mau uiraa hohonu e fifi roa atoa hoi no nia i te oraraa. Ia farii oe i ta ˈna aratairaa, e riro ïa te reira i te tauturu ia oe ia faatupu i te auhoaraa e te Atua. Auê ïa haamaitairaa rahi mau e! E e faatia hoi te reira ia oe ia fanaˈo i te hau ta te Atua anaˈe ra e nehenehe e horoa mai. (Roma 15:13, 33) Ia haamata oe i te rave i taua ite faufaa mau ra, te rave ra ïa oe i te tutavaraa faufaa roa ˈˈe e te taoˈa-atoa-hia hoi o to oe na oraraa. Eita roa ˈtu oe e tatarahapa ia noaa ia oe te ite no nia i te Atua o te aratai i te ora mure ore.

19. Eaha te tumu parau ta tatou e tuatapapa i roto i te pene i mua nei?

¹⁹ Ua faahiti na tatou i te Bibilia mai te hoê buka e tei roto te ite no nia i te Atua. Inaha, nafea hoi tatou e ite ai e, e ere teie te buka no nia i te paari o te taata, e buka faufaa rahi aˈe râ? E tuatapapa tatou i taua tumu parau nei i roto i te pene i mua nei.

A HIˈOPOA NA I TO OE ITE

No te aha te ite no nia i te Atua e nehenehe ai e aratai ia oe i te oaoaraa mure ore?

Eaha te huru o te oraraa no a muri aˈe i roto i te Paradaiso i nia i te fenua nei?

No te aha oe e fanaˈo ai ia rave mai oe i te ite no nia i te Atua i teie nei iho â?

[Uiraa haapiiraa]