Pene 9

Eaha te tupu i nia i te feia pohe herehia e tatou?

1. Eaha te huru o te taata ia pohe tei herehia e ratou?

 “E MAUIUI mau â te taata ia pohe tei herehia e ana no te mea e faatupu te pohe i te moemoe rahi eita e nehenehe e faataa.” O ta te hoê tamaiti ïa i parau a pohe ai to ˈna metua tane e aita i maoro roa i muri iho, ua pohe atoa to ˈna metua vahine. Ua faatupu hoi to ˈna mauiui e to ˈna manaˈo hohonu no taua ereraa rahi ra, i te “oto rahi.” Peneiaˈe ua roo-aˈena-hia oe i taua huru mauiui ra. Ua ui na paha oe e teihea tei herehia e oe e e ite faahou anei oe ia ratou.

2. Eaha te mau uiraa papu ore e matara mai no nia i te pohe?

² Ua parauhia i te tahi mau metua e oto ra e, “E rave te Atua i te feia maitai roa ˈˈe ia nehenehe ratou e ora i pihai iho ia ˈna i nia i te raˈi.” Mai te reira mau anei? Ua haere anei tei herehia e tatou i roto i te hoê ao varua? O te mea anei ta vetahi pae e parau ra te Nirvana, i faataahia mai te hoê huru faahiahia roa i te pae no te tiamâ-roa-raa mai i te mauiui e te hinaaro? Ua na roto atu anei tei herehia e tatou i te hoê uputa e aratai i te hoê oraraa eita e pohe faahou i roto i te paradaiso? Aore ra mai ta te tahi pae e parau ra, ua riro anei te pohe ei taime haamauiuiraa aita e hopearaa no te feia i faaino i te Atua? E mana anei to te feia pohe i nia i to tatou oraraa? Ia noaa mai ia tatou i te mau pahonoraa parau mau no nia i taua mau uiraa nei, e tia ia tatou ia heheu i te Parau a te Atua, te Bibilia.

 EAHA TE “VARUA” I ROTO I TE TAATA?

3. Eaha te manaˈo o Socrate raua o Platon no nia i te pohe, e nafea te reira ia ohipa i nia i te taata i teie mahana?

³ Te parau ra na taata philosopho heleni tahito ra o Socrate raua o Platon e te vai ra te hoê mea pohe ore i roto i te tane e te vahine—te hoê nephe (âme) e ora ˈtu ia pohe te taata e o te ore roa ˈtu hoi e pohe. Na te fenua taatoa nei, i teie mahana, e mau mirioni taata e tiaturi nei i te reira. E pinepine taua tiaturiraa ra i te faatupu rahi aˈe i te mǎtaˈu i te feia pohe maoti hoi i te haapao i to ratou maitai. Te haapii maira te Bibilia ia tatou i te hoê haapiiraa taa ê mau no nia i te feia pohe.

4. (a) Eaha ta te Genese e parau ra ia tatou no nia i te nephe? (b) Eaha ta te Atua i tuu i roto ia Adamu ia ora noa oia?

⁴ Ia hiˈo maite tatou i te huru o te feia pohe, e tia ia tatou ia haamanaˈo e aita to to tatou metua matamua o Adamu e nephe. E nephe râ oia. Na roto i te hoê ohipa poieteraa maere rahi mau, ua hamani aˈera te Atua i te taata—te nephe—i te mau taoˈa rii no roto mai i te fenua e ua haapuai ihora i “te aho ora” i roto ia ˈna. Te na ô ra te Genese 2:7 e: “A hamani ai te Atua ra o Iehova i te taata i te repo fenua nei, ua haapuai ihora oia i te aho ora i roto i tana apoo ihu ra, riro aˈera te taata ei taata ora [nephe].” Na te aho i atuatu i te ora o Adamu. E titauhia hau atu i te haapuairaa ˈtu i te mataˈi i roto i te mahaha o te taata, i to te Atua tuuraa mai i te aho ora i roto ia Adamu. Te faahiti ra te Bibilia i te parau no ‘te puai o te ora’ e ohipa ra i roto i te mau mea ora i poietehia i nia i te fenua nei.—Genese 7:22.

5, 6. (a) Eaha “[te puai o te ora]”? (b) Eaha te ohipa e tupu ia faaea te “varua” i faahitihia i roto i te Salamo 146:4 i te faaitoito i te tino?

⁵ Eaha mau na ‘te puai o te ora’? O te tumu matamua ïa no te ito o te ora ta te Atua i tuu i roto i te tino ora ore o Adamu. E na te hutihutiraa i te aho e atuatu noa i taua puai nei. Inaha, eaha te “varua” e faahitihia ra i roto i te Salamo 146:4? Te na ô ra te irava no nia i te taata e pohe e: “Te reva nei hoi to ˈna varua, te hoˈi nei oia i to ˈna ra repo; mou roa ˈtura ta ˈna i opua i taua mahana ra.” Ia faaohipa te feia i papai i te Bibilia i te parau ra “varua” i roto i taua tuhaa nei, aita ratou e  manaˈo ra i te hoê nephe i faarue mai i te tino e o te tamau noâ i te ora i muri aˈe i te poheraa o te tino.

⁶ Te “varua” e faarue mai i te taata i te poheraa o te puai ora ïa no ǒ mai i to tatou nei Poiete. (Salamo 36:9; Ohipa 17:28) Aita to teie nei puai ora te tahi noa ˈˈe mau huru o te mea i poietehia o ta ˈna e faaitoito ra, mai te uira e ore e rave i te mau hohoˈa o te matini ta ˈna e faatere ra. Ia pohe te hoê taata, e faaea te varua (te puai ora) i te faaitoito i te mau taoˈa tahi o te tino, mai te hoê mori e pohe ia tupohehia te uira. Ia faaea te puai ora i te atuatu i te tino—e pohe ïa te taata—te nephe.—Salamo 104:29; Koheleta 12:1, 7.

“E HOˈI FAAHOU ATU Â OE I TE REPO”

7. Eaha te roohia i nia ia Adamu ia ore oia e auraro i te Atua?

⁷ Ua faataa maramarama maitai mai o Iehova eaha te auraa o te pohe no te taata hara ra o Adamu. Te na ô ra te Atua e: “E amu oe i ta oe maa ma te hou i nia i to rae, e hoˈi noa ˈtu oe i raro i te repo, no reira mai hoi oe; e repo hoi oe, e e hoˈi faahou atu â oe i te repo.” (Genese 3:19) E hoˈi faahou atu â o Adamu ihea? I te fenua ïa, i te repo no reira mai oia i te poieteraahia. Ia pohe o Adamu, ua ore roa ïa oia!

8. Ei nephe, aita te mau taata i hau aˈe i te mau animala i roto i teihea tuhaa?

⁸ Ia hiˈohia mai te reira te huru, aita roa ˈtu te pohe o te taata i taa ê i to te mau animala. E mau nephe atoa ratou, e hoê â varua, aore ra puai ora, e faaitoito ra ia ratou. (Genese 1:24) I roto i te Koheleta 3:19, 20, te na ô maira te taata paari ra o Solomona e: “Te pohe nei te tahi pae, e te na reira atoa nei te tahi pae i te pohe; hoê hoi o ratou atoa ra [varua]; e aita ˈtura te taata i hau i te puaa . . . No te repo anaˈe ratou e te hoˈi anaˈe nei i te repo â.” E hau aˈe te taata i te mau puaa i te mea e ua poietehia ratou ia au i te hohoˈa o te Atua, ma te faaite i te mau huru o Iehova. (Genese 1:26, 27) Tera râ, ia pohe ratou e hoˈi faahou atu â te mau taata e te mau animala i te repo.

9. Eaha te huru o te feia pohe, e e haere ratou ihea?

⁹ Ua faataa mai o Solomona i muri aˈe eaha te auraa o te parau ra pohe, ia ˈna i parau e: “Ua ite te feia e ora nei, e pohe  ratou, aita râ a te feia i pohe ra e parau itea.” Oia mau, aita roa ˈtu ta te feia pohe e parau itea. No reira o Solomona i faaitoito ai e: “O tei itea ia oe ta to rima e rave ra, a rave ma to puai atoa ra; aore hoi e ohipa, aore e imiraa, aore hoi e ite, aore hoi e paari, i te apoo ta oe e haere na.” (Koheleta 9:5, 10) E haere te feia pohe ihea? I Hade ïa (Hebera, sheʼohlʹ), oia hoi te apoo amui o te huitaata nei. Aita te feia pohe herehia e tatou e ohipa itea. Aita ratou e mauiui ra, e aita roa ˈtu to ratou e mana i nia ia tatou nei.

10. No te aha tatou e nehenehe ai e parau e eita e titauhia ia vai noa mai te pohe?

¹⁰ E ora noa anei tatou paatoa e tei herehia e tatou te tahi noa tau matahiti te maoro e i muri iho, pohe roa ˈtu ai e a muri noa ˈtu? Eita, ia au i te Bibilia. I te taime o Adamu i orure hau ai, i reira iho to te Atua ra o Iehova haamauraa i te mau faanahoraa no te faaore roa i te mau faahopearaa iino mau o te hara a te taata. Aita roa ˈtu to te pohe e tuhaa i roto i te opuaraa a te Atua no te huitaata nei. (Ezekiela 33:11; Petero 2, 3:9) No reira, eita ˈtura ïa e titauhia e ia vai noa mai te pohe no tatou nei e no tei herehia e tatou.

“UA TAOTO”

11. Mea nafea to Iesu faataaraa mai i te huru o to ˈna hoa o Lazaro i pohe?

¹¹ O te opuaraa a Iehova te faaoraraa ia tatou e te feia pohe herehia e tatou nei, i te pohe no ǒ mai ia Adamu ra. No reira, te faahiti ra te Parau a te Atua i te parau no te taata pohe mai te huru ra ïa e te taoto ra oia. Ei hiˈoraa, ia ˈna i ite e ua pohe to ˈna hoa o Lazaro, ua na ô atura Iesu Mesia i Ta ˈna mau pǐpǐ: “Ua taoto to tatou hoa o Lazaro, te haere nei râ vau e faaara ia ˈna.” I te mea e aita te mau pǐpǐ i taa oioi i te auraa o taua parau nei, ua haapapu maitai atura Iesu ia ratou e: “Ua pohe roa Lazaro.” (Ioane 11:11, 14) Ua haere atura o Iesu i muri iho i te oire ra no Betania, i reira te mau tuahine o Lazaro oia hoi o Mareta e o Maria i te oto-noa-raa i to raua taeae i pohe. Ia parau atu o Iesu ia Mareta e, “E tia faahou mai ïa to tuaane,” ua faaite maira oia i to ˈna faaroo i roto i te opuaraa a te Atua e faaore roa i te mau faahopearaa a te pohe  i nia i te fetii taata nei. Teie ta ˈna i parau: “Ua ite au e, e tia faahou mai â oia ia tae i te tia-faahou-raa i te mahana hopea ra.”—Ioane 11:23, 24.

12. Eaha te tiaturiraa o te vahine e oto ra oia hoi o Mareta, no nia i te pohe?

¹² Aita o Mareta i faaite noa ˈˈe i te parau no nia i te hoê nephe pohe ore e ora noâ i te tahi vahi i muri aˈe i te poheraa. Aita o ˈna i tiaturi e ua reva aˈena o Lazaro i roto i te tahi ao varua no te tamau â i te ora. Ua tiaturi o Mareta i te tiaturiraa faahiahia roa no nia i te hoê tia-faahou-raa mai te pohe mai. Ua taa ia ˈna e aita te hoê nephe pohe ore i faarue mai i te tino o Lazaro, tera râ ua faaea to ˈna taeae o tei pohe, i te ora. Te ravea no te faaora mai i to ˈna tuaane o te tia-faahou-raa ïa.

13. Eaha te mana i horoahia mai e te Atua ia Iesu, e mea nafea to ˈna faaiteraa i taua mana ra?

¹³ Ua horoa te Atua ra o Iehova i te mana ia Iesu Mesia no te hoo mai i te huitaata nei. (Hosea 13:14) No reira, ei pahonoraa i te parau a Mareta, ua na ô aˈera o Iesu e: “Tei ia ˈu te tia-faahou-raa e te ora, o te faaroo mai ia ˈu ra, e pohe noâ oia e ora â ïa.” (Ioane 11:25) Ia au i te reira, ua faaite o Iesu i te mana ta te Atua i horoa mai i to ˈna haereraa i te menema o Lazaro, tei pohe a maha atura mahana, no te faaora faahou ia ˈna. (Ioane 11:38-44) A feruri na i te oaoa o te feia tei ite i taua tia-faahou-raa ra aore ra i te tahi atu mau tia-faahou-raa i faatupuhia e Iesu Mesia!—Mareko 5:35-42; Luka 7:12-16.

14. No te aha te parau no te tia-faahou-raa e te manaˈo no nia i te hoê nephe pohe ore e ore ai e tuati?

¹⁴ A feruri maitai na i teie manaˈo: Aita ïa e faufaa ia faatia faahou mai i te hoê taata, aore ra ia faaora faahou ia ˈna, mai te peu e e ora ˈtu te hoê nephe pohe ore i te taime poheraa. Inaha, e ere i te mea maitai ia faatia faahou mai i te hoê taata mai ia Lazaro no te hoê oraraa tia ore i nia i te fenua nei ahiri e ua tapae aˈena o ˈna i nia i te hoê utua faahiahia mau i nia i te raˈi. I te parau mau, aita te Bibilia i faaohipa aˈenei i te parau ra “nephe pohe ore.” Te parau nei râ te mau Papai e e pohe mau te nephe taata hara. (Ezekiela 18:4, 20) No reira, te  faahiti ra ïa te Bibilia i te faanahoraa i rave-atea-hia no nia i te hoê tia-faahou-raa ei ravea mau no te arai i te pohe.

“TE FEIA ATOA I ROTO I TE APOO RA”

15. (a) Eaha te auraa o te parau ra “tia-faahou-raa”? (b) No te aha e ere roa ˈtu i te mea fifi te tia-faahou-raa o te mau taata na te Atua ra o Iehova?

¹⁵ Te auraa tumu o te parau ta te mau pǐpǐ a Iesu i faaohipa no te “tia-faahou-raa” o te parau ïa “tia i nia.” O te hoê tiaraa i nia mai roto mai i te huru ora ore o te pohe—mai te tiaraa no te haere i rapae i te apoo amui o te huitaata nei. Mea ohie roa na te Atua ra o Iehova ia faatia mai i te hoê taata. No te aha? No te mea o Iehova te Tumu o te ora. I teie mahana, e nehenehe ta te taata e haruharu i te mau reo e te mau hohoˈa o te mau tane e te mau vahine i nia i te mau ripene video e e hauti faahou i teie mau haruharuraa i muri aˈe i te poheraa o teie  mau taata. Ma te papu maitai e e nehenehe to tatou Poiete mana hope e haruharu mai i te mau mea rii no nia i te mau taata tataitahi e e faatia faahou mai i taua iho taata ra, ma te horoa no taua tane aore ra no taua vahine ra i te hoê tino i hamani-apî-hia.

16. (a) Eaha te parau tǎpǔ ta Iesu i tǎpǔ mai no nia i te feia i roto i te apoo ra? (b) Na te aha e haapapu mai i te huru tia-faahou-raa o te hoê taata?

¹⁶ Teie ta Iesu Mesia i parau: “Te fatata mai nei hoi te hora e faaroo ai te feia atoa i roto i te apoo ra i tana [to Iesu] reo, e e haere mai i rapae; e te feia i mau na i te parau maitai ra, e tia mai ïa e rave i te ora; e te feia hoi i mau na i te parau ino ra, e tia mai ïa e rave i te [haavaraa].” (Ioane 5:28, 29) E faatia-faahou-hia mai te feia atoa ta Iehova e haamanaˈo ra e e haapiihia ratou i to ˈna mau haerea. No te feia e ohipa ia au i te ite a te Atua, e riro ïa te reira ei tia-faahou-raa no te ora. Te feia râ e ore e haapao i te mau haapiiraa e te faatereraa a te Atua, e riro ïa ei tia-faahou-raa no te haavaraa.

17. O vai te faatia-faahou-hia?

¹⁷ Papu maitai, te feia i rave i te hoê haerea tia ei tavini no Iehova, e faatia-faahou-hia mai ïa ratou. Inaha, ua faaitoito te tiaturiraa i te tia-faahou-raa e rave rahi feia ia faaruru i te pohe, e tae noa ˈtu i te mau taime hamani-ino-raa uˈana. Ua ite ratou e e nehenehe ta te Atua e faaora faahou ia ratou. (Mataio 10:28) E mau mirioni taata râ i pohe ma te ore e faaite e ua faaau mau ratou ia ratou i te mau faaueraa tumu tia a te Atua. E faatia-atoa-hia mai ratou. Ma te tiaturi i taua opuaraa a Iehova i roto i taua tuhaa nei, ua na ô aˈera te aposetolo Paulo e: “Te tiaturi nei au i te Atua . . . e e tia-faahou-raa to tei pohe, te feia parau-tia e te feia parau-tia ore.”—Ohipa 24:15.

18. (a) Eaha te orama ta te aposetolo Ioane i ite no nia i te tia-faahou-raa? (b) Eaha te haamou-roa-hia i roto i “te roto auahi,” e eaha ta taua “roto” ra e faataipe ra?

¹⁸ Ua ite te aposetolo Ioane i te hoê orama putapû mau no nia i te feia i faatia-faahou-hia mai e tia noa ra i mua i te terono o te Atua. Teie ta Ioane i papai: “Ua tuu maira te miti i te feia i pohe i roto ia ˈna ra, e ua tuu maira te apoo e hade i te feia i pohe i roto ia raua ra, e haavahia ihora ratou atoa i ta  ratou mau ohipa. E hurihia ˈtura te apoo e hade i roto i te roto auahi. O te piti teie o te pohe [te roto auahi].” (Apokalupo 20:12-14) A feruri na i te reira! Te feia pohe atoa ta te Atua e haamanaˈo ra e matara mai ïa ratou mai Hade mai (Heleni, haiʹdes), aore ra Schéol, te apoo amui o te huitaata nei. (Salamo 16:10; Ohipa 2:31) E nehenehe ratou e faaite na roto i ta ratou mau ohipa e e tavini anei ratou i te Atua aore ra eita. I muri iho, e hurihia te “pohe e hade” i roto i tei parauhia “te roto auahi,” faataipehia i te haamou-roa-raa, mai te parau ra “Gehena.” (Luka 12:5) Aita e feia pohe faahou i roto i te apoo amui o te huitaata nei e e ore roa te reira ia hope anaˈe te tia-faahouraa. Auê i te mahanahana mau e ia haapii tatou i roto i te Bibilia e eita te Atua e haamauiui i te taata!—Ieremia 7:30, 31.

TIA-FAAHOU-RAA IHEA?

19. No te aha vetahi feia e faatiahia ˈi no te ora ˈtu i nia i te raˈi, e eaha te huru tino ta te Atua e horoa no ratou?

¹⁹ E faatia-faahou-hia te mau tane e te mau vahine tei taotiahia to ratou numera, no te ora ˈtu i nia i te raˈi. Ei arii e ei tahuˈa i pihai iho ia Iesu, e apiti atu ratou no te faaore roa i te mau faahopearaa iino atoa a te pohe i roohia i nia i te huitaata nei, no roto mai i te taata matamua ra ia Adamu. (Roma 5:12; Apokalupo 5:9, 10) Ehia rahiraa ta te Atua e rave no te haere i nia i te raˈi e faatere i pihai iho i te Mesia? Ia au i te Bibilia, 144 000 anaˈe ratou. (Apokalupo 7:4; 14:1) E horoa ˈtu Iehova no taua feia atoa ra e faatia-faahou-hia i te hoê tino varua ia nehenehe ratou e ora i nia i te raˈi.—Korinetia 1, 15:35, 38, 42-45; Petero 1, 3:18.

20. Eaha ta te huitaata faaroo e ite atu, e tae noa ˈtu te feia i faatiafaahou-hia?

²⁰ Fatata te rahiraa o te feia i pohe te faatia-faahou-hia mai i roto i te hoê paradaiso i nia i te fenua nei. (Salamo 37:11, 29; Mataio 6:10) Te hoê tumu te tahi pae e faatiahia ˈi no te ora i nia i te raˈi, no te faatupu-roa-raa ïa i te opuaraa a te Atua no te fenua nei. Mai te raˈi mai e faahoˈi rii mǎrû noa o Iesu Mesia e na 144 000 i te huitaata faaroo i te tia-roa-raa i haafaufaa-ore-hia e to tatou nau metua matamua. E tano atoa te reira no te feia e faatia-faahou-hia, mai tei faaitehia e Iesu  ia ˈna i parau atu i te taata e fatata i te pohe i patǐtǐhia i pihai iho ia ˈna e: “Ei [te] paradaiso ïa oe e o vau atoa.”—Luka 23:42, 43.

21. Ia au i te peropheta ia Isaia e te aposetolo Ioane, eaha ïa te roohia i te pohe?

²¹ I roto i te Paradaiso i nia i te fenua nei, e faaore-roa-hia te pohe o te hoê ïa tupuraa faufaa ore i teie mahana. (Roma 8:19-21) Ua faaite te peropheta o Isaia e “e haamou roa [te Atua ra o Iehova] i te pohe e a muri noa ˈtu.” (Isaia 25:8) Ua ite te aposetolo o Ioane i te hoê orama no nia i te tau e tiamâ mai ai te huitaata faaroo i te oto e te pohe. Oia mau, “e ei pihai atoa iho te Atua ia ratou, ei Atua no ratou. E na te Atua e horoi i to ratou roimata atoa; e e ore roa te pohe, e te oto, e te mihi, e te mauiui, e ore atoa ïa, no te mea ua mou te mau mea tahito ra.”—Apokalupo 21:1-4.

22. Nafea te ite no nia i te tia-faahou-raa ia ohipa i nia ia oe?

²² E faaore te mau haapiiraa maramarama a te Bibilia i te papu ore no nia i te ohipa e tupu i nia i te feia pohe. Te haapapu maira te mau Papai e “e taua enemi hopea ra” o te pohe, e haamouhia ïa. (Korinetia 1, 15:26) Auê ïa puai e te tamahanahanaraa ta tatou e nehenehe e huti mai i te ite no nia i te tiaturiraa i te tia-faahou-raa e! Auê i te oaoa e ia ara mai te feia pohe herehia e tatou o ta te Atua e haamanaˈo ra, i te taoto o te pohe no te fanaˈo i te mau mea maitatai atoa e vai ra ia ˈna no te feia atoa e here ra ia ˈna! (Salamo 145:16) E tupu taua mau haamaitairaa ra maoti te Basileia o te Atua. Tera râ afea hoi ta ˈna faatereraa e haamata ˈi? E tuatapapa anaˈe na tatou i te reira.

A HIˈOPOA NA I TO OE ITE

Eaha te varua i roto i te taata?

Nafea oe ia faataa i te huru o te feia pohe?

O vai te faatia-faahou-hia?

[Uiraa haapiiraa]

[Hohoˈa i te api 85]

Mai ia Iesu i pii ia Lazaro e haere mai i rapae i te apoo, e mau mirioni taata atoa te faatia-faahou-hia

 [Hohoˈa i te api 86]

O te oaoa anaˈe o te itehia ia ‘haamou roa te Atua i te pohe e a muri noa ˈtu’