Nafea oe ia haafatata ˈtu i te Atua
Pene 16
Nafea oe ia haafatata ˈtu i te Atua
1. Eaha te mau tuatiraa e ite-maitai-hia i roto e rave rahi mau haapaoraa?
UA MAERE roa te hoê ratere tei mataitai na i te hoê fenua i te pae Hitia o te râ i te mau peu faaroo o ta ˈna i ite i roto i te hiero a te feia e haamori i te Bouddha. Noa ˈtu e e ere te mau hohoˈa o Maria aore ra o te Mesia, ua tuea noa e rave rahi mau peu i tei faatupuhia ra i roto i ta ˈna fare pure i to ˈna fenua. Ei hiˈoraa, ua tapao mai oia e te faaohipahia ra te mau rosario e te himenehia ra i te mau pure. Ua rave atoa te tahi pae i te mau faaauraa mai te reira te huru. I te pae Hitia o te râ aore ra i te pae Tooa o te râ, e tuatiraa faahiahia mau te itehia i roto i te mau ravea e faaohipahia e te feia haamori e tamata ra i te haafatata ˈtu i te Atua aore i te mau taoˈa o ta ratou e haamori ra.
2. Mea nafea te mau pure i te faataaraahia, e no te aha e rave rahi taata e pure ai?
2 E rave rahi tei tamata taa ê i te haafatata ˈtu i te Atua ma te pure ia ˈna. Ua faataahia te pure mai “te hoê huru aparauraa a te taata e tei moˈa—i te Atua, i te mau atua, i te ao varua, aore ra i te mau puai tei hau aˈe i te natura taata nei.” (The New Encyclopædia Britannica) Tera râ, ia haafatata ˈtu ratou i te Atua na roto i te pure, e manaˈonaˈo noa vetahi i te maitai e noaa mai ia ratou. Ei hiˈoraa, i te hoê taime, ua ani atura te tahi taata i te hoê Ite no Iehova e: “Ia pure oe no ˈu, e titiaifaro anei to ˈu mau fifi i roto i to ˈu utuafare, i te ohipa, e i te pae no te oraora-maitai-raa?” E au ra e, tera mau te manaˈo o taua taata ra, te pure nei râ e te ite nei hoi e rave rahi e te vai noa nei â to ratou mau fifi. No reira, e uiui ïa tatou, ‘No te aha e tia ia tatou ia haafatata ˈtu i te Atua?’
NO TE AHA TATOU E HAAFATATA ˈTU AI I TE ATUA
3. E faatae i ta tatou mau pure ia vai, e no te aha?
3 E ere te pure i te hoê peu faufaa ore, e ere atoa hoi i te hoê noa ravea e noaa ˈi ia tatou i te tahi ohipa. Te tumu matamua tatou e haafatata ˈtu ai i te Atua no te faatupuraa ïa i te taairaa piri roa e o ˈna. No reira, e tia ïa ta tatou mau pure ia faataehia ˈtu i te Atua ra o Iehova. “Te fatata maira o Iehova i te feia e tiaoro atu ia ˈna,” o ta te taata papai salamo ra ïa o Davida i parau. (Salamo 145:18) Te titau mai nei o Iehova ia faatupu tatou i te hoê taairaa hau e o ˈna. (Isaia 1:18) E farii te feia e pahono i taua titauraa ra i te parau a te taata papai salamo e na ô ra e: “E mea maitai râ ia ˈu ia haafatata ˈtu i te Atua.” No te aha? No te mea e fanaˈo te feia e haafatata ˈtu i te Atua ra o Iehova i te oaoaraa mau e te hau o te feruriraa.—Salamo 73:28.
4, 5. (a) No te aha e mea faufaa ia pure i te Atua? (b) Eaha te huru taairaa ta tatou e nehenehe e faatupu e te Atua na roto i te pure?
4 No te aha ïa e pure ai i te Atua no te ani i te tauturu mai te peu e ua ‘ite oia eaha to tatou hinaaro hou tatou e ani atu ai ia ˈna’? (Mataio 6:8; Salamo 139:4) Te faaite ra te pure e te tiaturi nei tatou i te Atua e te faariro nei tatou ia ˈna ei Tumu no “te mau mea maitatai i ho-mai-hia mai, e te mau mea tia roa e maitai roa ˈi.” (Iakobo 1:17; Hebera 11:6) Mea au na Iehova ta tatou mau pure. (Maseli 15:8) Mea oaoa roa na ˈna ia faaroo mai i ta tatou mau parau haamauruururaa faufaa mau e ta tatou mau arueraa, mai te hoê metua e oaoa ia faaroo oia i ta ˈna tamarii ia faahiti i te mau parau haamauruururaa ma te aau rotahi. (Salamo 119:108) Ia tupu anaˈe te mau taairaa maitai i rotopu i te metua e te tamarii, e tupu atoa te mau aparauraa mahanahana mau. Mea hinaaro na te hoê tamarii herehia e aparau e to ˈna metua tane. Mai te reira atoa te huru no to tatou mau taairaa e te Atua. Mai te peu e te haafaufaa mau nei tatou i te mau mea ta tatou e haapii ra no nia ia Iehova e te here o ta ˈna i faaite mai no tatou, e puai ïa to tatou hinaaro e faaite i to tatou iho mau manaˈo ia ˈna na roto i te pure.—Ioane 1, 4:16-18.
5 Ia haafatata ˈtu tatou i te Atua Teitei roa ˈˈe, e tia ia tatou ia faaite i te tura, e aita e faufaa ia haafifi rahi roa no nia i te mau parau tano o ta tatou e faaohipa. (Hebera 4:16) E nehenehe noa tatou e haafatata ˈtu ia Iehova. E auê hoi haamaitairaa i te mea e e nehenehe tatou e ‘ninii hua i to tatou aau’ i mua i te Atua na roto i te pure e! (Salamo 62:8) E faatupu to tatou mauruuru ia Iehova i te mau taairaa mahanahana mau e o ˈna, mai ta te taata haapao maitai ra o Aberahama i fanaˈo ei taua no te Atua. (Iakobo 2:23) Ia pure râ tatou i te Fatu Mana hope o te ao nei, e tia ia tatou ia auraro i ta ˈna mau titauraa no te haafatata ˈtu ia ˈna.
TE MAU TITAURAA NO TE HAAFATATA ˈTU I TE ATUA
6, 7. Noa ˈtu e aita te Atua e titau ra i te moni no te faaroo i ta tatou mau pure, eaha râ ta ˈna e titau nei ia tatou ia pure tatou?
6 E titauhia anei te moni no te haafatata ˈtu i te Atua? Te aufau nei e rave rahi taata i te mau upoo faatere haapaoraa no te pure no ratou. E te tiaturi nei hoi vetahi e e faaroohia mai ta ratou mau pure ia au i te faito moni ta ratou e horoa. Aita râ te Parau a te Atua e na ô ra e e tia ia tatou ia pûpû i te moni no te haafatata ˈtu ia Iehova na roto i te pure. E noaa hoi te mau mea i te pae varua i faaineinehia e ana e te mau haamaitairaa no te taai atu ia ˈna na roto i te pure, aita e moni.—Isaia 55:1, 2.
7 Eaha râ te titauhia? Mea faufaa roa te hoê mafatu maitai roa. (Paraleipomeno 2, 6:29, 30; Maseli 15:11) I roto i to tatou mafatu e tia ia tatou ia tiaturi i te Atua ra o Iehova mai “Tei faaroo i te pure” e “te faautua i te feia i imi papu ia ˈna ra.” (Salamo 65:2; Hebera 11:6) E tia atoa ia tatou ia faatupu i te hoê mafatu haehaa. (Te mau arii 2, 22:19; Salamo 51:17) I roto i te hoê o ta ˈna mau parabole, ua faaite mai o Iesu Mesia e no te haafatata ˈtu i te Atua, ua haapapu aˈera te hoê telona haehaa e te mafatu haehaa roa e e rahi aˈe to ˈna haerea i te parau-tia i to te Pharisea teoteo. (Luka 18:10-14) Ia haafatata tatou i te Atua na roto i te pure, ia haamanaˈo na tatou e “te [riri] ra Iehova i te feia atoa i te teoteo te aau ra.”—Maseli 16:5.
8. Mai te peu e te hinaaro nei tatou e ia pahono mai te Atua i ta tatou mau pure, e tia ia tatou ia tamâ ia tatou iho i te aha?
8 Mai te peu e te hinaaro nei tatou e ia pahono mai te Atua i ta tatou mau pure, e tia ia tatou ia tamâ ia tatou i te haerea tia ore. I to te pǐpǐ ra o Iakobo faaitoitoraa i te tahi pae ia haafatata ˈtu i te Atua, ua parau faahou aˈera oia e: “E horoi na i to outou rima, e te feia rave hara ra; e tamâ na i to outou [mafatu], e te feia aau piti na.” (Iakobo 4:8) E nehenehe atoa te feia rave hara e ô i roto i te mau taairaa hau e te Atua ia tatarahapa e ia faarue ratou i to ratou huru oraraa tahito. (Maseli 28:13) Eita tatou e nehenehe e manaˈo e e faaroo mai o Iehova ia tatou ia faahua parau noa tatou e ua mâ tatou i te pae varua. “Tei te feia parau-tia hoi to [Iehova] ra mata; e tei ta ratou pure hoi to ˈna tariˈa; e mata ê râ to [Iehova] i te feia i rave i te ino ra,” o ta te Parau a te Atua ïa e parau ra.—Petero 1, 3:12.
9. Na roto ia vai tatou e tia ˈi ia haafatata ˈtu ia Iehova, e no te aha?
9 Te haapapu ra te Bibilia e: “Aita mau e taata parau-tia i te fenua nei, o tei rave i te parau maitai, e aore roa e hara.” (Koheleta 7:20) E riro râ paha outou i te ani e: ‘Nafea râ tatou e nehenehe ai e haafatata ˈtu i te Atua ra o Iehova?’ Te pahono ra te Bibilia e: “Ia roohia ˈtu râ te hoê taata i te hara, e tia to tatou tei ô i te Metua ra, o Iesu Mesia, o te taata parau-tia ra.” (Ioane 1, 2:1) Noa ˈtu e e feia hara tatou, e nehenehe tatou e haafatata ˈtu i te Atua ma te mǎtaˈu ore i te parau na roto ia Iesu Mesia, o tei pohe ei tusia no tatou. (Mataio 20:28) O oia anaˈe te arai e nehenehe ai tatou e haafatata ˈtu i te Atua ra o Iehova. (Ioane 14:6) Eita tatou e rave i te maitai o te tusia taraehara o Iesu ma te manaˈo e e tapoˈi oia i ta tatou mau hara atoa e e rave atu ai i te hara ma te opua mau. (Hebera 10:26) Ia faaitoito mau râ tatou i te haapae i te mea ino e i te tahi taime a hahi ê atu ai, e nehenehe tatou e tatarahapa e e ani i te Atua ia faaore mai i ta tatou hara. Ia haafatata tatou ia ˈna ma te mafatu haehaa, e faaroo mai oia ia tatou.—Luka 11:4.
TE MAU TAIME E NEHENEHE AI E PARAPARAU I TE ATUA
10. Ia pure anaˈe tatou, nafea tatou e nehenehe ai e pee ia Iesu, e eaha te tahi mau taime tatou e pure ai tatou anaˈe?
10 Ua haafaufaa rahi mau â o Iesu Mesia i to ˈna mau taairaa e o Iehova. No reira, ua faataa o Iesu i te taime no te aparau i te Atua na roto i te pure raua anaˈe. (Mareko 1:35; Luka 22:40-46) E mea maitai roa ia pee tatou i te hiˈoraa o Iesu e ia pure tamau i te Atua. (Roma 12:12) Mea tano ia haamata tatou i te mahana na roto i te pure, e na mua ˈˈe e haere ai e taoto, e nehenehe iho â tatou e haamauruuru ia Iehova no te ohipa i ravehia i taua mahana ra. I roto i te roaraa o te mahana, ia faaoti na tatou e haafatata ˈtu i te Atua ‘i te mau huru taime atoa’ e tia ˈi. (Ephesia 6:18) E nehenehe atoa tatou e pure ma te muhu ore i roto i to tatou mafatu, ma te ite e e nehenehe te Atua e faaroo mai ia tatou. E tauturu te mau aparauraa o tatou anaˈe e te Atua ia tatou, ia haapaari i to tatou mau taairaa e o ˈna, e te pureraa ia Iehova i te mau mahana atoa, e riro ïa i te tauturu ia tatou ia haafatata roa ˈtu â ia ˈna.
11. (a) No te aha e tia ˈi i te mau utuafare ia pure amui? (b) Eaha te auraa ia parau oe “Amene” i te hopearaa o te hoê pure?
11 E faaroo atoa o Iehova i te mau pure e faahitihia no te mau pǔpǔ taata. (Te mau arii 1, 8:22-53) E nehenehe tatou e haafatata ˈtu i te Atua e to tatou utuafare, e na te upoo o te utuafare e faaoti i te pure. E haapaari hoi te reira i te mau taairaa i roto i te utuafare, e e riro o Iehova ei Atua mau no te feia apî ia faaroo noa ratou i to ratou mau metua ia pure atu i te Atua ma te haehaa. Eaha ïa mai te peu e na te tahi taata e tia no te hoê pǔpǔ na roto i te pure, peneiaˈe i te hoê putuputuraa a te mau Ite no Iehova? Mai te peu e tei rotopu tatou i te feia e faaroo ra, ia faaroo maite ïa tatou ia nehenehe tatou, ia hope te pure, e parau ma to tatou mafatu taatoa e “Amene,” oia te auraa “Na reira ïa.”—Korinetia 1, 14:16.
TE MAU PURE TA IEHOVA E FAAROO RA
12. (a) No te aha te Atua e ore ai e pahono i te tahi mau pure? (b) No te aha tatou e ore ai e tia ia manaˈonaˈo noa i to tatou iho mau hinaaro ia pure tatou?
12 E manaˈo paha vetahi e aita te Atua e pahono maira i ta ratou mau pure noa ˈtu e te pure ra ratou ia ˈna na roto i te Mesia. Teie râ, te na ô ra te aposetolo Ioane e: “Ia ani noa ˈtu tatou i te mau mea atoa i au ia ˈna [i te Atua] ra, te faaroo maira ïa oia ia tatou.” (Ioane 1, 5:14) No reira, e tia ïa ia tatou ia ani ia au i te hinaaro o te Atua. I te mea e te anaanatae ra oia i to tatou mau maitai i te pae varua, ua riro atura ïa te mau mea atoa e haapeapea i to tatou huru i te pae varua ei tumu parau tano maitai no te pure. E tia ia tatou ia patoi i te hinaaro e manaˈonaˈo noa i te mau mea e titauhia i te pae tino. Ei hiˈoraa, noa ˈtu e mea tano ia pure no te ani i te maramarama e i te puai o te feruriraa no te faaruru i te maˈi, eita e tia i te mau haapeapearaa no nia i te oraora-maitai-raa o te tino ia haamoe i te mau faufaa i te pae varua. (Salamo 41:1-3) I to ˈna iteraa e te haapeapea rahi ra oia no te oraora-maitai-raa o to ˈna tino, ua ani atura te hoê vahine kerisetiano ia Iehova i te tauturu ia noaa ia ˈna i te huru hiˈoraa tano no nia i to ˈna maˈi. E te faahopearaa, ua riro maira ïa te mau fifi i te pae no te oraora-maitai-raa o to ˈna tino ei haapeapearaa haihai aˈe na ˈna, e ua ite aˈera hoi oia e ua horoahia mai no ˈna “i te mana rahi maitai ra.” (Korinetia 2, 4:7) Ua rahi roa maira to ˈna hinaaro e riro ei tauturu no vetahi ê i te pae varua, e ua riro aˈera oia ei taata poro i te Basileia ma te taime taatoa.
13. Mai tei faaitehia i roto i te Mataio 6:9-13, eaha te tahi mau tumu parau tano ta tatou e nehenehe e faaô i roto i ta tatou mau pure?
13 Eaha te tia ia tatou ia faahiti i roto i ta tatou mau pure ia oaoa o Iehova i te faaroo mai i te reira? Ua haapii o Iesu Mesia i ta ˈna mau pǐpǐ nafea ia pure. I roto i te pure i papaihia i roto i te Mataio 6:9-13 te tia ia peehia, ua vaiiho mai oia i te hoê hiˈoraa no nia i te mau tumu parau tano te tia ia tatou ia pure. Eaha te mea matamua ta tatou e ani na roto i ta tatou mau pure? E tia ia haafaufaa rahi i te iˈoa o te Atua ra o Iehova e te Basileia. Mea tano atoa ia ani no to tatou mau hinaaro i te pae tino. Mea faufaa atoa ia ani e ia faaorehia mai i ta tatou mau hara e ia faaorahia mai tatou i te mau faahemaraa e i te varua ino ra, oia hoi te Diabolo ra o Satani. Aita o Iesu i hinaaro e ia himene tatou i taua pure ra aore ra ia na nia iho noa tatou i te parau, ia haapinepine tatou i te faahiti i te reira ma te ore e feruri i to ˈna auraa. (Mataio 6:7) Eaha ïa te huru taairaa e tupu mai ia na nia iho noa te hoê tamarii i te faahiti i taua mau parau noa nei â i te mau taime atoa oia e paraparau atu ai i to ˈna metua tane?
14. Taa ê atu i te mau aniraa, eaha te mau pure ta tatou e pûpû atu?
14 Taa ê atu i te mau aniraa e te mau taparuraa rotahi, e tia ia tatou ia pûpû atu i te mau pure arueraa e haamauruururaa. (Salamo 34:1; 92:1; Tesalonia 1, 5:18) E nehenehe atoa tatou e pure no vetahi ê. E faaite hoi ta tatou mau pure no to tatou mau taeae e tuahine i te pae varua e mauiui ra aore ra e hamani-ino-hia ra, i to tatou anaanatae ia ratou, e mea oaoa roa na Iehova ia faaroo mai ia tatou ia faahiti i taua huru tapitapiraa ra. (Luka 22:32; Ioane 17:20; Tesalonia 1, 5:25) Inaha, ua papai te aposetolo Paulo e: “Eiaha outou e ahoaho noa ˈtu i te mau mea atoa nei; e faaite hua râ i to outou hinaaro i te mau mea atoa nei i te Atua, i te pure, i te aniraa ˈtu ma te haamaitai. E na te hau a te Atua, o tei hau ê atu i te ite taata nei, e faaitoito mai i to outou aau, e to outou manaˈo i te Mesia nei ia Iesu.”—Philipi 4:6, 7.
A PURE MA TE TUUTUU ORE
15. Eaha ta tatou e haamanaˈo ia manaˈo tatou e aita ta tatou mau pure e pahonohia maira?
15 Noa ˈtu e te noaa noa ra ia oe i te ite no nia i te Atua, e manaˈo paha oe i te tahi taime e aita ta oe mau pure e pahonohia maira. E nehenehe te reira e tupu no te mea aita i tae i te taime te Atua e pahono mai ai i taua pure ra. (Koheleta 3:1-9) E nehenehe o Iehova e faatia i te hoê tupuraa ia tamau noa i te hoê area taime, tera râ e pahono mai oia i te mau pure e ua ite oia eaha te taime tano maitai oia e na reira ˈi.—Korinetia 2, 12:7-9.
16. No te aha tatou e tamau noa ˈi i te pure, e nafea te reira ia ohipa i nia i to tatou taairaa e te Atua?
16 Te faaite ra to tatou tamau-maite-raa i te pure i to tatou anaanatae rahi no te mea o ta tatou e ani ra i te Atua. (Luka 18:1-8) Ei hiˈoraa, e ani paha tatou ia Iehova ia tauturu ia tatou ia na nia ˈˈe i te hoê huru paruparu. Ia pure tatou ma te tuutuu ore e ia ohipa tatou ia au maite i ta tatou mau aniraa, e faaite ïa tatou i to tatou huru rotahi. E tia ia tatou ia faataa maitai e ia ore e haavare i roto i ta tatou mau aniraa. E mea faufaa iho â râ ia pure uˈana ia farerei anaˈe tatou i te hoê tamataraa. (Mataio 6:13) Ia tamau noa tatou i te pure a tamata noa ˈi tatou i te haavî i to tatou mau hinaaro uˈana e rave i te hara, e ite tatou e nafea o Iehova ia tauturu mai ia tatou. E faaitoito hoi te reira i to tatou faaroo e e haapaari i to tatou mau taairaa e o ˈna.—Korinetia 1, 10:13; Philipi 4:13.
17. Nafea tatou e faufaahia ˈi ia tamau tatou i te pure ma te tavini i te Atua?
17 Na roto i te tamauraa tatou i te pure ma te rave i te taviniraa moˈa a te Atua ra o Iehova, e ite ïa tatou e e eita tatou e tavini ia ˈna ia au i to tatou iho puai. Auaˈa o Iehova e tupu ai te mau mea atoa. (Korinetia 1, 4:7) E tauturu te fariiraa tatou i te reira, ia riro tatou ei taata haehaa e e faufaahia hoi to tatou taairaa e o ˈna. (Petero 1, 5:5, 6) Oia, e mau tumu papu maitai e vai nei ia tatou ia ore tatou e tuutuu i te pure. E faatupu ta tatou mau pure itoito maitai e te ite faufaa roa e faaite ra nafea râ ia haafatata ˈtu i to tatou Metua here i te raˈi ra, i te oaoa mau i roto i to tatou oraraa.
TE APARAURAA E O IEHOVA E ERE HOÊ ANAˈE TAATA O TE PARAPARAU
18. Nafea tatou ia faaroo i te Atua?
18 Mai te peu e e hinaaro tatou e ia faaroo mai te Atua i ta tatou mau pure, e tia ia tatou ia faaroo atu eaha ta ˈna e parau maira. (Zekaria 7:13) Eita oia e faatae faahou mai i ta ˈna mau poroi na roto i te mau peropheta i faauruahia e te Atua e papu maitai eita oia e faaohipa i te mau ravea tahutahu. (Deuteronomi 18:10-12) E nehenehe râ tatou e faaroo i te Atua na roto i te haapiiraa i ta ˈna Parau, te Bibilia. (Roma 15:4; Timoteo 2, 3:16, 17) Mai ia tatou e hinaaro ia mau mai te au o te maa ei maitai no tatou, te faaitoitohia maira tatou ia “hiaai maite . . . i te û anoi-ore-hia ra i te parau.” A atuatu i te hiaai i te maa varua na roto i te taioraa i te Parau a te Atua i te mau mahana atoa.—Petero 1, 2:2, 3; Ohipa 17:11.
19. Eaha te faufaaraa ia feruri hohonu tatou i nia i te mea o ta tatou e taio ra i roto i te Bibilia?
19 A feruri hohonu na i nia i te mau mea o ta oe e taio ra i roto i te Bibilia. (Salamo 1:1-3; 77:11, 12) Te auraa ra, ia feruri ïa oe i nia i te tumu parau. E nehenehe oe e faaau i te reira i te maa e faatopahia i roto i te opu. E nehenehe oe e taa maitai i te mau mea i te pae varua na roto i te faatuatiraa i te mau mea o ta oe e taio ra i te mau mea o ta oe i ite aˈena. A manaˈo na nafea te tumu parau ia ohipa i nia i to oe oraraa, aore ra a manaˈonaˈo na i te mau mea o ta ˈna e faaite ra no nia i te mau maitai e te mau haerea o Iehova. No reira na roto i te haapiiraa tataitahi, e nehenehe oe e rave i te maa i te pae varua ta Iehova e horoa maira. E haafatata roa ˈtu hoi te reira ia oe i te Atua e e tauturu mai ia oe ia faaruru i te mau fifi o te mau mahana atoa.
20. Nafea te taeraa i te mau putuputuraa kerisetiano ia tauturu ia tatou ia haafatata ˈtu i te Atua?
20 E nehenehe atoa oe e haafatata ˈtu i te Atua na roto i te faarooraa i ta ˈna Parau e vauvauhia mai i te mau putuputuraa kerisetiano, mai te mau ati Iseraela i faaroo maite i to ratou haaputuputuraahia no te faaroo i te taioraa i te Ture a te Atua i mua i te huiraatira. Ua haafaufaa maitai te feia haapii o taua tau ra i ta ratou taioraa i te Ture, ma te tauturu i te feia e faaroo maira ia taa e ia faaitoitohia i te faaohipa i te mau mea o ta ratou e faaroo ra. E oaoaraa rahi tei itea mai i te reira. (Nehemia 8:8, 12) No reira, ia riro na ei peu na oe te amuiraa ˈtu i roto i te mau putuputuraa a te mau Ite no Iehova e tia ˈi. (Hebera 10:24, 25) E tauturu hoi te reira ia oe ia faaohipa i te ite a te Atua i roto i to oe oraraa e e faaoaoa ia oe. E tauturu te amuimuiraa ˈtu oe i roto i te autaeaeraa kerisetiano o te ao taatoa nei, ia vai piri noa oe i pihai iho ia Iehova. E mai ta tatou e ite atu, e nehenehe oe e ite i te vai-maitai-raa mau i rotopu i te nunaa o te Atua.
A HIˈOPOA NA I TO OE ITE
No te aha e tia ia oe ia haafatata ˈtu i te Atua?
Eaha te tahi mau titauraa no te haafatata ˈtu i te Atua?
Eaha ta oe e nehenehe e faaô atu i roto i ta oe mau pure?
No te aha e tia ˈi ia oe ia tamau noa i te pure?
Nafea oe ia faaroo ia Iehova i teie nei mahana?
[Uiraa haapiiraa]
[Hohoˈa api taatoa i te api 157]
