No te aha te Atua e faatia ˈi i te mauiui?
Pene 8
No te aha te Atua e faatia ˈi i te mauiui?
1, 2. E pinepine, eaha te huru o te taata i mua i te mauiui e farereihia e ana?
IA TAIRI te mau ati, ma te haamou roa i te mau fare e ma te haapohe i te taata, e rave rahi o te ore e taa e no te aha taua mau ohipa riaria ra e tupu ai. Te peapea nei vetahi pae i te ohipa taparahi taata e te haavîraa uˈana rahi e te taehae e ravehia nei e aita e tumu. Ua ui atoa paha oe e, ‘No te aha te Atua e faatia ai i te ino?’
2 No te mea aita i itea e ratou i te pahonoraa tano i taua uiraa nei, e rave rahi aita e tiaturi faahou ra i te Atua. Te manaˈo nei ratou e aita o ˈna e anaanatae maira i te taata nei. E haamata te tahi pae o te farii ra i te mauiui ei tuhaa no te oraraa, i te inoino e i te faahapa i te Atua no te mau ino atoa i roto i te totaiete taata nei. Mai te peu e te reira to oe manaˈo, peneiaˈe e anaanatae roa oe i te mau manaˈo o te Bibilia i nia i teie mau tumu parau.
E ERE NA TE ATUA I FAATUPU I TE MAUIUI
3, 4. No te aha tatou e nehenehe ai e papu e e ere na Iehova i faatupu i te ino e te mauiui?
3 Te haapapu maira te Bibilia e e ere na te Atua ra o Iehova i faatupu i te mauiui ta tatou e ite nei. Ei hiˈoraa, teie ta te pǐpǐ o Iakobo i papai: “Eiaha roa ei taata haavarehia e parau e, Ua haavarehia vau e te Atua, e ore roa hoi te Atua e vare i te ino, e ore roa hoi oia e haavare i te taata.” (Iakobo 1:13) Mai te reira mau â hoi, eita o te Atua e nehenehe e faatupu i te mau ati e rave rahi e tairi nei i te huitaata. Eita o ˈna e faatae i te mau ati i nia i te taata ia nehenehe ratou e fanaˈo i te oraraa i nia i te raˈi, eita atoa oia e haamauiui i te taata no te mau ohipa iino atoa ta ratou paha i rave i roto i to ratou oraraa na mua ˈtu.—Roma 6:7.
4 Hau atu, noa ˈtu â ïa e mea rahi te mau ohipa riaria i ravehia na nia i te iˈoa o te Atua aore ra o te Mesia, aita e rea parau i roto i te Bibilia e haapapu maira e ua farii raua i taua mau ohipa ra. Aita ta te Atua e ta te Mesia e tuhaa e te feia e parau ra e te tavini ra ratou ia raua e o te taviri hoi i te faufaa e te eiâ, te taparahi i te taata e te haru i te taoˈa, e te faatupu e rave rahi atu â mau mea e haamauiui i te taata. Inaha, mea “riaria [na] Iehova i te parau a te paieti ore.” “Tei te atea ê [te Atua] i te feia paieti ore.”—Maseli 15:9, 29.
5. Eaha vetahi mau maitai o Iehova, e eaha to ˈna huru i nia i te mau mea ora o ta ˈna i poiete?
5 Te faataa ra te Bibilia ia Iehova mai tei “î . . . i te aroha, e te hamani maitai rahi.” (Iakobo 5:11) Te parau ra oia e “mea au hoi na Iehova te parau-tia.” (Salamo 37:28; Isaia 61:8) E ere oia i te Atua tahoo. Te aupuru maira oia i te mau mea ora o ta ˈna i poiete ma te horoa na ratou pauroa i te mea maitai roa ˈˈe ei maitai no ratou. (Ohipa 14:16, 17) Ua na reira o Iehova mai te omuaraa mai o te oraraa i nia i te fenua nei.
TE HOÊ HAAMATARAA TIA ROA
6. Mea nafea to te tahi mau aai faahitiraa i te aamu o te taata i te haamataraa?
6 Ua matau tatou paatoa i te ite e te putapû i te peapea e te mauiui. Mea fifi roa râ ia manaˈo e te vai ra te hoê tau aita e mauiui faahou, inaha mai te reira hoi te mau mea i te omuaraa o te aamu taata nei. Te faahiti atoa ra te mau aai a te tahi mau nunaa i te hoê haamataraa oaoa mai te reira te huru. I roto i te aai heleni, ua piihia te omuaraa o te mau “Tau e Pae o te Taata” te “Tau Auro.” I reira, e ora na te mau taata i te hoê oraraa oaoa, aita e ohipa rohirohi, aita e peapea, e aita atoa te mau faainoraa a te ruauraa. Te parau ra te mau Tinito e i raro aˈe i te ariiraa a te Emepera Rearea o te aai (Huang-Ti), e ora na te taata ma te hau, e te fanaˈo i te au-maite-raa o te hoê anuvera maitai mau e o te mau animala oviri. E aai anaˈe ta to Peresia, to Aiphiti, to Tibet, to Pérou, e to Mexique no nia i te hoê tau oaoa e te huru tia roa, i te omuaraa o te aamu taata nei.
7. No te aha te Atua i poiete ai i te fenua e te huitaata?
7 Te faahiti noa ra hoi te mau aai o te mau nunaa i te aamu tahito roa ˈˈe i papaihia no nia i te aamu taata nei, oia hoi te Bibilia. Te haamaramarama maira oia ia tatou e ua tuu te Atua i na taata matamua, o Adamu e o Eva, i roto i te hoê paradaiso piihia te ô i Edene ra e ua faaue atura ia raua e: “Ia fanau orua, e ia rahi roa, e faaî i te fenua nei, e e haavi iho.” (Genese 1:28) Ua fanaˈo to tatou nau metua matamua i te huru taata tia roa e ua noaa ia raua i te tiaturiraa e ite atu i te fenua taatoa nei ia riro ei paradaiso e faaeahia e te hoê utuafare fetii tia roa e ora e a muri noa ˈtu i roto i te hau e te oaoa. Tera te opuaraa a te Atua ia ˈna i poiete i te fenua e te huitaata.—Isaia 45:18.
TE HOÊ FAATIHAEHAERAA INO MAU
8. Ua titauhia o Adamu e o Eva e auraro i teihea faaueraa, eaha râ te ohipa i tupu?
8 Ia farii-noa-hia raua e te Atua, e tia ia Adamu e ia Eva ia haapae roa i te amu i to “te raau e ite ai i te maitai e te ino.” (Genese 2:16, 17) Ahiri raua i auraro i te ture a Iehova, eita ïa e itehia te mauiui ia faaino i te oraraa o te taata. Ia auraro raua i te faaueraa a te Atua, e faaite ïa raua i to raua here ia Iehova e i to raua haapao maitai ia ˈna. (Ioane 1, 5:3) Mai ta tatou râ i haapii mai i roto i te pene 6, aita te mau mea i tupu mai te reira. Ma te turaihia e Satani, ua amu aˈera o Eva i to taua raau ra. I muri aˈe, ua amu atoa aˈera o Adamu i taua maa i opanihia ra.
9. Eaha te aimârôraa no nia ia Iehova ta Satani i faatupu?
9 Te taa ra anei ia oe i te faufaaraa o te ohipa i tupu? Ua aro o Satani i te tiaraa o Iehova ei Mana Teitei roa ˈˈe. Ia parau e, “E ore roa orua e pohe,” ua patoi atu te Diabolo i te mau parau a te Atua, oia hoi “E pohe ïa oe.” Te haapapu ra te mau parau a Satani i faahiti i muri iho e aita o Iehova i hinaaro e ia ite o Adamu e o Eva i te ravea e nehenehe ai raua e riro mai te Atua ra te huru, eita ˈtura hoi raua e hinaaro faahou Ia ˈna no te faaoti e eaha te mea maitai e te mea ino. Te faahapa ra ïa te faatihaehaeraa a Satani i te faufaaraa o te tiaraa o Iehova ei Mana arii i nia i te ao taatoa nei.—Genese 2:17; 3:1-6.
10. Eaha te mau manaˈo ta Satani i horoa no nia i te taata?
10 Ua horoa atoa te Diabolo ra o Satani i te manaˈo e e tamau noâ te taata i te auraro ia Iehova mai te peu e e faufaahia ratou i te roaraa o to ratou auraroraa i te Atua. Teie atoa te auraa, o te haapao maitai o te taata tei haavahavahahia. Ua pari hoi o Satani e aita e taata e hinaaro mau e tapea i to ˈna haapao maitai i te Atua. Ua faaite-papu-hia teie faahaparaa ino a Satani i roto i te aamu a te Bibilia no nia ia Ioba, te hoê tavini haapao maitai a Iehova tei faaruru i te hoê tamataraa rahi hou te matahiti 1600 hou to tatou nei tau. Ia taio oe i na pene matamua e piti o te buka a Ioba, e nehenehe ïa oe e taa i te tumu te taata e mauiui ai e no te aha te Atua e faatia ˈi i te reira.
11. Eaha mau na te huru o Ioba, e eaha te pariraa ta Satani i faatupu?
11 Ua roohia te “taata parau-tia e te paieti,” ra o Ioba i te aroraa a Satani. A tahi, ua horoa o Satani i te mau manaˈo iino no Ioba ma te tuu i te uiraa ra e, “E mǎtaˈu noa anei Ioba i te Atua?” I muri iho, ua faaino aˈera te Diabolo i te Atua e o Ioba ma te aravihi, ma te pari e ua hoo mai o Iehova i te haapao maitai o Ioba na roto i te parururaa e te haamaitairaa ia ˈna. Ua faatihaehae maira o Satani ia Iehova i te na ôraa ˈtu e: “Nanao noa ˈtura râ i to rima a rave atu ai i ta ˈna e ia pau roa; e e faaino oia ia oe i mua i to aro i reira.”—Ioba 1:8-11.
12. (a) Eaha te mau uiraa te nehenehe e pahonohia ia faatia te Atua ia Satani i te tamata ia Ioba? (b) Eaha ïa te faahopearaa i te tamataraahia o Ioba?
12 Ua tavini noa anei o Ioba ia Iehova no te mau maitai anaˈe iho i noaa mai ia ˈna i te Atua ra? E nehenehe anei te haapao maitai o Ioba e upootia mai i roto i taua tamataraa ra? I te tahi aˈe pae, ua tiaturi papu anei o Iehova i ta ˈna tavini no te faatia e ia tamatahia o ˈna? E nehenehe taua mau uiraa nei e pahonohia ia faatia o Iehova ia Satani ia faatae i nia ia Ioba i te mau tamataraa iino roa ˈˈe. Ua riro te haerea haapao maitai o Ioba i roto i te tamataraa ta te Atua i faatia, mai tei faaitehia i roto i te buka a Ioba, ei haapapuraa no te hoê faatiaraa fati ore i te parau-tia o Iehova e te haapao maitai o te taata.—Ioba 42:1, 2, 12.
13. No te aha e ohipa atoa na tatou te ohipa i tupu i Edene ra e i nia ia Ioba?
13 E auraa hohonu roa to te ohipa i tupu i roto i te ô i Edene ra e i nia i te taata ra ia Ioba. No te huitaata atoa e no tatou nei atoa i teie nei mahana te mau aimârôraa ta Satani i faatupu. Ua faainohia te iˈoa o te Atua, e ua patoihia to ˈna tiaraa mana arii. Ua faahapahia te huru tia o te poieteraa a te Atua oia hoi te taata. E tia hoi taua mau aimârôraa ra ia faatitiaifarohia.
NAFEA IA FAATITIAIFARO I TE MAU AIMÂRÔRAA
14. Ia û oia i te hoê faatihaehaeraa ino mau, eaha te tia i te hoê taata i parihia ia rave?
14 Ei hiˈoraa, ahiri e e metua here oe e mea rahi ta oe tamarii, i roto i te hoê utuafare fetii oaoa mau. A feruri na e ua haavare haere te hoê o to oe mau taata tapiri, ma te pari e metua ino mau oe. Ahiri atura ïa e parau taua taata tapiri ra e aita ta oe mau tamarii e here ra ia oe, e faaea noa ratou i pihai iho ia oe no te mea aitâ i itehia mai ia ratou i te hoê oraraa maitai aˈe, e e haere ratou ia faaite mai te hoê taata ia ratou i te ravea. ‘E mea maamaa mau!’ o ta oe paha ïa e parau. Oia, nafea râ ïa oe ia haapapu i te reira? E riro paha te tahi mau metua i te riri roa. Hau atu hoi i te faatupu faahou i te fifi, e riro teie huru pahonoraa uˈana i te turu i te mau parau haavare. Te hoê ravea maitai roa no te faaruru i teie huru fifi, o te vaiihoraa ïa no te taata i pari mai ia oe i te taime no te haapapu mai i ta ˈna pariraa e no ta oe mau tamarii ia haapapu mai e te here mau ra ratou ia oe.
15. Mea nafea to Iehova maitiraa e pahono i te faatihaehaeraa a Satani?
15 Ua riro o Iehova mai taua metua here ra. E nehenehe o Adamu e o Eva e faaauhia i te mau tamarii, e e tano maitai ia Satani i te tiaraa o te taata tapiri haavare. Ma te paari, aita te Atua i haamou oioi ia Satani, Adamu, e o Eva, ua faatia râ oia i teie mau taata rave hara ia tamau noâ i te ora e maa taime. Ua vaiiho aˈera te reira no to tatou nau metua matamua i te taime no te faatupu i te fetii taata, e ua horoa hoi na te Diabolo i te ravea no te haapapu e ua tano anei ta ˈna faahaparaa ia nehenehe te mau aimârôraa ia faatitiaifarohia. Mai te omuaraa mai â, ua ite te Atua e e tapea vetahi feia i to ratou haapao maitai ia ˈna ma te haapapu e e haavare mau â o Satani. Auê hoi tatou i te mauruuru i te mea e ua tamau noâ o Iehova i te haamaitai e i te tauturu i te feia e here ra ia ˈna!—Paraleipomeno 2, 16:9; Maseli 15:3.
EAHA TEI HAAPAPUHIA?
16. Mea nafea te ao nei i te riroraa i te mana o Satani?
16 Fatata i te roaraa o te aamu taata nei, i vai na ia Satani te tiamâraa taatoa no te faatupu i ta ˈna opuaraa e faatere i te huitaata. E mana rahi atoa to ˈna i nia i te mau puai politita e ua faatupu hoi i te mau haapaoraa tei haamori ia ˈna maoti hoi ia Iehova. Ua riro atura te Diabolo ei “atua o teie nei ao,” e ua piihia oia ei “arii o teie nei ao.” (Korinetia 2, 4:4; Ioane 12:31) Oia mau, “te vai noa nei to te ao atoa i raro aˈe i taua varua ino ra.” (Ioane 1, 5:19) Teie anei ra te auraa e ua haapapu o Satani i ta ˈna faahaparaa e e nehenehe ta ˈna e faaatea ê i te huitaata atoa nei i te Atua ra o Iehova? Aita roa ˈtu! A faatia noa ˈi ia Satani ia ora noa, ua ohipa aˈera o Iehova no te faatupu i ta ˈna iho opuaraa. Eaha ˈtura ïa ta te Bibilia e faaite ra no nia i te faatiaraa te Atua i te ino?
17. Eaha ta tatou e haamanaˈo no nia i te tumu o te ino e te mauiui?
17 E ere na Iehova i faatupu i te ino e te mauiui. I te mea hoi e o Satani te faatere o teie nei ao e te atua o te amuiraa o te mau mea nei, o o ˈna ïa e te feia e turu ra ia ˈna te tumu no te huru o te totaiete taata e no te mau ati atoa ta te huitaata i faaoromai. Aita e taata e nehenehe mau e parau e o te Atua te tumu no taua huru ati ra.—Roma 9:14.
18. Eaha ta te faatiaraa o Iehova i te ino e te mauiui i haapapu no nia i te manaˈo te faaatea-ê-raa te taata i te Atua?
18 Ua haapapu te faatiaraa o Iehova i te ino e te mauiui e aita te faaatea-ê-raa te taata i te Atua i faatupu i te hoê ao maitai aˈe. Papu maitai, ua tapaohia te aamu na tera e tera ati. E te tumu no te reira, ua maiti ïa te taata e pee i to ratou iho haerea ma te faaatea ê mai i te Atua e aita roa ˈtu hoi ratou i tâuˈa noa ˈˈe i te Parau e i te hinaaro o te Atua. A pee noa ˈi te nunaa o Iehova i tahito ra e to ratou mau aratai faaroo ore i te ‘hororaa matauhia’ e a faarue ai ratou i ta ˈna parau, e mau faahopearaa ati mau tei itea mai. Na roto i ta ˈna peropheta ia Ieremia, ua na ô atura te Atua ia ratou e: “Ua haama te feia paari, ua maheahea, e ua fifi; inaha, ua faarue ratou i te parau a Iehova, e te paari ra, eaha to roto ia ratou?” (Ieremia 8:5, 6, 9) I te mea hoi aita ratou i pee i te mau ture a Iehova, riro maira ïa te pae rahi o te huitaata nei mai te hoê pahi aita e hoe, e titapoupou noa i roto i te hoê moana arepurepu.
19. Eaha te haapapuraa e vai ra e eita o Satani e nehenehe e haafariu ê i te taatoaraa o te taata no te patoi atu i te Atua?
19 Ua haapapu atoa te faatiaraa te Atua i te ino e te mauiui e aita o Satani i nehenehe e haafariu ê i te taatoaraa o te huitaata ia Iehova. Te faaite maira te aamu e ua ite-noa-hia te taata o te tapea i to ratou haapao maitai i te Atua noa ˈtu te mau tamataraa aore ra te mau ati i tupu i nia ia ratou. I te roaraa o te mau senekele, ua faaite o Iehova i to ˈna mana i nia i ta ˈna mau tavini, e ua faaitehia to ˈna iˈoa na te fenua atoa nei. (Exodo 9:16; Samuela 1, 12:22) Te faaite maira te Hebera pene 11 no nia i te hoê tabula roa mau o te mau taata haapao maitai, mai ia Abela, Enoha, Noa, Aberahama, e o Mose. Te parau ra te Hebera 12:1 no ratou mai ‘te nahoa rahi ite.’ Ua riro ratou ei hiˈoraa no te faaroo aueue ore ia Iehova. I to tatou atoa nei tau, e rave rahi tei pohe ma te tapea i to ratou haapao maitai aueue ore no te Atua. Maoti to ratou faaroo e to ratou here, ua haapapu maitai taua mau taata ra e eita ta Satani e nehenehe e haafariu i te mau taata atoa no te patoi atu i te Atua.
20. Eaha ta te faatiaraa o Iehova i te ino e te mauiui ia tamau noâ i te tupu, i haapapu no nia i te Atua e te huitaata nei?
20 I te pae hopea, ua haapapu mai te faatiaraa o Iehova i te ino e te mauiui ia tamau noâ e o Iehova anaˈe, te Poiete, o te nehenehe e o te tia ia faatere mai i te huitaata nei no to ratou maitai e to ratou oaoaraa mure ore. E rave rahi senekele to te taata tamata-noa-raa e rave rau mau faatereraa. Eaha râ hoi te faahopearaa? Ua riro te mau fifi e te mau ati huru rau e faaruruhia nei e te mau nunaa i teie mahana, ei haapapuraa taa maitai e e parau mau ta te Bibilia ia na ô oia e “e ta te taata nei faaheporaa ˈtu i te taata e pohe atura ei pohe no ˈna iho.” (Koheleta 8:9) O Iehova anaˈe te nehenehe e faaora ia tatou e e faatupu i ta ˈna opuaraa matamua. Nafea o ˈna ia faatupu i te reira, e afea?
21. Eaha te ravehia i nia ia Satani, e o vai te faaohipahia no te faatupu i te reira?
21 I muri noa ˈˈe o Adamu e o Eva e topa ˈi i roto i te opuaraa ino a Satani, ua faaite mai te Atua i Ta ˈna opuaraa no nia i te hoê ravea faaoraraa. Teie ta Iehova i parau no nia ia Satani: “E tuu hoi au i te au ore e riri ai ra ia orua o te vahine, e to [huero], e to ˈna ra [huero]; na ˈna e haaparuparu i to afii, e na oe e haaparuparu i to ˈna poro avae.” (Genese 3:15) Ua haapapu mai taua parau ra e eita te Diabolo e tamau noâ i te rave i ta ˈna mau ohipa iino e a muri noa ˈtu. Ei Arii no te Basileia mesia, e ‘haaparuparu’ te Huero i tǎpǔhia, o Iesu Mesia ‘i te afii o Satani.’ E, “eita e mahia,” e haamou roa o Iesu i te orure hau ra o Satani!—Roma 16:20.
E NAFEA ÏA OE?
22. (a) Eaha te mau uiraa te tia ia oe ia faaruru? (b) Noa ˈtu â ïa e faatupu o Satani i to ˈna riri i nia i te feia e tapea i to ratou haapao maitai i te Atua, e nehenehe ratou e papu i te aha?
22 Ma te ite i te mau aimârôraa, tei teihea ïa pae oe? E haapapu anei oe na roto i ta oe mau ohipa e e taata turu papu mau oe no Iehova? I te mea hoi e ua ite o Satani e taime poto roa to ˈna, e rave ïa oia i ta ˈna e nehenehe e rave no te faaite tahaa i to ˈna riri rahi i nia i te feia e hinaaro e tapea i to ratou haapao maitai no te Atua. (Apokalupo 12:12) E nehenehe râ oe e ani atu i te Atua te tauturu no te mea “ua ite maori [Iehova] i te faaora i te feia paieti i roto i te ati ra.” (Petero 2, 2:9) Eita o ˈna e vaiiho ia oe ia tamatahia hau atu i ta oe e nehenehe e faaoromai, e e iriti oia i te eˈa no oe ia nehenehe oe e faaoromai i taua mau tamataraa ra.—Korinetia 1, 10:13.
23. E nehenehe tatou e tiai ma te tiaturi i te aha?
23 Ma te tiaturi, ia tiai ïa tatou i te taime te Arii ra o Iesu Mesia e haa mai ai no te aro ia Satani e te feia atoa e pee ia ˈna. (Apokalupo 20:1-3) E faaore roa o Iesu i te feia atoa e o ratou te tumu no te mau ati e te mau arepurepuraa ta te huitaata e faaoromai ra. E tae noa ˈtu i taua taime ra, e mauiui mau â tatou ia pohe te feia herehia e tatou. A taio i te pene i mua nei no te ite e eaha te tupu i nia ia ratou.
A HIˈOPOA NA I TO OE ITE
Nafea tatou ia ite e e ere na Iehova i faatupu i te mauiui o te huitaata?
Eaha te mau aimârôraa i tuuhia mai e Satani i Edene ra e tei haapapuhia i te tau o Ioba?
Eaha ta te faatiaraa te Atua i te mauiui i haapapu mai?
[Uiraa haapiiraa]
