Ta te Atua i rave no te faaora i te huitaata nei
Pene 7
Ta te Atua i rave no te faaora i te huitaata nei
1, 2. (a) Mea nafea to te hoê raatira hanere roma iteraa ˈtu e o vai te Tamaiti a te Atua? (b) No te aha Iehova i faatia ˈi ia Iesu ia pohe?
I TE hoê avatea o te tau uaaraa tiare, fatata e 2 000 matahiti i teie nei, te hiˈo noa ra te hoê raatira hanere roma e toru na taata e mauiui noa ra e pohe atura. Ua tapao taa ê mai taua faehau ra i te hoê o ratou—o Iesu Mesia. Ua patǐtǐhia o Iesu i nia i te hoê pou raau. Ua haapouri te raˈi i te hora ahuru ma piti i te avatea a fatata noa mai ai te taime o to ˈna poheraa. Ia ˈna i pohe, ua aueue rahi te fenua, ua pii hua aˈera taua faehau ra e: “O te Tamaiti mau â teie nei taata na te Atua.”—Mareko 15:39.
2 Te Tamaiti a te Atua! Ua tano mau taua faehau ra. No ite noa ˈtura hoi oia i te ohipa faufaa roa ˈˈe i ore aˈenei i tupu i nia i te fenua nei. E rave rahi taime na mua ˈtu, ua pii te Atua iho ia Iesu o te Tamaiti here na ˈna ra. (Mataio 3:17; 17:5) No te aha o Iehova i faatia ˈi i ta ˈna Tamaiti ia pohe? No te mea o te ravea teie a te Atua no te faaora i te huitaata nei i te hara e te pohe.
MAITIHIA NO TE HOÊ OPUARAA TAA Ê
3. No te aha e tano maitai ia maitihia te Tamaiti fanau tahi a te Atua no te hoê opuaraa taa ê no te huitaata nei?
3 Mai ta tatou i ite mai na i roto i teie nei buka, i vai na Iesu hou oia e riro mai ai ei taata. Ua piihia oia te “Tamaiti fanau tahi” a te Atua no te mea na Iehova iho i poiete ia ˈna. Ua faaohipa te Atua ia ˈna i muri iho no te hamani i te tahi atu mau mea atoa. (Ioane 3:18; Kolosa 1:16) Mea here mau â na Iesu i te taata nei. (Maseli 8:30, 31) Eita ˈtura ïa e maerehia ia maiti o Iehova i ta ˈna Tamaiti fanau tahi no te haapao i te hoê opuaraa taa ê a roohia ˈi te taata nei i te utua o te pohe!
4, 5. Hou aˈe Iesu e haere mai ai i te fenua nei, eaha ta te Bibilia i faaite no nia i te Huero Mesia?
4 Ia ˈna i faaoti i ta ˈna haavaraa i nia ia Adamu, Eva, e o Satani i roto i te ô i Edene ra, ua faahiti aˈera te Atua i te parau no te Faaora e tia mai e a muri aˈe ei “[huero].” E haere mai taua Huero ra no te faaore roa i te mau ati riaria mau ta te Diabolo ra o Satani, “taua ophi tahito ra,” i faatupu. I te parau mau, e haaparuparu roa te Huero i tǎpǔhia maira, ia Satani e te feia atoa e pee ia ˈna.—Genese 3:15; Ioane 1, 3:8; Apokalupo 12:9.
5 I te roaraa o te mau senekele, ua faaite riirii mai te Atua i te parau no nia i te Huero, pii-atoa-hia te Mesia. Mai tei faahitihia i roto i te tabula o te api 37, mea rahi te mau parau tohu tei horoa mai i te mau haamaramaramaraa no nia i te mau tuhaa e rave rahi o to ˈna oraraa i nia i te fenua nei. Ei hiˈoraa, e tia ia ˈna ia faaoromai i te hamani-ino-raa riaria mau no te faatupu i to ˈna tiaraa i roto i te opuaraa a te Atua.—Isaia 53:3-5.
NO TE AHA TE MESIA E POHE AI
6. Ia au i te Daniela 9:24-26, eaha ta te Mesia e faatupu, e mea nafea?
6 Ua faaite atea mai te parau tohu i roto i te Daniela 9:24-26 e e faatupu te Mesia—Tei Faatahinuhia e te Atua—i te hoê opuaraa rahi mau. E haere mai oia i te fenua nei “ei opaniraa ˈtu i te hara, ei faaotiraa ˈtu i te mau ino, ei tatararaa ˈtu i te hara, e ei faaôraa mai i te parau-tia” e a muri noa ˈtu. E tatara hoi te Mesia i te faautuaraa a te pohe i nia i te huitaata faaroo. Tera râ, nafea oia ia faatupu i te reira? Te faataa ra te parau tohu e e “tâpû-ê-hia” oia aore ra e haapohehia oia.
7. No te aha te mau ati Iuda i pûpû ai i te mau tusia animala, e te faataipe ra te reira i te aha?
7 Ua matau te mau ati Iseraela i tahito ra i te parau no te faaoreraa i te hara. I roto i ta ratou haamoriraa i raro aˈe i te Ture ta te Atua i horoa ˈtu ia ratou ra na roto i te arai o Mose, e pinepine ratou i te pûpû i te mau tusia animala. E faahaamanaˈo na hoi te reira i te nunaa Iseraela e mea hinaaro na te taata i te hoê mea e tatara, aore ra e tapoˈi, i ta ratou mau hara. Ua haapoto te aposetolo Paulo i te faaueraa tumu mai teie te huru: “E aore e toto i faatahehia ra, aita roa e faaoreraa hara.” (Hebera 9:22) Aita te mau kerisetiano i raro aˈe i te Ture a Mose e ta ˈna mau titauraa, mai te mau tusia. (Roma 10:4; Kolosa 2:16, 17) Ua ite atoa ratou e eita ta te mau tusia animala e nehenehe e faaore tamau e e faaore roa i te mau hara. Eita, e taipe râ taua mau pûpûraa tusia ra no te hoê tusia tei hau atu i te faufaa—to te Mesia. (Hebera 10:4, 10; a faaau e te Galatia 3:24.) Inaha, e riro paha oe i te aniani e, ‘Mea titau-mau-hia anei e ia pohe te Mesia?’
8, 9. Eaha te mau mea taoˈa rahi i erehia ia Adamu raua o Eva, e eaha te faahopearaa o ta raua mau ohipa i nia i ta raua huaai?
8 E, e tia i te Mesia ia pohe mai te peu e e tia i te huitaata nei ia faaorahia. Ia papu ia tatou e no te aha, e tia ia tatou ia hoˈi i muri i roto i te ô i Edene ra e ia tamata i te taa i te rahi o te faufaa i erehia ia Adamu e o Eva i to raua orureraa i te Atua. O te ora mure tei tuuhia mai i mua ia raua! Ma to raua tiaraa tamarii na te Atua, ua fanaˈo atoa raua i te taairaa fatata roa e o ˈna. Ia raua râ i faarue i te faatereraa a Iehova, ua erehia aˈera raua i taua mau mea atoa ra e ua tuu maira hoi i te hara e te pohe i nia i te huitaata nei.—Roma 5:12.
9 Mai te mea ra e i to tatou nau metua matamua haamâuˈa-noa-raa i te hoê taoˈa faufaa rahi, topa ˈtura raua i roto i te hoê tarahuraa rahi. Ua vaiiho maira o Adamu raua o Eva i taua tarahu ra na ta raua huaai. No te mea aita tatou i fanauhia ma te huru taata tia roa e te hara ore, e taata hara anaˈe atura ïa tatou paatoa e te roohia i te pohe. Ia maˈihia tatou aore ra ia parau tatou i te hoê parau e haamauiui e o ta tatou hoi e hinaaro e faaore, te ite ra ïa tatou i te mau faahopearaa o te utua no ǒ mai i to tatou mau tupuna ra—te huru taata tia ore. (Roma 7:21-25) Ta tatou tiaturiraa hoê roa te noaa-faahou-raa mai ïa ia tatou i tei erehia e Adamu. Eita râ te ora taata tia roa e nehenehe e noaa ia tatou. I te mea hoi e e rave te mau taata tia ore atoa i te hara, o te pohe ïa te noaa ia tatou paatoa, eiaha te ora.—Roma 6:23.
10. Eaha tei hinaarohia no te hoo mai i tei erehia e Adamu?
10 Inaha, e nehenehe anei te hoê mea e pûpûhia ei taui i te ora i erehia e Adamu? E titau te mau ture parau-tia a te Atua i te aifaito, “mai te pohe ra, ei pohe ïa te utua.” (Exodo 21:23) No reira e tia te hoê ora ia pûpûhia no te aufau i te ora i erehia. Eita te ora no te mau huru taata atoa e navai. Te na ô ra te Salamo 49:7, 8 no nia i te mau taata tia ore e: “E ore roa e tia i te taata ia faaora i tana taeae, e aita a ˈna hoo ia hopoi i te Atua e noaa mai ai oia ra: (i te rahi hoi o te hoo ia ˈna e ora ˈi, e ore roa ˈtu ïa e taea).” No reira, e nehenehe anei e parau e aita e ravea faahou? Papu maitai eita.
11. (a) Eaha te auraa o te parau ra “hoo” na roto i te reo Hebera? (b) O vai anaˈe te nehenehe e hoo mai i te huitaata nei, e no te aha?
11 I roto i te reo Hebera, te auraa o te parau ra “hoo” o te tuhaa moni ïa e aufauhia no te hoo mai i te hoê taata i roto i te tapearaa e e tuati atoa i te parau ra aifaito. O te hoê taata tia anaˈe te nehenehe e pûpû i te mea e aifaito noa i tei erehia e Adamu. I muri aˈe ia Adamu, te taata i fanauhia mai ma te huru taata tia roa o Iesu Mesia anaˈe ïa. No reira te Bibilia i pii ai ia Iesu “te Adamu hopea” e e haapapu mai ai ia tatou e ua “horoa [o Iesu] ia ˈna iho ei hoo i te taata atoa.” (Korinetia 1, 15:45; Timoteo 1, 2:5, 6) Noa ˈtu â ïa e ua tuu mai o Adamu i te pohe i nia i ta ˈna mau tamarii, e horoa mai o Iesu i te ora mure ore. Te faataa ra te Korinetia hoê, 15:22 e: “Mai te taata i hope i te pohe ia Adamu, e hope atoa i te faaorahia i te Mesia.” Tano maitai atura ïa o Iesu i te piiraahia te “Metua no te ui a muri atu.”—Isaia 9:6, 7.
MEA NAFEA TE HOO I TE AUFAURAAHIA
12. Afea ra to Iesu riroraa mai ei Mesia, e i muri mai eaha te huru oraraa o ta ˈna i pee atu?
12 I te tau haapoheraa raau o te matahiti 29 o to tatou nei tau, ua haere atura o Iesu i to ˈna fetii ia Ioane ia bapetizohia oia e ia faaite atoa ˈtu hoi oia ia ˈna no te faatupu i te hinaaro o te Atua. I taua taime ra, ua faatavai o Iehova ia Iesu i te varua moˈa. Ua riro maira ïa o Iesu ei Mesia aore ra Kirito tei faatahinuhia e te Atua. (Mataio 3:16, 17) E mai reira mai, ua haamata aˈera Iesu i ta ˈna taviniraa e toru matahiti e te afa te maoro. Ua tere haere oia na to ˈna fenua, i te pororaa i te Basileia o te Atua e te haaputuputuraa i ta ˈna mau pǐpǐ haapao maitai. Tera râ, mai tei tohuhia mai, aita i maoro roa te patoiraa ia ˈna i te rahi roa.—Salamo 118:22; Ohipa 4:8-11.
13. Eaha te mau ohipa i aratai i te poheraa o Iesu ei taata o tei tapea i to ˈna haapao maitai?
13 Ua faaite tahaa roa mai o Iesu ma te itoito, i te huru haavarevare o te mau aratai haapaoraa, ua imi ratou i te ravea no te haapohe ia ˈna. O ratou atoa te tumu no te hoê opuaraa ino hairiiri mau oia hoi te hooraahia oia, te tapearaahia oia ma te tano ore e te mau tia mana, te haamauiuiraahia ma te tia ore, e te pariraahia o ˈna i te ohipa faahuehue. Ua papaihia o Iesu, ua tutuhahia ˈtu i nia iho, ua faaooohia, ua tairihia i te hoê taura tairi ia mutumutu roa to ˈna tino. E ua faautua te tavana roma ra o Ponotio Pilato ia ˈna i te utua pohe i nia i te hoê pou haamauiuiraa. Ua patǐtǐhia o ˈna i nia i te hoê pou raau ma te rî-tia-noa-hia. I te mau hutiraa aho atoa e mauiui roa o ˈna, e mau hora i muri iho pohe atura o ˈna. I roto i taua ati ra, ua tapea o Iesu i to ˈna haapao maitai tia roa i te Atua.
14. No te aha te Atua i faatia ˈi i ta ˈna Tamaiti ia mauiui e ia pohe?
14 No reira, i te 14 no Nisana o te matahiti 33 o to tatou nei tau to Iesu horoaraa i to ˈna ora ei “hoo no te taata e rave rahi.” (Mareko 10:45; Timoteo 1, 2:5, 6) Mai te raˈi mai, ua nehenehe o Iehova e ite i ta ˈna Tamaiti here i te mauiuiraa e i te poheraa. No te aha te Atua i farii ai e ia tupu te hoê ohipa riaria mau mai te reira te huru? Ua na reira oia no te mea ua here o ˈna i te huitaata nei. Teie ta Iesu i parau: “I aroha mai te Atua i to te ao, e ua tae roa i te horoa mai i ta ˈna Tamaiti fanau tahi, ia ore ia pohe te faaroo ia ˈna ra, ia roaa râ te ora mure ore.” (Ioane 3:16) Te haapii atoa maira te pohe o Iesu ia tatou e e Atua parau-tia mau o Iehova. (Deuteronomi 32:4) E aniani paha vetahi taata e no te aha te Atua i ore ai e faahuru ê i ta ˈna mau faaueraa tumu no nia i te parau-tia e titau e pohe e pohe ïa e ma te ore e tâuˈa i te hoo e titauhia no te hara a Adamu. Te tumu no te mea ïa e faatupu noa o Iehova i ta ˈna mau ture e e faateitei hoi oia i te reira, noa ˈtu e e tia ia ˈna ia horoa rahi ia ˈna iho.
15. No te tano ore hoi e ia faatia e ia mou roa te ora o Iesu, eaha ˈtura ïa ta Iehova i rave?
15 E titau atoa te parau-tia a Iehova e ei faahopearaa oaoa to te pohe o Iesu e tia ˈi. Inaha hoi, te vai ra anei te parau-tia ia vaiiho-noa-hia te taata haapao maitai ra o Iesu ia taoto noa i roto i te pohe e a muri noa ˈtu? Papu maitai aita! Ua tohu mai te mau Papai Hebera e eita te taata haapao maitai a Iehova e faaea noa i roto i te apoo. (Salamo 16:10; Ohipa 13:35) Ua taoto oia i roto i te pohe e piti mahana taatoa e te tuhaa matamua o te toru o te mahana, e ua faatia mai te Atua ra o Iehova ia ˈna no te ora ei varua puai mau.—Petero 1, 3:18.
16. Eaha ta Iesu i rave ia ˈna i hoˈi atu i nia i te raˈi?
16 I to ˈna poheraa, ua horoa roa o Iesu i to ˈna ora taata. I te faatiaraahia oia no te ora ˈtu i nia i te raˈi, ua riro maira oia ei varua e horoa i te ora. Hau atu, ia Iesu i haere atu i te vahi moˈa roa ˈˈe o te ao nei, ua tahoê faahou atu oia i to ˈna Metua here ra e ua faaite atura hoi Ia ˈna i te faufaa o to ˈna ora taata tia roa. (Hebera 9:23-28) E nehenehe atura ïa te faufaa o taua ora taoˈa rahi ra e faaohipahia no te huitaata faaroo. Eaha ïa to te reira auraa no oe?
TE HOO O TE MESIA E OE
17. Nafea tatou e fanaˈo ai i te faaoreraa i te hara na nia i te niu o te tusia hoo o te Mesia?
17 A hiˈo na e toru ravea e fanaˈo ai oe i te tusia hoo o te Mesia i teie nei â. A tahi, e faaore te reira i te hara. Ia tiaturi tatou i te toto o Iesu i manii, e noaa ïa ia tatou i “te ora [i te hoo],” e, “i te hara i faaorehia nei.” (Ephesia 1:7) No reira, mai te peu e ua rave tatou i te hoê hara ino roa, e nehenehe tatou e ani i te Atua ia faaore mai i te reira na roto i te iˈoa o Iesu. Mai te peu e e tatarahapa mau tatou, e faaohipa ïa o Iehova i nia ia tatou nei i te faufaa o te tusia hoo o ta ˈna Tamaiti. E faaore mai te Atua i ta tatou nei hara, ma te horoa mai i te haamaitairaa o te hoê haava manaˈo maitai, maoti hoi i te faautua mai ia tatou i te utua pohe no ta tatou hara.—Ohipa 3:19; Petero 1, 3:21.
18. Nafea te tusia o te Mesia e horoa mai i te tiaturiraa na tatou?
18 Te piti, e horoa mai te tusia hoo o te Mesia i te niu no to tatou tiaturiraa no a muri aˈe. Ua ite orama te aposetolo Ioane e e ora ˈtu te “feia rahi roa, e ore roa e pau ia taio” i te hopea ati mau o te amuiraa o te mau mea nei, o te fatata mai nei. No te aha hoi ratou e ora ˈi ia haamou anaˈe hoi te Atua e rave rahi atu mau taata? Ua parau atura te hoê melahi ia Ioane e ‘ua horoi taua feia rahi ra i to ratou ahu, e ua teatea, i te toto o te Arenio,’ o Iesu Mesia. (Apokalupo 7:9, 14) Ia faaohipa noa anaˈe tatou i te faaroo i roto i te toto o Iesu Mesia i manii e ia ora ia au i te titauraa a te Atua, e mâ ïa tatou i mua i te aro o te Atua e e noaa hoi ia tatou i te tiaturiraa o te ora mure ore.
19. Nafea te tusia o te Mesia ia haapapu e te here maira oia e to ˈna atoa Metua ia oe?
19 Te toru, te tusia hoo o te haapapuraa hopea ïa o te here o Iehova. E itehia i roto i te pohe o Iesu nau tapao here rahi roa ˈˈe i roto i te aamu o te ao nei: (1) Te here o te Atua ia ˈna i tono mai i ta ˈna Tamaiti no tatou nei; (2) Te here o Iesu na roto i te hinaaro-mau-raa oia e pûpû ia ˈna iho ei hoo. (Ioane 15:13; Roma 5:8) Mai te peu e e faaohipa mau tatou i te faaroo, e fanaˈo tatou tataitahi i taua here ra. Teie ta te aposetolo Paulo i parau: “Te Tamaiti a te Atua; o tei aroha mai ia ˈu, e ua horoa ia ˈna iho no ˈu.”—Galatia 2:20; Hebera 2:9; Ioane 1, 4:9, 10.
20. No te aha tatou e faaohipa ˈi i te faaroo i roto i te tusia hoo o Iesu?
20 No reira, ia faaite na tatou i to tatou mauruuru no te here o te Atua e te Mesia na roto i te faaohiparaa i te faaroo i roto i te tusia hoo o Iesu. Ia na reira tatou, e aratai ïa te reira i te ora mure ore. (Ioane 3:36) Inaha, e ere to tatou nei ora te tumu faufaa roa ˈˈe no te oraraa e te poheraa o Iesu i nia i te fenua nei. E ere, ta ˈna râ tapitapiraa matamua no nia ïa i te hoê tumu parau rahi roa ˈtu â, no nia i te ao taatoa nei. Mai ta tatou e ite i roto i te pene i mua nei, e tano taua tumu parau ra no tatou paatoa no te mea te faaite maira hoi no te aha te Atua i faatia noa ˈi i te ino e te mauiui ia tupu noa na i roto i teie nei ao.
A HIˈOPOA NA I TO OE ITE
No te aha e tia e ia pohe o Iesu no te huitaata nei?
Mea nafea te hoo i te aufauraahia?
E fanaˈo oe i te hoo i roto i teihea tuhaa?
[Uiraa haapiiraa]
[Hohoˈa api taatoa i te api 67]
