To vai mana ta oe e auraro?
Pene 14
To vai mana ta oe e auraro?
1, 2. Mea ino anei te taatoaraa o te mau mana? A faataa mai na.
“MANA” o te hoê ïa parau e au-ore-roa-hia e te taata e rave rahi. E nehenehe tatou e taa i te reira, no te mea e pinepine te mana i te ore e faaohipa-maitai-hia—i te vahi raveraa ohipa, i roto i te utuafare, e na te mau faatereraa. Te na ô ra hoi te Bibilia e: “E ta te taata nei faaheporaa ˈtu i te taata e pohe atura ei pohe no ˈna iho.” (Koheleta 8:9) Oia mau, mea rahi tei faatere i te tahi pae ma te haavî e te faahepo e ia tavinihia ratou anaˈe ra.
2 E ere râ hoi te mau mana atoa i te mea ino. Ei hiˈoraa, ua riro atoa i te parauhia e e mana to to tatou tino i nia ia tatou nei. Te “faaue” nei oia ia tatou ia huti i te aho, ia tamaa, ia inu, e ia taoto. Mea teimaha anei te reira? Eita. Inaha, e riro te auraroraa tatou i taua mau titauraa ra, ei maitai no tatou. Noa ˈtu â ïa e ere i te mea opuahia te auraroraa tatou i te mau mea e titauhia e to tatou tino, te vai ra te tahi atu mau huru mana e titau e ia hinaaro mau iho â tatou e auraro. E tuatapapa anaˈe na i te tahi mau hiˈoraa.
TE MANA TEITEI ROA ˈˈE
3. No te aha e mea tia mau ia piihia o Iehova te “Fatu Mana hope”?
3 Hau atu i te 300 taime i roto i te Bibilia, e piihia o Iehova te “Fatu Mana hope.” Te hoê Mana hope o te hoê ïa taata e mau ra i te mana teitei roa ˈˈe. No te aha teie tiaraa e tano ai no Iehova? Te pahono ra te Apokalupo 4:11 e: “E au te hanahana ia oe, e [Iehova], e te tura, e te mana, na oe hoi i hamani i te mau mea atoa nei, e no to oe hinaaro i mau ai, e i hamanihia ˈi ratou.”
4. Mea nafea to Iehova maitiraa e faatupu i to ˈna mana?
4 Ei Poiete no tatou, e tiaraa ïa to Iehova no te faatupu i to ˈna mana mai ta ˈna e maiti. E riro paha te reira i te haamǎtaˈu, ia ite iho â râ tatou e “puai rahi” to te Atua. E piihia oia “te Atua mana hope ra”—te hoê iˈoa e horoa ra na roto i te reo hebera, i te manaˈo no te puai aita e faaauraa. (Isaia 40:26; Genese 17:1) Te faaite nei râ o Iehova i to ˈna puai ma te hamani maitai, no te mea to ˈna huru matamua, o te here ïa.—Ioane 1, 4:16.
5. No te aha e ere i te mea fifi ia auraro i te mana o Iehova?
5 Noa ˈtu e ua faaara mai o Iehova e faautua oia i te feia rave hara e ore e tatarahapa, ua ite na mua o Mose ia ˈna mai “te Atua mau ïa, o te Atua haavare ore, o tei haapao maite i te faufaa e te aroha i te feia i hinaaro ia ˈna, e te haapao i ta ˈna ra parau.” (Deuteronomi 7:9) A feruri na! Eita te Mana Teitei roa ˈˈe o te ao nei e faahepo ia tatou ia tavini ia ˈna. Tera râ, e haafatata ˈtu tatou ia ˈna no to ˈna here ia tatou. (Roma 2:4; 5:8) Inaha, e riro te auraroraa i te mana o Iehova ei oaoaraa, no te mea e ohipa noa ta ˈna mau ture ei maitai rahi no tatou nei.—Salamo 19:7, 8.
6. Mea nafea te parau no te mana i te tupuraa i roto i te ô i Edene ra, e eaha te faahopearaa?
6 Aita to tatou nau metua matamua i farii i te tiaraa mana arii o te Atua. Ua hinaaro raua e faaoti no raua iho eaha te mea maitai e eaha te mea ino. (Genese 3:4-6) E te faahopearaa, ua tiahihia raua i rapae i to raua faaearaa i roto i te Paradaiso. I muri iho, ua faatia o Iehova i te taata ia haamau i te mau faanahoraa mana ia nehenehe ratou e ora i roto i te hoê totaiete nahonaho maitai, noa ˈtu te huru tia ore. Eaha vetahi o taua mau mana ra, e te titau maira te Atua e ia auraro tatou ia ratou ia au i teihea faito?
“TE FEIA MANA TOROA”
7. O vai “te feia mana toroa,” e nafea to ratou tiaraa ia faaauhia i te mana o te Atua?
7 Teie ta te aposetolo Paulo i papai: “Ia auraro maite te taata atoa i te feia mana toroa ra. Aore roa hoi e mana maori râ no ǒ mai i te Atua ra.” O vai mau na te “feia mana toroa”? Te faaite ra te mau parau a Paulo i roto i te mau irava i muri mai e o te mau faatereraa a te taata ratou. (Roma 13:1-7; Tito 3:1) E ere o Iehova te tumu no te mau faatereraa a te taata, te faatia nei râ o Iehova ia ratou ia vai mai. No reira o Paulo i papai ai e: “Te feia mana e vai nei, ua haapaohia ïa e te Atua.” Eaha ïa ta te reira e haapapu maira no nia i teie huru mana i nia i te fenua nei? Tei raro aˈe ïa te reira i te mana o te Atua. (Ioane 19:10, 11) No reira, ia patoi anaˈe te ture a te taata i te ture a te Atua, na to ratou haava manaˈo i faaineinehia e te Bibilia e aratai i te mau kerisetiano. “O te Atua ta [ratou] e faaroo e tia ˈi eiaha te taata.”—Ohipa 5:29.
8. Nafea oe ia fanaˈo i te feia mana toroa, e nafea oe e nehenehe ai e faaite i to oe auraro ia ratou?
8 I te rahiraa râ o te taime, e haa mai te feia mana toroa a te hau ei ‘tavini no te Atua ia maitai tatou.’ (Roma 13:4) I roto ïa i teihea tuhaa? Inaha, a feruri na i te mau ohipa e rave rahi ta te feia mana toroa e faatupu ra, mai te fare rata, te mutoi e te feia tupohe auahi, te vai-mâ-raa, e te haapiiraa. “No reira hoi outou i horoa ˈtu ai i te taoˈa aufau nei,” o ta Paulo ïa i papai, “e tavini hoi ratou no te Atua, i te rave-tamau-maite-raa i taua mea nei.” (Roma 13:6) No nia i te mau taoˈa aufau aore ra i te tahi mau faaheporaa a te ture, ei “haapao maitai” ïa to tatou e tia ˈi.—Hebera 13:18.
9, 10. (a) Nafea te feia mana toroa ia tuati i nia i te faanahoraa a te Atua? (b) No te aha e mea hape ia patoi atu i te feia mana toroa?
9 I te tahi mau taime, eita te feia mana toroa e faaohipa maitai i to ratou mana. E faaore anei ïa te reira i ta tatou hopoia oia hoi ia auraro noa tatou ia ratou? Eita, eita roa ˈtu. Te ite maira Iehova i te mau ohipa hape a teie feia mana. (Maseli 15:3) Te fariiraa o ˈna i te faatereraa a te taata, e ere ïa te auraa e aita o ˈna e tâuˈa ra i to ˈna huru viivii; aita atoa oia e hinaaro maira e ia na reira tatou. Oia mau, fatata roa te Atua i te rave e ia “hope roa hoi taua mau basileia ra i te parari e e pau,” e na te faatereraa a ta ˈna iho basileia parau-tia e mono ia ratou. (Daniela 2:44) Hou aˈe râ te reira e tupu ai, te tavini ra te feia mana toroa i te hoê opuaraa faufaa mau.
10 Teie ta Paulo e faataa ra: “O tei mârô atu i te toroa ra, ua mârô ïa i tei haapaohia e te Atua ra.” (Roma 13:2) Ua riro te feia mana toroa ei feia “tei haapaohia” e te Atua i te mea e te paruru ra ratou i te nahonaho, ia ore te huehue e te huenane ia ite-rahi-hia. Te patoiraa ˈtu ia ratou, aita ïa e tuati ra i te mau Papai e e ere i te mea tano. Ei faahohoˈaraa: Ahiri e ua tâpûhia oe e te taote e ua nirahia te vahi i pepe. Noa ˈtu â ïa e ere te mau taura i nirahia i te hoê tuhaa no te tino, e opuaraa ta ratou e faatupu ra no te hoê taime taotiahia. Ia tatara-oioi-noa-hia te reira, e nehenehe ïa e fifihia. Hoê â huru no te mau faatereraa a te taata nei, aita ta ratou e tuhaa i roto i te opuaraa matamua a te Atua. Hou râ to ˈna Basileia e faatere ai i te fenua taatoa nei, te tapea nei te mau faatereraa taata i te nahonaho i roto i te totaiete taata, ma te faatupu i te hoê toroa e tuea i te hinaaro o te Atua, no teie nei tau. E tamau noa ïa tatou i te auraro i te feia mana toroa, a tuu noa ˈi tatou i te ture e te mana a te Atua i mua.
TE MANA I ROTO I TE UTUAFARE
11. Nafea oe ia faataa i te parau no te faaueraa tumu no nia i te tiaraa upoo?
11 Ua riro te utuafare fetii ei niu papu no te totaiete taata nei. I roto i te utuafare, e nehenehe te hoê tane e te hoê vahine e ite i te auhoaraa maitai, e e nehenehe hoi te mau tamarii e paruruhia e e faaineinehia no to ratou oraraa taata paari. (Maseli 5:15-21; Ephesia 6:1-4) E titau te hoê faanahoraa maitai mai te reira te huru e ia faanahonahohia ia au i te hoê ravea e faatia i te mau melo o te utuafare fetii ia ora i roto i te hau e te au-maite-raa. Te ravea a Iehova no te faatupu i te reira, e itehia ïa i roto i te faaueraa tumu no nia i te tiaraa upoo faatere, i faaitehia i roto i teie mau parau, i roto i te Korinetia 1, 11:3 e na ô ra e: “O te Mesia te upoo o te taata atoa nei, e o to te vahine ra upoo, o te tane ïa, e o to te Mesia ra upoo, o te Atua ïa.”
12, 13. O vai te upoo o te utuafare, e eaha te nehenehe e haapiihia i roto i te huru faaohiparaa a Iesu i to ˈna tiaraa upoo?
12 O te tane te upoo o te utuafare. Tera râ, e upoo atoa to ˈna—o Iesu Mesia. Teie ta Paulo i papai: “E te mau tane ra, e aroha outou i ta outou mau vahine, mai te Mesia atoa i aroha i te ekalesia, e ua horoa ia ˈna iho ei taui.” (Ephesia 5:25) E faaite te hoê tane i to ˈna auraro i te Mesia ia faaite oia i ta ˈna vahine i te huru ta Iesu i faaite i nia i te amuiraa. (Ioane 1, 2:6) Ua horoahia mai te mana rahi i nia ia Iesu, ua faatupu râ oia i te reira ma te mǎrû, te here, e te manaˈo aifaito. (Mataio 20:25-28) Aita te taata ra o Iesu i faaohipa aˈenei i to ˈna mana ma te haavî. E taata “mǎrû e te haehaa o te aau,” o Iesu e ua pii o ˈna i ta ˈna mau pǐpǐ e mau “taua” maoti hoi i te pii e mau “tavini.” “Na ˈu outou e faaora,” o ta ˈna ïa i tǎpǔ mai ia ratou, e ua na reira mau oia.—Mataio 11:28, 29; Ioane 15:15.
13 Te haapii maira te hiˈoraa o Iesu i te mau tane e e ere te tiaraa upoo kerisetiano i te hoê tiaraa no te faatere ma te etaeta. E ere, e tiaraa râ te reira e titau i te faatura e te haapae ia ˈna iho ma te here. E faaore roa hoi te reira i te hamani ino ma te taparahi aore ra i te iria ˈtu i to ˈna hoa. (Ephesia 4:29, 31, 32; 5:28, 29; Kolosa 3:19) Mai te peu e e hamani ino te hoê tane kerisetiano i ta ˈna vahine, e riro ïa te tahi atu mau ohipa maitatai ta ˈna ei mau ohipa faufaa ore, e e riro hoi ta ˈna mau pure i te ore e fariihia mai.—Korinetia 1, 13:1-3; Petero 1, 3:7.
14, 15. Nafea te ite no nia i te Atua ia tauturu i te hoê vahine ia auraro i ta ˈna tane?
14 Ia pee te hoê tane i te hiˈoraa o te Mesia, mea ohie aˈe ïa na ta ˈna vahine ia faaau ia ˈna i te mau parau a te Ephesia 5:22, 23 e na ô ra e: “E te mau vahine ra, e auraro outou i ta outou ihora mau tane, mai ta tatou i auraro i te Fatu ra. O te tane hoi to te vahine ra upoo, mai te Mesia atoa ra ei upoo ïa no te ekalesia.” Mai te hoê tane e tia ia auraro i te Mesia, e tia atoa i te hoê vahine ia auraro i ta ˈna tane. Te haamaramarama atoa ra te Bibilia e e tia i te mau vahine maitai ia faahanahanahia e ia aruehia no to ratou paari paieti mau e no to ratou itoito.—Maseli 31:10-31.
15 Ua taotiahia te auraro o te hoê vahine kerisetiano i ta ˈna tane. Te auraa ra, e tia e ia aurarohia te Atua eiaha râ te taata mai te peu e e riro te auraroraa i te hoê ohipa e titauhia i te ofati i te ture a te Atua. Noa ˈtu te reira, e tia te tiaraa papu o te vahine ia tamǎrûhia e te hoê “aau mǎrû e te mamahu.” E ite-papu-hia ïa e ua faariro te ite no nia i te Atua ia ˈna ei vahine maitai aˈe. (Petero 1, 3:1-4) E tano atoa te reira no te hoê tane kerisetiano aita ta ˈna vahine i roto i te parau mau. Ia auraro oia i te mau faaueraa tumu a te Bibilia, e riro ïa oia ei tane maitai aˈe.
16. Nafea te mau tamarii e nehenehe ai e pee i te hiˈoraa i vaiihohia mai e Iesu i to ˈna vai-apî-raa ra?
16 Te faataa ra te Ephesia 6:1 i te tiaraa o te mau tamarii, i te na ôraa e: “E faaroo i to outou mau metua i te Fatu ra, e parau-tia hoi te reira.” E pee te mau tamarii kerisetiano i te hiˈoraa o Iesu, tei tamau noa i te auraro i to ˈna mau metua a paari noa ˈi oia. Mai te hoê tamaroa auraro ra, ua “tupu atura Iesu i te rahi e te paari, e te herehia mai e te Atua e te taata atoa.”—Luka 2:51, 52.
17. Eaha ta te huru faaohiparaa a te mau metua i te mana e nehenehe e faatupu i nia i ta ratou mau tamarii?
17 E nehenehe te huru o te mau metua ia amo ratou i ta ratou mau hopoia e ohipa i nia i te parau no te faaturaraa ta ratou mau tamarii i te feia mana aore ra i te orure-hau-raa ratou. (Maseli 22:6) No reira, e tia i te mau metua ia uiui ia ratou iho e, ‘Te faatupu ra anei au i to ˈu mana ma te here aore ra ma te etaeta? E faatia noa anei au i te mau mea atoa?’ E titauhia i te hoê metua paieti ia here oia e ia faatura i ta ˈna mau tamarii ma te tapea maite râ i te faaueraa tumu paieti. Ma te tano maitai, ua papai o Paulo e: “E te feia metua ra, eiaha e [rave e ia riri roa ta outou mau tamarii], e haapii râ ia ratou e ia paari ma te aˈo a [Iehova] ra.”—Ephesia 6:4; Kolosa 3:21.
18. Nafea te aˈoraa a te mau metua ia faatupuhia?
18 E tia i te mau metua ia hiˈopoa maitai i ta ratou mau ravea faaineineraa, mai te peu e e hinaaro ratou ia auraro mai ta ratou mau tamarii e ia faaoaoa mai ia ratou. (Maseli 23:24, 25) I roto i te Bibilia, ua riro na mua te aˈo ei huru haapiiraa. (Maseli 4:1; 8:33) Ua taatihia te reira i te here e te mǎrû, eiaha i te riri e te hamani ino. No reira, e tia i te mau metua kerisetiano ia haa ma te paari e ia haavî ia ratou iho, ia aˈo atu ratou i ta ratou mau tamarii.—Maseli 1:7.
TE MANA I ROTO I TE AMUIRAA
19. Mea nafea to te Atua horoaraa mai i te nahonaho-maitai-raa i roto i te amuiraa kerisetiano?
19 I te mea hoi e e Atua nahonaho o Iehova, mea tano ïa e ia faatupu oia i te aratairaa mana e te nahonaho maitai no to ˈna nunaa. Ma te tia, ua nomino oia ia Iesu ei Upoo no te amuiraa kerisetiano. (Korinetia 1, 14:33, 40; Ephesia 1:20-23) I raro aˈe i te aratairaa ite-ore-hia a te Mesia, ua faatia te Atua i te hoê faanahoraa i reira te mau matahiapo tei nominohia i roto i te mau amuiraa tataitahi, e haapao ai i te nǎnǎ ma te itoito, te hinaaro mau, e te here. (Petero 1, 5:2, 3) Te turu nei te mau tavini tauturu ia ratou i roto e rave rahi tuhaa e te faatupu nei hoi ratou i te hoê taviniraa faufaa mau i roto i te amuiraa.—Philipi 1:1.
20. No te aha tatou e auraro ai i te mau matahiapo kerisetiano i nominohia, e no te aha te reira e riro ai ei mea maitai?
20 No nia i te mau matahiapo kerisetiano, teie ta Paulo i papai: “E faaroo i to outou mau aratai, e auraro atu outou; te faaitoito ra hoi ratou i to outou mau [nephe], e faaitehia hoi ta ratou parau; ia na reira râ ratou ma te oaoa, eiaha ma te oto: e ore hoi e faufaahia ta outou i te reira.” (Hebera 13:17) Ma te paari, ua horoa mai te Atua ma te tiaturi i te mau tiaau kerisetiano ra i te hopoia e haapao i te mau hinaaro i te pae varua o te feia i roto i te amuiraa. Aita teie mau matahiapo i riro ei pǔpǔ upoo faatere haapaoraa. Ua riro râ ratou ei tavini e ei tîtî na te Atua, e haapao ra i te mau hinaaro o to ratou mau hoa haamori, mai to tatou Fatu ra o Iesu Mesia i na reira. (Ioane 10:14, 15) Te iteraa tatou e te anaanatae maira te mau taata e faaî ra i te mau titauraa a te mau Papai, i to tatou maitai e i to tatou tupuraa i te pae varua, e riro ïa te reira i te faaitoito ia tatou ia tahoê atu e ia auraro.—Korinetia 1, 16:16.
21. Nafea te mau matahiapo i nominohia ia tauturu i to ratou mau hoa kerisetiano i te pae varua?
21 I te tahi mau taime, e nehenehe te mau mamoe e atea ê aore ra e haafifihia na te mau tumu ino mau a teie nei ao. I raro aˈe i te aratairaa a te Tiai mamoe rahi ra, e ara maite te mau matahiapo ma to ratou tiaraa tiai mamoe tauturu, i te mau hinaaro o te feia o ta ratou e aupuru ra e i te haapaomaitai-raa ia ratou tataitahi. (Petero 1, 5:4) E haere ratou e farerei i te mau melo o te amuiraa e e horoa hoi i te mau parau faaitoitoraa. Ma te ite e te tutava ra te Diabolo e faaore i te hau i roto i te nunaa o te Atua, e faatupu te mau matahiapo i te paari no nia maira no te arai i te mau fifi. (Iakobo 3:17, 18) Te haa nei ratou ma te itoito ia vai noa te autahoê e te faaroo hoê ra, te hoê tumu no reira o Iesu iho i pure ai.—Ioane 17:20-22; Korinetia 1, 1:10.
22. Eaha te tauturu ta te mau matahiapo e horoa ia itehia te mau hara?
22 Eaha ˈtura ïa ia faaruru te hoê kerisetiano i te tahi fifi aore ra ia paruparu oia no te mea ua rave oia i te hara? E nehenehe te aˈoraa mǎrû a te Bibilia e te mau pure rotahi a te mau matahiapo e tauturu ia ˈna ia ora mai oia i te pae varua. (Iakobo 5:13-15) E mana atoa to teie mau taata, i nominohia e te varua moˈa no te aˈo e no te faaite atu i te hapa a te taata o te tamau i te rave i te haerea ino aore ra o te haafifi i te vai-mâ-raa o te amuiraa i te pae varua e i te pae morare. (Ohipa 20:28; Tito 1:9; 2:15) Ia vai viivii ore noa te amuiraa, mea titauhia i te taata ia faaite i te mau hara ino i ravehia. (Levitiko 5:1) Ia farii te hoê kerisetiano tei rave i te hoê hara ino roa i te aˈo e te aˈoraa a te mau Papai e ia haapapu oia i te tatarahapa mau, e tauturuhia ïa oia. Oia mau, te feia e tamau noa i te ofati i te ture a te Atua e e ore e tatarahapa, e tiavaruhia ïa ratou.—Korinetia 1, 5:9-13.
23. Eaha ta te mau tiaau kerisetiano e horoa ei maitai no te amuiraa?
23 Ua tohu mai te Bibilia e i raro aˈe i te Arii ra o Iesu Mesia, e nominohia te mau taata paari i te pae varua no te horoa mai i te tamahanahanaraa, i te paruru, e te faahaumǎrûraa no te nunaa o te Atua. (Isaia 32:1, 2) E rave ratou i te upoo ei poro evanelia, ei tiai mamoe, ei orometua no te faahaere i mua i te pae varua. (Ephesia 4:11, 12, 16) Noa ˈtu â i te tahi taime e faahapa, e aˈo, e e faaara hua te mau tiaau kerisetiano i te mau hoa faaroo, e tauturu te faaohiparaa i te haapiiraa maitai a te mau matahiapo, i niuhia i nia i te Parau a te Atua, ia faaea noa te taatoaraa i nia i te eˈa o te ora.—Maseli 3:11, 12; 6:23; Tito 2:1.
A FARII I TE MANAˈO O IEHOVA NO NIA I TE MANA
24. Te tamatahia nei tatou i te mau mahana atoa i nia i teihea tuhaa?
24 Ua tamatahia te tane e te vahine matamua no nia i te parau no te auraroraa i te mana. Eita ïa tatou e maere ia faaruru tatou i taua huru tamataraa ra i te mau mahana atoa. Ua faaitoito te Diabolo ra o Satani i te hoê feruriraa orure hau i roto i te huitaata nei. (Ephesia 2:2) Ua faarirohia te eˈa no te tiamâraa, ma te hape hoi, ei eˈa maitai aˈe i to te auraroraa.
25. Eaha te mau haamaitairaa e noaa mai ia haapae roa tatou i te feruriraa orure hau o te ao nei e ia auraro tatou i te mana ta te Atua e faatupu nei aore ra e faatia nei?
25 E tia râ ia tatou ia haapae roa i te feruriraa orure hau o te ao nei. Ia na reira tatou, e ite ïa tatou e e mau haamaitairaa faahiahia mau ta te auraroraa paieti e faatupu. Ei hiˈoraa, e ape tatou i te mau hepoheporaa e te mau ahoaho matauhia e te feia e faahuehue nei i te feia mana o te ao nei. E faaiti mai tatou i te tatamaˈi e ite-rahi-hia nei i roto i te mau utuafare e rave rahi. E e oaoa roa hoi tatou i te mau haamaitairaa o te amuimuiraa mahanahana e te here mau e to tatou mau hoa faaroo kerisetiano. Hau atu i te mau mea atoa, e mau taairaa maitai mau e o Iehova, te Mana Teitei roa ˈˈe o te itehia ia auraro tatou ma te paieti.
A HIˈOPOA NA I TO OE ITE
Mea nafea to Iehova faatupuraa i to ˈna mana?
O vai “te feia mana toroa,” e nafea tatou ia auraro ia ratou?
Eaha te hopoia ta te faaueraa tumu no nia i te tiaraa upoo e tuu ra i nia i te mau melo tataitahi o te utuafare?
Nafea tatou e nehenehe ai e faaite i to tatou auraro i roto i te amuiraa kerisetiano?
[Uiraa haapiiraa]
[Tumu parau tarenihia i te api 134]
E FEIA AURARO, E ERE I TE FEIA FAAHUEHUE
I roto i ta ratou pororaa i te vahi taata, te faaite nei te mau Ite no Iehova i te parau no te Basileia o te Atua mai te tiaturiraa hoê roa no te huitaata nei e itea ˈi te hau e te ino ore. E ere roa ˈtu râ teie feia poro itoito i te Basileia o te Atua, i te feia faahuehue i te mau faatereraa i reira ratou e ora ˈi. E ere, tei rotopu te mau Ite i te feia faatura roa ˈˈe e te auraro hoi i te ture. “Ahiri pauroa te mau faaroo mai te mau Ite no Iehova,” ta te hoê ïa taata toroa o te hoê fenua no Afirika i parau, “aita ïa ta tatou e taata taparahi taata, vavahi taoˈa, e e peu iino i roto i te ui apî, mau auri e e paura atomi faahou. Eita te mau opani e ponao-noa-hia.”
Ma te farii i te reira, ua faatia te feia toroa a te hau i roto e rave rahi fenua e ia ravehia te ohipa pororaa a te mau Ite ma te opani-ore-hia. I roto i te tahi atu mau fenua, ua faaorehia te mau opaniraa aore ra te mau faaheporaa a ite ai te mau hui mana e e faaohiparaa maitai ta te mau Ite no Iehova i nia i te taata. E riro mau hoi mai ta Paulo i papai no nia i te auraroraa i te feia mana toroa: “A rave na i te parau maitai, e e haamaitaihia oe i reira.”—Roma 13:1, 3.
