Buka Bibilia numera 10—Samuela 2
Buka Bibilia numera 10—Samuela 2
Feia papai: Gada e Natana
Vahi papairaa: Iseraela
Otiraa te papai: area 1040 H.T.T.
Area tau puohuhia: 1077–area 1040 H.T.T.
1. E haamata te Samuela Piti na roto i teihea huru tupuraa, e nafea te aamu e haere ai i mua?
TEI roto te nunaa o Iseraela i te hepohepo rahi no to ratou pau i Gilaboa e te tomoraahia te fenua e te Philiseti tei upootia. Ua pohe te feia faatere a Iseraela e ta ˈna mau taurearea maitai roa ˈˈe. Mea na roto i teie huru tupuraa i tui ai te roo o Davida, te tamaiti a Iese i “faatahinuhia e Iehova,” na te fenua atoa ra. (Sam. 2, 19:21) Mea na reira te Samuela Piti e haamata ˈi, o te nehenehe atoa e parauhia te buka a Iehova e a Davida. Ua î te reira i te mau huru ohipa atoa, mai te mau pau rahi e tae atu i te upootiaraa hanahana, mai te ahoaho o te hoê nunaa i amahamaha i te mau feiiraa e tae atu i te manuïaraa o te hoê basileia i tahoêhia, mai te itoito o te apîraa e tae atu i te paari o te ruhiruhiaraa. Teie te faatiaraa o te oraraa iho o Davida a imi ai oia i te pee ia Iehova ma to ˈna mafatu atoa. * Ia turai teie aamu i te taata taio atoa ia hiˈopoa i to ˈna mafatu ia nehenehe oia e haapaari i to ˈna taairaa e te Poiete e ia farii-maitai-hia oia.
2. (a) Nafea te buka i te parauraahia te Samuela Piti? (b) Na vai ma i papai, no te eaha e mea aravihi raua no teie ohipa, e eaha ta raua i tutava i te paruru?
2 Aita roa ˈtu te iˈoa o Samuela i faahitihia i roto i te Samuela Piti, e au ra e ua horoahia teie iˈoa no te buka no te mea i te omuaraa hoê noa otaro, aore ra buka, e te Samuela Hoê. I to te mau peropheta ra o Natana e o Gada faaotiraa i te Samuela Hoê, ua tamau noa raua i te papai i te Samuela Piti. (Par. 1, 29:29) Mea aravihi maitai raua no teie hopoia. Tei pihai iho o Gada ia Davida a aˈuaˈuhia ˈi oia i Iseraela mai te hoê taata ofati ture, e i te pae hopea o te faatereraa e 40 matahiti a Davida, ua ohipa amui noa oia e te arii. O Gada tei faaohipahia no te faaite ia Davida i te riri o Iehova no to ˈna ereraa i te paari a numera ˈi oia ia Iseraela. (Sam. 1, 22:5; Sam. 2, 24:1-25) Ua ohipa te peropheta ra o Natana, te hoê hoa ohipa piri roa no Davida a ora noa ˈi o Gada e i muri aˈe. O oia tei haamaitaihia no te faaite i te faufaa faahiahia roa a Iehova e o Davida, te faufaa no te hoê basileia mure ore. Ma te itoito e te faauruahia, na ˈna i faaite i te hara rahi a Davida raua Bate-seba e te faautuaraa no te reira. (Sam. 2, 7:1-17; 12:1-15) Ua faaohipa ïa Iehova ia Natana, teie te auraa o to ˈna iˈoa “na [te Atua] i horoa,” e ia Gada, oia hoi “Manuïa rahi,” no te papai i te parau faauruahia e te faufaa o te Samuela Piti. Aita taua feia tuatapapa haehaa ra i imi e ia haamanaˈohia raua, no te mea aita e haamaramaramaraa i horoahia no nia i to raua mau tupuna aore ra to raua iho oraraa. Ua imi noa raua i te paruru i te parau faauruahia e te Atua, no te maitai o te feia haamori a Iehova no a muri aˈe.
3. Eaha te area tau i puohuhia e te Samuela Piti, e afea te reira i te otiraa i te papaihia?
3 E faahaere te Samuela Piti i te aamu Bibilia tano i mua i muri aˈe i te poheraa o Saula, te arii matamua o Iseraela, e tae roa fatata i te pae hopea o te faatereraa e 40 matahiti a Davida. E puohu ïa te reira i te area tau mai te matahiti 1077 H.T.T. e tae atu i te area 1040 H.T.T. No te mea aita te buka e faatia ra i te poheraa o Davida, e haapapuraa puai ïa e ua papaihia te reira i te area 1040 H.T.T., aore ra hou noa ˈˈe to ˈna poheraa.
4. Eaha te mau tumu e tia ˈi ia fariihia e e tuhaa te Samuela Piti no te canon Bibilia?
4 No taua noâ mau tumu ra i faaitehia no nia i te Samuela Hoê, e farii tatou e e tuhaa te Samuela Piti no te canon Bibilia. Aita e feaaraa e e parau mau teie buka. E haapapuraa puai mau te haavare ore o te feia papai tei ore i huna i te mau hara e te mau hape a te arii Davida.
5. Eaha te haapapuraa puai roa ˈˈe e e tuhaa te Samuela Piti no te mau Papai faauruahia?
5 Te haapapuraa puai roa ˈˈe e e parau mau te Samuela Piti, o te tupuraa ïa o te mau parau tohu, no nia iho â râ i te faufaa o te Basileia e o Davida. Ua tǎpǔ te Atua ia Davida e: “E to oe na fare e to oe ra basileia, e mau ïa i mua ia oe ra: to oe ra terono, e mau ïa e a muri noa ˈtu.” (7:16) I te pae hopea atoa o te basileia o Iuda, ua faahiti o Ieremia i te vai-noa-raa o teie parau i tǎpǔhia i te utuafare o Davida ia parau oia e: “Te na ô maira hoi Iehova, Eita roa Davida e ere i te huaai ei parahi i nia i te terono i te utuafare o Iseraela.” (Ier. 33:17) Ua tupu mau â teie parau tohu, no te mea i muri aˈe, ua faatae mai Iehova ia “Iesu Mesia, e tamaiti na Davida,” mai roto mai ia Iuda mai ta te Bibilia e haapapu maitai ra.—Mat. 1:1.
TUMU PARAU O TE SAMUELA PITI
6. Eaha te huru o Davida i to ˈna faarooraa e ua pohe o Saula e o Ionatana?
6 Mau ohipa matamua o te faatereraa a Davida (1:1–4:12). I muri aˈe i te poheraa o Saula i te mouˈa Gilaboa, e horo oioi mai te hoê ati Amaleka mai te vahi aroraa ia Davida ra i Zikelaga e te parau apî. Ma te tiaturi e e farii-maitai-hia oia e Davida, e haavare oia e na ˈna i haapohe ia Saula. Maoti i te haapopouhia, e faautuahia te ati Amaleka i te pohe, na ˈna iho hoi oia e faahapa ia parau oia e na ˈna i haapohe i “ta Iehova taata i faatahinu ra.” (1:16) I teie nei, e papai te arii apî, o Davida, i te hoê himene otoraa, “Te Fana,” i reira oia e oto ai i te pohe o Saula e o Ionatana. Teie te vahi nehenehe roa ˈˈe o te faaiteraa putapû o te here rahi o Davida no Ionatana: “E ati to ˈu ia oe, e tau taeae, e Ionatana e! e here rahi to ˈu ia oe: e oto rahi to oe ia ˈu, e oto hau ïa i to te vahine! Auê te hiˈa o te aito e! e te mauhaa tamaˈi i faaruehia ra!”—1:17, 18, 26, 27.
7. Eaha te tahi atu mau ohipa i tapao i te tuhaa matamua o te faatereraa arii a Davida?
7 Ma te arataihia e Iehova, e afai Davida e to ˈna mau taata i to ratou mau utuafare i Heberona i te fenua o Iuda. I reira, e haere mai te mau matahiapo o te opu fetii e faatahinu ia Davida ei arii no ratou i te matahiti 1077 H.T.T. E riro te tenerara ra o Ioaba ei taata faahiahia roa ˈˈe o te feia e turu ia Davida. E faatahinu râ Abinera, te raatira o te nuu, ia Isa-boseta, te hoê tamaiti a Saula ei arii patoi no te nunaa. E tupu te mau tatamaˈiraa i rotopu i na pǔpǔ i tera e tera taime, e e taparahi pohe o Abinera i te hoê taeae o Ioaba. I te pae hopea, e horo atu o Abinera i te paeau o Davida. E aratai oia ia Mikala te tamahine a Saula ia Davida ra, mea maoro aˈenei to Davida aufauraa i te moni faaipoiporaa no ˈna. I reira râ Ioaba e taparahi pohe ai ia Abinera ei tahooraa i te pohe o to ˈna taeae. E oto rahi o Davida i te reira, ma te parau e aita ta ˈna hoê aˈe hara. I muri noa ˈˈe i te reira, e taparahi-pohe-hia o Isa-boseta ‘a taoto ai oia i te avatea ra.’—4:5.
8. Nafea Iehova e haamaitai ai i te faatereraa arii a Davida i nia ia Iseraela taatoa?
8 Davida, arii i Ierusalema (5:1–6:23). Noa ˈtu e ua faatere aˈena oia i nia ia Iuda e hitu matahiti e e ono avaˈe, e riro Davida i teie nei ei arii hoê roa, e e faatahinu te mau tia o te mau opu fetii ia ˈna ei arii i nia ia Iseraela taatoa. Teie te toruraa o to ˈna faatahinuraahia (1070 H.T.T.). Te hoê o te mau ohipa matamua ta Davida e rave ei arii o te basileia taatoa, te haruraa ïa i te pare etaeta o Ziona i Ierusalema mai roto mai i te rima o te mau ati Iebusi i tapuni i reira, ma te haere omoe atu na te eˈa pape. E faariro atu ai Davida ia Ierusalema ei oire pu no ˈna. E haamaitai Iehova sabaota ia Davida e e rahi noa ˈtu â oia. Tae noa ˈtu ia Hirama, arii no Turia, e hapono oia i te raau arezi maitatai na Davida e e tono atoa oia i te feia rave ohipa e patu i te hoê fare no te arii. E tupu te utuafare o Davida i te rahi, e e haamanuïa Iehova i ta ˈna faatereraa arii. E piti â aroraa te tupu e to Philiseti feia au i te tamaˈi. I te aroraa matamua, e faaô Iehova ia Davida i roto i te mau enemi i Baala-perazima, e e horoa ˈtu i te upootiaraa na ˈna. I roto i te piti, e faatupu Iehova i te tahi atu semeio na roto i te “ahehe i roto i te mau baka ra,” o te faaite e te haere ra Iehova na mua ia Iseraela no te haapau i te mau nuu Philiseti. (5:24) Te tahi atu â ïa upootiaraa faahiahia no te mau nuu a Iehova!
9. A faataa mai i te mau ohipa i tupu a afaihia ˈi te Afata i Ierusalema.
9 Ma te rave e 30 000 taata ia ˈna ra, e haere Davida e tii i te afata o te faufaa i Baale i Iuda (Kiriata-iearima) e faahoˈi i Ierusalema. A tarihia ˈi te reira na roto i te taˈi upaupa faahiahia e te oaoa, e opa te pereoo e uta ra i te reira, e e toro Uza, o te haere ra na pihai iho, i to ˈna rima no te tapea i te Afata moˈa. “Tupu aˈera te riri o Iehova ia Uza; tairihia ihora oia e te Atua i reira ra . . . no ta ˈna hapa.” (6:7) E vaiihohia te Afata i te fare o Obeda-edoma, e i te roaraa e toru avaˈe i muri mai, e haamaitai rahi Iehova i to ˈna utuafare. Ia hope na avaˈe e toru, e haere Davida e rave i te Afata ia au i te ravea i faaotihia, no te toea o te tere. Na roto i te mau piiraa oaoa, te taˈi upaupa, e te ori, e tae mai te Afata i te oire pu o Davida. E faaite roa Davida i to ˈna oaoa rahi ma te ori i mua i te aro o Iehova, e vahavaha râ ta ˈna vahine o Mikala i te reira. E onoono Davida e: “E faatupu â vau i te oroa i mua i te aro o Iehova.” (6:21, MN) No reira Mikala e ore roa ˈtu ai e fanau i te tamarii e tae roa i to ˈna poheraa. *
10. Eaha te faufaa e te parau tǎpǔ a Iehova e faataahia maira ia tatou i teie nei?
10 Te faufaa a te Atua e o Davida (7:1-29). Teie te hoê o te mau ohipa faufaa roa ˈˈe i roto i te oraraa o Davida i taaihia i te tumu parau rahi o te Bibilia, oia te haamoˈaraa i te iˈoa o Iehova maoti te Basileia e faaterehia e te Huero i tǎpǔhia. E tupu te reira na roto i te hinaaro o Davida e patu i te hoê fare no te afata a te Atua. A noho ai oia i roto i te hoê fare arezi nehenehe mau, e faaite oia ia Natana i to ˈna hinaaro e patu i te hoê fare no te afata o te faufaa a Iehova. Na roto ia Natana, e haapapu faahou â Iehova ia Davida i To ˈna maitai rahi ia Iseraela e e faaau atu e oia i te hoê faufaa o te vai noa e a muri noa ˈtu. E ere râ na Davida, na to ˈna râ huaai, e patu i te fare no te iˈoa o Iehova. Hau atu â, e tǎpǔ Iehova ma te here e: “E to oe na fare e to oe ra basileia, e mau ïa i mua ia oe ra: to oe ra terono, e mau ïa e a muri noa ˈtu.”—7:16.
11. Na roto i teihea pure Davida e faaite ai i te aau mehara?
11 E putapû roa Davida i te maitai o Iehova e itehia ra na roto i teie faufaa o te Basileia, e e faaite oia i to ˈna mauruuru no te maitai rahi o te Atua: “O vai hoi ïa fenua i te ao nei e au i to oe na mau taata ia Iseraela nei, ta te Atua i tii hoo ei taata no ˈna iho, e ei faarahi i to ˈna ra iˈoa, ei rave hoi i te mau peu rarahi e te mǎtaˈutaˈu, no to oe ra fenua? . . . E ua riro hoi oe, e Iehova, ei Atua no ratou.” (7:23, 24) E pure uˈana oia no te haamoˈaraa o te iˈoa o Iehova e ia haamau-papu-hia te fare o Davida i mua Ia ˈna.
12. Eaha te mau tamaˈi e ravehia e Davida, e eaha te maitai ta ˈna e faaite i nia i te utuafare o Saula?
12 E faaaano Davida i te basileia o Iseraela (8:1–10:19). Eita râ Davida e faatere i roto i te hau. Te vai nei â te mau tamaˈi e tia ia faatupuhia. E rave Davida e tairi i to Philiseti, to Moabi, to Soba, to Arama, e to Edoma, a turai ai i te mau otia o Iseraela e tae roa ˈtu i te mau vahi i faataahia e te Atua. (Sam. 2, 8:1-5, 13-15; Deut. 11:24) I muri iho, e fariu atu oia i to ˈna ara-maite-raa i nia i te toea o te utuafare o Saula e faaite i te maitai i nia ia ratou no to ˈna here ia Ionatana. E huti o Ziba, te hoê tavini a Saula, i to ˈna ara-maite-raa i nia i te hoê tamaiti a Ionatana, o Mephiboseta, e pirioi oia. I taua iho â taime ra, e faaue Davida ia horoahia te mau faufaa atoa a Saula na Mephiboseta e ia faaapuhia to ˈna fenua e Ziba e ta ˈna mau tavini no te horoa i te maa na te utuafare o Mephiboseta. Area ia Mephiboseta iho, e tamaa oia i te amuraa maa a Davida.
13. Na roto i teihea ˈtu â mau upootiaraa Iehova e faaite ai e tei pihai iho oia ia Davida?
13 Ia pohe te arii o Amona, e tono Davida i te mau tia ia Hanuna ra ta ˈna tamaiti e faaite atu i to ˈna aroha. E pari râ te feia aˈo a Hanuna, ia Davida, i te tonoraa ia ratou no te hiˈopoa haere i te fenua, no reira ratou e faahaehaa ˈi e e faahoˈi ai ia ratou fatata ma te ahu ore. No to ˈna riri, e tono Davida ia Ioaba e ta ˈna nuu e tahoo i teie faainoraa. E vahi Ioaba i ta ˈna nuu, e e pau ohie ia ˈna to Amona e to Arama tei haere mai e tauturu ia ratou. E haaputu to Arama i ta ratou mau faehau, e e pau â ratou i te nuu a Iehova e arataihia ra e Davida e e pohe to ratou e 700 feia faahoro pereoo tamaˈi e e 40 000 feia faahoro puaahorofenua. Tera te tahi atu â haapapuraa e te farii e te haamaitai ra Iehova ia Davida.
14. Eaha te mau hara ta Davida e rave e o Bate-seba?
14 E hara Davida ia Iehova (11:1–12:31). I te tau uaaraa tiare i muri aˈe, e tono â Davida ia Ioaba i Amona e haaati ia Raba, area ia ˈna iho ra, e faaea ïa i Ierusalema. I te hoê ahiahi, mai nia mai i to ˈna tafare parahurahu, e ite oia i te vahine haviti ra o Bate-seba, te vahine a Uria te ati Heta, e hopu ra i te pape. E titau oia ia ˈna i to ˈna ra fare, e taoto oia ia ˈna, e e hapû ihora oia. E tamata Davida i te huna i te reira ma te faahoˈi mai ia Uria mai i ǒ te aroraa i Raba e te tono atu ia ˈna i to ˈna ra fare e faafaaea. Eita râ Uria e hinaaro e faaoaoa ia ˈna e e taoto i ta ˈna vahine area te Afata e te nuu ra ‘te vai noa ra ïa i roto i te puhapa.’ Ei ravea hopea, e faahoˈi Davida ia Uria ia Ioaba ra e te hoê rata e na ô ra e: “E tuu ia Uria i mua mau i te aroraa ra, a orai ai outou i muri ia tairihia oia, ia pohe.” (11:11, 15) Inaha e pohe Uria. Ia hope te tau otoraa a Bate-seba, e rave oioi Davida ia ˈna i to ˈna ra fare, i reira oia e riro ai ei vahine na ˈna, e e fanau ai i to raua tamarii, te hoê tamaiti.
15. Nafea Natana e faahiti ai i te haavaraa parau tohu i nia ia Davida?
15 Mea ino te reira i te hiˈoraa o Iehova. E tono oia i te peropheta ra o Natana ia Davida ra e te hoê poroi haavaraa. E parau Natana ia Davida no nia i te hoê taata taoˈa rahi e te hoê taata veve. E nǎnǎ rahi ta te hoê, area ta te tahi ra, e fanauˈa mamoe ufa ïa, e e animala rata hoi i roto i te utuafare e e riro oia “mai te tamahine te huru.” Ia faatupu râ oia i te hoê tamaaraa, e rave te taata taoˈa rahi, eiaha i te hoê mamoe no roto mai i ta ˈna iho nǎnǎ, i te fanauˈa mamoe ufa râ a te taata veve. No to ˈna riri i te faarooraa i te reira, e parau Davida e: “Te ora ra Iehova, o te taata i na reira ra, e au ia ˈna te pohe.” E pahono atu Natana e: “O oe â taua taata ra.” (12:3, 5, 7) E e parau oia i te haavaraa parau tohu oia hoi e haru te hoê taata i te mau vahine a Davida i mua i te taata, e tatamaˈi to ˈna utuafare te tahi i te tahi, e e pohe to raua o Bate-seba tamarii.
16. (a) Eaha te auraa o te mau iˈoa o te piti o te tamaiti a Davida raua o Bate-seba? (b) Eaha te faahopearaa o te aroraa ia Raba?
16 Ma te oto e te tatarahapa mau, e faˈi maite Davida e: “Ua hara vau ia Iehova.” (12:13) Ia au i te parau a Iehova, e pohe te tamarii i roaa mai na roto i te taiataraa i muri aˈe i te maˈiraahia e hitu mahana. (I muri iho, e roaa mai to Davida e o Bate-seba te tahi atu tamaiti; e mairi raua ia ˈna o Solomona, no roto mai hoi teie iˈoa i te hoê parau e “hau” te auraa. Ua tono râ Iehova ia Natana no te mairi atoa i te iˈoa ra Iedidia, oia hoi “Herehia e Ia.”) I muri aˈe i teie ohipa peapea, e pii Ioaba ia Davida e haere atu i Raba, ua ineine hoi te aroraa hopea. Ua noaa ia Ioaba te haapueraa pape o te oire, e vaiiho râ oia ma te faatura na te arii te hanahana e haru i te oire.
17. Eaha te mau fifi e haamata i te faaoto i te utuafare o Davida?
17 Te mau fifi i roto i te utuafare o Davida (13:1–18:33). E haamata te mau fifi i roto i te utuafare o Davida i to Amanona, te hoê tamaiti a Davida, maamaa-roa-raahia ia Tamara, te tuahine o to ˈna taeae o Abasaloma. E haavare maˈi o Amanona e e ani oia ia tonohia mai Tamara te potii purotu ra e utuutu ia ˈna. E haru oia ia ˈna e i muri aˈe e riri roa oia ia ˈna, no reira e tiahi oia ia ˈna ma te faahaehaa ˈtu. E opua Abasaloma e tahoo, e tiai râ oia i te taime tano. Fatata e piti matahiti i muri iho, e faaineine oia i te hoê tamaaraa i reira o Amanona e te tahi atu mau tamaiti a te arii e titau-manihini-hia ˈi. Ia rearea maite te mafatu o Amanona i te uaina, e haruhia oia e e haapohehia ia au i te faaueraa a Abasaloma.
18. Na roto i teihea ravea aravihi Abasaloma e faahoˈihia mai ai mai to ˈna horo-ê-raa?
18 Ma te mǎtaˈu i te riri o te arii, e reva Abasaloma i Gesura, i reira oia e faaea ˈi e toru matahiti. I taua area taime ra, e faanaho o Ioaba, te raatira o te nuu a Davida, i te hoê faahauraa ia Davida raua o Abasaloma. E faanaho oia e ia haere mai te hoê vahine paari no Tekoa e faahiti i te hoê tupuraa manaˈo-noa-hia i mua i te arii no nia i te tahooraa, te tiahiraa, e te faautuaraa. Ia faaite te arii i te faaotiraa, e faaite atu te vahine i te tumu mau o to ˈna tere, oia hoi ua horo o Abasaloma te tamaiti iho a te arii i Gesura. Ua ite Davida e na Ioaba i faaineine i teie ohipa, e faatia râ oia i ta ˈna tamaiti ia hoˈi mai i Ierusalema. E mairi â e piti matahiti hou te arii e farii ai e ite mata roa ˈtu ia Abasaloma.
19. Eaha te opuaraa ino e tupu ra i teie nei, e eaha te faahopearaa no Davida?
19 Noa ˈtu te maitai o Davida, e faanaho Abasaloma i te hoê opuaraa ino no te haru i te terono o to ˈna metua tane. E taata haviti mau o Abasaloma i roto i te mau tane puai atoa o Iseraela, o te faarahi atu ïa i to ˈna nounou tiaraa e to ˈna teoteo. I te mau matahiti atoa, e hahuhia to ˈna upoo e te teiaha o to ˈna rouru meumeu, fatata ïa e 2,3 kilo. (Sam. 2, 14:26, nota i raro i te api) Na roto i te mau ravea huru rau e te haavarevare, e haamata Abasaloma i te aratô i te mafatu o te mau tane i Iseraela. I te pae hopea, e tupu roa ˈtura te orureraa hau. E roaa ia ˈna te parau faatia a to ˈna metua tane e haere i Heberona, i reira e faaite Abasaloma i ta ˈna opuaraa orure i te hau ia Davida e e ani oia ia Iseraela paatoa e tauturu ia ˈna. No te rahi o te numera o te feia i haere i te paeau o ta ˈna tamaiti orure hau, e horo ê Davida mai Ierusalema ˈtu e te tahi feia e turu ra ia ˈna, o Itai te ati Gata iho â râ te tahi, o te parau e: “Te ora ra Iehova, e te ora ra tau fatu, te arii ra, ei taua vahi e parahihia e tau fatu e te arii ra, ei te pohe au e ei te ora vau, ei reira mau â to tavini nei.”—15:21.
20, 21. (a) Eaha te mau ohipa e tupu a horo ê ai Davida, e nafea te parau tohu a Natana e tupu ai? (b) Nafea te taata haavare ra o Ahitophela e pohe ai?
20 A horo ê ai oia mai Ierusalema ˈtu, e itea ia Davida te haavare a te hoê o to ˈna mau taata aˈo ta ˈna e tiaturi rahi roa ˈˈe, o Ahitophela. E pure oia e: “E Iehova e, teie ta ˈu maa parau ia oe e, e faariro oe i te aˈo a Ahitophela ei maamaa.” (15:31) E tono-faahou-hia o Zadoka e o Abiatara, te mau tahuˈa i ore i taiva ia Davida, e o Husai te ati Areki, i Ierusalema e hiˈopoa haere i te mau ohipa a Abasaloma e faaite atu ai i te arii. I taua râ taime ra, i te medebara, e farerei o Davida ia Ziba te tavini a Mephiboseta, o te parau atu e te tiai noa ra to ˈna fatu ia faahoˈihia te basileia na te utuafare o Saula. A haere ai Davida, e faainohia e e taorahia oia i te ofai e Simei, te hoê o te utuafare o Saula, e tapea râ Davida i to ˈna mau taata eiaha e tahoo.
21 Ia hoˈi mai oia i Ierusalema, ia au i te manaˈo o Ahitophela, e taoto Abasaloma te taata haru tiaraa, i te mau vahine a to ˈna metua tane “i mua i te aro o to Iseraela atoa ra.” I reira te tupuraa te haavaraa parau tohu a Natana. (16:22; 12:11) E horoa atoa o Ahitophela i te manaˈo ia Abasaloma e rave 12 000 taata e e aˈuaˈu ia Davida i te medebara ra. E faaau atu râ o Husai, ua roaa hoi ia ˈna te tiaturiraa o Abasaloma, i te hoê ravea ê. E mai ta Davida i pure, eita te aˈo a Ahitophela e manuïa. Mai ia Iuda atoa ra, e hoˈi o Ahitophela tei inoino, i te fare e e tarî oia ia ˈna. E haere omoe o Husai e faaite i te mau opuaraa a Abasaloma i te mau tahuˈa ra o Zadoka e o Abiatara, o te faatae atu i te poroi ia Davida ra i te medebara.
22. Eaha te mea e haapeapea i te upootiaraa a Davida?
22 E nehenehe atura ïa o Davida e haere i te tahi pae mai o Ioridana e e maiti i te vahi aroraa i roto i te ururaau no Mahanaima. I reira, e faanaho oia i ta ˈna mau faehau e e faaue oia ia ratou ia rave maitai ia Abasaloma. E farerei te feia orure hau i te hoê pau rahi. Ia horo ê Abasaloma na nia i te hoê pheradi i roto i te ururaau ruperupe, e mau to ˈna upoo i roto i te mau amaa haehaa o te hoê tumu raau rarahi, e e tarere noa oia i nia i te aore. Ia ite atu Ioaba ia ˈna e te fifihia ra, e haapohe oia ia ˈna, ma te ore roa ˈtu e tâuˈa i te faaueraa a te arii. E itehia te mauiui rahi o Davida i to ˈna faarooraa e ua pohe ta ˈna tamaiti, na roto i to ˈna otoraa e: “Auê oe, e tau tamaiti, e Abasaloma e! e tau tamaiti, e tau tamaiti, e Abasaloma e! ahiri o vau tei pohe ei mono ia oe, e Abasaloma, e tau tamaiti, e tau tamaiti e!”—18:33.
23. Eaha te mau faanahoraa e ravehia e Davida ia hoˈi mai oia ei arii?
23 Mau tupuraa hopea o te faatereraa arii a Davida (19:1–24:25). E tamau noa Davida i te oto rahi e tae roa i te taime e faaitoito ai Ioaba ia ˈna e amo faahou â i ta ˈna mau hopoia e au i te arii. I teie nei, e nomino oia ia Amasa ei raatira o te nuu ei mono ia Ioaba. Ia hoˈi mai oia, e farii-popou-hia oia e te nunaa, e Simei atoa, ta Davida e vaiiho ia ora. E haere atoa mai o Mephiboseta e taparu no ˈna iho, e e horoa ˈtu Davida na ˈna i te hoê tufaa o te aifaito e ta Ziba. Ua tahoê-faahou-hia ïa Iseraela e Iuda taatoa i raro aˈe ia Davida.
24. Eaha ˈtu â te mau ohipa e tupu e te opu o Beniamina?
24 Te vai noa râ te mau fifi. E faariro o Seba, te hoê ati Beniamina, ia ˈna iho ei arii e e rave rahi mau taata ta ˈna e haafariu ê ia Davida. E farerei o Amasa, tei faauehia e Davida e haaputu i te mau taata no te faaore i te orureraa hau, ia Ioaba o te taparahi pohe ia ˈna ma te haavarevare. E e rave Ioaba i te faatereraa o te nuu e e aˈuaˈu oia ia Seba e tae atu i te oire o Abela-bete-maaka ta ˈna e haaati atu. Ma te pee i te aˈoraa a te hoê vahine paari o te oire, e haapohe te feia no reira ia Seba, e hoˈi atura o Ioaba. No te mea ua taparahi o Saula i te mau ati Gibeona e aitâ te faataheraa toto i tahoohia ˈtura, e tupu te hoê oˈe i Iseraela e toru matahiti i te maoro. No te tatara i teie hara, e haapohehia e hitu tamaiti o te utuafare o Saula. I muri iho, i roto â i te aroraa e to Philiseti, e faaorahia Davida e Abisai ta ˈna tamaiti fetii. E tǎpǔ to ˈna mau taata eiaha oia e haere faahou e aro e o ratou “a pohe hoi te lamepa a Iseraela.” (21:17) E tui te roo o to ˈna na taata e toru ia taparahi pohe ratou i te mau aito Philiseti.
25. Eaha te mau manaˈo hohonu e faaitehia i roto i te mau himene a Davida i tuuhia i ǒ nei?
25 I teie vahi o te faatiaraa, e tuu te taata papai i te hoê himene a Davida na Iehova, e au i te Salamo 18 e te faaite i te mauruuru no te faaoraraa “i te rima o to ˈna ra mau enemi, e te rima o Saula.” E parau oia ma te oaoa e: “O Iehova tau pǎpǎ, e tau pare, e to ˈu nei ora. Oia te pare e ora ˈi to ˈna arii, oia tei hamani maitai mai i tei faatahinuhia e ana ra, ia Davida e to ˈna [huero] e a muri noa ˈtu.” (22:1, 2, 51; MN) Ia oti te reira, o te himene hopea ïa a Davida, i reira oia e faˈi ai e: ‘Te parau nei te varua o Iehova ia ˈu, e tei tau vaha nei ta ˈna parau.’—23:2.
26. Eaha tei faaitehia no nia i te feia puai a Davida, e nafea oia e faaite ai i te faatura no to ratou ora?
26 Ia hoˈi mai tatou i roto i te aamu, e ite tatou i te tabula iˈoa o te feia puai a Davida. E toru o ratou te rave i te hoê ohipa faahiahia i to te Philiseti haamauraa i te hoê pǔpǔ faehau i Betelehema, te oire tumu o Davida. E faaite Davida i to ˈna hinaaro: “Ia inu na vau i te hoê maa pape i te apoo pape i Betelehema nei, i te pae uputa ra!” (23:15, MN) I reira iho, e haere na taata puai tootoru ra i roto i te puhapa o to Philiseti, e huti mai i te pape i taua apoo pape ra, e e hopoi mai na Davida. Eita râ Davida e inu. E manii oia i te pape i nia i te repo, a parau ai e: “Eiaha roa vau i te reira, e Iehova, e ia na reira hoi au nei: e ere anei i te toto teie o te mau taata o tei faaû noa i to ratou pohe i te tiiraa i teie nei pape?” (23:17) No ˈna, e tuea te pape i te toto aore ra i te ora ta ratou i haafifi no te tii i te pape. I muri aˈe, e faahitihia te iˈoa o na taata puai roa ˈˈe e 30 o ta ˈna nuu e ta ratou mau ohipa faahiahia i rave.
27. Eaha te hara hopea a Davida? Nafea te ati i tupu mai e faaorehia ˈi?
27 I te pae hopea, e hara Davida ia numera oia i te nunaa. E taparu oia i te Atua e aroha mai ia ˈna, e horoahia ˈtu na ˈna e maiti i roto e toru faautuaraa: e hitu matahiti oˈe, e toru avaˈe e pau ai te nuu, aore ra e toru mahana maˈi pohe na te fenua. E pahono atu o Davida e: “E ati rahi to ˈu: ei te rima o Iehova tatou; te rahi nei to ˈna aroha: eiaha râ vau ei te rima o te taata nei.” (24:14) E 70 000 taata ta te maˈi e haapohe na te fenua taatoa, e e ore noa te reira ia hoo mai Davida, ia au i tei faauehia e Iehova na roto i te arai o Gada, i te vahi papairaa sitona a Arauna, i reira oia e pûpû ai i te tusia taauahi e te tusia no te hau ra na Iehova.
FAUFAARAA
28. Eaha te mau faaararaa teimaha e vai ra i roto i te Samuela Piti?
28 E itea mai i te taata taio no teie tau e rave rahi mau haapiiraa faufaa i roto i te Samuela Piti! Fatata te mau manaˈo hohonu atoa o te taata o te matau-noa-hia tei faataahia i ǒ nei ma te oraora maitai. Inaha, te faaarahia maira tatou na roto i te mau parau teimaha no nia i te mau faahopearaa iino o te nounou tiaraa e te tahooraa (3:27-30), o te hinaaro tia ore i te hoa faaipoipo o vetahi ê (11:2-4, 15-17; 12:9, 10), o te ohipa haavarevare (15:12, 31; 17:23), o te here i niuhia i nia i te hinaaro uˈana (13:10-15, 28, 29), o te haavaraa ru (16:3, 4; 19:25-30), o te oreraa e faatura i te mau ohipa paieti a vetahi ê.—6:20-23.
29. Eaha te mau hiˈoraa maitatai o te haerea e te ohipa tia e itehia i roto i te Samuela Piti?
29 Te mea faufaa roa ˈˈe râ o te Samuela Piti no tatou, o to ˈna ïa mau manaˈo maitai, ia pee maite tatou i te mau hiˈoraa maitatai o te haerea e te ohipa tia. O Davida te hoê hiˈoraa no to ˈna haamoriraa i te Atua anaˈe (7:22), to ˈna haehaa i mua i te Atua (7:18), to ˈna faahanahanaraa i te iˈoa o Iehova (7:23, 26), to ˈna manaˈo tia i roto i te fifi (15:25), to ˈna tatarahaparaa i te hara ma te haavare ore (12:13), to ˈna haapao-maite-raa i ta ˈna parau tǎpǔ (9:1, 7), to ˈna vai-faito-noa-raa i roto i te tamataraa (16:11, 12), to ˈna tiaturi-tamau-raa ia Iehova (5:12, 20), e to ˈna faatura hohonu no te mau faanahoraa e te mau nominoraa a Iehova (1:11, 12). E ere i te mea maere e ua parauhia o Davida “te tahi taata no ˈna e au i to [Iehova] ra aau”!—Sam. 1, 13:14.
30. Eaha te mau faaueraa tumu e faaohipahia i roto i te Samuela Piti?
30 E rave rahi atoa mau faaohiparaa o te mau faaueraa tumu Bibilia i roto i te Samuela Piti. E faahiti anaˈe i te tahi: te mau hopoia amui (Sam. 2, 3:29; 24:11-15), eita te mau opuaraa maitatai e faaore i te mau titauraa a te Atua (6:6, 7), ia faaturahia te mau nominoraa i roto i te faanahonahoraa teotaratia a Iehova (12:28), ia hiˈohia te toto ei mea moˈa (23:17), e titauhia te taraehara no te taparahiraa taata (21:1-6, 9, 14), e nehenehe te hoê taata paari e ape eiaha te rahiraa ia roohia i te ati (Sam. 2, 20:21, 22; Koh. 9:15), e eiaha roa ˈtu e taiva i te faanahonahoraa a Iehova e i to ˈna mau tia ‘a pohe aore ra a ora noa tatou.’—Sam. 2, 15:18-22.
31. Nafea te Samuela Piti e haamatara ˈi i te Basileia o te Atua, mai tei haapapuhia i roto i te mau Papai Heleni Kerisetiano?
31 Te mea faufaa roa ˈˈe, te haamatara atea ra te Samuela Piti i te Basileia o te Atua, ta ˈna e haamau i roto i te rima o te “tamaiti na Davida,” o Iesu Mesia. (Mat. 1:1) Te faahitihia ra te parau ta Iehova i tǎpǔ ia Davida e e vai noa to ˈna basileia (Sam. 2, 7:16) i roto i te Ohipa 2:29-36 ma te taai i te reira ia Iesu. Na te Hebera 1:5 e haapapu e o Iesu iho â te faahitihia ra i roto i te parau tohu ra “Ei metua vau no ˈna, e ei tamaiti oia no ˈu.” (Sam. 2, 7:14) Ua haapapu-atoa-hia te reira e te reo o Iehova tei parau mai te raˈi mai e: “Tau Tamaiti here teie, ua mauruuru roa vau ia ˈna.” (Mat. 3:17; 17:5) I te pae hopea, ua faahiti Gaberiela i te faufaa o te Basileia e o Davida i to ˈna parauraa ia Maria no nia ia Iesu e: “E rahi oia, e e parauhia i te Tamaiti na te Teitei: e na te Fatu ra na te Atua e horoa mai i te terono o to ˈna ra metua o Davida no ˈna: ei ia ˈna te hau i te fetii o Iakoba e a muri noa ˈtu; e e ore roa to ˈna basileia e mure.” (Luka 1:32, 33) Auê hoi te anaanatae rahi te parau tǎpǔ a te Basileia ia tupu te mau tuhaa atoa i mua ia tatou!
[Nota i raro i te api]
^ Étude perspicace des Écritures, buka 1, mau api 745-747.
^ Étude perspicace des Écritures, buka 2, api 262.
[Uiraa haapiiraa]
