Buka Bibilia numera 32—Iona

Taata papai: Iona

Otiraa te papai: area 844 H.T.T.

1. Eaha te mau uiraa e pahonohia i roto i te buka a Iona, e eaha ta ˈna e faaite no nia i to Iehova aroha?

 IONA—mitionare i te fenua ěê no te senekele 9 H.T.T.! Nafea oia i hiˈo ai i ta ˈna hopoia no ǒ mai ia Iehova ra? Eaha te mau tupuraa apî ta ˈna e ite atu? Ua farii anei te taata ta ˈna i farerei i ta ˈna poroi? Mai te aha te manuïaraa o ta ˈna pororaa? E pahono mai te aamu faahiahia mau o te buka a Iona i teie mau uiraa. Ua papaihia teie buka parau tohu i te hoê tau a ofati ai te nunaa maitihia o Iehova i ta ˈna faufaa e a topa ˈi i roto i te haamoriraa idolo etene, e te faaite nei e aita te aroha hamani maitai o te Atua i taotiahia i te hoê anaˈe nunaa, noa ˈtu e o te nunaa Iseraela. Hau atu â, te faahanahana ra te buka i te aroha e te maitai rahi o Iehova, o te taa ê roa i te ereraa i te aroha, te faaoromai, e te faaroo e ite-pinepine-hia i nia te taata hara.

2. Eaha ta tatou i ite no nia ia Iona, e te matahiti i tohu ai oia?

² Te auraa o te iˈoa Iona (Hebera, Yoh·nahʹ) o “Uupa.” E tamaiti oia a te peropheta o Amitai no Gata-hephera i Galilea i te tuhaa fenua o Zebuluna. I roto i Te mau arii 2, 14:23-25, te taio nei tatou e ua faanuu Ieroboama, arii no Iseraela, i te otia o te fenua ia au i te parau ta Iehova i faahiti na roto i te arai o Iona. Ia au i te reira, ua tohu ïa Iona i te area 844 H.T.T., matahiti i riro ai Ieroboama II ei arii no Iseraela, e e rave rahi matahiti hou a haamata ˈi Asura, e to ˈna oire pu o Nineve, i te faatere ia Iseraela.

3. Eaha te haapapuraa e e parau mau te aamu a Iona?

³ Aita e feaaraa e e parau mau te buka taatoa a Iona. Ua faahiti te “Taata e haamaitai roa i to tatou faaroo, o Iesu,” ia Iona mai te hoê taata mau e ua horoa i te tatararaa faauruahia no na ohipa e piti i tupu i nia ia Iona ei parau tohu, a faaite ai e e parau tohu mau to roto i te buka. (Heb. 12:2, MN; Mat. 12:39-41; 16:4; Luka 11:29-32) Ua tuu noa na te ati Iuda i te buka a Iona i roto i te canon Bibilia e no ratou, e tuea te reira e te tuatapaparaa. Te haapapu atoa ra te huru huna ore o Iona ia faataa oia i to ˈna mau hape e mau paruparu, ma te ore e tamata i te tapoˈi atu, e mea mau te faatiaraa.

4. Eaha te huru o te iˈa i horomii ia Iona? Eaha râ te navai ia tatou ia ite?

⁴ Eaha ïa no nia i te “iˈa rahi” tei horomii ia Iona? E rave rahi mau manaˈo i faahitihia no nia i te huru o te reira iˈa. E nehenehe te tohora e momi i te hoê taata taatoa. Te maˈo rahi uouo atoa. Te parau noa nei râ te Bibilia e: “Ua haapaohia e Iehova te iˈa rahi ei horomii ia Iona.” (Iona 1:17) Aita te huru o te iˈa i haapapuhia. Eita e nehenehe e faataa papu maitai e e tohora anei, e maˈo rahi uouo, aore ra te tahi atu mea ora ite ore o te miti. * Te parau ra te Bibilia e e “iˈa rahi,” e mauruuru noa ïa tatou i te reira.

TUMU PARAU O TE IONA

5. Eaha te huru o Iona i mua i ta ˈna hopoia, e eaha te faahopearaa?

⁵ Tonohia Iona i Nineve, e horo ê râ oia (1:1-16). “E tae maira te parau a Iehova ia Iona a Amitai ra, na ô maira, A tia, a haere i te oire rahi ra i Nineve, e tiaoro atu, ua tae roa mai to ratou ino i mua i tau aro nei.” (1:1, 2) E oaoa anei Iona i teie hopoia? Eita roa ˈtu! E horo ê oia i te tahi roa ˈˈe paeau, e paiuma oia i nia i te hoê pahi e tere atu i Taresisa, o te fenua Paniora paha ïa. E faaruru atu te pahi o Iona i te hoê mataˈi rahi. Ma te mǎtaˈu, e tiaoro te mau ihitai i te tauturu, “te taata taitahi i to ˈna atua,” a taoto noa ˈi Iona i raro roa i te pahi ra. (1:5, MN) I muri aˈe ratou e faaara ˈi ia Iona, e taora ratou i te kelero no te ite o vai te tumu o to ratou ati. Ua topa te kelero i nia ia Iona. I reira noa oia e faaite ai ia ratou e e Hebera oia, e taata haamori ia Iehova, e te horo ê nei oia i mua i te ohipa ta te Atua i horoa na ˈna. E titau oia ia ratou e taue ia ˈna i roto i te miti. E tutava faahou â ratou i te aratai i te pahi, e i te pae hopea e huri ratou ia Iona i rapae. E mania ˈtura te miti.

6. Eaha te tupuraa o Iona e “te iˈa rahi”?

⁶ Horomiihia e “te iˈa rahi” (1:17–2:10). “Ua haapaohia e Iehova i te iˈa rahi ei horomii ia Iona. E i roto hoi Iona i te opu o taua iˈa ra e e toru rui, e toru hoi ao.” (1:17) E pure oia ia Iehova ma te itoito rahi i roto i te opu o te iˈa. “I roto i te opu o hade” e tiaoro oia i te tauturu e e parau oia e e haapao oia i ta ˈna i euhe, no te mea “tei ia Iehova te ora.” (2:2, 9) Ia au i te faaueraa a Iehova, e haapuai te iˈa ia Iona i nia i te pae.

7. Eaha te faahopearaa o te pororaa a Iona i Nineve?

⁷ Pororaa i Nineve (3:1–4:11). E tapiti Iehova i ta ˈna faaueraa ia Iona. Eita Iona e ape faahou i ta ˈna  hopoia, e haere oia i Nineve. I reira e haere oia na te mau aroâ o te oire a poro ai e: “E piti taau mahana toe, e taihitumuhia ˈi Nineve.” (3:4) E faahopearaa maitai to ta ˈna pororaa. E tatarahapa haere to Nineve, e e haamata te taata i te tiaturi i te Atua. E faaue te arii ia haapae te taata e te puaa i te maa e ia tapoˈihia i te ahu oto. E faaora Iehova i te oire ma te aroha.

8. Eaha te huru o Iona i to Iehova faaiteraa i te aroha i te oire, e nafea Iehova e faaite ai i te paari ore o te peropheta?

⁸ Eita ta Iona e nehenehe e faaoromai i te reira. E parau oia ia Iehova e ua ite aˈena oia e e faaite iho â Oia i te aroha e no reira oia i horo ê ai i Taresisa. E hinaaro oia e pohe. Ma te inoino, e parahi Iona i raro aˈe i te tamǎrû i te pae hitia o te râ o te oire e e tiai oia ia ite eaha te tupu mai. E faatupu Iehova i te hoê tumu kikiuna ei tamǎrû i nia i ta ˈna peropheta e omuhumuhu ra. E taime poto râ te oaoaraa o Iona i te reira. Ia poipoi aˈe, e tuu Iehova i te hoê tuˈa no te tairi i te kikiuna, e ia monohia to ˈna paruru tamǎrû e te mataˈi veavea no te pae hitia o te râ mai e te amaraa o te mahana. E hinaaro faahou â Iona e pohe. E faatano oia i to ˈna riri ma te faahua parau-tia. E haaferuri Iehova ia ˈna no to ˈna huru paari ore: e aroha Iona i te hoê tumu kikiuna, e riri râ oia no te mea e aroha Iehova i teie oire rahi o Nineve.

FAUFAARAA

9. Eaha te huru feruriraa e te haerea o Iona e riro ei faaararaa no tatou?

⁹ E tia ia riro te haerea o Iona e to ˈna faahopearaa ei faaararaa no tatou. Ua horo ê oia i mua i te ohipa ta te Atua i horoa na ˈna; mea maitai aˈe ahiri oia i rave i tei faauehia e i tiaturi i te Atua no te turu ia ˈna. (Iona 1:3; Luka 9:62; Mas. 14:26; Isa. 6:8) I to ˈna haereraa i te vahi ê roa, ua faaite oia i te hoê haerea tano ore i te oreraa e faaite noa ˈtu i te mau ihitai e e taata haamori oia “ia Iehova, i te Atua o te raˈi ra.” Ua erehia oia i to ˈna mǎtaˈu ore. (Iona 1:7-9; Eph. 6:19, 20) No to ˈna haapao-noa-raa ia ˈna iho, ua hiˈo Iona i to Iehova aroha i to Nineve mai te hoê haamaauraa ia ˈna; ua tamata oia i te faatia ia ˈna iho ma te parau atu ia Iehova e ua ite aˈena oia i te hopea o teie ohipa—no te aha ïa e tono ai ia ˈna ei peropheta? Ua faahapahia oia no teie huru faatura ore, e te amuamu, e tia ïa ia tatou ia faufaahia i tei roohia i nia ia Iona e eiaha e faahapa i te aroha o Iehova aore ra i ta ˈna huru ohiparaa.—Iona 4:1-4, 7-9; Phil. 2:13, 14; Kor. 1, 10:10.

10. Nafea te maitai e te aroha o Iehova e haamatarahia ˈi i roto i te buka a Iona?

¹⁰ Hau atu i te mau mea atoa i roto i te buka a Iona, o te faataaraa ïa i te mau huru maitatai faahiahia o te maitai e te aroha o Iehova. Ua faaite Iehova i te maitai i to Nineve i to ˈna tonoraa ˈtu i ta ˈna peropheta e faaara no nia i te haamouraa e fatata maira, e ua ineine oia i te faaite i te aroha i to te oire tatarahaparaa—te hoê aroha o tei faatia ia ora â Nineve hau atu i te 200 matahiti e tae noa ˈtu i to ˈna haamouraahia e to Medai e to Babulonia i te area 632 H.T.T. Ua faaite oia i te aroha ia Iona na roto i te faaoraraa ia ˈna mai roto mai i te moana arepurepu e te horoaraa ˈtu i te kikiuna “ia ora oia i to ˈna ra ati.” Na roto i te horoaraa i te kikiuna tamǎrû e te rave-faahou-raa ˈtu, ua faaite Iehova ia Iona e e faaite Oia i te aroha e te maitai ia au i To ˈna iho hinaaro.—Iona 1:2; 3:2-4, 10; 2:10; 4:6, 10, 11.

11. Eaha te ‘semeio a Iona’?

¹¹ I roto i te Mataio 12:38-41, ua parau Iesu i te mau aratai haapaoraa e te semeio hoê roa e horoahia ia ratou o te ‘semeio ïa a Iona.’ I muri aˈe e toru ao e e toru rui i roto i “te opu o Hade,” ua haere Iona e poro i to Nineve, a riro ai ei “semeio” no to Nineve. (Iona 1:17; 2:2; 3:1-4) Oia atoa, ua faaea Iesu e toru mahana i roto i te apoo e ua faatiahia mai. I to ta ˈna mau pǐpǐ haapapuraa i taua tupuraa ra, ua riro Iesu ei semeio no taua ui ra. Ia au i te huru tuatapaparaa tau a te ati Iuda e te mau ohipa i tupu i nia ia Iesu, e iti aˈe teie tau “e toru ao e e toru rui” i te toru mahana taatoa. *

12. (a) Eaha ˈtu â ta Iesu e parau no nia i to Nineve e te ati Iuda no to ˈna tau? (b) Nafea te hoê ‘i rahi aˈe ia Iona’ i te faraa mai, e eaha te taairaa e te Basileia o te Atua e te faaoraraa?

¹² I roto i taua noâ mau irava ra, te faaite ra Iesu e ua taa ê roa te tatarahapa o to Nineve e te aau etaeta o te ati Iuda tei patoi ia ˈna i to ˈna pororaa ˈtu ia ratou, a na ô atu ai e: “Na to Nineve i te tia-atoa-raa i te haavaraa ra, e faahapa i teie nei ui; i te mea ua tatarahapa ratou i te aˈoraahia e Iona ra; e inaha, e rahi teie ia Iona.” (Hiˈo atoa i te Mataio 16:4 e te Luka 11:30, 32.) “E rahi teie ia Iona”—eaha hoi ta Iesu e hinaaro ra e parau na roto i teie mau parau? Te faahiti ra oia no ˈna iho mai te peropheta rahi roa ˈˈe, o Tei tonohia e Iehova e poro: “A tatarahapa, te fatata mai nei te basileia o te ao.” (Mat. 4:17) Ua patoi râ te rahiraa o te ati Iuda o taua ui ra i ‘te semeio a Iona.’ Eaha ïa no teie mahana? Noa ˈtu e aita te rahiraa e haapao nei i te poroi faaararaa a Iehova, e rave rahi mau tausani taata na te ao nei teie e fanaˈo nei i te haamaitairaa faito ore e faaroo i te parau apî maitai o te Basileia o te Atua tei poro-na-mua-hia e Iesu, “te Tamaiti a te taata nei.” Mai to Nineve tei tatarahapa, e tei haamaitaihia i te pororaa a Iona, e nehenehe atoa teie mau taata e fanaˈo i te faanahoraa aroha e te horoa rahi a Iehova no te ora mure ore, no te mea “tei ia Iehova te ora.”—Iona 2:9.

[Nota i raro i te api]

[Uiraa haapiiraa]