Buka Bibilia numera 40—Mataio

Taata papai: Mataio

Vahi papairaa: Paletetina

Otiraa te papai: area 41 T.T.

Area tau puohuhia: 2 H.T.T.–33 T.T.

1. (a) Eaha te parau tǎpǔ ta Iehova i tuu i mua i te huitaata mai te tau mai â o te ô i Edene? (b) Nafea te tiaturiraa i te Mesia i te papu-maitai-raa i roto i te ati Iuda?

 MAI te tau mai â o te orureraa i Edene, ua tuu mai Iehova i te parau tǎpǔ tamahanahana i mua i te huitaata nei e e horoa oia i te tiamâraa na te mau taata e au i te parau-tia na roto i te Huero o ta ˈna “vahine.” Ua opua oia e ia na roto mai teie Huero, aore ra Mesia, i te nunaa o Iseraela. A mairi ai te mau senekele, ua rave oia e ia papai te feia papai Hebera i faauruahia i te mau parau tohu e rave rahi, a faaite ai e e riro te Huero ei Arii no te Basileia o te Atua e e ohipa oia no te haamoˈaraa o te iˈoa o Iehova, a faaore roa ˈi i te faaino rahi e vai ra i nia i teie iˈoa e a muri noa ˈtu. E rave rahi mau parau rii tei horoahia mai na roto i taua mau peropheta ra no nia i teie taata o te riro ei mauhaa no te faatia ia Iehova, e o te faatiamâ i te taata i te mǎtaˈu, te faaheporaa, te hara, e te pohe. I te otiraa te mau Papai Hebera, ua papu maitai te tiaturiraa i te Mesia i roto i te ati Iuda.

2. I te taeraa mai te Mesia, nafea te mau huru tupuraa no te haaparare i te parau apî maitai i tano roa ˈi?

² Na roto i taua taime ra, te taui ra te huru o te ao nei. Ua ohipa te Atua i nia i te mau nunaa ei faaineineraa i te taeraa mai o te Mesia, e ua tano maitai te mau huru tupuraa ia parare te parau apî o teie ohipa na te mau vahi atoa. Ua haamau o Heleni, te pae o te hau o te ao atoa, i te hoê reo amui, ei ravea taairaa no te mau nunaa atoa. Ua tahoê o Roma, te ono o te hau o te ao atoa, i te mau nunaa ta ˈna e faatere ei hau emepera o te ao atoa e ua hamani oia i te mau purumu ia naeahia te mau vahi atoa o te hau emepera. E rave rahi ati Iuda tei purara ê na teie hau emepera, no reira, ua faaroo atoa vetahi atu â mau taata e te tiai ra te ati Iuda i te haerea mai o te Mesia. E inaha, hau atu i te 4 000 matahiti i muri aˈe i te parau i tǎpǔhia i Edene, teie mai nei te Mesia! Ua tae mai te Huero i tǎpǔhia e i tiai-maoro-hia! Te tupu ra ïa te mau ohipa faufaa roa ˈˈe o te tuatapaparaa o te taata nei a faatupu ai te Mesia i te hinaaro o to ˈna Metua ma te haapao maitai i te fenua nei.

3. (a) Eaha te faanahoraa ta Iehova i rave ia papaihia te mau mea rii atoa o te oraraa o Iesu? (b) Eaha te taa-ê-raa o na Evanelia taitahi, e no te aha e mea faufaa na Evanelia e maha atoa ra?

³ Ua tae faahou te taime no te papai i teie mau tupuraa faahiahia mau ei mau parau faauruahia. Ua faaurua te varua o Iehova e maha taata haapao maitai no te papai i te mau faatiaraa taa ê, o te horoa ïa e maha haapapuraa e o Iesu te Mesia, te Huero e Arii i tǎpǔhia, e te vauvau i te mau parau rii atoa o to ˈna oraraa, ta ˈna taviniraa, to ˈna poheraa, e to ˈna tia-faahou-raa. Teie mau faatiaraa, o te mau Evanelia ïa, oia hoi “parau apî maitai.” Noa ˈtu e e tuea noa teie mau faatiaraa e mea pinepine hoi i te faahiti i te hoê â mau tupuraa, e ere roa ˈtu râ i te mau hohoˈa te tahi no te tahi. Mea pinepine na Evanelia matamua e toru i te parauhia e synoptique, oia hoi “hoê â hiˈoraa,” no te mea fatata hoê â ta ratou huru faatiaraa i te oraraa o Iesu i te fenua nei. Teie râ, te faatia tataitahi ra na feia papai e maha—Mataio, Mareko, Luka, e Ioane—i ta ˈna iho aamu no nia i te Mesia. Te taata papai taitahi ta ˈna iho tumu parau e ta ˈna iho tapao, te faaite i to ˈna iho huru taata, e te haamanaˈo o vai te taio i ta ˈna papai. Rahi noa ˈtu tatou i te faahohonu i ta ratou mau papai, rahi noa atoa ˈtu tatou i te papu i te mau tuhaa taa ê o te papai taitahi e i te taa e ua riro teie na buka Bibilia faauruahia e maha ei mau faatiaraa taa ê o te faanavai e te au maite te tahi i te tahi, no nia i te oraraa o Iesu Mesia.

4. Eaha tei itehia no nia i te taata papai i te Evanelia matamua?

⁴ O Mataio te taata matamua i papai i te parau apî maitai no nia i te Mesia. Peneiaˈe e haapotoraa to ˈna iˈoa no te iˈoa Hebera ra “Mattithiah,” oia hoi “Taoˈa horoa a Iehova.” Tei roto oia i na aposetolo 12 i maitihia e Iesu. I te tau a ratere ai te Fatu na te fenua Paletetina ma te poro e te haapii no nia i te Basileia o te Atua, ua fanaˈo Mataio i te auhoaraa piri roa e o Iesu. Hou oia a riro mai ai ei pǐpǐ na Iesu, e telona o Mataio, e toroa hiˈo-ino-roa-hia e te ati Iuda, no te mea e haamanaˈo tamau te reira e aita to ratou e tiamâraa, tei raro aˈe râ ratou i te faatereraa a te hau emepera Roma. Mea matau-atoa-hia Mataio o Levi ïa e e tamaiti oia na Alephaia. Ua farii oioi noa oia i te titauraa a Iesu e pee ia ˈna.—Mat. 9:9; Mar. 2:14; Luka 5:27-32.

5. Nafea te haapapuraahia e na Mataio i papai i te Evanelia matamua?

⁵ Noa ˈtu e aita e faahitihia ra e na Mataio i papai i te Evanelia e parauhia e na ˈna, na te mau faaiteraa e rave rahi a te feia tuatapapa a te ekalesia matamua e haapapu ra i te reira. Aita ˈtu paha buka tahito i  haapapu-maitai-hia to ˈna taata papai ma te fariihia e te taatoaraa, mai te buka a Mataio. I te tau aˈena ra o Papias no Hiérapolis (omuaraa o te senekele 2 T.T.), e pueraa feia ite tei haapapu e na Mataio i papai i teie Evanelia e e tuhaa mau teie buka no te Parau a te Atua. Te na ô ra te Cyclopedia a McClintock e Strong e: “Ua faahitihia te mau irava a Mataio e Justin, e te taata i papai i te rata ia Diognète (hiˈo i te Justin a Otto, buka ii), e Hégésippe, Irénée, Tatien, Athénagore, Théophile, Clément, Tertullien e Origène. E ere noa no te parau, no te huru faahitiraa râ, oia hoi mai te hoê parau mana papu, e ma te feaa ore tatou e farii ai e aita te buka e vai ra ia tatou nei, i roohia i te tahi tauiraa taue.” * I te mea e e aposetolo o Mataio e, ia au i teie tiaraa to ˈna, tei nia te varua o te Atua ia ˈna, mea papu ïa e e parau mau anaˈe ta ˈna i papai.

6, 7. (a) Afea e na roto i teihea reo na mua te papairaahia te Evanelia a Mataio? (b) Na te aha e faaite e ua papaihia te reira na te ati Iuda iho â râ? (c) Ehia rahiraa taime te Traduction du monde nouveau e faahiti ai i te iˈoa Iehova i roto i teie Evanelia, e no te aha?

⁶ Ua papai Mataio i ta ˈna faatiaraa i Paletetina. Aita i itehia te matahiti mau, tera râ, te na ô ra vetahi mau nota i te hopea o te tahi mau papai (no muri iho pauroa i te senekele 10 T.T.) e o te matahiti 41 T.T. Te vai ra te haapapuraa e ua papai na mua Mataio i ta ˈna Evanelia na roto i te reo Hebera matauhia i tera tau, e ua huri oia i muri iho ei reo Heleni. I roto i ta ˈna buka De viris inlustribus (Te tahi feia tuiroo), i te pene III, te na ô ra o Jérôme e: “Ua papai na mua Mataio, o Levi atoa to ˈna iˈoa, tei faarue i to ˈna toroa telona no te riro mai ei aposetolo, i te hoê Evanelia a te Mesia i Iudea na roto i te reo e te papairaa Hebera no te feia peritomehia i faaroo.” * Te na ô faahou ra o Jérôme e ua haapaohia te papai Hebera o teie Evanelia i to ˈna tau (mau senekele 4 e te 5 T.T.) i roto i te fare vairaa buka a Pamphilus i Kaisarea.

⁷ I te omuaraa o te senekele toru, ua faahiti o Eusèbe i te manaˈo o Origène no nia i te mau Evanelia, oia hoi “ua papaihia te matamua . . . ia au ia Mataio, telona na mua e i muri iho aposetolo a Iesu Mesia: . . . na roto i te reo Hebera.” * Ua papai-na-mua-hia no te ati Iuda, o te haapapuhia ïa e te tabula huitupuna e au i te ture o Iesu na nia ia Aberahama e haere mai ai, e te faahiti-pinepine-raa i te mau Papai Hebera, a faaite ai e ua tohu te reira i te haerea mai o te Mesia. Mea tano ia tiaturi e ua faaohipa Mataio i te iˈoa o te Atua ra o Iehova, papaihia e na leta Hebera e maha, ia ˈna i faahiti i te mau irava o te mau Papai Hebera tei roto taua iˈoa ra. No reira te buka a Mataio i roto i te Traduction du monde nouveau e faahiti ai i te iˈoa ra Iehova 18 taime, mai te itehia ra i roto i te huriraa Hebera o te buka a Mataio a F. Delitzsch o te senekele 19. Hoê â iho â ïa haerea to Mataio e to Iesu no nia i te iˈoa o te Atua e eita roa ˈtu oia e hema i te mǎtaˈu hape ati Iuda eiaha roa e faahiti i taua iˈoa ra.—Mat. 6:9; Ioa. 17:6, 26.

8. Nafea e itehia ˈi i roto i ta ˈna Evanelia e e telona o Mataio na mua ˈˈe?

⁸ I te mea e e telona o Mataio na mua ˈˈe, e faataa maitai iho â ïa oia i te parau no te moni, te numeraraa, e te faufaa moni. (Mat. 17:27; 26:15; 27:3) E mauruuru rahi to ˈna i te aroha o te Atua o tei faatia ia ˈna, e telona vahavahahia, ia riro ei tavini no te parau apî maitai e ei hoa piri roa no Iesu. No reira, o Mataio anaˈe i roto i na feia papai Evanelia te haamatara i to Iesu faahiti-pinepine-raa e mea titauhia te aroha hau atu i te tusia. (9:9-13; 12:7; 18:21-35) Ua faaitoito-rahi-hia Mataio e te maitai rahi o Iehova e ua papai oia ma te tano roa i te tahi o te mau parau tamahanahana roa ˈˈe a Iesu: “E haere mai outou ia ˈu nei, e te feia atoa i haˈa rahi, e tei teiaha i te hopoia, e na ˈu outou e faaora. A rave mai i tau zugo i nia ia outou, e ia haapiihia outou e au, te mǎrû nei hoi au e te haehaa o te aau: e e noaa hoi te ora i to outou [nephe]. Te mǎrû nei hoi ta ˈu zugo e te mâmâ nei ta ˈu hopoia.” (11:28-30; MN) Auê ïa te mǎrû e te mahanahana o teie mau parau no teie telona tahito, eita hoi e ore e ua vahavaha mai to to ˈna nunaa ia ˈna!

9. Eaha te tumu parau e te huru vauvauraa taa ê a Mataio?

⁹ Ua haamatara iho â râ Mataio e, te tumu parau o te haapiiraa a Iesu, o “te basileia o te [mau raˈi]” ïa. (4:17; MN) No ˈna, ua riro Iesu ei Taata poro e Arii. No te pinepine oia i te faaohipa i te parau ra “basileia” (hau atu i te 50 taime) e nehenehe ai ta ˈna Evanelia e parauhia te Evanelia o te Basileia. Mea au aˈe na Mataio e faanaho i te mau oreroraa parau no te taatoaraa e te mau aˈoraa a Iesu ia au i te manaˈo eiaha râ ia au i te taime i parauhia ˈi. I roto i na pene matamua 18, te haamatara ra Mataio i te tumu parau o te Basileia, no reira oia i ore ai e pee i te faanahoraa ia au i te tau. Area râ, te pee ra na pene hopea hoê ahuru (19 e tae atu i te 28) i te tatuhaaraa ia au i te tau, a tamau noa atoa ˈi i te haamatara i te Basileia.

10. Eaha te tuhaa o te buka e itehia i roto anaˈe i te Mataio, e eaha te tau e puohuhia ra e te Evanelia?

¹⁰ E 42 % o te Evanelia a Mataio o te ore e itehia i roto i te tahi atu na Evanelia e toru. * Tei roto ïa hoê ahuru parabole, aore ra faahohoˈaraa: Te zizania i roto i te aua (13:24-30), te taoˈa moe (13:44), te poe maitai roa (13:45, 46), te upeˈa toro (13:47-50), te tavini ino (18:23-35), te mau rave ohipa e te moni veo (20:1-16), te metua tane e toopiti tamarii tamaroa (21:28-32), te oroa faaipoiporaa a te tamaiti o te arii (22:1-14), na paretenia tino ahuru (25:1-13), e te mau taleni (25:14-30). Ei haapotoraa, te faatia ra te buka mai te fanauraa mai o Iesu, i te matahiti 2 H.T.T., e tae atu i to ˈna putuputuraa e ta ˈna mau  pǐpǐ hou noa ˈˈe to ˈna maueraa i nia i te raˈi, i te matahiti 33 T.T.

TUMU PARAU O TE MATAIO

11. (a) Ma te tano roa, nafea te Evanelia e haamata ˈi, e eaha te mau tupuraa matamua e faatiahia ra? (b) E huti Mataio i to tatou ara-maite-raa i nia i teihea mau tupuraa i tohuhia mai?

¹¹ Faaiteraa ia Iesu e parau apî o “te basileia o te ao” (1:1–4:25). Ma te tano, e haamata Mataio na roto i te tabula huitupuna o Iesu, ei haapapuraa i te tiaraa o Iesu e au i te ture ei taata aiˈa no Aberahama e no Davida. E mau mai ïa te ara-maite-raa o te taata taio ati Iuda. I muri iho, e taio tatou i te faatiaraa i te tô-semeio-raahia o Iesu, to ˈna fanauraa i Betelehema, te tere o na feia hiˈo fetia, te riri o Heroda e to ˈna haapoheraa i te mau tamarii tamaroa atoa i raro mai i te piti matahiti i Betelehema, to Iosepha raua Maria hororaa i Aiphiti e te tamaroa iti, e to ratou hoˈiraa mai i muri iho e faaea i Nazareta. Ua haapao maitai Mataio i te huti i te ara-maite-raa i nia i te tupuraa o te mau parau tohu o te haapapu e, o Iesu mau â te Mesia.—Mat. 1:23—Isa. 7:14; Mat. 2:1-6—Mika 5:2; Mat. 2:13-18—Hos. 11:1 e Ier. 31:15; Mat. 2:23—Isa. 11:1, nota i raro i te api.

12. Eaha te ohipa e tupu ia bapetizohia Iesu e i muri noa ˈˈe mai?

¹² E ouˈa te aamu a Mataio fatata e 30 matahiti i muri iho. Te poro ra Ioane Bapetizo i roto i te medebara i Iudea: “E tatarahapa outou; te fatata mai nei hoi te basileia o te ao.” (Mat. 3:2) Te bapetizo ra oia i te mau ati Iuda e tatarahapa ra i roto i te pape Ioridana e te faaara ra i te mau Pharisea e te mau Sadukea i te riri e tae maira. E haere mai Iesu na Galilea mai e e bapetizohia oia. I reira iho, e tau mai te varua o te Atua i nia ia ˈna, e e parau te hoê reo no te raˈi mai e: “Tau Tamaiti here teie, ua mauruuru roa vau ia ˈna.” (3:17) E arataihia ˈtu ai Iesu i te medebara, e i reira, i muri aˈe i to ˈna haapaeraa i te maa e 40 mahana, e faahemahia oia e Satani te Diabolo. E toru taime oia e pahono atu ai ia Satani na roto i te faahitiraa i te Parau a te Atua, a na ô atu ai i te pae hopea e: “E haere ê atu oe, e Satani; ua oti hoi i te papaihia, O to Atua o Iehova ta oe e haamori, e oia anaˈe ra ta oe e faaroo.”—4:10.

13. Eaha te pororaa horuhoru e haamatahia i Galilea?

¹³ “A tatarahapa, te fatata mai nei te basileia o te ao.” Na te taata faatavaihia ra o Iesu e poro ra i teie mau parau horuhoru na Galilea. E titau oia e maha feia ravaai e vaiiho i ta ratou mau upeˈa e e pee mai ia ˈna ia riro ratou ei “ravaai taata,” e e tere oia e o ratou “na Galilea atoa e ati aˈe, i te haapiiraa i roto i to ratou mau sunago ra, e te aˈoraa i te parau maitai o te basileia, e te faaoraraa i te mau maˈi e te mau pohe atoa o te taata ra.”—4:17, 19, 23.

14. I roto i ta ˈna Aˈoraa i nia i te mouˈa, eaha na oaoaraa ta Iesu i faahiti, e eaha ta ˈna e parau no nia i te parau-tia?

¹⁴ Te Aˈoraa i nia i te mouˈa (5:1–7:29). No te mea e apee noa te mau nahoa ia ˈna, e haere Iesu i nia i te mouˈa, e parahi oia, e haamata ˈtu ai i te haapii i ta ˈna mau pǐpǐ. E faaomua oia i ta ˈna oreroraa parau tuiroo e na ‘oaoaraa’ e iva: E ao to tei ite i to ratou veve i te pae varua, to tei oto, to tei mǎrû, to tei poia e tei poihâ i te parau-tia, to tei aroha, to tei mâ te aau, to tei faatupu i te hau, to tei hamani-ino-hia no te parau-tia, e to tei faainohia e tei pari-haavare-hia. “A oaoa, e ia ouˈauˈa noa i te oaoa; e utua rahi hoi ta outou i te ao ra.” E parau oia i ta ˈna mau pǐpǐ “te miti no te fenua” e “te maramarama o teie nei ao” e e faataa oia eaha te parau-tia, o te taa ê roa hoi i te haerea faatia ture noa o te mau papai parau e te mau Pharisea, e te titauhia no te ô i roto i te Basileia o te mau raˈi. “Ia maitai roa hoi outou mai to outou Metua i te ao e maitai roa ra.”—5:12-14, 48.

15. Eaha ta Iesu e parau no nia i te pure e no nia i te Basileia?

¹⁵ E faaara Iesu no nia i te mau ô e te mau pure haavarevare. E haapii oia i ta ˈna mau pǐpǐ ia pure ia haamoˈahia te iˈoa o te Metua, ia tae mai To ˈna Basileia, e ia noaa ta ratou maa no te mahana. I te roaraa o ta ˈna aˈoraa, e faateitei Iesu i te Basileia. E faaara oia i te feia e pee mai ia ˈna eiaha e haapeapea aore ra e rohi no te mau taoˈa materia anaˈe, inaha ua ite te Metua eaha ta ratou e hinaaro mau ra. Te na ô ra oia e: “E mata na râ outou i te imi i te basileia o te Atua, e te parau-tia na ˈna; e amui-atoa-hia mai taua mau mea ra ia outou.”—6:33.

16. (a) Eaha ta Iesu aˈoraa no nia i te mau taairaa e o vetahi ê, e eaha ta ˈna e parau no nia i te feia e auraro i te hinaaro o te Atua e te feia e ore e na reira? (b) Eaha te faahopearaa o ta ˈna aˈoraa i nia i te taata?

¹⁶ E horoa te Fatu i te aˈoraa no nia i te mau taairaa e o vetahi ê, i te na ôraa e: “E te mau mea atoa ta outou i hinaaro ia vetahi ê ra, e na reira atoa ˈtu outou ia ratou.” Te feia iti e ite i te eˈa e tae atu ai i te ora, o te feia ïa e rave ra i te hinaaro o to ˈna Metua. E itehia te feia ohipa tia ore na roto i ta ratou mau hotu e e faaruehia ratou. E faaau Iesu i te taata e haapao i ta ˈna mau parau i te “taata paari, o tei faatia i to ˈna fare i nia i te pǎpǎ.” Eaha te huru o te mau nahoa e faaroo ra i teie oreroraa? “Ua maere anaˈe ihora” ratou, “i haapii hoi oia ia ratou ma te mana, e ere mai ta te mau papai parau ra.”—7:12, 24-29.

17. Nafea Iesu e faaite ai i to ˈna mana ei Mesia, e eaha te tapitapiraa î i te here ta ˈna e faaite?

¹⁷ Parareraa te pororaa o te Basileia (8:1–11:30). Mea rahi te mau semeio ta Iesu e rave—faaoraraa i te lepera, te hapepa, e te feia uruhia e te demoni. E tae roa atoa oia i te faaite i to ˈna mana i nia i te mataˈi e te are miti na roto i te tamǎrûraa i te hoê vero, e e faatia mai oia i te hoê tamahine mai te pohe mai. Mea aroha roa na Iesu te mau nahoa ia ite oia i to ratou veve rahi e to ratou faarueraahia, “mai te mamoe tiai ore ra”! Mai ta ˈna e parau i ta ˈna mau pǐpǐ, “te rahi mau nei te auhune, te iti nei râ te feia e rave: e teie nei, e pure outou i te Fatu o te ohipa ia tono â oia i te rave ohipa ei ooti.”—9:36-38.

18. (a) Eaha te faaueraa e te aˈoraa ta Iesu e horoa i ta ˈna mau aposetolo? (b) No te aha “teie nei ui” e pohe ai?

 ¹⁸ E maiti e e tono Iesu i na aposetolo 12. E horoa ˈtu oia i te mau faaueraa papu nafea ia rave i ta ratou ohipa e e haamatara oia i te tumu parau rahi o ta ratou haapiiraa: “E poro haere outou, e na ô atu, Te fatata mai nei te basileia o te ao.” E horoa ˈtu oia i te mau aˈoraa paari e te î i te here: “I horoa-noa-hia mai ta outou, e horoa noa hoi outou.” “Ia paari outou mai te ophi ra, e te hapa ore mai te uuairao ra.” E ririhia ratou e e hamani-ino-hia, na to ratou atoa iho fetii piri, e haamanaˈo atu râ Iesu e: “O tei tapea i to ˈna ora, e ere ïa oia i te ora; area te tuu noa i to ˈna ora no ˈu nei, e ora ïa to ˈna.” (10:7, 8, 16, 39) Haere atura ratou e haapii e e poro i te mau oire i tonohia ˈtu ratou! E haapapu Iesu e o Ioane Bapetizo te vea i tonohia na mua ˈtu ia ˈna, te “Elia” i tǎpǔhia, eita râ “teie nei ui” e farii ia Ioane e ia ˈna iho, te Tamaiti a te taata. (11:14, 16) E pohe ïa to teie nei ui e te mau oire tei ore i tatarahapa i te iteraa i ta ˈna mau semeio! Area te feia e riro ei mau pǐpǐ na ˈna ra, e tamǎrûhia ïa to ratou aau.

19. Ia faahapa te mau Pharisea i to ˈna haerea i te Sabati, nafea Iesu e haava ˈi ia ratou?

¹⁹ Patoiraa e faahaparaa i te mau Pharisea (12:1-50). E tamata te mau Pharisea i te faahapa ia Iesu no nia i te Sabati, e patoi râ oia i ta ratou mau pariraa e e haava i to ratou huru haavarevare. E na ô oia ia ratou e: “E te mau fanauˈa ehidena e, eaha outou te feia iino na e tia ˈi ia parau i te parau maitai? no te î o te aau hoi i parau ai te vaha.” (12:34) Aita e tapao e horoahia ˈtu maoti râ te tapao a te peropheta ra o Iona: E vai te Tamaiti a te taata e toru ao e e toru rui i raro i te repo.

20. (a) No te aha Iesu e parau parabole ai? (b) Eaha te mau parabole o te Basileia ta ˈna e horoa i teie nei?

²⁰ E hitu parabole no nia i te Basileia (13:1-58). No te aha Iesu e parau parabole ai? E faataa ˈtu oia i ta ˈna mau pǐpǐ e: “No te mea ua horoahia ia outou te ite i te parau aroaro i te basileia o te ao ra, aita râ i horoahia ia ratou.” E parau oia e e oaoa ta ˈna mau pǐpǐ no te mea te ite nei e te faaroo nei ratou. E haapiiraa tamǎrû mau ta ˈna e horoa ˈtu i teie nei! I muri aˈe i to ˈna faataaraa i te parabole o te taata ueue huero, e horoa ˈtu Iesu i te mau parabole o te zizania i roto i te aua, te huero sinapi, te faahopue, te taoˈa moe, te poe maitai roa, e te upeˈa toro—o te faahohoˈa pauroa i te tahi mea i taaihia i “te basileia o te ao.” E turori râ te taata ia ˈna, e e na ô atu Iesu e: “E ore te peropheta e ere i te tura, maori râ i to ˈna noa iho fenua mau, e i to ˈna iho fetii mau.”—13:11, 57.

21. (a) Eaha te mau semeio ta Iesu e rave, e eaha ta te reira e haapapu ra no nia i to ˈna tiaraa? (b) Eaha te orama e horoahia no nia i te haerea mai o te Tamaiti a te taata i roto i to ˈna Basileia?

²¹ Toea o te taviniraa e mau semeio a “te Mesia” (14:1–17:27). E mauiui roa Iesu ia faaroo oia e ua tâpûhia te upoo o Ioane Bapetizo na nia i te faaueraa a Heroda Anitipa, taata aau paruparu. E faatamaa semeio oia i te hoê nahoa e 5 000 e tiahapa taata; e haere oia na nia i te miti; e pahono oia i te hoê faainoraa apî a te mau Pharisea, ta ˈna hoi i parau e ‘ua faahapa i te ture a te Atua i ta ratou na tutuu’; e faaora oia i tei uruhia i te demoni, “te pirioi, e te matapo, e te vava, e te paruparu, e te mau maˈi ěê atoa e rave rahi”; e e faatamaa faahou oia hau atu i te 4 000 taata, i te pane e hitu e tau iˈa rii. (15:3, 30) Ia pahono oia i te hoê uiraa a Iesu, e haapapu Petero o vai oia a na ô ai e: “O te Mesia oe, te Tamaiti a te Atua ora ra.” E haapopou Iesu ia Petero e na ô atura e: “Ei nia iho i teie nei pǎpǎ e patu ai au i tau ekalesia.” (16:16, 18) E haamata ˈtu ai Iesu i te parau no to ˈna pohe e fatata maira e no to ˈna tia-faahou-raa i te toru o te mahana. E tǎpǔ atoa râ oia e “e ore” te tahi pae o ta ˈna mau pǐpǐ ‘e ite i te pohe hou ratou e ite ai i te Tamaiti a te taata i te taeraa mai i to ˈna ra basileia.’ (16:28) E ono mahana i muri aˈe, e aratai Iesu ia Petero, Iakobo, e ia Ioane i nia i te hoê mouˈa teitei e hiˈo ia faahuru-ê-hia oia ma te hanahana. I roto i te hoê orama, e ite ratou ia Mose raua Elia i te paraparauraa e oia, e e faaroo ratou i te hoê reo no te raˈi mai i te na ôraa e: “O tau Tamaiti here teie, ua mauruuru roa vau ia ˈna; a faaroo ia ˈna.” Ia pou mai ratou mai nia mai i te mouˈa, e parau Iesu ia ratou e ua haere aˈena mai o “Elia,” e taa ˈtura ia ratou e o Ioane Bapetizo ta ˈna e parau ra.—17:5, 12.

22. Eaha te aˈoraa a Iesu no nia i te faaoreraa i te hapa?

²² To Iesu aˈoraa i ta ˈna mau pǐpǐ (18:1-35). I Kaperenaumi, e paraparau Iesu i ta ˈna mau pǐpǐ no nia i te haehaa, te oaoa rahi ia itea mai te mamoe i moe ra, e te faaafaroraa i te mau fifi i rotopu i te mau taeae. E ui Petero e: ‘Ehia taime e tia ˈi ia ˈu ia faaore i te hapa a to ˈu taeae?’ e e pahono atu Iesu e: “Aore au i parau atu ia oe e, Ia hitu; ia hitu râ ahuru i te hituraa.” No te haapapu roa ˈtu â i te reira, e horoa Iesu i te parabole o te tavini i faaorehia ta ˈna tarahu e 60 mirioni moni veo e to ˈna fatu. I muri iho, e rave teie tavini e ia tapeahia te tahi hoa tavini i te fare tapearaa no te hoê tarahu iti 100 anaˈe moni veo, e i te pae hopea, e tuu-atoa-hia ˈtu te tavini aroha ore i te feia tapea ra. * Teie te tatararaa a Iesu: “E na reira atoa mai tau Metua i te ao ra ia outou atoa na, ia ore outou ia faaore ma te aau atoa i te hapa a to ˈna taeae.”—18:21, 22, 35.

23. Eaha ta Iesu e parau no nia i te faataaraa e te eˈa o te ora?

²³ Mau mahana hopea o te taviniraa a Iesu (19:1–22:46). E tupu oioi te mau mea e e puai noa ˈtu te mau manaˈo a uˈana ˈi te riri o te mau papai parau e te mau Pharisea i te taviniraa a Iesu. E haere mai ratou e faahapa ia Iesu no nia i te parau o te faataaraa, eita  râ ratou e manuïa; e faaite Iesu e te tumu hoê roa e faatia ˈi te mau Papai ia faataa, o te poreneia ïa. E haere mai te hoê taurearea taoˈa rahi ia Iesu ra, e ui nafea e noaa ˈi te ora mure ore, e reva râ oia ma te oto ia ite oia e e tia ia ˈna ia hoo atu i ta ˈna mau taoˈa atoa a pee atu ai ia Iesu. I muri aˈe i to ˈna horoaraa i te parabole o te mau rave ohipa e te moni veo, e faahiti faahou â Iesu i to ˈna poheraa e to ˈna tia-faahou-raa, a na ô atu ai e: “Aita atoa hoi te Tamaiti a te taata nei i haere mai ia tavinihia to ˈna, ei tavini râ, e ia horoa i to ˈna ora ei hoo no te taata e rave rahi.”—20:28.

24. A tae ai Iesu i te hebedoma hopea o to ˈna oraraa taata, eaha te mau aimârôraa e tupu e te feia patoi i te pae faaroo, e nafea oia e pahono atu ai i ta ratou mau uiraa?

²⁴ Tei te hebedoma hopea o to ˈna oraraa taata o Iesu i teie nei. E tomo oia ma te hanahana i Ierusalema ei ‘Arii, i nia i te fanauˈa o te asini.’ (21:4, 5) E tiahi oia i te feia hoo moni e te tahi atu â feia nounou moni i rapae i te hiero, e e uˈana roa ˈtu â te riri o to ˈna mau enemi ia parau atu oia e: “O te mau telona, e te mau vahine faaturi tei reva na i te basileia o te Atua, ia outou.” (21:31) E tano maitai ta ˈna mau parabole aravihi no nia i te ô vine e te oroa faaipoiporaa. E pahono atu oia ma te ite i te uiraa a te mau Pharisea no nia i te tute na roto i te parauraa ˈtu e aufau “i ta Kaisara ia Kaisara ra, e ta te Atua ra, . . . i te Atua ra.” (22:21) E pahono atoa ˈtu oia i te uiraa faahapa a te mau Sadukea e e turu oia i te tiaturiraa o te tia-faahou-raa. E haere faahou mai te mau Pharisea ia ˈna ra e te hoê uiraa no nia i te Ture, e e parau atu Iesu e te faaueraa rahi roa ˈˈe, ia here ïa ia Iehova ma te mafatu taatoa, e te piti, ia aroha i to tatou taata-tupu mai ia tatou iho. E ui atu Iesu ia ratou, ‘Nafea hoi te Mesia e riro ai ei tamaiti na Davida e ei fatu atoa no ˈna?’ Aita hoê e nehenehe e pahono, e aita hoê e uiui faahou ia ˈna.—22:45, 46.

25. Nafea Iesu e haava puai ai i te mau papai parau e te mau Pharisea?

²⁵ ‘Auê outou, e te mau haavare e’ (23:1–24:2). Ma te parau atu i te mau nahoa taata i te hiero, e faatae Iesu i te tahi atu faahaparaa etaeta no nia i te mau papai parau e te mau Pharisea. Aita noa ratou i faaere ia ratou iho i te tiaraa ia tomo i roto i te Basileia, e imi atoa râ ratou i te mau ravea haavarevare atoa no te tapea ia vetahi ê ia ore ratou ia tomo atoa ˈtu. Mai te mau menema faateateahia ra, mea nehenehe ratou i rapae au, area o roto ra, ua î roa ïa i te ino e te pê. E faahope Iesu na roto i teie haavaraa ia Ierusalema: “To outou utuafare e tuuhia ˈi i te ano.” (23:38) A faarue ai oia i te hiero, e tohu Iesu i to ˈna haamouraa.

26. Eaha te tapao ta Iesu e tohu no nia i to ˈna vairaa mai ei Arii hanahana?

²⁶ E horoa Iesu i ‘te tapao o to ˈna vairaa mai’ (24:3–25:46). I nia i te mouˈa i Oliveta, e uiui ta ˈna mau pǐpǐ ia ˈna no nia i ‘te tapao o to ˈna vairaa mai e te hopea o te faanahoraa o te mau mea.’ Ei pahonoraa, e faaite atea Iesu i te hoê tau tamaˈi, “e tia mai hoi te tahi fenua e aro mai i te tahi fenua, e te tahi basileia e aro mai i te tahi basileia,” te oˈe, te aueueraa fenua, te maraaraa o te faatura-ore-raa i te ture, te pororaa i “te evanelia o te basileia” e ati noa ˈˈe teie nei ao, te faatoroaraa o “te tavini haapao maitai e te paari,” e te tahi atu â mau tupuraa o te tapao e rave rau tuhaa. (24:3, 7, 14, 45-47) E faaoti Iesu i teie parau tohu faufaa na roto i te mau parabole o na paretenia tino ahuru e o te mau taleni, o tei haamatara i te mau haamaitairaa oaoa e fanaˈohia e te feia haapao maitai o te vai ara noa, e te parabole o te mau mamoe e te mau puaaniho, e faaite ra e e haere te feia e au i te puaaniho “i te pohe mure ore, area te feia parau-tia ra, o te rave ïa i te ora mure ore.”—25:46.

27. Eaha te mau tupuraa e tapao i te mahana hopea o Iesu i te fenua nei?

²⁷ Mau tupuraa o te mahana hopea o Iesu (26:1–27:66). I muri aˈe i te faatupuraa i te oroa Pasa, e haamau Iesu i te tahi oroa apî e ta ˈna mau aposetolo haapao maitai, a titau ai ia ratou e amu i te pane hopue ore e e inu i te uaina ei mau taipe o to ˈna tino e to ˈna toto. E haere atu ai ratou i Getesemane, i reira Iesu e pure ai. E haere mai Iuda e te feia rahi ma te mauhaa e e hoo oia ia Iesu ma te apa haavare. E arataihia Iesu i mua i te tahuˈa rahi, e e imi te mau tahuˈa rarahi e te Sunederi taatoa i te mau ite haavare no te faahapa ia Iesu. Ia au i ta Iesu i tohu, e huna Petero i te parau no ˈna i te taime a tamatahia ˈi oia. E tatarahapa Iuda, e e faarue oia i te moni o ta ˈna haavare i roto i te hiero a haere atu ai e tarî ia ˈna. Ia poipoi aˈe, e arataihia Iesu i mua i te tavana roma ra o Pilato, o te tuu atu ia ˈna e ia patǐtǐhia i nia i te raau ma te faahepohia e te nahoa e turaihia ra e te mau tahuˈa. E pii te nahoa e: “Ei nia ia matou to ˈna toto e ei nia i to matou tamarii.” E faaooo te mau faehau a te tavana i to ˈna tiaraa arii e e aratai ia ˈna i Golagota, i reira oia e patǐtǐhia ˈi i nia i te raau i ropu e piti feia eiâ, e te hoê papai i nia ˈˈe i to ˈna upoo, “O Iesu teie o te Arii o te ati Iuda ra.” (27:25, 37) I muri aˈe e rave rahi hora mauiuiraa, e pohe Iesu i te area hora toru i te avatea e e tuuhia oia i roto i te menema apî a Iosepha no Arimataio. O te mahana î roa ˈˈe i te mau tupuraa o te tuatapaparaa taatoa teie!

28. E hope te buka a Mataio na roto i teihea parau apî hau aˈe i te maitai, e teihea faaueraa?

²⁸ Te tia-faahou-raa o Iesu e ta ˈna mau faaueraa hopea (28:1-20). E hope te buka Mataio i teie nei na roto i te parau apî hau aˈe i te maitai. Ua faatiahia mai Iesu tei pohe na—te ora faahou ra oia! Ia poipoi roa i te mahana matamua o te hebedoma, e haere Maria i Magadala e “te tahi Maria” i te menema e e faaroo raua i te melahi ia faaite i teie parau oaoa. (28:1) No te haapapu i te reira, e fa roa mai Iesu i mua ia raua. E tamata roa te mau enemi i te huna i te parau no to ˈna tia-faahou-raa, a peta ˈi i te mau faehau i tiai i te menema ia parau e, “Na ta ˈna iho mau pǐpǐ i tii mai e i eiâ ia ˈna i te po te taoto ra matou.” I muri iho, e putuputu faahou â Iesu e ta ˈna mau pǐpǐ i  Galilea. Eaha ta ˈna faaueraa hopea ia ratou hou oia a reva ˈi? Teie ïa: “E haere outou e faariro i te mau fenua atoa ei pǐpǐ, a bapetizo atu ai ia ratou i roto i te iˈoa o te Metua, e no te Tamaiti, e no te [varua moˈa].” E fanaˈo anei ratou i te aratairaa i roto i teie ohipa pororaa? E horoa mai te parau hopea a Iesu ta Mataio i papai, i teie haapapuraa: “E inaha, tei pihai atoa iho vau ia outou, e tae noa ˈtu i te hopea o teie nei [faanahoraa o te mau mea].”—28:13, 19, 20; MN.

FAUFAARAA

29. (a) Nafea te Mataio e faatuati maitai ai i te mau Papai Hebera e te mau Papai Heleni? (b) Eaha te haamaitairaa i fanaˈohia e Iesu e vai noa nei â i mua i te mau Kerisetiano i teie mahana?

²⁹ Ua riro mau â te buka a Mataio, te matamua o na Evanelia toomaha, ei tuatiraa maitai roa i rotopu i te mau Papai Hebera e te mau Papai Heleni Kerisetiano. Ma te feaa ore, te haapapu ra teie buka o vai te Mesia e Arii o te Basileia o te Atua i tǎpǔhia, te faaite ra oia eaha te mau mea e titauhia no te riro ei pǐpǐ na ˈna, e te faataa ra i te ohipa e tia ia ratou ia rave i te fenua nei. O Ioane Bapetizo na mua, i muri iho o Iesu, e i te pae hopea o ta ˈna mau pǐpǐ tei poro haere, “Te fatata mai nei hoi te basileia o te ao.” Hau atu â, e mana te faaueraa a Iesu e tae roa mai i te hopea o te faanahoraa o te mau mea: “E e parau-haere-hia te evanelia [aore ra “parau apî maitai,” MN] o te basileia nei e ati noa ˈˈe teie nei ao, ia ite te mau fenua atoa: o te hopea ihora ïa i reira ra.” I tera ra tau, e i teie atoa tau, e haamaitairaa faahiahia te apitiraa i roto i teie ohipa a te Basileia, oia atoa ‘te faariroraa i te mau fenua atoa ei pǐpǐ,’ ma te pee i te hiˈoraa o te Fatu.—3:2; 4:17; 10:7; 24:14; 28:19.

30. Eaha te tuhaa taa ê o te Mataio e fariihia no to ˈna ohieraa ia faaohipa?

³⁰ E “parau apî maitai” mau â te Evanelia a Mataio. E “parau apî maitai” ta ˈna poroi faauruahia no te feia i haapao i te reira i te senekele matamua o to tatou tau, e ua haapao te Atua ra o Iehova e ia paruruhia ei “parau apî maitai” e tae roa mai i teie nei mahana. Ua turai-atoa-hia te feia e ere i te Kerisetiano ia farii i te mana o teie Evanelia, ei hiˈoraa, te tia Hindou ra o Mohandas (Mahatma) Gandhi, o tei parau e: “A inu hua i te pape e horoahia maira i roto i te Aˈoraa i nia i te mouˈa . . . Na tatou taitahi hoi te haapiiraa o te Aˈoraa i nia i te mouˈa.” *

31. O vai tei haapopou mau i te aˈoraa a Mataio, e no te aha tatou e faufaahia ˈi ia faahohonu tatou i te Evanelia a Mataio na nia iho e na nia iho noa?

³¹ Teie râ, te fifi-noa-hia nei â te ao atoa nei, e tae noa ˈtu te tuhaa o te faahua parau nei e e Kerisetiano ratou. O te hoê noa pǔpǔ iti Kerisetiano mau o te haafaufaa nei, te faahohonu nei, e te faaohipa nei i te Aˈoraa i nia i te mouˈa e te tahi atu mau aˈoraa maitatai atoa o te parau apî maitai a Mataio e o te fanaˈo nei ïa i te mau haamaitairaa hau aˈe i te faahiahia. E faufaahia tatou ia faahohonu tatou na nia iho e na nia iho noa i te mau aˈoraa maitatai a Iesu no nia i te ravea e itea mai ai te oaoaraa mau, e tae noa ˈtu no nia i te peu morare e te faaipoiporaa, te puai o te here, te pure e faaroohia mai, te huru pae varua o te hau aˈe i te mau faufaa materia, te imiraa i te Basileia na mua, te faaturaraa i te mau mea moˈa, te araraa e te auraroraa. Te horoa ra te pene 10 a Mataio i te mau faaueraa a Iesu no nia i te taviniraa na te feia e poro nei i te parau apî maitai o “te basileia o te ao.” E mau haapiiraa faufaa roa to roto i te mau parabole e rave rahi a Iesu no te feia atoa ‘e tariˈa to ratou no te faaroo.’ Hau atu â, e haapaari te mau parau tohu a Iesu, mai ‘te tapao o to ˈna vairaa mai’ ta ˈna i tohu huˈahuˈa mai, i te faaroo e te tiaturiraa no a muri aˈe.—5:1–7:29; 10:5-42; 13:1-58; 18:1–20:16; 21:28–22:40; 24:3–25:46.

32. (a) A faahohoˈa nafea te mau parau tohu i tupu ia haapapu e o Iesu te Mesia. (b) Eaha te haapapuraa puai ta teie mau tupuraa e horoa maira i teie mahana?

³² Mea rahi te mau parau tohu i tupu i roto i te Evanelia a Mataio. Te rahiraa o ta ˈna mau faahitiraa i te mau Papai Hebera i faauruahia, no te faaite ïa i teie mau tupuraa. Te horoa maira te reira i te haapapuraa feaa ore e, o Iesu te Mesia inaha, eita roa e nehenehe e faanaho i teie mau tuhaa rii atoa hou a tupu ai. A faaau na ei hiˈoraa, i te Mataio 13:14, 15 e te Isaia 6:9, 10; te Mataio 21:42 e te Salamo 118:22, 23; e te Mataio 26:31, 56 e te Zekaria 13:7. E horoa atoa mai teie mau tupuraa i te haapapuraa aueue ore e e tupu mau te mau tohu atoa a Iesu iho, i papaihia e Mataio, i te tau i faataahia, ia tupu paatoa te mau opuaraa hanahana a Iehova i taaihia i “te basileia o te ao.”

33. Te oaoa rahi nei te mau hoa o te parau-tia i teihea ite e teihea tiaturiraa?

³³ Auê te tano e te rahi o te mau faataa-huˈahuˈa-raa ia tohu te Atua i te oraraa o te Arii o te Basileia! Auê te haapao maitai ia papai Mataio tei faauruahia i te tupuraa o teie mau parau tohu! A feruri ai ratou i te mau tupuraa o te mau parau tohu e te mau parau tǎpǔ atoa i papaihia i roto i te buka a Mataio, e nehenehe mau â te mau hoa o te parau-tia e oaoa i te ite e te tiaturiraa o “te basileia o te ao” ei mauhaa na Iehova no te haamoˈa i to ˈna iˈoa. Na teie Basileia faaterehia e Iesu Mesia e hopoi mai i te mau haamaitairaa faahiahia o te ora e te oaoa na te feia mǎrû e tei poia i te pae varua “ia tae i te faahouraa ra, ia parahi te Tamaiti a te taata i nia iho i to ˈna terono hanahana.” (Mat. 19:28) Tei roto teie mau parau atoa i te parau apî maitai faaitoito “a Mataio.”

[Nota i raro i te api]

[Uiraa haapiiraa]