Buka Bibilia numera 49—Ephesia
Buka Bibilia numera 49—Ephesia
Taata papai: Paulo
Vahi papairaa: Roma
Otiraa te papai: area 60-61 T.T.
1. Afea e i roto i teihea mau tupuraa to Paulo papairaa i te rata i to Ephesia?
A FERURI na e tei roto outou i te fare tapearaa. Tei reira outou no te mea te hamani-ino-hia ra outou no to outou itoito i roto i te taviniraa mitionare Kerisetiano. I teie nei e eita ta outou e nehenehe faahou e haere e farerei i te mau amuiraa no te haapuai ia ratou, e nafea outou? Eita anei ta outou e nehenehe e papai i te mau rata na tei riro mai ei mau Kerisetiano auaa ta outou ohipa pororaa? Aita anei ratou e haapeapea ra eaha râ to outou huru, e aita anei ratou e hinaaro ra i te faaitoitoraa? Oia iho â ïa! E haamata ïa outou i te papai atu. Te reira mau ta te aposetolo Paulo i rave i to ˈna tapearaahia i Roma i te taime matamua, i te area 59-61 T.T. Ua horo faahou oia i mua ia Kaisara, e noa ˈtu e e haavahia oia e e tiai to pihai iho ia ˈna, e tiamâraa to ˈna no te tahi maa ohipa. Ua papai Paulo i ta ˈna rata “I to Ephesia” mai Roma ˈtu, peneiaˈe i te matahiti 60 aore ra 61 T.T., e ua faatae oia i te reira na roto ia Tuhiko, tei apeehia e Onesimo.—Eph. 6:21; Kol. 4:7-9.
2, 3. Eaha te mau haapapuraa feaa ore e na Paulo i papai i te Ephesia e e au te reira i te canon?
2 E faaite Paulo e o oia te taata papai i roto iho â i te mau irava matamua e e maha taime oia e faahiti ai i to ˈna huru tupuraa ei “taata i tapeahia i te Fatu nei.” (Eph. 1:1; 3:1, 13; 4:1; 6:20) Aita te mau mârôraa e e ere o Paulo te taata papai, i manuïa. E 86 api o te codex o te mau rata a Paulo, oia atoa hoi te episetole i to Ephesia, to roto i te Papyrus Chester Beatty II (P46) e parauhia e no te area 200 T.T., o te faaite ïa e tei roto te reira i ta ˈna mau rata i taua tau ra.
3 Te haapapu ra te feia papai ekalesiatiko e na Paulo i papai i te rata e ua faataehia na “To Ephesia.” Ei hiˈoraa, ua faahiti o Irénée, no te senekele 2 T.T., i te Ephesia 5:30 mai teie: “Mai ta Paulo i haamaitaihia e parau ra i roto i ta ˈna episetole i to Ephesia, e e melo tatou no to ˈna tino.” Ua faahiti o Clément no Alesanederia, i taua noâ tau ra, i te Ephesia 5:21 a na ô ai e: “No reira atoa oia i papai ai i roto i te episetole i to Ephesia, A auraro te tahi i te tahi i roto i te mǎtaˈu i te Atua.” Ua faahiti Origène, i papai i te afa matamua o te senekele 3 T.T., i te Ephesia 1:4 a na ô ai e: “Hoê â atoa mau parau a te aposetolo i roto i te episetole i to Ephesia, ia parau oia e, Oia i maiti ia tatou hou te haamauraa o te ao nei.” * E tuu atoa Eusèbe, te tahi â taata ite i te aamu o te mau Kerisetiano matamua (area 260-area 340 T.T.), i te Ephesia i roto i te canon Bibilia, e e faahiti te rahiraa o te feia papai ekalesiatiko i te Ephesia ei tuhaa o te mau Papai faauruahia. *
4. Na te aha i turai i te vetahi ia manaˈo e ua faataehia te Ephesia i te tahi atu vahi, eaha râ te haapapuraa e ua papaihia iho â teie rata na to Ephesia?
4 Aita te mau parau ra “i Ephesia na” i roto i te Papyrus Chester Beatty, te Vaticanus 1209, e te Sinaiticus i roto i te pene 1, irava 1, aita ïa e faaite ra na vai te rata e papaihia ra. Ua turai te reira e te mea atoa e aita e aroharaa i to Ephesia (noa ˈtu e ua ohipa Paulo i ǒ e toru matahiti i te roaraa), i te tahi pae ia parau e ua faataehia te rata i te tahi atu vahi aore ra e rata amui paha tera na te mau amuiraa no Asia Iti, tae noa ˈtu i to Ephesia. Teie râ, te vai ra te mau parau ra “i Ephesia na” i roto i te rahiraa o te tahi atu mau papai tahito, e mai ta tatou i tapao i nia ˈˈe, ua farii te feia papai ekalesiatiko i te reira ei rata na to Ephesia.
5. Eaha te nehenehe e tapaohia no nia ia Ephesia no te tau o Paulo?
5 E tauturu mai te tahi mau haamaramaramaraa no nia i te tupuraa mau ia taa ia tatou te fa o teie rata. I te senekele matamua o to tatou tau, mea matauhia Ephesia no ta ˈna peu tairoiro, te tahutahu, te hiˈohiˈo, e te haamoriraa i te ruahine o te fanau-rahi-raa o Artémis. * I pihai iho i te tii o te ruahine, ua patuhia te hoê hiero nehenehe roa i hiˈohia na mai te hoê o na mea faahiahia e hitu o te ao i tahito ra. Ia au i te mau heruraa i taua vahi ra i te senekele 19 ra, ua patuhia te hiero i nia i te hoê paepae e 73 metera i te aano e 127 metera i te roa. Fatata e 50 metera i te aano to te hiero iho e 105 metera i te roa. Te vai ra 100 pou maremora, 17 metera i te teitei te pou taitahi. Mea tapoˈihia te tafare i te mau tâpû maremora uouo rarahi. Te parauhia ra e ua ravehia te auro eiaha râ te tima ei puoiraa i te mau tâpû maremora. E haere mai te mau ratere na te ao atoa nei e mataitai i te hiero, e mau hanere tausani hoi te purehu mai i roto i te oire i te mau tau oroa. Mea tere maitai te ohipa a te feia tupai ario no Ephesia ia hoo ratou i te mau tii no Artémis ei taoˈa haamanaˈoraa na te feia ratere i te pae faaroo.
6. Eaha te rahi o ta Paulo ohipa i rave i Ephesia?
6 Ua faaea Paulo i Ephesia i te piti o to ˈna tere mitionare no te hoê taime pororaa poto e ua vaiiho ia Akuila raua Perisila i ǒ ia faahaere raua i te ohipa i mua. (Ohi. 18:18-21) Ua hoˈi faahou oia i te toruraa o to ˈna tere mitionare e ua faaea i ǒ fatata e toru matahiti a poro e a haapii ai i “Te Eˈa” i te taata e rave rahi. (Ohi. 19:8-10, MN; 20:31) Ua rohi maite Paulo tei ǒraa oia i Ephesia. I roto i ta ˈna buka Daily Life in Bible Times, ua papai A. E. Bailey e: “E peu matauhia e Paulo te raveraa i ta ˈna ohipa imiraa mai te hitiraa o te mahana e tae atu i te hora 11 i te avatea (Ohipa 20:34, 35) i reira hoi e faaoti ai te haapiiraa a Turano; e mai te hora 11 i te avatea e tae atu i te hora 4 i te taperaa mahana, te pororaa i roto i te piha haapiiraa, te paraparauraa e to ˈna mau hoa rave ohipa, . . . e i te pae hopea te haereraa i tera e tera fare e poro i te taata mai te hora 4 i te taperaa mahana e tae atu i te maororaa po. (Ohipa 20:20, 21, 31) E maere tatou afea oia e rave ai i te taime no te tamaa e te taoto.”—1943, api 308.
7. Eaha te faahopearaa o te pororaa itoito a Paulo?
7 I roto i teie pororaa itoito, ua faahapa Paulo i te faaohiparaa i te mau hohoˈa i roto i te haamoriraa. Ua faatupu te reira i te riri o te feia e hamani ra e e hoo ra i te reira, mai te taata tupai ario ra o Demeterio, e i te pae hopea, ua tia aˈera ia Paulo ia faarue i te oire i roto i te arepurepuraa.—Ohi. 19:23–20:1.
8. Eaha te mau vahi e tano maitai ai te rata a Paulo i to Ephesia?
8 Ei teie nei, i roto i te fare tapearaa, te feruri ra Paulo i te mau fifi e farereihia ra e te amuiraa no Ephesia e haaatihia ra e te feia haamori etene e to pihai iho hoi i te hiero riaria o Artémis. Te hinaaro papu mau ra teie mau Kerisetiano faatavaihia i te faahohoˈaraa tano ta Paulo e horoa ra i teie nei na ratou, o te faaite e e “hiero moˈa” ratou i reira Iehova e parahi varua ˈi. (Eph. 2:21) E faaitoitoraa e e tamahanahanaraa rahi mau no ratou “te parau aro [moˈa]” e faaitehia ra i to Ephesia, no nia i te tiaauraa a te Atua (ta ˈna huru haapaoraa i te mau ohipa a to ˈna utuafare), ta ˈna ravea no te haamau faahou i te tahoêraa e te hau i roto ia Iesu Mesia. (1:9, 10; MN) E haamatara Paulo i te tahoêraa o te ati Iuda e o te Etene i roto i te Mesia. E faaitoito oia ia tahoê. Te ite ra ïa tatou i te fa, te faufaaraa, e e mea faaurua-mau-hia teie buka e te Atua.
TUMU PARAU O TE EPHESIA
9. Nafea to te Atua faarahiraa i to ˈna here, e e pure Paulo no te aha?
9 Te opuaraa a te Atua e faatupu i te tahoêraa na roto i te Mesia (1:1–2:22). E faatae te aposetolo Paulo i te aroha. Ia haamaitaihia te Atua no to ˈna maitai rahi hanahana. Aita anei oia i maiti ia ratou ia hoê ratou e Iesu Mesia, mea na roto hoi ia ˈna i tiamâ ˈi ratou maoti to ˈna toto. Hau atu â, ua faarahi te Atua i to ˈna here ia ratou na roto i te faaiteraa ˈtu i te parau aro o to ˈna hinaaro. Ua opua hoi oia i te hoê tiaauraa, no ‘te haaputu faahou i te mau mea atoa i roto i te Mesia,’ e hoê atoa hoi ratou e oia ei feia tufa. (1:10) Ei haapapu-aˈena-raa i te reira, ua tapaohia ratou i te varua moˈa. E pure Paulo e ia papu maitai ia ratou to ratou tiaturiraa i parauhia ˈi ratou e ia ite ratou e e faaohipa te Atua i te hoê â mana i nia ia ratou e ta ˈna i faaohipa no te faatia i te Mesia e no te tuu ia ˈna i nia ˈˈe roa i te mau faatereraa atoa e te mau mana atoa e no te faariro ia ˈna ei Upoo i nia ˈˈe i te mau mea atoa a te amuiraa.
10. Nafea to Ephesia i te riroraa mai ei feia ‘hoê â oire e te feia moˈa’?
10 Ua faahoˈi mai te Atua ia ratou i te ora no te rahi o to ˈna aroha e o to ˈna here noa ˈtu e ua pohe ratou i roto i to ratou mau hape e ta ratou mau hara, e ua haaparahi ia ratou paatoa “i te ao ra i te Mesia ra ia Iesu.” (2:6) Maoti te maitai rahi e te faaroo i tupu ai te reira, eiaha râ ta ratou iho mau ohipa. O te Mesia to ratou hau, oia i haaparari i te patu, maori râ te Ture o te mau faaueraa, tei faataa ê na i te Etene e te ati Iuda. I teie nei, e tia i na pae e piti atoa ia haafatata i te Metua na roto i te Mesia. No reira, e ere faahou to Ephesia i te feia ěê, ‘hoê atoa râ to ratou oire e te feia moˈa’ e te tupu ra ratou ei hiero moˈa i reira Iehova e faaea varua ˈi.—2:19.
11. Eaha “te parau aro moˈa,” e no te aha Paulo e pure ai no to Ephesia?
11 “Te parau aro moˈa o te Mesia” (3:1-21). Ua faaite te Atua i ta ˈna mau aposetolo e mau peropheta moˈa i “te parau aro [moˈa] o te Mesia . . . e ei feia aiˈa atoa te Etene, ei [mau melo o te tino] e ia noaa atoa tei parauhia mai e ana i te Mesia, i te evanelia ra.” (3:4, 6; MN) Maoti te maitai rahi o te Atua, ua riro mai Paulo ei tavini o te reira, no te poro i te faufaa faito ore o te Mesia e ia ite te taata nafea te parau aro moˈa e tiaauhia ˈi. Mea na roto i te amuiraa te paari rau roa o te Atua e faaitehia ˈi. No reira, e pure Paulo e ia haapuaihia ratou ma te mana maoti te varua o te Atua ia ite maite ratou i te here o te Mesia, o te hau aˈe i te ite, e ia taa ia ratou e e nehenehe ta te Atua ‘e rave hau atu â i te mau mea atoa ta tatou e ani nei e ta tatou e manaˈo nei.’—3:20.
12. (a) Nafea e tia ˈi i te mau Kerisetiano ia haere, e no te aha? (b) Eaha te mau ô ta te Mesia i horoa, e no teihea fa? (c) Eaha te titauhia no te ahu i “te huru taata apî”?
12 Te ‘faataata-apî-raa’ (4:1–5:20). E tia i te mau Kerisetiano ia haere ma te au i to ratou parauraa ra, ma te haehaa, te faaoromai e te here, e te taairaa o te hau. Inaha, hoê noa hoi varua, hoê tiaturiraa, hoê faaroo, e “hoê Atua o te Metua o te taata atoa, e tei nia iho i te taata atoa, e tei pihai iho i te taata atoa, e tei roto hoi ia outou atoa.” (4:6) No reira, ua horoa te Mesia, te ‘Fatu hoê,’ i te mau peropheta, te feia poro evanelia, te mau tiai mamoe, e te feia no te haapii, no te ‘faaau i te feia moˈa, no te ohipa [taviniraa], no te [paturaa] i te tino o te Mesia ra.’ No reira, ta Paulo ïa e papai, “ia tapea maite râ i te parau mau ma te aroha, ia tupu i te auraa ˈtu ia ˈna i te upoo ra i te Mesia, i te mau mea atoa nei,” mai te hoê tino i taai-maite-hia e te rave amui maitai ra te mau melo. (4:5, 12, 15; MN) Ia haapaehia te mau haerea morare tia ore, te faufaa ore e te ite ore o te huru taata tahito; e tia i te taata atoa ia faaapîhia i roto i te puai e ohipa ra i nia i to ˈna feruriraa e “ia ahu i te huru taata apî o tei hamanihia ia au i te hinaaro o te Atua ma te parau-tia e te taiva ore mau.” No te mea hoi e au anaˈe te tahi e te tahi, e tia ia ratou ia parau i te parau mau e ia haapae i te iria, te eiâ, te mau parau ino, te riri manaˈo ino—e eiaha e haapeapea i te varua moˈa o te Atua. ‘Ia hamani maitai maoti ratou ia ratou iho, ma te aau mǎrû aroha noa, ma te faaore hoi i te hara te tahi e te tahi, mai ta te Atua i faaore mai i ta outou i te Mesia ra.’—4:24, MN, 32.
13. No te riro mai ei taata e pee i te Atua, eaha te titauhia ia rave?
13 Ia riro paatoa ratou ei feia e pee i te Atua. Eiaha roa ˈˈe te poreneia, te mea faufau, e te nounou taoˈa ia faahitihia i roto ia ratou, e ore hoi te feia e rave i te reira mau mea e tufa i te Basileia. E aˈo Paulo i to Ephesia e: “A tamau i te haere ei mau tamarii o te maramarama.” “A ara maitai” i to outou haerea, ma te faaherehere i te taime maitai, “no te mea e anotau ino teie.” Oia mau, e tia ia ratou “ia ite eaha to Iehova hinaaro” e ia paraparau na roto i te mau arueraa i te Atua ma te haamaitai.—5:8, 15-17, MN.
14. Eaha te mau hopoia a te tahi i nia i te tahi a te mau tane e te mau vahine?
14 Te auraro e au; te tamaˈi Kerisetiano (5:21–6:24). Ia auraro te mau vahine i ta ratou mau tane, mai te amuiraa ia auraro i te Mesia, e ia tamau te mau tane i te here i ta ratou mau vahine, “mai te Mesia atoa i here i te amuiraa.” Oia atoa, “ei faatura rahi to te vahine i ta ˈna tane.”—5:25, 33, MN.
15. Eaha ta Paulo e aˈo i te mau tamarii e te mau metua, te mau tavini e te mau fatu, e no nia i te haana tamaˈi a te Kerisetiano?
15 Ia ora te mau tamarii ma te hoê e te mau metua, ia faaroo e ia farii i te aˈoraa a te Atua. Ia pee atoa te mau tavini e te mau fatu i te haerea e auhia mai ai ratou e te Atua, no te mea “tei te raˈi” te Fatu o te mau mea atoa, “o tei ore roa ïa e haapao i te huru o te taata nei.” I te pae hopea, “ia itoito” paatoa “i te Fatu e i to ˈna ra puai rahi,” a ahu ai i te haana tamaˈi taatoa a te Atua e ia noaa i te patoi atu i te Diabolo. Hau atu â, “a rave hoi i te paruru o te faaroo,” e ‘te ˈoˈe a te varua ra o te parau a te Atua.’ A tamau i te pure, e a vai ara. E ani Paulo e pure atoa ratou no ˈna, ia nehenehe oia e “faaite hua ˈtu i te parau aro ra o te evanelia.”—6:9, 10, 16, 17, 19.
FAUFAARAA
16. E pahonoraa ohie to roto i te Ephesia no nia i teihea mau uiraa, e eaha te parauhia ra no nia i te huru taata e auhia e te Atua?
16 E au te episetole i to Ephesia fatata i te mau tuhaa atoa o te oraraa Kerisetiano. Ia hiˈo tatou i te mau fifi ahoaho e te mau ohipa ino o teie tau na te ao nei, mea faufaa mau te aˈoraa maitai e te ohie a Paulo no te feia e hinaaro ra e ora ia au i te titauraa a te Atua. Eaha te huru o te mau tamarii i nia i te mau metua, e tia ˈi, e te mau metua i nia i te mau tamarii? Eaha te mau hopoia a te hoê tane i nia i ta ˈna vahine, e a te hoê vahine i nia i ta ˈna tane? Eaha te tia i te taata taitahi i roto i te amuiraa ia rave no te atuatu i te tahoêraa ma te here e te viivii ore Kerisetiano i roto i te hoê ao ino? E puohu te mau aˈoraa a Paulo i teie atoa nei mau uiraa, e e faaite â oia eaha te titauhia no te ahu i te huru taata Kerisetiano apî. Maoti te haapiiraa i te Ephesia, e taa maitai ia tatou teihea huru taata e auhia e te Atua e tei “hamanihia ia au i te hinaaro o te Atua ma te parau-tia e te taiva ore mau.”—4:24-32; 6:1-4; 5:3-5, 15-20, 22-33.
17. Eaha ta te Ephesia e faaite ra no nia i te auraro-maitai-raa i te mau faanahoraa i roto i te amuiraa?
17 Te faaite atoa ra te rata i te fa o te mau nominoraa e o te mau opereraa hopoia i roto i te amuiraa. ‘No te faaauraa ïa o te feia moˈa, te ohipa taviniraa, te paturaa i te tino o te Mesia,’ ia noaa te paari. Na roto i te auraro-maitai-raa i teie mau faanahoraa i roto i te amuiraa, e nehenehe te Kerisetiano, “ma te aroha,” e “tupu i te auraa ˈtu ia ˈna i te upoo ra i te Mesia, i te mau mea atoa nei.”—4:12, 15.
18. Eaha tei faataa-maitai-hia no nia i “te parau aro moˈa” e te hoê hiero varua?
18 Ua faufaa-rahi-hia te amuiraa matamua i te rata i to Ephesia tei tauturu ia taa maitai ia ratou “te parau aro [moˈa] o te Mesia.” Ua faataa-maitai-hia i ǒ nei e mai te mau ati Iuda faaroo, ‘e feia aiˈa atoa te Etene, e [mau melo o te tino] e ia noaa atoa tei parauhia mai e ana i te Mesia, i te evanelia nei.’ Ua faaorehia te patu faataa-ê-raa, oia “te Ture o te mau faaueraa,” i faataa ê na i te Etene e te ati Iuda, e i teie nei, maoti te toto o te Mesia, ua riro paatoa ei feia hoê â oire e te feia moˈa e ei mau melo o te utuafare o te Atua. Ma te taa ê roa i te hiero etene a Artémis, te patuhia ra ratou i roto i te Mesia ia Iesu ei vahi i reira te Atua e parahi varua ˈi—‘te hoê hiero moˈa no Iehova.’—3:4, 6; 2:15, 21; MN.
19. Eaha te tiaturiraa e te faaitoitoraa ta te Ephesia e tamau ra i te horoa i teie mahana?
19 No nia i “te parau aro moˈa,” ua faahiti atoa Paulo i “te hoê tiaauraa . . . no te haaputu faahou i te mau mea atoa i roto i te Mesia, to te raˈi [te feia i maitihia no te parahi i te Basileia i te raˈi] e to te ao nei [te feia e ora i te fenua nei o te faaterehia e te Basileia].” Mea na reira te opuaraa rahi a te Atua e faatupu faahou i te hau e te tahoêraa e haamatarahia ˈi. No nia i te reira, ua pure Paulo no to Ephesia, ua haamaramaramahia hoi te mata o to ratou mafatu, ia taa maitai ia ratou te tiaturiraa i parauhia ˈi ratou e te Atua e ia ite ratou ‘i te rahi o te hinuhinu o te tufaa e te feia moˈa ia ˈna ra.’ Ua faaitoito rahi mau â teie mau parau ia ratou i roto i to ratou tiaturiraa. E te tamau noa râ te rata faauruahia i to Ephesia i te patu i te amuiraa i teie mahana, ‘ia faaîhia tatou e ia tae i te î atoa a te Atua ra.’—1:9-11, MN, 18; 3:19.
[Nota i raro i te api]
^ Origin and History of the Books of the Bible, 1868, a C. E. Stowe, api 357.
^ New Bible Dictionary, piti o te neneiraa, 1986, neneihia e J. D. Douglas, api 175.
^ Étude perspicace des Écritures, buka 1, mau api 192-193.
[Uiraa haapiiraa]