Buka Bibilia numera 51—Kolosa

Taata papai: Paulo

Vahi papairaa: Roma

Otiraa te papai: area 60-61 T.T.

1. Teihea roa te oire no Kolosa?

 E FAARUE na taata e piti ia Ephesia e haere atu ai i hitia o te râ na Asia Iti atu na te hiti o te anavai Méandre (Menderes). I to raua tapaeraa ˈtu i te anavai ra o Lycus, i te fenua o Pherugia, ua tipuu raua i apatoa hitia o te râ a haere ai na te pae anavai na roto atu i te faa ǒaǒa. Mea haviti mau â te hohoˈa fenua i mua ia raua: e mau aua heeuri mea rahi te nǎnǎ mamoe i roto. (O te mau taoˈa hamanihia i te huruhuru mamoe te hoê imiraa rahi o taua fenua ra. *⁠) A haere noa ˈi raua i nia i te faa, e mahemo te oire ona no Laodikea, te pu o te faatereraa Roma no taua mataeinaa ra, i te pae atau, i na ratere. I to raua pae aui, i te tahi pae mai o te anavai, e ite raua ia Hierapoli, tei tui te roo no ta ˈna mau hiero e mau pape pihaa veavea. E mau amuiraa Kerisetiano to roto i nau oire e i roto atoa i te oire iti no Kolosa, fatata 16 kilometera i nia ˈtu â i roto i te faa.

2. (a) O vai na vea e piti ta Paulo i tono atu i Kolosa? (b) Eaha ta tatou i ite no nia i te amuiraa no Kolosa?

² O Kolosa te oire e haerehia ra e na ratere. E mau Kerisetiano raua toopiti. Mea matau maitai teie vahi i te hoê o raua, no te mea no Kolosa oia. O Onesimo to ˈna iˈoa, e e tavini oia e hoˈi ra i to ˈna fatu ra, te hoê melo no to reira amuiraa. Te hoa o Onesimo, o Tuhiko ïa, te hoê taata tiamâ, e mea tonohia raua atoa ra e te aposetolo Paulo no te hopoi i ta ˈna rata na “te mau taeae i faaroo i te Mesia i Kolosa na.” Ta tatou i ite, aita o Paulo i haere aˈenei i Kolosa. Ua haamauhia paha te amuiraa, e ere te rahiraa i te ati Iuda, e Epaphera tei rave na i te ohipa ia ratou ra e i teie nei, tei ia Paulo ra oia i Roma.—Kol. 1:2, 7; 4:12.

3. Eaha ta te rata iho i to Kolosa e faaite ra no nia i te taata papai, e te tau e te vahi papairaa atoa?

³ Na te aposetolo Paulo i papai i teie rata, mai ta ˈna e faaite ra i roto i te omuaraa parau e te faaotiraa. (1:1; 4:18) Te faaite atoa ra ta ˈna faaotiraa e ua papai oia i teie rata i roto i te fare tapearaa. O te tau ïa o to ˈna tapearaa matamua i Roma, i te area 59-61 T.T., i to ˈna papairaa tau rata faaitoitoraa, ua haponohia hoi te rata i to Kolosa i te hoê â taime e te rata ia Philemona. (Kol. 4:7-9; Philem. 10, 23) Te itehia ra e ua papaihia te reira i te hoê â taime e te rata i to Ephesia, hoê â hoi te mau manaˈo e te mau parau e rave rahi.

4. Eaha te haapapuraa e e parau mau te rata i to Kolosa?

⁴ Aita e tumu ia feaa e e parau mau te rata i to Kolosa. Tei roto te reira e te tahi atu mau rata a Paulo i te Papyrus Chester Beatty II (P⁴⁶) no te area 200 T.T., o te haapapu ïa e te fariihia ra te reira e te mau Kerisetiano matamua mai te hoê rata i papaihia e Paulo. Hoê â feia mana e haapapu ra e mea mau te reira e tei haapapu i te omuaraa iho â e e parau mau te tahi atu mau rata a Paulo.

5. (a) Eaha tei turai ia Paulo ia papai i to Kolosa? (b) Eaha ta te rata e haamatara ra?

⁵ Eaha tei turai ia Paulo ia papai i te hoê rata i to Kolosa? A tahi, te hoˈi ra o Onesimo i Kolosa. No tae noa maira o Epaphera ia Paulo ra, e papu maitai e ua riro ta ˈna faaiteraa no nia i te mau ohipa e tupu ra i Kolosa ei tumu hau i papaihia ˈi teie rata. (Kol. 1:7, 8; 4:12) Te fifihia ra te amuiraa Kerisetiano i ǒ. Te moe atura te mau haapaoraa no taua tau ra, e te fa noa maira te mau haapaoraa apî no roto i te tahoêraa o te mau tuhaa o te mau haapaoraa tahito. Te vai ra te philosophia etene ma te peu haapaeraa rahi, te peu tahutahu, e te mǎtaˈu maamaa haamori idolo, amuihia e te haapaeraa maa e te haapaoraa i  te mau mahana a te ati Iuda, tei ohipa paha i nia i te tahi pae i roto i te amuiraa. Noa ˈtu râ eaha te fifi, te itehia ra e ua navai te reira no Epaphera ia rave oia i te tere roa e farerei ia Paulo i Roma. Teie râ, te haapapu ra te faaiteraa faaitoito a Epaphera no nia i to ratou here e to ratou mau-maite-raa e aita to te amuiraa taatoa e fifi ru. I to ˈna faarooraa i te faataaraa, ua tia maira Paulo e paruru etaeta i te ite mau e te haamoriraa viivii ore na roto i te papairaa i teie rata i te amuiraa no Kolosa. Te haamatara ra te reira i te tiaraa teitei o te Mesia i horoahia mai e te Atua ia faaauhia i te philosophia etene, te haamoriraa i te melahi, e te mau tutuu ati Iuda.

TUMU PARAU O TE KOLOSA

6. (a) Eaha te pure a Paulo no to Kolosa? (b) Eaha ta Paulo e tauaparau no nia i te tiaraa e te taviniraa a Iesu, tei taaihia i te amuiraa?

⁶ A faaroo i te Mesia, te upoo o te amuiraa (1:1–2:12). E haamata Paulo na roto i ta ˈna mau aroharaa e ta Timoteo atoa, e haamauruuru atu ai oia no te faaroo o to Kolosa i te Mesia e no to ratou here. Ua ite ratou i te maitai rahi o te Atua maoti te pororaa a Epaphera i te parau apî maitai ia ratou. Mai to ˈna iho â faarooraa i te faataaraa no nia ia ratou, aita Paulo i faaea i te pure e ia faaîhia ratou i ‘te ite [mau] i to ˈna ra hinaaro, i te paari i te mau mea atoa, e te ite varua ra: ia au to ratou haerea [ia Iehova]’ e “ia rahi atu te faaoromai, e te haamahuraa roa i te ino ma te oaoa.” (1:9-11; MN) Ua faatiamâ te Metua ia ratou i roto “i te basileia o [te] Tamaiti o [to ˈna] here,” oia te hohoˈa o te Atua ite-ore-hia, e na roto ia ˈna e no ˈna te mau mea atoa i poietehia ˈi. Oia te Upoo o te amuiraa e te matahiapo no roto i tei pohe. Na roto i te toto o Iesu, ua faaoti te Atua e mea maitai ia faahau i te mau mea atoa e o ˈna, oia, to Kolosa atoa tei atea ê i mutaa iho, ia “tamau maite” hoi ratou “i te faaroo.”—1:13, 23; MN.

7. Eaha ta Paulo e poro ra, e no teihea fa?

⁷ Te oaoa nei Paulo i te faaoromai-atoa-raa i te mau mauiui o te Mesia no te amuiraa, ua riro hoi oia ei tavini no ˈna. Ua na reirahia no to ratou maitai ia poro faahope oia i te parau a te Atua no nia ‘i te parau aro itea ore ta te Atua i hinaaro e faaite i te maitai rahi hanahana i te feia moˈa no ˈna ra.’ Te na ô ra o Paulo e, ‘O te Mesia ta matou e faaite haere nei, i te aˈoraa e te haapiiraa i te mau parau paari atoa, ia pûpû matou i te taata atoa ma te nehenehe roa i te Mesia.’—1:26-28.

8. No te aha Paulo e aro ai no to ˈna mau taeae?

⁸ Ua aro Paulo no to Kolosa, to Laodikea, e no vetahi atu, ia tamahanahanahia e ia au tahi maite ratou i roto i te here, ma te tapao ia noaa ia ratou ‘te ite [mau] i te parau aro a te Atua, oia te Mesia o tei vaiiho-paatoa-hia te taoˈa ra o te paari e te ite i roto ia ˈna ra.’ Aita oia e hinaaro ra e ite ia ratou ia haavarehia e te mau haaferuriraa aravihi, ia haere râ ratou ma te ati maite atu i te Mesia, “ia aahia i roto ia ˈna, e ia patuhia i nia iho ia ˈna, e ia papu . . . i te parau faaroo.” I teie nei, e horoa Paulo i te hoê faaararaa. “E ara o te riro noa ˈtu outou i te [philosophia] e te haavare faufaa ore, . . . i te parau tutuu a te taata nei.”—2:2, 3, 7, 8; MN.

9. Ua faaara Paulo no nia i teihea huru haamoriraa, e no te aha e ore ai e tia i to Kolosa ia auraro i te Ture?

⁹ Ia pohe i te mau ohipa o te tino, ia ora râ i te Mesia (2:13–3:17). Noa ˈtu e i pohe na ratou i ta ratou mau hara e te peritome-ore-raa, ua faaora mai te Atua ia ratou e te Mesia, ma te parai i te Ture i papaihia, o tei faahapa na i te ati Iuda. “E tena na, eiaha ei taata e faahapa noa ˈtu” ia ratou no nia i te Ture e ta ˈna mau oroa, e ata anaˈe hoi no te mea mau, oia te Mesia. Oia atoa, mai te peu e ua pohe ratou e te Mesia i te mau mea rii o te ao nei, no te aha ïa ratou e haapao ai i te mau faaueraa ra: “Eiaha e amu, eiaha hoi e tamata, e eiaha hoi e rave noa ˈtu,” ia au i te mau faaueraa e te mau haapiiraa a te taata? Te hoê huru haamoriraa faahepohia e te faaahaaha, te haehaa haavarevare, te haamauiuiraa i te tino—aita roa ˈtu e faufaa no te aro i te mau hinaaro o te tino.—2:16, 21.

10. Nafea ia titau noa i te mau mea i nia ra e ia ahu i te huru taata apî?

¹⁰ Aita, te aˈo nei râ Paulo e: “E titau i te mau mea i nia ra, i te vahi e parahihia e te Mesia i te rima atau o te Atua ra. E haamau i to outou aau i te mau mea i nia ra, eiaha i to teie nei ao ra.” E nehenehe e na reira, na roto i te haapaeraa i te huru taata tahito e te ahuraa i te huru taata apî, o te ore e faataa ê i te ati Iuda e te Heleni maoti te ite mau, no te mea ‘o te Mesia anaˈe e i roto i te feia atoa.’ Te auraa ra, e ahu ïa ‘mai te feia i maitihia e te Atua’ i te aau aroha noa, te maitai, te haehaa, te mǎrû, e te faaoromai rahi. Te na ô ra te aposetolo e: “Mai [ta Iehova] atoa i faaore i ta outou na, e na reira atoa outou: e ei nia roa iho i taua mau mea atoa nei, o te aroha o taua tatua nehenehe roa ra ïa.” O te parau anei aore ra te ohipa, e tia ia ravehia te mau mea atoa, “ma te iˈoa o te Fatu ra o Iesu, ma te haamaitai i te Atua ra i te Metua ia ˈna ra.”—3:1, 2, 11-14, 17; MN.

11. (a) Eaha te aˈoraa e horoahia no nia i te utuafare e te tahi atu mau taairaa? (b) Eaha te mau aroharaa e faataehia i te pae hopea?

¹¹ Mau taairaa e o vetahi ê (3:18–4:18). No nia i te mau taairaa fetii, ia auraro te mau vahine i ta ratou mau tane e ia here te mau tane i ta ratou mau vahine, ia faaroo te mau tamarii i te mau metua e eiaha te mau metua tane ia faariri atu i ta ratou mau tamarii. E tia i te mau tavini ia faaroo i to ratou mau fatu ma te mǎtaˈu ia Iehova, e e tia i te mau fatu ia ohipa e ta ratou mau tavini ma te tia. Ia tamau maite te taatoaraa i te pure e ia haere tamau noa ma te paari i mua i to rapaeau ra. Na Tuhiko e o Onesimo e faaite atu ia ratou i te mau parau atoa no  nia ia Paulo e to ˈna mau hoa rave ohipa no te Basileia o te Atua. E faatae ratou i te aroha i to Kolosa, e e aroha atoa Paulo i te mau taeae no Laodikea, a ani atu ai ia taio te tahi e te tahi i te rata ta ˈna i hapono atu. E papai Paulo i te hoê aroharaa hopea i to ˈna iho rima: “A haamanaˈo mai i te auri fifi i nia ia ˈu nei. Ei ia outou te aroha [rahi].”—4:18; MN.

FAUFAARAA

12. Eaha te mau parau mau tamahanahana ta te rata a Paulo i to Kolosa e horoa ra, e nafea te amuiraa e faufaahia ˈi i te reira?

¹² E taa ohie noa ia tatou e ua parare oioi roa te parau apî e ua tae mai na taeae e piti mai Roma mai, i roto i te mau taeae no Kolosa. Ma te ru, e putuputu ratou, peneiaˈe i te fare o Philemona, no te faaroo ia taiohia te rata a Paulo. (Philem. 2) Auê ïa mau parau mau tamahanahana ta teie rata i horoa mai no nia i te tiaraa mau o te Mesia e te faufaaraa ia noaa te ite mau! Mea papu mau â te faahoˈiraahia te mau philosophia a te taata e te mau tutuu ati Iuda i to ratou parahiraa mau, e te faateiteiraahia te hau e te parau a te Mesia! Ua riro mau â te reira ei maa no te feruriraa e no te mafatu no te feia atoa i roto i te amuiraa—te mau tiaau, te mau tane, te mau vahine, te mau metua tane, te mau tamarii, te mau fatu, te mau tavini. Papu maitai e ua fanaˈo Philemona e o Onesimo i te aˈoraa maitai, inaha ua fanaˈo faahou raua i te taairaa fatu e tavini. Auê ïa aratairaa maitai tei horoahia i te mau tiaau no te faatitiaifaro i te nǎnǎ i roto i te haapiiraa tia! Maoti te mau parau a Paulo, ua mauruuru roa ˈtu â to Kolosa i ta ratou hopoia taa ê e rave i te ohipa ma te nephe atoa mai te mea e e na Iehova! E poroi oraora noâ te aˈoraa faaitoito i to Kolosa no nia i te tiamâraa mai i te mau manaˈo o teie nei ao e ta ˈna mau peu o te faatîtî, no te amuiraa i teie nei mahana.—Kol. 1:9-11, 17, 18; 2:8; 3:15, 16, 18-25; 4:1.

13. Eaha te faaueraa a Paulo no nia i te mau parau au maitai, te pure, e te auhoaraa Kerisetiano?

¹³ Te horoahia ra te hoê aˈoraa maitai roa no te tavini Kerisetiano i roto i te Kolosa 4:6: “Ei parau mǎrû maitai anaˈe â ta outou, ia rapaauhia i te miti ra i te ite, ia ite outou i te mea tia ia parau atu i te taata atoa ra.” E anaanatae mai te feia mafatu tia i te mau parau mau au maitai, e e faufaa-maoro-hia ratou i te reira. Oia atoa, e hopoi mai te pure oraora a te Kerisetiano, ta ˈna e faahiti ma te aau mehara, i te mau haamaitairaa e rave rahi no ǒ mai ia Iehova ra: “E tamau maite i te pure, e faaitoito i te reira ma te haamaitai i te Atua.” Auê ïa oaoa e tamahanahanaraa faaitoito e itehia i roto i te auhoaraa Kerisetiano! “[A tamau noa] i te haapiiraa e te aˈoraa te tahi i te tahi,” o ta Paulo ïa e parau ra, “ma te [himene] i roto i to outou aau [ia Iehova].” (4:2; 3:16; MN) E ite outou e rave rahi atu â mau taoˈa faufaa o te haapiiraa maitai e te ohie ia faaohipa, ia faahohonu outou i te rata i to Kolosa.

14. (a) Eaha te mea mau e haamatarahia ra i roto i te Kolosa? (b) Nafea te tiaturiraa o te Basileia e haamatarahia ˈi?

¹⁴ No nia i te haapaoraa i te Ture, te na ô ra teie rata e: “E ata anaˈe ïa no te tupu a muri aˈe; area te mea mau ra [tei] te Mesia [ïa].” (2:17; MN) O teie mea mau a te Mesia te haamatarahia ra i roto i te Kolosa. Te faahiti pinepine ra te rata i te tiaturiraa hanahana i haapaohia i nia i te raˈi no te feia i hoê e te Mesia ra. (1:5, 27; 3:4) E nehenehe teie feia e mauruuru roa i te mea e ua faatiamâ ê na te Metua ia ratou i te mana o te pouri no te hopoi ia ratou i roto “i te basileia o [te] Tamaiti o [to ˈna] here.” Ua auraro ïa ratou i Tei riro ei ‘huru mau o te Atua hiˈo-ore-hia, [te matahiapo o] te mau mea atoa i hamanihia ra: [na roto] hoi [ia ˈna] i hamanihia ˈi te mau mea atoa nei, o to te raˈi, e to te fenua nei, o tei itea ia hiˈo ra e tei ore i itea, te feia terono, e te feia hau, te hui arii, e te feia mana.’ O Oia te tia roa ia faatere ma te parau-tia i roto i te Basileia o te Atua. Teie ïa te aˈoraa a Paulo i te mau Kerisetiano faatavaihia: “E tena na, ua faatiahia outou i nia e te Mesia atoa ra, e titau i te mau mea i nia ra, i te vahi e parahihia e te Mesia i te rima atau o te Atua ra.”—1:12-16; 3:1; MN.

[Nota i raro i te api]

[Uiraa haapiiraa]