Buka Bibilia numera 56—Tito

Taata Papai: Paulo

Vahi papairaa: Makedonia (?)

Otiraa te papai: area 61-64 T.T.

1. (a) Eaha te ohipa i anihia ia Tito? (b) Eaha te mau huru tupuraa i te haamataraa mai te mau amuiraa no Kereta, e eaha te mau tutavaraa i titauhia i te mau Kerisetiano no Kereta ia rave?

 “PAULO, e tavini no te Atua, e e aposetolo hoi na Iesu Mesia . . . ia Tito, i tau tamaiti mau i te [faaroo hoê] nei.” (Tito 1:1, 4; MN) Mea na reira te haamataraa te rata a Paulo i to ˈna hoa ohipa e apiti mai mua mai â, o Tito, ta ˈna i vaiiho i te motu no Kereta, no te faanahonaho maitai atu â i te mau amuiraa. E hopoia rahi mau teie no Tito. No teie motu tei parauhia e i noho na “te metua o te mau atua e o te taata” i reira, teie maseli “e faakereta i te hoê taata no Kereta” oia hoi te auraa “e haavare atu i te taata haavare.” * Ua tui te roo o te huru haavare o teie nunaa, no reira Paulo i faahiti ai i te parau a to ratou iho peropheta i na ô e: “E haavare â to Kereta eita e faaea, e puaa ino, e arapoa rahi faatau ïa.” (1:12) I te tau o Paulo, ua faataa-atoa-hia to Kereta mai teie: “E feia papu ore to Kereta, te haavarevare, e te faatupu peapea. E faito taa ê to to ratou nounou taoˈa, ta ratou peu faufau, to ratou haavarevare, e mea inu hua ratou i te ava; e au ra e tei mua roa ˈtu â te mau ati Iuda e noho ra i rotopu i to te motu, ia ratou i te pae o te peu morare tia ore.” * I roto ïa i teie huru tupuraa to te mau amuiraa no Kereta haamataraa mai; e no reira, mea titau-mau-hia i te feia faaroo ‘ia haapae i te paieti ore, e te hinaaro i teie nei ao, e ia parahi ma te haapao maitai, e te parau-tia, e te paieti,’ mai ta Paulo i faaitoito.—2:12.

2, 3. (a) Eaha te huru tahoêraa o Tito e o Paulo? (b) Maihea mai paha to Paulo papairaa ˈtu ia Tito, e no teihea tumu?

² I roto iho i te Tito, mea iti roa te mau haamaramaramaraa no nia i te tahoêraa o Paulo e o Tito. E noaa mai râ te tahi mau haamaramaramaraa i roto i te mau faahitiraa ia Tito, i roto i te tahi atu mau rata a Paulo. E Heleni o Tito e ua apee pinepine oia ia Paulo, e hoê aˈe taime to ˈna haereraa na muri ia ˈna i Ierusalema. (Gal. 2:1-5) E faahiti Paulo ia ˈna mai ‘to ˈu hoa e tauturu.’ O Tito ta Paulo i tono atu i  Korinetia, i muri aˈe i to ˈna papairaa i ta ˈna rata matamua i to Korinetia, mai Ephesia ˈtu. A parahi ai oia i Korinetia, ua haapao Tito i te ohiraa faufaa no te mau taeae no Ierusalema, e i muri aˈe ua hoˈi faahou atu oia, ia au i te faaueraa a Paulo, e faaoti roa i te reira. I to ˈna tere hoˈiraa i Korinetia, i muri aˈe i to ˈna farereiraa ia Paulo i Makedonia, to Tito afairaa ˈtu i te piti o te rata a Paulo i to Korinetia.—Kor. 2, 8:16-24; 2:13; 7:5-7.

³ I to ˈna tuuraahia i to ˈna tapearaa matamua i Roma, ua tahoê faahou â Paulo e o Timoteo e o Tito no te mau matahiti hopea o ta ˈna taviniraa. Te manaˈohia ra e i taua atoa area ra te raveraahia te taviniraa i Kereta, Heleni, e Makedonia. I te pae hopea, te parauhia ra e te haere ra Paulo i Nikopoli, i Heleni apatoerau tooa o te râ, i reira paha to ˈna haruraahia e hopoiraahia i Roma no to ˈna tapearaa hopea e to ˈna haapoheraa. Tei to ˈna tereraa ˈtu i Kereta to Paulo vaiihoraa ˈtu ia Tito i reira no te “faatitiaifaro i te mau mea hape, te faatoroa i te mau matahiapo i tera e tera oire,” ia au i ta ˈna i faaue ia Tito. E au ra e ua papai Paulo i teie rata i Makedonia, i muri noa ˈˈe i to ˈna vaiihoraa ˈtu ia Tito i Kereta. (Tito 1:5, MN; 3:12; Tim. 1, 1:3; Tim. 2, 4:13, 20) E au ra e hoê â tumu e te Timoteo Hoê i papaihia ˈi teie rata, oia hoi te faaitoitoraa i te hoa ohipa o Paulo e te patururaa i to ˈna mana ia amo oia i ta ˈna mau hopoia.

4. Anafea ra to Paulo papairaa i te rata ia Tito, e eaha te haapapuraa e e parau mau teie?

⁴ Ua papai paha Paulo i teie rata i te area taime i rotopu i te matamua e te piti o to ˈna tapearaa i Roma, aore ra i te area 61 e 64 T.T. Hoê â mau haapapuraa e e parau mau te rata ia Tito e to te mau rata no taua anotau atoa ra i faataehia ia Timoteo, mea pinepine hoi na buka Bibilia e toru i te parauhia “te mau rata a te tiai mamoe” a Paulo. Hoê â te huru papairaa. Ua faahiti o Irénée e o Origène i te rata ia Tito, e ua haapapu atoa e rave rahi atu â feia mana no tahito ra e e au te buka i te canon. Tei roto oia i te mau Papai Sinaiticus e Alexandrinus. I te Vairaa buka John Rylands, te vai ra te hoê tâpû papyrus, te P³², e api codex, no te area senekele 3 T.T. o te Tito 1:11-15 e te 2:3-8 tei papaihia i nia iho. * Aita ˈtura ïa e feaaraa e e tuhaa mau te buka no te mau Papai faauruahia.

TUMU PARAU O TE TITO

5. (a) Eaha te mau mea e titauhia i te mau tiaau ta Paulo e haamatara ra, e no te aha e mea hinaarohia? (b) No te aha e tia ˈi ia Tito ia aˈo uˈana, e eaha tei parauhia no te feia viivii?

⁵ Ia aˈo te mau tiaau na roto i te haapiiraa ora (1:1-16). I muri aˈe i te hoê aroharaa î i te here, e faataa Paulo i te mau mea e titauhia i te mau tiaau. Te haapapuhia ra e e tia i te hoê tiaau ia riro ei “taata hapa ore,” ei hoa o te maitai, ei taata parau-tia, e te taiva ore, o te “tapea maite hoi i te parau mau i haapiihia ˈtu ia ˈna ra, ia tia ia ˈna ia haapii i te parau ora, e ia faaite atu i te hapa a te feia e patoi maira.” Mea hinaarohia te reira inaha, te taviri ra te feia “haavare [i te feruriraa]” i te mau fetii taatoa, ia noaa te taoˈa tia ore ra. No reira, e tia ia Tito ia ‘aˈo uˈana ˈtu ia ratou, ia tia to ratou faaroo, e eiaha e haapao i te mau fabula ati Iuda.’ E parau hua paha te feia viivii e ua ite ratou i te Atua, te taiva nei râ ratou ia ˈna na roto i ta ratou mau ohipa faaroo ore.—1:6-10, 13, 14; MN.

6. Eaha te mau aˈoraa e horoahia no nia i te haerea Kerisetiano?

⁶ Te oraraa ma te haapao maitai, te parau-tia, e te paieti (2:1–3:15). Ia haapao maitai te mau tane paari e te mau vahine paari, e ia faatura ratou i te Atua. E tia i te mau vahine apî ia here i ta ratou mau tane e ta ratou mau tamarii, e ia auraro i ta ratou mau tane “ia ore ia faainohia te parau a te Atua.” Ia riro te mau tane apî ei hiˈoraa i te pae no te mau ohipa maitatai e te parau viivii ore. Ia faaite te mau tavini auraro i te “haapao maitai roa.” Ua faaitehia mai te maitai rahi o te Atua, o te aratai i te ora, e te faaitoito i te haapao maitai, te parau-tia, e te paieti, i roto i te feia ta te Atua i tamâ na roto i te Mesia ra o Iesu, ia riro ratou “ei taata mau no ˈna iho, e te itoito i te mau ohipa maitatai ra.”—2:5, 10, 14.

7. Eaha ta Paulo e haapapu no nia i te auraroraa, te faaoraraa, e te mau ohipa maitatai?

⁷ E haapapu Paulo i te faufaaraa ia auraro e ia faatura i te mau hau faatere e ‘ia mǎrû i te taata atoa ra.’ I mutaa ihora, e feia iino o Paulo e to ˈna mau hoa Kerisetiano mai te tahi atu mau taata. E ere râ no ta ratou iho mau ohipa i rave, no te maitai râ o te Atua, to ˈna here, e to ˈna aroha hamani maitai i faaorahia ˈi ratou e te varua moˈa e i riro ai ratou ei feia tufaa i te tiaturiraa o te ora mure ore. No reira, e tia i te feia e tiaturi nei i te Atua ia feruri noa i te “rave tamau maite i te mau ohipa maitatai.” Ia haapae ratou i te mau uiui rii maamaa ra, e te tamaˈi i nia i te Ture, e te taata e faatupu i te pǔpǔ faaroo, ia faataa ê ïa ratou ia ˈna i muri aˈe i te hoê e te piti o te aˈoraa. E ani Paulo ia Tito e haere mai ia ˈna ra i Nikopoli e, i muri aˈe i to ˈna horoaraa ˈtu i te tahi atu mau aˈoraa no te taviniraa mitionare, e haapapu faahou â oia i te faufaaraa ia rave i te mau ohipa maitatai, eiaha hoi ia hotu ore.—3:2, 7, 8.

FAUFAARAA

8. Eaha te ‘mea maitai e te faufaa’ i roto i te mau aˈoraa a Paulo i roto i te rata ia Tito, no tatou i teie mahana, e no te aha?

⁸ Te ora ra te mau Kerisetiano no Kereta ma te haaatihia e te haavare, te viivii, e te nounou taoˈa. E pee noa anei ratou i te taata? Aore ra e rave anei ratou i te hoê tiaraa papu no te faataa ê roa mai ia ratou e no te tavini mai te hoê nunaa i haamoˈahia no te Atua ra o Iehova? Ei faaiteraa na roto ia Tito e e tia i to Kereta ia feruri noa i te “rave tamau maite i te  mau ohipa maitatai,” ua parau Paulo e: “O te mea maitai hoi te reira e [faufaahia ˈi] hoi te taata nei.” E ‘mea maitai e te faufaa’ atoa i teie nei mahana, i roto i te hoê ao i topa i roto i te vari o te haavare e te mau peu tia ore, ia “haapii” te mau Kerisetiano mau “i te rave i te mau ohipa maitatai,” ia hotu ratou i roto i te taviniraa a te Atua. (3:8, 14; MN) Te mau faahaparaa atoa a Paulo i te peu morare tia ore e te ino tei haamǎtaˈu i te mau amuiraa no Kereta, e faaararaa ïa no tatou i teie nei, ‘i te faaiteraa mai te [maitai rahi] o te Atua ia tatou e, e haapae tatou i te paieti ore, e te hinaaro i teie nei ao, e ia parahi tatou ma te haapao maitai, e te parau-tia, e te paieti, i teie nei [faanahoraa o te mau mea].’ E tia atoa i te mau Kerisetiano “[ia ineine no] te mau ohipa maitatai atoa ra” i te auraroraa i te mau hau faatere, e te tapearaa i te hoê manaˈo haava maitai.—2:11, 12; 3:1; MN.

9. Nafea te haapapuraahia te faufaa o te haapiiraa tano mau, ei hopoia iho â râ a te tiaau?

⁹ E tuea noa te Tito 1:5-9 e te Timoteo 1, 3:2-7 i te faaiteraa eaha ta te varua moˈa e titau ra i te mau tiaau. Te haamatara ra te reira e e tia i te tiaau ia ‘tapea maite i te parau mau’ e ia riro ei orometua haapii i roto i te amuiraa. Mea faufaa mau â te reira no te aratai i te taatoaraa i te paariraa ra! Oia mau, mea pinepine teie titauraa e horoa i te haapiiraa tano mau i te faahitihia i roto i te rata ia Tito. E faaitoito Paulo ia Tito ia ‘parau i te parau e au i te parau maitai.’ Ia riro te mau vahine paari ‘ei feia haapii i te parau maitai,’ e te mau tavini ra, ‘ia nehenehe te parau a to ratou Faaora ra, te Atua, ia ratou i te mau mea atoa ra.’ (Tito 1:9; 2:1, 3, 10) Ma te haapapu i te faufaaraa no Tito, ei tiaau, ia tapea maite e ia ore e mǎtaˈu i roto i ta ˈna haapiiraa, e parau Paulo e: “E parau oe i taua mau parau nei, e aˈo hua ˈtu, e faaite hua ˈtu, ei parau tumu ïa.” No te ore râ e faaroo, e parau oia e: “E aˈo uˈana ˈtu oe ia ratou, ia tia to ratou faaroo.” Ua riro mau ïa te rata a Paulo ia Tito ei “mea maitai ei haapiiraa, ei faahaparaa, ei faatitiaifaroraa i te mau mea, ei aˈoraa ma te parau-tia.”—Tito 2:15; 1:13; Tim. 2, 3:16.

10. Nafea te rata ia Tito e faaitoito ai ia tatou, e eaha te tiaturiraa oaoa ta teie rata e faatupu?

¹⁰ E faatupu te rata ia Tito i to tatou mauruuru no te maitai rahi o te Atua e e faaitoito atoa mai ia faarue i te huru paieti ore o teie nei ao, ‘a hiˈo noa ˈi tatou i taua maitai e tiaihia nei e te faraa mai hanahana o te Atua rahi ra e o to tatou Faaora ra o te Mesia ra o Iesu.’ Ia na reira ratou, e nehenehe te feia i tiahia na roto i te Mesia ra ia Iesu, e riro mai “ei feia tufaa . . . i te ora mure ore” i roto i te Basileia o te Atua.—Tito 2:13; 3:7.

[Nota i raro i te api]

[Uiraa haapiiraa]