Buka Bibilia numera 57—Philemona

Taata papai: Paulo

Vahi papairaa: Roma

Otiraa te papai: area 60-61 T.T.

1. Eaha te tahi o te mau huru taa ê o te rata ia Philemona?

 MEA faufaa roa teie rata au mau e te î i te here a Paulo no te mau Kerisetiano i teie nei tau. E ere noa o te episetole poto roa ˈˈe i papaihia e te rima iho o “te aposetolo [no] te Etene” tei paruruhia, i roto râ i te taatoaraa o te Bibilia, o te Ioane Piti e te Toru anaˈe tei iti aˈe te parau i roto. Oia atoa, o teie anaˈe te rata ta Paulo i papai “i te hoê taata,” aita hoi i faataehia ˈtu na te hoê amuiraa aore ra te hoê tiaau nominohia, na te hoê râ taata taa ê, no nia i te hoê fifi taa ê ta Paulo i hinaaro e tauaparau e teie taeae Kerisetiano, o Philemona, te hoê taeae huru navai e noho ra i te oire Pherugia o Kolosa, i ropu ia Asia Iti.—Roma 11:13; MN.

2. Ua papaihia te rata ia Philemona i roto i teihea huru tupuraa e no teihea fa?

² Mea papu maitai te fa o teie rata: I to ˈna tapearaa matamua i Roma (59-61 T.T.), e tiamâraa rahi to Paulo e poro i te Basileia o te Atua. I roto i te feia i faaroo i ta ˈna pororaa, te vai ra o Onesimo, te hoê tavini tei horo ê i te fare o Philemona, to Paulo hoa. Ua riro mai Onesimo ei Kerisetiano, e ua faaoti Paulo, ma te fariihia e Onesimo, e faahoˈi ia ˈna ia Philemona ra. Tei taua taime atoa ra to Paulo papairaa i ta ˈna mau rata i te mau amuiraa no Ephesia e no Kolosa. I roto i na rata e piti, ua horoa oia i te mau aˈoraa maitatai na te mau tavini Kerisetiano, e te mau fatu tavini atoa, no nia i te haerea e au ia peehia i roto i teie  huru auraa. (Eph. 6:5-9; Kol. 3:22–4:1) Na mua roa ˈˈe râ, ua papai Paulo i te hoê rata ia Philemona, i reira to ˈna iho taparuparuraa no Onesimo. E rata teie ta to ˈna iho rima i papai—e ere hoi i te peu matauhia e Paulo. (Philem. 19) Ua haapuai rahi atu â te reira i ta ˈna taparuraa.

3. Anafea ra paha te rata ia Philemona i te papairaahia, e na vai te reira i afai?

³ Papu mau e ua papaihia teie rata i te area 60-61 T.T., e au ra hoi e ua navai i te maoro to Paulo pororaa i Roma no te faariro i te tahi taata ei pǐpǐ. Oia atoa, no te mea te faaite ra oia i roto i te irava 22 e te tiaturi ra oia e e tuuhia oia, e nehenehe tatou e faaoti e maa taime aˈena to ˈna mauraa i te fare tapearaa a papai ai oia i teie rata. Te itehia ra ïa e na Tuhiko e na Onesimo i afai atu i teie na rata e toru, hoê na Philemona e ta te mau amuiraa no Ephesia e no Kolosa.—Eph. 6:21, 22; Kol. 4:7-9.

4. Eaha te haapapuraa no nia i te taata papai, e e parau mau te Philemona?

⁴ E ite-papu-hia e na Paulo i papai i te Philemona i roto i te irava matamua, ua faahiti-roa-hia hoi to ˈna iˈoa. Ua fariihia te reira e Origène e o Tertullien. * Te turu-atoa-hia ra e e parau mau te rata no te mea ua tabulahia i roto i te Canon de Muratori no te senekele 2 T.T. e te tahi atoa mau episetole a Paulo.

TUMU PARAU O TE PHILEMONA

5. (a) E haamata te rata na roto i teihea aroharaa e teihea haapopouraa? (b) Eaha ta Paulo e parau ia Philemona no nia i ta ˈna tavini o Onesimo?

⁵ Faahoˈihia Onesimo i to ˈna fatu ra ei ‘hau atu i te tavini’ (Mau ir. 1-25). E faatae Paulo i to ˈna aroha ia Philemona, ia Apephia “to tatou tuahine,” ia Arehipo ‘to tatou taetaeae aito,’ e i te amuiraa i roto i te fare o Philemona. E haapopou oia ia Philemona (“Tei î i te here,” o te auraa ïa o to ˈna iˈoa) no to ˈna here e to ˈna faaroo i te Fatu ra ia Iesu e i te feia moˈa. Ua faaoaoa e ua haamahanahana rahi te mau faataaraa no nia i to Philemona here, ia Paulo. Ei taata paari tei tapeahia, e faaite Paulo i teie nei i to ˈna manaˈo ma te huna ore no nia i ta ˈna “tamaiti” o Onesimo, ta ˈna “i fanau” a tapeahia ˈi oia. Mea faufaa ore na o Onesimo (O “Faufaa” hoi te auraa o to ˈna iˈoa) no Philemona, i teie nei râ, mea faufaa oia no Philemona e no Paulo atoa.—Mau ir. 2, MN, 10.

6. E ani Paulo ia nafea i te farii ia Onesimo, e eaha te haaferuriraa tano maitai ta ˈna e faaohipa?

⁶ Te hinaaro ra Paulo e tapea mai ia Onesimo no te tauturu ia ˈna i roto i te fare tapearaa, eita râ oia e na reira ia ore e fariihia e Philemona. No reira, te faahoˈi nei oia ia ˈna “eiaha râ ei tavini, ia hau atu râ oia i te tavini, ei taeae here ra.” E ani Paulo ia farii-maitai-hia Onesimo, mai te mea ra e o oia iho tera. Mai te peu e ua erehia Philemona ia Onesimo, ia tuuhia ïa te reira i nia ia Paulo, no te mea, o ta ˈna ïa e parau ia Philemona, “E amutarahu oe na ˈu ia oe iho na.” (Mau ir. 16, 19) E tiaturi Paulo e fatata oia i te tuuhia e haere atu ai paha oia e hiˈo ia Philemona, e e faaoti oia na roto i te mau aroharaa.

FAUFAARAA

7. No nia ia Onesimo, nafea to Paulo faaiteraa e te haapao maitai ra oia i to ˈna parauraahia teitei ei aposetolo?

⁷ Mai ta teie rata e faaite ra, aita Paulo e poro ra i te hoê “evanelia totiale,” a tamata ˈi i te faaore i te faanahoraa o te mau mea e vai ra e te mau ohipa ta ˈna i haamau, mai te faatîtîraa. Aita oia i faatiamâ, mai ta ˈna i hinaaro, i te mau tavini Kerisetiano, ua faahoˈi râ oia ia Onesimo, te tavini i horo ê, i to ˈna fatu ra ia Philemona, no te hoê tere tei hau atu i te 1 400 kilometera mai Roma i Kolosa. Ua haapao maitai ïa Paulo i to ˈna parauraahia teitei ei aposetolo, ma te pee maite i te ohipa ta te Atua i horoa mai na ˈna ‘e parau i te basileia o te Atua, e e haapii i te mau parau o te Fatu ra o Iesu Mesia.’—Ohi. 28:31; Philem. 8, 9.

8. Eaha te faaohiparaa ohie i te mau faaueraa tumu Kerisetiano ta te Philemona e faaite ra?

⁸ Te faaite ra te rata ia Philemona i te here e te tahoêraa e vai ra i rotopu i te mau Kerisetiano o te senekele matamua. Te ite ra tatou e, e pii na te mau Kerisetiano matamua ratou ratou iho “taeae” e “tuahine.” (Philem. 2, MN, 20) Hau atu â, te faaite ra oia i te mau Kerisetiano no teie tau nafea mau ia faaohipa i te mau faaueraa tumu Kerisetiano i rotopu i te mau taeae Kerisetiano. No nia ia Paulo, te ite ra tatou i te tapao o to ˈna here i te mau taeae, to ˈna faatura i te mau taairaa e te taata e i ta vetahi ê faufaa, te faatano-maitai-raa i te parau, e te haehaa e tia ia haapopouhia. Maoti i te tamata i te faahepo ia Philemona ia faaore i te hapa a Onesimo na roto i te faaohiparaa i to ˈna mana tiaau aratai o te amuiraa Kerisetiano, ua taparu haehaa Paulo ia ˈna ia au i te here Kerisetiano e to raua auhoaraa. E nehenehe te mau tiaau i teie tau e faufaahia i te huru tano maitai ta Paulo i faaohipa no te paraparau atu ia Philemona.

9. Na roto i te fariiraa i te aniraa a Paulo, eaha te hiˈoraa maitai ta Philemona i horoa mai no te mau Kerisetiano i teie tau?

⁹ Ua papu iho â ia Paulo e e farii Philemona i ta ˈna aniraa, e ia na reira mau Philemona, ua haapao ïa oia i ta Iesu i parau i roto i te Mataio 6:14 e ta Paulo i parau i roto i te Ephesia 4:32. Te hinaaro-atoa-hia ra ia faaite te mau Kerisetiano i teie tau i te maitai e ia faaore ratou i te mau hapa a te mau taeae. Mai te peu e ua noaa ia Philemona i te faaore i te hapa a te hoê tavini o oia iho te fatu e e tiaraa to ˈna e rave ino ia ˈna mai ta ˈna i hinaaro, e nehenehe atoa ïa te mau Kerisetiano i teie tau e faaore i te hapa a te hoê taeae—mea ohie roa ˈˈe hoi te reira.

10. Nafea te ohiparaa a te varua o Iehova e ite-papu-hia ˈi i roto i te rata ia Philemona?

¹⁰ Mea papu roa e ua ohipa te varua o Iehova i nia i teie rata ia Philemona. E ite-maitai-hia te reira i  roto i te aravihi o Paulo i te faatitiaifaroraa i te hoê fifi taa ê mau. E ite-papu-hia te reira i roto i te manaˈo maitai, te here, e te tiaturi i te hoê hoa Kerisetiano ta Paulo i faaite. E itehia te reira no te mea te haapii ra te rata ia Philemona, mai te tahi atoa mau Papai, i te mau faaueraa tumu Kerisetiano, te faaitoito ra i te tahoêraa Kerisetiano, e te arue ra i te here e te faaroo e vai rahi ra i roto i “te feia moˈa,” o te tiaturi i te Basileia o te Atua e te faaite i te maitai rahi o Iehova i roto i to ratou haerea.—Ir. 5.

[Nota i raro i te api]

[Uiraa haapiiraa]