Buka Bibilia numera 66—Apokalupo
Buka Bibilia numera 66—Apokalupo
Taata papai: Aposetolo Ioane
Vahi papairaa: Patamo
Otiraa te papai: area 96 T.T.
1. (a) No nia i te mau taipe o te Apokalupo, eaha ta te mau tavini a te Atua e farii? (b) No te aha e tano ai ia tuuhia te Apokalupo i te hopea roa o te Bibilia?
UA PAPAIHIA anei te mau taipe o te Apokalupo no te faariaria i te taata? Aita roa ˈtu! E nehenehe te tupuraa o te parau tohu e haamehameha i te feia iino, area te mau tavini haapao maitai a te Atua ra, e farii ïa i te omuaraa parau i faauruahia e te parau hopea a te melahi e: “E ao to ˈna to te taio, e to te feia e faaroo i teie nei parau tohu.” “E ao to te haapao i te mau parau tohu i roto i teie nei buka.” (Apo. 1:3; 22:7) Noa ˈtu e ua papaihia te Apokalupo na mua ˈˈe i te tahi atu na buka faauruahia e maha a Ioane, ua tano iho â ia tuuhia oia i te hopea roa o na buka faauruahia e 66 o ta tatou Bibilia, no te mea e faahaere te Apokalupo i te feia taio i mua roa i roto i te tau, maoti te hoê orama rahi no nia i te opuaraa a te Atua no te huitaata nei, e e aratai te reira i te tupuraa hanahana o te tumu parau rahi o te Bibilia, oia te haamoˈaraa i te iˈoa o Iehova e te faatiaraa i to ˈna mana arii na roto i te Basileia a te Mesia, te Huero i tǎpǔhia mai.
2. Nafea to te Apokalupo taeraa mai ia Ioane ra, e no te aha te upoo parau o te buka e tano maitai ai?
2 Ia au i te irava matamua, o “te apokalupo [faaiteraa] a Iesu Mesia, ta te Atua i tuu mai ia ˈna ra” teie. “E ua tono maira oia i tana melahi, e ua faaite maira i to ˈna nei tavini ia Ioane [na roto i te mau tapao].” E taata papai noa ïa Ioane, eiaha râ te tumu o teie mau parau. E ere ïa o Ioane te taata faaite, e e ere atoa te buka i te hoê faaiteraa a Ioane. (1:1; MN) Ua tano maitai te upoo parau o teie buka, e heheuraa hoi teie o te mau opuaraa faahiahia a te Atua no a muri aˈe, i Ta ˈna tavini, no te mea te auraa o te parau Heleni ra A·po·kaʹly·psis (Apokalupo), e “Faaiteraa” ïa aore ra “Heheuraa.”
3. Ia au i te Apokalupo iho, o vai te taata papai ra o Ioane, e nafea te feia tuatapapa no tahito ra e haapapu ai i te reira?
3 O vai teie Ioane ta te pene matamua e faahiti ra mai te taata papai i te Apokalupo? Te faaitehia maira e e tavini oia no Iesu Mesia, e e taeae o te roo-atoa-hia ra i te ati, e ua hopoi-ê-hia oia i nia i te motu no Patamo. Mea papu roa e mea matau-maitai-hia oia e to ˈna feia taio matamua, aita ïa e faufaa ia faataa hau atu â oia o vai oia. O te aposetolo Ioane iho â paha ïa. Te haapapuhia ra te reira e te rahiraa o te feia tuatapapa no tahito ra. No Papias, o tei papai i te tuhaa matamua o te senekele 2 T.T., na te hoê aposetolo i papai i teie buka. Te na ô ra o Justin, no te piti o te senekele, i roto i ta ˈna “Dialogue avec Tryphon” (81) e: “Ei ia matou ra te hoê taata, o Ioane te iˈoa, hoê o te mau aposetolo a te Mesia, o tei tohu i roto i te Apokalupo i tuuhia mai ia ˈna ra.” * Te haapapu ra Irénée e o te aposetolo Ioane te taata papai, o Clément no Alesanederia e o Tertullien atoa, no te hopea o te senekele 2 e te omuaraa o te senekele 3. Teie ta Origène, aivanaa Bibilia tuiroo no te senekele 3, i parau: “Eaha te parau no nia i tei turui i nia i te ouma o Iesu, no nia ia Ioane, o tei vaiiho mai i te hoê Evanelia, . . . e tei papai atoa i te Apokalupo.” *
4. (a) No te aha e taa ê ai te huru papai o te Apokalupo i to te tahi atu mau papai a Ioane? (b) Na te aha e haapapu e e tuhaa mau te Apokalupo no te mau Papai faauruahia?
4 E ere no te mea e te faahiti rahi ra te tahi atu mau papai a Ioane i te here, eita ïa ta ˈna e nehenehe e papai i teie buka puai mau e te itoito o te Apokalupo. O raua hoi to ˈna taeae ra o Iakobo tei riri roa i te mau ati Samaria no te hoê oire a hinaaro roa ˈi raua e parau i te auahi no te raˈi ia mairi mai. No reira raua i piihia ˈi o “Boanere,” oia hoi “tamarii a te patiri.” (Mar. 3:17; Luka 9:54) Eiaha te taa-ê-raa o te huru papai e haafifi ia tatou, ia haamanaˈo râ tatou e mea taa ê roa te tumu parau o te Apokalupo. E ere roa ˈtu te mau mea ta Ioane i ite i roto i teie mau orama mai te tahi atu mau mea ta ˈna i ite na mua ˈtu. E haapapu te au-maite-raa teie buka e te toea o te mau Papai parau tohu, ma te feaaraa ore e to roto mau oia i te Parau faauruahia a te Atua.
5. Afea to Ioane papairaa i te Apokalupo, e i roto i teihea mau huru tupuraa?
5 Ia au i te mau faaiteraa matamua, ua papai Ioane i te Apokalupo i te area 96 T.T., fatata e 26 matahiti i muri aˈe i te haamouraa o Ierusalema. Tei te pae hopea ïa o te faatereraa a te Emepera Domitien. Ei haapapuraa, i roto i ta ˈna buka “Contre les Hérésies” (V, 30, 3), te na ô ra Irénée no nia i te Apokalupo e: “Aita i maoro aˈenei te iteraahia, ua fatata râ i to tatou nei tau, i te pae hopea o te faatereraa a Domitien.” * Te farii ra Eusèbe e o Jérôme atoa i teie faaiteraa. E taeae o Domitien no Titus, tei aratai i te mau nuu Roma e haamou ia Ierusalema. Ua riro mai oia ei emepera i te poheraa o Titus, 15 matahiti hou te buka Apokalupo a papaihia ˈi. Ua titau oia e ia haamorihia oia ei atua e ua rave oia i te tiaraa Dominus ac Deus noster (oia hoi “To matou Fatu e Atua”). * Aita te haamoriraa i te Emepera i haapeapea noa ˈˈe i te feia e haamori ra i te mau atua haavare, eita roa ˈtu râ te mau Kerisetiano matamua e nehenehe e rave i te reira, e aita ratou i hinaaro e ruri ê i to ratou faaroo ei taua peu ra. No reira, i te pae hopea o te faatereraa a Domitien (81-96 T.T.), te mau Kerisetiano i roohia ˈi i te hamani-ino-raa uˈana. Te manaˈohia ra e na Domitien i hopoi tîtî ia Ioane i Patamo. I to Domitien haapoheraahia i te matahiti 96 T.T., ua monohia oia e te emepera mǎrû aˈe o Nerva, papu mau e na ˈna i tuu ia Ioane. I te tau a tapeahia ˈi oia i Patamo to Ioane iteraa i te mau orama ta ˈna i papai.
6. Nafea tatou e hiˈo ai i te buka Apokalupo, e nafea e vahi ai i te buka?
6 E tia ia papu maitai ia tatou e, e ere te mau mea ta Ioane i ite e i faauehia ia papai atu i te mau amuiraa, i te tahi noa mau orama tuea ore te tahi i te tahi, tei papai-haere-noa-hia. Mai te omuaraa e tae noa ˈtu i te hopea, na roto i tera e tera orama, te horoa maira te buka Apokalupo, i te hoê hohoˈa nahonaho maitai o te mau mea e tupu a muri aˈe, e i te hopea o te mau orama, o te heheuraa taatoa ïa i te mau opuaraa a te Basileia o te Atua. E tia ïa ia tatou ia hiˈo i te buka Apokalupo mai te hoê taatoaraa e tuea maitai to ˈna mau tuhaa, o te aratai ia tatou mai te tau o Ioane e tae roa ˈtu i te tau a muri atu. I muri aˈe i ta ˈna omuaraa parau (Apo. 1:1-9), e nehenehe te buka e vahihia na roto 16 orama: (1) 1:10–3:22; (2) 4:1–5:14; (3) 6:1-17; (4) 7:1-17; (5) 8:1–9:21; (6) 10:1–11:19; (7) 12:1-17; (8) 13:1-18; (9) 14:1-20; (10) 15:1–16:21; (11) 17:1-18; (12) 18:1–19:10; (13) 19:11-21; (14) 20:1-10; (15) 20:11–21:8; (16) 21:9–22:5. E hope teie mau orama na roto i te hoê faaotiraa faaitoito mau, i reira Iehova, Iesu, te melahi, e o Ioane e paraparau paatoa ˈi, na ratou ïa ei feia faahiahia roa ˈˈe o te ravea faataeraa poroi, te tuhaa hopea e rave.—22:6-21.
TUMU PARAU O TE APOKALUPO
7. Ia au ia Ioane, nohea mai te Apokalupo, e eaha ta ˈna e parau ra e te roo-atoa-hia ra oia e te mau melo o na amuiraa e hitu?
7 Omuaraa parau (1:1-9). E faataa Ioane e na te Atua te faaiteraa e tuu mai na roto i te arai o te melahi, e e paraparau atu ai oia i na amuiraa e hitu i roto i te mataeinaa no Asia. Ua faariro Iesu Mesia ia ratou “ei arii anaˈe, e ei tahuˈa na te Atua i to ˈna ra Metua,” te Atua ra o Iehova, te Mana hope. E haamanaˈo Ioane ia ratou e te roo-atoa-hia ra oia “i te ati, i te basileia e te faaoromai o Iesu,” e o ratou, inaha te tapea-tîtî-hia ra oia i Patamo.—1:6, 9.
8. (a) Eaha te faauehia ia Ioane ia rave? (b) O vai ta ˈna e ite i rotopu i te mau lamepa, e eaha Ta ˈna e faataa mai?
8 Mau poroi i na amuiraa e hitu (1:10–3:22). Ia haamata te orama matamua, maoti te faauruaraa, e tae Ioane i te mahana o te Fatu ra. E faaue te hoê reo rahi e au i te oto pu ra ia ˈna ia papai i nia i te hoê otaro i te mea ta ˈna e ite ra e ia hapono atu i na amuiraa e hitu, i Ephesia, Semurina, Peregamo, Tuatira, Saradi, Philadelephia e i Laodikea. Ia fariu atu oia i nia i taua reo ra, e ite Ioane i “te hoê mai te Tamaiti o te taata te huru” i rotopu e hitu lamepa, e tapea ra e hitu fetia i roto i to ˈna rima atau. E parau mai Oia e o o ˈna “te matamehai e te faahopea,” Tei pohe e o te ora nei i teie nei e a muri noa ˈtu, e tei ia ˈna te taviri o te pohe e o Hade. O Iesu Mesia ïa tei faatiahia mai. E faataa oia e: “Na fetia e hitu nei, oia na melahi a te mau [amuiraa] e hitu ra: e na lamepa e hitu ta oe e hiˈo nei, oia na [amuiraa] e hitu ra.”—1:13, 17, 20; MN.
9. Eaha te mau haapopouraa e te mau aˈoraa e horoahia i te mau amuiraa no Ephesia, Semurina, Peregamo, e no Tuatira?
9 E faauehia Ioane e papai i te melahi o te amuiraa no Ephesia tei faarue i to ˈna here matamua noa ˈtu ta ˈna ohipa, to ˈna faaoromai, e to ˈna au ore i te feia iino, e te tia ia tatarahapa e ia rave i te mau ohipa matamua. E parauhia te amuiraa no Semurina e, noa ˈtu te ati e te veve, e taoˈa rahi ta ˈna, e eiaha oia e mǎtaˈu: “Mau papu râ oe e tae noa ˈtu i te pohe, e na ˈu e horoa ˈtu i te korona ora no oe.” Te mau papu nei te amuiraa no Peregamo e faaea ra i “te vahi i tiahia e te terono o Satani,” i te iˈoa o te Mesia, te vai nei râ te feia taiva i roto ia ˈna, e e tia ia ratou ia tatarahapa, ia ore ra, e tamaˈi atu te Mesia ia ratou i te ˈoˈe roa o to ˈna vaha. I Tuatira, ‘e here, e faaroo, e ohipa, e e faaoromai’ to te amuiraa, te farii nei râ oia “i tena na vahine ia Iezebela.” E noaa râ i te feia haapao maitai o te mau papu ‘te mana i nia iho i te mau fenua.’—2:10, 13, 19, 20, 26.
10. Eaha te mau poroi e faataehia i te mau amuiraa no Saradi, Philadelephia, e no Laodikea?
10 E amuiraa oraora maitai, o te roo ïa o Saradi, te pohe noa na râ oia no te mea aita ta ˈna mau ohipa i faaoti-roa-hia i mua i te Atua. E ore roa râ te iˈoa o te riro ia ratou te re, e paraihia i roto i te buka ora. Ua tapea te amuiraa no Philadelephia i te parau a te Mesia, no reira oia e tǎpǔ ai e e faaora oia i te amuiraa “i taua hora ati e tupu i te taata atoa ra, ei tamataraa i te feia e parahi i te fenua nei.” E faariro te Mesia i tei riro ia ˈna te re, ei pou i roto i te hiero o To ˈna Atua. E parau te Mesia e: “E papai au i te iˈoa o tau Atua i nia iho ia ˈna, e te iˈoa no te oire o tau Atua ra, o Ierusalema apî, . . . e o to ˈu iho hoi iˈoa apî.” Ma te faahiti ia ˈna iho mai “te tumu o te mau mea atoa a te Atua i hamanihia ra,” e faaite te Mesia i te amuiraa no Laodikea e aore oia i toetoe, aore hoi i mahanahana, e e haapuai oia ia ˈna i rapae i to ˈna vaha. Noa ˈtu ratou e faateitei e e taoˈa rahi ta ratou, mea veve, mea matapo, e te vai tahaa noa ra to taua amuiraa ra. Te hinaaro ra ratou i te ahu teatea, e te raau mata ia ite ratou. E haere mai te Mesia e tamaa e te taata atoa e iriti atu i te opani. E haaparahi te Mesia i tei riro ia ˈna te re e oia i nia i to ˈna terono, mai ia ˈna i parahi e to ˈna Metua i nia i To ˈna terono.—3:10, 12, 14.
11. Eaha te orama unauna e faaitehia ia Ioane i muri iho?
11 Orama o te moˈaraa e o te hanahana o Iehova (4:1–5:14). E aratai te piti o te orama ia tatou i mua i te terono hanahana o Iehova i nia i te raˈi. E mataitairaa teie e hau ê i te nehenehe, mai te mau ofai maitatai ra te anaana. Te parahi ra e 24 matahiapo ma te korona i nia i to ratou upoo e ati aˈe te terono. E maha mea ora e parau ra i te moˈaraa o Iehova, e te haamorihia ra oia mai tei au ia ˈna ‘te hanahana, e te tura e te mana’ no te mea o oia Tei poiete i te mau mea atoa nei.—4:11.
12. O vai anaˈe te au ia ˈna ia hohora i te otaro ma te mau tapao taati e hitu?
12 Te tapea ra ‘Tei parahi i nia iho i te terono’ i te hoê otaro ma te mau tapao taati e hitu. O vai râ te au ia hohora i te otaro? “Tei te Liona o te opu o Iuda, tei te huaai o Davida,” tei ia ˈna anaˈe! Na ˈna, oia atoa hoi “te Arenio taparahihia,” e rave mai i te otaro ia Iehova ra.—5:1, 5, 12.
13. Eaha te orama tuhaa rau e itehia ia vahihia na tapao taati matamua e ono?
13 E vahi te Arenio i na tapao taati e ono o te otaro (6:1–7:17). Teie mai nei te toru o te orama. E haamata te Arenio i te vahi i te mau tapao taati. Na mua, e haere mai te hoê taata i nia i te puaahorofenua teatea “ma te haapau atu, e ia pau atu â.” I muri iho, e faaore te taata i nia i te puaahorofenua uteute i te hau i te fenua nei, e e tarani te tahi atu i nia i te puaahorofenua ereere, i te maa huero. Tei nia te Pohe i te hoê puaahorofenua maheahea, e te apee ra o Hade ia ˈna. E vahihia te pae o te tapao taati, itehia ˈtu ai “te feia i taparahihia no te parau a te Atua” e pii hua ra ia tahoohia to ratou toto. (6:2, 9) Ia vahihia te ono o te tapao taati, e aueue rahi te fenua, e pouri te mahana e te avaˈe, e e tiaoro te feia puai o te fenua nei i te mau mouˈa ia mairi mai i nia iho ia ratou, e huna ia ratou i mua ia Iehova e te riri o te Arenio.
14. Eaha te itehia i muri iho no nia i te mau tavini a te Atua e te feia rahi roa eita e pau ia taio?
14 E haamata ˈtu ai te maha o te orama. E itehia na melahi e maha e tapea ra i na mataˈi e maha o te fenua nei e ia hope roa te mau tavini a te Atua i te tapaohia i nia i te rae. To ratou rahiraa, 144 000 ïa. I muri aˈe, e ite Ioane i te feia rahi roa eita e pau ia taio, no te mau nunaa atoa, e tia noa ra i mua i te Atua e te Arenio, ma te parau e tei ia raua te ora, a tavini ai i te rui e te ao i roto i te hiero o te Atua. Na te Arenio iho “e faaamu ia ratou, e e aratai hoi ia ratou i te mau pape ora pihaa ra.”—7:17.
15. Eaha te tupu ia vahihia te hitu o te tapao taati?
15 E vahihia te hitu o te tapao taati (8:1–12:17). Aita e maniania i nia i te raˈi. E horoahia ˈtu ai e hitu pu i na melahi e hitu ra. Te pae o te orama, o na oto pu matamua e ono ïa.
16. (a) Eaha te tupu ia oto na pu taitahi matamua e pae, e eaha te matamua o na pohe e toru? (b) Eaha ta te ono o te pu e faaite?
16 A oto ai na pu matamua e toru te tahi i muri aˈe i te tahi, e mairi mai te mau ati i nia i te fenua, te miti, e te mau anavai e i nia atoa i te mau pape pihaa. Ia oto te maha o te pu, e pouri te hoê tufaa i nia i te toru o te mahana, te avaˈe, e o te mau fetia. Ia oto te paeraa, e tuu te hoê fetia i nia i te raˈi i te hoê ati akaride o te tairi i ‘te mau taata aore te tapao a te Atua i nia iho i to ratou rae.’ “Hoê pohe” teie, te toe râ e piti. Ia oto te ono o te pu, e tatarahia te taai o na melahi toomaha e haere mai no te taparahi pohe. E faatupu â ‘e piti muriadiraa i te muriadi’ nuu puaahorofenua i te ati e te haapoheraa, eita râ te mau taata e tatarahapa i ta ratou mau ohipa iino.—9:4, 12, 16.
17. Eaha te mau ohipa faufaa e faaite e ua mure aˈenei te piti o te pohe?
17 A haamata ˈi te ono o te orama, e pou mai te tahi atu melahi puai mai nia mai i te raˈi e faaite e ‘ia tae i te tau faaotoraa a te toohitu o te melahi ra, . . . ia tupu faaoti roa te parau aro a te Atua’ ia au i te parau apî maitai. E horoahia mai te hoê otaro iti na Ioane e amu. I roto i to ˈna vaha “e momona ïa mai te meli ra,” e maramara râ to ˈna opu. (10:7, 9) E tohu e piti ite 1 260 mahana i te maoro ma te ahu pute; haapohehia ˈtu ai raua e “te puaa no roto i te abuso ra,” e e vaiiho-noa-hia to raua oivi e toru mahana e te afa i nia “i te aroâ o te oire rahi.” E oaoa te feia e parahi i te fenua nei i te reira, e tupu râ te mǎtaˈu rahi ia faaora faahou mai te Atua ia raua. I taua hora ra, e aueue rahi te fenua. “Ua mure aˈenei te piti o te pohe.”—11:7, 8, 14.
18. Eaha te faaiteraa faufaa e tupu ia oto te hitu o te pu, e ua tae i te taime faataahia no te aha?
18 I teie nei, e faaoto te hitu o te melahi i ta ˈna pu. E faaite mai te mau reo no te raˈi mai e: “O te basileia ra o teie nei ao ua riro ei basileia no to tatou Fatu e no ta ˈna ra Mesia.” E haamori e e haamauruuru “te mau [matahiapo] e piti ahuru ma maha” i te Atua, e riri râ te mau nunaa. Ua tae i te taime faataahia e te Atua no te haava i te feia pohe e no te haamauruuru i to ˈna feia moˈa e no te “[tuino i te feia e tuino ra i te fenua].” E iritihia te vahi moˈa o to ˈna hiero, e te itehia ra te afata o ta ˈna faufaa i roto.—11:15, 16, 18; MN.
19. Eaha te tapao e te tamaˈi e itehia i nia i te raˈi, e eaha te faahopearaa?
19 I muri aˈe i te poroi e ua haamauhia te Basileia, e faaite oioi mai te hitu o te orama i te hoê “tapao rahi” i nia i te raˈi. E fanau mai ta te hoê vahine “e tamaroa, o te riro ia ˈna te tavana i te mau fenua atoa ma te setepa auri.” Ua ineine noa te hoê “teni rahi uteute” i te haapau i te tamarii, e hopoihia râ oia i te terono o te Atua ra. E tamaˈi Mikaela i te teni, e e huri oia i ‘taua ophi tahito ra, o tei parauhia o te Diabolo ra e o Satani’ i nia iho i te fenua. ‘E ati to te fenua’! E hamani ino te Diabolo i te vahine e haere atu ai e tamaˈi i te toea o to ˈna huero.—12:1, 3, 5, 9, 12; 8:13.
20. Eaha na puaa taehae e piti o te fa mai i roto i te orama, e nafea raua e faahepo ai i te mau taata o te fenua nei?
20 Te puaa taehae no roto mai i te miti (13:1-18). E faaite mai te vau o te orama i te hoê puaa taehae e hitu afii e ahuru tara, i te aˈeraa mai i nia mai raro mai i te miti. No ǒ mai to ˈna mana i te teni ra. E au ra e ua pohe te hoê o to ˈna mau afii, e ora mai râ, e umere rahi to te fenua atoa nei i te puaa. E parau oia i te parau faaino i te Atua, e e tamaˈi oia i te feia moˈa. A hiˈo na râ! Te ite ra Ioane i te tahi atu puaa taehae i te haerea mai i nia mai raro mai i te fenua. E piti to ˈna tara mai to te arenio ra, e paraparau râ oia mai te teni ra. E haavare oia i to te fenua nei e e parau oia ia ratou e hamani i te hoê hohoˈa o te puaa taehae matamua. E faahepohia te taata atoa e haamori i teie hohoˈa, ia ore ra, e haapohehia ratou. Aita anaˈe te tapao aore ra te numera o te puaa i nia ia ˈna, eita te hoê taata e faatiahia ia hoo mai aore ra ia hoo atu. O te 666 to ˈna numera.
21. Eaha ta Ioane e ite i nia i te mouˈa Siona, eaha ta te mau melahi e taitai ra e e faaite ra, e nafea te vine o te fenua nei e faaruehia ˈi?
21 Te “evanelia mure ore” e te mau poroi e au i te reira (14:1-20). E taa-ê-raa oaoa mau, i roto i te iva o te orama, e ite Ioane i te Arenio i nia i te mouˈa Siona, e i pihai iho ia ˈna, 144 000 taata ma te iˈoa o te Arenio e o te Metua i nia iho i to ratou mau rae. “Ua himene ihora ratou, mai te himene apî ra te huru, i mua i te terono,” ua hoohia mai hoi ratou “no roto i te taata nei, ei oho matamua na te Atua e na te Arenio ra.” E fa mai te tahi atu melahi i ropu i te reva, “ma te evanelia [mure ore] ei pororaa ˈtu” i te mau nunaa atoa a parau ai e: “A mǎtaˈu i te Atua, e faahanahana ˈtu ia ˈna.” E na ô te tahi atu melahi e: ‘Ua mairi o Babulonia Rahi!’ E faaite te toru o te melahi e e inu te feia e haamori i te puaa taehae e i to ˈna hohoˈa, i te riri o te Atua. E faaohipa te hoê “mai te Tamaiti a te taata ra te huru” i ta ˈna mauhaa ooti, e e faaohipa atoa te tahi atu melahi i ta ˈna mauhaa ooti, e e ooti oia i te vine o te fenua nei, a huri atu ai i roto i “te neneiraa rahi uaina ra o te riri o te Atua.” Ia taataahihia te neneiraa vine i rapae mai i te oire, e tahe mai te toto e e naea roa te tavaha o te mau puaahorofenua, “e hoê tausani e ono hanere setadia” (296 kilometera).—14:3, 4, 6-8, 14, 19, 20; MN.
22. (a) O vai te itehia ra i muri iho e te faahanahana ra ia Iehova, e no te aha? (b) Ihea na auˈa e hitu o te riri o te Atua e niniihia ˈi, e eaha te mau ohipa e tupu o te faaaueue i te fenua?
22 Te mau melahi e na ati hopea e hitu (15:1–16:21). E haamata te ahuru o te orama e te tahi atu hiˈoraa i te aua i nia i te raˈi. E faahanahana te feia i riro ia ratou te re i nia i te puaa taehae, ia Iehova, te “Arii [mure ore],” no ta ˈna mau ohipa rahi e te faahiahia. E haere mai e hitu melahi mai roto mai i te vahi moˈa i nia i te raˈi, e e horoahia ˈtu e hitu auˈa auro î i te riri o te Atua. E niniihia na auˈa matamua e ono i nia i te fenua, te miti, e te mau anavai e te mau pape pihaa, i nia atoa i te mahana, te terono o te puaa taehae, e te anavai Eupharate, pâpâmǎrô atura taua pape ra ia maitai te eˈa o “te hui arii o te hitia o te râ.” Na te mau parau demoni e haaputuputu i ‘te hui arii o te fenua atoa nei i te tamaˈi i taua mahana rahi o te Atua Puai hope ra’ i Aramagedo. E niniihia te hitu o te auˈa i nia i te reva, e na roto i te mau tupuraa natura riaria, e amaha te oire rahi i roto e toru tuhaa, e mairi te mau oire o te mau fenua i raro, e e roohia Babulonia i ‘te auˈa uaina o te riri uˈana o te Atua.’—15:3; 16:12, 14, 19; MN.
23. (a) Nafea te haavaraa a te Atua e faatupuhia ˈi i nia ia Babulonia Rahi? (b) Eaha te mau faaiteraa e te auê e faaroohia ia topa oia, e eaha te arueraa oaoa e haruru na nia i te raˈi?
23 Haavaraa a te Atua ia Babulonia; faaipoiporaa a te Arenio (17:1–19:10). E haamata te 11raa o te orama. A hiˈo na! Te haavaraa a te Atua ia “Babulonia Rahi, o te metua vahine o te mau faaturi,” “o tei faaturihia e te hui arii o te ao nei.” Ua taero oia i te toto o te feia moˈa, e te parahi ra oia i nia iho i te hoê puaa taehae uteute, e hitu to ˈna afii e hoê ahuru tara. “Te vai na” taua puaa ra “e aita nei; e ua fatata i te aˈe aˈe i nia mai raro mai i te abuso ra.” E tamaˈi to ˈna na tara hoê ahuru i te Arenio, no te mea râ e o oia ‘te Fatu o te mau fatu atoa e te Arii o te mau arii atoa,’ e upootia oia i nia ia ratou. E fariu atu na tara hoê ahuru i nia i te vahine faaturi e amu ia ˈna, e ia haamata te 12raa o te orama, e parau te tahi atu melahi, e turama hoi to ˈna anaana i te fenua, e: “Ua mairi Babulonia rahi e, ua mairi.” E faauehia te nunaa o te Atua e haere ê mai i rapae ia ˈna, ia ore ratou ia roohia i to ˈna mau pohe. E oto te mau arii e vetahi atu feia puai o te fenua nei, ia ˈna, a na ô ai e: “Auê te oire rahi nei o Babulonia e, auê oe te oire etaeta nei e! hora-tahi-noa-hia iho nei hoi to oe pohe e!” Ua pau roa ta ˈna mau taoˈa rahi atoa. Mai te hoê ofai mule rahi e taorahia i roto i te miti, e huri-taue-atoa-hia Babulonia i raro, e e ore roa e ite-faahou-hia ˈtu. Ua tahoohia ïa te toto o te feia moˈa a te Atua! E maha taime te raˈi e haruru ai i te piiraa ra: “A arue ia Ia, outou e te taata e!” (MN) A arue ia Ia no te mea ua faatupu oia i te haavaraa i nia i te vahine faaturi rahi! A arue ia Ia no te mea ua haamata Iehova i te faatere ei arii! A oaoa e ia rahi atu â te oaoa, “ua tae hoi i te faaipoiporaa a te Arenio, e ua faanehenehe ta ˈna vahine ia ˈna iho”!—17:2, 5, 8, 14; 18:2, 10; 19:1, 3, 4, 6, 7.
24. (a) No te aha e mea faufaa te tamaˈi e ravehia e te Arenio? (b) Eaha te ohipa e tupu i roto i na tausani matahiti, e eaha te tupu i muri iho?
24 E tamaˈi te Arenio ma te parau-tia (19:11–20:10). I roto i te 13raa o te orama, e aratai “te Arii o te mau arii, e te Fatu o te mau fatu” i te mau nuu o te raˈi i roto i te tamaˈi parau-tia. E riro te mau arii e te feia puai ei maa na te mau manu o te reva, e e huri-oraora-noa-hia te puaa taehae e te peropheta haavare i roto i te roto auahi e te gopheri e ama noa ra. (19:16) Ia haamata te 14raa o te orama, e itehia te hoê melahi “i te pouraa mai mai te raˈi mai, e tei ia ˈna te taviri o te abuso ra, e e fifi rahi auri tei tana rima.” E haruhia e e ruuruuhia ‘te teni, te ophi tahito, oia hoi te Diabolo ra o Satani,’ e ia hoê tausani i te matahiti. E riro mai tei fanaˈo i te tia-faahou-raa matamua ‘ei tahuˈa na te Atua e na te Mesia, e e faatere ratou ei arii e o ˈna e ia hoê tausani i te matahiti.’ I muri iho, e tuuhia Satani e e reva oia e haavare haere i te mau nunaa o te fenua nei, e hurihia râ oia, e te feia atoa e pee atu ia ˈna, i roto i te roto auahi.—20:1, 2, 6.
25. Eaha te orama horuhoru e itehia i muri iho, e o vai te tufa i teie mau mea?
25 Te Mahana Haavaraa e te hanahana o te Ierusalema Apî (20:11–22:5). Haere mai ai te 15raa o te orama horuhoru mau. E haavahia te feia pohe, te taata rii e te feia rarahi, i mua i te terono rahi teatea o te Atua. E hurihia te Pohe e Hade i roto i te roto auahi, “o te piti teie o te pohe,” e na muri ia raua, te taata atoa aore e itehia to ˈna iˈoa i roto i te buka ora. E pou mai te Ierusalema Apî mai nia mai i te raˈi, e e tiahapa te Atua i te huitaata nei, a horoi ai i to ratou roimata atoa. E ore roa te pohe, e te oto, e te mihi, e te mauiui! Oia mau, “te faaapî nei” te Atua “i te mau mea atoa nei,” e e haapapu oia i ta ˈna parau tǎpǔ, a na ô ai e: “A papai, e parau mau hoi teie nei mau parau, e te haavare ore.” E noaa teie mau mea i tei riro ia ratou te re, area tei mǎtaˈu noa ra, e te faaroo ore, e te feia tia ore i te pae morare aore ra tei rave i te peu tahutahu e te haamori idolo, eita ïa.—20:14; 21:1, 5.
26. (a) Mea nafea te faataaraahia te Ierusalema Apî? (b) Eaha te mau mea e atuatu i te ora e itehia i roto i te oire, e nohea mai to ˈna maramarama?
26 I roto i te 16raa e te hopea o te orama, e faaitehia ia Ioane “te vahine a te Arenio,” te Ierusalema Apî, e ta ˈna 12 uputa e 12 ofai niu, ma te iˈoa o na aposetolo 12 i nia iho. Mea orapa oia, e e faahohoˈahia to ˈna unauna rahi i te isephe, te auro, e te poe. O Iehova e te Arenio te hiero o teie oire, e o raua atoa to ˈna maramarama. O te feia anaˈe tei roto to ratou iˈoa i te otaro ora a te Arenio te ô i roto. (21:9) E tahe mai te hoê pape ora viivii ore no roto mai i te terono i roto i te aroâ aano o te oire, e i na pae pape, te vai ra te mau raau ora o te horoa i te hoturaa apî i te mau avaˈe atoa, e to ratou rauere, no te faaora ïa. E vai te terono o te Atua e o te Arenio i roto i te oire, e e ite te mau tavini o te Atua i To ˈna mata. “O te Atua [ra o Iehova] to ratou maramarama: e e [faatere] â ratou e a muri noa ˈtu.”—22:5; MN.
27. (a) Eaha te haapapuraa e horoahia ia Ioane no nia i te parau tohu? (b) E faaoti te Apokalupo na roto i teihea titauraa e faaararaa ru?
27 Te faaotiraa (22:6-21). E horoahia mai te haapapuraa: “E parau mau teie nei mau parau, e te haavare ore.” Oia mau, e ao to te feia atoa e haapao i te mau parau tohu o teie buka! No to ˈna faarooraa e iteraa i teie mau mea e tipapa ˈi Ioane i raro e haamori i te melahi, o te haamanaˈo mai ia ˈna e o te Atua anaˈe te haamorihia. Eiaha te mau tohu parau o teie buka ia taatihia, “ua fatata roa hoi te taime.” E ao to te feia e tomo i roto i te oire, no te mea to rapaeau te feia viivii e “te feia atoa e hinaaro e ua parau i te parau haavare ra.” E faaite Iesu e na ˈna iho i tono i teie ite i te mau amuiraa na roto i ta ˈna melahi, e o oia “te tumu e te huaai o Davida, e te fetia poipoi anaana ra.” “E te parau nei te [v]arua e te vahine faaipoipo apî, E haere mai. E o tei faaroo ra, a parau atoa oia e, E haere mai. E o tei poihâ ra, a haere mai. E tei hinaaro ra, a rave noa mai oia i te pape ora.” Eiaha roa te tahi taata ia taati noa mai aore ra ia iriti noa ˈtu i te hoê o te mau parau tohu o teie buka, e iriti-ê-hia ta ˈna tufaa “i roto i te [mau raau] ora, e i roto i te oire moˈa ra.”—22:6, 10, 15-17, 19; MN.
FAUFAARAA
28. Maoti teihea mau hiˈoraa e taa ˈi ia tatou e te faaoti ra te Apokalupo i te faatiaraa i haamatahia i roto i te tuhaa matamua o te Bibilia?
28 E faaotiraa hanahana mau ta te buka Apokalupo e horoa ra i te haaputuraa buka faauruahia e 66 o te Bibilia! Aita hoê mea i moehia. Aita e tuhaa faufaa ore. I teie nei te ite papu nei tatou i te hopea mai i te haamataraa. E faaoti te tuhaa hopea o te Bibilia i te faatiaraa i haamata i roto i te tuhaa matamua. Mai te Genese 1:1 i faatia i te poieteraa te Atua i te mau raˈi e te fenua materia, te faataa ra te Apokalupo 21:1-4 i te raˈi apî e te fenua apî e te mau haamaitairaa rahi e fanaˈohia e te huitaata nei, mai tei tohu-atoa-hia i roto i te Isaia 65:17, 18; 66:22; e te Petero 2, 3:13. Mai tei parauhia i te taata matamua e e pohe mau â oia ia ore oia e faaroo, e haapapu mau â te Atua e no te feia e faaroo, “e ore roa te pohe.” (Gen. 2:17; Apo. 21:4) I to te Ophi faraa mai no te taime matamua ei haavare i te huitaata nei, ua tohu te Atua e e haaparuparuhia to ˈna afii, e te faaite ra te Apokalupo nafea te ophi tahito, oia hoi te Diabolo ra o Satani, e haamouhia ˈi i te pae hopea. (Gen. 3:1-5, 15; Apo. 20:10) Ua faaatea-ê-hia te taata faaroo ore i te raau ora o te ô i Edene ra, area i teie nei ra, te vai ra ïa te mau raau ora taipe ‘ei faaora i te mau nunaa’ o te huitaata faaroo. (Gen. 3:22-24; Apo. 22:2) Mai te anavai i tahe mai roto mai i Edene no te faarari i te ô, te tahe atoa maira te hoê anavai taipe, o te horoa e te atuatu i te ora, mai roto mai i te terono o te Atua. E turua te reira e te orama ta Ezekiela i ite na, e e haamanaˈo atoa mai i te mau parau a Iesu no nia i te ‘pape pihaa e tia i te pihaaraa e tae noa ˈtu i te ora mure ore ra.’ (Gen. 2:10; Apo. 22:1, 2; Ezek. 47:1-12; Ioa. 4:13, 14) Taa ê atu i te tane e te vahine matamua o tei tiavaruhia mai mua ˈtu i te aro o te Atua, e ite te feia haapao maitai tei noaa ia ratou te re i to ˈna mata. (Gen. 3:24; Apo. 22:4) Mea faufaa mau â ia faahohonu i teie mau orama horuhoru mau o te Apokalupo!
29. (a) Nafea te Apokalupo e faatuati ai i te mau parau tohu no nia ia Babulonia? (b) Eaha te mau mea i roto i te mau orama o te Basileia, e o te mau puaa, e turua i roto i te Daniela e te Apokalupo?
29 A tapao atoa na nafea te Apokalupo ia faatuati i te mau parau tohu no nia ia Babulonia ino ra. Ua ite atea Isaia i te toparaa o Babulonia i tahito ra na mua ˈˈe roa oia a hiˈa ˈi, e ua parau oia e: “Ua pau, ua pau Babulonia e!” (Isa. 21:9) Ua tohu atoa Ieremia i te pau o Babulonia. (Ier. 51:6-12) Te parau taipe nei râ te Apokalupo no nia ia “Babulonia Rahi, o te metua vahine o te mau faaturi, e no te mau mea faufau o te ao nei.” E tia atoa ia ˈna ia faatahurihia, e e ite orama Ioane i te reira, a na ô ai e: “Ua mairi Babulonia Rahi e, ua mairi.” (Apo. 17:5; 18:2) Te haamanaˈo ra anei outou i te orama a Daniela no te hoê basileia e haamauhia e te Atua o te haaparari i te tahi atu mau basileia e te vai noa “e a muri noa ˈtu”? A tapao na nafea te reira e tuati ai e te pororaa i nia i te raˈi o te Apokalupo: “O te basileia ra o teie nei ao ua riro ei basileia no to tatou Fatu e no ta ˈna ra Mesia, e e vai ïa te hau ia ˈna e a muri noa ˈtu.” (Dan. 2:44; Apo. 11:15) E mai te orama a Daniela i faataa i ‘te hoê mai te Tamaiti a te taata ra i te haerea mai na roto i te mau ata o te raˈi ra, e ua horoahia maira te mana mure ore, e te hinuhinu, e te basileia no ˈna,’ te faaite ra te Apokalupo ia Iesu Mesia mai “te arii o te mau arii o te ao nei” o ‘te haere mai i roto i te ata,’ e te na ô ra e “e ite te mau mata atoa ia ˈna.” (Dan. 7:13, 14; Apo. 1:5, 7) E turua atoa te mau puaa o te orama a Daniela e te mau puaa a te Apokalupo. (Dan. 7:1-8; Apo. 13:1-3; 17:12) E vahi haapiiraa rahi mau â te Apokalupo o te haapaari i te faaroo.
30. (a) Eaha ta te Apokalupo e faaite maitai ra no nia i te haamoˈaraa i te iˈoa o Iehova maoti te Basileia? (b) Eaha te haamatara-maitai-hia ra no nia i te moˈaraa, e no vai teie nei parau?
30 E orama faahiahia e te hope te rau ta te Apokalupo e horoa maira no nia i te Basileia o te Atua! Te haamaramarama maitai ra oia i ta te mau peropheta no tahito ra e ta Iesu e ta ta ˈna mau pǐpǐ i parau no nia i te Basileia. I ǒ nei, e ite roa ino tatou ia haamoˈahia te iˈoa o Iehova na roto i te Basileia: “E moˈa, e moˈa, e moˈa, to [Iehova] to te Atua Mana hope ra.” E au ia ˈna ‘te hanahana, e te tura, e te mana.’ Oia mau, o oia te ‘faatupu i te mana rahi, e ua riro te hau ia ˈna’ na roto i te Mesia. E itoito rahi mau to ta ˈna Tamaiti hui arii, “te Arii o te mau arii, e te Fatu o te mau fatu,” ia tairi oia i te mau nunaa e ia taataahi i “te neneiraa uaina ra o te hoturaa rahi o te riri o te Atua Puai hope ra”! A naea ˈi i te tumu parau rahi o te Bibilia, oia hoi te faatiaraa ia Iehova, i to ˈna taime faahiahia roa ˈˈe, te haamatarahia ra e ia moˈa te taata atoa e te mau mea atoa i taaihia i te mau opuaraa a to ˈna Basileia. Te parauhia ra e mea moˈa te Arenio, o Iesu Mesia, tei ia ˈna “te taviri a Davida,” e mai te reira atoa te mau melahi o te raˈi. “E ao to” te feia e fanaˈo i te tia-faahou-raa matamua, “e te moˈa,” e te haapapuhia ra e ‘aore roa e mea viivii e tei rave i te parau faufau ra’ e ô i roto i ‘te oire moˈa ra o Ierusalema.’ Te faaitoito-puai-hia ra ïa tei hoohia mai i te toto o te Arenio no te riro “ei hui arii, e ei tahuˈa na to [t]atou Atua,” ia vai moˈa noa i mua ia Iehova. E tia atoa i te “feia rahi roa” ia “horoi i to ratou ahu, e [ia] teatea, i te toto o te Arenio” ia nehenehe ratou e pûpû i te taviniraa moˈa.—Apo. 4:8, 11; 11:17; 19:15, 16; 3:7; 14:10; 20:6; 21:2, 10, 27; 22:19; 5:9, 10; 7:9, 14, 15; MN.
31. Eaha te mau tuhaa o te Basileia e faaitehia mai i roto anaˈe i te buka Apokalupo?
31 E mau roa te orama o teie Basileia unauna e te moˈa o te Atua i roto i to tatou feruriraa a tapao mai ai tatou i te tahi mau tuhaa e faaitehia ra i roto anaˈe i te buka Apokalupo. I ǒ nei, te ite ra tatou i te taatoaraa o te feia aiˈa o te Basileia i nia i te mouˈa Siona i pihai iho i te Arenio, e himene ra i te hoê himene apî o ratou anaˈe tei ite. O te Apokalupo anaˈe te faaite mai i te numera o tei hoohia mai i te fenua nei e o te ô i roto i te Basileia—144 000—e ua tapaohia ratou no roto i na opu taipe 12 o te Iseraela pae varua. O te Apokalupo anaˈe te faaite e e fanaˈo teie ‘mau tahuˈa e mau arii’ i te tia-faahou-raa matamua mai te Mesia ra e e faatere atoa ratou e oia “e ia hoê tausani i te matahiti.” O te Apokalupo anaˈe te faaite maite i “te oire moˈa ra, ia Ierusalema apî,” e to ˈna hanahana anaana, o Iehova e te Arenio to ˈna hiero, i to ˈna 12 mau uputa e mau ofai niu, e te mau arii o te faatere i roto ia ˈna e a muri noa ˈtu na roto i te maramarama mure ore ta Iehova e faatae i nia ia ratou.—14:1, 3; 7:4-8; 20:6; 21:2, 10-14, 22; 22:5.
32. (a) Nafea te orama o “te raˈi apî” e “te oire moˈa ra, ia Ierusalema apî” e haapoto ai i te mau parau tohu atoa no nia i te Huero o te Basileia? (b) Eaha te mau haamaitairaa ta te Basileia e haapapu maira no te huitaata i te fenua nei?
32 E nehenehe mau â e parauhia e te haapoto ra teie orama o “te raˈi apî” e “te oire moˈa ra, ia Ierusalema apî,” i te mau parau tohu atoa a te mau Papai mai tahito mai â no nia i te Huero o te Basileia. Ua tiai maite Aberahama i te hoê huero na roto ia ˈna “e maitai ai te mau fetii atoa o te ao nei” e i “taua oire niu mau ra, o te Atua te faaau e te faatia ra.” I teie nei, i roto i te orama a te Apokalupo, te faataa-maitai-hia maira e teie oire haamaitaihia, o “te raˈi apî” ïa—te hoê faatereraa apî, te Basileia o te Atua, oia hoi te Ierusalema Apî (te vahine faaipoipo a te Mesia) e ta ˈna Tane faaipoipo. E faatere amui raua ma te parau-tia i te fenua atoa nei. E tǎpǔ Iehova i te huitaata haapao maitai e e riro ratou ‘ei taata no ˈna’ o te oaoa, e te faatiamâhia i te hara e te pohe, o te huru ïa o te taata hou te orureraa hau i Edene. E no te haapapu maitai, e piti taime to te Apokalupo faaiteraa mai e “na te Atua e horoi i to ratou roimata atoa.”—Gen. 12:3; 22:15-18; Heb. 11:10; Apo. 7:17; 21:1-4.
33. (a) Eaha te hiˈoraa taatoa faahiahia mau ta te Apokalupo e horoa ra no nia i te tupuraa o te mau opuaraa a te Atua? (b) Nafea “te mau Papai atoa” i te riroraa ei ‘mea faaurua e te Atua e e mea faufaa,’ e no te aha teie te taime no te haapii e no te auraro i te Parau a te Atua?
33 Oia, e faaotiraa faahiahia mau teie i te mau Papai faauruahia! Mea au mau te “mau mea e fatata i te tupu”! (Apo. 1:1) E faaraahia te iˈoa o Iehova, “te Atua o [te mau parau faauruahia a] te mau peropheta.” (22:6; MN) Te faaitehia ra e te tupu ra te mau parau tohu i papaihia i te roaraa 16 senekele, e te haamauruuruhia ra te mau ohipa faaroo i ravehia ehia tausani matahiti i te maoro! Ua pohe te “ophi tahito,” ua haamouhia to ˈna mau nuu, e aita e ino faahou. (12:9) E faatere te Basileia o te Atua aore ra “raˈi apî” ei arueraa ia ˈna. Te vai ra te mau haamaitairaa o te hoê fenua i faaapîhia, tei î e tei faanahohia ia au i te opuaraa a Iehova i faaitehia i roto i te pene matamua o te Bibilia, i mua i te huitaata nei no te hoê tau mure ore hanahana. (Gen. 1:28) Ua riro mau â te mau Papai atoa ei ‘mea faaurua e te Atua e e mea faufaa ei haapiiraa, ei faahaparaa, ei faatitiaifaroraa i te mau mea, ei aˈoraa ma te parau-tia.’ Ua faaohipa Iehova i te mau Papai no te aratai i te mau taata faaroo aravihi roa e tei ineine roa e tae roa mai i teie mahana faahiahia. Teie ïa te taime no te haapii i teie mau Papai ia paari to outou faaroo. A auraro i ta te reira mau faaueraa ia fanaˈo outou i te haamaitairaa a te Atua. A haapao i te reira i nia i te eˈa tia o te aratai i te ora mure ore. Ia na reira outou, e nehenehe atoa ïa outou e apiti ma te tiaturi papu i te parau faaotiraa a te buka hopea o te Bibilia: “Amene. Oia ïa, a haere mai, e te Fatu, e Iesu e!”—Tim. 2, 3:16, MN; Apo. 22:20.
34. Nafea e noaa ˈi ia tatou te oaoa faaauraa ore i teie nei, e no te aha?
34 Auê ïa oaoa faaauraa ore to tatou i teie nei ia arue tatou i te “basileia no to tatou Fatu e no ta ˈna ra Mesia,” te Huero, o te faaraa i te iˈoa faito ore o Iehova “te Atua Mana Hope” e a muri noa ˈtu!—Apo. 1:15, 17.
[Nota i raro i te api]
^ L’œuvre de Justin, Apologies I et II, Dialogue avec Tryphon, Paris, 1982, api 263.
^ Histoire ecclésiastique, a Eusèbe, hurihia e G. Bardy, Paris, 1955, VI, xxv, 7-10.
^ Hurihia e A. Rousseau, Paris, 1985.
^ Vies des douze Césars (Domitien, XIII).
[Uiraa haapiiraa]