Buka Bibilia numera 7—Te mau tavana

Taata papai: Samuela

Vahi papairaa: Iseraela

Otiraa te papai: area 1100 H.T.T.

Area tau puohuhia: area 1450–area 1120 H.T.T.

1. Nafea te anotau o te mau tavana e mea faahiahia ˈi?

 TEIE te hoê tuhaa o te aamu o Iseraela e rave rahi te mau tupuraa. Te itehia ra te nunaa e faaruru ra i te mau faahopearaa ino no to ratou anaanataeraa i te haapaoraa a te demoni e i te tahi taime, ia tatarahapa ratou, te fanaˈo ra ïa ratou i te aroha hamani maitai o Iehova o te faaora ia ratou na roto i te ravea o te mau tavana ta ˈna i nomino. E faatupu te mau ohipa itoito a Otaniela, a Ehuda, a Samagara, e a te tahi atu mau tavana no muri mai i te faaroo. Mai ta te taata i papai i te mau Hebera e parau ra: “E maoro hua hoi ia parau vau ia Gideona, ia Baraka, ia Samasona, ia Iepheta, . . . o tei pau ia ratou te mau basileia i te faaroo, e ua rave i te parau-tia ra, . . . ua faaetaetahia i te paruparuraa ra, aito roa ˈtura hoi i te tamaˈi, fati atura hoi ia ratou te mau nuu o te fenua ěê ra.” (Heb. 11:32-34) Ei faahitiraa i te taatoaraa o na tavana 12 no taua anotau ra, te vai atoa ra o Tola, o Iaira, o Ibesana, o Elona, e o Abadona. (Aita i matauhia i te taio ia Samuela i rotopu i te mau tavana.) Ua aro o Iehova no te mau tavana, e ua î ratou i te varua a rave ai ratou i ta ratou mau ohipa maere. Ua parau ratou e na te Atua i faatupu i te reira e ua faahanahana ratou ia ˈna.

2. Nafea te iˈoa Hebera o te buka Te mau tavana e tano maitai ai?

² I roto i te Septante, o Kri·taiʹ te iˈoa o te buka e i roto i te Bibilia Hebera, o Sho·phetimʹ ïa, oia hoi “Te mau tavana.” No roto mai te parau ra Sho·phetimʹ i te ihoparau ra sha·phatʹ, teie te auraa “haava, faatia, faautua, faatere,” o te haapapu maitai ïa i te hopoia a teie feia i nominohia ia au i te teotaratia e “te Atua . . . te haava i te taata atoa.” (Heb. 12:23) Na Iehova i haamau i teie feia i roto i te mau huru tupuraa taa ê no te faaora i to ˈna nunaa i te zugo o te mau hau ěê.

3. Afea Te mau tavana i papaihia ˈi?

³ Afea te buka Te mau tavana i te papairaahia? E piti parau i roto i te buka te tauturu mai ia tatou ia ite i te pahonoraa. Teie te parau matamua: “Te parahi noa ra te ati Iebusi . . . i Ierusalema i teie nei â mahana.” (Tav. 1:21) I te mea e ua haru mai te arii Davida i “te pare ra o Ziona” i te rima o te mau ati Iebusi i te vauraa o te matahiti o ta ˈna faatereraa (1070 H.T.T.), ua papaihia ïa Te mau tavana na mua ˈtu i taua taio mahana ra. (Sam. 2, 5:4-7) E maha taime e farereihia ˈi te piti o te parau: “Aore o Iseraela arii i te reira ra anotau.” (Tav. 17:6; 18:1; 19:1; 21:25) Ua papaihia ïa te buka i te hoê anotau te vai ra te hoê “arii i Iseraela,” oia hoi, i muri aˈe i to Saula riroraa mai ei arii matamua i te matahiti 1117 H.T.T. Ua papaihia ïa te reira i rotopu i te matahiti 1117 e 1070 H.T.T.

4. Na vai i papai i Te mau tavana?

⁴ O vai te taata papai? Ma te feaa ore, e tavini haapao maitai oia no Iehova. O Samuela noa tei itehia ei paruru no te haamoriraa a Iehova i taua area taime ra mai te mau tavana e tae atu i te mau arii ra, e oia atoa te matamua o te anairaa peropheta haapao maitai. No reira, mea tano ïa e na Samuela e papai i te aamu o te mau tavana.

5. Nafea te area tau o Te mau tavana e nehenehe ai e numerahia?

 ⁵ Eaha te maororaa o te tau i puohuhia e Te mau tavana? E nehenehe te reira e numerahia maoti Te mau arii 1, 6:1 o te faaite e ua haamata Solomona i te patu i te fare o Iehova i te maharaa o te matahiti o ta ˈna faatereraa, oia hoi i “te maha o te hanereraa e vau ahuru i te tiahapa i te matahiti, a reva mai ai te tamarii a Iseraela mai te fenua maira mai Aiphiti.” (I te mea e e numera nanairaa “te maha o te hanereraa e vau ahuru,” e au ïa te reira i te 479 matahiti taatoa.) I roto i na matahiti e 479, ua amuihia teie mau tau iteahia: e 40 matahiti i raro aˈe i te aratairaa a Mose i te medebara (Deut. 8:2), e 40 matahiti faatereraa a Saula (Ohi. 13:21), e 40 matahiti faatereraa a Davida (Sam. 2, 5:4, 5), e na matahiti matamua e 3 o te faatereraa a Solomona. Ia tatarahia teie taatoaraa 123 matahiti i roto i na matahiti e 479 e vai ra i roto i Te mau arii 1, 6:1, e toe mai e 356 matahiti no te anotau mai te taeraa ˈtu Iseraela i Kanaana e tae atu i te haamataraa o te faatereraa a Saula. * Ua tupu te mau ohipa i papaihia i roto i te buka Te mau tavana, mai te taime i pohe ai Iosua e tae atu i te tau o Samuela, fatata e 330 matahiti o taua tau ra e 356 matahiti.

6. Eaha te haapapu e e parau mau Te mau tavana?

⁶ Aita e feaaraa e e parau mau te buka Te mau tavana. Ua farii noa na iho â te mau ati Iuda i te reira ei tuhaa o te canon Bibilia. Ua faahiti te feia papai i te mau Papai Hebera e Heleni Kerisetiano i te reira, mai te itehia ra i roto i te Salamo 83:9-18; Isaia 9:4; 10:26; e Hebera 11:32-34. Ma te haavare ore, aita oia e huna ra i te mau hapa e te topa-faahou-raa o Iseraela, a faateitei atoa ˈi i te maitai rahi o Iehova. O Iehova, eiaha te hoê noa tavana taata, te faahanahanahia ei Faaora i Iseraela.

7. (a) Nafea te ihipǎpǎ e faatano ai i te buka Te mau tavana? (b) No te aha o Iehova i faaue ai ma te tia roa e haamou i te feia haamori ia Baala?

⁷ Hau atu â, te turu ra te mau itearaa a te ihipǎpǎ e e parau mau Te mau tavana. Te rahiraa o te mau haamatararaa, no nia ïa i te huru haamoriraa a to Kanaana ia Baala. Taa ê atu i te mau faahitiraa a te Bibilia, mea iti roa o tei itehia mai no nia i te haamoriraa ia Baala na mua ˈˈe i eruhia ˈi te oire tahito o Ougarit (i teie tau, o Ras Shamra i te fenua o Suria i te tahi pae mai i te poro apatoerau hitia o te râ o te motu no Kupero), o tei haamata i te matahiti 1929. I reira, ua faaitehia e e peu matauhia i roto i te haapaoraa a Baala te nounou taoˈa, te here aiˈa puai, e te haamoriraa i te melo taatiraa. Te vai ra ta te oire taitahi no Kanaana ta ˈna iho vahi haamoriraa ia Baala oia atoa te mau vahi teitei. I roto i te mau vahi haamoriraa, te vai ra paha te mau hohoˈa no Baala, e i pihai iho i te mau fata, i rapaeau, e itehia te mau pou ofai—peneiaˈe te mau faahohoˈaraa o te melo taatiraa o Baala. Ua tafetafeta teie mau vahi moˈa i te toto o te mau tusia taata faufau. A viivii ai to Iseraela i te haamoriraa a Baala, ua pûpû atoa ratou i to ratou mau tamaroa e mau tamahine. (Ier. 32:35) Te vai atoa ra te hoê tii e faahohoˈa ra i te metua vahine o Baala, o Asherah. Te haamorihia ra o Asetarota, te vahine a Baala, te ruahine o te hotu rahi, na roto i te mau peu taatiraa tino hairiiri, a riro ai te mau tane e te mau vahine ei faaturi “moˈa” i te hiero. E ere i te mea maere e ua faaue Iehova ia haamouhia te haamoriraa a Baala e te feia i pee i te reira mai te animala ra te huru. “Eiaha roa to mata e faaherehere ia ratou. Eiaha hoi oe e haamori i to ratou mau atua.”—Deut. 7:16. *

TUMU PARAU O TE MAU TAVANA

8. Nafea Te mau tavana i te tatuhaa-maitai-raahia?

⁸ Ua vahi-maitai-hia te buka na roto e toru tuhaa. E faaite na pene matamua i te mau huru tupuraa i Iseraela i taua anotau ra. E faatia te pene 3 e tae atu i te 16 i te mau faaoraraa i ravehia e na tavana 12. E faataa te pene 17 e tae atu i te 21 i te tahi mau aroraa ratou ratou iho i Iseraela.

9. Eaha te huru tupuraa e horoahia e na pene matamua e piti o Te mau tavana?

⁹ Mau huru tupuraa i Iseraela i te anotau o te mau tavana (1:1–2:23). E faahitihia te huru o te mau opu o Iseraela a purara ˈi ratou no te faaea i nia i te mau fenua i faataahia no ratou. Teie râ, maoti i te tiahi roa i to Kanaana, e faahepo to Iseraela e rave rahi o ratou e rave i te ohipa, a faatia ˈtu ai e faaea i rotopu ia ratou. No reira te melahi a Iehova e parau ai e, “E riro râ ratou ei tara i to outou aoao, e to ratou mau atua e riro ïa ei tafifi ia outou.” (2:3) No reira, a tia mai ai te hoê ui apî o te ore e ite ia Iehova e ta ˈna mau ohipa, e faarue oioi te nunaa ia ˈna no te tavini ia Baala ma e te tahi atu mau atua. No te mea e tairi te rima o Iehova ia ratou i te ati, “ati roa aˈera ratou.” No to ratou etaeta e te hinaaro ore e faaroo tae noa ˈtu i te mau tavana, eita Iehova e tiahi hoê noa ˈˈe o te mau nunaa ta ˈna i vaiiho no te tamata ia Iseraela. E tauturu teie mau mea ia taa maitai ia tatou te mau ohipa e tupu i muri mai.—2:15.

10. E haava o Otaniela na roto i teihea mana, e eaha te faahopearaa?

¹⁰ Te tavana ra o Otaniela (3:1-11). I te mea e te ahoaho ra ratou no to ratou tapearaahia e to Kanaana, e haamata te mau tamarii a Iseraela i te tiaoro ia Iehova e tauturu ia ratou. E haamau na mua oia ia Otaniela ei tavana. E haava anei Otaniela na roto i te mana e te paari o te taata? Eita, inaha e taio tatou e: ‘Tei nia te  varua o Iehova ia ˈna’ no te haavî i te mau enemi o Iseraela. “Hau ihora taua fenua ra, e a maha aˈera ahururaa o te matahiti.”—3:10, 11.

11. Nafea Iehova e faaohipa ˈi ia Ehuda no te faaora ia Iseraela?

¹¹ Te tavana ra o Ehuda (3:12-30). A vai ai te mau tamarii a Iseraela i raro aˈe i te faatereraa a te arii no Moabi ra o Egalona i te maororaa 18 matahiti, e faaroo faahou â Iehova i ta ratou mau tiaororaa i te tauturu, e e haamau oia i te tavana ra o Ehuda. Ia fariihia oia e paraparau atu oia anaˈe e te arii, e huti mai o Ehuda te taata rima aui ra i ta ˈna ˈoˈe tei hamanihia e a ˈna, mai raro aˈe mai i to ˈna ahu e e patia oia i te reira i roto i te opu poria o Egalona. E tahoê oioi mai o Iseraela i te pae o Ehuda i roto i te aroraa ia Moabi, e e oaoa faahou te fenua i te hau ta te Atua e horoa, no te roaraa e 80 matahiti.

12. Na te aha e faaite mai e ua upootia o Samagara maoti te mana o te Atua?

¹² Te tavana ra o Samagara (3:31). E faaora o Samagara ia Iseraela ma te tairi e 600 ati Philiseti. Maoti te mana o Iehova i noaa mai ai te upootiaraa, o te faaitehia ïa e te mauhaa ta ˈna e faaohipa—te hoê noa patia puaatoro.

13. Eaha te mau ohipa faahiahia e haamatarahia i roto i te himene upootiaraa a Baraka raua o Debora?

¹³ Te tavana ra o Baraka (4:1–5:31). I muri iho, e faatîtîhia Iseraela e te arii no Kanaana ra o Iabina e te raatira o ta ˈna nuu, o Sisera, o te faateitei no ta ˈna mau pereoo tamaˈi e 900 i tamauhia i te auri rahi tâpû matie. No te mea e tiaoro faahou Iseraela ia Iehova, e haamau Oia i te tavana ra o Baraka, o te turu-maitai-hia e te peropheta vahine ra o Debora. Ia ore Baraka e ta ˈna nuu ia faateitei, e faaite Debora e e arataihia te aroraa e Iehova, e e tohu oia e: “E riro hoi Iehova i te horoa ia Sisera i te rima o te hoê vahine.” (4:9) E titau Baraka i te mau tane no Naphatali e no Zebuluna i te mouˈa ra o Tabora. I reira ta ˈna nuu 10 000 taata e haere ai e aro. E upootia te faaroo puai i taua mahana ra. ‘E faatupu Iehova i te arepurepuraa i nia ia Sisera e ta ˈna mau pereoo tamaˈi atoa e i roto i te puhapa taatoa,’ a haaparemo ai ia ratou i te hoê pape pue e tahe taue mai i roto i te faa no Kisona. “Aore roa ˈˈera te hoê taata i toe.” (4:15, MN, 16) Na Iaela, te vahine a Hebera te ati Keni ra, e faaoti roa i te haapoheraa na roto i te patiaraa i te hoê pou iti o te fare ie i roto i te upoo o Sisera tei horo hoi i roto i to ˈna fare ie. “Pau ihora . . . Iabina i te Atua.” (4:23) E faaite Debora raua Baraka i te oaoa na roto i te himene, ma te faahanahana i te puai pau ore o Iehova o tei turai atoa i te mau fetia ia aro ia Sisera mai nia mai i to ratou vairaa. Oia mau, e taime ïa no te “haamaitai ia Iehova”! (5:2) E maha ahuru matahiti te hau e fanaˈohia ˈi i muri mai i te reira.

14, 15. Eaha te tapao o te tauturu a Iehova e roaa ia Gideona, e nafea taua tauturu ra e haapapuhia ˈi i roto i te pau hopea o to Midiana?

¹⁴ Te tavana ra o Gideona (6:1–9:57). E rave faahou â te mau tamarii a Iseraela i te ino, e e pau te fenua i te mau eiâraa a to Midiana. Na roto i te arai o ta ˈna melahi, e haamau Iehova ia Gideona ei tavana, e e haapapu roa ˈtu Iehova iho na roto i te mau parau ra, “Ei pihai-mau-iho vau ia oe.” (6:16) Te ohipa itoito matamua a Gideona, o te haaparariraa ïa i te fata a Baala i roto i to ˈna iho oire. I teie nei e haere mai te mau nuu amui a te enemi i Iezereela, e ‘e haere mai te varua o Iehova i nia ia Gideona’ a haaputuputu ai oia ia Iseraela no te aroraa. (6:34) Na roto i te tamataraa e vaiiho i te hoê otaa huruhuru mamoe i raro aˈe i te hupe i te vahi papairaa sitona ra, e tapao toopiti tei noaa ia Gideona e tei pihai iho te Atua ia ˈna.

¹⁵ E parau Iehova ia Gideona e ua rahi roa ta ˈna nuu e 32 000 taata e e nehenehe te reira e horoa mai i te tahi tumu no te faaahaaha ia noaa te upootiaraa. E faahoˈi-na-mua-hia te feia e mǎtaˈu ra i ǒ ratou, e toe noa mai 10 000. (Tav. 7:3; Deut. 20:8) I muri aˈe, na roto i te tamataraa ia au i ta ratou huru inuraa i te pape, e faahoˈihia te rahiraa taa ê noa ˈtu na taata e 300 tei ara maite e tei haapao maite. E haere Gideona e hiˈopoa haere i te puhapa o to Midiana i te po e e tamahanahanahia oia ia faaroo oia i te hoê taata e tatara ra i te auraa o te hoê moemoeâ a na ô ai e: “O te ˈoˈe te reira a Gideona . . . Ua horoa te Atua i te ati Midiana, e te nuu atoa nei, i tana rima.” (Tav. 7:14) E haamori Gideona i te Atua e i muri iho e faataa oia i to ˈna mau taata na roto e toru pǔpǔ e ati aˈe te puhapa o to Midiana. E ore taue te hau o te po i te otoraa pu, te parariraa te mau farii pape rarahi, te anaana o te mau lamepa, e te piiraa o na feia e 300 a Gideona, “O te ˈoˈe a Iehova, e ta Gideona!” (7:20) Tei roto te puhapa enemi i te huananeraa. E aro te mau taata te tahi i te tahi e e horo ê ratou. E aˈuaˈu Iseraela ia ratou, a haamou atu ai e a haapohe ai i to ratou mau hui arii. E ani te nunaa o Iseraela ia Gideona e faatere ia ratou, eita râ oia e farii, a parau ai e, “O Iehova to nia iho ia outou.” (8:23) E hamani râ oia i te hoê ephoda i te taoˈa i haruhia i te tamaˈi, o te faahanahana-rahi-hia i muri aˈe e o te riro ïa ei marei no Gideona e to ˈna utuafare. Ua vai te fenua i roto i te hau e 40 matahiti i raro aˈe i te faatereraa a te tavana ra o Gideona.

16. Eaha te ati e tupu i nia ia Abimeleka, te taata haru tiaraa?

¹⁶ E haru o Abimeleka, te hoê o te mau tamaiti a Gideona tei fanauhia e te hoê vahine i faaea-noa-hia, i te faatereraa i muri aˈe i te poheraa o Gideona, e e haapohe oia i to ˈna mau taetaeae e 70. O Iotama anaˈe, te tamaiti hopea a Gideona, te ora mai, e e faahiti oia i te utua a Abimeleka i nia i te mouˈa Gerezima ra. I roto i teie parabole o te mau tumu raau, e faaau oia i te “toroa arii” o Abimeleka i te mau tataramoa. Eita e maoro e faaruru o Abimeleka i te tamaˈi i roto i to ˈna iho i Sekema e e faahaehaahia oia ia pohe oia i te hoê vahine tei taora i te tahi ofai oro mai nia mai i te pare o Tebesa, ma te haaparari i to ˈna upoo.—Tav. 9:53; Sam. 2, 11:21.

17. Eaha ta te buka e parau ra no nia i te mau tavana ra o Tola e o Iaira?

 ¹⁷ Te mau tavana ra o Tola e o Iaira (10:1-5). O raua te tia mai i muri aˈe no te rave i te mau faaoraraa na roto i te mana o Iehova, ma te haava e 23 matahiti i te maororaa ta te tahi e e 22 ta te tahi.

18. (a) Eaha te faaoraraa ta Iepheta e faatupu? (b) Eaha te euhe ia Iehova ta Iepheta e rave ma te haapao maitai? Nafea?

¹⁸ Te tavana ra o Iepheta (10:6–12:7). A tamau noa ˈi Iseraela i te haamori i te idolo, e riri uˈana Iehova i te nunaa. I teie nei, e haavîhia ratou e to Amona e to Philiseti. E faahoˈihia mai Iepheta mai to ˈna tiahiraahia no te aratai ia Iseraela i roto i te aroraa. O vai râ te haava mau i roto i teie mârôraa? Na te mau parau a Iepheta iho e horoa mai i te pahonoraa: “Ei te haava ra, ei ia Iehova, te tuu mai i te parau i te tamarii a Iseraela, e te tamarii a Amona, aauanei.” (11:27) A haere mai ai te varua o Iehova i nia ia ˈna, e euhe oia e ia hoˈi mai oia mai i ǒ i te mau ati Amona ra ma te hau, e pûpû oia i te taata matamua e haere mai i rapae i to ˈna fare e farerei ia ˈna, na Iehova. E pau Amona ia Iepheta i te haapoheraa rahi. Ia hoˈi oia i to ˈna fare i Mizepe, o ta ˈna iho tamahine te horo mai na mua e farerei ia ˈna ma te oaoa i te upootiaraa a Iehova. E haapao oia i ta ˈna euhe—eita, e ere na roto i te tusia taata a te etene ia au i te mau peu a Baala, ma te pûpû râ i teie tamahine otahi ia tavini oia i roto i te fare o Iehova ei arueraa Ia ˈna.

19. Eaha te mau tupuraa e aratai i te tamataraa o te “Shiboleta”?

¹⁹ I teie nei, e faaite te mau tane no Epheraima i te mauruuru ore no te mea aita ratou i titauhia no te aro ia Amona, e e haamǎtaˈu ratou ia Iepheta, o te faahepohia ïa ia faaotohe ia ratou. I te taatoaraa, e 42 000 ati Epheraima tei taparahi-pohe-hia, e rave rahi o ratou i te vahi papaˈu o Ioridana, i reira to ratou iteraahia no te parau-hape-raa i te parau ra “Shiboleta.” E tamau noa Iepheta i te haava ia Iseraela e ono matahiti i te maoro.—12:6.

20. O vai na tavana e toru e faahitihia i muri mai?

²⁰ Te mau tavana ra o Ibesana, Elona, e o Abadona (12:8-15). Noa ˈtu te iti tei faahitihia no nia ia ratou, ua haava ratou e hitu matahiti te tahi, hoê ahuru te tahi, e e vau te tahi.

21, 22. (a) Eaha te mau ohipa puai ta Samasona e rave, e na roto i teihea mana? (b) Nafea Samasona e pau ai i to Philiseti? (c) Eaha te mau tupuraa e hope na roto i te ohipa rarahi roa ˈˈe a Samasona, e o vai te haamanaˈo ia ˈna i taua taime ra?

²¹ Te tavana ra o Samasona (13:1–16:31). E topa faahou â o Iseraela i raro aˈe i te haavîraa a to Philiseti. I teie taime, o Samasona ta Iehova e haamau ei haava. E faataa to ˈna nau metua ia ˈna ei Nazira i to ˈna fanauraa, e e titauhia ia ore roa te hahu ia tae i nia i to ˈna rouru. A paari ai oia, e haamaitai Iehova ia ˈna, e ‘e rave mai te varua o Iehova ia ˈna i to ˈna ra mahana.’ (13:25) E ere to ˈna puai no roto mai i te mau uaua taata, no ǒ mai râ i te mana o Iehova ra. I te taime ‘ei nia ˈi te varua o Iehova ia ˈna’ e noaa ˈi ia ˈna te puai no te haapohe i te hoê liona aore e mauhaa i to ˈna rima e i muri iho no te faaaufau i te haavare a to Philiseti na roto i te taparahi-pohe-raa e 30 o ratou. (14:6, 19) No te mea e tamau noa to Philiseti i te ohipa haavare no to ˈna faaipoiporaa i te hoê potii ati Philiseti, e rave Samasona e 300 alope, e taai oia i te aero o te tahi i te tahi, e taamu oia i te omoi auahi i ropu i to ratou aero e e tuu atu ai ia ratou i roto i te mau faaapu maa huero, te mau ô vine, e te mau tumu olive a to Philiseti ia ama te reira i te auahi. E e rave oia i te hoê taparahiraa rahi i nia i to Philiseti, “ma te haapue i te mau avae i nia i te mau humaha.” (15:8, MN) E turai to Philiseti i to ˈna mau hoa ati Iseraela, e feia no Iuda, ia taamu ia Samasona e ia tuu mai ia ˈna ia ratou ra, ‘e haere’ faahou mai râ ‘te varua o Iehova i nia ia ˈna,’ e e tahe to ˈna mau taamu i nia i to ˈna rima. E taparahi pohe Samasona hoê tausani ati Philiseti—“hoê pueraa, e piti pueraa!” (15:14-16, MN) Ta ˈna mauhaa haamouraa? Te hoê ivi taa asini ota. E haamâha Iehova i te rohirohi o ta ˈna tavini ma te faatahe semeio i te hoê vai pihaa i te vahi aroraa.

²² I muri iho, e taoto Samasona hoê po i te fare o te hoê vahine faaturi i Gaza, i reira to Philiseti e haaati ai ia ˈna ma te maniania ore. Tei nia faahou râ te varua o Iehova ia ˈna ia tia mai oia i te tuiraa po, e tatara roa oia i te mau opani o te uputa oire e te mau pou, e afai atu ai i nia i te tupuai mouˈa i te tahi pae mai ia Heberona. I muri iho, e faahinaaro oia i te vahine haavare ra o Delila. Ei mauhaa manaˈo tae na to Philiseti, e haapeapea oia ia Samasona e tae roa i te taime e faaite ai oia e e Nazira oia e na to ˈna rouru roroa, te tumu mau o to ˈna puai rahi, e faaite i to ˈna taairaa ia Iehova. A taoto ai oia, e rave o Delila e ia tâpûhia to ˈna rouru. I teie haereraa, e faufaa ore ia ara mai oia no te aro, inaha “ua faarue Iehova ia ˈna.” (16:20) E haru to Philiseti ia ˈna, e paaro ratou i to ˈna mata, e e tuu atu ai ia ˈna e taviri i te huero ei tîtî i roto i ta ratou fare tapearaa. A tae mai ai te taime no te hoê oroa rahi faahanahanaraa i to ratou atua ra o Dagona, e afai mai to Philiseti ia Samasona i rapae no te faaarearea ia ratou. Ma te ore e haapao e ua roa e ua meumeu faahou â to ˈna rouru, e faatia ratou ia ˈna i rotopu i na pou e piti o te fare tei faaohipahia no te haamori ia Dagona. E tiaoro Samasona ia Iehova e: “E tau Fatu, e Iehova, e haamanaˈo mai oe ia ˈu, o ta ˈu ïa pure ia oe i teie nei, e faaetaeta mai oe ia ˈu nei, hoê roa ra faaetaetaraa toe o teie anaˈe nei.” E haamanaˈo Iehova ia ˈna. E haru Samasona i te mau pou e ‘e piˈo oia i raro e e faahope oia i te puai’—te puai o Iehova—‘e e mairi te fare i raro, e rahi atu ai te feia i pohe i taua poheraa no ˈna ra, i tei taparahihia e ana i te oraraa ra.’—16:28-30.

23. Eaha te mau ohipa e faatiahia i roto i te pene 17 e tae atu i te 21, e afea to ratou tupuraa?

²³ Tei roto tatou i teie nei i te mau pene 17 e tae atu i te 21, o te faataa i te tahi mau aroraa ratou ratou iho i haapeapea i to Iseraela i taua anotau ra. Ua tupu oioi  teie mau ohipa i te omuaraa o te anotau o te mau tavana, inaha te parauhia ra e te ora noa râ Ionatana e Phinehasa, mau mootua a Mose e a Aarona.

24. Nafea te tahi mau ati Dana e haamau ai i ta ratou iho haapaoraa?

²⁴ Mika e te mau ati Dana (17:1–18:31). E haamau o Mika, te hoê taata no Epheraima, i ta ˈna iho faanahonahoraa i te pae faaroo, te hoê ‘fare no te mau atua,’ te hoê fare haamoriraa idolo, e te hoê hohoˈa otiotihia e te hoê tahuˈa ati Levi. (17:5) E haere mai te feia no te opu o Dana na reira no te maimi i te tahi tufaa i te pae apatoerau. E rave ratou i te mau taoˈa pae faaroo a Mika e ta ˈna tahuˈa, e e haere atu ratou i te atearaa i te pae apatoerau e haamou i te oire o Laisa o te ore e manaˈo ra e e roohia ratou i te ati. Ei monoraa i te reira, e patu ratou i to ratou iho oire o Dana e e faatia ratou i te hohoˈa otiotihia ra a Mika. E pee ïa ratou i te haapaoraa ta ratou iho i maiti i te mau mahana atoa a vai ai te fare o te haamoriraa mau a Iehova i Silo.

25. Nafea te aroraa ratou ratou iho i Iseraela e tae ai i te faito rahi i Gibea?

²⁵ Te hara a Beniamina i Gibea (19:1–21:25). E aratai te ohipa i tupu i muri mai ia Hosea ia parau e: “Ua hara oe, e Iseraela e, mai te anotau mai â i Gibea ra.” (Hos. 10:9) A hoˈi ai oia i te fare e ta ˈna vahine faaea, e taoto te hoê ati Levi no Epheraima hoê po i ǒ i te hoê taata ruhiruhia ra i Gibea a Beniamina. E haaati te feia aita e ohipa maitai o te oire i te fare ma te titau e e rave ratou i te peu taatiraa e te ati Levi ra. E farii râ ratou e rave maoti i ta ˈna vahine faaea e e rave ino ratou ia ˈna i te po taatoa. E iteahia oia e ua pohe i raro i te uputa ia poipoi aˈe. E faahoˈi te ati Levi i to ˈna tino i te fare, e tâpûpû oia ia ˈna na roto 12 tuhaa, e e hapono oia i te reira i te mau vahi atoa o Iseraela. Mea na reira ïa na opu fetii 12 e tamatahia ˈi. E faautua anei ratou ia Gibea e e faaore anei ratou i te peu morare tia ore i Iseraela? E haafaufaa ore Beniamina i teie hara faufau. E amui mai vetahi mau opu fetii i mua i te aro o Iehova i Mizepe, i reira ratou e opua ˈi e haere e aro ia Beniamina i Gibea na roto i te tufa kelero. I muri aˈe i na pau e piti i haamanii i te toto, e upootia te tahi atu mau opu fetii maoti te moemoeraa e e mou ia ratou fatata te taatoaraa o te opu o Beniamina, e 600 feia anaˈe te horo i te mato ra o Rimona. Ia maoro rii, e tatarahapa Iseraela i te tâpû-ê-raahia te hoê opu fetii. E rave ratou e horoa i te mau vahine na te mau ati Beniamina no roto mai i te mau tamahine no Iabesa-gileada e no Silo. E faahope te reira i te faatiaraa o te aroraa e te haafifiraa i Iseraela. Mai ta te mau parau hopea a Te mau tavana e parau faahou ra, “Aore o Iseraela arii i te reira ra anotau: rave atura te taata atoa i tei au ia ˈna ihora.”—Tav. 21:25.

FAUFAARAA

26. Eaha te mau faaararaa puai e vai ra i roto i Te mau tavana e au atoa no teie mahana?

²⁶ E ere roa ˈtu te buka Te mau tavana i te hoê buka no nia i te mau aroraa e te mau faataheraa toto, e faateitei râ te reira ia Iehova ei Faaora rahi no to ˈna nunaa. E faaite te reira nafea to ˈna aroha hamani maitai e to ˈna faaoromai faito ore i faaitehia ˈi i nia i te nunaa i mairihia i to ˈna iˈoa i to ratou hoˈiraa mai ia ˈna ra ma te mafatu tatarahapa. Mea faufaa roa Te mau tavana ia paruru te reira ma te haavare ore i te haamoriraa a Iehova e ta ˈna mau faaararaa puai no nia i te maamaa o te haapaoraa a te demoni, te anoiraa i te haapaoraa e te mau amuiraa tia ore i te pae morare. Ia turai te faautuaraa etaeta a Iehova i te haamoriraa a Baala, ia tatou ia faataa ê mai i te mau mea e tuea ra i te reira i teie tau apî, oia te nounou taoˈa, te here aiˈa, e te peu taatiraa tia ore i te pae morare.—2:11-18.

27. Nafea tatou e faufaahia ˈi i te hiˈoraa maitai o te mau tavana?

²⁷ Ia hiˈopoa tatou i te faaroo mǎtaˈu ore e te itoito o te mau tavana, e tupu atoa te hoê faaroo mai teie i roto i to tatou mafatu. E ere ïa i te mea maere e ua faahitihia ratou ma te mahanahana mau i roto i te Hebera 11:32-34! Ua aro ratou no te haamoˈa i te iˈoa o Iehova, eiaha râ na roto i to ratou iho puai. Ua ite ratou i te tumu o to ratou mana, te varua ïa o Iehova, e ua farii ratou i te reira ma te haehaa. I teie atoa mahana, e nehenehe tatou e rave i te ‘ˈoˈe a te varua,’ te Parau a te Atua, ma te tiaturi e e haapuai mai te Atua ia tatou mai ia ˈna i haapuai ia Baraka, Gideona, Iepheta, Samasona, e te tahi atu â. Oia mau, no te faaruru i te mau fifi, maoti te tauturu a te varua o Iehova, e nehenehe tatou e puai mai i te pae varua mai ia Samasona i puai na i te pae tino ia pure mau â tatou ia Iehova e ia turui tatou i nia ia ˈna.—Eph. 6:17, 18; Tav. 16:28.

28. Nafea te buka Te mau tavana e haamatara ˈi i te haamoˈaraa i te iˈoa o Iehova na roto i te Huero o te Basileia?

²⁸ Ua faahiti te peropheta Isaia i Te mau tavana i roto e piti vahi no te faaite nafea Iehova e haamarua ˈi ma te papu i te zugo ta To ˈna mau enemi e tuu ra i nia i to ˈna nunaa, mai ta ˈna i rave i te tau o to Midiana. (Isa. 9:4; 10:26) E haamanaˈo atoa mai te reira ia tatou i te himene a Debora e a Baraka, i hope na roto i te pure puai ra: “Ia na reira atoa te mau enemi atoa no oe i te pohe, e Iehova e: area te feia i [here] ia ˈna ra, ia riro ïa ratou, mai te mahana ia hiti mai to ˈna anaana rahi ra!” (Tav. 5:31; MN) O vai teie feia e here ra ia ˈna? Ma te faaite e o te feia aiˈa o te Basileia, ua faaohipa Iesu i te hoê parau mai te reira i roto i te Mataio 13:43: “Ei reira te feia parau-tia e anaana mai ai i te basileia o to ratou ra Metua mai te anaana o te mahana ra.” Te faaite ra ïa te buka Te mau tavana i te taime e faaohipa ˈi te Haava parau-tia e te Huero o te Basileia ra o Iesu, i to ˈna mana. Na roto i to ˈna arai, e faahanahana e e haamoˈa Iehova i To ˈna iˈoa, ia au i te pure a te taata papai salamo no nia i te mau enemi o te Atua: “Na reira oe ia ratou mai ta oe i rave ia Midiana; e ia Sisera e ia Iabina i te pape ra ia Kisona . . . Ia ite te taata atoa e, o Iehova to oe iˈoa, e o oe anaˈe tei Teitei i te fenua atoa nei.”—Sal. 83:9, 18; Tav. 5:20, 21.

[Nota i raro i te api]

[Uiraa haapiiraa]