Faahohonuraa i te mau Papai faauruahia e to ratou tupuraa mau

Faahohonuraa numera 2—Te tau e te mau Papai Moˈa

Te vahiraa i te tau ia au i te Bibilia, te mau tarena matauhia, te mau matahiti faufaa a te Bibilia, e te tahi mau manaˈo faahiahia no nia i “te tau.”

1, 2. Eaha ta Solomona i papai no nia i te taime, e ia hiˈohia te tere o te taime, e nafea tatou e faaohipa ˈtu ai?

 MEA taa maitai i te taata e te mairi ra te tau. I te mau tetoni atoa e faaroohia ˈi te hora, te haere ra oia i mua ˈtu â i roto i te tau. Mea paari mau ïa oia ia faaohipa maitai oia i to ˈna taime. Mai ta te arii Solomona i papai: “E tau to te mau mea atoa nei, e taime to te mau mea atoa i imihia i raro aˈe i te raˈi nei. E taime to te fanau, e taime to te pohe; e taime to te tanu, e taime to te iriti i tei tanuhia ra. E taime to te taparahi, e taime to te faaora; e taime to te vavahi i raro, e taime to te patu tia i nia ra. E taime to te oto, e taime to te ata.” (Koh. 3:1-4) Mea tere mau â te taime! E poto roa na matahiti e 70 o te hoê oraraa au noa e noaa rahi ai i te hoê taata te ite e e fanaˈo ai oia i te tahi atu mau mea maitatai atoa ta Iehova i horoa na te taata i te fenua nei. “Ua faanehenehe oia i te mau mea atoa i te tau mau ra, e ua tuu [atoa] oia i te manaˈo [o te tau otia ore] i roto i to ratou aau; aita râ e taata i ite i te ohipa a te Atua mai te matamua mai e tae noa ˈtu i te hopea.”—Koh. 3:11; MN; Sal. 90:10.

² Te ora ra Iehova iho i roto i te mure-ore-raa o te tau. No nia i ta ˈna i poiete, ua au ia ˈna i te tuu ia ratou i roto i te tau. Mea taa maitai roa i te mau melahi o te raˈi, tae noa ˈtu ia Satani te orure hau, e te mairi ra te tau. (Dan. 10:13; Apo. 12:12) Ua parauhia no nia i te taata e “e tau e e tupuraa manaˈo-ore-hia hoi to te taata atoa ra.” (Koh. 9:11, MN) E ao to te taata e haamanaˈo tamau i te Atua e e farii maite i te faanahoraa a te Atua no te horoa mai i te “maa i te hora mau ra”!—Mat. 24:45.

3. Eaha te auraa i rotopu i te taime e te ao nui?

³ E tere te tau i te hoê noa paeau. Noa ˈtu e e au te tau i te ao taatoa, aita e taata e nehenehe e faataa i te reira. Hoê â to ˈna hohonuraa e to te ao nui. Aita e taata e nehenehe e faataa ihea oia e haamata ˈi e te haere ra oia ihea. Tei ia Iehova anaˈe te reira, maoti to ˈna ite otia ore, oia te faataahia mai “te Atua, mai tahito mai â e a muri noa ˈtu!”—Sal. 90:2.

4. Eaha te nehenehe e parauhia no nia i te tereraa o te tau?

⁴ Te vai ra râ te tahi mau mea no nia i te tau e nehenehe e taahia. E nehenehe e faitohia to ˈna tere. Hau atu â, e haere atu oia i te hoê noa paeau. Mai te tereraa pereoo i nia i te hoê purumu hoê noa paeau te haereraa, e tere atu te tau i taua noâ paeau ra—i mua, i mua noa. Noa ˈtu eaha to ˈna tere, eita e nehenehe e faahoˈi mai ia ˈna i muri. E taime poto noa teie nei taime. Te tere nei râ teie nei taime, te mairi noa ˈtura i muri. Aita to ˈna e faaearaa.

5. No te aha e nehenehe ai e parau e ua manuïa aore ra ua mâuˈa te tau i mairi?

⁵ Te tau i mairi. Ua oti te tau i mairi, ua riro ei aamu, e eita oia e nehenehe e na nia-iho-hia. E au te tamataraa i te faahoˈi mai ia ˈna i te tamataraa i te faahoˈi i te pape i topa i nia i te aivi aore ra i te faahoˈi i te ohe i nia i te teˈa. Ua tapao ta tatou mau hape i te tau, e o Iehova anaˈe te nehenehe e faaore i te reira tapao. (Isa. 43:25) Oia atoa, e vai noa te mau ohipa tahito maitatai a te hoê taata e e ‘hoˈi mai i nia ia ˈna’ ma te mau haamaitairaa no ǒ mai ia Iehova ra. (Mas. 12:14, MN; 13:22) Ua manuïa aore ra ua mâuˈa te tau i mairi. Aita e ravea faahou i nia ia ˈna. Teie tei papaihia no nia i te feia iino: “E ore hoi e maoro ua motu mai te aihere ra, e maehe atura mai te raau rii heeuri ra.”—Sal. 37:2.

6. Nafea te tau i mua e taa ê ai i te tau i mairi, e no te aha e tia ˈi ia anaanatae taa ê tatou i te reira?

⁶ Te tau i mua. Mea ê te tau i mua. Te tere maira  ia tatou ra. Maoti te tauturu a te Parau a te Atua, e nehenehe tatou e ite atu i te mau haafifiraa e faura mai i mua ia tatou e e faaineine i te faaruru atu. E nehenehe tatou e haapue i ‘te taoˈa na tatou i nia i te raˈi.’ (Mat. 6:20) Eita teie mau taoˈa e hopoi-ê-hia e te tau. E vai noa mai ia tatou ra e tae roa ˈtu i te tau haamaitairaa mure ore i mua nei. E tapitapi tatou i te faaohipa i te tau ma te paari i te mea e ua taaihia to tatou tau i mua nei i te reira.—Eph. 5:15, 16.

7. Eaha te mau mea ta Iehova i horoa na te taata o te faaite i te tau?

⁷ Te mau mea o te faaite i te tau. E mau mea o te faaite i te tau te mau uati e mau hora o to tatou nei tau. E mau ravea faitoraa i te tau te reira. Oia atoa, ua faaohu te Atua Poiete ra o Iehova i te mau mea rarahi o te faaite i te tau—te fenua o te ohu, te avaˈe o te haaati i te fenua, e te mahana—ia taa maitai i te taata i nia i te fenua eaha mau ra te taime. “Ua parau ihora te Atua, Ei tiarama to roto i te reva i te raˈi ra, ei faataa i te rui e te ao: e ei tapao ïa, e ei faaite no te mau tau, e no te mau mahana, e no te mau matahiti.” (Gen. 1:14) Inaha, ei pueraa taoˈa i poietehia ma te mau fa amui, e tere teie mau mea i nia i te raˈi ma te mau ohuraa maitai roa, a faito ai ma te hope ore e te hape ore i te tereraa o te tau i te hoê noa paeau.

8. Eaha te mau auraa rau o te taˈo ra “mahana” i roto i te Bibilia?

⁸ Te mahana. E rau te auraa o te taˈo ra “mahana” i roto i te Bibilia, e faaauraa rau atoa to te reira i teie nei tau. Ua ohu anaˈe te fenua i nia ia ˈna iho hoê ohuraa, ua tia ïa hoê mahana e 24 hora. I ǒ nei, hoê mahana, o te ao ïa e te po, te hoê taatoaraa e 24 hora. (Ioa. 20:19) E parau-atoa-hia râ te taime maramarama iho, te hoê ïa faito au noa 12 hora, e mahana (Farani). “Mairi ihora te Atua i to te maramarama iˈoa, E ao [Farani, mahana], e mairi ihora oia i to te pouri iˈoa, E rui.” (Gen. 1:5) E aratai te reira ia tatou i nia i te taˈo ra “rui,” te taime pouri fatata 12 hora. (Exo. 10:13) Te tahi atu auraa o te parau ra “te (mau) mahana,” o te anotau ïa o te hoê taata tuiroo. Ei hiˈoraa, ua ite Isaia i ta ˈna orama “i te anotau [aore ra mau mahana] ia Uzia, ia Iotama, ia Ahaza, e ia Hezekia” (Isa. 1:1), e te parauhia ra e e anotau parau tohu te mau mahana o Noa e o Lota. (Luka 17:26-30) Te tahi atu hiˈoraa o te faaohiparaa ohie aore ra taipe o te taˈo ra “mahana,” o te parau ïa a Petero ‘hoê â hete ia Iehova te mahana hoê e te matahiti hoê tausani ra.’ (Pet. 2, 3:8) I roto i te Genese, e tau roa ˈtu â te mahana poieteraa—e mau tausani matahiti ïa. (Gen. 2:2, 3; Exo. 20:11) Na te mau irava tapiri e faaite eaha te auraa o te taˈo ra “mahana.”

9. (a) Nohea mai te vahiraahia te mahana na roto e 24 hora e e 60 minuti i te hora? (b) Eaha te mau mea o te faaite i te taime i roto i te mau Papai Hebera?

⁹ Te hora. Na to Aiphiti i rave e vahi i te mahana na roto e 24 hora. Area te vahiraa o teie nei tau i te hora na roto e 60 minuti, na te matematika Babulonia ïa te reira, e faanahoraa tataiono ahuru (niuhia i nia i te numera 60). Aita e vahiraa na roto i te mau hora i roto i te mau Papai Hebera. * Maoti i te vahi i te mahana na roto i te mau hora taa maitai, e faaohipa te mau Papai Hebera i te mau parau mai teie, “poipoi,” “avatea,” e “ahiahi” ei faaiteraa i te taime. (Gen. 24:11; 43:16; Deut. 28:29; Arii 1, 18:26) E vahihia te po na roto e toru tuhaa parauhia “te mau araraa” (Sal. 63:6), e piti te faataa-maitai-hia i roto i te Bibilia: “te araraa i ropu” (Tav. 7:19) e “te araraa poipoi.”—Exo. 14:24; Sam. 1, 11:11.

10. Nafea te ati Iuda e taio ai i te hora i te tau o Iesu, e nafea te iteraa i te reira e tauturu mai ai ia faataa i te hora i pohe ai Iesu?

¹⁰ Area i roto i te mau Papai Heleni Kerisetiano ra, mea pinepine ïa te faahitiraahia te parau ra “hora.” (Ioa. 12:23; Mat. 20:2-6) E taiohia na te mau hora mai te hitiraa mai o te mahana, i te area hora 6 ïa i te poipoi. Te faahiti ra te Bibilia i te “toru o te hora,” te area hora 9 ïa i te poipoi. Te faahitihia ra “te hora ono” mai te taime i pouri roa ˈi Ierusalema i to Iesu patǐtǐraahia i nia i te raau. O ta tatou ïa hora 12 i te avatea. Te parauhia ra ua pohe Iesu i nia i te pou haamauiuiraa “i te hora iva,” oia hoi i te area hora 3 i te taperaa mahana.—Mar. 15:25; Luka 23:44; Mat. 27:45, 46. *

11. Inafea roa ra te faaohiparaahia te “hebedoma” ei faitoraa i te taime?

¹¹ Te hebedoma. Mea oioi roa i roto i te tuatapaparaa to te taata haamataraa i te taio i te mau mahana na roto i te mau anairaa tataihitu. Ua pee ïa ratou i te hiˈoraa o Tei poiete ia ratou, o tei faahope i ta ˈna na mahana poieteraa e ono na roto i te hituraa o te anotau parau-atoa-hia mahana. Ua taio o Noa i te mau mahana na roto i te mau anairaa tataihitu. Na roto i te reo Hebera, e au mau “te hebedoma” i te hoê taatoaraa aore ra anotau e hitu tuhaa.—Gen. 2:2, 3; 8:10, 12; 29:27.

12. Eaha te marama, e eaha to ˈna êraa i te avaˈe o to tatou tau?

¹² Te mau marama. Te faahiti ra te Bibilia i te mau “marama.” (Exo. 2:2; Deut. 21:13; 33:14; Eze. 6:15) E ere te mau avaˈe i to tatou nei tau i te mau marama, no te mea aita i taaihia i te marama. E mau tatuhaaraa noa i te matahiti o te mahana na roto 12 tuhaa. Na te avaˈe apî e faataa i te hoê marama. E maha tuhaa to te avaˈe, hoê haaatiraa a te avaˈe, e 29 ïa mahana, 12 hora, e e 44 minuti. E tia noa ia hiˈo atu i te huru o te avaˈe, e itehia ˈi te mahana o te marama.

13. Nafea te faataa-maitai-raahia te Diluvi i roto i te tau?

 ¹³ Maoti i te faaohipa i te mau marama, e au ra e ua faatia o Noa i te mau tupuraa ma te mau avaˈe e 30 mahana. Auaa te mau tapaopaoraa ta Noa i haapao i roto i te araka, ua taa ia tatou e ua tapoˈi noa te pape o te Diluvi i te fenua e pae avaˈe i te maoro, aore ra ‘hoê hanere e pae ahuru mahana.’ Ua tia roa 12 avaˈe e 10 mahana i mǎrô ai te fenua e i nehenehe ai te feia i roto i te araka e haere mai i rapae. Ua faataa-maitai-hia ïa teie mau tupuraa faahiahia o te tuatapaparaa i roto i te tau.—Gen. 7:11, 24; 8:3, 4, 14-19.

14. (a) Nafea to Iehova horoaraa mai i te mau anotau? (b) Eaha te maoro e vai noa mai ai te mau anotau?

¹⁴ Te mau anotau. I to ˈna faaineineraa i te fenua no te taata, ua faanaho Iehova i te mau anotau ma te paari e te here. (Gen. 1:14) E tauiui te reira no te mea ua faaopahia te fenua i te faito e 23,5° ia faaauhia i te reni o to ˈna haaatiraa i te mahana. E opa na mau ïa te tuhaa Apatoa e, e ono avaˈe i muri aˈe, te tuhaa Apatoerau, i te pae o te mahana, no reira te mau anotau e tupu ai te tahi i muri aˈe i te tahi. Ia taui te anotau, e tupu te mau huru e rave rau o te aratai i te taime ueueraa huero e te auhune. Te haapapu maira te Parau a te Atua e e tamau noa teie faanahoraa no te tauiuiraa o te mau anotau i te roaraa o te matahiti, e a muri noa ˈtu. “I teie nei râ, te vai nei te fenua, e vai atoa mai te tau tanuraa, e te ootiraa, te toetoe, e te mahanahana, te auhune, e te poai, te ao, e te po, eita e ore.”—Gen. 8:22.

15, 16. (a) I te Fenua Tǎpǔhia, nafea te tau ûa e nehenehe ai e vahihia? (b) A faataa na i te mau anotau ûa e te taairaa o teie mau anotau e te ohipa faaapu.

¹⁵ E nehenehe e vahihia te matahiti i roto i te Fenua Tǎpǔhia na roto i te tau ûa e te tau mǎrô. Mai te ropu o te avaˈe Eperera e tae atu i ropu i te avaˈe Atopa, mea iti roa te ûa e topa mai. E nehenehe te tau ûa e vahihia na roto i te ûa matamua aore ra te ûa o “te tau toparaa rauere” (Atopa-Novema); te ûa rahi o te tau toetoe (Titema-Febuare); e te ûa hopea aore ra te ûa o “te tau uaaraa tiare” (Mati-Eperera). (Deut. 11:14, MN; Ioe. 2:23, MN) E mau tatuhaaraa huru au noa teie, e tauiui rii no te huru rau o te ahuaraˈi o te mau tuhaa fenua taa ê. E haamǎrû te ûa matamua i te repo mǎrô, no reira e au maitai ai te mau avaˈe Atopa e Novema no te “arote” e no te “ueueraa huero.” (Exo. 34:21; Lev. 26:5) Ia topa te ûa rahi mai Titema e tae atu i Febuare, e ere i te mea varavara te mau toparaa hiona, e i Tenuare e Febuare, e nehenehe te anuvera e topa roa i raro aˈe i te faito e paari ai te pape i te mau vahi teitei. Te faahiti ra te Bibilia ia Benaia, hoê o te mau aito a Davida, e te haapohe ra i te liona “i te anotau hiona.”—Sam. 2, 23:20.

¹⁶ O te mau avaˈe Mati e Eperera (e tuati i te area o te mau avaˈe Hebera Nisana e Iyyar) te mau avaˈe o “te ûa hopea.” (Zek. 10:1) O te ûa hopea teie, o te hinaarohia ia tupu te huero i tanuhia i te tau toparaa rauere, e ia maitai te auhune e roaa mai. (Hos. 6:3; Iak. 5:7) O te anotau atoa teie o te auhune matamua, ua faaue te Atua ia Iseraela e pûpû i te hotu matamua o te auhune i te 16 no Nisana. (Lev. 23:10; Ruta 1:22) E anotau nehenehe roa e te au mau. “Te itea maira te tiare i nia i te fenua nei; e ua tae i te [ootiraa o te vine] ra, e te itea nei te oto o te uupa i to tatou nei fenua. Te oteu nei te suke i to ˈna suke pu, e te hauˈa nei te tiare o te vine nei.”—Sire 2:12, 13; MN.

17. (a) Nafea te mau faaapu e faararihia ˈi i te anotau mǎrô? (b) A hiˈo na i te tabula “Te matahiti a to Iseraela” e a vahi i te matahiti ia au i te mau anotau i faataahia i roto i te mau paratarapha 15-17. (c) Anafea ra e tupu ai te auhune maa huero e e ohihia ˈi te mau hotu atoa, e e tanohia taua mau ohipa ra i teihea mau oroa?

¹⁷ I ropu i te avaˈe Eperera, e haamata te anotau mǎrô, tera râ, fatata i te roaraa o teie anotau, e atuatu te hupe rahi i te mau faaapu o te tau veavea i te mau vahi papu i te pae miti e te mau pae mouˈa tooa o râ iho â râ. (Deut. 33:28) I te avaˈe Me, e ootihia te maa huero, e i te hopea o taua avaˈe ra e faatupuhia ˈi te Oroa o te mau Hebedoma (Penetekose). (Lev. 23:15-21) E, a haere noa ˈtu ai te tau i te veavearaa e te repo i te mǎrôraa, e para mai te mau vine e e ootihia, na reira ˈtu ai te tahi atu mau maa hotu, mai te olive, te hotu tamara, e te suke. (Sam. 2, 16:1) Ia tae i te hopea o te anotau mǎrô e te haamataraa o te anotau ûa, ua ohihia ïa te mau hotu atoa o te fenua, i reira (haamataraa o te avaˈe Atopa) e haapaohia ˈi te Oroa Patiaraa tiahapa.—Exo. 23:16; Lev. 23:39-43.

18. (a) No te aha e tano mau ai te auraa o te taˈo Hebera ra no “matahiti”? (b) Eaha te matahiti mau o te mahana no te fenua?

¹⁸ Te matahiti. E aratai ta tatou faahohonuraa i te tau ia au i te Bibilia i nia i te parau ra “matahiti.” Mai te matamehai mai â o te tuatapaparaa o te taata to te reira faahitiraahia. (Gen. 1:14) Te auraa o te tumu o te taˈo Hebera ra sha·nahʹ, oia hoi “matahiti,” e “haamata faahou; rave faahou” ïa e te vai ra te manaˈo o te ohuraa o te taime i roto. E tano te reira no te mea i te mau matahiti atoa, e haamata faahou te ohuraa o te mau anotau. Te matahiti o te fenua, o te taime ïa ta te fenua e rave no te haaati roa i te mahana. Te matahiti o te mahana, o te anotau ïa mai te hoê tau uaaraa tiare e tae atu i te tahi. E fatata te reira i te 365 mahana, e 5 hora, e 48 minuti e e 46 tetoni, aore ra e 365 mahana e te 1⁄4 i te maoro.

19. (a) Nafea e taiohia ˈi te mau matahiti a te Bibilia i tahito ra? (b) Eaha te “matahiti moˈa” ta Iehova i haamau i muri aˈe?

¹⁹ Te mau matahiti Bibilia. Ia au i te taioraa a te Bibilia i tahito ra, te hoê matahiti, mai te hoê ïa tau toparaa rauere e tae atu i te tahi. E au iho â te reira i te hoê oraraa faaapu, e haamata hoi te matahiti e te aroteraa e te ueueraa, i te afa matamua o te avaˈe Atopa, e e hope hoi na roto i te auhune. No Noa, e haamata te matahiti i te tau toparaa rauere. Ua faatia oia e ua haamata te Diluvi “i te piti o te marama,” o te tuati ïa i te afaraa o Atopa e te afaraa matamua o Novema. (Gen. 7:11, nota i raro i te api) Tae roa  mai i teie tau, e rave rahi â nunaa i te fenua nei o te haamata i te matahiti apî i te tau toparaa rauere. I te tau o te Revaraa mai Aiphiti mai, i te matahiti 1513 H.T.T., ua faaoti Iehova e o Abiba (Nisana) te “marama matamua” no te ati Iuda, e matahiti moˈa ïa ta ratou i teie nei mai te tau uaaraa tiare e tae atu i te tahi. (Exo. 12:2) I to tatou nei râ tau, te haapao nei te ati Iuda i te hoê matahiti tivila o te haamata i te tau toparaa rauere, o Tishri te avaˈe matamua.

20. Nafea te faatanoraahia te matahiti o te marama i nia i te matahiti o te mahana, e eaha te mau matahiti o te marama e o te mahana?

²⁰ Te matahiti o te marama e o te mahana. Tae noa ˈtu i te tau o te Mesia, ua faaohipa noa te rahiraa o te mau nunaa i te mau matahiti o te marama no te numera i te tau, ma te rave i te mau ravea huru rau no te faatano atu i nia i te matahiti o te mahana. E 354 mahana to te matahiti o te marama 12 marama, e 29 aore ra e 30 mahana i roto i te avaˈe hoê, tei te huru o te avaˈe apî. E poto aˈe ïa te matahiti o te marama 11 mahana e te 1⁄4 i te matahiti o te mahana e 365 hoi mahana e te 1⁄4. E pee na te mau Hebera i te matahiti o te marama. Aita i faataahia i roto i te Bibilia nafea ratou e faatano ai i teie matahiti i te matahiti o te mahana e i te mau anotau, ua tuu râ paha ratou i te mau avaˈe hau ia hinaarohia. Ua haapapuhia te tuuraa i te mau avaˈe hau i muri aˈe i te senekele 5 H.T.T. i roto i tei matauhia i teie nei mai te faaohuraa métonien. E nehenehe e tuuhia e 7 taime hoê avaˈe hau i te mau 19 matahiti atoa, e i roto i te tarena ati Iuda, e tuuhia te reira i muri aˈe i te 12raa o te avaˈe, oia o Adara, e e parauhia o Véadar, aore ra “te piti o te Adara.” Ia faatanohia te tarena o te marama i nia i te mahana, e parauhia te mau matahiti 12 aore ra 13 avaˈe to roto, mau matahiti o te marama e o te mahana.

21. (a) Eaha te tarena julien? (b) No te aha e tano aˈe ai te tarena grégorien?

²¹ Te mau tarena julien e grégorien. Te hoê tarena, o te hoê ïa ravea no te haamau i te haamataraa, te roa, e te mau tatuhaaraa o te matahiti e te faanahoraa i te reira. Na Jules César i haamau i te tarena julien i te matahiti 46 H.T.T., no te horoa i te ravea no te faito i te matahiti na nia i te mahana eiaha râ na nia i te marama, na to Roma. Ia au i te tarena julien, e 365 mahana to roto i te matahiti, e i te mau 4 matahiti atoa (te matahiti bissextile), e tuuhia te hoê mahana hau, e 366 ïa mahana. Teie râ, ia maoro rii, ua itea mai e e roa rii aˈe te tarena julien e hau rii atu i te 11 minuti i te matahiti o te mahana. I te senekele 16 T.T., ua raea roa i taua taa-ê-raa ra 10 mahana taatoa. No reira, i te matahiti 1582 ra, ua faatano rii te pâpa Grégoire XIII, i te tarena julien, a haamau ai i te tarena grégorien. Na roto i te faaotiraa a te pâpa, ua tatarahia hoê ahuru mahana i te matahiti 1582, riro atura te mahana i muri aˈe i te 4 no Atopa te 15 no Atopa. Ia au i te tarena grégorien, e ere te mau matahiti tataihanere o te ore e nehenehe e vahihia na roto e 400 i te mau matahiti bissextile. Ei hiˈoraa, taa ê atu i te matahiti 2000, e ere te matahiti 1900 i te matahiti bissextile no te mea eita te numera 1 900 e nehenehe e vahihia na roto e 400. O te tarena grégorien te faaohipa-roa ˈˈe-hia i teie nei i te rahiraa o te mau vahi o te ao nei.

22, 23. Eaha te roa o te hoê matahiti parau tohu?

²² “Te matahiti” parau tohu. I roto i te parau tohu Bibilia, e pinepine te taˈo ra “matahiti” i te faaohipahia ma te auraa taa ê, e aifaito oia i te 12 avaˈe, e 30 mahana to roto i te avaˈe, e 360 ïa mahana pauroa. A tapao na eaha ta te hoê taata ite i parau no nia i te Ezekiela 4:5, 6: “E tia ia tatou ia manaˈo e ua ite Ezekiela i te matahiti e 360 mahana. E ere teie i te  hoê matahiti o te mahana mau e ere atoa i te hoê matahiti o te marama. E matahiti ‘au noa’ teie e 30 mahana to te avaˈe taitahi.” *

²³ E parau-atoa-hia te hoê matahiti parau tohu te hoê “tau,” e e faaite mai te faahohonuraa i te Apokalupo 11:2, 3 e 12:6, 14 nafea te “tau” e au ai i te 360 mahana. I roto i te parau tohu, i te tahi taime, e faataipe-atoa-hia te hoê matahiti na roto i te hoê “mahana.”—Ezek. 4:5, 6.

24. Nafea te mau nunaa e rave rahi i tahito ra ia haamata i te numera?

²⁴ Aita e matahiti aore. Aita e aore ta te tahi mau nunaa i tahito ra, tae noa ˈtu to Heleni feia ite, to Roma, e ta te ati Iuda. Ia ratou, e haamata te numeraraa na nia i te hoê. I to outou haapiiraa i te mau numera Roma i te fare haapiiraa (I, II, III, IV, V, X, e haere atu ai), ua haapii anei outou i te hoê papai no te aore? Aita, no te mea aita ta to Roma te reira. I te mea e aita to Roma i faaohipa na i te aore, ua haamata to Tatou Tau, eiaha na nia i te aore, na nia râ i te 1 T.T. No reira mai te mau numera nanairaa, mai te matamua, te pitiraa (2raa), te toruraa (3raa), te ahururaa (10raa), e te hanereraa (100raa). I roto i te matematika no teie nei tau, ua faaotihia e e haamata te mau mea atoa na nia i te aore. Na te mau Hindou paha i feruri i te aore.

25. Nafea te numera nanairaa e taa ê ai i te numera tumu?

²⁵ Inaha, ia faaohipahia te mau numera nanairaa, e tia ia iritihia hoê tiahapa e noaa ˈi te numera tia. Ei hiˈoraa, ia paraparau tatou no te hoê taio mahana o te senekele 20 T.T., o te auraa anei e ua mairi e 20 senekele tia? Eita, 19 ïa senekele tia e tau matahiti. No te faataa i te mau matahiti tia, e rave te Bibilia, mai te matematika o teie tau atoa, i te mau numera tumu, mai te 1, 2, 3, 10, e te 100. E parau-atoa-hia teie “te mau numera tia.”

26. Nafea outou e numera ˈi (a) i te mau matahiti mai te 1 no Atopa 607 H.T.T., e tae atu i te 1 no Atopa 1914 T.T.? (b) e 2 520 matahiti mai te 1 no Atopa 607 H.T.T. e haere atu ai?

²⁶ I te mea e aita to Tatou Tau i haamata e te matahiti aore, e te matahiti 1 râ o T.T., e eita te tarena o te mau matahiti hou to Tatou Tau e numera mai te matahiti aore atu, mai te matahiti 1 râ H.T.T., e numera nanairaa ïa te numera o te mau matahiti atoa. Oia hoi, ia tae i te matahiti 1990 T.T., 1 989 ïa matahiti tei mairi mai te omuaraa o to Tatou Tau, e ia tae i te 1 no Tiurai 1990, 1 989 ïa matahiti e te afa tei mairi mai te omuaraa o to Tatou Tau. Hoê â faanahoraa no te mau taio mahana H.T.T. No reira, no te faataa ehia matahiti tei mairi mai te 1 no Atopa 607 H.T.T. e tae atu i te 1 no Atopa 1914 T.T., a amui atu e 606 matahiti (e na avaˈe hopea e toru o te matahiti i mairi) i te 1 913 (e na avaˈe matamua e iva o te matahiti i mua), e noaa ïa e 2 519 (e na avaˈe 12), aore ra e 2 520 matahiti. Aore ra mai te peu e te hinaaro ra outou e faataa eaha te matahiti e topa ˈi e 2 520 matahiti i muri aˈe i te 1 no Atopa 607 H.T.T., a haamanaˈo e e numera nanairaa te matahiti 607—e 606 matahiti tia mau â te reira—e no te mea e e taio tatou eiaha mai te 31 no Titema 607 H.T.T., mai te 1 râ no Atopa 607 H.T.T., e tia ia amuihia ˈtu na avaˈe hopea e toru o te matahiti 607 H.T.T. i na matahiti e 606. I teie nei, a iriti e 606 e te 1⁄4 mai te 2 520 matahiti. E toe mai 1 913 e te 3⁄4. E 2 520 matahiti mai te 1 no Atopa 607 H.T.T., e tae ïa tatou 1 913 matahiti e te 3⁄4 i roto i to Tatou Tau—1 913 matahiti tia, e tae ïa tatou i te omuaraa o te matahiti 1914 T.T., e e toru tuhaa i nia i te maha, e tae ïa tatou i te 1 no Atopa 1914 T.T. *

27. Eaha te mau taio mahana faufaa, e no te aha e mea faufaa roa te reira?

²⁷ Mau taio mahana faufaa. Ua niuhia te tuatapaparaa tau Bibilia tano i nia i te tahi mau taio mahana faufaa. Te hoê taio mahana faufaa, o te hoê ïa taio mahana i roto i te tuatapaparaa e niu to ˈna o te fariihia e te au i te hoê tupuraa i faatiahia i roto i te Bibilia. E nehenehe ïa e faaohipahia ei haamataraa o te tahi mau tupuraa o te Bibilia tapaohia ma te tano i nia i te tarena. Ua mau anaˈe teie taio mahana faufaa, e ravehia te mau numeraraa e haere mai i mua aore ra i muri na nia i te mau faatiaraa tano o te Bibilia iho, mai te roaraa o te oraraa o te tahi mau taata aore ra te roaraa o te faatereraa a te mau arii. Inaha, ma te haamata i te hoê vahi taa maitai, e nehenehe e faaohipahia te tuatapaparaa tau Bibilia tano no te faataa i te taio mahana o te mau tupuraa Bibilia e rave rahi.

28. Eaha te taio mahana faufaa e noaa mai i roto i te mau Papai Hebera?

²⁸ Taio mahana faufaa no te mau Papai Hebera. E tupuraa faahiahia tei faatiahia i roto i te Bibilia e te tuatapaparaa a teie nei ao, te haruraahia te oire o Babulonia e to Medai e to Peresia faaterehia e Kuro. Te faahiti ra te Bibilia i te reira i roto i te Daniela 5:30. Te paturu ra te mau buka tuatapaparaa e rave rau (mai ta Diodore, ta Africanus, ta Eusèbe, ta Ptolémée, e te mau pǎpǎ Babulonia) i te matahiti 539 H.T.T. mai te matahiti i haruhia ˈi Babulonia e Kuro. Te horoa ra te Faatiaraa a Nabonide i te avaˈe e te mahana i topa ˈi te oire (aita i faaitehia te matahiti). No reira te feia tuatapapa o teie nei ao i haamau ai i te toparaa o Babulonia i te 11 no Atopa 539 H.T.T., ia au i te tarena julien, aore ra i te 5 no Atopa ia au i te tarena grégorien. *

29. Anafea ra te raveraahia te faaotiraa a Kuro, eaha ta te reira i faatia?

²⁹ I muri aˈe i te tahuriraa o Babulonia, e i roto i te matahiti matamua i faatere ai oia ia Babulonia tei haavîhia, ua rave o Kuro i ta ˈna faaotiraa tuiroo e vaiiho i te ati Iuda ia hoˈi i Ierusalema. Ia au i te Bibilia,  e au ra e ua ravehia te faaotiraa i te hopea matahiti 538 H.T.T. aore ra i te area tau uaaraa tiare 537 H.T.T. E navai maitai ïa to te ati Iuda taime no te faanaho faahou i to ratou faaearaa i nia i to ratou fenua e no te haere atu i Ierusalema e haapao faahou i te haamoriraa a Iehova “i te hitu o te marama,” o Tishri, aore ra i te area 1 no Atopa 537 H.T.T.—Eze. 1:1-4; 3:1-6. *

30. Nafea ia faataa e e taio mahana faufaa te matahiti 29 T.T. no te mau Papai Heleni Kerisetiano?

³⁰ Taio mahana faufaa no te mau Papai Heleni Kerisetiano. Ua faataahia te hoê taio mahana faufaa no te mau Papai Heleni Kerisetiano maoti te taio mahana i mono ai Tiberio Kaisara i te emepera Auguso. Ua pohe Auguso i te 17 no Atete 14 T.T. (tarena grégorien); ua nominohia Tiberio ei emepera e te Huitoofa Roma i te 15 no Setepa 14 T.T. Te parauhia ra i roto i te Luka 3:1, 3 e ua haamata Ioane Bapetizo i ta ˈna taviniraa i te 15raa o te matahiti faatereraa a Tiberio. Mai te peu e e taiohia te mau matahiti mai te poheraa o Auguso, e haere ïa te 15raa o te matahiti mai te avaˈe Atete 28 T.T. e tae atu i te avaˈe Atete 29 T.T. Mai te peu e e taiohia mai te nominoraahia Tiberio e te Huitoofa, e haere ïa te matahiti mai te avaˈe Setepa 28 T.T. e tae atu i te avaˈe Setepa 29 T.T. Aita i maoro i muri aˈe i te reira, ua haere atu Iesu, o te apî aˈe ia Ioane Bapetizo e ono avaˈe, ia bapetizohia oia, ua tae oia ‘i te toru ahururaa o to ˈna matahiti.’ (Luka 3:2, 21-23; 1:34-38) E au maite te reira e te parau tohu i roto i te Daniela 9:25 e e mairi e 69 “hebedoma” (hebedoma parau tohu e 7 matahiti to roto, e 483 ïa matahiti pauroa) mai te “parau i te rave faahou e te patu ia Ierusalema” e to ˈna mau patu e tae roa ˈtu i te faraa mai o te Mesia. (Dan. 9:24, nota i raro i te api) Na Aretehasaseta (Longue-Main) i haamana i “taua parau” ra i te matahiti 455 H.T.T. ra e na Nehemia i faatupu i Ierusalema i te pae hopea o taua matahiti ra. E 483 matahiti i muri aˈe, i te pae hopea o te matahiti 29 T.T., i to ˈna bapetizoraahia e Ioane, ua faatavai-atoa-hia Iesu i te varua moˈa o te Atua, a riro mai ai ei Mesia, aore ra Tei faatavaihia. Ua bapetizohia Iesu e ua haamata oia i ta ˈna taviniraa i te pae hopea o taua matahiti ra, e au maite ïa i te parau tohu e “ei ropu i taua hebedoma” matahiti ra (aore ra ia raea e toru matahiti e te afa) oia e tâpû-ê-hia ˈi. (Dan. 9:27) I te mea e ua pohe oia i te tau uaaraa tiare, ua haamata ïa ta ˈna taviniraa e toru matahiti e te afa i te area tau toparaa rauere o te matahiti 29 T.T. * E tano maitai, te faaite ra teie na haapapuraa e piti e ua fanauhia Iesu i te tau toparaa rauere o te matahiti 2 H.T.T., inaha te faaite ra Luka 3:23 e e 30 matahiti to Iesu i to ˈna haamataraa i ta ˈna ohipa. *

31. (a) No te aha e au ra e e tauiui rii te tere o te tau? (b) Eaha ïa te ravea maitai ta te feia apî e fanaˈo ra?

³¹ Eaha te mea e mairi oioi ai te taime. Te na ô ra te hoê parau tahito e “ia tiai tatou i te hoê mea, e maoro noa ˈtu â.” E parau mau teie e mai te peu e te hiˈo ra tatou i te hora, mai te peu e te ite maite ra tatou e te mairi atura, mai te peu e te tiai ra tatou e ia tupu te hoê ohipa, e au ia tatou e e maoro te reira. Mai te peu râ e te ohipa ra tatou, mai te peu e te anaanatae ra tatou e te haapao maitai atura tatou i ta tatou e rave ra, i reira, e au ra ïa e “te horo ê ra te hora.” Hau atu â, e au ra i te feia paari aˈe e e mairi oioi roa ˈtu â te hora i te mau tamarii apî. No te aha hoi? Hoê matahiti hau i roto i te oraraa o te hoê tamarii hoê matahiti, 100 % ïa maraaraa. Area hoê matahiti hau i roto i te oraraa o te hoê taata paari e 50 matahiti ra, e 2 % noa ïa maraaraa. No te hoê tamarii, mea roa roa te hoê matahiti. Mai te peu e te ohipa ra te taata paari e mea oraora maitai oia, e au ia ˈna e te mairi oioi noa ˈtura te mau matahiti. E taa maitai aˈe ia ˈna te mau parau a Solomona: “Aore roa e mea apî i raro aˈe i te mahana nei.” I te tahi aˈe pae, tei roto noâ te feia apî i te mau matahiti haapiiraa e au ra ia ratou e mea roa. Maoti i te ‘amu i te mataˈi,’ e te hoê ao nounou taoˈa, e nehenehe ratou e haafaufaa i taua mau matahiti ra na roto i te haapueraa i te mau taoˈa maoti te hoê oraraa paieti. Ua tano Solomona i te na ô-faahou-raa e: “E tena na, e haamanaˈo i tei Hamani ia oe i to apîraa ra, aita i tae i te mau mahana ino ra, e aita i tae i te mau matahiti e parau ai oe ra e, Aita roa o ˈu e maitairaa.”—Koh. 1:9, 14; 12:1.

32. Nafea e taa maitai aˈe ai i te taata te manaˈo o Iehova no nia i te taime?

³² Te tau—Ia ora te taata e a muri noa ˈtu. Te vai ra râ te mau mahana oaoa i mua nei eita roa ˈtu e inohia. E nehenehe te feia mea au na ratou te parau-tia, ‘tei to Iehova rima hoi to ratou taime,’ e tiai ru i te ora mure ore i te vahi e faaterehia e te Basileia o te Atua. (Sal. 31:14-16; Mat. 25:34, 46) I raro aˈe i taua Basileia ra, e ore roa te pohe. (Apo. 21:4) E ore te faatau-noa-raa, te maˈi, te haumani, e te faufaa ore. Te vai ra te ohipa anaanatae e te faahiahia, o te titau i te mau aravihi o te taata tia roa e o te faaoaoa roa ia ˈna. E au ia ˈna e e mairi oioi noa ˈtu â te mau matahiti, e e î noa ˈtu â to ˈna aau mehara haapao maitai i te mau tupuraa oaoa. A mairi ai te mau mileniuma, eita e ore e e taa maitai aˈe i te taata i te fenua nei i te manaˈo o Iehova no nia i te taime: “Ia oe [Iehova] ra hoi, hoê tausani noa ˈtu i te matahiti e au i te mahana hoê i mahemo ra.”—Sal. 90:4.

33. No nia i te tau, eaha te haamaitairaa ta Iehova i faaue?

³³ Ia hiˈo tatou, ei taata, i te tau e, ia au i te tǎpǔ a te Atua no nia i te hoê ao apî parau-tia, mea oaoa mau ïa te mau haamaitairaa o taua tau ra: “I reira Iehova i te faaueraa i te maitai, e ua horoa mai i te ora e a muri noa ˈtu”!—Sal. 133:3.

[Nota i raro i te api]

[Uiraa haapiiraa]

[Tapura i te api 281]

TE MATAHITI A TO ISERAELA

Avaˈe Nisana (Abiba)

E tuea i te Mati - Eperera

Matahiti Moˈa avaˈe matamua

Matahiti tivila 7raa o te avaˈe

Irava Exo. 13:4; Neh. 2:1

Oroa 14 no Nisana Pasa

15-21 no Nisana Oroa Pane Faahopue-ore-hia

16 no Nisana Pûpûraa i te mau hotu matamua

Avaˈe Iyyar (Zifa)

E tuea i te Eperera - Me

Matahiti Moˈa 2raa o te avaˈe

Matahiti tivila 8raa o te avaˈe

Irava Arii 1, 6:1

Avaˈe Sivana

E tuea i te Me - Tiunu

Matahiti Moˈa 3raa o te avaˈe

Matahiti tivila 9raa o te avaˈe

Irava Ese. 8:9

Oroa 6 no Sivana Oroa o te mau Hebedoma

(Penetekose)

Avaˈe Tammouz

E tuea i te Tiunu - Tiurai

Matahiti Moˈa 4raa o te avaˈe

Matahiti tivila 10raa o te avaˈe

Irava Ier. 52:6

Avaˈe Ab

E tuea i te Tiurai - Atete

Matahiti Moˈa 5raa o te avaˈe

Matahiti tivila 11raa o te avaˈe

Irava Eze. 7:8

Avaˈe Elula

E tuea i te Atete - Setepa

Matahiti Moˈa 6raa o te avaˈe

Matahiti tivila 12raa o te avaˈe

Irava Neh. 6:15

Avaˈe Tishri (Etanima)

E tuea i te Setepa - Atopa

Matahiti Moˈa 7raa o te avaˈe

Matahiti tivila avaˈe matamua

Irava Arii 1, 8:2

Oroa 1 no Tishri Mahana faaotoraa pu

10 no Tishri Mahana Taraehara

15-21 no Tishri Oroa Patiaraa Tiahapa

22 no Tishri Apooraa moˈa

Avaˈe Heshvân (Bula)

E tuea i te Atopa - Novema

Matahiti Moˈa 8raa o te avaˈe

Matahiti tivila 2raa o te avaˈe

Irava Arii 1, 6:38

Avaˈe Kisilu

E tuea i te Novema - Titema

Matahiti Moˈa 9raa o te avaˈe

Matahiti tivila 3raa o te avaˈe

Irava Neh. 1:1

Avaˈe Tebeta

E tuea i te Titema - Tenuare

Matahiti Moˈa 10raa o te avaˈe

Matahiti tivila 4raa o te avaˈe

Irava Ese. 2:16

Avaˈe Sebata

E tuea i te Tenuare - Febuare

Matahiti Moˈa 11raa o te avaˈe

Matahiti tivila 5raa o te avaˈe

Irava Zek. 1:7

Avaˈe Adara

E tuea i te Febuare - Mati

Matahiti Moˈa 12raa o te avaˈe

Matahiti tivila 6raa o te avaˈe

Irava Ese. 3:7

Avaˈe Véadar

E tuea i te (Avaˈe hau)

Matahiti Moˈa 13raa o te avaˈe