Pene 87

A feruri i te tau a muri aˈe ma te paari

NO FAATIA noa maira o Iesu i te aamu o te tamaiti haamauˈa taoˈa ra i te nahoa taata tei roto atoa ta ˈna mau pǐpǐ, te mau telona eiâ ra e te tahi atu feia i matauhia no ta ratou mau hara, e te mau papai parau e te mau Pharisea. I teie nei, ma te fariu atu i nia i ta ˈna mau pǐpǐ, ua faatia aˈera oia i te hoê parabole no nia i te hoê taata taoˈa rahi o tei faaroo i te hoê parau au ore roa no nia i te taata e tiai ra i to ˈna fare, oia hoi te tiaau.

Te na ô ra o Iesu e ua pii aˈera te taata taoˈa rahi i ta ˈna tiaau e ua faaite atura e e vaiiho o ˈna ia ˈna. Ua na ô ihora te tiaau ia ˈna iho e: “Eaha ra vau? te hopoi ê nei tau fatu i te toroa tiaau ia ˈu nei: eita e tia ia ˈu ia faaapu, e haama hoi au ia ani haere. E na ô vau, ia fariihia mai au e ratou i roto i to ratou mau fare, ia faaerehia vau i te toroa tiaau ra.”

Eaha ta te tiaau e opua ra e rave? Ua pii ihora oia i te feia amutarahu atoa a to ˈna fatu. E ua ani atura: “E hia a tau fatu taoˈa ia oe aore i hoo na?”

Ua pahono maira te taata matamua e, ‘E 2 200 litera monoˈi olive.’

Ua na ô atura oia ia ˈna e: ‘A rave i te pepa na oe, a parahi i raro i tena na, a papai ai e, e 1 100 litera.’

Ua ani atura oia i te tahi: ‘E hia ta oe taoˈa aore i hoo na?’

Ua parau maira oia e, ‘E 22 000 litera sitona.’

‘A rave i te pepa na oe, a papai ai e, e 18 000 litera.’

E tiaraa to te tiaau no te faaiti mai i te tuhaa i tarahuhia i to ˈna fatu no te mea na ˈna noâ e haapao ra i te taoˈa a to ˈna fatu. Na roto i te faaitiraa mai i te mau tarahu, te faahoa ˈtura ïa oia e te feia o te nehenehe e tauturu mai ia ˈna ia erehia oia i ta ˈna ohipa.

I to te fatu faarooraa i te ohipa i tupu, ua maere roa oia. Inaha, ua ‘haamaitai te fatu i te ravea a taua tiaau parau-tia ore ra no te mea ua ohipa oia ma te paari.’ Oia mau, te na ô faahou ra o Iesu e: “E paari rahi hoi to te tamarii o teie nei ao i ta ratou ra mau peu, i to te tamarii o te maramarama.”

I teie nei, ma te haamatara mai i te haapiiraa no ta ˈna mau pǐpǐ, ua faaitoito aˈera Iesu e: “E faataua ˈtu outou i te taua no outou i te taoˈa haavare nei, e ia tuua-ê-hia outou ra, ia fariihia outou e ratou i [nia] i te [mau parahiraa] tahuti ore ra.”

Aita o Iesu e haamaitai ra i te tiaau no to ˈna parau-tia ore teie râ no to ˈna faaineineraa no te ohipa e tupu a muri aˈe, oia hoi no to ˈna paari. Mea pinepine “te tamarii o teie nei ao” i te faaohipa i ta ratou moni aore ra to ratou tiaraa ma te aravihi no te faahoa ˈtu i te feia o te nehenehe e tauturu atoa mai ia ratou. No reira, e tia atoa i te mau tavini a te Atua, “te tamarii o te maramarama,” ia faaohipa i ta ratou mau faufaa i te pae materia, ta ratou mau “taoˈa haavare,” na roto i te hoê ravea paari ia faufaahia ratou iho.

Teie râ, mai ta Iesu e parau ra, e tia ia ratou ia faahoa ˈtu, na roto i te ravea o teie mau faufaa, i te feia o te nehenehe e farii ia ratou ‘i nia i te mau parahiraa tahuti ore ra.’ No te mau melo o te nǎnǎ iti, tei nia teie mau parahiraa i te raˈi ra; no te mau “mamoe ê atu,” tei nia ïa i te paradaiso i nia i te fenua nei. I te mea e o te Atua ra o Iehova e ta ˈna Tamaiti anaˈe te nehenehe e farii i te taata i nia i teie mau parahiraa, e tia ïa ia tatou ia titau i te atuatu i te auhoaraa e o raua na roto i te faaohiparaa i ta tatou mau “taoˈa haavare” atoa nei no te turu i te mau faufaa o te Basileia. I reira, ia ore anaˈe aore ra ia pau anaˈe te mau taoˈa materia, e e tupu mau hoi te reira, mea papu maitai ïa to tatou oraraa no a muri noa ˈtu.

Te parau faahou ra o Iesu e te feia e haapao i teie mau mea materia haihai ra, e haapao atoa ïa ratou i te mau ohipa faufaa roa ˈtu â. Te na ô faahou ra oia e: “E teie nei, aore outou i haapao i te taoˈa haavare ra, na vai e tuu atu ia outou i te taoˈa mau [oia hoi, te mau faufaa i te pae varua, aore ra to te Basileia]? E aore outou i haapao i te raveraa i ta vetahi ê ra [te mau faufaa o te Basileia ta te Atua i horoa ˈtu i ta ˈna ra mau tavini], na vai e tuu atu ia outou i te rave i ta outou iho [te haamaitairaa o te oraraa i nia i te mau parahiraa tahuti ore ra]?”

Eita noa tatou e nehenehe e riro ei tavini mau na te Atua e i te hoê â taime e riro atoa ei tavini no te mau faufaa tia ore, oia hoi te mau taoˈa materia, mai ta Iesu i faahope i te na ôraa e: “Aore e tavini e tia ia faaroo atu i te fatu piti; e riro oia i te ore i te au atu i te tahi, e te au atu i te tahi; e aore ïa, e riro i te haapao atu i te tahi e te faarue taue atu i te tahi. O outou nei hoi e ore e tia ia faaroo i te Atua e te Mamona.” Luka 15:1, 2; 16:1-13; Ioane 10:16.

▪ Mea nafea te tiaau o te parabole a Iesu i te faahoaraa ˈtu i te feia o te nehenehe e tauturu ia ˈna i muri aˈe?

▪ Eaha te mau “taoˈa haavare,” e nafea tatou ia faaohipa i te reira ia noaa mai to tatou hoa?

▪ O vai te nehenehe e farii ia tatou i nia i ‘te mau parahiraa tahuti ore ra,’ e eaha mau na teie mau parahiraa?