Pene 123

“A hiˈo mai na i taua taata nei!”

UA MAERE roa o Pilato i mua i te haerea o Iesu e ua faˈi oia i to ˈna hapa ore, no reira, ua tamata oia i te tahi ravea no te tuu ia ˈna. Ua na ô atura oia i te tiaa rahi taata: “O te peu râ e tuu vau i te hoê taata ia outou i te pasa ra.”

Ua tapea-atoa-hia o Baraba, te hoê taparahi taata matauhia, i roto i te fare tapearaa, no reira, ua ani atura o Pilato e: “O vai ta ˈu e tuu atu ia outou na? O Baraba anei, e o Iesu anei o tei parauhia, o te Mesia ra?”

I te mea e ua riro to ratou manaˈo i te mau tahuˈa rahi o tei faaarepurepu ia ratou, ua ani te nunaa e ia tuuhia o Baraba e ia taparahihia o Iesu. Aita râ o Pilato i tuu e ua pahono atura oia, ma te ani faahou atu e: “O teihea i taua na taata toopiti nei ta ˈu e tuu atu ia outou na?”

“Baraba,” o ta ratou ïa i tuô.

“Eaha hoi au ia Iesu i tei parauhia, o te Mesia nei?” o ta Pilato ïa i ani ma te haaparuparu.

Ua pahono maira ratou ma te tahoê i to ratou reo puai e: ‘Ia patitihia i nia i te pou!’ ‘A patiti ia ˈna i nia i te pou! A patiti ia ˈna i nia i te pou!’

Ua ite hoi o Pilato e te titau ra ratou e ia pohe te hoê taata hapa ore, no reira ua ani atura oia e: “Eaha ta ˈna hara i rave? Aita a ˈna hara i itea e au e au ai ia ˈna te pohe; e papai noa ˈtu vau ia ˈna, a tuu atu ai.”

Noa ˈtu ta ˈna mau tutavaraa, ua tamau noa te tiaa maamaa ra, tei faaitoitohia e to ratou mau raatira faaroo, i te tuô e: ‘Ia haamauiuihia oia i nia i te pou!’ Ua maamaa roa ratou na roto i te raveraa a te mau tahuˈa, e te titau ra te tiaa taata i te toto. Ia manaˈo na tatou, e pae noa mahana na mua ˈtu, tei roto paha vetahi o ratou i te feia o tei farii popou ia Iesu ei Arii i roto ia Ierusalema! I teie taime, mai te peu e tei reira te mau pǐpǐ a Iesu, te mamû noa ra ratou e te tapuni noa ra.

I te mea e te ite ra oia e aita ta ˈna mau tamataraa e manuïa ra, tera râ, te rahi noa ˈtura te maniania, ua rave ihora o Pilato i te pape e ua horoi atura i to ˈna rima i mua i te tiaa taata, e ua na ô atura: “Aita a ˈu hara i te toto o teie nei taata parau-tia: ei ia outou te reira.” I reira, ua pahono maira te feia rahi e: “Ei nia ia matou to ˈna toto e ei nia i to matou tamarii.”

No reira, ia au i ta ratou aniraa—e no to ˈna hinaaro e faatia i te manaˈo o te tiaa taata maoti hoi i te rave i te ohipa o ta ˈna i ite e mea tia—ua tuu ihora o Pilato ia Baraba ia ratou ra. Ua rave atura oia ia Iesu e ua faaue ihora ia tataratarahia to ˈna ahu e ia papaihia oia. E ere râ i te hoê papairaa matarohia. Teie te tatararaa e horoahia ra e te Te vea a te taatiraa marite i te pae rapaauraa no nia i te papairaa a to Roma:

“Te mauhaa matarohia i te faaohipa, o te hoê ïa taura tairiraa poto (parauhia flagrum aore ra flagellum) o tei hamanihia aore ra tei firihia e te mau taura iri puaa e ua rau atoa to ratou roa, e ua taamu-atoa-hia te mau pôro auri iti aore ra te mau huˈahuˈa ivi mamoe oˈi maitai na roto. . . . Ia hui te mau faehau roma e rave rahi taime i te tua o te taata e haamauiuihia ra, ma to ratou puai atoa, e pepe roa te tino i te mau pôro auri e e motu hohonu roa te iri i te mau taura iri puaa e te mau ivi mamoe. Ia tamau noa te ruturaa, e motu hohonu roa te mau pepe e tae roa ˈtu i te iˈo o te mau ivi, e e matara roa mai te mau vaehaa iˈo e te toto.”

I muri aˈe i teie ruturaa mauiui mau, ua afaihia o Iesu i roto i te aorai o te tavana, e ua haaputuputuhia maira te mau nuu faehau atoa. I reira, ua hamani ino faahou te mau faehau ia ˈna na roto i te firiraa i te hoê hei taratara e ua taumi atura i nia i to ˈna upoo. Ua tuu atura ratou i te hoê aeho i roto i to ˈna rima atau, e ua vehî atura ia ˈna i te hoê ahu faanehenehe vareau, mai to te arii ra te huru. I muri iho, ua faaooo atura ratou ia ˈna i te na ôraa e: “Ia ora na te Arii o te ati Iuda!” Ua tutuha atoa ratou i nia ia ˈna e ua poara atoa i to ˈna mata. Ma te rave mai i te aeho paari i roto i to ˈna rima, ua rave ihora ratou i te reira no te tairi i to ˈna upoo, ma te faaô hohonu roa ˈtu â i te mau raau taratara o te “hei” haavahavaha ra, i roto i te iri o to ˈna upoo.

Ua maere rahi roa o Pilato i te tura e te puai nehenehe mau ta Iesu i faaite i mua i taua hamani-ino-raa ra, e ua tamata faahou oia i te faaora ia ˈna. Ua na ô atura oia i te tiaa taata: “Inaha! i aratai mai nei au ia ˈna ia outou nei, ia ite outou e, aita roa o ˈna ino i itea ia ˈu.” Peneiaˈe paha e te manaˈo ra oia e ia ite ratou ia Iesu tei haamauiuihia, e mǎrû mai ïa to ratou mafatu. A tia noa ˈi o Iesu i mua i te nahoa taata aroha ore, e to ˈna hei taratara i nia i te upoo ma te vehîhia i te ahu vareau, e to ˈna mata te tahe noa ra te toto e tei mauiui roa, ua parau atura o Pilato e: “A hiˈo mai na i taua taata nei!”

Noa ˈtu e ua pepe roa oia e ua rohirohi roa, te tia noa ra te taata faahiahia roa ˈˈe o te aamu taata nei, oia mau te taata rahi roa ˈˈe tei ore i ora aˈenei! Oia mau, ua faaite o Iesu i te tura aueue ore e te hau, tei riro ei tapao no te hoê hanahana rahi ta Pilato iho i faˈi, inaha, te faaite ra ta ˈna mau parau i to ˈna faatura e to ˈna aroha. Ioane 18:39–19:5; Mataio 27:15-17, 20-30; Mareko 15:6-19; Luka 23:18-25.

▪ Mea nafea to Pilato imiraa i te ravea ia tuuhia o Iesu?

▪ Mea nafea to Pilato tamataraa i te faatiamâ mai ia ˈna i te hopoia?

▪ Eaha te huru ruturaa e ravehia na?

▪ Mea nafea to Iesu faaoooraahia i muri aˈe i to ˈna papairaahia?

▪ Eaha te tahi atu tamataraa ta Pilato i rave no te tuu atu ia Iesu?