Pene 22

E maha pǐpǐ tei titauhia mai

I MURI aˈe i te tamataraahia e taparahi ia ˈna i to ˈna oire ra i Nazareta, ua haere atura o Iesu i te oire no Kaperenaumi i pihai iho i te Miti o Galilea. Ua faatupu te reira i te tahi atu parau tohu a Isaia. O te parau tohu ïa e faaite ra e e ite te feia no Galilea e ora ra i te pae miti i te hoê maramarama rahi.

A tamau noa ˈi o Iesu i te faaanaana i to ˈna maramarama na roto i te pororaa i te Basileia i tera vahi, ua ite atura oia e maha o ta ˈna mau pǐpǐ. Ua haere ratou na muri ia ˈna na mua ˈtu teie râ, ua rave faahou ratou i ta ratou ohipa ravaai i to ratou hoˈiraa mai mai Iudea mai e o Iesu. E au ra e te imi ra Iesu ia ratou i teie nei, inaha, ua tae i te taime no te haaputuputu mai i te feia tauturu itoito e te haapao maitai o ta ˈna e faaineine no te rave i te taviniraa ia reva ˈtu oia.

Te haere noa ra o Iesu na te pae miti a ite ai oia ia Simona Petero e to ˈna mau hoa e horoi ra i ta ratou upeˈa, e ua haere atura oia ia ratou ra. Ua paiuma ˈtura oia i roto i te pahi o Petero e ua ani atura ia ˈna ia faaatea ê atu i te fenua. I to ratou atea-rii-raa, ua parahi ihora Iesu i roto i te pahi e ua haamata ˈtura i te haapii i te feia rahi roa i te pae miti.

I muri iho, ua faaue atura Iesu ia Petero e: “Ho atu i roto i te vahi moana e tuu i ta outou upeˈa i te hoê haroa.”

Ua pahono atura Petero e: “E te Fatu, i haa noa na matou e ao noa aˈenei te rui, e aore roa i noaa, e tuu râ vau i te upeˈa o oe i parau mai na.”

Ua tuu atura ratou i te upeˈa e no te rahi o te iˈa, haamata aˈera te upeˈa i te motumotu. Ua tarape oioi taua mau taata ra i to ratou mau hoa i roto i te pahi i pihai noa ˈtu, ia haere mai e tauturu ia ratou. Ua î roa ˈˈera na pahi e piti nei i te iˈa e ua haamata aˈera i te tomo. Ite atura hoi Petero i te reira, tipapa ihora i mua ia Iesu, i te na ôraa ˈtu e: “E haere ê oe e te Fatu, e taata hara hoi au.”

Ua pahono atura Iesu e: “Eiaha e mǎtaˈu, i teie nei, e taata [ora] ta oe e noaa.”

Ua titau atoa o Iesu i te taeae o Petero o Anederea. Ua na ô atura oia ia raua: “Apee mai ia ˈu, e faariro vau ia outou ei ravaai taata.” Ua titau-atoa-hia to ratou mau hoa taiˈa o Iakobo raua Ioane, na tamarii a Zebedaio, e ua farii atoa raua ma te ore e haamarirau. Ua faarue aˈera taua mau taata e maha ra i ta ratou ohipa ravaai e riro mai nei ei mau pǐpǐ matamua e maha o tei apee ia Iesu ma te haapao maitai e te itoito. Luka 5:1-11; Mataio 4:13-22; Mareko 1:16-20; Isaia 9:1, 2.

▪ No te aha Iesu i faaue atu ai i ta ˈna mau pǐpǐ ia pee mai ia ˈna, e o vai ma taua mau pǐpǐ ra?

▪ Eaha te semeio tei haamǎtaˈu ia Petero?

▪ Ua titau o Iesu i ta ˈna mau pǐpǐ ia rave i teihea huru ravaai?