Pene 130

I te Miti o Galilea

TE HOˈI ra te mau aposetolo i Galilea, mai ta Iesu i faaue mai ia ratou na mua ˈtu. Aita râ i papu maitai ia ratou e eaha ta ratou ohipa e rave i reira. I muri aˈe, ua parau atura o Petero ia Toma, ia Nataniela, ia Iakobo e to ˈna taeae o Ioane, e e piti aposetolo ê atu e: “Te haere nei au e ravaai.”

Ua parau maira na feia e ono e: “E haere atoa tatou.”

I taua po taatoa ra, aita ta ratou iˈa i noaa mai. Teie râ, a tia mai ai te mahana, ua fa maira o Iesu i te pae tahatai, aita râ te mau aposetolo i ite o Iesu tera. Ua pii atura oia: “E te mau tamarii ra, e maa ta outou?”

Ua pahono maira ratou e: “Aita.”

Ua na ô atura oia: “A tuu na te upeˈa i te tau atea o te pahi na, e noaa ïa ta outou.” I to ratou tuuraa ˈtu i te upeˈa, aita ratou i nehenehe e huti mai i nia no te mea ua î roa i te iˈa.

Ua tuô aˈera o Ioane e: “O te Fatu.”

I to ˈna faarooraa i teie parau, ua oomo aˈera o Petero i to ˈna ahu, o ta ˈna hoi i tatara na mua ˈtu, e ua ouˈa ˈtura i roto i te miti. Ua aˈu atura oia e 90 metera e tae roa ˈtu i te pae miti. Ua apee maira te tahi mau aposetolo ia ˈna na nia i te poti iti, ma te ume mai i te upeˈa tei î roa i te iˈa.

I to ratou tapaeraa ˈtu i te hiti miti, te ama noa ra te hoê auahi, e te iˈa i nia iho, e te pane. Ua na ô atura o Iesu: “A rave mai na i te fanu iˈa i ta outou iˈa i noaa na.” Ua haere atura o Petero e ua ume maira i te upeˈa i tahatai. E 153 iˈa rahi i roto!

Ua titau maira o Iesu ia ratou: “A haere mai a amu.”

Aita hoê i ani atu e, “O vai oe?” no te mea ua ite pauroa ratou e o Iesu tera. O te hituraa o te taime to Iesu faraa mai i muri aˈe i to ˈna tia-faahou-raa, e o te toru o te taime i mua i te pǔpǔ o te mau aposetolo. Ua haapao ihora o Iesu i te tamaaraa, ma te horoa ˈtu na ratou tataitahi i te tahi pane e te iˈa.

A paia ˈi ratou, ua ani atura o Iesu, o te hiˈo noa ra paha i te rahiraa iˈa i noaa mai, ia Petero e: “E Simona a Iona e, te rahi na to oe hinaaro ia ˈu i teie?” Eita e ore e te hinaaro ra oia e parau e, Mea faufaa aˈe anei teie toroa ravaai i te ohipa o ta ˈu i faaineine na oe ia rave?

Ua pahono maira o Petero e: “Ua ite oe e, te hinaaro atu nei au ia oe.”

Ua parau atura o Iesu: “A faaamu i tau mau arenio.”

No te piti o te taime, ua ani faahou atura oia e: “E Simona a Iona e, te hinaaro na oe ia ˈu?”

Ua pahono maira o Petero ma te aau mehara e: “E te Fatu, e, ua ite oe e, te hinaaro atu nei au ia oe.”

“A tiai i tau mau mamoe,” o ta Iesu ïa i faaue faahou.

E, no te toru o te taime, ua ani oia e: “E Simona a Iona e, te hinaaro na oe ia ˈu?”

Ua oto ihora o Petero. Te manaˈo ra paha o ˈna e te feaa ra o Iesu no nia i to ˈna here. Inaha, i to Iesu haavaraahia aita i maoro aˈenei no to ˈna ora, ua huna hoi o Petero ia ˈna e toru taime. No reira o Petero i parau ai e: “E te Fatu, aore roa e mea toe i te itea ia oe, ua ite oe e, te hinaaro atu nei au ia oe.”

E no te toru o te taime, ua faaue atura o Iesu e: “A faaamu i tau mau mamoe.”

No reira, ua faaohipa o Iesu ia Petero ei hiˈoraa papu maitai no te haaputapû i te tahi pae no nia i te ohipa o ta ˈna e hinaaro ra ia ratou ia rave. Fatata roa o ˈna i te faarue mai i te fenua nei, e te hinaaro ra oia ia rave ratou i te upoo no te haapiiraa ˈtu i te feia o te arataihia mai i roto i te aua mamoe a te Atua.

Mai ia Iesu i ruuruuhia e i taparahihia no te mea ua rave oia i te ohipa ta te Atua i faaue mai ia ˈna ia rave, i teie nei, te faaite ra oia e e faaoromai atoa o Petero i teie huru tupuraa. Ua na ô atura o Iesu ia ˈna: “I to apîraa ra, ua tatia oe ia oe iho, e hahaere ihora oe i ta oe ra vahi hinaaro; ia ruhiruhia râ oe, na oe e faatoro i to rima, e na te tahi ê e ruuruu ia oe, e a hopoi atu ai hoi ia oe i te vahi hinaaro-ore-hia e oe ra.” Noa ˈtu te pohe mauiui mau e tiai maira ia Petero, ua faaitoito atura o Iesu ia ˈna e: “A pee mai ia ˈu.”

Ua fariu maira o Petero i muri, ite atura ia Ioane e ani ihora: “E te Fatu, eahahia hoi teie nei taata?”

Ua pahono atura o Iesu e: “I hinaaro vau i te vaiiho ia ˈna e ia tae noa mai au ra, eaha ta oe i reira? e pee mai oe ia ˈu.” E rave rahi o te mau pǐpǐ o tei manaˈo e te hinaaro ra o Iesu e parau e eita roa ˈtu te aposetolo Ioane e pohe. Teie râ, mai ta te aposetolo Ioane e faataa ˈtu i muri iho, aita o Iesu i parau e eita roa ˈtu o ˈna e pohe, ua na ô noa ˈtu râ oia e: “I hinaaro vau i te vaiiho ia ˈna e ia tae noa mai au ra, eaha ta oe i reira?”

Ua faaite atoa o Ioane i muri aˈe i te tahi parau faufaa mau: “E rave rahi â ta Iesu peu i rave, ahiri i hope atoa i te papaihia, te manaˈo nei au, e ore e tia i to te ao atoa nei ia farii mai i taua mau buka ra, ahiri i papaihia.” Ioane 21:1-25; Mataio 26:32; 28:7, 10.

▪ Eaha te mea e faaite ra e aita te mau aposetolo i papu maitai no nia i te ohipa o ta ratou e rave i Galilea?

▪ Mea nafea to te mau aposetolo iteraa ia Iesu i te Miti o Galilea?

▪ Ehia taime to Iesu faraa mai mai to ˈna tia-faahou-raa mai â?

▪ Mea nafea to Iesu haapapuraa i te ohipa o ta ˈna e hinaaro ra i te mau aposetolo ia rave?

▪ Mea nafea to Iesu faaiteraa i te huru poheraa o Petero?

▪ Eaha te parau a Iesu no nia ia Ioane ta te mau pǐpǐ e rave rahi i ore i taa maitai i te auraa?