Pene 66

I te oroa o te patiaraa tiahapa ra

I ROTO i na matahiti e toru aore ra fatata roa i muri aˈe i to ˈna bapetizoraahia, ua tui te roo o Iesu. E rave rahi tausani taata tei ite atu i ta ˈna mau semeio e te mau aamu o ta ˈna mau ohipa, ua parare te reira i roto i te taatoaraa o te fenua. Ua haamata ihora te mau ati Iuda o tei haaputuputu mai i Ierusalema no te oroa patiaraa tiahapa i te imi haere ia ˈna. Ua uiui noa ihora ratou ratou iho e: “Teihea oia nei?”

Ua riro aˈera Iesu ei tumu no te hoê aimârôraa. Te parau nei te tahi e: “E taata maitai oia.” Te na ô nei hoi te tahi pae e: “E ere; te haavare nei oia i te taata.” E rahi roa ˈˈera te omuhumuhuraa mai te reira i te mau mahana matamua o te oroa. Aita râ e taata i faaite tahaa i to ˈna tiaraa e tei te pae o Iesu oia, no te mea e mǎtaˈu rahi to ratou i te mau faatere haapaoraa ati Iuda ra.

E tae aˈera i ropu i taua oroa ra, ua tae maira Iesu. Haere atura oia i roto i te hiero ra e i reira ra, haamaere rahi atura oia i te taata i ta ˈna huru haapiiraa nehenehe mau. Te maere nei hoi te mau ati Iuda, i te mea e aore Iesu i haere noa ˈˈe i te haapiiraa a te mau rabi, na ô noa ˈˈera ratou e: “No hea ra te ite o teie nei taata, aore hoi oia i haapiihia?”

Ua faataa maira Iesu ia ratou e: ‘E ere i ta ˈu ta ˈu e haapii nei, na ˈna râ, na tei tono mai ia ˈu nei. O tei hinaaro maite i te haapao i to ˈna ra hinaaro, e ite ïa i ta ˈu e haapii nei e na te Atua, aore ra na ˈu iho.’ Ua niu o Iesu i te taatoaraa o ta ˈna haapiiraa i nia i te ture a te Atua. E mea papu iho â ïa i te taatoaraa o te taata e ua imi oia, eiaha i to ˈna hinuhinu, te hinuhinu râ o te Atua. Ua ani atura Iesu ia ratou e: “E ere anei o Mose tei tuu mai i te ture na outou ra?” E, ma te parau faahapa, ua na ô atura oia e: “Aita roa te hoê o outou i haapao i taua ture ra.”

Ua ani faahou atura oia ia ratou e: “Eaha outou e titau mai ai ia ˈu nei e taparahi?”

Aita roa te feia e faaroo ra ia ˈna, e mau taata ratere paha no taua oroa ra, i ite noa ˈˈe i taua tutavaraa ra no te taparahi ia Iesu. I to ratou hiˈoraa, e mea tano ore roa ia hinaarohia e taparahi i te hoê taata haapii faahiahia mau mai ia ˈna te huru. No reira ratou i manaˈo ai e e mea tano ore te feruriraa o Iesu i nia i te reira tuhaa. Ua parau maira ratou ia ˈna e: “E demoni to oe, o vai tei titau atu ia oe e taparahi?”

Aita paha te feia rahi i ite e e hinaaro papu to te mau raatira o te haapaoraa ati Iuda e taparahi ia Iesu. Hoê matahiti e te afa na mua aˈe, i to Iesu faaoraraa i te hoê taata i te mahana sabati, ua tamata atoa ratou i te taparahi ia ˈna. Ua hinaaro Iesu i teie nei, e haaferuri ia ratou no to ratou manaˈo hape, ua na ô atura oia e: “I peritomehia te taata i te mahana sabati ia ore ia faahapahia te ture a Mose, te riri mai nei hoi outou ia ˈu i te mea vau i faaora hua i te hoê taata i te sabati? Eiaha e haapao i te huru i rapae au aˈe, e haapao râ i te parau-tia.”

Ua uiui noa ihora te feia no Ierusalema ratou ratou iho, ratou tei ite i taua huru tupuraa ra, i te na ôraa e: “E ere anei teie te taata ta ratou e imi e taparahi? E inaha! te parau faaite noa nei oia, e aore roa ratou e parau noa ˈtu ia ˈna: ua ite mau anei te feia rarahi nei e, o te Mesia mau teie?” Ua faataa maira teie feia no Ierusalema i muri iho e no te aha ratou e ore ai e tiaturi e o Iesu hoi te Mesia: “Ua ite râ tatou i te vahi no reira mai teie nei taata; ia tae mai râ te Mesia ra, aore roa e taata i ite i te vahi no reira mai oia ra.”

Ua pahono maira Iesu ia ratou e: “Te ite na outou ia ˈu e te vahi no reira mai au nei aore au i haere noa mai, area tei tono mai ia ˈu nei, e parau mau ta ˈna, aore outou i ite ia ˈna. Area vau, ua ite au ia ˈna, mai reira hoi au nei, e na ˈna hoi au i tono mai nei.” I reira, ua imi atura ratou i te haru ia ˈna, no te tuu paha i roto i te fare tapearaa aore ra no te taparahi haapohe ia ˈna. Aita râ i tia ia ratou, no te mea aitâ te hora poheraa o Iesu i tae mai.

Tera râ, e rave rahi te tiaturi ra ia Iesu, e e rave rahi hoi tumu no te reira. Aita anei oia i haere na nia i te miti, i faataime i te mau mataˈi, i faatupu i te semeio na roto i te faaamuraa tau tausani taata i tau pane e i tau iˈa anaˈe ra? Aita anei oia i faaora i te maˈi, i faahaere i te hapepa, i faaora i te matapo e te lepera, e i faatia atoa i te feia pohe ra? Ua parau noa ˈˈera ratou ratou iho e: “Ia tae mai te Mesia ra e rahi atu anei ta ˈna tapao e rave i ta teie nei taata i rave?”

I to te mau Pharisea iteraa i te taata i te mutamutaraa ia ˈna no te reira, ua tono atura ratou e te mau tahuˈa rarahi ra i te feia toroa e haru ia Iesu. Ioane 7:11-32.

▪ Eaha te taime o Iesu i tae mai ai i te oroa, e eaha te mau parau e faahitihia ra no ˈna?

▪ Eaha te tumu vetahi i parau ai e e demoni to Iesu?

▪ Eaha te manaˈo o te feia no Ierusalema no nia ia Iesu?

▪ No te aha te rahiraa o te taata i tiaturi ai ia Iesu?