Pene 122

Mai ia Pilato e tae roa ˈtu ia Heroda ra e i mua faahou ia Pilato

NOA ˈTU e aita o Iesu i tamata i te huna ia Pilato e e arii oia, ua faataa ˈtu oia e eita to ˈna Basileia e haamǎtaˈu ia Roma. “E ere i to teie nei ao to ˈu basileia,” o ta Iesu ïa e parau ra. “Ahiri no teie nei ao to ˈu basileia, ua faaitoito ïa tau mau tavini ia ore au ia tuuhia ˈtu i te rima o te ati Iuda; e ere râ to ˈu basileia i to ǒ nei.” E e toru taime to Iesu haapapuraa e e Basileia to ˈna, noa ˈtu e e ere no te fenua nei.

Ua mârô faahou atura o Pilato ia ˈna: “O te Arii maori oe?” Oia hoi, e arii anei oe noa ˈtu e e ere to oe Basileia no teie nei ao?

Ua faaite atura o Iesu ia Pilato e ua tano ta ˈna parau, i to ˈna pahonoraa ˈtu e: “Te parau maira oe e e Arii au. I fanau mai ai au, e i haere mai ai hoi au i te ao nei, e faaite i te parau mau. No te te parau mau oia ra, e faaroo ïa i tau reo.”

Oia mau, te tumu matamua o te oraraa o Iesu i nia i te fenua nei, o te faaiteraa ïa i “te parau mau,” te parau mau iho â râ no nia i to ˈna Basileia. Ua ineine o Iesu i te tapea i to ˈna haapao maitai i taua parau mau nei e tae noa ˈtu i te pohe. Noa ˈtu e ua ani atu o Pilato e: “Eaha te parau mau?” aita o ˈna i tiai i te tahi atu haamaramaramaraa. Ua ravai te parau o ta ˈna i faaroo no te faaoti i te haavaraa.

Ua hoˈi faahou maira o Pilato i te tiaa taata e tiai ra i rapae i te aorai. Tei pihai iho o Iesu ia ˈna, e ua parau atura oia i te mau tahuˈa rahi e te feia i apee mai ia ratou e: “Aore roa e hara e itea e au i teie nei taata.”

No to ratou riri i taua faaotiraa ra, ua haamata ihora te tiaa taata i te onoono ma te parau e: “Te tiarepu nei oia i te taata, i te parau ta ˈna e haapii i Iudea atoa nei mai Galilea mai â, e tae roa mai nei i teie nei vahi.”

Ua maere paha o Pilato i te haerea maamaa mau o te mau ati Iuda. No reira, a tuôtuô noa ˈi te mau tahuˈa rahi e te feia paari, ua fariu aˈera o Pilato i nia ia Iesu e ua ani atura: “Aita oe i faaroo aˈe i te rahi o te hara ta ratou i pari mai ia oe nei?” Aita râ Iesu i tamata noa ˈˈe i te pahono atu. Ua maere roa o Pilato i te iteraa e aita o Iesu i aueue i mua i te mau pariraa ino mau.

I to ˈna iteraa e e taata no Galilea o Iesu, ua manaˈo atura o Pilato e tera te ravea no te ape i teie hopoia. Tei Ierusalema o Heroda Anetipa (te tamaiti a Heroda Rahi), no te oroa Pasa, no reira, ua tono atura o Pilato ia Iesu ia ˈna ra. Ua faaue hoi o Heroda Anetipa e ia tâpûhia te upoo o Ioane Bapetizo na mua ˈtu, e ua riaria roa oia i to ˈna faarooraa i te mau semeio ta Iesu i rave, no te mea ua mǎtaˈu oia e o Iesu, o Ioane ïa tei faatiahia mai mai te pohe mai.

I teie nei, ua oaoa roa o Heroda i te mea e e farerei oia ia Iesu. E ere no te mea e te haapeapea ra oia no te maitairaa o Iesu aore ra te hinaaro mau ra oia e ite e e parau mau anei te mau pariraa i parihia i nia ia ˈna ra. Tera râ, te hinaaro noa ra o ˈna e ite ia ˈna e ia faatupu atoa o Iesu i te tahi semeio.

Aita râ o Iesu i hinaaro e faatia i te hinaaro o Heroda. Inaha, a uiui noa ˈi o Heroda ia ˈna, ua mamû noa o Iesu. Aita ˈtura o Heroda i taa faahou e nafea râ, e ua faaooo aˈera oia e ta ˈna mau faehau ia Iesu. Ua tuu atura ratou i te tahi ahu anaana i nia ia ˈna e ua faaooo aˈera ia ˈna. I muri iho, ua faahoˈi atura ratou ia ˈna ia Pilato ra. Inaha, ua riro maira o Heroda raua o Pilato, tei riro na hoi ei enemi i mutaa ihora, ei mau hoa.

I to Iesu hoˈiraa mai, ua pii atura o Pilato i te mau tahuˈa rahi, te mau raatira ati Iuda, e te feia paatoa e ua na ô atura: “I aratai mai nei outou i teie nei taata ia ˈu nei mai te mea e, e orure hau; e inaha, i haava iho nei au ia ˈna i mua i to outou aro e aore roa a ˈna e hara i itea e au, i te mau mea atoa ta outou e pari ia ˈna nei: aita atoa hoi i itea ia Heroda, ua tono hoi au ia outou ia ˈna ra, aita roa a ˈna hara i rave e au ai ia ˈna te pohe. E teie nei, e papai au ia ˈna, a tuu noa ˈtu ai.”

Inaha, no te piti o te taime, ua faˈi o Pilato e aita ta Iesu e hara. Te hinaaro ra hoi oia e tuu ia Iesu, no te mea ua taa ia ˈna e no to ratou pohehae i tuu mai ai te mau tahuˈa ia ˈna. A tutava noa ˈi o Pilato i te tuu ia Iesu, ua noaa maira ia ˈna i te tahi atu tumu no te na reira. A parahi ai oia no te haava, ua faatae mai ta ˈna vahine i te hoê poroi na ˈna ra: “Eiaha roa oe e rave iti noa ˈtu i tena na taata parau-tia, e ati rahi hoi to ˈu i te moemoeâ [eita e ore e no ǒ mai i te Atua] ia ˈna i nauanei.”

Nafea râ o Pilato ia tuu i teie taata parau-tia, ua ite hoi oia e tera te tia ia ˈna ia rave? Ioane 18:36-38; Luka 23:4-16; Mataio 27:12-14, 18, 19; 14:1, 2; Mareko 15:2-5.

▪ Mea nafea to Iesu pahonoraa i te uiraa no nia i to ˈna tiaraa arii?

▪ Eaha “te parau mau” ta Iesu i faaite i roto i te roaraa o to ˈna oraraa i nia i te fenua nei?

▪ Eaha te faaotiraa o te haavaraa a Pilato, mea nafea to te taata fariiraa i te reira, e eaha ta Pilato i rave ia Iesu?

▪ O vai o Heroda Anetipa, no te aha oia i oaoa ˈi i te farereiraa ia Iesu, e eaha ta ˈna i rave i nia ia ˈna?

▪ No te aha o Pilato e hinaaro ai e tuu ia Iesu?