Pene 125

Mauiui pohe i nia i te pou

NA MURI iho ia Iesu, ua aratai-atoa-hia maira e piti feia eiâ e taparahi. Aita i atea roa i te oire, ua tapea ihora te nahoa taata i te vahi i parauhia te Golagota, aore ra te vairaa apu upoo ra.

Ua tatarahia ˈtura te ahu o te feia i tapeahia. Ua horoahia maira te uaina tei anoihia i te raau avaava. Na te mau vahine no Ierusalema paha i faaineine i te reira, e ua farii to Roma e ia horoahia teie inu tamǎrû i te mauiui na te feia e patitihia ˈtu i nia i te pou. Teie râ, i to ˈna tamataraa i te reira, aita oia i farii i te inu. No te aha? Eita e ore e te hinaaro ra oia e ia vai ara noa oia i taime o te tamataraa rahi hopea o to ˈna faaroo.

Ua faaetaetahia o Iesu i teie nei i nia i te pou e to ˈna rima i nia ˈˈe i to ˈna upoo. Ua patiti aˈera te mau faehau i te mau naero rarahi i nia i to ˈna rima e i nia i to ˈna avae. Ua fefe roa oia i te mauiui a puta ai to ˈna iˈo e to ˈna mau uaua i te naero. Ua faatiahia ˈtura te pou i nia, e ua rahi atu â te mauiui, no te mea no te teiaha o te tino, te hutihia ra ïa i nia i te mau pepe i te vahi i patitihia i te naero. Maoti râ i te faaino ia ratou, ua pure atura o Iesu no te mau faehau Roma i te na ôraa e: “E tau Metua, e faaore mai i ta ratou hara, aore hoi ratou i ite i ta ratou e rave nei.”

Ua tuu o Pilato i nia i te pou i te hoê iri i papaihia i nia iho ra: “O Iesu o Nazareta te Arii o te ati Iuda ra.” E au ra e ua papai oia i teie parau eiaha noa no to ˈna faatura ia Iesu, no to ˈna atoa râ inoino i te mau tahuˈa ati Iuda i te mea e ua faahepo ratou ia ˈna ia faautua ia Iesu i te utua pohe. Ia nehenehe te mau taata atoa e taio i te parau i nia i teie iri, ua papai o Pilato na roto e toru reo—te reo hebera, te reo latino i haamanahia, e te reo heleni i matauhia.

Ua ahoaho te mau tahuˈa rahi, e oia atoa o Kaiapha raua o Ana. Ua faaino hoi teie huru faaiteraa i to ratou upootiaraa. No reira ratou i patoi ai e: “Eiaha e papaihia e, O te Arii o te ati Iuda, e na ô râ e, Ua parau oia e, O vau te Arii o te ati Iuda.” No to ˈna inoino i te mea e ua faaohipa te mau tahuˈa ia ˈna, ua pahono aˈera o Pilato ma te riri e: “O tei papaihia e au ra, ua papaihia â ïa.”

Ua haaputuputu aˈera te mau tahuˈa, e tae noa ˈtu i te tiaa rahi taata, i te vahi taparahiraa taata, e ua patoi ihora te mau tahuˈa i te faaiteraa i nia i te iri. Ua faahiti faahou ratou i te parau haavare tei horoahia na mua ˈtu i te haavaraa a te Sunederi. No reira, eita iho â ïa e maerehia ia faaino te feia e haere ra na reira, ma te tairiiri i to ratou upoo ma te faaooo i te na ôraa e: “E te vavahi i te hiero e, e ua rui toru anaˈe ua tia faahou, a faaora ia oe iho na. O ta te Atua Tamaiti oe na, a pou mai i raro faarue atu i te [pou haamauiuiraa].”

Ua tâhitohito maira te mau tahuˈa rahi e to ratou mau apee faaroo ra i te na ôraa e: “Ua faaora oia ia vetahi ê; eita e tia ia faaora ia ˈna iho. O te arii oia o Iseraela nei ra, a pou mai oia i teie nei faarue atu i te [pou haamauiuiraa], e na tatou e faaroo atu ia ˈna. I tiaturi hoi oia i te Atua, e te ite maira te Atua ia ˈna, a faaora oia ia ˈna i teie nei; ua parau hoi oia e, E Tamaiti au na te Atua.”

Ua pee atoa ˈtura te mau faehau i teie huru raveraa e ua faaooo atura ia Iesu. Ua horoa ˈtura ratou i te tahi vinega na ˈna, ma te tuu roa ˈtu paha i pihai iho i to ˈna vaha tei mǎrô roa. Ua na ô atura ratou ma te faaooo e: “O te Arii oe o te ati Iuda ra, a faaora ia oe iho.” Ua tae roa atoa hoi te feia eiâ—hoê i patitihia i te pae atau o Iesu, e te tahi i to ˈna pae aui—i te faaooo ia ˈna. A feruri na! Ua faaoromai mau â te taata hau aˈe i te faahiahia tei ora aˈenei i nia i te fenua nei, oia mau, tei apiti atu i te Atua ra o Iehova no te poiete i te mau mea atoa, i teie hamani-ino-raa rahi!

Ua rave maira te mau faehau i te ahu rapaeau o Iesu e ua tufa ˈtura e maha tuhaa. Ua tuu kelero ihora ratou no te ite e o vai te tano i teie ahu. Area te ahu na roto ra, mea faufaa roa ˈtu ïa no te mea aita e niraraa to nia iho. No reira, ua parau ihora te mau faehau ratou ratou iho e: “Eiaha tatou e haehae, e faakelero râ ia itea te fatu.” No reira, ma te ore e ite, ua faatupu aˈera ratou i te papai e na ô ra e: “Ua tufa ihora ratou i tau ahu no ratou iho, e ua tufa kelero ihora hoi ratou i tau ahu pu.”

I muri iho, ua farii te hoê o na feia eiâ e e arii mau â o Iesu. No reira, ma te aˈo atu i to ˈna hoa, ua na ô atura oia e: “Aita o oe mǎtaˈu i te Atua tei pohe atoa hoi oe hoê â huru? E mea tia râ to tâua pohe, o te utua mau hoi teie i ta tâua i rave; area teie nei taata, aita roa a ˈna e parau ino.” Ua fariu atura oia i nia ia Iesu, na ô atura: “E haamanaˈo mai oe ia ˈu ia tae oe i to oe ra basileia.”

Ua pahono maira Iesu e: ‘Oia mau, te parau atu nei au ia oe i teie mahana e: Ei te paradaiso oe e o vau atoa nei.’ E tupu teie parau tǎpǔ ia faatere mai Iesu ei Arii i nia i te raˈi e ia faatia faahou mai oia i teie taata rave hara tei tatarahapa ra no te ora i roto i te paradaiso i nia i te fenua nei, ta te feia i ora mai i Aramagedo e to ratou mau hoa e oaoa roa i te atuatu. Mataio 27:33-44; Mareko 15:22-32; Luka 23:27, 32-43; Ioane 19:17-24.

▪ No te aha o Iesu i patoi ai i te inu i te uaina i anoihia i te raau avaava?

▪ No te aha te hoê iri papairaa i tuuhia ˈi i nia i te pou o Iesu, e eaha ˈtura te aimârôraa i tupu i rotopu ia Pilato e te mau tahuˈa rahi?

▪ Eaha te tahi atu hamani-ino-raa i ravehia i nia ia Iesu i nia i te pou, e eaha te tumu?

▪ Mea nafea te parau tohu i te tupuraa no nia i te ohipa e ravehia e te ahu o Iesu?

▪ Eaha te tauiraa i ravehia e te hoê o na feia eiâ, e mea nafea o Iesu e faatupu ai i ta ˈna aniraa?